Month: August 2018

Өнөөдөр “Улсаа аврах ард түмний үндэсний хөдөлгөөн”-өөс НҮБ-ын Монгол дахь суурин төлөөлөгчийн газарт хандан, Оюу толгой компанид давуу байдал олгон, гүний цэнгэг усыг хэрэглүүлэхгүй байх талаар шинжээчийн баг гаргаж ажиллуулахыг хүсч буйгаа илэрхийлэн мэдээлэл хийлээ.

А.Эрдэнэбаяр “Оюу толгой” компанитай холбоотой асуудлаар НҮБ-ын Монгол дахь суурин төлөөлөгч Биата Транкманд хүсэлт хүргүүлж байна.”

Улсаа аврах ард түмний үндэсний хөдөлгөөний дарга А.Эрдэнэбаяр “Өнөөдөр манай байгууллага НҮБ-ын Монгол дахь суурин төлөөлөгчийн газарт хүсэлт хүргүүлж байна. Үүний гол зорилго нь байгал хамгаалах, гүний цэнгэг ус, уур амьсгалын өөрчлөлт, авилга мөнгө угаах гэмт хэрэг, цөмийн хог хаягдал булшлах, атомын цахилгаан станц барих, баялгийг хүртэх ёстой гэсэн зургаан чиглэлээр олон улсын шинжээчдийг томилж, шинжилгээ хийн хохирлыг тооцож өгөхийг шаардаж байгаа. Оюутолгой ордын ашиглаж байгаа гүний усны нөөц Өмнөговь аймгийн хэмжээнд 150 сая орчим байгаа. Энэ бол Монгол улсыг 100 жил хангах цэнгэг ус. Гэтэл Оюутолгой компани гүний цэвэр усыг нэг секундэд 872 литрээр хэрэглэж байна. Энэ нь Монгол улсын гүний усны нөөцийг барагдуулах боломжтой. Иймээс гүний усыг ашиглахгүй харин саарал усыг ашигла гэсэн байр суурийг илэрхийлж албан шаардлага хүргүүлсэн. Саарал усыг ашиглавал манай улсын баялаг, ан амьтан, ард түмэн гэх мэт олон зүйлс хордохгүй байх боломж бүрдэнэ. Гэтэл говийн нутагт саарал ус ашиглах боломжгүй гэсэн хариу өгсөн. Улаанбаатар хотоос 600 километр газарт хоолой татаад ашиглах боломж байгаа. Гэтэл үүнийг хүлээн зөвшөөрөөгүй” гэлээ.

Мөн Оюутолгой компанийг гүтгэсэн хэмээн “Улсаа аврах ард түмний үндэсний хөдөлгөөн”-ий удирдах зөвлөлийн зарим гишүүдийг цагдаагийн байгууллагад хянуулсан аж. Гэтэл цагдаагийн байгууллагаас “Оюу толгой” компанийг гүтгэсэн нь тогтоогдоогүй гэсэн” хариу ирүүлжээ.

С.ОЮУНЖАРГАЛ

Япон Улсад өнгөрсөн долдугаар сарын 08-нд хүчтэй аадар бороо орсны улмаас сүүлийн 30 жилд тохиолдоогүй байгалийн гамшигт нэрвэгдээд байгаа билээ. Тус улсын 11 бүс нутаг үерийн усанд автсаны улмаас 200 гаруй хүн нас барж, 60 хүн ор сураггүй алга болоод байна.

Одоогоор бороо намдсан ч ихэнх газар үерлэж, хөрсний нуралт үүссэн бөгөөд хэд хэдэн эмнэлгийн барилга нурж, хоёр сая иргэнийг нүүлгэн шилжүүлээд байгаа аж. Тэгвэл “АМДА” олон улсын байгууллагын хамтын ажиллагааны хүрээнд Нийслэлийн түргэн тусламжийн төвийн их эмч А.Алтанзагас Япон улсад ажиллаж, байгалийн гамшигт өртсөн ард иргэдэд тусламж үзүүлж байна. Тэрбээр олон улсын эмч, мэргэжилтнүүдтэй хамтран гамшигт өртөж гэр оронгүй болсон, нүүлгэн шилжүүлж ирсэн иргэдэд үзлэг оношилгоо хийж, хоол хүнс болон эм тариа тараах зэрэг эмнэлгийн болон сэтгэлзүйн тусламж үзүүлж байгаа юм.

