Тулгар төрийн 2227, Их Монгол Улсын 812, Ардын хувьсгалын 97 жилийн ой, Ардчилсан хувьсгалын 29 жилийн ой, Үндэсний их баяр наадмын хүчит бөхийн барилдаанд Увс аймгийн Ховд сумын харьяат, “Увс нуур” дэвжээний бөх Намсрайжавын Батсуурь ес даван түрүүлж, Улсын аварга болсон билээ.
Түүнийг Онцгой байдлын ерөнхий газрын удирдлагууд хүлээн авч уулзан, баяр хүргэсэн байна. Мөн энэ үеэр ОБЕГ-ын дарга, хошууч генерал Т.Бадралын тушаалаар Н.Батсуурьд Дэд хурандаа цол олгожээ.
Бидний гэрт хүүхдэд аюул учруулах нүдэнд үл үзэгдэх нэгэн хачиг амьдарч байдаг аж. Тэрхүү хачиг нь хүүхдийг харшилтай болгохоос гадна багтраа үүсгэх аюултай гэнэ. Хүүхдийн гуурсан хоолойн багтраа өвчиний 80 хувь нь энэхүү хачигнаас үүсдэг болох нь тогтоогдсон байна.
Энэ хачиг нь хүүхдийн үслэг зөөлөн тоглоом, буйдан, хөнжил дэрэнд үй олноороо аж төрөн амьдардаг аж. Тэдгээр хачигны хоол хүнс бол бидний биеэс гуужин унадаг арьс, үсний хаг юм. Нэг хүн хоногт 1-1,5 гр хагийг арьснаасаа гуужуулан хаядаг нь хэдэн зуун мянган хачигийг өлхөөн тэжээчихдэг байна.
Энэхүү хачигийг гэрийн тоосны хачиг гэж нэрлэдэг. Учир нь тэр гэрийн тоосон дунд, үслэг, зөөлөн эдлэл дунд үл үзэгдэгч хэлбэрээр арзагар найман хөлөөрөө зүүгдэн амьдардаг. Эмэгчин хачиг дөрвөн долоо хоногт 300 хүртэл өндөг гаргадаг. Түүний өндөг бие гүйцсэн хачиг болтлоо дөрвөн долоо хоног зарцуулна. Үржил нь маш худацтай тул түүнийг устгана гэдэг тийм ч амар биш. Бас нэг анхаарах зүйл бол энэхүү хачиг нь намар өвлийн улиралд хамгийн их харшил өгдөг гэнэ. Ингэхдээ цөөн үед хамрын битүүрэлт найтаалт ажиглагдаж байдаг бол хачиг ихэсмэгц багтраа хөдөлдөг байна.
Иймд энэ хачигийг тэжээж, үржүүлэхгүйн тулд гэрээ байнга цэвэрлэж, өрөөний дулааныг тохируулах хэрэгтэй аж. Тодруулбал, хачиг гэрийн тоостой нөхцөлд болон 20-30 хэм дулаан орчинд хамгийн тохиромжтой оршин тогтнодог байна.
.jpg)
Дорнод аймгийн Засаг даргын 2016-2020 оны үйл ажиллагааны хөтөлбөрийн дагуу аймгийн Иргэдийн Төлөөлөгчдийн Хурлын Тэргүүлэгчдийн тогтоолоор батлагдсан “Ахмадын ачлал” хөтөлбөр, аймгийн Засаг даргын захирамжийн хэрэгжилтийг хангах ажлын хүрээнд долдугаар сарын 21-ний өдөр соёл, урлаг, спортын салбарын ахмадын төлөөлөлтэй уулзлаа.
Уулзалтад Дорнод аймгийн Засаг даргын орогч Ч.Ганбат, аймгийн Засаг даргын Тамгын газрын Нийгмийн бодлогын хэлтсийн дарга О.Байгалмаа нар оролцлоо. Энэхүү арга хэмжээнд соёл, урлаг, спортын салбарын тэр дундаа Аймгийн төв номын сан, Музей, Хөгжимт драмын театр, Биеийн тамир спортын газар, сумдын Соёлын төвийн өндөр настнууд болон ахмад шатарчид, шатрын багш нар нийт 20 гаруй ахмадууд оролцож, нийгэм, цаг үеийн тухайд болон тус салбарын ахмад настнуудад үзүүлэх аливаа арга хэмжээ, хандах хандлага, тусламж дэмжлэг тааруу байдаг тухай хэлж санал бодлоо хуваалцлаа.
