Month: July 2018

Энэ сарын 03-ний өдрийн байдлаар Хангай нурууны арын Чулуут, Орхон, өврийн Шаргалжуут, Түй, Богд, Буянт, Хэнтий нурууны зүүн хажуугаас усжих Онон, Хурх, Эг, Хэрлэн зэрэг голын усны түвшин өмнөх өдрөөс 15-40 см нэмэгдэж, олон жилийн дундаж түвшинг 10-30 см үерлэж байна.

Мөн Алтай нуруунаас эхтэй Ховд, Буянт, Увс нуурын савын Хархираа зэрэг голууд үерийн түвшинг 5-25 см, Ховд гол Мянгад сум орчимд үерийн аюултай түвшинг 70 см даван тус тус үерлэж байна хэмээн ЦУОШГ-аас мэдээллээ.

Иймд дээрх голын сав дагуу суурьшиж, зусаж буй малчид тариаланчид, ард иргэдийг үер усны аюулаас болгоомжтой байхыг анхааруулж байна.

Нийслэлийн Налайх дүүргийн зургадугаар хорооны ”Байтаг богд” гэдэг газар Туул голын усанд Улаанбаатар хотын Баянзүрх дүүргийн харъяат иргэн Б, О нар живсэн байна. Уг дуудлагыг зургадугаар сарын 29-ний өдрийн 21:45 цагт хүлээн авав. Дүүргийн Онцгой байдлын хэлтсийг очиход иргэн О-г иргэд эсэн мэнд аварчээ. Харин иргэн Б-ын цогцсыг уснаас гарган авч цагдаагийн хэлтэст хүлээлгэн өгсөн байна. Б нь 22 настай эрэгтэй хүн байжээ. Иймд ард иргэдийг аялал зугаалгаар гол усанд орохдоо архи согтууруулах ундааг зохистой хэрэглэхийг Онцгой байдлын газраас анхаарууллаа.

Манай оронд зохион байгуулж буй Гамшгийн эрсдлийг бууруулах Азийн Сайд нарын Бага хурлын үйл ажиллагаа “Туушин” зочид буудалд оролцогч талуудын зөвлөлдөх уулзалтуудаар эхэллээ.
Олон улсын хуралд ирсэн орон орны төлөөлөгчид хувийн хэвшлийн, Азийн шинжлэх ухаан, технологийн академийн, хөгжлийн бэрхшээлтэй иргэдийн, иргэний нийгмийн, жендерийн зэрэг салбар салбарын асуудлаар оролцогч талуудын зөвлөлдөх болон хэсэгчилсэн уулзалтууд болж Бага хурлын нэгдсэн хуралдаан болон үйл ажиллагаанд салбар салбарын оролцоо, хувь нэмэр ямар байхыг ярилцаж байна.

Зөвлөлдөх уулзалтуудыг зохион байгуулагч Монголын талын төлөөлөгч С.Цэнд-Аюушийн хэлснээр “Гамшгийн эрсдлийг бууруулахад хүүхэд залуучуудын оролцоо”, “Гамшгийн эсрэг “Сендайн үйл ажиллагааны хүрээ” баримт бичгийг хэрэгжүүлэх талаар хийсэн ажил, “Азийн бүсийн 2018-2020 оны төлөвлөгөө” “Улаанбаатарын тунхаглал”, “Оролцогч талуудын сайн дурын мэдэгдэл” зэрэг баримт бичгийг батлан гаргахад тусгах үйл ажиллагааны чиглэл санал дүгнэлт, гамшгийн эрсдлээс урьдчилан сэргийлснээр тогтвортой хөгжлийг хангах, гамшгийн эрсдлийг бууруулахад салбаруудын оролцоо чухал гэдгийг тус тус ярилцаж байна гэв.

