Month: July 2018

Гадаад улсад зорчихдоо аюулгүй байдлаа сайтар хангаж, өөрийгөө болон гэр бүл, ойр дотны хүмүүсээ болзошгүй эрсдлээс хамгаалах талаар ТЕГ-аас мэдээлэл гаргажээ.

Хилээр нэвтрэхийн өмнө

• Зорчих гэж буй улсынхаа талаар мэдээлэлтэй байж, тухайн орныхоо хил, гааль, визийн журмыг сайтар судлаарай. Мэдээлэлгүйн улмаас санаатай, санамсаргүй хэлбэрээр гэмт хэрэгт холбогдож, бусдын гэмт үйлдэлд ашиглагдах, золиос болох зэргээр хохирч болзошгүй.
• Бусдын захиас, дайвар эд зүйлийг авч явах санал, мөнгө, бусад амлалт, хүсэлтийг хүлээн авахгүй байх. Гэмт этгээдүүдийн гадаад дүр төрх, заль мэхэнд хууртаж өөрийгөө аюулд унагах зүйл бүү хийгээрэй. Та татгалзах эрхтэй.
• Эзэнгүй эд зүйл олбол мэргэжлийн байгууллагад хандаж хүлээлгэх өгөх. Ингэснээр та өөрийгөө болзошгүй эрсдлээс хамгаалж чадна.
• Баримт бичиг, эд зүйлээ дахин нэг шалгана уу. Гадаад паспортын хүчинтэй хугацаа, тасалбар, кредит карт, вакцин хийлгэсэн баримт, хүүхэдтэй явах бол хүүхдийн баримт бичиг, итгэмжлэл, тээшийн битүүмжлэл зэргийг шалгаарай.
• Хэрэв та, төрийн болон албаны нууцтай танилцах эрх бүхий албан тушаалтан бол зохих журмын дагуу зөвшөөрөл авч, санамсар болгоомжгүйн улмаас нууц тээгч авч хил гарахаас сэргийлээрэй.

Гадаад улсад байхдаа

• Хилийн чанадад зорчихдоо архи, согтууруулах ундаа хэтрүүлэн хэрэглэхгүй байх, онцын шаардлагагүй бол эм, эмийн төрлийн бүтээгдэхүүн хэрэглэхгүй байх, бусдын найрсаг хандлагаар дайлж буй уух, идэх төрлийн зүйлийг хүлээн авахгүй байх, мөн өөрийн идэж, ууж буй зүйлээ орхин явахгүй байх зэрэг нь хүний наймааны золиос болохоос сэргийлнэ.
• Бага насны хүүхэдтэйгээ зорчиж байгаа бол хүүхэд хараа хяналтаас гарах эрсдэлтэй үйлдэл бүү гаргаарай.
• Гадаадын иргэн тодорхойгүй шалтгаанаар Таньд найрсаг хандаж, Таныг гуйгаагүй байхад туслахыг оролдох, дайлж цайлах, бэлэг сэлт өгөх зэргээр ойр дотно харилцаа үүсгэхийг оролдвол болгоомжтой хандаарай. Үнэгүй зүйл гэж байдаггүй.
• Тухайн улсынхаа ёс заншил, шашны байдлыг бодолцож жишгийг дагаарай.
• Гадаад улсад ямар нэгэн зөрчилд холбогдсон бол, мөн Та ямар нэгэн байдлаар таны эрх зөрчигдсөн гэж үзэж байгаа бол энэ талаараа өөрийн улсын ЭСЯ, Консулын газарт аль болох хурдан мэдэгдэж туслалцаа авах нь зүйтэй.

Эх орондоо ирсний дараа

Гадаадын иргэн танаас төрийн болон албаны бусад нууц /бизнесийн/-тай холбоотой асуулт асуух, мэдээлэл өгөхийг хүсэхээс аль болох зайлсхийж, ийм тохиолдол гарсан, эсвэл харилцаа үүссэн бол нутагтаа ирсэн даруйд тагнуулын байгууллагад мэдэгдэх нь иргэн Таны үүрэг мөн.

Булган аймаг дахь Цагдаагийн газрын түүхт 80 жилийн ойн баярын үйл ажиллагаа энэ сарын 17-18-ны өдрүүдэд боллоо. Ойн баярын үйл ажиллагаанд хүрэлцэн ирсэн хүндэт зочид, төлөөлөгчид, ард иргэдэд “Цагаан шонхор” хөшөөний нээлтийг хийж, цагдаагийн нийт бие бүрэлдэхүүн ёслолын жагсаал ахлаж, бие хамгаалах урлаг, албаны нохойн үзүүлэх тоглолтыг сонирхуулав.Баярын хурал зохион байгуулж, өргөсөн тангарагтаа үнэнчээр зүтгэж, эрхэлсэн ажилдаа амжилт бүтээл гарган ажилласан цагдаагийн алба хаагчдад шагнал гардуулсан юм.

Гадаад харилцааны дэд сайд Б.Батцэцэг Монгол Улсын Соёлын элчээр томилогдсон Бүгд Найрамдах Австри Улсын иргэн Мариа-Катарина Лангд Монгол Улсын Соёлын элчийн гэрчилгээг өнөөдөр гардуулж өгөв.

Мариа-Катарина Ланг нь Монгол судлал тэр дундаа Европын зарим оронд хадгалагдаж буй монголын эртний эд өлгийн зүйлсийн судалгаагаар 23 жил дагнан ажиллаж байгаа монгол судлаач, эрдэмтэн юм.

