Цаг уур, орчны шинжилгээний газраас гаргасан 2018 оны 7 дугаар сарын 3-наас 7 дугаар сарын 9-нийг хүртэлх цаг агаарын урьдчилсан мэдээг та бүхэнд хүргэж байна.
– Энэ 7 хоногийн эхэн болон дунд үеэр ихэнх нутгаар бороо хуртай тул үер уснаас сэрэмжлэхийг анхааруулж байна –
Баруун аймгуудын нутгаар: Долдугаар сарын 3, 8-нд нутгийн хойд хэсгээр түр зуурын бороо, 4-5нд ихэнх нутгаар, 6-нд нутгийн зүүн хэсгээр бороо орно. Дуу цахилгаантай. Борооны өмнө зарим газраар салхи түр зуур ширүүснэ. 4-нд нутгийн баруун хэсгээр, 5-6-нд ихэнх нутгаар сэрүүсч Алтай, Хангайн уулархаг нутгаар шөнөдөө 5-10 хэм, өдөртөө 16-21 хэм дулаан, Алтайн өвөр говиор шөнөдөө 13-18 хэм, өдөртөө 26-31 хэм дулаан, бусад нутгаар шөнөдөө 9-14 хэм, өдөртөө 19-24 хэм дулаан байна. Бусад хугацаанд дулаарна.
Төвийн аймгуудын нутгаар: Долдугаар сарын 3-нд зарим газраар, 4-нд нутгийн баруун хэсгээр, 5-6-нд ихэнх нутгаар бороо, 7-нд нутгийн зүүн хэсгээр, 8-нд нутгийн баруун хойд хэсгээр түр зуурын бороо орно. Дуу цахилгаантай. Борооны өмнө зарим газраар салхи түр зуур ширүүснэ. 7-нд нутгийн зүүн хэсгээр, 5-нд нутгийн баруун хэсгээр, 6-нд ихэнх нутгаар сэрүүсч Дархадын хотгор, Хөвсгөл, Хангай, Хэнтийн уулархаг нутгаар шөнөдөө 4-9 хэм, өдөртөө 15-20 хэм дулаан, бусад нутгаар шөнөдөө 10-15 хэм, өдөртөө 19-24 хэм дулаан байна. Бусад хугацаанд Дархадын хотгор, Хөвсгөл, Хангай, Хэнтийн уулархаг нутаг, Тэрэлж орчмоор шөнөдөө 8-13 хэм, өдөртөө 19-24 хэм дулаан, бусад нутгаар шөнөдөө 14-19 хэм, өдөртөө 28-33 хэм хүрч хална.
Зүүн аймгуудын нутгаар: Долдугаар сарын 3-нд ихэнх нутгаар, 5-6нд нутгийн баруун хагаст, 7-нд ихэнх нутгаар, 8-нд нутгийн зүүн хагаст бороо, 4-нд нутгийн зүүн хэсгээр түр зуурын бороо орно. Дуу цахилгаантай. Салхи зарим газраар түр зуур ширүүснэ. 3, 7-8-нд сэрүүсч ихэнх нутгаар шөнөдөө 9-14 хэм, өдөртөө 20-25 хэм дулаан байна. Бусад хугацаанд шөнөдөө 14-19 хэм, өдөртөө 30-35 хэм хүрч хална.
Говийн аймгуудын нутгаар: Долдугаар сарын 5-нд нутгийн баруун хэсгээр, 6-нд ихэнх нутгаар, 7-нд нутгийн зүүн хэсгээр бороо түр зуурын бороо орно. Борооны өмнө зарим газраар салхи түр зуур ширүүснэ. 6-нд ихэнх нутгаар, 7-нд нутгийн зүүн хэсгээр бага зэрэг сэрүүснэ. Бусад хугацаанд Дундговийн нутгаар шөнөдөө 14-19 хэм, өдөртөө 28-33 хэм, бусад нутгаар шөнөдөө 17-22 хэм, өдөртөө 31-36 хэм хүрч хална.
Монголчуудын уламжлалт соёл түүний дотор үндэстэн ястны дээл хувцас, эд хэрэглэл, ардын урлагийн биет болон биет бус өвийг сурталчлан таниулах, түгээн дэлгэрүүлэх, залуучуудын оролцоог нэмэгдүүлэх, аялал жуулчлалын бүтээгдэхүүн үйлчилгээг хөгжүүлэхэд чиглэсэн “Дээлтэй Монгол наадам” арга хэмжээ энэ сарын 10-ны өдөр Д.Сүхбаатарын талбайд зохион байгуулагдах гэж байна. 12 дахь жилдээ зохион байгуулагдаж буй уг наадмыг нийслэлийн Засаг даргын Тамгын газар, нийслэлийн Аялал жуулчлалын газар, Монголын аялал жуулчлалын холбоо, “Монгол Костюмс” ХХК хамтран зохион байгуулж байгаа юм.
