Month: July 2018

Монголын хөрөнгийн бирж 2018 оны 7 дугаар сарын 16-ний өдрөөс 7 дугаар сарын 20-ны өдрүүдэд 5 удаагийн үнэт цаасны арилжааг зохион байгуулж, өдөрт дунджаар 304.6 сая төгрөг буюу нийт 1,523,330,347.10 төгрөгийн арилжаа хийсэн байна.

1. ХУВЬЦААНЫ АРИЛЖАА:

Хувьцааны хоёрдогч зах зээлийн арилжаа:

Нийт 88 компанийн 2,768,377 ширхэг хувьцаа 591,302,697.1 төгрөгөөр арилжаалагдсан байна.

Идэвхтэй арилжигдсан хувьцаа:

Хувьцааны арилжаанд идэвхтэй оролцсон үнэт цаасны компаниуд:

Жич: Авсан зарсан нийлбэр үнийн дүнгээр гаргав.

2. ЗАСГИЙН ГАЗРЫН ЖИЖИГЛЭНГИЙН ҮНЭТ ЦААСНЫ АРИЛЖАА:

ЗГҮЦ-ны хоёрдогч зах зээлийн арилжаа:

2018 оны 07-р сарын 09-ний өдрөөс 07-р сарын 10-ны өдрүүдэд ЗГҮЦ хоёрдогч зах зээлийн арилжаагаар 8,794 ширхэг засгийн газрын үнэт цаасыг 932.0 сая төгрөгөөр арилжаалсан байна.

ЗГҮЦ-ны хоёрдогч зах зээлийн арилжаанд идэвхтэй оролцсон компаниуд:

Жич: Авсан зарсан нийлбэр үнийн дүнгээр гаргав.

2018 оны 07 дугаар сарын 20-ны байдлаар зах зээлийн үнэлгээ 2,430,727,137,270.8 төгрөг болсон бол “ТОП 20” индекс 19873.78 нэгж болж өмнөх долоо хоногоос 1.20 хувиар буурсан үзүүлэлттэй байна.

МОНГОЛЫН ХӨРӨНГИЙН БИРЖ

-Монгол Улсын шүүхийн 2018 оны эхний хагас жилийн шүүн таслах ажиллагааны тоймыг танилцуулав-

Монгол Улсын Шүүхийн ерөнхий зөвлөлөөс сар бүр зохион байгуулдаг “Нээлттэй шүүх” хэвлэлийн бага хурал өнөөдөр (2018.07.23) боллоо. Хэвлэлийн бага хурлаар Шүүхийн судалгаа, мэдээлэл, сургалтын хүрээлэнгийн ахлах референт Б.Отгон “Монгол Улсын шүүхийн 2018 оны эхний хагас жилийн шүүн таслах ажиллагааны тойм”-ыг танилцуулсан юм.

Анхан шатны шүүх 2018 оны хагас жилийн байдлаар эрүүгийн 6213 хэрэг, иргэний 25438 хэрэг, захиргааны 786 хэрэг, нийт 32437 хэрэг, маргааныг хянан шийдвэрлэж, 6997 зөрчил, зөрчлийн хэрэгт шийтгэл оногдуулж, 465 хүнийг хорих ял эдлэхээс хугацааны өмнө суллаж, 787 хүнд цагдан хорих таслан сэргийлэх арга хэмжээ авчээ. Анхан шатны шүүхээр хянан шийдвэрлэсэн эрүүгийн хэрэг өмнөх оны мөн үеэс 64.0 хувиар, иргэний хэрэг 4.0 хувиар тус тус өсөж, захиргааны хэрэг 26.5 хувиар буурсан байна.

А. Эрүүгийн хэрэг, зөрчил

Зарим гэмт хэргийн тоо өсөв. (хүчиндэх, залилах, улсын хилээр барааг хууль бусаар хил нэвтрүүлэх, авто тээврийн хэрэгслийн хөдөлгөөний аюулгүй байдал, ашиглалтын журмын эсрэг, дээрэмдэх гэмт хэрэг их хэмжээгээр өссөн дүнтэй байна) Хүнийг алах гэмт хэргийн тоо буурсан эерэг үзүүлэлттэй байна.

Анхан шатны шүүхээр хянан шийдвэрлэсэн нийт хэргээс дараах төрлийн гэмт хэрэг өссөн байна.

