Month: July 2018

АТГ-аас ээлжит мэдээллээ хийж байна. Тус газраас Ерөнхий сайд У.Хүрэлсүхийг Шадар сайд байхад нь туслахаар ажиллаж байсан Н.Энхбаатарыг авлигын хэрэгт холбогдуулан өчигдөр саатуулсан.Н.Энхбаатар нь УИХ-ын гишүүний туслахаар 2006 оноос ажиллаж, 2008 оноос МАН-ын Ерөнхий нарийн бичгийн даргын туслах байсан бөгөөд 2010-2015 онд НАМЗХ-ны Удирдах зөвлөлийн гишүүн зэрэг ажлуудыг хийж байжээ. Тэрбээр 2016 оны арванхоёрдугаар сараас МИАТ-ийн Захиргаа, хууль эрх зүй эрхэлсэн дэд захирлаар томилогдон ажиллаж байгаа юм байна.

Харин энэ хүнийг саатуулсан талаар сэтгүүлчид АТГ-ынхнаас асуухад:

-Мөрдөн шалгах ажиллагаа явагдаж байгаа хэрэг дээр прокурорын зөвшөөрөгдсөн хэмжээнд мэдээлэл өгөх ёстой. Ямар нэгэн нам, улстөрийн захиалгаар, хэн нэгнийг хагаралдуулах гэсэн элдэв асуудал байхгүй. Прокурорын хяналтан дор, шүүгчийн зөвшөөрлөөр энэ үйл ажиллагаа явагддаг гэдгийг ойлгоорой. Мөрдөн шалгах ажиллагаа дөнгөж эхэлж байгаа болохоор мэдээлэх боломжгүй гэж хариуллаа.

Цаг уурын байгууллагаас ирүүлсэн мэдээллээр энэ сарын 24-ний өдрийн байдлаар Хэнтийн нуруунаас эхтэй Балж, Онон, Хэрлэн, Алтай нуруунаас усжих Ховд, Увс нуурын савын Хархираа зэрэг голуудын усны түвшин нэмэгдсэн байна.

Мөн 07 дугаар сарын 25, 26-нд баруун болон төвийн аймгуудын нутгаар, 27-нд баруун аймгуудын зүүн хэсэг, төв, зүүн, говийн аймгуудын нутгаар, 28, 29-нд төвийн аймгийн зарим, говь болон зүүн аймгуудын ихэнх нутгаар дуу цахилгаантай усархаг бороо орно. Иймд иргэд, аж ахуйн нэгж, байгууллагууд амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, аян замд явахдаа сайн мэдэхгүй гол мөрний усанд орохгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Энэ сарын 24-ний өдрийн байдлаар Баян-Өлгий аймгийн Өлгий сумын 2,3,12,13 дугаар багийн 90480 м2 талбай, айл өрхийн хашаа хороог халдваргүйжүүлэлтэнд хамруулсан байна. Халдваргүйжүүлэлтийн ажлыг аймгийн Эрүүл мэндийн газраасудирдан явуулж байгаа бөгөөд аймгийн Мэргэжлийн хяналтын газрын улсын байцаагчид, Мейрим өрхийн эрүүл мэндийн төвийн ахлагчийн хамт халдваргүйжүүлэлтийн үйл ажиллагаанд хяналт тавин ажиллаж байна.

Аадар бороо, үерийн улмаас улсын чанартай Өлгий-Ховд чиглэлийн 5 км, Өлгий-Даян-Улсын хил чиглэлийн 6 км, 132.8 у/м замын байгууламжидэвдрэл үүссэнийг аймгийн Мэргэжлийн хяналтын газраас үзлэг шалгалт хийж хоёр дүгнэлт гарган холбогдох яам, агентлаг болон “Жол” ХХК-д хүргүүлжээ.

