Month: July 2018

Нийгмийн даатгалын ерөнхий газрын дэргэдэх Эмнэлэг хөдөлмөрийн магадлах төв комиссоос санаачлан Эмнэлэг хөдөлмөрийн магадлах үйл ажиллагаанд мөрдөж буй хууль тогтоомжийн хэрэгжилтийг хангуулах, хөгжлийн бэрхшээлтэй иргэдэд үзүүлэх тусламж үйлчилгээний чанар хүртээмжийг нэмэгдүүлэх зорилгоор “Хөгжлийн бэрхшээлтэй иргэдэд үзүүлэх эмнэлэг хөдөлмөрийн магадлалын үйлчилгээг сайжруулах аян”-ыг улсын хэмжээнд зургадугаар дугаар сарын 1-нээс эхлүүлсэн.

Таван сарын хугацаанд үргэлжлэх аяны хүрээнд хөгжлийн бэрхшээлтэй иргэдэд ээлтэй орчин бүрдүүлэх, хөдөлмөрийн чадвар алдалтын хувь, хугацаа тогтоох хурлын өрөө, хүлээлгийн танхим, ариун цэврийн өрөөг хөгжлийн бэрхшээлтэй иргэдэд ээлтэй хэлбэрээр засч тохижуулах, эмнэлэг хөдөлмөрийн магадлах үйл ажиллагааны талаар иргэдээс сэтгэл ханамжийн судалгаа авч, холбогдох арга хэмжээг хэрэгжүүлэх, иргэдийн санал, гомдол, хүсэлтийг нээлттэй хүлээн авах үйл ажиллагааг зохион байгуулж байна. Мөн хөдөлмөрийн чадвар алдалтаас урьдчилан сэргийлэх, бууруулах чиглэлээр иргэдтэй уулзалт, ярилцлага зохион байгуулж, хөдөлмөрийн чадвар алдалтын хувь, хугацаа тогтоох үйл ажиллагааг сурталчилан таниулах ажлыг хийх юм.

Аймаг, дүүргийн хөдөлмөрийн чадвар алдалтын хувь, хугацаа тогтоолгосон иргэн (даатгуулагч)-ийн сүүлийн таван жилийн судалгаа, Үйлдвэрлэлийн ослын улмаас хөдөлмөрийн чадвар алдалтын хувь, хугацаа тогтоолгосон даатгуулагчийн судалгаа, Хөдөлмөрийн чадвар алдалтын хувь, хугацаа тогтоолгоод ажил хөдөлмөр эрхэлж байгаа иргэн (даатгуулагч)-ийн судалгаа, Хөдөлмөрийн чадвар алдалтын хувь, хугацааг хугацаагүйгээр тогтоолгосон иргэн (даатгуулагч)-ийн судалгааг тус тус хийж, нийгмийн даатгалын болон нийгмийн халамжийн сангаас тэтгэвэр, тэтгэмж авдаг даатгуулагчийн тэтгэврийн хувийн хэргийг цахим мэдээллийн сантай тулган, хөгжлийн бэрхшээлтэй иргэдийн талаарх мэдээ, мэдээллийг нэгтгэн, эмнэлэг хөдөлмөрийн магадлалын чиглэлээр суурь судалгаатай болох юм.

Ийнхүү хөгжлийн бэрхшээлтэй иргэд рүү чиглэсэн үйл ажиллагааг зохион байгуулахаар нийт аймаг (дүүрэг)-ийн Эмнэлэг хөдөлмөрийн магадлах комисс төлөвлөгөө гарган ажиллаж эхлээд байна хэмээн Эмнэлэг хөдөлмөрийн магадлах төв комиссоос мэдээллээ.

Номын сангийн хөгжлийн шинэ чиг хандлагыг тодорхойлоход чухал ач холбогдолтой бүхий АНУ-ын Төрийн департаментийн “International Visitor Leadership Program on Demand” буюу Олон улсын манлайлагчдын зочин хөтөлбөрт Монгол Улсын номын сангийн арван төлөөлөл хамрагдаж 2018 оны 06 дугаар сарын 10-22-ны өдрүүдэд Америкийн номын сангийн хөгжлийн шинэ түвшинд хүрсэн ажил үйлчилгээтэй нь танилцан “Номын сангийн нөөцийн менежмент” сэдэвт сургалтад хамрагдлаа.