· хүний эрүүл мэндэд хүнд хохирол учруулах гэмт хэрэг 21 хэргээр буюу 11.9 хувиар,

· хүчиндэх гэмт хэрэг 42 хэргээр 43.3 хувиар,

· хулгайлах гэмт хэрэг 133 хэргээр буюу 18.3 хувиар,

· дээрэмдэх гэмт хэрэг 38 хэргээр буюу 36.9 хувиар,

· улсын хилээр барааг хууль бусаар хил нэвтрүүлэх гэмт хэрэг 26 хэргээр буюу 2.7 дахин,

· авто тээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэрэг 148 хэргээр буюу 49.3 хувиар,

· залилах гэмт хэрэг 104 хэргээр буюу 2 дахин,

· мансууруулах эм, сэтгэцэд нөлөөт бодисыг хууль бусаар ашиглах гэмт хэрэг 13 хэргээр буюу 25.5 хувиар тус тус өссөн байна.

Зарим төрлийн гэмт хэргийн тоо буурав

· хүнийг алах гэмт хэрэг 13 хэргээр буюу 12.5 хувиар буурсан,

· татвар төлөхөөс зайлсхийх гэмт хэрэг хянан шийдвэрлэгдээгүй байна.

Шүүх хорихоос өөр төрлийн ялыг түлхүү оноожээ. Монгол Улсын хэмжээнд 2018 оны хагас жилд шүүхээс нийт ял шийтгүүлсэн 6312 хүний 1657 хүнд хорих ял, 3756 хүн, хуулийн этгээдэд торгох ял, нийтэд тустай ажил хийлгэх ял 899 хүнд оноожээ. Энэ нь өмнөх оны мөн үетэй харьцуулбал хорих ял оногдуулсан тоо 2017-оор буюу 2.2 дахин буурсан бол торгох ял 3756-аар буюу 24.9 дахин, нийтэд тустай ажил хийлгэх ял 675-аар буюу 4 дахин тус тус өссөн байна. Шүүхээс 3756 хүн, хуулийн этгээдийг нийт 3 тэрбум 131 сая 355 мянга 211 төгрөгийн торгох ялаар шийтгэсэн нь өмнөх оны мөн үеийн үзүүлэлтээс 5 дахин нэмэгдсэн байна.

Цагдан хорих зөвшөөрлийн тоо буурав. Улсын хэмжээнд 2018 оны хагас жилд цагдан хорих зөвшөөрөл олгосон хүний тоог өмнөх онтой харьцуулбал 1287 хүн буюу 62.0 хувиар, сэжигтнийг баривчлах зөвшөөрөл олгосон хүний тоо 403-аар буюу 7.0 дахин буурсан нь 2017 оны 07 дугаар сарын 01-ний өдрөөс хэрэгжиж эхэлсэн Эрүүгийн хэрэг хянан шийдвэрлэх тухай хуульд сэжигтнийг баривчлах болон цагдан хорих таслан сэргийлэх арга хэмжээг авах үндэслэлийг илүү тодорхой болгож хуульчилж өгсөнтэй холбоотой гэж үзэхээр байна.

Хорих ял эдлэх дэглэмийг бууруулав. Улсын хэмжээнд 2017 онд нийт 96 ялтны хорих ял эдлэх дэглэмийг бууруулж, хаалттайгаас нээлттэй дэглэмд шилжүүлсэн нь өнгөрсөн онтой харьцуулбал 51 хүн буюу 34.6 хувиар, хорих ял эдлэх дэглэмийг хүндрүүлж, нээлттэй дэглэмээс хаалттай дэглэмд шилжүүлсэн хүний тоо 5 хүнээр буюу 45.4 хувиар тус тус буурсан байна.

Б. Иргэний хэрэг

Онцгой ажиллагааны журмаар хянан шийдвэрлэсэн хэргийн тоо өсөв. Анхан шатны шүүхийн шийдвэрлэсэн иргэний хэргийн тоо өмнөх оны мөн үеэс 996 хэрэг буюу 4 хувиар өссөн байна. Хянан шийдвэрлэсэн хэрэг, маргаанаас Гэр бүлийн тухай хуулиар шийдвэрлэсэн хэргийн тоо 117 хэргээр буюу 4.8 хувиар, Хөдөлмөрийн тухай хуулиар шийдвэрлэсэн хэргийн тоо 395 хэргээр буюу 29.5 хувиар, Дампуурлын тухай хуулиар шийдвэрлэсэн хэргийн тоо 4 хэргээр буюу 28.5 хувиар, Шүүхийн шийдвэр гүйцэтгэх тухай хуулиар шийдвэрлэсэн хэргийн тоо 48 хэргээр буюу 20.6 хувиар тус тус буурсан.

