Month: July 2018

Ойрын өдрүүдэд орж буй борооны улмаас дүүргийн хэмжээнд үерийн аюултай нөхцөл байдал үүсч хүн амын эрүүл мэндэд ноцтой хохирол учруулах аюултай тулгараад байна. Тухайлбал үер усны гамшгийн үед гэр хорооллын бохир усны цооног,жорлон хальж, өтгөн шингэн ялгадас, бохир хаягдлаар газрын хөрс, гудамж талбайг бохирдуулж иргэд, хүүхэд багачууд сальмонеллёз, балнад, цусан суулга, боом, хийт үржил, вирүст гепатит А зэрэг халдварт өвчинд өртөх нөхцөл бүрддэг юм.

Иймд иргэдийг үер, усны аюулаас болгоомжилж, эрүүл мэндээ хамгаалж, халдварт өвчнөөс урьдчилан сэргийлэхийг дүүргийн Онцгой комиссоос анхааруулж байна.

Нийгмийн хариуцлагын хүрээнд Онцгой Байдлын Ерөнхий газар болон Сентеррагоулд Монголия ХХК хамтран иргэдийг үер усны аюулаас сэргийлэх санамж бүхий самбарыг Туул голын дагуу байршууллаа.

Сүүлийн үед үргэлжлэн орж буй усархаг борооны улмаас Туул гол болон нийслэлийн ойр орчмын голын усны түвшин эрс нэмэгдэж байна. Баяр наадам, амралтын өдрүүд үргэлжилж, иргэд чөлөөт цагаараа гол устай газар бараадаж амрах нь ихэсчээ. Иймд хүүхэд багачууд, иргэдийг анхаарал болгоомж алдан усанд эрсдэх аюулаас урьдчилан сэргийлүүлэх үүднээс Туул голын хамгийн эрсдэл өндөр 13 газарт дээрх санамж бүхий самбаруудыг байршуулав. ОБЕГ дээрх самбаруудыг байгалийн бүхий л гамшгаас урьдчилсан сэргийлэх санамжийг ард иргэдэд хүргэх зорилгоор олон удаа ашиглах боломжтой юм.

Энэ хичээлийн жилд төрийн өмчийн цэцэрлэгт шинээр элсэх бүх хүүхдийн бүртгэл, элсэлтийн үйл ажиллагааг цахим хэлбэрээр зохион байгуулахаас гадна өмнө нь цэцэрлэгт хамрагдаж байсан 3-5 насны хүүхдийн бүртгэлийг цахимаар баталгаажуулж байгаа билээ. “Цахим бүртгэл” 2018 оны энэ сарын 25-наас ирэх сарын 23-ны өдрийг дуустал 30 хоног үргэлжилнэ.

Цэцэрлэгийн цахим бүртгэлд хүүхдээ бүртгүүлэх, интернэтийн орчинд ажиллах боломжгүй иргэдэд туслах ажилтан дүүрэг дээр 2018 оны долдугаар сарын 25-наас наймдугаар сарын 23-ны өдрүүдэд ажлын цагаар тогтмол ажиллаж байна.

Өнгөрсөн оны тавдугаар сард Монгол улсын Ерөнхий сайд болон 30 гаруй улсын удирдлагууд Бээжин хотод чуулж “Нэг бүс, нэг зам” олон улсын хамтын ажиллагааны чуулга уулзалтыг амжилттай зохион байгуулсан. Энэ үеэр хамтарсан албан ёсны мэдэгдэлд гарын үсэг зурж, улс хоорондын бодлогын харилцаа, бүтээн байгуулалт, худалаа бизнесийн харилцаа, банк, санхүү, нөхөрсөг харилцаа зэргийг цогцоор нь дэмжих хэлэлцээрийг хийсэн билээ.

