Month: July 2018

Боловсролын тухай хуулийн 20, 21 дүгээр зүйл, Монгол Улсын Засгийн газрын 2017 оны 08 дугаар сарын 17-ны өдрийн хуралдааны 36 дугаар тэмдэглэл, Нийслэлийн эдийн засаг, нийгмийг 2018 онд хөгжүүлэх үндсэн чиглэлд заасны дагуу шинээр сургууль, цэцэрлэг байгуулах иргэн, аж ахуй нэгжийн хүсэлтийг 2018 оны 08 дугаар сарын 1-нээс 10-ны өдрүүдэд Нийслэлийн Боловсролын газарт хүлээн авна.

Сургууль, цэцэрлэг байгуулахад бүрдүүлэх материалыг “Аж ахуйн үйл ажиллагааны тусгай зөвшөөрлийн тухай” хуулийн 11 дүгээр зүйл, “Боловсролын тухай” хуулийн 21 дүгээр зүйлийн 21.1, БСШУ-ны Сайдын 2010 оны 353 дугаар тушаалаар батлагдсан “Сургуулийн өмнөх болон бага, дунд боловсролын сургалт эрхлэх тусгай зөвшөөрөл авахад бүрдүүлэх баримт бичигт тавигдах шаардлага”-ыг баримтлан бүрдүүлсэн байх шаардлагатай.

Холбогдох мэдээллийг Нийслэлийн Боловсролын газрын www.edub.edu.mn цахим хаягаар болон 70113039 утсаар авах боломжтой гэж Нийслэлийн Боловсролын газраас мэдээлэв.

Цаг уур, орчны шинжилгээний газрын мэдээллээр 2018 оны 7 дугаар сарын 23-30-ны хооронд ихэнх нутгаар бороо хуртай, зарим газраар усархаг аадар бороо орж, 26-28-ны өдрүүдэд зарим нутгаар сэрүүсэх төлөвтэй байгаа тул үер ус, нөөлөг салхи, аянга цахилгааны болзошгүй аюулаас сэрэмжтэй байж, дараах арга хэмжээг цаг алдалгүй авч хэрэгжүүлэхийг аймаг, нийслэлийн Засаг дарга нар, Хүнс, хөдөө аж ахуйн газруудад анхааруулж, зөвлөмж хүргүүлж байна. Үүнд,

1. Энэ сарын 27-29-ны өдрүүдэд нийт нутгаар түр зуурын дуу цахилгаантай, аадар бороо орох төлөвтэй байгаа тул үер усны аюулаас хамгаалах арга хэмжээ яаралтай авч, сонор сэрэмжтэй байх
2. Аймаг, нийслэл, орон нутгийн малчид, тариаланчид, иргэд, аж ахуйн нэгж байгууллагад үер, усны болзошгүй эрсдэл, аюулаас сэргийлэх анхааруулга, зөвлөмж өгч, малчид, мал бүхий иргэдийн шилжилт хөдөлгөөнийг хянах, тариалангийн талбайг хамгаалах арга хэмжээ зохион байгуулах
3. Хур бороо, үерийн уснаас хамгаалах богино хугацааны тандалт, судалгаа явуулж, үерийн усны гольдролыг өөрчлөн, газар тариалангийн талбай, бэлчээрийг усжуулах арга хэмжээ авч, энэ жилд орон нутгийн байгууллага, иргэдийг дайчлан ажиллах
4. Ирэх 8 дугаар сард нийт нутгаар олон жилийн дунджаас 0.5-1.5 хэмээр халах төлөвтэй байгаа тул мал аж ахуй, газар тариаланг усаар хангах ажлыг төлөвлөн зохион байгуулж, түр зуурын аадар бороо, үер усны аюул, эрсдэлийг тооцоолон, бэлэн байдлыг хангаж ажиллах

ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН ЯАМ

Баянзүрхийн гүүрнээс Алтанбулагийн гүүр хүртэл Туул голын дагуу аялал жуулчлалын бүс байгуулахаар болжээ. Үүний дагуу БНХАУ-ын Засгийн газрын зээлийн хүрээнд 60 сая ам.долларын хөрөнгө оруулалт хийх юм байна.

Санхүүжилтийг нь зарцуулах эрх Сангийн яаманд байгаа аж. Энэ талаар БОАЖ-ын Төрийн нарийн бичгийн дарга Ц.Цэнгэл хэвлэлд өгсөн ярилцлагадаа “Уг нь бодлогын хувьд Сангийн яам санхүүжүүлэлтээ хийгээд, манай яам бодлогоо гаргах ёстой. Гэтэл төрийн ажил хэдэн яамдын дунд хийгдээд байгаа. Тиймээс Монгол Улсын маань хөгжил явахгүй байна” гэжээ.

