Month: August 2018

Ази Номхон Далайн Бүсийн орнуудын Татварын мэргэшсэн зөвлөхүүдийн холбооны энэ оны ээлжит хурал ирэх сарын 12-оос 14-ны өдрүүдэд нийслэл хотод зохион байгуулагдах гэж байна.

Энэ удаагийн хурлын гол онцлог нь Дэлхийн татварын зөвлөхүүдийн Глобал форумыг үүсгэн байгуулж байгааг тус хурлын үеэр тунхаглах юм. Уг тунхаглалд гарын үсэг зурах ажиллагаа Улаанбаатар хотод хийгдэх учир “Улаанбаатарын тунхаг бичиг” гэж нэрлэж буй аж.

“Улаанбаатарын тунхаг бичиг”-ийг ирэх сарын 12-ны өдөр Гадаад харилцааны яаманд зохион байгуулахаар болжээ.

Ази Номхон Далайн Бүсийн орнуудын Татварын мэргэшсэн зөвлөхүүдийн холбооны хурлаар XXI дүгээр зууны олон улсын татварын чиг хандлага, шинэчлэл хүрээнд хийгдэж байгаа олон шинэ ойлголтууд, нэр томъёонууд, мөн татварын шинэчлэлд дэлхий нийтийн болон тухайн улс орнуудын үүрэг роль ямар байх зэрэг хүрээнд явагдах юм.

Гурван “I”. Ирэх долоо хоногт ОХУ-ын Сочи хотноо дэлхийн 100 шахам улсын санхүүгийн зохицуулагч байгууллага болон Төв банкуудын төлөөлөгчид хуран цуглаж, “Innovation. Inclusion. Impact” буюу гурван “I”-г өргөн хүрээнд хэлэлцэх гэж байна. “Инноваци. Хүртээмж. Нөлөөлөл” гэсэн харилцан хамаарал бүхий гурван асуудлыг Дэлхийн бодлогын форум (ДБФ, Global Policy Forum, GPF) үндсэн сэдвээ болгож дэвшүүлэн тавьсан нь хүн төрөлхтний санхүүгийн хөгжлийн нийтлэг чиг хандлага эдгээр хэв шинжид түлхүү төвлөрөх болсныг илтгэн харуулж буй юм.

Эгнээндээ 95 улс орны нөлөө бүхий 110 гаруй санхүүгийн зохицуулагч байгууллагыг нэгтгэн, хүртээмжийн бодлогыг олон улсын хэмжээнд зангидан хэрэгжүүлдэг дэлхийн хамгийн том нэгдэл болох Санхүүгийн хүртээмжийн нийгэмлэг (СХН, Alliance for Financial Inclusion, AFI) ДБФ-ыг жил бүр зохион байгуулж байна. ДБФ-аар санхүүгийн үйлчилгээг илүү нээлттэй, хүртээмжтэй болгоход чиглэсэн бодлогыг шийдлүүдийг зөвшилцөн баталж, тэдгээрийг үр дүнтэй хэрэгжүүлэх, хөгжлийг хурдасгахад нийгэмлэгийн гишүүн байгууллагууд идэвхтэй хамтран ажилладаг юм. Сочи хотноо ОХУ-ын Төв банктай хамтран зохион байгуулж буй энэ жилийн ДБФ бол нийгэмлэгийн болон форумын 10 жилийн ойтой давхцаж буйгаараа ач холбогдолтой бөгөөд 600 гаруй төлөөлөгч оролцохоо нэгэнт мэдэгдээд байна.

СХН-ийг Захирлуудын зөвлөл удирдах бөгөөд есөн жинхэнэ, хоёр ажиглагч гишүүний бүрэлдэхүүтэй тус зөвлөлийн жинхэнэ гишүүнээр Бразил, Бангладеш, ОХУ, Гана, Египет, Самоа, Коста Рика болон Баруун Африкийн улсуудын Төв банкны тэргүүн, дэд тэргүүн санхүүгийн зохицуулагч байгууллагын удирдлагуудтай хамт Монгол Улсын Санхүүгийн зохицуулах хорооны дарга, доктор С.Даваасүрэн ажиллаж байна. Зөвлөл нь Төсөв санхүүгийн, Олон улсын стандарт ба бодлогын, Жендэр ба эмэгтэйчүүдийн санхүүгийн оролцооны хороод, Зөвлөхүүдийн бүлэг, Хандивлагчдын зөвлөлдөх зөвлөлийн дэмжлэгтэйгээр бодлого тодорхойлох, түүнийг хэрэгжүүлэхэд гишүүн байгууллагуудын оролцоог хангах, хамтын шийдвэрийг баталгаажуулах чиг үүргийг хэрэгжүүлдэг юм. Мөн СХН нь үндсэн зургаан ажлын хэсгийн бүтцээр ажилладаг бөгөөд Монгол Улсын Санхүүгийн зохицуулах хороо бүх ажлын хэсгүүдэд буюу Хэрэглэгчийн эрх ашиг ба зах зээлийн ёс зүй (Consumer Empowerment and Market Conduct, CEMC), Санхүүгийн хүртээмжийн стратеги (Financial Inclusion Strategy, FIS), Санхүүгийн хүртээмжийн өгөгдөл (Financial Inclusion Data, FID), Санхүүгийн хэрэглээний хэм хэмжээ, тэнцвэрт байдлын Олон улсын стандарт (Proportionate Application of Global Standards, GSP), Санхүүгийн цахим үйлчилгээ (Digital Financial Services, DFS), ЖДҮ-ийн санхүүжилт (SME Finance, SMEF) ажлын хэсгүүдэд ажиллаж байна. Ажлын хэсгийн бүтцээс гадна СХН-ийн гишүүн байгууллагууд бүс нутгийн зөвлөлүүдээр хамтран ажиллаж, санхүүгийн хүртээмжийн дэвшилтэт шийдэл, шинэ санаачилгыг дэмжих, дэлгэрүүлэхэд анхаарлаа хандуулдаг юм.

