Month: August 2018

Хан-Уул дүүрэг “Эко дүүрэг” болох зорилтын хүрээнд Хан-Уул дүүргийн Засаг даргын Тамгын газар, Тохижилт үйлчилгээний төвийн санаачлагаар 120 мянгатын автобусны буудлын хойно ногоон байгууламжтай таван тивийн ан амьтадын баримал хөшөөтэй Нийслэлд жишиг болох “Шинэ Хан-Уул” цэцэрлэгт хүрээлэнг шинэчлэн байгуулсан.

Өчигдөр /2018.08.08/ Хан-Уул дүүргийн Туул тосгон ногоон байгууламжтай шинэ цэцэрлэгт хүрээлэнтэй боллоо. 1,2 га талбайтай тус ногоон байгууламж бүхий тус цэцэрлэгт хүрээлэнг зүлэгжүүлэн цэцгийн мандалтай гацуур, улиас суулгаж, 60 гаруй ан амьтдын баримал хөшөө, усан оргилууртай цэцэрлэгт хүрээлэн Хан-Уул дүүрэгт дахин нэгээр нэмэгдлээ. Мөн эргэн тойрны хашаа хайсыг бүрэн шинэчлэн засаж янзалсан байна.

13 дугаар хороо нь Хан-Уул дүүргийн алслагдсан хороодын нэг бөгөөд 1400 гаруй өрх, 4107 хүн амтай хороо юм. Тус хорооны иргэд амарч зугаалах цэцэрлэгт хүрээлэн байдаггүй байсан байна.

Тус цэцэрлэгт хүрээлэн байгуулагдсанаар бага насны хүүхэдтэй эцэг эхчүүд хүүхдээ агаар салхинд гаргах, хүүхдүүд аюулгүй орчинд тоглож наадах, ахмадууд чөлөөт цагаа ая тухтай өнгөрүүлэх тохиромжтой орчин бий болж байгаа юм.

Ялангуяа алслагдсан хороодын иргэд амралт чөлөөт цагаа зөв боловсон өнгөрөөх боломж бололцоо хомс заавал хотын төв рүү цаг заваа үрэн амарч зугаалж өнгөрөөдөг байсан цаг үе ийнхүү ард хоцорч байна.

Булган аймаг энэ жил 42.2 мянган га талбайд үр тариа тариа, 473.3 га-д төмс хүнсний ногоо тариалсан байна. Харин 900 гаруй га талбайд малын тэжээлийн ургамал тариалжээ.

Ургацын хураалтын талаар аймгийн Засаг даргын орлогч Ц.Бат-Өлзий “Одоогоор ургацын урьдчилсан хэмжээг тогтоогоогүй байна. Тариаланчид, мэргэжлийн хүмүүсийн баримжаа, аймгийн хүнс, хөдөө аж ахуйн газрын мэдээллээр тариа, төмс, хүнсний ногоо, таримал ургамлын болц харьцангуй гайгүй боломжийн байгаа. Ер нь энэ намар төлөвлөсөн хэмжээний ургац хураалт, нэгж талбайн ургац улсын дунджаас дээгүүр авна гэсэн найдлага байна.

Учир нь энэ сарын цаг агаарын мэдээг харахад хур бороо газар тариалангийн бүс нутгаар ахиу орно гэсэн байсан. Хэрэв хур элбэг байвал үр тарианы болцод сөргөөр нөлөөлөх эрсдэл харагдаж байна” гэв.

Өнгөрсөн сард Хутаг-Өндөр сумын төв орчмоор орсон хүчтэй аадар бороо, үеийн улмаас тус сумын иргэн, зарим аж ахуйн нэгжүүдийн төмс, хүнсний ногоо, үр тарианы ургац бага хэмжээгээр өртсөн аж. Харин бусад газар цаг агаарын нөлөөлөл харьцангуй гайгүй үеэр ус, гангийн нөлөөлөл бага байна гэж хөдөө аж ахуйн салбарынхан үзэж байна.

З.МӨНХСУВД

Говь-Алтай аймгийн хэмжээнд энэ оны хоёрдугаар улирлын байдлаар нийт 369 иргэнд 26,52 га газар өмчлүүлсэн байна. Тухайлбал, “Дарив сум 19 иргэнд 1.33 га, Дэлгэр сум 91 иргнэд 6,37 га, Есөнбулаг сум 99 иргэнд 7,62 га, Эрдэнэ сум 160 иргэнд 11,2 га газрыг өмчүүлсэн” хэмээн тус аймгийн Газрын харилцаа, барилга, хот байгуулалтын газраас мэдээлэв.

НӨАТ-ын урамшууллын 2018 оны наймдугаар сарын сугалааны тохирол 19-нд Боловсрол телевизээр орон даяар шууд явагдана. Иргэн та 2018 оны долдугаар сарын 01-нээс долдугаар сарын 31-ны өдөр хүртэлх хугацаанд худалдан авалт хийсэн баримтаа наймдугаар сарын 18-ний өдрийн 23 цаг 59 минутаас өмнө Цахим төлбөрийн баримтын системд бүртгүүлснээр НӨАТ-ын урамшууллын сугалаанд хамрагдан азтан болох боломжтой.

