Month: August 2018

Иргэдээс ирүүлсэн гомдлын дагуу Баянзүрх дүүргийн 19 дүгээр хорооны нутаг дэвсгэр Цайз зах орчимд нийтийн эзэмшлийн зам талбайд худалдаа үйлчилгээ эрхлэн, орчныг бохирдуулж оршин суугч, иргэдийн эрүүл мэндэд сөргөөр нөлөөлж буй байдлыг газар дээр нь шалгах, илэрсэн зөрчлийг арилгуулах, цэгцлэх, цаашид авч хэрэгжүүлэх арга хэмжээний санал боловсруулах ажлын хэсэг өнөөдөр хуралдлаа.

Тус ажлын хэсэгт дүүргийн эдийн засгийн хөгжлийн асуудал хариуцсан Засаг даргын орлогч Д.Уламбаяр, Улаанбаатар хотын Захирагчийн ажлын албаны Хүнс, худалдаа үйлчилгээний хэлтэс, дүүргийн Хүнс, худалдаа үйлчилгээний хэлтэс, Тохижилт нийтийн аж ахуйн хэлтэс, Газрын харилцааны алба, Мэргэжлийн хяналтын хэлтэс, Онцгой байдлын хэлтэс, Цагдаагийн нэгдүгээр хэлтэс болон Замын цагдаагийн хэлтэс ажиллаж байна. Ажлын хэсэг өнөөдөр үүсээд буй нөхцөл байдалтай газар дээр нь очиж танилцаж, зөвшөөрөлгүй худалдаа эрхэлж буй иргэдэд шаардлага тавьж байна.

НИТХ болон Нийслэлийн захирагчийн ажлын албанаас “Нийслэлийн худалдаа үйлчилгээний нийтлэг журам”-ыг шинэчлэн боловсруулахаар болсон байна. Төсөлдөө худалдаа эрхлэгчдийн саналыг тусгахаар “Монголын худалдаачдын холбоо”, “ТҮЦ-ээр амь зуугчдын холбоо” зэрэг бусад холбогдох ТББ-уудын төлөөлөлтэй удаа дараагийн уулзалтуудыг зохион байгуулаад байгаа юм. Уулзалтын дүнд хоёр шатны хэлэлцүүлэг зохион байгуулж, эндээс гарсан шийдвэр гарч аж. Хуульд нийцсэн саналыг журмын төсөлд тусгаж хэлэлцүүлэхээр болжээ. Нийслэлийн дүүргүүдэд энэ сарын 15-ны дотор хэлэлцүүлгийг зохион байгуулж, дүүрэг бүр нутаг дэвсгэрийн онцлогтоо таарсан саналуудыг нэгтгэж ирүүлэхийг үүрэг болгоод байна. Саналаа урьдчилан ирүүлсэн хувь хүн, хуулийн этгээдийн хүрээнд Нийслэлийн иргэний танхимд нэгдсэн хэлэлцүүлэг зохион байгуулах юм байна. Хэлэлцүүлэгт худалдаа эрхлэгчдээс гадна хууль хяналт, иргэний нийгмийн байгууллага, эрдэмтэн судлаачид, иргэд хэрэглэгчдийн төлөөллийг оролцуулж, гаргасан саналыг нэгтгэн төсөлдөө тусгах юм.

З.Мөнхсувд

Зоонозын өвчин судлалын үндэсний төв /ЗӨСҮТ/, Баян-Өлгий аймгийн ЗӨСТ, ОХУ-ын Эрхүү хотын Сибирь, Алс Дорнодын тарваган тахал эсэргүүцэн судлах эрдэм шинжилгээний хүрээлэн, Уулын-Алтайн тарваган тахал эсэргүүцэн судлах станцын мэргэжилтнүүдээс бүрдсэн баг Баян-Өлгий аймгийн Улаанхус, Цагааннуур, Ногооннуур сумдын хил орчмын нутагт тарваган тахлын байгалийн голомтын тандалт судалгаа хийлээ.

Тандалт судалгаанд Сийлхэмийн голомтын 32 секторын 2678.4 кв.км газар нутаг, 104 айл өрх хамарчээ.
Тандалт судалгааны явцад 565 сорьц цуглуулан лабораторийн шинжилгээнд хамруулснаас тарваган тахал өвчний эерэг сорьц 156 илэрсэн байна. Нийт эерэг сорьцонд нян судлалын шинжилгээ хийж тарваган тахлын үүсгэгчийн өсгөвөр 44 илэрч дээрх сумдын нутаг дахь тарваган тахлын байгалийн голомтын эпизотын идэвхийн эрчим нэмэгдсэн, тархвар судлалын өндөр эрсдэл үүсэх магадлалтай байгааг тогтоожээ.

Түүнчлэн холбогдох мэргэжлийн албаныхан 17 аймгийн 130 гаруй сум тарваган тахлын байгалийн голомттой гэдгийг аялж зугаалж яваа иргэдэд анхааруулж байна.