НЭМГ-ын харьяа Нийслэлийн түргэн тусламжийн төв нь Японы “АМДА” олон улсын байгууллагатай зургаа дахь жилдээ хамтран ажиллаж байгаа ажээ. Тус байгууллага нь олон улсын хүмүүнлэгийн байгууллага бөгөөд 30 гаруй орны гишүүнчлэлтэй юм байна. Өнгөрсөн 2013 онд Филиппин улсад тохиолдсон байгалийн гамшгийн үеэр Нийслэлийн түргэн тусламжийн төвийн хоёр их эмч тусламжийн шугамаар очиж ажилласан бол, өдгөө Япон улсад тус төвөөс нэг их эмч ажиллаж байгаа юм байна.

“Иргэдийн шударга шүүх” ТББ, Монголын худалдаачдын холбоо хамтран улстөрчдийн хууль бус үйлдлийн эсрэг тэмцэж МАН-ын байрны гадна хугацаагүй суулт хийх талаар мэдээлэв.

Энэ талаар Иргэдийн шударга шүүх ТББ-ын дарга Х.Бат-Ялалт “Зарим төрийн байгууллагууд ажил хийгээч гэж худалдаа эрхлэгчдийг хэлдэг. Биднийг зүгээр сууж байгаад мөнгө олж байгаа мэтээр боддог. Худалдаа эрхлэнэ гэдэг маш том хөдөлмөр. Би сүүлийн таван жилийн турш судалсан. Хуульч хүн бол эрх нь зөрчигдсөн иргэдийн зовлон бэрхшээлийг сонсож, аз жаргалтай болгохын төлөө ажилладаг байх ёстой. Худалдаа эрхлэгчид өр зээлэнд баригдах түүнийгээ дагаад хүчирхийлэл, дарамт шахалтанд ордог. Үүнээс шалтгаалан элдэв төрлийн гэмт хэрэг үйлдэх нийгмийн сөрөг асуудал үүсдэг. МАН амлалтаа биелүүлээгүй. Иргэд өөрсдөө тэмцэх шаардлага үүсчээ. Өнөөдөр ТҮЦ эрхлэгчидийн эрх ашиг ноцтой зөрчигдсөөр байгаа. Тиймээс бид МАН-ын байрны гадна хугацаагүй суулт хийж тэмцэхээ албан ёсоор мэдэгдэж байна. Хүний эрхийн төлөө тэмцэнэ. Наймдугаар сарын 12-ны өдөр хүртэл Нийслэлийн Засаг дарга, МАН-ын дарга, Сүхбаатар дүүргийн засаг дарга нарт мэдэгдэж байгаа юм.Түүнчлэн худалдаа үйлчилгээний нийтлэг журмыг энэ сарын 16-ны өдөр нийслэлээс нээлттэй зохион байгуулна гэв. Худалдаа үйлчилгээний журам шинээр батлагдсанаар ТҮЦ-үүдийг цэгцэлнэ гэж яриад байна. Смарт карт цэнэглэдэг ТҮЦ тавьж, дотор нь соёлын худалдаа явуулж болно гэх яриа гарсан. Үүнийг цэгцлэнэ гэдэг нэрийн цаана ашиг сонирхлын зөрчил явагдаж байна гэж харж байгаа. Бидний эрхийг хамгаалах төрийн бодлого, тодорхой институт байхгүй учраас өөрсдийн төлөө нэгдэж, эрх чөлөөгөө хамгаалах ёстой. Бид тэмцлийн бүх хэлбэрээр дуу хоолойгоо ард түмэндээ хүргэж, тууштай тэмцэнэ”