Гамшгийн эрсдлийг бууруулах Азийн Сайд нарын Бага хурлын албан ёсны үйл ажиллагаа өнөөдөр 16.00 цагт Төрийн ордонд нэгдсэн хуралдаанаар эхэлж “Шангри-Ла” зочид буудалд салбар хуралдаануудаар 3 өдөр үргэлжилж гамшгийн эсрэг Азийн улс орнууд цаашид хамтран ажиллах тухай “Улаанбаатарын тунхаглал” гарснаар өндөрлөх юм. “Гамшгийн эрсдлээс урьдчилан сэргийлснээр тогтвортой хөгжлийг хамгаалах нь” уриан дор зохион байгуулж буй тус хуралд оролцохоор Ази, Номхон далайн бүс нутгийн 50 гаруй улс, орны өндөр дээд хэмжээний төлөөлөгчдөөс гадна олон улс, иргэний нийгэм, хэвлэл мэдээлэл, хувийн хэвшлийн байгууллага болон хүүхэд, эмэгтэйчүүд, хөгжлийн бэрхшээлтэй иргэд, эрдэмтэн судлаачид зэрэг 3000 гаруй зочид төлөөлөгч ирээд байна.

ОБЕГ-ын дарга, хошууч генерал Т.Бадрал өнөөдөр Улаанбаатар хотноо зохион байгуулагдаж байгаа “Гамшгийн эрсдэлийг бууруулах Азийн сайд нарын II бага хурал”-д оролцохоор хүрэлцэн ирсэн БНСУ-ын Дотоод хэрэг, Үндэсний аюулгүй байдлын дэд сайд ноён Шим Бү Кион тэргүүтэй төлөөлөгчдийг хүлээн авч уулзлаа.

Монгол Улсын Онцгой байдлын байгууллага нь ОХУ, БНХАУ, АНУ, Унгар, Япон, Франц зэрэг 10 гаруй орны гамшгаас хамгаалах байгууллага, НҮБ болон түүний төрөлжсөн байгууллагууд, Азийн гамшгийн бэлэн байдлын төв, Олон Улсын Иргэний хамгаалалтын байгууллага, Дэлхийн банк, Азийн хөгжлийн банк, Дэлхийн зөн Монгол олон улсын байгууллага, Улаан загалмай, улаан хавирган сар нийгэмлэгүүдийн холбоо, Дэлхийн галын инженерүүдийн холбоо зэрэг бүсийн болон олон улсын байгууллагатай байнгын түншлэл, хамтын ажиллагаатай ажиллан гамшгийн эрсдэлийг бууруулах, урьдчилан сэргийлэх, тэмцэх чиглэлээр төсөл, хөтөлбөрийг амжилттай хэрэгжүүлж байна.

Гамшгаас хамгаалах салбарт хамтран ажиллах тухай Монгол Улсын Онцгой байдлын асуудал эрхэлсэн сайд, Бүгд Найрамдах Солонгос Улсын Онцгой байдлын ерөнхий газар хоорондын Харилцан ойлголцлын санамж бичгийг 2006 онд үзэглэснээр хоёр байгууллагын харилцаа, хамтын ажиллагааны суурь тавигдсан. Монгол Улсын Онцгой байдлын байгууллага нь БНСУ-ын Дотоод хэрэг, үндэсний аюулгүй байдлын яам, Үндэсний галын удирдлагын газар, Үндэсний аврах алба-119, Гёонги мужийн Гал, гамшгаас хамгаалах газар, Гёонги мужийн Галын академи, Солонгосын Галын судалгааны хүрээлэн болон холбогдох бусад байгууллагуудтай уламжлалт, найрсаг харилцаа, хамтын ажиллагаатай ажилладаг.

ОБЕГ-ын дарга, хошууч генерал Т.Бадрал уулзалтын эхэнд, “Гёонги мужийн Онцгой байдлын газраас Монгол Улсын Онцгой байдлын албаны алба хаагчдын мэргэжлийн ур чадварыг сайжруулахад дэмжлэг үзүүлж, жил бүр 20-60 алба хаагчдыг Гал унтраах, аврах ажиллагааны 14 хоногийн сургалтад үнэ төлбөргүй хамруулдаг. Мөн Гёонги аймгийн Гал, гамшгаас хамгаалах газартай хамтран “Гамшгийн менежментийн системийн бүтэц, хөгжлийг хангах нь” сэдэвт туршлага солилцох айлчлалыг 2015 оноос эхлэн жил бүр БНСУ болон Монгол Улсад зохион байгуулж, хоёр орны онцгой байдал, гамшгаас хамгаалах асуудал эрхэлсэн байгууллага, тэдгээрийн салбар, нэгжийн үйл ажиллагаатай танилцах, бүтэц, тогтолцоо, менежемент, үйл ажиллагааны талаар харилцан туршлага солилцох таатай нөхцөл бүрдсэн” гэж онцлон тэмдэглэв.

