Month: July 2018

Улаанбаатар хотод 51 байршилд нийтдээ 140 км урт үерийн далан суваг бий. Ихэнх нь 1980-1990 оны хооронд баригдсаны 70 орчим хувь нь эвдэрч шаардлага хангахгүйд хүрчээ.

Ойрын өдрүүдэд хур тунадас их орж, зарим газраар хүчтэй үерлэж эхэлсэн нь үерийн далангийн бүсэд амьдарч байгаа иргэдэд эрсдэлтэй нөхцөл байдал үүсэх шалтгаан болж буй юм. Нийслэл хотын үерийн далангийн бүсэд 1000 гаруй айл өрх амьдардаг гэсэн судалгаа байдаг.

Өнгөрсөн долоо хоногт Нийслэлийн Авто замын хөгжлийн газар, Ус сувгийн удирдах газар, Геодези, усны барилга байгууламжийн газар, Нийслэлийн Газрын алба, Мэргэжлийн хяналтын газрын хамтарсан ажлын хэсэг Монелийн уулзвар дахь үерийн ус зайлуулах далан дээр зөвшөөрөлгүй буусан иргэн, аж ахуйн нэгжүүдэд нүүх шаардах хуудсыг хүргүүлсэн. Гэвч шаардлагыг биелүүлээгүй учраас албадан буулгахаас өөр аргагүйд хүрчээ.

Дэлхийн үнэлгээний “Fitch Ratings” агентлаг “ХасБанк”-ны зээлжих зэрэглэлийг дахин нэг шатаар ахиулж, “B-“ байсныг “B” үнэлгээтэй болгон тогтвортой түвшинд аваачин өсгөлөө. Агентлагийн зүгээс энэ сарын есөнд Монгол Улсын эдийн засгийн зээлжих зэрэглэлийг “B” болгон ахиулсантай зэрэгцэн “ХасБанк”-ны зэрэглэлийг ч мөн ийнхүү сайжруулсан байна.

Манай улсын эдийн засгийн нөхцөл байдал харьцангуй сайжирсан нь зээлжих эрсдэлийн түвшин буурч, сайжирсан орны тоонд багтахад нөлөөлсөн ажээ. Харин “ХасБанк”-ны санхүүгийн болон зохистой харьлцааны үзүүлэлтүүд эерэг, төлбөрийг түргэн гүйцэтгэх чадвар өндөр түвшинд тогтвортой байгаа нь гол нөлөө үзүүлсэн байна. Мөн гадаад зах зээлээс валютын эх үүсвэр татан төвлөрүүлэх байнгын чадавх тогтвортой хадгалагдаж байгаа нь зээлжих зэрэглэл сайжрахад эергээр нөлөөлсөн юм.

“ХасБанк” нь зээлжих зэрэглэлийн үнэлгээг “Moody’s, Fitch Ratings” агентлагаар нэгэн зэрэг гүйцэтгүүлдэг Монголын хоёр банкны нэг билээ.

Оройн цагаар орон нутгийн замд хөдөлгөөнд оролцож буй жолооч нар гэрлээ шилжүүлэхгүйн улмаас зам тээврийн осол гарах хандлаг буурахгүй байгаа.

Тийм өчигдрөөс эхлэн Замын цагдаагийн газрын албанаас буруу талдаа жолооны хүрдтэй автомашинд зориулагдсан гэрлийн гялбааг сааруулагчийг нааж, өгч байгаа аж. Уг наалт нь гэрлийн тусгалын гялбуулах хэсгийг саринуулдаг эерэг нөлөөтэй юм. Олон улсад хүлээн зөвшөөрөгддөг “anti lights”-ыг зарим автомашинд үнэгүй нааж өгч байгаа ажээ. Мөн энэ үеэрээ гэрлийн гялбааны талаар жолооч нарт хэрэгтэй инфографик бүхий мэдээллийн зурагт санамжийг тарааж буй гэнэ.

Харанхуй үед хэт хурц гэрэл гэнэт тусах нь жолоочийн хүүхэн хараанд нөлөөлж, гэрэл туссанаас үүдэн тухайн хүн 10 орчим секундийн турш юу ч харах боломжгүй болгодог аж. Үүнийг ерөнхий нэршлээр “хурц гэрлийн гялбаанд орох” гэж ярьдаг байна.