Мөн аймгийн хэмжээнд тулгамдаж буй асуудал, цаашид авах арга хэмжээний талаар ахмадуудын үгийг залуу хойч үе, төрийн байгууллагуудад хүргэсэн арга хэмжээг тогтмол зохион байгуулж ажилладаг ажээ.
Өмнөх сард аймгийн Засаг даргын дэргэдэх Хөдөлмөр, халамжийн үйлчилгээний газрын “Хөдөлмөрт бэлтгэх сургалтын төв”-д хувиараа үйлдвэрлэл, худалдаа, үйлчилгээ эрхлэгч ахмад настнуудын төлөөлөлтэй уулзалт зохион байгуулж оролцсон бөгөөд сар бүрийн уулзалтаас гарч буй санал, зөвлөмжүүдийг холбогдох байгууллага, албан тушаалтанд уламжлан, зохих арга хэмжээг шат шатандаа авч, бодлогын түвшинд хэрэгжүүлэн ажиллаж байна.
Энэ сарын 17-ны өдөр Сэлэнгэ аймагт 12:35-16:40 хооронд орсон усархаг борооны улмаас орон гэргүй болсон хоёр өрхөд аймгийн Засаг даргын нөөц сангаас гэр олголоо. Гэрийг аймгийн Засаг даргын орлогч Б.Нарантуяа, Онцгой байдлын газрын дарга, хурандаа Г.Баатар нар гардуулан өгсөн юм.
Үерийн улмаас орох орон байргүй болсон зарим иргэдэд гэр олгох ажил аймгийн Засаг даргын өгсөн үүрэг чиглэлийн дагуу хийгдэж байна гэж Сэлэнгэ аймгийн Онцгой байдлын газраас мэдээллээ.
Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай Улсын Их Хурлын 2018 оны 40 дүгээр тогтоолын 2.4-т “хүүхдийн мөнгөн тэтгэмж авах хүсэлтэй өрхийн судалгааг хийж, хүсэлт гаргасан иргэдэд хүүхдийн мөнгөн тэтгэмж олгох асуудлаар олон улсын холбогдох байгууллагатай зөвшилцөн, Монгол Улсын Засгийн газрын 2016-2020 оны үйл ажиллагааны хөтөлбөрийн биелэлтийг хангах” гэж заасны дагуу хүүхдийн мөнгөн тэтгэмжид хамрагдахгүй байгаа өрх, иргэдээс “Хүүхдийн мөнгөн тэтгэмж авах хүсэлтэй өрхийн судалгаа” авах ажлыг 2018 оны 09 дүгээр сарын 01-ний өдрийг хүртэлх хугацаанд зохион байгуулж байна.
Иргэн та судалгаатай холбоотой дэлгэрэнгүй мэдээллийг оршин суугаа газрынхаа Хөдөлмөр, халамжийн үйлчилгээний газар, хэлтэс болон сум, хорооны хөдөлмөр эрхлэлт, халамжийн асуудал хариуцсан мэргэжилтнээс тодруулах боломжтой.
Тусгай олимп нь спортын уралдаан тэмцээнээр дамжуулж оюуны бэрхшээлтэй хүүхэд залууст урам зориг өгөх, бие бялдрыг нь хөгжүүлэх, тэднийг бусадтай адил тэгш эрхтэй иргэн гэдгийг олон нийт, нийгэмд таниулах зорилготой олон улсын хүмүүнлэгийн хөдөлгөөн билээ. Хөвсгөл аймгийн Засаг даргын Тамгын газар, Монголын тусгай Олимпийн хороо, Дэлхийн зөн Монгол олон улсын байгууллагын Хөвсгөл орон нутгийн хөгжлийн хөтөлбөр хамтран оюуны хөгжлийн бэрхшээлтэй хүүхэд, залуусын дунд “Хөгжилд хамтдаа” тусгай олимпийн зуны спортын наадмыг 2018 оны наймдугаар сарын 23-24-ний өдрүүдэд “Урандөш” зусланд зохион байгуулах гэж байна.