Мөн тэрээр, хоёр улсын Онцгой байдлын менежментийн салбарт хамтран ажиллах тухай Монгол Улсын Онцгой байдлын асуудал эрхэлсэн сайд, БНСУ-ын Онцгой байдлын ерөнхий газар хоорондын Харилцан ойлголцлын санамж бичгийг шинэ түвшинд гаргаж, хоёр улсын гамшгаас хамгаалах салбарт хамтран ажиллах гэрээ байгуулах хүсэлтэй байгаагаа ноён уламжиллаа.

БНСУ-ын Дотоод хэрэг, үндэсний аюулгүй байдлын дэд сайд ноён Шим Бү Кион, хоёр орны гамшгаас хамгаалах салбарын харилцаа, хамтын ажиллагааг өргөжүүлж, шинэ түвшинд гаргах, засгийн газар хоорондын гэрээ байгуулах саналыг дэмжиж байгаагаа уулзалтын үеэр илэрхийллээ.

Мөн тэрээр хоёр улсын гамшгаас хамгаалах салбарын хамтын ажиллагааг БНСУ-ын сүүлийн үеийн дэвшилтэт технологид тулгуурлан хөгжүүлэхэд санал нэгтэй байгаагаа уламжиллаа гэж Онцгой байдлын ерөнхий газраас мэдээллээ.

2018 оны эхний 6 сард улсын хэмжээнд объектын гал түймэр нийт 2093 удаа гарч, 12.5 тэрбум төгрөгийн хохирол учирч, 44 хүн нас барж, 26 хүн түлэгдэж гэмтэн 289 толгой мал хорогдож, 912 гэр орон сууц шатсан байна. Дээрх гал түймрийн аюулаас аврагч-гал сөнөөгчид 582 хүний амь нас, төр, аж ахуйн нэгж, байгууллагын 26.6 тэрбум төгрөгийн өмч хөрөнгийг авран хамгааллаа.

Объектод гарсан гал түймрийг өнгөрсөн оны мөн үетэй харьцуулахад гал түймрийн тоо 4,3 хувиар, учирсан хохирлын хэмжээ 42 хувиар тус тус өссөн байна.

Нийслэл хотод нийт 1371 удаагийн гал түймэр гарч, 2.9 тэрбум төгрөгийн хохирол, орон нутагт 722 удаагийн гал түймэр гарч, 9.6 тэрбум төгрөгийн хохирол тус тус учирсан байна.

Улсын хэмжээнд 2018 оны эхний 6 сарын байдлаар Архангай, Баянхонгор, Булган, Дорнод, Завхан, Сүхбаатар, Сэлэнгэ, Төв, Ховд, Хөвсгөл, Хэнтий, Увс аймгийн 12 аймгийн 41 суманд 56 удаагийн ой, хээрийн гал түймэр гарч /урьдчилсан байдлаар/ 32667 га ой, 41143 га хээр, нийт 73810 га талбай түймэрт өртөж, түймрийг унтраахаар Онцгой байдлын байгууллагаас 1231 алба хаагч 92 техник, хил хамгаалах, хууль сахиулах байгууллагаас 50 алба хаагч 5 техник, орон нутгаас 1334 иргэн 149 техник хэрэгсэлтэй ажилласан байна.

Ой, хээрийн гал түймрийг өнгөрсөн оны мөн үетэй харьцуулахад гал түймрийн тоо 46,7 хувиар буурсан байна.