Мэдээлэлж буйгаар, шөнийн цагаар гарч буй зам тээврийн ослын 60 хувь нь энэ төрлийн үйлдлээс болдог ажээ. Ялангуяа буруу талдаа жолооны хүрдтэй автомашины гэрлийн хийц нь эсрэг талын автомашины жолоочийн нүдийг хүчтэй гялбуулдаг сөрөг нөлөөтэй юм.

1998 онд баталсан Архивын тухай хуулийг шинэчлэн найруулж өөрчлөх гэж байна.
Өнөөдөр Монголын төрийн болон төрийн бус бүх байгууллага, ажилтан, иргэн бүр өөрсдийн архивыг хөтөлж бүртгэх болсноор архивын баримтын үнэ цэн өсч эргэлтэнд орж, тэр бүхнийг дагаад архивын лавлагааны ачаалал их болжээ. Гэтэл архивын албанд төрийн бусад байгууллагад хэдийнэ нэвтрээд буй цахимжилт, нэг цэгийн үйлчилгээ байхгүй, иргэд лавлагаа авахаар дугаарласан хэвээр байна. Архивын баримт нь бүгд түүх болон үлдэх учир тэр бүхнийг бүрэн бүтэн, үнэн зөв авч үлдэх учиртай архивын үйл ажиллагааг зохицуулж буй Архивын тухай хуулийн заалт зүйлүүд одоо мөрдөж буй зарим хууль тогтоомжтой уялддаггүй болжээ. Мөн архив бүртгэл хөтлөл дээр гарч буй зөрчил дутагдлыг шийдвэрлэх нарийвчилсан зохицуулалт байхгүй, хуулийн заалтууд бүхэлдээ цаг үетэйгээ нийцэхгүй байгааг саяхан болж өнгөрсөн Архивын ажилтны улсын зөвлөгөөн уулзалт дээр архивын ажилтнууд хэлж шүүмжлэлттэй хандаж байв. Иймд Архивын тухай хуулийг бүхэлд нь шинэчлэн найруулж өөрчлөх гэж байна. Өөрчлөхдөө хуучин Архивын албан хэрэг хөтлөлтийн хуульд албан хэрэг хөтлөлтийн талаар 2-хан заалт байсныг одоо шинэчилсэн найруулгаар тусдаа бүхэн бүтэн бүлэг болгон оруулж байгаа аж. Шинэчилсэн хуульд байгууллагын үйл ажиллагаанд баримтлах албан хэргийг хөтлөх зүйл заалтыг оруулж, үйл ажиллагааг хэрхэн зөв бүртгэн хөтлөж баримтжуулж түүнийгээ архивлах зэргийг тусгахаар болжээ.
Архивчдын улсын зөвлөгөөн уулзалтад оролцсон аймаг, орон нутгийн архивын ажилтнууд одоо шинэчлэх гэж буй хуульд юуны өмнө, мэдээлэл баримтыг бүрэн хүлээн авахад хэн ямар эрх, үүрэг хүлээхийг нарийн тусгаж, архивын бүртгэл хөтлөлтөд хяналт тавих эрхзүй, агуулгын өөрчлөлт үгүйлэгдэж байгааг хуульд оруулж өгмөөр байна гэсэн саналаа хэлж байв. Хуульд өөрчлөлт орсноор архив, албан хэрэг хөтлөлт сайжирч улсын байцаагчдын мэдлэг, ур чадвар дээшилнэ гэж үзэж байна.

17:00 цагт: “Чингис хаан” олон улсын нисэх буудалд УИХ-ын Хүний эрхийн дэд хорооны гишүүн Лу.Болд ЗТХЯ, ИНЕГ, ХХЕГ, ГЕГ-ын холбогдох хүмүүс ажиллаж байна. Турк улсаас ирсэн онгоц хяналтад байгаа бөгөөд Вэйсел Акчайгийн өмгөөлөгч нисэх буудал дээр ирээд байгаа боловч үйлчлүүлэгчтэйгээ уулзаж чадаагүй байгаа гэв. Тун удахгүй Гадаад харилцааны яамны дэд сайд Б.Батцэцэг мэдээлэл хийнэ.

