Month: July 2018

Улсын Их Хурлын гишүүн, УИХ дахь Монгол- Их Британийн парламентын бүлгийн дарга С.Батболд өнөөдөр Их Британийн Гадаад хэрэг, хамтын нөхөрлөлийн яамны Ази, номхон далайн орнуудын асуудал эрхэлсэн Төрийн сайд ноён Марк Фийлд тэргүүтэй төлөөлөгчдийг хүлээн авч уулзав. Уулзалтын эхэнд УИХ-ын гишүүн, УИХ дахь Монгол-Их Британийн парламентын бүлгийн дарга С.Батболд төлөөлөгчдийг Монгол Улсад тавтай зочлохыг хүсээд, хоёр улсын дипломат харилцаа тогтоосны 55 жилийн ой тохиож буй энэ цаг мөчид Их Британийн Гадаад хэрэг, хамтын нөхөрлөлийн яамны Ази, номхон далайн орнуудын асуудал эрхэлсэн Төрийн сайд ноён Марк Фийлдийг Монгол Улсад айлчилж байгаад талархаж байгаагаа илэрхийлэв. Мөн хоёр улс 1963 онд дипломат харилцаа тогтоосноос хойш харилцаа, хамтын ажиллагаа олон салбарт идэвхтэй гүнзгийрэн хөгжиж байгааг онцлов.

Их Британийн Гадаад хэрэг, хамтын нөхөрлөлийн яамны Ази, номхон далайн орнуудын асуудал эрхэлсэн Төрийн сайд Марк Фийлд хоёр орны парламент хоорондын болон улс төр, худалдаа, эдийн засгийн гээд олон салбарын харилцааг хөгжүүлэхэд ихээхэн хүчин чармайлт гаргаж байдагт Улсын Их Хурлын гишүүн, УИХ дахь Монгол- Их Британийн парламентын бүлгийн дарга С.Батболдод тусгайлан талархал илэрхийлсэн юм. Тэрээр үргэлжлүүлэн, Лондонгийн болон Монголын хөрөнгийн бирж хооронд 2011 онд байгуулж байсан түншлэлийн үр дүн гарч эхэлж байгаад баяртай байна. Гадаадын хөрөнгөb оруулагчдын урсгалыг Монгол руу татахад хөрөнгийн биржийн хамтын ажиллагаа чухал ач холбогдолтой болохыг онцлов. Мөн тэрээр Их Британи Умард Ирландын Нэгдсэн Вант Улсын Гадаад хэрэг, хамтын нөхөрлөлийн яам, Монгол Улсын Боловсрол, соёл, шинжлэх ухаан, спортын яам хоорондын хамтын ажиллагааны хүрээнд “Чевнингийн сангийн хамтарсан тэтгэлэг”-т хамрагдаж буй Монгол оюутнууд амжилттай суралцаж байгаа ба улс орондоо өөрсдийн хувь нэмрийг оруулах манлайлагч, мэргэшсэн боловсон хүчин болон бэлтгэгдэж байгаа гэдэгт итгэлтэй байна гэв.

ӨМӨЗО дахь Монгол Улсын иргэдийн нийгэмлэг, ӨМӨЗО-ы Ардын Засгийн газрын Хэвлэл мэдээллийн албанаас жил бүр Монгол, Хятад улсын найрамдалт хүүхдүүдийн гар зургийн уралдааныг зохион байгуулдаг билээ. Уг уралдааны сэдвийг зохион байгуулагч талууд сонгодог бөгөөд энэ жилийн хувьд “Байгаль дэлхийгээ хамгаалъя” сэдвийн дор зохион байгуулж байна.

Хүүхдийн урлан бүтээх чадварыг нэмэгдүүлэх, тэдний сэтгэлгээг хөгжүүлэх зорилгоор дээрх сэдвийн хүрээнд зохион байгуулсан бөгөөд энэ оны Олон улсын хүүхдийн эрхийг хамгаалах өдрөөр шилдгүүдэд шагналыг гардуулан өгчээ. Өнөөдөр тус уралдаанд оролцсон хүүхдүүдийн бүтээлийн үзэсгэлэн нээлтээ хийлээ.