Иргэд хөдөө орон нутгаар амарч зугаалахдаа тарваганы түүхий мах, эд эрхтэнг эмчилгээний зорилгоор хэрэглэхгүй байх, мэрэгчийн үхсэн сэг зэмтэй харьцахгүй байх, тарваганы бөөс болон бүүрэгт хазуулахгүй байх, нийслэл хот руу тарваганы түүхий мах, тулмыг тээвэрлэж оруулж ирэхгүй байхыг Нийслэлийн эрүүл мэндийн газар, Зоонозын өвчин судлалын үндэсний төвөөс сэрэмжлүүлж байна.

Өчигдөр нийслэлийн есөн дүүргийн боловсролын хэлтсийн сургуулийн өмнөх боловсрол хариуцсан мэргэжилтнүүд болон цэцэрлэгүүдийн төлөөллийг сургалтад хамруулжээ. Сургалтаар цахим бүртгэл, цахим элсэлтийн үйл ажиллагааг хэрхэн зохион байгуулах тухай системийн зааварчилгааг танилцуулсан байна. Тус сургалтад хамрагдсан мэргэжилтнүүд нийслэлийн төрийн өмчийн 222 цэцэрлэгийн эрхлэгч, аргазүйч багш нарыг сургаж цахим элсэлтийн үйл ажиллагааг хэвийн явуулах бэлтгэл ажлыг хангахад туслах ажээ.

Монгол Улсын Ерөнхий сайдын 2018 оны 105 дугаар захирамжийн дагуу Эрүүл мэндийн яам, “Глобаль” сангийн дэмжлэгтэйгээр Монголын өрхийн анагаах ухааны мэргэжилтнүүдийн холбоотой хамтран “Сүрьеэгүй аймаг” олон талын оролцоог хангах ухуулга, нөлөөллийн уулзалт, хэлэлцүүлэг, сүрьеэгийн тусламж үйлчилгээг зохицуулагч бэлтгэх сургалт 2018 оны наймдугаар сарын 07-08 өдрүүдэд Сэлэнгэ аймагт зохион байгуулагдаж байна.

Уулзалт хэлэлцүүлгийн арга хэмжээнд МӨАУМХ-ны захирал, мэргэжилтэн, Халдварт өвчин судлалын үндэсний төвийн СТСА–ны мэргэжилтэн, Сүхбаатар, Мандал сумдын Засаг даргын тамгын газрын дарга, эрүүл мэндийн асуудал хариуцсан мэргэжилтэн, багийн Засаг дарга нар болон ЭМГ, аймгийн Нэгдсэн эмнэлгийн удирдлага, мэргэжилтнүүд, өрхийн эрүүл мэндийн төвийн дарга /ӨЭМТ/нар, шийдвэр гаргагчид оролцож байна.

Өнөөдөр сүрьеэгийн тусламж үйлчилгээг зохицуулагч бэлтгэх сургалтанд Нэгдсэн эмнэлгүүдийн сүрьеэгийн диспансерийн эмч, сувилагч, ӨЭМТ-ийн эмч, сүрьеэгийн асуудал хариуцсан мэргэжилтнүүд хамрагдах юм.

Оросын түүхий эдийн бус болон эрчим хүчний эх үүсвэр бус барааны экспортын хэмжээ 2018 оны оны эхний хагаст өнгөрсөн оны мөн үетэй харьцуулбал 23%-иар нэмэгдсэн тухай “Известия” сонин Оросын экспортын төвийн мэдээ баримтаас иш татан мэдээлэв.

Оросын экспортын төвийн тэргүүн Андрей Слепневийн мэдээлснээр, энэ оны 1-6 дугаар сард түүхий эдийн бус экспорт 70 тэрбум ам.долларт хүрч, нийт экспортын 33%-ийг бүрдүүлсэн байна. “Экспортын барааны нэр төрөл ч нэмэгдсэн. Оросын барааны эрэлт Тусгаар улсуудын хамтын нөхөрлөлийн гишүүн орнууд, Зүүн Ази, Баруун ба Зүүн Европ, Ойрхи Дорнодын орнуудад нэмэгдсэн ба нийлүүлэлт 10,5% – 23% хүртэл өссөн” гэж тэрбээр тэмдэглэжээ.

Өмнө нь Андрей Слепнев ТАСС агентлагийн сурвалжлагчид өгсөн яриллагадаа “2018 онд эрчим хүчний эх сурвалж бус экспортын хэмжээ 15%-иар өсч, 153 тэрбум ам.долларт хүрэх төлөвтэй байгаа. Экспортын хэмжээ нэмэгдэхэд голлон нөлөөлөх бараануудын тоонд төрөл бүрийн металл, химийн бүтээгдэхүүн, бордоо, хөдөө аж ахуй-аж үйлдвэрийн цогцолбор, машины үйлдвэрлэл, ойн аж үйлдвэрийн бүтээгдэхүүнүүд багтаж байна” гэж мэдэгдэж байв.

ОХУ-ын Ерөнхийлөгч Владимир Путин энэ оны тавдугаар сард гаргасан зарлигтаа 2024 он гэхэд түүхий эдийн бус болон эрчим хүчний эх үүсвэр бус барааны экспортын хэмжээг 250 тэрбум ам.долларт хүргэх үүргийг засгийн газартаа өгсөн ажээ.

Бээжингийн их сургуулийн эрдэмтэд компьютерээс ялгарах цацрагийн хорт нөлөөг бууруулах арга олжээ. Олон жил судалсны дүнд биед шингэсэн хүнд элементийг гарган зайлуулах үйлчилгээ ногоон цайнд байдаг болохыг олж тогтоосон байна.