Month: July 2018

Mөнгөний нийлүүлэлт (M2) 2018 оны зургаадугаар сарын эцэст 17.3 их наяд төгрөг болж, өмнөх сараас 304.0 (1.8%) тэрбум төгрөг, өмнөх оны мөн үеэс 3.9 (28.7%) их наяд төгрөгөөр өссөн байна.

Гүйлгээнд гаргасан бэлэн мөнгө 2018 оны зургаадугаар сарын эцэст 931.1 тэрбум төгрөг болж, өмнөх сараас 4.8 (0.5%) тэрбум төгрөгөөр буурч, өмнөх оны мөн үеэс 16.1 (1.8%) тэрбум төгрөгөөр өссөн байна.
Аж ахуйн нэгж, байгууллага, иргэдэд олгосон нийт зээлийн өрийн үлдэгдэл 2018 оны зургаадугаар сарын эцэст 15.4 их наяд төгрөг болж, өмнөх сараас 429.7 (2.9%) тэрбум төгрөг, өмнөх оны мөн үеэс 2.5 (19.4%) их наяд төгрөгөөр өсөв.

Хугацаа хэтэрсэн зээлийн өрийн үлдэгдэл 2018 оны зургаадугаар сарын эцэст 829.5 тэрбум төгрөг болж, өмнөх сараас 111.2 (11.8%) тэрбум төгрөгөөр буурч, өмнөх оны мөн үеэс 32.5 (4.1%) тэрбум төгрөгөөр өсжээ. Хугацаа хэтэрсэн зээлийн өрийн үлдэгдэл нийт зээлийн өрийн үлдэгдлийн 5.4 хувийг эзэлж, өмнөх сараас 0.9 пункт, өмнөх оны мөн үеэс 0.8 пунктээр буурсан байна.

Банкны системийн хэмжээгээр чанаргүй зээл 2018 оны зургаадугаар сарын эцэст 1.3 их наяд төгрөг болж, өмнөх сараас 96.9 (7.9%) тэрбум төгрөг, өмнөх оны мөн үеэс 184.7 (16.3%) тэрбум төгрөгөөр өсжээ. Чанаргүй зээл нийт зээлийн өрийн үлдэгдлийн 8.5 хувийг эзэлж, өмнөх сараас 0.4 пунктээр өсөж, өмнөх оны мөн үеэс 0.3 пунктээр буурсан байна.Үнэт цаасны арилжаагаар 2018 онд эхний хагас жилд 290.7 тэрбум төгрөгийн гүйлгээ хийж, 384.9 сая ширхэг үнэт цаас арилжсан нь өмнөх оны мөн үеэс гүйлгээ 501.8 (63.3%) тэрбум төгрөгөөр буурч, арилжсан үнэт цаас 333.7 (7.5 дахин) сая ширхгээр өссөн байна.

Харин 2018 оны 6-р сард 13.2 тэрбум төгрөгийн гүйлгээ хийж, 35.0 сая ширхэг үнэт цаас арилжсан нь өмнөх сараас гүйлгээ 1.3 (10.9%) тэрбум төгрөгөөр өсөж, арилжсан үнэт цаас 10.5 (23.0%) сая ширхгээр буурсан байна.

Засгийн газрын үнэт цаасны хоёрдогч зах зээлийн арилжаагаар 2018 оны эхний хагас жилд 240.9 тэрбум төгрөгийн гүйлгээ хийсэн нь өмнөх оны мөн үеэс 105.5 (30.5 хувь) тэрбум төгрөгөөр буурчээ.

Хөрөнгийн зах зээлийн чиг хандлагыг илэрхийлэх ТОП-20 дундаж индекс 2018 оны зургаадугаар сард 19737.5 нэгж болж, өмнөх сараас 184.0 нэгжээр, өмнөх оны мөн үеэс 7153.6 нэгжээр өсөв.
Хөрөнгийн зах зээлд үйл ажиллагаа явуулж байгаа хувьцаат компаниудын үнэт цаасны зах зээлийн нийт үнэлгээ 2018 оны 6 дугаар сард 2.5 их наяд төгрөг болж, өмнөх оны мөн үеэс 984.2 (65.7%) тэрбум төгрөгөөр өссөн байна.