Түц эрхлэгч Л.Хандмаа “Би багшийн дээдийн автобусны буудал дээр ТҮЦ-ээ байршуулчихсан. Гэхдээ худалдаа үйлчилгээ эрхлээгүй удаж байна. Учир нь зөвшөөрөл өгөөгүй. Зөвшөөрөл өгөхийн тулд биднээс нэг сая гаруй төгрөг өгөх хэрэгтэй болдог. Бид амьдрах гэж зовж байна. ТҮЦ-үүдийг хүчээр ачиж яваад журмын хашаанд тавьдаг. Эргээд авахын тулд 300 мянган төгрөг төлнө. Шилэн ТҮЦ-ийг худалдаж авах бололцоо, мөнгө байхгүй. Үүнийг хотын төвийн байршил сайтай гэсэн 124 газар эзэнтэй болгоод өгчихсөн байгаа. Бид нарт анх 8-10 сая төгрөгөөр зарах санаатай байсан. Хамгийн гол нь бидэнд ТҮЦ ажиллуулах зөвшөөрөл өгөхгүй байна. ТҮЦ-ийг ачихаар, тогийг нь таслах гэж байсан хүмүүстэй тэмцсэн. Тог таслах юм бол 220 вольтийн хүчдэлээс зуураад үхнэ гэдгээ хэлсэн.Бид эрх ашгийнхаа төлөө ингэж л тэмцэж байна” гэв.

Монголын худалдаачдын холбооны гүйцэтгэх захирал В.Мөнхтуяа “Бид үгээ хэлж үзэл бодлоо илэрхийлэхийн тулд МАН-ын байранд очсон боловч удирдлагууд нь гарч ирсэнгүй, Хуулийн зөвлөхөө явуулж манай намын үүд хаалга үргэлж нээлттэй гэж хэлүүлсэн. Яг ийм л дүр зургаар үргэлж бидэнд худлаа ярьсаар байх уу? Гар дээрээс худалдаа наймаа эрхэлж байгаа хүмүүсийн ажлын байрыг нь булааж татвар түрээс нэмээд байгаа төр засгийн удирдлагуудад үгээ хэлж, үр дүн гартал нь тэмцлээ үргэлжлүүлэх болно” гэлээ.

Нийслэл хотод нийгэм, эдийн засгийн шийдлээ хүлээж буй олон асуудлууд бий. Нийслэлчүүдийн өдөр тутмын ажил амьдралтай холбоотой асуудлын шийдлийн хүрээнд хүрээнд НИТХ-ын Тэргүүлэгчид зургаа, долдугаар саруудад нийт 7 удаа хуралдаж, холбогдох шийдвэрүүдийг гаргажээ.

Өнгөрсөн хоёр сарын турш НИТХ-ын тэргүүлэгчдийн хуралдаанаар хэд хэдэн төсөл хөтөлбөрүүдийг баталж, нийслэлийн хэмжээнд тулгамдаж буй дараах асуудлуудыг хэлэлцэж шийдвэрлэсэн байна.
Тухайлбал, нийслэлийн хүн амын аюулгүй байдлыг хангах, ариун цэврийн байгууламжийн ашиглалтыг сайжруулах болон ус хангамжийн аюулгүй байдлыг хангах дэд хөтөлбөрийг баталжээ.
Уг хөтөлбөрийг хэрэгжүүлснээр ус хангамжийн шугам сүлжээ, тоног төхөөрөмжийг шинэчлэх, онцгой байдал, гамшгийн үед хүн амын ундны усны аюулгүй байдлыг хангах арга хэмжээг тодорхой болгох, гадаргын болон газрын доорх усны чанарт хийх шинжилгээ, судалгааны ажлыг эрчимжүүлэх, түүнд тавих хяналтыг өндөржүүлэх болон Улаанбаатар хотын Төв цэвэрлэх байгууламжуудын ашиглалтын хэвийн ажиллагааг хангах, Үйлдвэр аж ахуйн нэгж байгууллагын бохир усыг татан зайлуулахад гарах эрсдэлийг бууруулах зэрэг ажлуудыг гүйцэтгэх юм.
Мөн нийтийн эзэмшлийн гудамж, талбай дахь аюулгүй байдлыг хэрхэн сахиулах талаар хэлэлцэж сар бүрийн 9-ний өдрийг “Иргэдийн амьдрах орчны аюулгүй байдлын өдөр” болгож үүнийг угтан хүний амь нас, эрүүл мэндэд өдөр бүр эрсдэл учруулж буй зүйлсийг хариуцсан байгууллагууд нь шалгаж, засаж байхыг үүрэг болгосон. Үүнтэй холбоотойгоор нийслэлийн холбогдох байгууллагууд иргэдийг эрсдэлд учруулж болохуйц нөхцөл байдлыг арилгах тал дээр анхаарч, тодорхой ажлуудыг шат дараатайгаар амжилттай хэрэгжүүлжээ.
Нийслэлд нийтийн эзэмшлийн гудамж, талбай, автобусны буудал зэрэг газар зөвшөөрөлгүй ТҮЦ байршуулан ил задгай худалдаа эрхлэх явдал гарах болсон. Энэхүү хууль бус үйл ажиллагаа нь иргэдийн эрүүл орчинд амьдрах эрхэнд сөргөөр нөлөөлж болзошгүй учир НИТХ болон Нийслэлийн захирагчийн ажлын албанаас “Нийслэлийн худалдаа үйлчилгээний нийтлэг журам”-ыг шинэчлэн боловсруулж уг төсөлд худалдаа эрхлэгчдийн саналыг тусгахаар ажиллаж байна. Үүнтэй холбогдуулан НИТХ-ын Ажлын албанаас наймдугаар сарын 15-ны өдөр Нийслэлийн иргэний танхимд хэллэцүүлэг өрнүүлэхээр бэлтгэл ажилдаа ороод байгаа юм.