Эрүүл мэндийн сайд Д.Сарангэрэл болон яамны удирдлагын баг ДЭМБ-ын Номхон далайн баруун бүсийн захирал Др.Шин Ён-су-тэй уулзлаа. Уулзалтаар жил бүрийн 7 дугаар сард тохиодог Дэлхийн Хепатитын өдрийг Монголд тэмдэглэх болсонтой холбогдуулан зохион байгуулах асуудлыг ярилцлаа.

Сайд Д.Сарангэрэл хэлэхдээ таны энэ удаагийн айлчлалын нэгэн чухал хэсэг болох Дэлхийн Хепатитын өдрийн албан ёсны арга хэмжээнд энэ сарын 27-ны өдөр та бид хамтран тэмдэглэнэ. Энэ жилийн Дэлхийн Хепатитын өдрийн албан ёсны арга хэмжээг Монгол Улсад онцлон зохион байгуулж, Монгол Улсын Засгийн газраас вируст хепатитын халдварын эсрэг авч хэрэгжүүлж буй цогц арга хэмжээ болох “Элэг бүтэн Монгол” үндэсний хөтөлбөрийг дэлхий нийтэд сурталчлан таниулах томоохон боломж олгосон ДЭМБ-д, Танд болон Таны манлайлал, чадварлаг удирдлага ажиллаж байгаа Бүсийн төвийн хамт олон, Др.Сергей Диордица тэргүүтэй Монгол Улс дахь Суурин төлөөлөгчийн газрын хамт олонд талархал илэрхийлье гэлээ.

Др.Шин Ён-су ДЭМБ-ын зүгээс Монгол Улсын Засгийн газраас элэгний В, С вирусын халдвар, түүний шалтгаант элэгний хатуурал, элэгний хорт хавдартай тэмцэх чиглэлээр авч хэрэгжүүлж хөтөлбөр, үйл ажиллагааг олон улсад сайшаан дэмжиж байгааг тэмдэглэн хэлээд Дэлхийн Хепатитын өдрийг Монгол Улсын Засгийн газартай хамтран үр дүнтэй зохион байгуулна гэдэгт итгэлтэй байгаагаа илэрхийллээ.

Сэлэнгэ аймгийн Эрүүл мэндийн газрын хүсэлтээр Халдварт өвчин судлалын үндэсний төвийн мэргэжилтэн Д.Доржмаа, Э.Уянга нар Сэлэнгэ аймагт долоо хоног ажиллаж Сүрьеэ өвчний тусламж үйлчилгээнд хяналт үнэлгээ хийж ажиллалаа.
Аймгийн хэмжээнд сүрьеэгийн өвчлөл өндөртэй сумдуудыг сонгон Сүхбаатар сумын 4 өрх, Цагааннуур, Алтанбулаг сум, Бугант тосгоны эрүүл мэндийн төвүүд дээр ажилласан ба аймгийн Нэгдсэн эмнэлгийн сүрьеэгийн диспансерийн үйл ажиллагаатай танилцаж, мэргэжил арга зүйн зөвлөмж өглөө.
Мөн 2018 оны 07 сарын 21-ны өдөр бүх шатны эмнэлгийн сүрьеэгийн асуудал хариуцсан эмч, мэргэжилтнүүдэд зориулан “Сүрьеэгийн тусламж үйлчилгээний чанарыг сайжруулах” нэг өдрийн сургалтыг зохион байгуулж, харилцан санал солилцлоо.

Баян-Өлгий аймгийн Өлгий суманд энэ 7 дугаар сарын 14-16-ны өдрүүдэд усархаг бороо орсны улмаас үер бууж найман багийн 530 өрхийн 2500 гаруй хүн гамшигт өртөж, олон гэр, байшин, хашаа усанд автсантай холбогдуулан олон улсын хүмүүнлэгийн байгууллагууд, тухайлбал, Дэлхийн зөн, Адра, Мерси Кор Монгол, Монголын улаан загалмай нийгэмлэг зэрэг байгууллагаас гамшигт өртсөн иргэдэд тодорхой хэмжээний мөнгөн болон хүмүүнлэгийн тусламж үзүүлж эхлээд байна.