Төгрөгийн америк доллартай харьцах Монголбанкны нэрлэсэн дундаж ханш 2018 оны зургаадугаар сард 2432.30 төгрөг болж, өмнөх оны мөн үеэс 2.7 хувиар, өмнөх сараас 1.1 хувиар суларсан байна.

Төгрөгийн юаньтай харьцах Монголбанкны нэрлэсэн дундаж ханш 2018 оны зургаадугаар сард 376.12 төгрөг болж, өмнөх оны мөн үеэс 8.1 хувиар суларч, өмнөх сараас 0.3 хувиар чангарчээ.

Төгрөгийн рубльтэй харьцах Монголбанкны нэрлэсэн дундаж ханш 2018 оны зургаадугаар сард 38.72 төгрөг болж, өмнөх оны мөн үеэс 5.2 хувиар чангарч, өмнөх сараас 0.4 хувиар суларсан байна.

Өнөө жилийн Үндэсний их баяр наадмын хүчит бөхийн барилдаанд Увс аймгийн Ховд сумын харьяат, Увс нуур дэвжээний бөх Н.Батсуурь Улсын аварга цол хүртсэн. Тэрбээр Увс аймгаас төрсөн дөрөв дэх, Монголын Улсын 23 дахь аварга болсон юм.

Түүний цолны мялаалга наадамтөрөлх нутагт болох Увс аймгийн Улаангом хотод ирэх наймдугаар сарын 19-нд болох тов гарчээ. Наадмаар Улс, аймгийн алдар цолтой 128 бөх барилдаж, их нас, шүдлэн, даага гэсэн гурван насны морь уралдах юм байна.

Баянхонгор аймгийн Мэргэжлийн хяналтын газраас тус аймгийн Бөмбөгөр, Бууцагаан, Заг, Жаргалант, Гурванбулаг, Галуут сумдын нутагт ашигт малтмал олборлох үйл ажиллагаа явуулж буй аж ахуйн нэгж, нөхөрлөлд шалгалт хийжээ.

Шалгалтаар “Хишигт хөндий” компанийн үйл ажиллагааг нь зогсоож, зөрчлийн хэрэг үүсгэж, “Сайхан байгаль” компани уурхайн кемпээ зөвшөөрөлгүй газарт байгуулснийг илрүүлэн, талбай чөлөөлөх шаардлага хүргүүлсэн байна.

Ашигт малтмал олборлохоор зэхэж буй “Вояжер минериал ресурсес” ХХК-ийн уурхайд урьдчилан сэргийлэх хяналт шалгалт хийж, улсын байцаагчид холбогдох чиглэлээр мэргэжил арга зүйн зөвлөгөө өгчээ.

“Вируст хепатиттай тэмцэх дэлхийн өдөр”-ийг энэ жил Монгол Улс 8 дахь удаагаа “Илрүүлье, эмчилье” уриаг дэвшүүлэн ажиллаж байна. Уг арга хэмжээнд оролцохоор манай улсад ДЭМБ-ын халдварт өвчний асуудал хариуцсан шадар ерөнхий захирал Рэн Минхуй ирээд байна. Айлчлалын бүрэлдэхүүнд ДЭМБ-ын ХДХВ, ДОХ-ын Газар ба Дэлхийн хепатитын хөтөлбөрийн Дарга Др.Готфрид Хирншол, Хепатитын хөтөлбөрийн багийн ахлагч Др.Марк Бултерис, Номхон далайн баруун бүсийн ХДХВ, БЗДХ, Хепатитын хөтөлбөрийн зохицуулагч Др Наоко Ишикава, Хепатитын мэргэжилтэн Полин Чан, Такеши Нишижима, ДЭМБ-ын Хэвлэл мэдээллийн менежер Н.Оюунтунгалаг нар багтжээ.

Цагдаагийн ерөнхий газрын Мэдээлэл нэгтгэн боловсруулах газрын лавлагааны сан цагдаагийн тодорхойлолтыг олгохдоо зөвхөн визэнд орох иргэдэд материалыг нь үндэслэн олгож байсан.