Дэлхийн банкны санхүүжилтээр “Монгол Улсын хөдөлмөр эрхлэлтийг дэмжих төсөл”-ийг 2018-2021 оныг дуустал хэрэгжүүлэнэ. Төслийг “Гэрээт малчин-өрхийн хөдөлмөр эрхлэлтийг дэмжих”, “Зохион байгуулалттай ажлын байр” гэсэн төрлөөр хэрэгжүүлэхээр болжээ. Энэ талаар ХНХ-ын сайд С.Чинзориг мэдээлэл хийллээ. Тэрээр ажилгүйдэл ядуурлыг бууруулах нь Засгийн газрын тэргүүлэх ажил юм. Учир нь 2016 оны жилийн эцсийн гүйцэтгэлээр Дэлхийн банк, ҮСХ-ноос хийсэн судалгаагаар ядуурлын түвшин 2014 оныхоос нэмэгдэн 10 хувь болсон гэх судалгаа байна. Үүнээс энэ онд 7,4 хувьтай болж буурсан ч ажилгүйдал, ядуурал байсаар байгаа гэв.

Хөдөө аж ахуйн салбар нь дотоодын нийт бүтээгдэхүүний 14 орчим хувийг үйлдвэрлэж, хүн амын хүнсний хангамж, үндэсний үйлдвэрлэлийн түүхий эдийн гол тулгуур болдог. Иймээс “Гэрээт малчин-өрхийн хөдөлмөр эрхлэлтийг дэмжих” туршилтын төслийг хэрэгжүүлэхээр төлөвлөжээ. Төслөөр энэ онд 520 гаруй гэр бүлийг хамруулах юм. Мөн уг төслөөр “төвлөрлийг сааруулах, утааг бууруулахад эерэг нөлөө үзүүлнэ гэж” ХНХ-ын сайд С.Чинзориг хэллээ.

Хэрэгжүүлэх дараагийн төсөл нь “Зохион байгуулалттай ажлын байр” юм.Өнгөрсөн оны дөрөвдүгээр улирлын байдлаар хөдөлмөр эрхлэгчдийн 75,4 хувь нь хот, 24,6 хувь нь хөдөө орон нутагт амьдарч байна. Иймд уг төсөл нь сум хооронд ажилгүй байгаа иргэдийг зохион байгуулалттайгаар хөдөлмөрөө хоршин ажиллаж, албан бус салбарт хөдөлмөр эрхлэгчийн нөхөрлөл, хоршоо болоход дэмжлэг үзүүлэхэд гол зорилго нь чиглэгджээ. Мөн иргэд өөрийн амьдралын туршилга, ур чадварт түшиглэн өөрөө өөртөө ажлын байр бий болгох, өргөгтөх, хадгалгах үйл ажилгааг дэмжихээр Хөдөлмөр эрхлэлийн үндэсний зөвлөлөөр өмнө батлагдсан хөтөлбөртөө өөрчлөлт оруулжээ. Үүндэргэлтийн хөрөнгийн гурван сая төгрөгийн зээлийг 24 сарын хугацаатай олгодог байсныг тав сая төгрөг болгож 36 сарын хугацаатай олгох аж. Хөдөлмөр эрхлэлтийг дэмжих хөтөлбөрийн малжуулах арга хэмжээнд хамрагдах хүмүүсийн насыг 15-39 байсныг 18-45 болгож хамрах хүрээг нэмэгдүүлсэн байна.

С.ОЮУНЖАРГАЛ

Нийслэлийн нутгийн захиргааны байгууллагуудын хот төлөвлөлттэй холбоотой сэдэвчилсэн мэдээллийг багтаасан “Орон зайн мэдээлэлд суурилсан хот байгуулалтын дундын мэдээллийн нэгдсэн сан”-г бий болгож олон нийтийн хэрэглээнд нэвтрүүлэх ажлыг Нийслэлийн Засаг Даргын Тамгын газар, Нийслэлийн Мэдээллийн технологийн газар болон нийслэлийн нутгийн захиргааны байгууллагууд хамтран хэрэгжүүлж байна.

Нийслэлийн дундын мэдээллийн сан нь Орон зайн байршил дээр суурилан нийгэм, эдийн засаг, байгаль орчин, дэд бүтэц, статистикийн тоон мэдээллүүдийг харьцуулан дүн шинжилгээ хийн судалгаанд суурилж оновчтой шийдвэр гаргалтанд дэмжлэг үзүүлэх, иргэдийг хот төлөвлөлттэй холбоотой нээлттэй мэдээ, мэдээллээр хангах давуу талуудыг бий болгож байгаа юм.