Түүнчлэн зургаа, долдугаар сард хуралдсан НИТХ-ын Тэргүүлэгчдийн хуралдаанаар дараах асуудлуудыг хэлэлцэн шийдвэрлэжээ.

1. “Хөгжлийн бэрхшээлтэй иргэдийг дэмжих дэд хөтөлбөр”
2. “Нийслэлийн хүн амын аюулгүй байдлыг хангах, ариун цэврийн байгууламжийн ашиглалтыг сайжруулах хөтөлбөр”
3. “Нийслэлд биеийн тамир, спортыг хөгжүүлэх дэд хөтөлбөр”
4. “НИТХ-ын ээлжит хуралдаанаар Нийслэлийн хүн амын ус хангамжийн аюулгүй байдлыг хангах дэд хөтөлбөр”
5. “Агаарын бохирдлыг бууруулах мастер төлөвлөгөө”
6. “Нийслэлийн нутгийн захиргааны байгууллагуудыг Яармаг руу шилжүүлэх төсөл” зэргийг дурьдаж болно.

НИТХ-ын Тэргүүлэгчдийн хуралдаанаар ийнхүү нийслэлчүүдийн ажил амьдралтай холбоотой асуудлуудыг цаг алдалгүй, баяр наадам, амралтын цаг гэж хойш тавилгүйгээр цаг хугацаанд нь багтаан шийдвэрлэж ажиллажээ.

Монгол Улсын Ерөнхий сайд У.Хүрэлсүх өнөөдөр “Зөв амьдрах ухаан” төвд ажиллан, тэнд амьдарч байгаа иргэд болон 24 цагийн цэцэрлэгт хүмүүжиж байгаа хүүхэд багачуудтай уулзав.

“Зөв амьдрах ухаан” төрийн бус байгууллага нь орон гэргүй, орц, траншейнд амьдардаг, архи, мансууруулах бодисонд донтсон, хорих ангиас суллагдсан, өнчин, ядуу, орох оронгүй, хөдөлмөрийн бэрхшээлтэй иргэдэд сэтгэл зүйн болон ажил хөдөлмөр эрхлэх сургалт явуулж, нийгэмд эзлэх байр сууриа дахин олоход нь тусалдаг юм.

Байгууллагын тэргүүн Г.Загдаагийн танилцуулснаас үзвэл тус төв 250 орчим иргэнийг дахин нийгэмшихэд нь ямар нэг байдлаар туслаж дэмжжээ. Өнөөдрийн байдлаар энэ төвд 0-72 насны 100 гаруй иргэн ажиллаж, амьдарч байгаагийн цөөнгүй нь цэцэрлэг, сургуулийн насны хүүхэд байна.

Жирийн иргэн сайн дураараа эмзэг бүлгийн иргэдийг асарч халамжлан, нийгэмшүүлж, ажил хөдөлмөр эрхлэхэд нь туслаж байгаад Ерөнхий сайд У.Хүрэлсүх байгууллагын тэргүүнд талархал илэрхийлэв.