2017 оноос эхлэн “Нэг зам нэг бүс” үзэсгэлэнг уламжлал болгон зохион байгуулж эхэлсэн бөгөөд энэ жил Улаанбаатар хот дахь Монгол Хятадын соёлын төвд “Ли Шуй”ийн гурван эрдэнэ хэмээх БНХАУ-ын шилмэл гар урлалын бүтээлүүдээр үзэсгэлэн гаргажээ. Уг бүтээлүүд нь Чин үеийн шаазан, сийлбэрүүдэд суурилсан уламжлалт гар урлалын бүтээлүүд юм. Үзэсгэлэнгийн нээлтийн ёслолд НИТХ-ын дарга С.Амарсайхан оролцох үеэрээ, “Хоёр орны харилцаа, хамтын ажиллагааг хөгжүүлэхэд хүмүүнлэг, соёлын солилцоо, хамтын ажиллагаа нэн чухал үүрэгтэй билээ. Ли Шуй-ийн гурван эрдэнэ нь үзэсгэлэн нь хоёр улсын уламжлалт соёлын харилцааны хөгжлийг хамтран урагшлуулсан, илүү нягтаршуулсан, Монгол Хятадын гар урлал соёлын бүтээлүүдийн нийлэмжит хөгжлийг урагш түлхэхэд хувь нэмэрээ оруулж буй өв соёл, үнэт зүйлсийн нэг болно гэдэгт итгэлтэй байна. Цаашид хоёр орны соёл түүхийг харилцан сурталчлах, иргэдийн соёлын харилцааг дэмжихэд чиглэсэн бүх төрлийн үйл ажиллагааг зохион байгуулахад Улаанбаатар хотын зүгээс үргэлж нээлттэй бөгөөд хувь нэмрээ оруулж ажиллах болно гэдгийг цохон тэмдэглье” гэлээ.

Үзэсгэлэнгийн нээлтийн үеэр Шаазан ваар, хутга, чулуун хөшөө гэсэн бүх төрлөөс нэг нэг бүтээлийг Монгол улсын үндэсний музейд өгч үзэсгэлэнд байрлуулахаар хандивлав

Баян-Өлгий аймгийн Өлгий суманд 07 дугаар сарын 14-16-ны өдрүүдэд орсон усархаг аадар борооны улмаас Өлгий сумын нийт 8 багийн 530 айл өрхийн 2500 гаруй иргэн гамшигт нэрвэгдэж, 3 иргэн бэртэж гэмтэн, гэр, байшин, хашаа усанд автсан.

Үерийн гамшигт өртсөн охид, эмэгтэйчүүдэд дэмжлэг үзүүлэх зорилгоор НҮБ-ын Хүн амын сангаас ариун цэвэр, эрүүл ахуйн багцыг бэлтгэн, багцыг түгээх тээврийн зардлын хамт өнөөдөр Онцгой байдлын ерөнхий газарт хүлээлгэн өглөө.

Энэ үеэр НҮБ-ын Хүн амын сангийн суурин төлөөлөгч Наоми Китахара “Онцгой байдал, гамшгийн үед ихэвчлэн хоол унд, орон байр зэрэг хэрэгцээнд илүү анхаарал хандуулж, охид, эмэгтэйчүүдийн өвөрмөц хэрэгцээг орхидуулдаг. Тиймээс НҮБ-ын Хүн амын сангаас энэ тал дээр анхаарал хандуулж, 24 сая төгрөгийн өртөг бүхий 250 ширхэг ариун цэвэр, эрүүл ахуйн багцыг хүлээлгэн өгч байна” хэмээн онцлов.

Харин ОБЕГ-ын тэргүүн дэд дарга, бригадын генерал Г.Ариунбуян, Баян-Өлгий аймагт болсон үерийн нөхцөл байдал, авч хэрэгжүүлж байгаа арга хэмжээний талаар мэдээлэл өгч, охид, эмэгтэйчүүдийн асуудалд нэн тэргүүнд анхаарал хандуулж байгаа НҮБ-ын Хүн амын сангийнханд талархал илэрхийллээ.