Энэхүү наадам нь хөнгөн атлетик, ширээний теннис, жудо, агаарын теннис, хамтарсан багийн сагсан бөмбөг зэрэг спортын 5 төрлөөр явагдах бөгөөд Хөвсгөл аймгийн 23 сумаас нийт 100 гаруй оюуны хөгжлийн бэрхшээлтэй хүүхэд залуус оролцох юм. Спортын тэмцээнээс гадна эрүүл мэндийн урьдчилан сэргийлэх үзлэгүүдийг нүд, шүд, амны хөндий эрүүл ахуй, чих хамар хоолойн нарийн мэргэжлийн эмч нар хийж, тамирчдад нэг бүрчлэн зөвлөгөө өгнө. Мөн эцэг эх, асран хамгаалагч нарт зориулсан эрүүл мэндийн боловсрол олгох сургалтуудыг зохион байгуулж, гэр бүл хоорондоо туршлага хуваалцах боломжийг бүрдүүлнэ.
1968 онд үүсгэн байгуулагдсан Тусгай олимпийн хөдөлгөөн 50 жилийнхээ ойг энэ жил дэлхийн 170 гаруй улсад тэмдэглэн өнгөрүүлж байна. Энэхүү 50 жилийн ойд МТОХ Хөвсгөл аймгийн ЗДТГ-тай хамтран Зуны спортын наадмыг зохион байгуулж байгаагаараа онцлог юм байна.
Дашрамд дурдахад, 2019 оны гуравдугаар сард Олон улсын Тусгай Олимпийн зуны наадам Арабын Нэгдсэн Эмират улсын Абу Даби хотод болох юм. Тус наадамд МТОХ-ны 28 тамирчин, дасгалжуулагч оролцох юм.
Улсын Их Хурлын Аюулгүй байдал, гадаад бодлогын байнгын хороо 2018 оны хаврын ээлжит чуулганы хугацаанд Монгол Улсын Үндсэн хууль, Монгол Улсын үндэсний аюулгүй байдлын болон гадаад бодлогын үзэл баримтлалын хүрээнд үндэсний аюулгүй байдлыг хангах үйл ажиллагаа, гадаад бодлогын хэрэгжилтийг хангах, Улсын Их Хуралд өргөн мэдүүлсэн хууль, бусад шийдвэрийн төслийн талаар болон нэгдсэн хуралдаанаар хэлэлцэх тодорхой асуудлаар санал, дүгнэлт гаргах, Байнгын хорооны эрхлэх асуудлын хүрээнд Улсын Их Хурлын хянан шалгах чиг үүргийг хэрэгжүүлэх, эрхлэх асуудлын хүрээний байгууллагын үйл ажиллагаанд тавих хяналтыг хэрэгжүүлэх, үүрэг, чиглэл өгөх зэргээр бүрэн эрхээ хэрэгжүүлж ажиллалаа.
Тус Байнгын хороо ээлжит чуулганы хугацаанд 13 удаа, Тусгай хяналтын дэд хороо 2, Цахим бодлогын түр хороо 1 удаа хуралдаж, 26 асуудал хэлэлцсэн бөгөөд үүнээс Байнгын хорооноос нэгдсэн хуралдаанд оруулж батлуулсан хуулийн төсөл 17, Улсын Их Хурлын тогтоолын төсөл 3-ыг хэлэлцүүлж шийдвэрлүүлэв. Тухайлбал, Орон нутгийн хамгаалалтын тухай хууль батлагдсанаар тайван цагт иргэдийг орон нутгийн хамгаалалтын үйл ажиллагаанд сургах, учирч болзошгүй аюулаас урьдчилан сэргийлэх, орон нутгийн хамгаалалтын бэлтгэлийг бүхий л түвшинд хангах, орон нутгийн хамгаалалтад төрийн байгууллага, иргэн, хуулийн этгээдийн эрх, үүргийг тогтоож, Монгол Улсын батлан хамгаалах чадавхыг нэмэгдүүлэн, онц болон дайны байдлын үед орон нутгаа хамгаалах замаар Монгол Улсыг гадны зэвсэгт халдлага, түрэмгийлэлээс ард иргэдийн оролцоотойгоор батлан хамгаалах, иргэний аюулгүй байдлыг хангахад дэмжлэг үзүүлэх зэрэг олон төрлийн арга хэмжээ цогц байдлаар хэрэгжих эрх зүйн зохицуулалт бий болж, улс орноо батлан хамгаалах нэгдмэл тогтолцооны цогц байдал хангагдлаа.