Монголын номын санчид орчин үеийн номын сангийн хөгжлийн чиг хандлагыг тодорхойлж буй мэдээллийн технологи өндөр хөгжсөн Америкийн Нэгдсэн Улсын 12 номын санд зочилж, мэргэжил нэгт нөхдөөсөө шинэ мэдлэг, туршлагаас нь суралцаж ирлээ.

Хөтөлбөрийн хүрээнд Вашингтон ДиСи хот дахь Конгрессийн номын сан, Питтсбург хотын Карнегийн нэрэмжит хотын номын сан, Харааны бэрхшээлтэй иргэдэд зориулсан номын сан, Карнегийн бизнесийн номын сан, Питтсбургийн их сургуулийн номын сан, Манчестер хотын нийтийн номын сан, Нью Хэмпшир мужийн номын сан, Конкорд хотын нийтийн номын сан, Дартмоут коллежийн номын сан зэрэг томоохон хотууд, мужийн, орон нутгийн олон нийтэд болон хүүхдэд үйлчилдэг номын сангийн үйл ажиллагаатай танилцав. Мөн их, дээд сургуулийн болон хувийн номын сангуудын үйл ажиллагаа, номын санч бэлтгэдэг сургуулийн сургалтын хөтөлбөрөөс судалгаа хийжээ.

Америкийн номын санчид монголын номын санчдад өөрсдийн хуримтлуулсан туршлага, мэдлэгээ харамгүй хуваалцаж, хамтран ажиллах боломжоо тодорхойлсон нь Монголын номын сангуудын гадаад харилцаа, цаашдын хөгжилд үнэтэй хувь нэмэр болох юм.

Орчин үеийн техник технологийн ашиглан уншигчдад түргэн шуурхай мэдээлэл хүргэх үйлчилгээ

Бурлингтоны бизнесийн номын сан Питтсбург хот

Үнэт ховор номыг хадгалагч тусгай зориулалтын тавиур

Дартмоут коллежийн номын сан Конкорд хот

Хөтөлбөрт хамрагдсан номын санчид суралцаж ирсэн мэдлэгийн богцоо задалж, хот, хөдөөгийн номын санчидтайгаа мэдээллээ хуваалцахаар ирэх сарын сүүлээр орон нутагт сургалт семинар, Монголын номын санчдын улсын зөвлөгөөнийг 9 дүгээр сард зохион байгуулахаар төлөвлөөд байгааг дуулгахад таатай байна.

Энэхүү хөтөлбөрт хамрагдахад бодлогын болон санхүүгийн дэмжлэг үзүүлсэн БСШУСЯам, АНУ-ын Элчин Сайдын Яамны хамт олон Монголын номын сангуудын консорциум талархал илэрхийлж байна.

Гамшгийн эрсдэлийг бууруулах Азийн сайд нарын бага хуралд оролцож буй хүндэт зочдын нэг бол НҮБ-ын Ерөнхий нарийн бичгийн даргын Гамшгийн эрсдэлийг бууруулах асуудал хариуцсан тусгай төлөөлөгч, НҮБ-ын Гамшгийн эрсдэлийг бууруулах байгууллагын тэргүүн хатагтай Мами Мизутори юм. Тэрээр Азийн сайд нарын бага хурлын нээлтийн ажиллагаанд оролцон үг хэллээ.

Тэрээр хэлсэн үгэндээ, Юуны өмнө, энэхүү Бага хурлыг эх орондоо хүлээн авч, амжилттай зохион байгуулахад шаардлагатай бүхий л дэмжлэг, туслалцааг үзүүлсэн Монгол Улсын Ерөнхий сайд Ухнаагийн Хүрэлсүх, Монгол Улсын Засгийн газар, зочломтгой ард иргэд та бүхэнд талархал илэрхийлье.