СХН өнөөдрийн байдлаар Африкийн, Өмнөд Америк болон Карибын тэнгисийн арлуудын, Ойрхи Дорнод болон Хойд Африкийн, Номхон далайн арлуудын гэсэн бүс нутгийн дөрвөн зөвлөлтэйгөөр ажилладаг бөгөөд өнгөрөгч зургаадугаар сард Санкт Петербург хотноо хуралдсан “Олон улсын санхүүгийн XXVII чуулган”-ы хүрээнд болсон СХН-ийн дээд хэмжээний уулзалтаар Зүүн Европ, Төв Азийн зөвлөлийг байгуулах асуудлыг хэлэлцсэн юм. Хороо болон ОХУ, Киргизстан, Армен, Беларусь, Казакстан Улсын Төв банк, санхүүгийн зохицуулах байгууллагын тэргүүн, тэргүүн дэд ерөнхийлөгч нар, мөн СХН-ийн гүйцэтгэх удирдлага оролцсон тус уулзалтаар бүс нутгийн тав дахь зөвлөл байгуулахыг дэмжиж, ДБФ-д оруулж шийдвэрлүүлэхээр болсон юм. Сочигийн ДБФ-ын шийдвэрлэх нэг чухал асуудал нь энэ байх бөгөөд шинээр Зүүн Европ, Төв Азийн бүсийн зөвлөлийг байгуулах асуудлыг санаачлагчдын нэг нь Монгол Улсын Санхүүгийн зохицуулах хороо юм.

10 дахь ДБФ-аар хөгжиж буй орнуудын хүн амын санхүүгийн хүртээмжийг нэмэгдүүлэх, үр ашгийг дээшлүүлэх, хүйсийн тэгш бус байдлыг арилгах, хил дамнасан мөнгөн гуйвуулгын өртгийг бууруулах, дүрвэгсэд, засаг захиргаагүй хүмүүсийн санхүүгийн хэрэглээний арга замыг шийдвэрлэх, зохицуулалтыг сайжруулах зэрэгт хиймэл оюун ухаан, блокчэйн болон биометрийг тодорхойлох технологиуд, үүлэн тооцоолуур, мэдээллийн санг ашиглах гэх мэт өргөн хүрээний асуудлыг хэлэлцэх юм. Форумын хүрээнд СХН-ийн Захирлуудын зөвлөл хуралдаж, хэтийн бодлого чиглэлийг хэлэлцэн, хэрэгжүүлэх стратегийг тодорхойлохоос гадна ажлын хэсгүүд, бүс нутгийн зөвлөлүүд болон хороодын уулзалт, хурлууд, мөн удирдагчдын дугуй ширээний зөвлөлгөөнүүд болно.

Цаг уур орчны шинжилгээний газраас ирүүлсэн мэдээгээр наймдугаар сарын 28-нд баруун болон зүүн аймгуудын нутгийн зарим газар, төвийн аймгуудын нутгийн баруун хэсгээр, 29-нд баруун болон төвийн аймгуудын нутгаар, 30-нд баруун болон төвийн аймгуудын нутаг, говийн аймгуудын нутгийн баруун хэсгээр, 31-нд ихэнх нутгаар бороо орох төлөвтэй байгаа юм.

Иймд иргэд, аж ахуйн нэгж, байгууллагууд амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, нэгдсэн зохион байгуулалттай явах, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, аян замд явахдаа гол мөрний усанд орохгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдэлээс урьдчилан сэргийлэхийг Баянзүрх дүүргийн Онцгой комиссоос анхааруулж байна.

Мэргэжлийн хяналтын байгууллагын хэмжээнд зохиогдож буй “Төрийн хяналт-Иргэн таны төлөө” аяны хүрээнд Хэнтий аймгийн Мэргэжлийн хяналтын газраас Хэрлэн сумын хэмжээнд үйл ажиллагаа явуулж буй СӨБ-ын байгууллагын эрхлэгч, дотоод хяналтын ажилтнуудтай уулзаж зөвлөмж, чиглэл өглөө. Мөн сургууль, цэцэрлэгийн орчимд замын тэмдэг тэмдэглэгээ болон хурд сааруулагчгүй байгууллагуудад албан тоот хүргүүлэв.