Мөн НҮБ-ын системийн байгууллагууд, тухайлбал, НҮБ-ын Хүн амын сангаас 250 өрхөд ариун цэвэр, эрүүл ахуйн багцыг хүргүүлэх, НҮБ-ын Хүүхдийн сангаас ундны ус, эрүүл ахуйн чиглэлээр урт хугацаанд авах арга хэмжээний талаар зөвлөмж гаргахаар ажиллаж байна. НҮБ-ын холбогдох байгууллагууд байдлыг газар дээр нь ажиглаж, шаардлагатай бусад арга хэмжээ авахаар төлөвлөж байгааг Улаанбаатар дахь НҮБ-ын Суурин зохицуулагчийн газраас Гадаад харилцааны яаманд мэдээлэв.

Нийслэлийн тээврийн газрын мэдээллээр Улаанбаатар хотод метро барьж байгуулах судалгааг хотын хөгжлийн бодлоготой уялдуулан дахин эхлүүлжээ.

Анх метро барих судалгааг Японы олон улсын хамтын ажиллагааны “Жайка” байгууллагын буцалтгүй тусламжаар 2013-2014 онд хийж байжээ. Гарсан тайланг НИТХ-аар хэлэлцэн ҮАБЗ дээр дэмжин зөвлөмж гарч Японы засгийн газраас 600 сая ам.долларын хөнгөлөлттэй зээл олгохоо албан ёсоор мэдэгдэж байсан боловч улс орны эдийн засгийн хүчин чадал, санхүүгийн боломжоос шалтгаалан зогсоод байсан юм.

Харин одоо Улаанбаатар хотын хөгжлийн чиг хандлагад тусгаснаар 2030 он гэхэд метро байгуулах эдийн засгийн бололцоотой гэсэн тооцоо хийснээ албаны хүмүүс мэдэгдсэн байна. Иймээс өмнөх судалгааг дахин эхлүүлж буй аж. Нийслэл хотод метро барьж байгуулахад 1.5 тэрбум ам.доллар шаардагдах тооцоо гарчээ. Хөрөнгийг манай улс дангаар гаргах боломж байхгүй учир гадаад дотоодын хөрөнгө оруулалт, төр-хувийн хэвшлийн түншлэл, хамтын ажиллагаа, концессын гэрээ зэрэг арга замаар шийдэхээр болжээ.

Метроны чиглэлийг Офицеруудын ордноос Энхтайваны өргөн чөлөөний зам дагуу Сонсголон хүртэл хотыг зүүнээс баруун тийш холбосон 17.7 км газар доогуур барих бололцоотой гэж тодорхойлсон байна. Хотын захын дүүргүүдийг гүүрэн буюу өргөтгөсөн замаар холбох төлөвлөгөөтэй байгаа аж. Мөн нийслэлд тусгай замын болон электро автобусны (RTI болон BTI) зам тавьж чиглэл гаргахаар төлөвлөжээ.

Японы олон улсын хамтын ажиллагааны “Жайка” байгууллагын буцалтгүй тусламжаар дизель хөдөлгүүрээс ялгарах хөө тортогжилтын ялгарлыг бууруулах зорилгоор нийтийн тээврийн үйлчилгээний автобуснуудад DPF шүүлтүүрийг суурилуулах ажлыг үе шаттай хийж байна.

Эхний ээлжинд “Зорчигч Тээврийн Нэгтгэл” ОНӨТААҮГ-ын 1 дүгээр автобус баазад DPF шүүлтүүрийн шатаах зуух болон бусад шаардлагатай тоног төхөөрөмжийг суурилуулжээ. Буцалтгүй тусламжийн хүрээнд “Зорчигч Тээврийн Нэгтгэл” ОНӨААТҮГ болон “Сутайн Буянт” ХХК-ийн нийт 25 автобусанд энэ долдугаар сард багтаан DPF шүүлтүүрийг тавихаар төлөвлөсөн байна. DPF шүүлтүүр нь дизель түлшнээс ялгарч буй утаа, тортогжилтыг 100 хувьшүүдэг гэнэ.