Тэгвэл энэ оны долдугаар сарын 1-ээс иргэдэд эрүүгийн хариуцлага хүлээж байсан гэх цагдаагийн тодорхойлолтыг ямар нэг хязгаарлалтгүйгээр олгож эхэлжээ.

Тодорхойлолтыг авахдаа иргэний үнэмлэх, 500 төгрөгийн хураамж төлсөн баримттай байхад хангалттай. Мөн гадаадын оронд ажиллаж, сурч байгаа хүмүүсийн тодорхойлолтыг итгэмжлэлээр өгөх боломжтой юм байна.

Нийслэлийн Засаг даргын “Мал, амьтны гоц халдварт шүлхий өвчнөөс урьдчилан сэргийлэх арга хэмжээг эрчимжүүлэх тухай” захирамжийн дагуу нийслэлийн Багануур, Багахангай дүүргийн Авто тээврийн шалган бүртгэх товчоо, Хан-Уул дүүргийн Өлзийт, Таван толгойн гүүр, Налайх дүүргийн Городок, 4 дүгээр зөрлөг, Сонгинохайрхан дүүргийн Шар хөтөл, Баруун турууны Авто тээврийн шалган бүртгэх товчоодод дүүргийн мэргэжлийн байгууллагуудыг томилон 24 цагаар хяналт шалгалт ариутгал халдваргүйжүүлэлтийн цэг ажиллуулж байна.

Энэ сарын 14-нөөс ирэх сарын 15-ныг хүртэл үргэлжлэх уг арга хэмжээг Архангай, Өвөрхангай аймгийн 10 суманд гарсан малын гоц халдварт өвчнөөс нийслэл хотод урьдчилан сэргийлэх зорилгоор ажиллуулж буй юм. Тухайн цэгийн үйл ажиллагааг хянах, заавар зөвлөмж өгөхөөр цэг тус бүрт зайн хяналтын камерыг Нийслэлийн Онцгой комиссын нөөц хөрөнгөөр суурилуулан ажиллаж байгаа аж.

Баянгол дүүрэг, Тасганы овооны дагуух тарьж ургуулсан ногоон байгууламжийг сүйтгэж хоёр шилмүүст модыг дайрч зугтаасан хэрэг гарчээ.
Нийтийн эзэмшлийн зам талбай ногоон байгууламжийг эвдэж сүйтгэсэн тус машины дугаарыг харсан хүн байвал мэдээлэл өгч хамтарч ажиллахыг Улаанбаатар хотын захирагчийн албанаас хүсчээ.

Сүүлийн хэдэн өдөр иргэдийг бухимдуулж, шүүмжлэл дагуулсан “Гэрэлт гудамж”-ыг шатрын хөлөг мэт өнгө оруулж будсан зам нь өчигдөр оройны бороонд урсчээ. Яагаад цагаан будаг нь урсав. Будаг нь ганц борооны ая даахааргүй чанаргүй байв уу, эсвэл ажил гүйцэтгэсэн хүмүүс нь нүглийн нүдийг гурилаар хуурав уу гэдэг нь удахгүй тодорхой болох байх. Ямартаа ч хэдэн өдөр сошаил орчинд хэрүүл тарьсан эрээн алаг зам нь эвдэрч сүйдээгүй ч борооны усанд урссан байна.

Ийнхүү Нийслэлчүүдийн чөлөөт цагаа өнгөрүүлэх дуртай газрын нэгээр зүй ёсоор нэрлэгддэг Гэрэлт гудамж өнгөө засч, зам нь хар цагаан өнгөтэй болсон нь жолооч нарыг ч бухимдуулаад байгаа. Хар цагаан дээр тэмдэглэсэн замын тэмдэглээ нь сайн харагдахгүй, нүд эрээлжилэхээр юм хийлээ. Ийм замд осол аваар гарахгүй гэх баталгаа байхгүй хэмээн шүүмжлээд буй.

Тэгвэл энэхүү замыг “Жоби” худалдааны төв нийгмийн хариуцлагаа ухамсарлаж өөрсдийн санаачлага хандиваар холбогдох албаныхантай зөвшилцөн зөвшөөрөл авч зорчих замыг шатрын хөлөг мэт өнгө оруулж будаж өгсөн гэнэ.