Түүнчлэн нийслэлийн дүүргүүд Монгол наадгайн өргөө, Дээл урлалын өргөө, Язгуур урлагийн өргөө, Хөгжмийн өргөө, Уран бичлэгийн өргөө, Казах түмний өргөө зэрэг Монгол ахуй, зан заншил, соёл урлаг, Монгол наадмыг харуулсан өөр өөрсдийн онцлог бүхий гэр хотхонуудыг ажиллуулах юм байна. Иргэд, жуулчид өөрсдийн сонирхсон зүйлсээ худалдан авч, тэдний бэлдсэн тоглолт, үзүүлбэрүүдийг үзэж сонирхох боломжтой юм.
Баян-Өлгий аймгийн Цэнгэл сумд зургадугаар сарын 28-ний өдрийн 08:00 цагт малдаа явсан 16 настай хүү сураггүй алга болсон хэрэг гарсан. Хүүг сураггүй болсон гэх мэдээллийн дагуу тус аймгийн онцгой байдлын газрын алба хаагчид, иргэд хамтран эрэн хайх ажиллагааг зохион байгуулсан байна.
Өнгөрсөн амралтын өдрүүдэд Филиппин улсад болсон Ой тогтоолтын нээлттэй тэмцээнд манай улсыг төлөөлөн Их Мастер, Монголын Оюун Ухааны Академийн тамирчин Б.Шижир-Эрдэнэ амжилттай оролцжээ. Тэрбээр тэмцээний 10 төрөлд өрсөлдсөнөөс дөрвөн алт, гурван мөнгө, гурван хүрэл медаль хүртэн нийлбэр оноогоор тэргүүлж, аваргаар тодорчээ. Ийнхүү Монголын оюун ухааны академийн тамирчид АНУ, Англи, Хятад, Энэтхэг, Солонгос, Сингапур, Турк, Герман зэрэг олон арван улсын 47 тэмцээнд амжилттай оролцож, 770 медаль хүртээд байна.
Монгол Улсын Засгийн газар, НҮБ-ын Гамшгийн эрсдэлийг бууруулах газраас Гамшгийн эрсдэлийг бууруулах Азийн сайд нарын бага хурал 2018 оны 07 дугаар сарын 03-06-ны өдрүүдэд Улаанбаатар хотноо зохион байгуулагдах бөгөөд энэ үеэр Ази, номхон далайн бүс нутгийн 50 гаруй орны 3000 гаруй төлөөлөгч оролцох юм.
Энэ сарын 3-6-нд Улаанбаатар хотноо зохион байгуулагдах Гамшгийн эрсдэлийг бууруулах Азийн сайд нарын бага хурал болох гэж буйтай холбоотойгоор үүсэх замын хөдөлгөөний хэт ачааллаас урьдчилан сэргийлэх зорилгоор Замын цагдаагийн албанаас төв зам дагуу хэсэгчлэн замын хөдөлгөөнийг түр хязгаарлах аж. Тус хуралд Ази, Номхон далайн бүс нутгийн 50 гаруй орны 3,000 гаруй төлөөлөгч оролцох юм. Тиймээс Онцгой байдлын ерөнхий газар, Цагдаагийн ерөнхий газар, Замын цагдаагийн газраас хамтран мэдээлэл хийж байна.
Дорноговь аймгийн ИТХ-аас Дэлгэрэх сумын нутагт буй өвөрмөц тогтоцтой Цонжийн чулууг байгалийн дурсгалт газрын ангиллаар аймгийн тусгай хамгаалалтад авах шийдвэр гаргажээ. Сумын төвөөс зүүн хойш 55 км-т орших Цонж толгой нь зургаан талт босоо гонзгой бие биедээ наалдан ургасан зургаан талт харандаа мэт сонин сайхан тогтоцтой цэнхэр чулуу, байгаль эхийн уран чамин урлалт жижиг уул юм.
УИХ-ын гишүүн Л.Оюун-Эрдэнэ 60 тэрбумын асуудлаар тагнуулын байгууллагад ханджээ. Тэрбээр Тагнуулын Ерөнхий газрын дарга, хурандаа Д.Гэрэлд хандсан хүсэлтдээ 60 тэрбумын хэргийг хэрхэн шалган, шийдвэрлэсэн талаарх мэдээллийг ирүүлэхийг хүсчээ. Ингэхдээ төрийн нууцад халдахгүй гэдгээ мөн илэрхийлсэн байна. 
Энэ сарын 3-9-ний өдрүүдэд занабазарын нэрэмжит дүрслэх урлагийн музейд тагнуулын байгууллагын “аюулгүй байдлын манаанд 96 жил” сэдэвт уран зураг, гэрэл зураг, архивын баримт, биет үзмэрийн үзэсгэлэн гарч байна.
Өмнөд болон Умард Солонгос нэгдсэн толь бичиг гаргах хэрэгтэй гэж Өмнөд Солонгосын Соёл, спорт, аялал жуулчлалын сайд То Чонван мэдэгджээ.