Доктор Мариа-Катарина Ланг нь хилийн чанадад монгол судлалыг хөгжүүлэх, монгол судлалаар дамжуулан Монголын түүх, соёлыг олон улсад таниулах, монгол угсаатны зүйн эд өлгийн цуглуулга болон соёлын чиглэлээр олон улсын бага хурал, лекц семинар, хамтарсан үзэсгэлэн зохион байгуулах зэрэг ажлуудыг хийхээр төлөвлөж байна.

Гадаад харилцааны сайд Д.Цогтбаатар 2018 оны 7 дугаар сарын 25-26-нд Америкийн Нэгдсэн Улсын Вашингтон хотноо болох Шашны эрх чөлөөний асуудлаарх сайд нарын олон улсын анхдугаар бага хуралд АНУ-ын Төрийн нарийн бичгийн дарга М.Помпеогийн урилгаар оролцоно.

Сайд бага хуралд оролцох үеэрээ Төрийн нарийн бичгийн дарга М.Помпео, Энхтайвны корпусын захирал хатагтай Ж.Олсен, Конгрессын Төлөөлөгчдийн танхимын Гадаад харилцааны хорооны дарга Э.Ройс, Конгресс дахь Америк-Монголын бүлгийн хамтран даргалагч Д.Тайтус болон Конгресс, Америкийн Засаг захиргааны бусад хүмүүстэй уулзаж, хоёр талын харилцааны болон бүс нутаг, олон улсын тавцан дахь цаг үеийн харилцан сонирхсон асуудлаар ярилцана.

Булган аймгийн Хутаг-Өндөр сумын Тээл багийн аймгийн төвөөс баруун хойд зүгт 175 км-т, сумын төвөөс баруун хойд зүгт 25 км-т байрлах “Хагийн-Ам” гэдэг газар энэ сарын 18-ны өдрийн 09:00 цагт тус сумын харьяат иргэн 50 настай, эрэгтэй Б малдаа яваад сураггүй болсон тухай дуудлагыг энэ 20-ны өдрийн 08:50 цагт хүлээн авсан байна. Тус аймгийн Онцгой байдлын газрын 4 алба хаагч 1 автомашин, Цагдаагийн газрын 3 алба хаагч, 1 автомашин, ар гэрийн 45 хүн, 4 автомашин, 3 мотоцикл, нийт 52 хүн, 9 техник хэрэгсэлтэйгээр ажиллаж, өчигдөр Тээл багийн уулыг тойрч 40 км-т эрэн хайх ажиллагааг зохион байгуулж үр дүнд хүрээгүй тул 20:25 цагт түр зогсоосон. Өнөөдөр 07:00 цагт эрэн хайх ажиллагааг дахин эхлүүлжээ.

Олон улсын валютын сангийн төлөөлөгчид иржээ. Үнэлгээний багийг Сангийн сайд Ч.Хүрэлбаатар өнөөдөр хүлээн авч уулзан, эдийн засгийн нөхцөл байдал, тулгамдаж буй асуудлаар санал солилцлоо. Олон улсын валютын сангийн үнэлгээний багийнхан өнөөдрөөс эхлэн ирэх наймдугаар сарын 6-ны өдрийг хүртэл Монгол Улсад ажиллах юм. Ингэхдээ “Өргөтгөсөн санхүүжилтын хөтөлбөр”-ийн тавдугаар шатны үнэлгээг хийнэ. Энэ удаагийн хэлэлцээрээр төрийн албан хаагчдын цалингийн нэмэгдэл яригдана гэдгийг Сангийн сайд мэдэгдээд буй юм.

Дархан-Уул аймгийн Онцгой байдлын газраас Эрэн хайх аврах анги, Гал түймэр унтраах, аврах ангиудын аврагч-гал сөнөөгчдийн дунд “Иргэд автомашинтайгаар осолдсон үед аврах ажиллагааг зохион байгуулах нь” сэдэвт гүний уснаас аврах ажиллагааны дадлага сургуулийг зохион байгууллаа.

Аврагчдын гүний уснаас эрэн хайх, аврах ажиллагааны чадварыг нэмэгдүүлэх, харилцан туршлага солилцох зорилготой дадлага, сургууль нь усны гүнийн камер ашиглан тандалт хийх, аврагч нар найман метрийн гүний шумбалт хийн нэрвэгдсэн иргэнийг усны гүнээс гаргах, усанд осолдсон иргэнд амилуулах суурь тусламж үзүүлэх, живсэн автомашиныг усны гүнээс татан гаргах гэсэн дөрвөн үе шаттайгаар явагдсан юм.

Дадлага сургуульд нийт 24 алба хаагч хамрагдлаа гэж Дархан-Уул аймгийн Онцгой байдлын газраас мэдээллээ.

Өмнөговь аймгийн Цогтцэций сум Сийрст багийн “Салхин сэнс” буюу сумын төвөөс урд зүгт 23 км-т өчигдөр 16:30-16-40 цагийн хооронд мөндөр орж уруйн үер буужээ. Үерийн улмаас 91-80 ӨМӨ улсын дугаартай “Хондо Пит” загварын суудлын автомашинтай хоёр зорчигч үерт автсан, бөгөөд багийн “Эхэн хадан-Ус” гэдэг газар нэг хүн мотоциклтой зорчиж яваад үерийн усанд боогдсон тухай дуудлагыг өчигдөр 18:45, 19:30 цагуудад тус тус хүлээн авсан байна.

Тус аймгийн Онцгой байдлын газрын долоон алба хаагч, нэг автомашинтай ажиллаж суудлын автомашинтай зорчиж явсан иргэн 54 настай, эмэгтэй Б, 4 настай, эмэгтэй А нарыг 18:47 цагт, мотоциклтой зорчиж явсан 15 настай, эрэгтэй Ө-г, 21:14 цагт тус тус аюулгүй газарт гаргасан байна.