“Чингис хаан” нисэх онгоцны буудалд энэхүү үйл явдлыг эсэргүүцэн иргэд жагсаад байна.

Чингис хаан онгоцны буудалд ажиллаж байгаа хүмүүсийн өгсөн мэдээллээр Туркийн онцгой элчийн онгоц өнөөдөр 18:00 цагт эргээд буцах бүртгэлтэй байгаа аж. Энэхүү онгоц нь буцахдаа хүн зөөвөрлөх зөвшөөрөлгүй талаар албаны эх сурвалж мэдээллээ.

Яг одоо газар дээр нь ажиллахаар Зам, тээврийн хөгжлийн дэд сайд Б.Цогтгэрэл очоод байгаа талаар эх сурвалжууд мэдээлж байна.

Албаны эх сурвалжуудын өгсөн мэдээллээр энэхүү онгоцыг буцах үед сайтар шалгах талаар мэдэгдлээ.

ВЕЙСЕЛ АКЧАЙГ 4-5 ХҮН БИЧИГ ҮЗҮҮЛЭН МАШИНДАА СУУЛГАН АВЧ ЯВСАН БАЙНА

Эх сурвалжуудын мэдээлж буйгаар Монгол, Туркийн сургуулийн захирал Вейсел Акчай өнөөдөр 09:30 цагийн үед гэрээсээ гарсан байна. Улмаар гэр бүлийн хүн нь 11:00 цагийн орчимд ажил руу нь залгахад ажилдаа ирээгүй гэсэн мэдээллийг авчээ.

Ингэж сураг гаргахад Вейсел Акчайг гэрийнх нь гаднаас хар өнгийн машинаас 4-5 хүн гарч ирээд бичиг үзүүлээд машиндаа суулгаад явсан нь тодорхой болжээ. Тиймээс ч гэр бүлийнхэн нь цагдаагийн байгууллагад хандсан байна.

Харин Эмпати сургуулиудын захирал Б.Ганбатын мэдээлсэн Чингис хаан онгоцны буудалд газардаад байгаа онгоц нь Туркийн онцгой элчин сайдын онгоц аж.

Чингис хаан онгоцны буудалд ажиллаж байгаа Ikon.mn -ийн сэтгүүлчийн өгсөн мэдээллээр Монгол, Туркийн сургуулийн захирал Вейсел Акчайг Чингис хаан онгоцны буудалд авчраад байна гэв.

МОНГОЛ, ТУРКИЙН СУРГУУЛИЙН ЗАХИРАЛ ВЕЙСЕЛ АКЧАЙГ ЧИНГИС ХААН НИСЭХ ОНГОЦНЫ БУУДАЛД ХҮРГЭЭД БАЙНА

Монгол, Туркийн хамтарсан сургуулийн захирал Вейсел Акчайг өнөөдөр гэрийнхээ гаднаас хулгайлагдсан байх магадлалтай талаар бид мэдээлсэн.

Түүнийг Турк руу авч явах зорилготой ийм үйл ажиллагаа явууллаа гэж Эмпати сургуулиудын захирал Б.Ганбат олон нийтийн сүлжээнд мэдэгдээд байна.

Тэгвэл баттай эх сурвалжийн мэдээлсэнээр Вейсел Акчайг үнэхээр Чингис хаан олон улсын нисэх онгоцны буудалд аваачаад байгаа талаар мэдээллээ.

Яг одоогийн байдлаар энэ талаар Монголын төр засгаас ямар нэгэн мэдэгдэл хийгээгүй байна.

УИХ-ын гишүүн О.Баасанхүү энэ тухай “Бид тусгаар тогтонсон улс Хэн дуртай нь эх оронд минь дураараа ирж гүйцэтгэх ажил хийн хүн хулгайлж болно гэж үү” гэж өөрийн твиттер хуудасдаа жиргээд байгаа юм

Улсын хэмжээнд энэ оны эхний хагас жилийн байдлаар 43 мянган хүн эрүүлжүүлэгдсэн бол 5.3 мянган хүн баривчлагдсан байна. Эрүүлжүүлэгдсэн хүнийн тоо өнгөрсөн оны мөн үеийнхээс зургаан хувиар, баривчлагдсан хүн 24.1 хувиар буурчээ.