Долоо дахь удаагаа зохион байгуулагдсан энэхүү уралдаанд 6-17 насны хүүхдүүдийн 1003 бүтээл ирснээс ангилал тус бүрт 22 хүүхэд шалгарчээ. Үзэсгэлэнгийн нээлтэд Хүүхдийн урлан бүтээх төвийн захирал Д.Уранбилэг, ӨМӨЗО дахь Монгол Улсын иргэдийн нийгэмлэгийн удирдах зөвлөлийн гишүүн Д.Гантөгс, Б.Давааням болон Хөх хотын Туршилтын Үндэсний Сургуулийн Монгол улсын сурагчдыг хариуцан ирсэн багш Улаанаа нар оролцов.

Хүүхдийн Урлан бүтээх төвийн захирал Д.Уранбилэг “Улс орны зан заншил, уламжлал гээд бүгд байгаль дэлхийтэйгээ уялдаа холбоотой байдаг. Өнөөдөр яг хэрэгтэй цаг үед нь “Байгаль дэлхийгээ хамгаалъя” гэсэн маш чухал сэдвээр хүүхдүүдийг уриалсан үзэсгэлэнг зохион байгуулж байгаа Монгол Улсын иргэдийн нийгэмлэгт талархал дэвшүүлье. Цаашдаа бид бүхэн байнга хамтран ажиллах болно. Мөн хүүхдийн хөгжил гэдэг улс орны ирээдүй байдаг тул Монгол улсын ирээдүйн хөгжлийн төлөө бид бүхэн үнэтэй хувь нэмэр оруулж байгаа гэдэгтээ итгэлтэй байна” гэв.

Уг уралдаанд оролцсон н.Алтан-Үйлс “Би ӨМӨЗО-ы Туршилтын Үндэсний сургуулиас ирсэн. Энэ үзэсгэлэнд би “Эх дэлхийгээ хамгаалъя” сэдэвт зургаараа оролцсон. Яагаад гэвэл Эх дэлхий бол олон улс бүрийн хүмүүс хамгаалах хэрэгтэй зүйл юм. Мөн энэ дэлхийн бөмбөрцөг бол энэ дэлхийн бүх хүмүүсийн амьдарч байгаа орчин юм” гэлээ.

Монгол орны нийт нутаар орсон усархаг борооны улмаас одоогийн байдлаар авто замд үүссэн хохирлын хэмжээ 1,3 тэрбум төгрөгт хүрчээ. Үүнээс нийслэлд гурван хэсэгт авто зам усанд автаж, эвдэрсэн байна. Тодруулбал, Баянзүрх дүүргийн Монелын зам сүүлийн өдрүүдэд усанд автаж, зам эвдэрсэн аж. Энэ зам эвдэрсэн шалтгаан нь “Агво” компани зөвшөөрөлгүйгээр бохирын шугам барьж, даланг хааснаас үерийн ус зам руу орж цөмрөлт үүсгэжээ. Энэ далан нь 2000 метрийн өргөнтэй Баянзүрх уулаас орж ирэх үерийн усыг аюулгүй болгох зорилготой баригдсан ч бөглөснөөс болж зам гэмтэж, айлуудыг усанд автуулсан юм.

Мөн Баянзүрх дүүргийн Дарь эхийн эцэст байрлах авто зам эвдэрч, хуурчээ. Уг авто зам 2011 онд ашиглалтад орсон. Үерийн далан барих суваг шуудуу дагуу 50 гаруй айл өрх, аж ахуй нэгж бууснаас болж үерийн ус авто зам руу урссан байна. Барилга хот байгуулалтын яамнаас үерийн далан барих ажлыг 2018-2019 онд барихаар эхлүүлсэн боловч айлууд газар чөлөөлөхгүй байгаа учраас далангийн ажил гацаж, авто зам төдийгүй айл өрхүүдийн хашаа үерт автжээ.

•Баянгол дүүргийн 19-р хороо Чингүнжавын гудамж зүүн талын далан угаагдсан байсныг засварлаж байна.