НҮБ-ын Хүн амын сангаас бэлтгэн хандивлаж байгаа Ариун цэвэр, эрүүл ахуйн багц нь хүмүүнлэгийн нөхцөлд охид, эмэгтэйчүүд өөрсдийн ариун цэвэр, эрүүл ахуйн хэрэгцээ, эрүүл мэнд, аюулгүй байдлаа зохих түвшинд хангахад шаардлагатай эд зүйлсээс бүрджээ. Тухайлбал, ариун цэврийн хэрэглэл, нүүр гарын болон барааны саван, дотуур хувцас, оймс, хувцас, гар нүүрийн алчуур, шүдний оо, сойз зэрэг зүйлс багцад орсон байна.

Мөн зайгаар ажилладаг гар чийдэнг эмэгтэйчүүд шөнө оройн цагаар гарч явахдаа ашиглах боломжтой бөгөөд гамшгийн үед охид, эмэгтэйчүүд жендэрт суурилсан болон бэлгийн хүчирхийлэлд өртөх эрсдэлтэй байдаг тул өөрийгөө аюулаас хамгаалах зорилгоор ашиглах шүгэлийг энэ багцад оруулсан гэдгийг онцолсон юм гэж Онцгой байдлын ерөнхий газраас мэдээллээ.

Энэ сарын 09-ний өдөр Дархан-Уул аймгийн Дархан сумын 15 дугаар багийн хөгжлийн төвийн барилгын шав тавих ёслол боллоо. Тус арга хэмжээнд УИХ-ын гишүүн Б.Жавхлан, Дархан-Уул аймгийн ИТХ-ын дарга Г.Эрдэнэбат, аймгийн Засаг дарга С.Насанбат болон аймаг, орон нутгийн удирдлагууд, иргэдийн төлөөлөл оролцсон юм. Монгол улсын хамгийн олон хүн амтай, хамгийн том баг болох Дархан сумын 15 дугаар багт төрийн үйлчилгээг иргэдэд ойртуулах зорилгоор баригдаж буй энэхүү багийн төвийн барилгыг энэ ондоо багтаан ашиглалтанд оруулах ажээ.Эдийн засгийн хүнд цаг үеийг улс орон даяар туулж байгаа хэдий ч Дархан-Уул аймгаас сонгогдсон УИХ-ын гишүүд болон Дархан-Уул аймгийн удирдлагууд, аймаг, сумын ИТХ-ын төлөөлөгчид хамтран ард иргэд рүүгээ чиглэсэн бүтээн байгуулалтын ажлуудыг хэрэгжүүлэх бодлогыг баримтлан ажиллаж буй талаар аймгийн МАН-ын хорооны дарга, аймгийн Засаг дарга С.Насанбат нээлтийн үеэр хэллээ. Багийн хөгжлийн төвийн барилгыг барих ажил Дархан сумын 15 дугаар багаар хязгаарлагдахгүй дахин Дархан сумын 11,12 болон 13,14,16 дугаар багийг хамарсан 2 хэсэг байрлалд баригдах юм. Эдгээр 3-н багийн төвийн барилгын ажлыг “СБМ” ХХК нийт 1.4 тэрбум төгрөгийг өртгөөр гүйцэтгэх аж. Төрийн үйлчилгээг иргэдэд хүргэдэг хамгийн анхан шатны нэгж буюу багийн төвийн үйл ажиллагааг эрчимжүүлж, үйлчлэх цар хүрээ, орчин нөхцлийг сайжруулахын тулд ийнхүү олон жил яригдсан багийн төвүүдийн барилгын ажил эхэлж байгаад иргэд талархаж байна.

Хүрэн манжин байнга хэрэглэвэл цусны эргэлт сайжирч, даралт тогтворжихоос гадна бүдүүн гэдэсний үйл ажиллагаанд нөлөөлж өтгөн хаталтыг зогсоодог. Өдөр бүр хүрэн манжингийн шүүс уувал тархины цусан хангамж нэмэгдэж, ой тогтоолт сайжирдгийг Америкийн эрдэмтэд баталжээ. Хүрэн манжингийн найрлага дахь нитратууд хоол боловсруулах үед ходоодны хүчилд дэм өгөхөөс гадна ашигтай нянгууд тэрхүү бодист ордог байна. Энэ нь судасны ханыг цэвэрлэж, цусны эргэлтийг сайжруулдаг аж.