Иргэний хэрэг шүүхэд хянан шийдвэрлэх тухай хуулиар шийдвэрлэсэн хэрэг өмнөх оны мөн үетэй харьцуулахад 2692 хэргээр буюу 39.5 хувиар өссөн бөгөөд нийт шийдвэрлэсэн иргэний хэргийн 37.3 хувьтай тэнцэж байна. Үүнээс онцгой ажиллагааны журмаар 8129 хэрэг шийдвэрлэсэн нь өмнөх оны мөн үеэс 2200 хэрэг буюу 37.1 хувиар өссөн дүнтэй байна.

В. Захиргааны хэрэг

Төрийн албаны маргаан, газрын маргааны тоо буурав. Захиргааны хэргийн анхан шатны шүүхийн шийдвэрлэсэн нийт хэргийн тоо өмнөх оны мөн үеэс 284 хэргээр буюу 26.5 хувиар буурсан байна. Захиргааны хэргийн хувьд ашиг малтмалтай холбоотой маргаан 15 хэргээр буюу 20.0 хувиар, татварын маргаан 3 хэргээр буюу 9.3 хувиар, төрийн хяналт шалгалттай холбоотой маргаан 4 хэргээр буюу 14.2 хувиар, нийгмийн даатгалтай холбоотой маргаан 4 хэргээр буюу 33.3 хувиар тус тус өссөн байна.

Харин төрийн албаны маргаан 54.8 хувиар, газрын маргаан 22.4 хувиар, эд хөрөнгийн эрхтэй холбоотой маргаан 43.4 хувиар, тендерийн маргаан 40.9 хувиар тус тус буурсан үзүүлэлттэй байна.

Г. Давж заалдах, хяналтын шатны шүүхийн шийдвэрлэсэн хэргийн тоо нэмэгдэв

Давж заалдах шатны шүүх 2018 оны хагас жилд эрүүгийн 1183 хэрэг, иргэний 1967 хэрэг, захиргааны 705 хэрэг, нийт 3855 хэрэг, маргааныг хянан шийдвэрлэжээ. Давж заалдах шатны шүүхээр хянан шийдвэрлэсэн нийт хэрэг өмнөх оны мөн үеэс 7.2 хувиар буурсан байх ба эрүүгийн хэрэг 8.9 хувиар, иргэний хэрэг 8.4 хувиар, захиргааны хэрэг 23.3 хувиар тус тус буурсан үзүүлэлттэй байна.

Хяналтын шатны шүүх 2018 оны эхний хагас жилд эрүүгийн 281 хэрэг, иргэний 1043 хэрэг, захиргааны 283 хэрэг, нийт 1607 хэргийг хянан шийдвэрлэсэн байна. Хянан шийдвэрлэсэн эрүүгийн хэрэг өмнөх оноос 18.0 хувиар, захиргааны хэрэг 5.0 хувиар тус тус буурсан бол иргэний хэрэг 4.0 хувиар өсжээ.

Шүүхийн судалгаа, мэдээлэл, сургалтын хүрээлэн

Хэвлэл мэдээлэл, олон нийттэй харилцах хэлтэс

Улаанбаатар-Дархан чиглэлийн замын өргөтгөл шинэчлэл, Дархан-Алтанбулаг чиглэлийн замыг засварлахад Азийн хөгжлийн банк 60 сая ам.долларын хөнгөлөлттэй зээл олгоно. Зээлийн хэлэлцээрт Сангийн сайд Ч.Хүрэлбаатар, Азийн хөгжлийн банкны Монгол дахь суурин төлөөлөгч Ёланда Фернандез Ломмен нар гарын үсэг зурлаа.

Манай улсыг хоёр хөрш оронтой автозамаар холбох “Бүс нутгийн автозамыг хөгжүүлэх, зам засвар” төслийн хүрээнд одоогийн байгаа замыг нэг метрээр өргөтгөн, огцом эргэлт, өгсөлт, уруу ихтэй, үзэгдэх орчин хязгаарлагдмал есөн цэгт замын тэмдэг, тэмдэглэгээг сайжруулах зэрэг олон ажил хийх юм.