Дайчилгааны тухай хуульд нэмэлт, өөрчлөлт оруулах тухай хууль батлагдсанаар дайчилгааны талаарх субъектүүдийн үүрэг, үйл ажиллагааны уялдаа холбоо сайжрахын зэрэгцээ, хуулийн давхардал, хийдэл, зөрчил арилж, нэгдсэн удирдлага, төлөвлөлт бүхий дайчилгааны тогтолцоог бүрдүүлэх эрх зүйн орчин боловсронгуй боллоо.
Улсын нисэхийн тухай хуульд нэмэлт, өөрчлөлт оруулснаар улсын агаарын хөлгийн ашиглалтын үед осол зөрчил гарахаас урьдчилан сэргийлэх, улсын нисэхийн нислэг-техникийн осол зөрчлийг шинжлэн шалгах үйл ажиллагааны эрх зүйн зохицуулалт тодорхой болж, улсын нисэхийн агаарын хөлгийн нислэгийн ангилал, төрөл шинээр тодорхойлогдож, шинээр байгуулагдсан Агаарын цэргийн командлал хуулиар хүлээсэн үүргээ биелүүлэх нөхцөл, боломж бий болж, эрх зүйн зохицуулалт сайжирах, Агаарын цэргийн командлалын хэрэгжүүлэх нислэгийн хөдөлгөөний зохицуулалт нарийвчлагдан зохицуулагдлаа.
Нэгдсэн Үндэстний Байгууллагын Хүнс, хөдөө аж ахуйн байгууллагын Хүнс, хөдөө аж ахуйн ургамлын генетик нөөцийн олон улсын гэрээг соёрхон баталснаар газар тариалангийн үйлдвэрлэлийг нэмэгдүүлэх, эрчимжүүлэхэд нэн шаардлагатай манай орны нөхцөлд тохирсон шинэ таримал, генетик материалаар таримал ургамлын генийн санг баяжуулж, Монгол орны хөрс, цаг уурын нөхцөлд тохиромжтой, бүтээмж өндөртэй шинэ сортуудыг бий болгох, дэлхийн таримал ургамлын генетик нөөцийг судалгаанд ашиглах эрх зүйн орчинг бүрдүүлэх боломж нээгдлээ.
Монгол Улсын Засгийн газар, Бүгд Найрамдах Хятад Ард Улсын Засгийн газар, Оросын Холбооны Улсын Засгийн газар хооронд байгуулсан Азийн авто замын сүлжээгээр олон улсын авто замын тээвэрлэлт гүйцэтгэх тухай хэлэлцээр соёрхон батлах тухай хуулийг баталснаар Монголын тээвэрлэгчид гуравдагч улс руу автотээвэрлэлт гүйцэтгэх, дэлхийн зах зээлд өрсөлдөх, дамжин өнгөрөх тээвэрлэлтийн шинэ гарц нээгдэх эрх зүйн зохицуулалт бий болох, Монгол Улс болон гуравдагч орнуудын хооронд ТИР конвенцийн хүрээнд ачаа тээвэрлэлт зохион байгуулах боломж бүрдэх, Монгол Улсын гадаад худалдаа өргөжиж, эдийн засагт эерэгээр нөлөөлөх, Ази-Европыг хамарсан худалдаа, тээвэр, татвар, даатгалын асуудлууд хөнгөвчлөгдөх зэрэг ач холбогдолтой.
Байнгын хорооны хуралдаанаар олон улсын гэрээ, хэлэлцээрийн төслийг зөвшилцөх 10 асуудал хэлэлцэж, санал, дүгнэлт, хуралдааны тэмдэглэлээ Засгийн газарт хүргүүлэв. Тухайлбал, Нийгмийн хамгааллын тухай Монгол Улс, Бүгд найрамдах Турк улс,Бүгд найрамдах Чех улс хоорондын хэлэлцээр, Монгол Улсын Засгийн газар, Европын сэргээн босголт, хөгжлийн банк хооронд байгуулах “Улаанбаатар хотын хатуу хог хаягдлыг боловсруулах байгууламжийг шинэчлэх төсөл”-ийн Зээлийн хэлэлцээр, “Иргэний болон аж ахуйн хэргийн талаар эрх зүйн туслалцаа харилцан үзүүлэх тухай, Эрүүгийн хэргийн талаар эрх зүйн туслалцаа харилцан үзүүлэх тухай, Гэмт этгээдийг шилжүүлэх тухай” Монгол Улс, Бүгд Найрамдах Беларусь Улс хоорондын гэрээ”-ний төслүүд, Монгол Улсын Засгийн газар, АНУ-ын Мянганы сорилтын корпорацийн хооронд байгуулах Компакт гэрээний төслүүдийг тус тус зөвшилцөв. Мөн Элчин сайдыг эгүүлэн татах, томилох саналыг хэлэлцсэн дүнгийн талаарх Улсын Их Хурлын даргын албан тоотыг Монгол Улсын Ерөнхийлөгчид хүргүүллээ.