Харин гэмт хэргийн улмаас учирсан хохиролийн мөнгөн дүн 103.4 тэрбумд хүрсэн бол нөхөн төлүүлсэн хохирлын хэмжээ 15.3 тэрбум төгрөгөд хүрсэн байна. Энэ нь өмнөх онд учирсан хохиролыг бодвол 55.1 хувиар буурсан ажээ. Мөн бүлэглэн үйлдэгдсэн гэмт хэрэг 903 бүртгэгдсэн нь 2017 оныг бодоход 9.7 хувиар өссөн байгаа юм. Хамгийн их буюу согтуугаар үйлдэгддэг гэмт хэргийн гаралт 1485 болж, өмнөх оны мөн үеэс 44.5 хувиар буурсан байна. Тэгвэл гэмт хэрэгт эмэгтэй хүн оролцсон тохиолдол 1421 бүртгэгдсэн нь 18.1 хувиар буурсан үзүүлэлтийн гаргасан ажээ.

З.СУВД

Хийгээр ажилладаг автомашинтай жолооч нарыг хийн баллоныхоо баталгаажуулалтын хугацааг шалгаж байхыг МХЕГ-аас санууллаа. Автомашины хийн баллоны баталгаажуулалтын хугацаа дууссан нөхцөлд өндөр дараллтай хий алдагдаж шууд дэлбэрэх аюултайг анхааруулж байна. Иймд мэргэжлийн хүмүүст хандаж баталгаажилт хийхийг зөвлөж байна.
Манай улсад сүүлийн жилүүдэд техник ашиглалтын дүрэм хангахгүй тээврийн хэрэгсэл их орж ирж байгаагийн нэг хэсэг нь ихэвчлэн БНСУ-аас импортолж буй хийгээр ажилладаг, 10-аас дээш жилийн насжилттай, хийн хөдөлгүүр, хийн баллонтой автомашинууд юм. Ийм машинууд нь тухайн орондоо ашиглалтын хугацаа дууссан гэсэн үг. Тиймээс Монголд явж буй хуучны, ийм төрлийн автомашинтай иргэд, жолооч нар хийн баллоны баталгаажилтын хугацаа буюу техникийн магадлалыг сайн анхаарч харахыг анхааруулж байна.
Автомашины хий нь тэсэрч дэлбэрэх аюултайгаас гадна хий алдсан нөхцөлд жолооч, зорчигч нар мэдэхгүйгээс хорддог байна. Ялангуяа амралт зугаалга эхэлсэн зуны цагт иргэд аялал, найр наадамд их явах холын замд болгоомжтой байж, хий алдаж байгаа эсэх, хийн баталгаажилтыг хийсэн эсэхээ шалгаж нягтлан засвар, оношлогоо, техникийн газраар үзүүлж аюулгүй байдлаа хангахыг мэргэжлийн хяналтын байгууллагаас анхааруулж байна.
Тодруулга: Манай улсад хийн хөдөлгүүртэй, хийгээр ажилладаг 10 гаруй мянган автомашин, тээврийн хэрэгсэл байна.

Баянзүрх дүүргийн Засаг даргын Тамгын газрын Төрийн захиргааны удирдлагын хэлтсээс 2018 оны зургадугаар сарын 27-оос долдугаар сарын 27-ны өдрийг хүртэлх хугацаанд ирсэн нийт 326 албан бичгийг холбогдох албан тушаалтан, хэлтэс, албадад танилцуулан шилжүүлж ажиллалаа.

Тухайлбал 268 хариугүй албан бичиг, 58 хариутай албан бичиг ирсэн юм. Дээрх хугацаанд албан бичгийг холбогдох албан тушаалтнууд 95 хувьтай шийдвэрлэж иргэдэд төрийн үйлчилгээг түргэн шуурхай хүргэж байна. Харин Засаг даргын Тамгын газраас www.edoc.ub.gov.mn цахим хаягаар 225 албан бичгийг явуулж бүртгэж байгууллагуудад илгээж ажиллаад байна.