Азийн хөгжлийн банкны 60 сая ам.долларын хөнгөлөлттэй зээл нь 27 жилийн хугацаатай гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Энэ сарын эхээр Токио хотноо зохион байгуулсан “Монгол-Японы бизнесийн форум”-ын үеэр манай улсын дотоодын ААН Японы зах зээлд бараа, бүтээгдэхүүнээ худалдан борлуулах гэрээ хийсэн юм. Үүнд:

• Форумд оролцогч арьсан цүнх, түрийвч үйлдвэрлэгч “Марал Дизайн” ХХК Японы 50 жилийн түүхт “Kawano Japan” компанитай хамтран Япон стандартын дагуу үйлдвэрлэсэн арьсан цүнх, түрийвчийг экспортлохоор тохиролцов.
• Органик гоо сайхны бүтээгдэхүүн үйлдвэрлэгч “Спирит оф Натур” компани Япон улсын шилдгийн шилдэг органик гоо сайхны бүтээгдэхүүний нэгдсэн худалдааны төвөөр зочилж, бүтээгдэхүүн хөгжүүлэлтийн судалгаа хийсэн төдийгүй өөрийн бүтээгдэхүүний орц найрлагийг Япон Улсын шинжилгээний лабораториор шинжлүүлэхээр боллоо.
• “Монос” групп өөрийн бүтээгдэхүүнийг Японы зах зээлд худалдан борлуулах гэрээ хийлээ.
• “ХАА-н бирж” ХХК-ийн Арилжааны хэлтсийн захирал Д.Оюун-Эрдэнэ Японы биржийн хувьчлалыг сонирхогч хөрөнгө оруулалтын компанитай уулзаж, хамтран ажиллах эхний алхам хийлээ.

Онцгой байдлын ерөнхий газраас Гал унтраах техникийн олон төрөлт спортын улсын аварга шалгаруулах тэмцээнийг НОБГ-ын харьяа Баянхошуун дахь сургалтын цогцолборт өнгөрсөн амралтын өдрүүдэд зохион байгууллаа.

Улсын аварга шалгаруулах 21 дэх тэмцээнд “Алтан гадас”, “Мөнгөн дуулга”, “Од”, “Шонхор”, “Ган дуулга” гэсэн 5 клубын нийт 21 багийн 200 орчим тамирчин оролцож, довтолгооны шат, саадтай 100 м, 4х100 метрийн буухиа гүйлт, байлдааны тархалт гэсэн дөрвөн төрлөөр хурд хүч, авхаалж самбаагаа сорин өрсөлдөж, аваргуудаа шалгаруулсан юм.

Довтолгооны шатны төрөлд нэгдүгээр байранд УБТЗЦХАлба, спортын мастер Н.Пүрэвдаш 15:00 секундээр, хоёрдугаар байранд Булган аймгийн ОБГ-ын ГТУА 20-р ангийн аврагч, ОУХМ О.Мөнхтунгалаг 15:15 секундээр, гуравдугаар байранд НОБГ-ын Чингэлтэй дүүргийн ОБХ-ийн ГТУА 10-р ангийн аврагч, спортын дэд мастер Э.Алтаншагай 15:19 секундээр, мөн Увс аймгийн ОБГ-ын ГТУА 41-р ангийн аврагч Д.Даваабаяр 15:62 секундын амжилтаар тус тус шалгарлаа.

Мөн саадтай 100 метрийн төрөлд нэгдүгээр байранд, Орхон аймгийн ОБГ-ын ГТУА 58-р ангийн аврагч Э.Баттулга 17:49 сек, хоёрдугаар байранд НОБГ-ын Чингэлтэй дүүргийн ОБХ-ийн ГТУА 10-р ангийн аврагч, спортын дэд мастер Э.Алтаншагай 20:54 сек, гуравдугаар байранд УБТЗЦХАлба спортын мастер Д.Саруул-Ирээдүй 23:33 сек, мөн НОБГ-ын Сонгинохайрхан дүүргийн ОБХ-ийн ГТУА 26-р ангийн аврагч Д.Ариунболд 23:63 секундын амжилтаар шалгарав.

Харин 4х100 метрийн буухиа төрлийн тэмцээний нэгдүгээр байранд 1:01:63 амжилтаар, ХСИС-ийн ОБСургуулийн 1-р баг, хоёрдугаар байранд 1:03:12 амжилтаар, Орхон аймгийн ОБГ-ын ГТУА 58-р анги, гуравдугаар байранд 1:02:94 амжилтаар, ХСИС-ийн ОБСургуулийн 2-р баг тус тус шалгарсан бол байлдааны тархалтын төрөлд нэгдүгээр байранд 33:31 секундээр НОБГ-ын Налайх дүүргийн ОБХ-ийн ГТУА 28-р анги, хоёрдугаар байранд 33:54 секундээр Дархан аймгийн ОБГ-ын ГТУА 22-р анги, гуравдугаар байранд 34:19 секундээр Орхон аймгийн ОБГ-ын ГТУА 56-р ангийн баг тамирчид тус тус шалгарсан юм.