•Орбит-Толгойт чиглэлийн уулзвараас Орбит-Баянгол чиглэлийн уулзвар хүртэлх 1.7 км авто замын 480 у/м-т явган хүний замын хашлага суурилуулах, нөхөөс хийгдэж байна.

•Сонгино-Хайрхан дүүргийн 31 дүгээр хорооны явган хүний зам суулт өгсөн. Тиймээс чулуун хучилтын чигжээсийг цементэн багсармалаар сэргээж, хазайсан тэмдгүүдийг тэгшлэх ажил хийгдэж байна.

•Сүхбаатар дүүргийн Оюутны гудамжийн авто замд 20 у/м хоёр суулт, 2 мкв нүхэн эвдрэл үүссэн тул зам засварлаж байна.

-Хөдөө орон нутгийн чанартай 116 км автозам эвдэрч, хоёр тэрбум төгрөгийн хохирол учраад байна

Түүнчлэн энэ долдугаар сарын 19-ний өдрийн байдлаар 13 аймгийн 29 байршилд нийт 116 км авто зам эвдэрч, улсад хоёр орчим тэрбум төгрөгийн хохирол учраад байна. Эвдэрсэн замуудыг АЗЗА компаниуд болон холбогдох албанаас шуурхай ажлын хэсэг ажиллаж, эвдрэл гэмтлийн засахаар газар дээр нь ажиллаж байна. Нийт 14 зам хариуцагч байгууллагын 154 хүн, 62 машин техниктэй ажиллаж байгаа бөгөөд Зам тээврийн хөгжлийн яамнаас эвдрэл гэмтлийн тоог газар дээр нь тогтоох аж. Хохирлын хэмжээ цаашид нэмэгдэж магадгүй байна. Сэлэнгэ, Булган, Өвөрхангай, Архангай аймгуудын зам эвдрэлтэй газруудад Зам тээврийн хөгжлийн сайд ажиллаж байна. Хохирлын хэмжээг аймаг тус бүрээр тогтооно.

Нийслэлд хотод орсон хүчтэй, аадар борооны улмаас авто замын зорчих хэсэг эвдэрч, тээврийн хэрэгсэл хөдөлгөөнд оролцоход хүндрэлтэй нөхцөл байдал үүссэн. Баянзүрх дүүргийн нутаг дэвсгэр Монелийн уулзвараас, Дарь эхийн зам хүртэлх Гадна тойруугийн 3 дугаар хэсгийн замын нөхцөл байдал, хийгдэж байгаа засварын талаар нийслэлийн Авто замын хөгжлийн газраас ажлын хэсэг гаран ажиллаж байна.

Монелийн уулзвар орчмын 330 метр чулуун замд үерийн усны улмаас цөмрөлт үүссэн. Энэ талаар нийслэлийн Авто зам хөгжлийн газрын дарга Ж.Тогтохбаяр “Энэ авто замын хэсэгт “Агбо” ХХК зөвшөөрөлгүй бохирын шугам татсанаас үүдэн үерийн ус чулуун замруу урсаж замд ачаалал өгснөөс үүдэн цөмөрсөн. БЗД-ын зүүн амнаас орж ирдэг далангийн том суваг энэ доогуур явж байгаа. Гэвч иргэд, аж ахуй нэгжийн буруутай үйл ажиллагаа, зөвшөөрөлгүй барьсан байшин барилгаас үүдэн үерийн ус зам руу орсон. Бид мэргэжлийн хяналтын байгууллага, газрын албатай хамтран тухайн албан байгууллагад албан шаардлага хүргүүлсэн. Шаардлагыг заасан хугацаанд биелүүлээгүй тохиолдолд албадан нүүлгэх хүртэл арга хэмжээ авна” гэлээ.

Нийслэл хотод үер усны улмаас 3 замд эвдрэл, гэмтэл үүсчээ. Гарсан эвдрэлийг засах, цэвэрлэх ажлуудыг нийслэлийн Авто зам хөгжлийн газар, Тохижилт үйлчилгээний компани зэрэг холбогдох газруудтай хамтран 24 цагаар 16 баг гарган ажиллаж байгаа юм.