Дорноговь аймгийн Айраг сумын нутгаар дайрч өнгөрдөг Номт зөрлөгийн төмөр замд ноцтой осол гарчээ. Тодруулбал Номт-Цагаан хад чиглэлийн 1016 км төмөр замд засварын ажил гүйцэтгэж байсан кран осолдож төмөр замыг дамнан унасан байна. Азаар хүний амь нас эрсдээгүй ч энэ чиглэлд явдаг галт тэрэгний хөдөлгөөн бүрэн хаасан байна. Эх сурвалжийн мэдээлж буйгаар энэ чиглэлийн төмөр замын модон дэрийг бетон дэрээр сольж, шинэчлэлийн ажлыг нь хийж дуусгах дөхсөн байжээ.

Авто үйлчилгээний чиглэлээр үйл ажиллагаа эрхэлж буй иргэн, аж ахуйн нэгж хууль тогтоомжийн дагуу найм дугаар сарын долооны өдрөөс эхлэн бүртгэлд хамрагдах тухай мэдэгдэл гарчээ.

Эхний өдрийн байдлаар 29 авто үйлчилгээ эрхлэгчдэд холбогдох хууль, дүрэм, журам, стандартыг мөрдөн ажиллах талаар мэдэгдэл хүргүүлээд байна.

Нийслэлийн нутаг дэвсгэрт авто үйлчилгээний чиглэлээр үйл ажиллагаа эрхэлж буй иргэн, аж ахуйн нэгж, байгууллагуудад “Автотээврийн тухай” хууль түүнтэй нийцүүлэн гаргасан дүрэм, журам, Авто үйлчилгээ-Ангилал, Ерөнхий шаардлага MNS 5025:2010, “Автомашины угаалгын үйлчилгээ. Ангилал, Ерөнхий шаардлага” MNS 5347:2003 стандартыг хэрхэн мөрдөн ажиллаж буйд 2018 оны есдүгээр сард удирдамжтай шалгалт хийнэ гэж нийслэлийн Тээврийн газраас мэдээллээ.

2018 оны эхний зургаан сарын байдлаар мансууруулах бодистой холбоотой 91 гэмт хэрэгт 201 хүн холбогдож шалгагдсан байна. Үнийг өмнөх оны мөн үетэй харьцуулахад 40 хэргээр буюу 78.4 хувь их байгаа аж. Мөн холбогдогч нь 68 хүнээр буюу 51.1 хувиар өссөн гэнэ.

Тиймээс энэ төрлийн гэмт хэрэгтэй тэмцэх, урьдчилан сэргийлэж, холбогдох хэргийг бууруулах чиглэлээр Монгол Улсын Засгийн газраас “Мансууруулах эм, сэтгэцэд нөлөөт бодисын хууль бус эргэлттэй тэмцэх үндэсний хөтөлбөр”-ийг баталж, үндэсний хороо байгуулан, хөтөлбөрийг хэрэгжүүлэх нэгдүгээр үе шатны төлөвлөгөөг батлан хэрэгжүүлж байна.

НҮБ-ын Мансууруулах бодис, гэмт хэрэгтэй тэмцэх алба /UNODC/-наас гишүүн орнууддаа хар тамхи хэрэглэж байгаа иргэд болон борлуулагч, тээвэрлэгч, бүлэглэлүүдийн эсрэг явуулж буй тэмцлээ улам чангатгах хэрэгтэй гэсэн зөвлөмжийг гаргажээ.

Иймд Цагдаагийн байгууллагаас хар тамхитай тэмцэх ажлыг эрчимжүүлэх зорилгоор Эрүүгийн цагдаагийн албаны бүтцэд байсан Хар тамхитай тэмцэх хэлтсийг газар болгон бүтэц, орон тоог нэмэгдүүлж, 2018 оны хоёрдугаар сард Цагдаагийн төв байгууллагын харьяа Хар тамхитай тэмцэх газар болгон өргөжүүлсэн юм.

Монгол Улсын Засгийн газар, Хууль зүй, дотоод хэргийн яам, цагдаагийн байгууллагаас энэ төрлийн гэмт хэргээс урьдчилан сэргийлэх, илрүүлэх тандан судлах, орчин үеийн дэвшилтэд техник, технологи, тоног төхөөрөмжөөр хангах, бүтэц орон тоог өргөтгөж, алба хаагчдын мэргэжлийн мэдлэг ур чадварыг дээшлүүлэх, иргэдийг соён гэгээрүүлэх, хор уршгийг таниулах чиглэлээр ажиллаж байна.

Энэ хүрээнд, 2018 оны улсын төсөвт тусгагдсан хөрөнгөөр АНУ, Англи улсад үйлдвэрлэсэн TARGET ID, HBI-120, SABRE™5000 зэрэг төхөөрөмж, уян камертай толь, загварын аналитик жин, рентген төхөөрөмж, шээснээс илрүүлэгч тест зэргийг худалдан авч ашиглаж байна. Мөн Сэлэнгэ, Дархан-Уул, Орхон, Дорнод, Дорноговь, Өмнөговь аймгийн Цагдаагийн газар, Иргэний агаарын тээвэр дэх цагдаагийн газар, хэлтэст хар тамхи, мансууруулах болон тэсэрч дэлбэрэх бодисыг илрүүлэгч, тандан судлагч тоног төхөөрөмжийг хүлээлгэн өгч, алба хаагчдыг нь сургалтад хамруулжээ.

З.МӨНХСУВД