БЗД VI ХОРООНЫ ИРГЭН Л.БАЯРХҮҮ

Миний аав П.Лхамсүрэн нь амьд ахуй цагтаа Алтан-Овоог сэргээн засах асуудлыг анхлан санаачилж, хэрэгжүүлэхээр өөрийн санаагаа илгээсэн байдаг. 1989 онд санаачилгаа хүсэлт болгон “БАТЦАГААНЫГ СЭРГЭЭХСЭН” гэсэн гарчигтайгаар “Уул, ус, ургамлын үзэсгэлэн сайхан цогцолсон түүх, домог ихтэй манай эх орны нэгэн тансаг баян бүрд болох Дарьганга сум, тэр хавийн нутгийг үзэж сонирхох гэсэн ойр холын хүмүүсийн хөл тасрахгүй байна. Тэнд Богд эзэнд мэдээтэй Одоо сүм нэртэй олон лам, хувраг хуран чуулсан хошуу сүм гучаад он хүртэл оршиж байжээ. Бас << аль чталаасаасүндэрлэх Алтан овоо>>- Дарь уул дээр арван ханатай гэрийн чинээ Батцагаан хэмээх дээрээ алтан ганжир гялалзуулсан дуган байсныг Дарьгангын уугуул нутгийн унаган иргэн би сайн санаж байна. Тэр үед томоохон сүм хийдийг хошуу сүм ( хошуучлагч гэсэн утгаар) гэж нэрлэдэг байсан болов уу? Одоо тэр сүмийн туурь нь хүртэл баларч сэргээх ямарч аргагүй болсон. харин хаанаасаа ч тод харагддаг байсан алтан овооны дуганыг сэргээн барих юмуу, тэнд тэртээх цагийн сүм хийдийн сүлд хийморь болсон нэгэн суварга байгуулаасай гэсэн санал дэвшүүлж байна. Энэ талаар үе тэнгийн зарим өвгөд, хөгшидтэй ярилцахад <<үр, ачид маань дурсгалтай, буянтай үйлс хэр чадлаараа хандив өргөж оролцоно>> гэж бэлэгшээж байх юм. Миний саналыг дээр доргүй дэмжээсэй гэж хүснэ. Ингэвэл үзэсгэлэнт нутгийг минь улам л чимнэ дээ” хэмээн сонинд хэвлүүлсэн ажээ.

Хожим 1990 онд санаачилга нь биеллээ олж, Алтан-Овоог сэргээн засварласан нээлтийн үеэр аав маань ийнхүү үг хэлж байжээ.

Хүндэт наадамчид та бүхэнд баярын мэнд хүргэе

Нарлаг монгол орны Дархан тал нутгийн өнцөг булан дарьганга Хошуу Алтан Дарь овоо 1930 оны хүнд хэцүү цагт хэлмэгдэн бусниулагдаад жараад жилийн дараа өнөөдөр сэргээн босгож баяр хөөр болж байна. Эзэн Чингисийн сэргээн мандалтын энэ онд их жанжин Сүхбаатарын нэрэмжит аймгийн улс даяар их алдар цуутай Алтан Дарь овооны хошуу наадам болж байгаа явдал маш их ерөөл тавилантай үйл явдал боллоо. Бидний өсөж төрсөн энэ сайхан нутаг дэлхийд унаган төрхөөрөө байгаа ховор нандин газар болоод байна. Ийм учраас хорвоод хүн болж төрсөн ганцхан насанд заяасан энэ сайхан нутаг усаан хайрлан хүндэтгэж явцгаая. Ийм хошуу наадмыг таван жилийн дараа 1995 онд хийх санал дэвшүүлж байна. 1990.08.05

“Өдрийн сонин”-ы “Хэлэх эрхийн индэр”-т оролцон үзэл бодлоо илэрхийлэхийг хүсвэл 99663163,88775292 дугаарын утсаар холбоо барина уу.

Тэмдэглэл хөтөлсөн:Б.НОМИН-ЭРДЭНЭ