Байнгын хороо эрхлэх асуудлынхаа хүрээнд Батлан хамгаалах яам, Зэвсэгт хүчний Жанжин штабынүйл ажиллагаатай танилцаж, шаардлагатай мэдээ, мэдээллийг сонссон. Мөн “Газар хөдлөлтийн гамшгаас урьдчилан сэргийлэх, эрсдэлийг бууруулах талаар авах зарим арга хэмжээний тухай” Улсын Их Хурлын 2016 оны 34 дүгээр тогтоолын хүрээнд хэрэгжүүлсэн арга хэмжээний биелэлт, үр дүнгийн талаарх асуудлыг Байнгын хорооны хурлаар сонсож, танилцав. Байнгын хорооны дарга О.Содбилэг болон ажлын албаны ажилтнууд Зэвсэгт хүчний Сургалтын нэгдсэн төвийн үйл ажиллагаа, артиллерийн байлдааны буудлагатай хээрийн сургуультай танилцаж, Батлан хамгаалах яам, Гадаад харилцааны яам, Хууль зүй, дотоод хэргийн яам, Шүүхийн ерөнхий зөвлөл, Харилцаа холбоо, мэдээллийн технологийн газар зэрэг байгууллагуудаас эрхлэх асуудлынхаа хүрээнд шаардлагатай мэдээллийг авч Байнгын хорооны гишүүдийг мэдээллээр хангаж ажиллалаа.
Тайлангийн хугацаанд Гадаад харилцааны яамнаас зохион байгуулсан “Гадаад бодлогын шийдвэр гаргах механизмыг боловсронгуй болгох асуудал, Монгол Улсын жишээ” сэдэвт олон улсын бага хурал, Үндэсний Батлан хамгаалах Их сургуульд зохион байгуулагдсан “Мэдээллийн аюулгүй байдал:онол, практикийн тулгамдсан асуудал” сэдэвт олон улсын эрдэм шинжилгээний хурал,“Солонгосын нэгдлийг хангах нь” сэдэвт олон улсын бага хурал, Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” олон улсын бага хуралд Байнгын хорооны дарга О.Содбилэг үг хэлж, Байнгын хорооны гишүүд болон ажлын албаны ажилтнууд оролцлоо.
Түүнчлэн Байнгын хорооны ажлын албанаас Байнгын хорооны дарга О.Содбилэг болон Байнгын хорооны бусад гишүүдийн дотоод, гадаадын зочид, төлөөлөгчидтэй хийсэн 6 уулзалт, ярилцлагыг зохион байгуулав. Үүнд, Оросын Холбооны Улсын Цэргийн академийн захирал, хурандаа генерал В.Б.Зарудницки тэргүүтэй төлөөлөгчид, Гадаад харилцааны яамнаас зохион байгуулсан “Гадаад бодлогын шийдвэр гаргах механизмыг боловсронгуй болгох асуудал: Монгол Улсын жишээ” сэдэвт олон улсын бага хуралд оролцсон Афганистан, Бутан, Киргизстан, Мьянмар, Лаос, Шри Ланка зэрэг улсын төлөөлөгчид, Япон Улсаас Монгол Улсад суугаа Онц бөгөөд Бүрэн эрхт Элчин сайд Масато Такаока тэргүүтэй төлөөлөгчид, Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд Калыбек Ибрагимович Кобландин нарыг тус тус хүлээн авч уулзлаа.
Тайлангийн хугацаанд нийт 380 хуудас бүхий 78 өргөдөл, хүсэлт албан бичиг ирүүлснийг тухай бүрт нь шийдвэрлэн, хариуг холбогдох байгууллага, иргэдэд хүргүүллээ.