Энэ хугацаанд 11327 байгууллага, аж ахуйн нэгж, 76999 айл өрхөд гал түймрийн хяналт шалгалт хийж, гал түймрийн хэрэг зөрчилд хүргэж болзошгүй 63246 зөрчил дутагдал илрүүлэн, 26834 зөрчлийг үзлэг шалгалтын явцад арилгуулан бусад зөрчлийг арилгуулахаар 3010 заавал биелүүлэх албан шаардлага, 4226 мэдэгдэл, 155 танилцуулга, 546 дүгнэлт бичиж, гал түймэр гарч болзошгүй 65 объектын үйл ажиллагааг хэсэгчлэн буюу түр хугацаагаар зогсоож, Галын аюулгүй байдлын тухай хууль тогтоомжийг зөрчсөн байгууллага, аж ахуйн нэгжийн холбогдох албан тушаалтан, иргэдийг 104.6 сая төгрөгөөр торгож, галын аюулаас урьдчилан сэргийлэх сургалт 1235 удаа, дадлага 963 удаа зохион байгуулж, хэвлэл мэдээллийн хэрэгслээр 1177 удаа сэрэмжлүүлэг явуулсан байна.

Сүхбаатар дүүргийн нутаг дэвсгэрээс малтай айл өрхийг зөвшөөрөгдсөн бүс рүү нүүлгэн шилжүүлэх ажил амжилттай дууслаа.

Улсын Онцгой комисс, нийслэл, дүүргийн Засаг даргын шийдвэрээр хотоос малыг гаргах ажлыг үе шаттай зохион байгуулсны үр дүнд 189 өрхийн 3130 толгой малыг иргэдтэй хэлэлцэн тохиролцсоны үндсэн дээр 06 дугаар сарын 30-ны өдрөөр бүрэн нүүлгэн шилжүүлж дууслаа.

Өнөөдрийн байдлаар нүүлгэн шилжүүлсэн малын хашаа, саравчийг буулгах, өтөг бууцыг цэвэрлэх, зөөвөрлөх, ариутгал халдваргүйтгэлийн ажил төлөвлөсний дагуу хийгдэж байна.

Сүхбаатар дүүргийн Засаг даргын Тамгын газар нь хийгдэж буй ажлын явц, тайлан мэдээг холбогдох байгууллагууд болон иргэддээ тухай бүр нь мэдээлж ажиллалаа.

2018 оны 7 дугаар сарын 2-ний өдөр I, II, III ангиллын 30 хувьцаат компанийн 203,809 ширхэг хувьцаа арилжигдсанаас 6 хувьцаат компанийн хувьцааны ханш өсч, 16 хувьцаат компанийн хувьцааны ханш буурсан бол 8 хувьцаат компанийн ханш тогтвортой байлаа. Үүнээс “Хөх ган” (HGN+13.84%) болон “Материалимпекс” (MIE+5.44%) компаниудын хувьцааны ханш хамгийн өндөр өсөлттэй байсан бол “Силикат ХК (SIL-15.00%) болон “Монгол шилтгээн” (MSH14.89%) компаниудын хувьцаа хамгийн их уналттай байлаа.

Энэ өдөр “TOP 20” индекс 19540.33 нэгж болж 2.11 хувиар буурсан бол зах зээлийн үнэлгээ 2,417,141,067,186 төгрөг боллоо.

Арилжааны дэлгэрэнгүй мэдээллийг Энд дарж үзнэ үү.

Санхүүгийн тогтвортой байдлын зөвлөлөөс “Монгол Улсын санхүүгийн тогтвортой байдлын тайлан”-г хагас жил тутам боловсруулан олон нийтэд танилцуулдаг бөгөөд энэ удаа 11 дэх дугаарыг Та бүхэнд хүргэж байна.

Энэ удаагийн тайланд Хадгаламжийн даатгалын талаарх дэд бүлэг болон СТБЗ-ийн Ажлын албанаас Эдийн засгийн судалгаа, эрдэм шинжилгээний хүрээлэнтэй хамтран анх удаа зохион байгуулсан “Монгол Улсын нийт арилжааны банкуудын эрсдэлийн хүлээлтийн судалгаа”-ны үр дүн нэмэгдэж орсон нь өмнөх тайлангуудаас онцлогтой юм.

Тус тайланг Монголбанкны веб хуудасны “Санхүүгийн тогтвортой байдал” цэс буюу эндээстатан авч, уншина уу.

Тайлангийн чанар, агуулгыг сайжруулахтай холбоотойгоор санал, хүсэлтийг Монголбанкны СТБЗАА-ны 455122 утсаар холбогдон ирүүлэх боломжтой.