Гамшгийн эрсдэлийг бууруулах Азийн сайд нарын бага хуралд би анх удаа оролцож байгаа хэдий ч та бүхнийг 2005 оноос хойш хоёр жил тутам хуран чуулж байгааг болон энэхүү Бага хурал Гамшгийн эрсдэлийг бууруулах Сендайн үйл ажиллагааны хүрээг 2015 онд баталснаас хойш хоёрдахь удаагаа зохион байгуулагдаж байгааг сайн мэдэх билээ.

Энэ тоо баримт нь та бүхнийг улс төрийн манлайллын хувьд ч, гамшигт хамгийн их нэрвэгддэг бүс нутгийн хувьд ч гамшгийн аюул, уур амьсгалын өөрчлөлтийн сөрөг үр дагавраас ард иргэдээ хамгаалах сорилтыг даван туулах хүсэл эрмэлзлэл дүүрэн байгааг харуулж байна.

Бид энэ долоо хоногт харилцан ярилцах, үйл ажиллагаагаа тодорхойлох уламжлалаа үргэлжлүүлэн хэрэгжүүлэх болно. Дели хотноо зохион байгуулагдсан Азийн Сайд нарын бага хурлаас Гамшгийн эрсдэлийг бууруулах үйл ажиллагааны манлайлагч-төрийн түшээ хэмээн хүлээн зөвшөөрөгдсөн Ерөнхий сайд У.Хүрэлсүхийн санаачилгаар бид өнөөдөр Ази тивийн зүрхнээ хуран чуулж байна.

Эдгээр олон асуудлын талаар та бүхэн ойрын хэд хоногт хэлэлцэн ярилцах билээ.

Бүс нутгийн гамшгийн нөхцөл байдал

Өнгөрсөн жил Ази-Номхон далайн бүс нутагт маш олон гамшиг тохиолдсон бөгөөд эдийн засгийн хохирол 34 тэрбумам долларт хүрсэн бөгөөд эдгээр нь Сендайн үйл ажиллагааны хүрээг хэрэгжүүлэх чиглэлээр идэвхтэй ажиллах шаардлагатайг харуулж байна.

Сүүлийн жилүүдэд гамшгийн улмаас амь насаа алдсан хүний тоо буурсан хэдий ч гамшгийн улмаас амьнасааалдсан хүний бараг 50 хувь энэ бүс нутагт байна. Гамшгийн эрсдэлийн удирдлагын асуудлаар тулгамдаж буй асуудлуудыг шийдвэрлэх зорилгоор Бангладешийн Кокс Базаар бүсэд санаачилга гаргаж Засгийн газрын болон холбогдох бусад байгууллагууд хоргодох байр байгуулж, далайн хар салхинд нэрвэгдсэн 1 сая орчим нэрвэгдэгсдийг хамгаалсан байна. Орон нутгийн шилжих хөдөлгөөний хяналтын төв болон Норвегийн дүрвэгсдийн зөвлөлийн мэдээллээр зөвхөн 2017 онд Ази, Номхон далайн бүс нутагт 8.6 сая хүн, Өмнөд Азид 2.8 сая хүн ам гамшгийн үр дагавараас зугтаж нутаг сэлгэн шилжин суурьшсан байна. Гэнэт тохиолддог гамшиг аюулт үзэгдэл, тухайлбал үер, салхи шуурга нь уур амьсгал, цаг агаарын нөлөөллөөс нэмэгдэж, бүс нутагт шилжин суурьших үндсэн шалтгаан болж байна.

Бид гамшгийн улмаас амиа алдсан, нэрвэгдсэн хүний тоог бууруулахын тулд эдгээр хүндрэл бэрхшээлүүдийг давах арга замыг олж, нэн чухал дэд бүтэц, эдийн засагт учруулж буй хохирлыг бууруулах боломжтой юм.

Бусад бүс нутгаас илүү их гамшиг болдог энэ бүс нутгийн ихэнх бэрхшээл Монгол оронд мөн тохиолдож байна. Монгол оронд газар хөдлөлт, үер, ойн түймэр, ган гачиг тохиолддог. Энэ оронд онцлон тохиолддог байгаль, цаг агаарын аюулт үзэгдлийн нэг бол Зуд бөгөөд зуны улирлын гангачиг, өвлийн улирлын эрс хүйтэн, хүчтэй салхи шуургатай холбоотой үүсдэг.