Монгол Улсын Хүнс, хөдөө аж ахуй, хөнгөн үйлдвэрийн яам, Бүгд Найрамдах Беларусь Улсын Хөдөө аж ахуй, хүнсний яам хоорондын Ажлын хэсгийн хоёрдугаар хуралдаан өнгөрөгч долоо хоногт (2018.07.18-07.19) Беларусь Улсын Минск хотноо боллоо. Хоёр орны хөдөө аж ахуйн салбарын хамтын ажиллагааг өргөжүүлэх зорилготой Ажлын хэсгийн хоёрдугаар хуралдаанд Монголын талаас ХХААХҮЯ-ны Төрийн нарийн бичгийн дарга Д.Энхбатаар ахлуулсан ажлын хэсэг оролцсон юм. Харилцан ойлголцол бүхий ажил хэрэгч байдалтай өрнөсөн хуралдааны эхэнд 2016 оны гуравдугаар сард Улаанбаатар хотноо болсон Ажлын хэсгийн анхдугаар хуралдааны Протоколын биелэлтийг дүгнэсэн. Ийнхүү хоёр жилийн хугацаанд хоёр орны хөдөө аж ахуйн салбарт багагүй ахиц гарсан учраас энэ удаагийн хоёрдугаар хуралдаанаар мал аж ахуйн салбарт өргөн хүрээтэй хамтран ажиллахаар болж, Протоколд гарын үсэг зурлаа. Тодруулбал,
Беларусийн хөдөө аж ахуйн техник, тоног төхөөрөмжийг санхүүгийн тааламжтай нөхцөлөөр буюу хүү бага, хугацаа урт, хөнгөлөлттэй зээлээр нийлүүлэх замаар Монгол Улсад фермерийг хөгжүүлэх, сүүний үйлдвэрлэлийн кластер байгуулах Засгийн газрын хамтарсан хөтөлбөр хэрэгжүүлэх боломжийг судлахаар тохиролцлоо.
Мөн Засгийн газрын хэрэгжүүлэгч агентлаг Мал эмнэлгийн ерөнхий газрыг шинээр эмхлэн байгуулж, 21 аймгийн 330 суманд салбартай болж байгаатай холбогдуулан тус улсад боловсон хүчин бэлтгэх, давтан сургах, шаардлагатай тоног төхөөрөмжөөр хангах тал дээр хамтарч ажиллах юм. Түүнчлэн Монгол Улсад хоёр орны хамтарсан сахарын үйлдвэр байгуулах, чихрийн манжингийн тариалан эрхлэх боломжийг судлан, туршлага солилцоно.
Нийслэлийн хэмжээнд энэ жил цэцэрлэгт хамрагдах 146 мянга орчим хүүхэд байгаа. Үүнээс 114 мянган хүүхдийг төрийн болон төрийн бус өмчийн 672 цэцэрлэгт цэцэрлэгт сургуулийн өмнөх насны 114 мянган хүүхдийг хамруулах төлөвтэй байгаа юм байна.
Энэ жил цэцэрлэгт 2016 оны нэгдүгээр сарын 1-нээс арванхоёрдугаар сарын 31-ныг хүртэл хугацаанд төрсөн хоёр настай хүүхдүүд хамрагдана. Тэгвэл энэ жил хараахан хоёр нас хүрээгүй хүүхдүүд ч цэцэрлэгт бүртгүүлж, элсэх боломжтой юм байна.
Ирэх есдүгээр сарын 1-нд таны хүүхэд хараахан хоёр нас хүрээгүй, хоёр нас хүрэхэд хоёр гурван сарын хугацаа дутуу байсан ч tsetserleg.ulaanbaatar.mn гэсэн цахим сайтад хүүхдээ бүртгүүлэх боломжтой юм байна. Дараа нь санамсаргүй түүврийн аргаар явагдах цахим элсэлтээр сонгогдсон тохиолдолд хүүхдээ хоёр нас хүрсэн тухайн сард нь харъяа дүүргийн элссэн цэцэрлэгтээ хамран сургах боломжтой юм.