“Зөв амьдрах ухаан” төрийн бус байгууллага орон нутгийн захиргааны байгууллагатай гэрээ байгуулан гүйцэтгэсэн ажлын хөлс болох 243 сая төгрөгөө авч чадалгүй багагүй хугацаа өнгөрчээ. Энэ талаар нийслэл, дүүрэг, холбогдох байгууллагад нь олон удаа хандаж, эрх мэдэл бүхий хүмүүстэй уулзсан ч ямар ч үр дүнд хүрээгүй байна. Ерөнхий сайд У.Хүрэлсүх энэ асуудлыг нь ирэх долоо хоногт багтаан шийдвэрлэхийг Хөдөлмөр, нийгмийн хамгааллын сайд С.Чинзориг, Нийслэлийн Засаг дарга бөгөөд Улаанбаатар хотын захирагч С.Батболд нарт даалгав.

Мөн төвд амьдарч байгаа иргэдийг эрүүл мэндийн үзлэг, оношлогоонд хамруулж, шаардлагатай хүмүүст эмчилгээ хийх арга хэмжээ авахыг Эрүүл мэндийн сайд Д.Сарангэрэлд, нэг хашаанд 10 гаруй гэр байгаа учир галын аюулгүй байдалд нь анхаарах, үйл ажиллагаагаа өргөжүүлэхийн тулд газраа өргөтгөх хүсэлтийг нь судлаж үзэхийг холбогдох дарга нарт үүрэг болголоо. Мөн “Жаргалтай амьдарч байгаа хэсэг нь зовж байгаа бусдадаа туслах нь хүний эрхэм чанар, үнэт зүйл. Иймээс аль аль талдаа харилцан ойлголцож, хамтран ажиллах нь чухал” гэдгийг тэмдэглэв.

“Зөв амьдрах ухаан” төвд амьдарч байгаа иргэд хуванцар гэр, тавилга, төмөр эдлэл, блок, модон эдлэлийн үйлдвэрлэл эрхэлдэг байна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Хууль сахиулахын их сургуулийн харьяанд шинээр Ерөнхий боловсролын ахлах сургуульбайгуулагдаж байгаа бөгөөд 2018-2019 оны хичээлийн жилд хамгийн анхны шинэ элсэлтээ авах гэнэ.

Тус сургууль нь эх хэл, үндэсний өв, ёс заншил, уламжлал соёлоо эрхэмлэдэг, хууль эрх зүйн мэдлэгтэй, сурах арга барилтай, хамтран ажиллах чадвартай, авьяас чадвараа нээн хөгжүүлдэг, өөртөө итгэлтэй, бүтээлч сэтгэлгээтэй, хариуцлагатай, эх оронч иргэнийг төлөвшүүлэх зорилготой аж.

Мөн суралцагчид ахлах ангийн заавал болон сонгон суралцах хичээлүүдээс гадна “Төр эрх зүйн үндэс”, “Монгол бахархал”, “Сэтгэлгээний соёл”, “Англи хэл”, “Орос хэл” зэрэг хичээлийг заана юм байна.

Хууль сахиулахын их сургуулийн онцлогийг харуулж, бие бялдар, сэтгэл зүйн бэлтгэлийг хангахад чиглэсэн “Цэрэгжлийн биеийн тамир”, “Цэргийн хэргийн үндэс”, “Бие хамгаалах бэлтгэл”, “Гамшгаас хамгаалах бэлтгэл”-ийн хичээлүүдийг сурагчдад орох юм.

Сурагчид чөлөөт цагаараа спортын болон олон улсын хэмжээний мастер, түүнээс дээш зэрэгтэй мэргэжлийн багш нарын удирдлага дор таеквонда, кудо, холимог тулаан болон бие хамгаалах урлаг, самбо, жудо, чөлөөт бөхийн төрлөөр үнэ төлбөргүй хичээлэх боломжтой ажээ.