Мөн Хэрлэн голын гүүрний пост дээр малын шилжилт хөдөлгөөн, гарал үүслийн гэрчилгээ зэрэгт хяналт тавин ажиллаж байна.

Хүнс, хөдөө аж ахуй, хөнгөн үйлдвэрийн яамнаас 2018-2019 оны өвөлжилт, хаваржилтын бэлтгэл ажлыг хангах зорилгоор орон даяар “Хадлан, тэжээл-2018” уралдаан зарлажээ.

Өвс тэжээлийн нөөцийг бүрдүүлэх, хангамжийг нэмэгдүүлэх, өвөлжилтийн бэлтгэлийг хангуулах ажилд аймаг, сум, баг, хадлан тэжээл бэлтгэдэг орон нутгийн аж ахуйн нэгж, малчдын идэвхи санаачилгыг өрнүүлэхэд хөшүүрэг болох үүднээс дээрх уралдааныг зарласан хэмээн ХХААХҮЯ–аас мэдээллээ.

Өвс, тэжээлийн нөөц бүрдүүлэхдээ тухайн орон нутгийн дотоодын нөөц боломжийг бүрэн ашиглаж, шаардлагатай тохиолдолд гадны аймаг, сумтай гэрээ байгуулан бэлтгэх зэргээр төрөл бүрийн тэжээлийг бэлтгэх юм байна. Уралдаанд оролцогсод байгалийн болон таримал хадлан, сүрэл, гар, ногоон, үйлдвэрийн тэжээл,таримал нэг наст болон шимт ургамлын дарш /халгай, таана, хөмүүл, мангир, лууль/, эрдэст нэмэгдэл тэжээл давс, хужир, шүү, амьтны гаралтай тэжээл бэлтгэх боломжтой хэмээн албаныхан хэллээ.

Уралдааны болзол биелүүлж, өвөлжилтийн бэлтгэл хамгийн сайн хангасан аймаг, сум, баг, малчдын бүлэг хоршоо, фермерийг шалгаруулж өргөмжлөл, мөнгөн шагналаар шагнах аж. Тодруулбал аймгийг өргөмжлөл, 15 сая төгрөгөөр, сумыг өргөмжлөл, 10 сая төгрөгөөр, багийг өргөмжлөл, 5 сая төгрөгөөр,малчдын бүлэг хоршоог өргөмжлөл, 3 сая төгрөгөөр, фермерийг өргөмжлөл, 3 сая төгрөгөөр тус тус шагнаж урамшуулах юм байна.

Төрийн албаны сахилга хариуцлагыг чангатгах талаар авч хэрэгжүүлэх арга хэмжээний тухай Засгийн газрын тогтоолыг хэрэгжүүлэх үүрэг даалгаврыг ЗГХЭГ-аас холбогдох байгууллагын удирдлагуудад шат дараалан өгч байна.

Энэ хүрээнд ЗГХЭГ-ын дэд дарга У.Бямбасүрэн аймгийн ЗДТГ-ын дарга нартай нэгдсэн уулзалт хийж, Засгийн газрын 01 тоот албан даалгаврын хэрэгжилтийг хангаж ажилласан эсэхэд ирэх долоо хоногоос шалгалт явуулж, Засгийн газраас гаргасан тогтоолыг цаашид хэрхэн хэрэгжүүлэх талаар үүрэг чиглэл өгөв. Аймгуудын төрийн албаны хүний нөөцийн дүүргэлт, албан хаагчдын ёс зүйн байдал, төрийн өмчийн барилга байгууламж, ажлын өрөөний дотоод дэг журам, ажилчдын цаг ашиглалтад нарийвчилсан шалгалт явуулна гэв. гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Дорноговь аймгийн Зам-Үүд суманд төмөр замын ажилтан галт тэргэнд дайруулан нас баржээ.

Энэ талаар цагдаагийн байгууллагаас тодруулахад “Дорноговь аймаг Замын-Үүд сум 3 дугаар баг, Замын-Үүд-2 өртөө дээр тус өртөөний холбооны механикч ажилтай, Улаанбаатар хот Хан-уул дүүрэгт тоотод суух 29 настай эрэгтэй “Б” нь “ТЗ-ын 1109-р километрийн 2-р зуутад Олон улсын … дугаар галт тэргэнд дайруулж нас барсан байна” гэсэн мэдээллийг наймдугаар сарын 27-ны 10:30-д авч хэргийн газарт үзлэг хийж үргэлжлүүлэн шалгаж байна” гэлээ.

Мөн өнөөдөр /2018.08.28/ 04:20 цагийн үед Шанд-Түшлэг хооронд галт тэрэгний хоосон явсан толгой зүтгүүрийн А секц шатаж бүрэн зогсож гол зам гурван цаг хаагдсан тухай мэдээлэл байна.