Хоёр төрөлтийн тэмцээний нэгдүгээр байранд 32:76 сек амжилтаар Дархан аймгийн ОБГ-ын ГТУА 22-р ангийн аврагч, ОУХМастер О.Батсайхан, хоёрдугаар байранд 33:71 сек амжилтаар НОБГ-ын Чингэлтэй дүүргийн ОБХ-ийн ГТУА 10-р анги, спортын дэд мастер Э.Алтаншагай, гуравдугаар байранд 34:03 сек амжилтаар Орхон аймгийн ОБГ-ын ГТУА 58-р ангийн аврагч Ц.Балжинням нар тодорлоо.

Харин тэмцээний нэгдсэн дүнгээр гуравдугаар байранд 20 оноогоор, Орхон аймгийн ОБГ-ын ГТУА 58-р анги, хоёрдугаар байранд 18 оноогоор, Булган аймгийн ОБГ-ын ГТУА 20-р анги, нэгдүгээр байранд 9 оноогоор, Орхон аймгийн ОБГ-ын ГТУА 56-р анги шалгарч, 2018 оны улсын аварга шалгаруулах Гал унтраах техникийн олон төрөлт спортын аварга боллоо гэж Онцгой байдлын ерөнхий газраас мэдээллээ.

Булган аймгийн Сайхан сумын Ундрах багийн “Хөндлөн бүрд” гэдэг газар /аймгийн төвөөс баруун хойд зүгт 65 км-т, сумын төвөөс зүүн зүгт 35 км-т/07.22-н буюу өчигдөр 20:00 цагийн орчим дуу цахилгаантай бороо оржээ.

Энэ үед иргэн 19 настай эмэгтэй О, 16 настай эмэгтэй О нар мотоцикльтой малдаа явж байгаад аянгад цохиулсан байна. Мэдээллийн дагуу онцгой байдлынхан очиж, тэднийг эмнэлэгт хүргэсэн бол тус сумын эмч Д.Загдсүрэн анхны тусламж үзүүлж, ар гэрийнхэнд нь хүлээлгэн өгчээ.

Элэгний B, C вирус илрүүлэх хурдавчилсан оношлогоо, элэгний эхо, элэгний хатуурлыг тодорхойлох Фиброскан үзлэг болон мэргэжлийн эмч нарын зөвөлгөөнд хамрагдаараа. Та элгээ хайралдаг уу? Та гэр бүл, найз нөхөд, хайртай тодны хүмүүстэйгээ 2018 оны 07 сарын 27-ны өдрийн 12,30-17,30 цагын хооронд Сүхбаатарын талбайд ирээрэй.

Цахилгааны аюулгүй байдал хангаагүйн улмаас эрүүл мэнд, амь насаараа хохирох тохиолдол гарсаар байна. Цахилгааны шугам сүлжээнийхээ аюулгүй байдлыг дахин нэг шалгана уу?

Эрчим хүчний тухай хуулийн 30 дугаар зүйл “Хэрэглэгчийн эрх, үүрэг”-ийн 1.8-д зааснаар “Хэрэглэгч нь өөрийн эзэмшлийн шугам сүлжээ, тоног төхөөрөмжийн бүрэн бүтэн, аюулгүй байдал, засвар үйлчилгээ, баталгаажуулалтыг бүрэн хариуцна” хэмээн заасан байгаа юм. Энгийн үгээр мэргэжлийн байгууллагууд тоолуур хүртэл бүх үйл ажиллагаанд аюулгүйн хяналт тавин ажилладаг. Тоолуураас дотогш хэрэглэгч та өөрийн өмч хөрөнгө, тоног төхөөрөмжүүдийг бүрэн хариуцах ёстой. Иймд цахилгааны ил гарсан утас, шалбархай хэсэг зэрэг эрсдэлтэй хэсгүүдийг дахин нэг шалган өөрийн болон бусдын аюулгүй байдлыг ханган ажиллахыг мэргэжлийн байгууллагууд онцгойлон анхааруулж байна.