Тухайлбал хүүхэд нь аравдугаар сарын 12-нд төрсөн байлаа гэхэд долоодугаар сарын 25-наас эхлэх цахим бүртгэлд хүүхдийнхээ нэрийг оруулж баталгаажуулна. Мөн наймдугаар сарын 24-нөөс явагдах цахим элсэлтээр тухайн хүүхэд сонгогдвол ирэх аравдугаар сарын 12-нөөс буюу хоёр нас хүрсэн өдрөөс эхлэн элссэн цэцэрлэгтээ суралцах бүрэн боломжтой аж.
Цэцэрлэгийн “Цахим бүртгэл” 2018 оны 07 дугаар сарын 25-ны 09:00 цагаас 2018 оны 08 дугаар сарын 23-ны өдрийн 23:59 цагийг дуустал 30 хоног үргэлжилнэ.
Бүртгүүлэхдээ tsetserleg.ulaanbaatar.mn системд нэвтрэн орж хүүхдийнхээ регистрийн дугаар болон доор гарч ирэх нэг удаагийн нууц түлхүүр үгийг бичиж нэвтрэх товчийг дарна.
Нэвтэрч ороход таны хүүхдийн мэдээлэл, оршин сууж байгаа хаягийн мэдээлэл, хамран сургах тойргийн цэцэрлэгийн дугаар гарч ирнэ.
Хүүхдийнхээ хаягийн мэдээллийг үнэн зөв эсэхийг шалгаад холбогдох гар утасны дугаараа оруулж, бүртгэлийн дугаар авах ногоонөнгийн товч дээр дарна.
Таны гар утсанд бүртгэлийн 5 оронтой дугаар очих бөгөөд тус дугаарыг “Бүртгэлийн дугаар” хэсэгт бичиж, бүртгэл баталгаажуулах товчийг дарснаар “Амжилттай баталгаажигдлаа” гэсэн хариу мэдэгдэл гарч ирнэ.
Харин “Цахим элсэлт”-ийн үйл ажиллагаа 2018 оны 08 дугаар сарын 24-ний БААСАН гаригийн 09:00 цагт нийслэлийн хэмжээнд нэгэн зэрэг явагдана.“Цахим элсэлт”-ийн дүнгийн мэдээллийг эцэг эх, асран хамгаалаагчдын системд бүртгүүлсэн гар утсанд мессэжээр илгээнэ. Мөн tsetserleg.ulaanbaatar.mn системийн “Шалгах”цэс рүү орж хүүхдийнхээ бүртгэлийн дугаарыг оруулж, цэцэрлэгтээ элссэн эсэхийг шалгах боломжтой.
Улсын хэмжээнд 2018 оны эхний хагас жилд 38055 эх амаржиж, 38310 хүүхэд төрүүлсэн нь өмнөх оны мөн үеэс амаржсан эх 2743 (7.8 хувь)-аар, төрсөн хүүхэд 2774 (7.8хувь)-өөр тус тус өсжээ. Мөн нас баралт 8515 болж, өмнөх оны мөн үеэс 770 (9.9хувь)-аар нэмэгджээ.
Энэ оны эхний хагас жилд 1000 хүнд ногдох төрөлт 11.9, нас баралт 2.7, ердийн цэвэр өсөлт 9.2 байна.
Өмнөх оны мөн үеэс 1000 хүнд ногдох төрөлт 0.6 пункт, нас баралт 0.2 пункт, хүн амын ердийн цэвэр өсөлт 0.4 пунктээр өссөн байна.
1000 хүнд ногдох төрөлт Улаанбаатар хот болон Дорнод, Орхон, Ховд, Говьсүмбэр, Баян-Өлгий аймагт улсын дунджаас 0.1-2.3 пунктээр дээгүүр, бусад аймагт 0.2-5.8 пунктээр доогуур байна.
1000 хүнд ногдох нас баралт Увс, Архангай, Өвөрхангай, Дархан-Уул, Дорноговь, Дундговь, Хөвсгөл, Баянхонгор аймагт улсын дунджаас 0.1-0.5 пунктээр дээгүүр, харин Улаанбаатар хот болон Булган аймагт ижил түвшинд, бусад аймагт 0.1-1.2 пунктээр доогуур байна.
Хүн амын ердийн цэвэр өсөлт Улаанбаатар хот болон Дорнод, Орхон, Ховд, Баян-Өлгий, Говьсүмбэр аймагт улсын дунджаас 0.2-3.2 пунктээр дээгүүр, бусад аймагт 0.3-5.5 пунктээр доогуур байна.