Уг ажлын хүрээнд 2018 оны 7-р сарын 18-30-ны хооронд ОСНААУГ-ын 45 албан хаагчийг сургалтад хамруулж байна. Сургалтад хамрагдсан алба хаагчид газрын зургийн давхаргуудтай ажиллах, газрын зургийн бичиг баримтыг удирдах, мэдээллийн сан байгуулах, сервис файл гаргах, ArcGIS програм ашиглан веб аппликейшн үүсгэх чадвартай болох юм гэж Нийслэлийн Мэдээллийн технологийн газраас мэдээллээ.

Анхдагчдын өлгий Булган аймгийн түүхт 80 жилийн ой долдугаар сарын 27-оос 29-ний өдрүүдэд Булган аймгийн төв Булган суманд зохион байгуулагдах гэж байна. Уг ойтой холбоотойгоор Булган аймгийн төв, Их хотгор гэдэг газар “Анхдагчдын өлгий нутаг” нэртэй хаалга бүтээжээ.

Тус хаалгыг Булган аймагт уул уурхайн чиглэлээр үйл ажиллагаа явуулдаг “Эвсэг сайхан” компани нийгмийн хариуцлагын хүрээнд өөрсдийн хүч хөрөнгөөр бүтээж өнөөдөр аймгийн удирдлагууд, ард түмэндээ хүлээлгэн өгөх ёслолын ажиллагаа болов. Ёслолын ажиллагаанд Булган аймгийн Засаг дарга З.Батзориг болон бусад албаны хүмүүс, иргэд оролцсон бөгөөд даага насны морьдын уралдаан болжээ.

“Анхдагчдын өлгий нутаг” хаалгыг бүтээхэд нийт 280 гаруй сая төгрөгийн зардал гарсан бөгөөд уран барималч Д.Алтайбаатар захиралтай “Бурхан буудайн гоёл” компани хоёр сарын хугацаанд хийж гүйцэтгэсэн аж.

Нийслэлийн онцгой байдлын газраас өнөөдөр цаг үеийн асуудлаар мэдээлэл хийлээ. Хэвлэлийн хуралд дэд дарга, хошууч Б.Мягмардорж, Гамшгаас урьдчилан сэргийлэх хэлтсийн дарга, хурандаа Г.Нэргүй, Гал түймэртэй тэмцэх хэлтсийн дарга, хурандаа Д.Мөнхсайхан нар оролцож, мэдээлэл өгсөн юм.

“Тал нутгийн Монгол” олон улсын марафоныг энэ жил наймдугаар сарын 19-ний өдөр Хүй долоон худагт зохион байгуулах гэж байна.

Японы иргэн Фүживара болон Кон Аяа нар 1996 онд анхлан санаачилж байсан уг наадам Япон болон бусад гадаад орнуудын мөн Монгол улсын гүйгчид, спорт сонирхогчдыг өргөнөөр татан жил ирэх тусам хүрээгээ тэлж буй. Тус тэмцээнд ойролцоогоор 2500 гаруй хүн сонирхогчдын болон мэргэжлийн тамирчдын хагас марафоны зайд хурд хүчээ сорьдог байна.

Энэ жилийн тэмцээний үеэр тал нутгийн 3, 5, 10, 21 километрээс гадна “Богдхан уулын ултра трайл” болох 50 километрийн марафоныг зохион байгуулж байгаагаараа онцлогтой юм хэмээн Нийслэлийн аялал жуулчлалын газраас мэдээллээ.

Архангай, Өвөрхангай аймгийн 10 суманд гарсан малын гоц халдварт өвчнөөс нийслэл хотод урьдчилан сэргийлэх зорилгоор Нийслэлийн Засаг дарга С.Батболд “Мал, амьтны гоц халдварт шүлхий өвчнөөс урьдчилан сэргийлэх арга хэмжээг эрчимжүүлэх тухай” захирамж гаргасан.

Уг захирамжийн дагуу нийслэлийн Багануур, Багахангай дүүргийн Авто тээврийн шалган бүртгэх товчоо, Хан-Уул дүүргийн Өлзийт, Таван толгойн гүүр, Налайх дүүргийн Городок, 4 дүгээр зөрлөг, Сонгинохайрхан дүүргийн Шар хөтөл, Баруун турууны Авто тээврийн шалган бүртгэх товчоодод 07 дугаар сарын 14-ний өдрөөс 08 дугаар сарын 15-ны өдрийг хүртэл дүүргийн мэргэжпийн байгууллагуудыг томилгоожуулан 24 цагаар хяналт шалгалт ариутгал халдваргүйжүүлэлтийн цэг ажиллуулж байна.

Тухайн ариутгал халдваргүйжүүлэлтийн цэгийн үйл ажиллагааг хянах, заавар зөвлөмж өгөх зорилгоор цэг тус бүрт зайн хяналтын камерыг Нийслэлийн Онцгой комиссын нөөц хөрөнгөөр суурьлуулан ажиллаж байна гэж НОБГ-аас мэдээллээ.