Цусны даралт бууруулна

Өдөрт 250 мл хүрэн манжингийн шүүс ууснаар цусны даралтыг бууруулдаг. Шүүсэнд агуулагдах нитрат нь цусанд нитритийн хүчил болж цусны судсыг өргөсгөж өгдөг.

Биеийн жин барихад тустай

Хүрэн манжин нь илчлэг багатай, өөх тосгүй, шимт бодисуудаар баялаг.

Хорт хавдраас сэргийлнэ

Хүрэн манжингийн өнгийг бүрдүүлэгч бодис беталайн нь усанд уусдаг исэлдэлтийн эсрэг бодис юм. Энэхүү бодис нь хавдраас сэргийлдэг.

Калийн маш сайн эх үүсвэр

Хүрэн манжин нь калийн маш сайн эх үүсвэр юм. Шүүсийг нь ууснаар калийг хангалттай хэмжээгээр авах боломжтой. Кали нь бие махбодийн мэдрэлийн болон булчингийн үйл ажиллагаа хэвийн явагдахад чухал шаардлагатай эрдэс бодис юм. Кали дутсанаар ядрах, сульдах, шөрмөс татах зэрэг шинж тэмдэг илэрдэг.

Эрдэс бодисын маш сайн эх үүсвэр

Хүрэн манжингийн шүүс нь Кальци, төмөр, магни, манган, фосфор, натри, цайр, зэс, селен зэрэг эрдэс бодисуудаар баялаг.

С аминдэмээр баялаг

Хүрэн манжин нь С аминдэмээр баялаг юм. С аминдэм нь бие махбодийг чөлөөт радикалуудаас хамгаалж исэлдэлтийн эсрэг үйлчилгээ үзүүлдэг. Мөн шархны эдгэрэлтийг түргэсгэх, төмрийн шимэгдэлтийг сайжруулах, дархлааг сайжруулах зэрэг маш олон ач холбогдолтой.

Элэгний үйл ажиллагааг дэмждэг

Хүрэн манжинд агуулагддаг бетайн хэмээх бодис нь элэг өөхлөхөөс сэргийлдэг байна. Мөн элгийг хортой бодисуудаас хамгаалдаг.

Фолийн хүчлийн маш сайн эх үүсвэр

Хүрэн манжин нь мэдрэлийн гуурсны гажиг үүсэхээс сэргийлдэг фолийн хүчлийн маш сайн эх үүсвэр юм.

Холестеролын хэмжээг бууруулдаг

Хархан дээр хийсэн нэгэн туршилтаар хүрэн манжингийн шүүсний ханд нь нийт холестерол болон триглицеридыг бууруулж өндөр нягттай холестерол (сайн холестерол)-ын хэмжээг нэмэгдүүлж байсан байна.

Үйл ажиллагаа эрхлэх хаяг дээрээ байхгүй, ажлын байр нь хангалтгүй үнэлэгдсэн, ажлын байрны нөхцөл шаардлага хангахгүй эрүүл мэндийн байгууллагын тусгай зөвшөөрлийг Нийслэлийн Засаг даргын 2018 оны 7 дугаар сарын 24-ний өдрийн “Эрүүл мэндийн чиглэлээр үйл ажиллагаа эрхлэх тусгай зөвшөөрлийг түдгэлзүүлэх тухай” А/678 дугаар захирамжаар 1 сарын хугацаатай түдгэлзүүллээ. Дурдсан хугацаанд шинэ ажлын байр болон ажлын байрыг дахин үнэлүүлээгүй тохиолдолд эрүүл мэндийн тухай хуулийн 19-р зүйлийн 19.20-д заасны дагуу тусгай зөвшөөрлийг хүчингүй болгохыг эрүүл мэндийн байгууллагад анхааруулж байна.