З.МӨНХСУВД

Энэ сарын 12-ноос эхлэн Монголын худалдаачдын холбоо, ТҮЦ-ээр амь зуугчдын холбооноос тэдний нийгмийн асуудлыг шийдэж өгөхийг шаардан МАН-ын төв байрны гадаа хугацаагүй жагсаал, суулт, өлсгөлөн зарлах болсон талаар өнөөдөр /2018.8.9/ мэдээлэл хийлээ.

Тэд “МАН 2016 онд УИХ-ын ээлжид сонгуульд ажилгүйдэл, ядуурлыг шийднэ, ажлын байрыг нэмэгдүүлнэ, татварыг багасгана, шударга ёсыг тогтооно, авлига хээл хахуультай тэмцэнэ гэх зэргээр амлаж, үнэмлэхүй ялалт байгуулсан. Гэвч амлалтаа биелүүлсэнгүй. Зөрчлийн хууль нэрээр ард түмний эрх чөлөөг боомилж, алба гувчуур, торгууль шийтгэлийг нэмэгдүүлсэн харгис бодлого явуулж байна. Өөрсдийн хүч чадлаар хувиараа худалдаа эрхлэгчдийн нийгмийн асуудлыг шийдэхийн оронд хууль зөрчигч, нийгмийг хордуулагч, хог шаар мэтээр элдэв дарамт шахалт үзүүлж, өр зээлийн дарамтад оруулж, татвар, торгуулиар хүчирхийлж байна. Тиймээс бид эвлэлдэн нэгдэж, эрх чөлөөнийхөө төлөө тэмцэхээр эсэргүүцлийн тэмцэл эхлүүлэх гэж байна. Албан бус мэдээгээр Монголд 300 мянга гаруй худалдаа эрхлэгч бий. Тэднийг тэмцэлд уриалан дуудаж байна. Бидний эсэргүүцлийг хүлээн авч, ямар нэгэн шийдвэрт хүртэл тэмцэх болно. Тэмцэл наймдугаар сарын 12-нд эхэлнэ. “Хэрэв бидний төлөө ямар нэгэн шийдвэр гаргахгүй бол бид жагсаал, суултаа өлсгөлөн болгоно”хэмээн мэдэгдлээ.

А.АНУЖИН

Боловсрол, соёл, шинжлэх ухаан, спортын яам, Засгийн газрын хэрэгжүүлэгч агентлаг Соёл урлагийн газар, Биеийн тамир спортын газар хамтран энэ сарын 11-15-ны өдрүүдэд Хүй долоон худаг дахь Монгол наадам цогцолборт “Нүүдэлчин Монгол” наадмыг зохион байгуулах гэж байна.

“Нүүдэлчин Монгол” наадмын хүрээнд Үндэсний спортын VI их наадам зохион байгуулагдах бөгөөд 21 аймаг, нийслэлийн есөн дүүргийн 2000 гаруй үндэсний спортын тамирчид хүй долоон худагт отоглон бууж өөрсдийн авьяас билэг авхаалж самбаа, ур чадвараа сорино.

Үндэсний спортын их наадам нь үндэсний спорт, тоглоом наадгай, ёс заншил, зан үйл, соёлын биет болон биет бус өвийг өсвөр үеийнхэнд өвлүүлэн таниулах, гадна дотнын жуулчид болон судлаачдад сурталчлан таниулах зорилготой юм. Наадмыг олон нийтийн дунд түгээмэл дэлгэрсэн дараах төрлөөр зохион явуулна. Үүнд,

• Үндэсний бөх,
• Үндэсний сурын харваа,
• Хурдан морины уралдаан,
• Шагайн харваа,
• Ширээний шагай,
• Жороо морины уралдаан,
• Уран уургач, бугуйлч, эмнэг булгиулагч,
• Буриад, урианхай, уламжлалт сурын харваа багтаж байна.

Анхан шатны тэмцээн аймаг, дүүргийн хэмжээнд энэ оны эхний хагас жилд зохион байгуулагдсан бөгөөд шалгарсан баг, тамирчид Хүй долоон худагт болох шигшээ тэмцээнд оролцох эрхээ авсан юм.

Баян-Өлгий аймгийн Өлгий сумын үерийн гамшигт өртсөн ард иргэдэд сэтгэлийн дэм үзүүлэх зорилгоор төрийн болон олон улсын байгууллага, иргэд хандивын аянд нэгдсээр байна.