Мөн БЗД-ийн 27, 21-р хороодын нутаг дэвсгэр гадна тойруугийн 3 дугаар хэсгийн авто замын зарим хэсэгт үерийн улмаас ихээхэн хэмжээний гэмтэл учирчээ. Энэ замд үерийн ус зайлуулах далан суваг хийгдсэн ч ус зайлуулах далангийн нийлэх хэсэг, байгалийн ус урсах жалгыг иргэд, аж ахуй нэгж зөвшөөрөлгүй шороогоор дүүргэж, дагтаршуулж барилга байшин барьжээ. Энэ хэсэгт 50 гаруй иргэн аж ахуй нэгж байгаа юм. Газрын албаны ямар нэг зөвшөөрөлгүй буусан эдгээр айл, аж ахуй нэгжээс үүдэн 2011 онд ашиглалтад орсон замын 450 метр орчим газарт зам эвдэрчээ. Үерийн улмаас хуримтлагдсан шороо, лаг шаврыг дүүргийн тохижилт үйлчилгээний газрууд болон, зам засвар арчлалтын компанитай хамтран цэвэрлэж хөдөлгөөнийг нээж, тээврийн хэрэгсэл нэвтрүүлсэн байгаа юм талаар нийслэлийн Авто зам хөгжлийн газрын орлогч дарга Б.Индра хэллээ.

Иргэд зөвшөөрөлгүйгээр үерийн далан сувгийн орчимд хашаа хатган, обьект барьж үерийн гольдрил өөрчлөгдөж зам руу орж байна. Тиймээс иргэд ухамсартай байж далан сувгийн орчим буухгүй байх, зөвшөөрөлгүй газар ухах, булах, далан суваг бөглөж барилга байшин барихгүй байхыг нийслэлийн Авто замын газраас зөвлөж байна. Мөн үерийн улмаас ашиглалтад ороод удаагүй замууд эвдэрсэн гэдэг нь ташаа мэдээлэл бөгөөд 5-10 жилийн насжилттай авто замуудад эвдрэл гарсан. Шинээр тавигдсан замуудад ямар нэг эвдрэл гэмтэл учраагүй байна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Сүүлийн үед орж байгаа их хэмжээний аадар борооны улмаас цахилгаан дамжуулах агаарын болон кабель шугамд гэмтэл ихээр гарч, 6-35кВ-ын хуваарилах байгууламж усанд автах тохиолдлууд ажиглагдаж байгаа тул иргэдэд дараах сэрэмжлүүлгийг хүргэж байна. Үүнд,

-Агаарын шугамын төмөр болон бетон, модон тулгуур хазайсан, унасан тохиолдолд яаралтай холбогдох байгууллагад мэдэгдэж арга хэмжээ авахуулах, тухайн газраас холдож аюулгүй замд очих, тулгуур унасан газраар явахгүй байх, бусдад анхааруулах,

-Цахилгаан хуваарилах байгууламжийн ойролцоо их хэмжээний ус тогтмол газарт ойртохгүй байх,

-Цахилгаан щит бүхий байрууд подвальд ус орохоос сэргийлэх, ил задгай утас, кабель байгаа эсэхийг сайтар нягтлах, холбогдох байгууллагад мэдэгдэх,

-Орон унтагт зорчиж байхдаа цахилгаан дамжуулах агаарын шугамаас хол байх, агаарын шугам унасан эсэхийг сайтар нягтлах,

-Газар унасан утас, ил гарсан кабель шугамууд хүчдэлтэй байх эсвэл дахин залгах автомат төхөөрөмжийн үйлчлэлээр хүчдэлтэй болж болзошгүй тул ойртох, хүрэхээс зайлсхийх,

-Тулгуур хазайсан, унасан унжсан утсанд шүргэж амь нас, эрүүл мэндээрээ хохирч тул сэрэмжтэй байхыг анхааруулж байна.

Онцгой байдлын ерөнхий газар