Санхүүгийн зохицуулах хороо банкнаас бусад санхүүгийн зах зээлүүдийн хөгжлийг хангах бодлогын зохицуулалтыг хэрэгжүүлэх үүднээс олон улсын хэмжээнд үнэт цаасны, даатгалын, банк бус санхүүгийн болон хадгаламж, зээлийн хоршооны салбарт гарч буй ололт дэвшил, шинэ хандлага, сайн туршлагыг судлах болон тэдгээрийн Монгол Улсад нэвтрүүлэх боломж, давуу болон сул талуудыг шинжлэх ажлыг тогтмол хийдэг юм. Үүний дотор олон улсын байгууллагуудаас манай орны эдийн засаг, нийгмийн төлөв байдалтай төстэй улс орнуудад хэрэгжүүлж буй хөтөлбөр, туршилтуудад ажиглалт, судалгаа хийж байна.

АНУ-ын Олон улсын Хөгжлийн агентлаг (USAID)-аас улс орны нийгэм, эдийн засгийн салбаруудад түншлэх, хамтран ажиллах явдлыг нэмэгдүүлэх, мөн салбар хоорондын уялдаа холбоо, харилцааг дэмжих Хамтын ажиллагааны хөгжлийн хөтөлбөр (ХАХХ, Cooperative Development Program, CDP)-ийг хэрэгжүүлж байна. Хөтөлбөрийн хүрээнд өнөөдрийн байдлаар 15 орны хөдөө аж ахуй, санхүү, эрүүл мэнд, эрчим хүч, мэдээлэл, харилцаа холбооны технологийн салбарт хоршоодыг бэхжүүлэх төсөл хэрэгжүүлээд байгаа юм.

Эдгээрийн дотор Латин Америкийн зарим улс оронд санхүүгийн хоршооны арга ажиллагааг жижиг үйлдвэрлэгчид, тэр дундаа хөдөө аж ахуй, газар тариалангийн салбарт ажиллаж байгаа жижиг бизнес эрхлэгчдэд нэвтрүүлэх төслүүдийг Дэлхийн Хадгаламж, зээлийн хоршооны Зөвлөл (ДХЗХЗ, World Council of Credit Unions, WOCCU)-тэй хамтран хэрэгжүүлж байгаа нь сонирхол татаж буй юм.

Тухайлбал, Кени Улсад хэрэгжүүлж буй “Хөдөөгийн жижиг үйлдвэрлэгчдийн орлогыг сайжруулах” төсөл тариалан эрхэлдэг жижиг аж ахуйнууд, айл өрхийг Хадгаламж, зээлийн хоршоодод нэгтгэх замаар санхүүгийн хэрэгцээ шаардлага, тулгамдсан асуудлыг шийдвэрлэх зорилготой юм. Ингэхдээ техник туслалцаа үзүүлж, хөдөөгийн санхүүд зориулсан тусгай арга хэрэгслүүд болон технологийн шийдэлд тулгуурласан санхүүгийн бүтээгдэхүүн, үйлчилгээ, тэдгээрт нийцүүлсэн дэд бүтцийг шийдвэрлэхээр ажиллаж байна.

Кенийн хөдөө нутаг болон хотжилтийн нөхцөл байдал, тэдгээрийн хөгжлийн ялгаа, газар тариалан болон загас агнуурын, мөн мал аж ахуйн үйлдвэрлэл эрхлэгчдийн тархай бутархай байдал, дэд бүтцийн хөгжил тааруу, байгаль, цаг уурын нөлөөлөл их зэрэг нь манай улсын хөдөө, орон нутгийн аж ахуйн эрхлэлтийн байдалтай төстэй юм. Иймд Хороо дээрх төслийн хэрэгжилт, үр дүн болон нутагших байдал зэргийг ажиглан, дүн шинжилгээ хийж байна.

“Хөдөөгийн жижиг үйлдвэрлэгчдийн орлогыг сайжруулах” төслөөр тухайн аж ахуйн болон санхүүгийн үйл ажиллагааны ерөнхий мэдлэг, аргачлал, загвар дизайныг сайжруулж, иргэдийн ур чадвар, мэргэшлийг дээшлүүлэхээс гадна гар утас зэрэг хувийн ухаалаг төхөөрөмж (PDA) болон ПОС төхөөрөмжүүд, бусад арга хэрэгслийг нэвтрүүлэх боломжит хувилбарыг эрэлхийлж байгаа нь онцлог юм гэж Санхүүгийн зохицуулах хорооноос мэдээллээ.