Монгол орны хүн амын 1/3 нь бэлчээрийн мал аж ахуй түшиглэн амьдардаг бөгөөд зудын улмаас бэлчээргүй болж, мал сүрэг өлдөн хорогдож, нүүдэлчин малчид амьжиргааны эх үүсвэрээ алдсанаар хөдөөгөөс хот суурин руу чиглэсэн шилжилт хөдөлгөөн ихэсдэг.

Монгол Улс эрт зарлан мэдээлэх тогтолцоогоо сайжруулах, хот суурин газар, орон нутгийн аль алинд Сендайн үйл ажиллагааны хүрээг хэрэгжүүлэх үүрэг амлалттайгаа нийцүүлэн гамшгийн эрсдэлийг бууруулах үндэсний зорилтуудаа тодорхойлон ажиллаж байна.

НҮБ-ын Гамшгийн эрсдэлийг бууруулах олон улсын стратегийн газрын Хотуудын гамшгийг тэсвэрлэх чадавхыг сайжруулах санаачлагыг бүс нутгийн хэмжээнд дэмжин ажиллаж байгаа бөгөөд ялангуяа Улаанбаатар хот гамшгийн эрсдэлийн менежментийн стратегиа Сендайн үйл ажиллагааны хүрээнд нийцүүлэн сайжруулах туршилтын төслийг идэвхтэй хэрэгжүүлж байна.

Гамшгийн эрсдэлийг бууруулах Сендайн хөтөлбөрийг хэрэгжүүлэхэд гарсан ололт, тулгарч буй бэрхшээлүүдийн талаар та бүхэнд танилцуулъя.

Гамшгийн эрсдэлийг бууруулах Сендайн хүрээ хөтөлбөрийг улс орон бүр өөрийн түвшинд хүчин чармайлт гарган хэрэгжүүлж, гамшгийн хохирлыг бууруулж, гамшгийн аюулаас сэргийлэх талаарх иргэдийн ойлголтыг нэмэгдүүлэхэд улс төрийн хүчтэй манлайлал хэрэгтэй.

Энэ хөтөлбөрийг өөрийн хэлнээ хөрвүүлэн нутагшуулсан улс орон олон болж, Сендайн хөтөлбөрийг хэрэгжүүлэх Азийн бүсийн төлөвлөгөөг баталсан үр дүнтэйгээр бид дахин золгож байна.

Бусад улс оронтой нэгэн адил, Монгол Улс гамшгийн эрсдэлийг бууруулах Үндэсний зөвлөлийг байгуулан, нийгмийн бүхий л төлөөллийг багтааж, гамшгийн аюулд эмзэг байгаа байгууллага, иргэдийн санал бодлыг тусгаж байна.

Оролцоог хангасан байна гэдэг нь гамшгийн эрсдэлийг бууруулах Сендайн хөтөлбөрийн нэгэн чухал үзэл санаа юм.

Засаглал сайн байвал холбогдох талуудын сайн оролцоо бий болдог бөгөөд аль нэг засгийн газар дангаараа гурван жилийн өмнө НҮБ-ын гишүүн улс орнуудын хамтран баталсан Гамшгийн эрсдэлийг бууруулах Сендайн хүрээ хөтөлбөрийн зорилтод хүрэх боломжгүй, олон талын оролцоо чухал байна.

Гамшгийн аюулд харилцан адилгүй өртөж байгаа иргэдийн дуу хоолойг бид сонсох нь чухал. Хөгжлийн бэрхшээлтэй, өндөр настай, хүүхэд эмэгтэйчүүд, нутгийн уугуул иргэдийн оролцоог нэмэгдүүлэх, харилцан зөвшилцөж хамтран хэрэгжүүлэх хэрэгтэй юм.

Холбогдох талуудын төлөөллөөс бүрдсэн бүлгүүд тэдгээр иргэдийг бүрэн гүйцэд төлөөлөн, энэхүү хурлын үеэр олон арга хэмжээг зохион байгуулж байгаа нь бүс нутагт оролцоог хангахад өндөр ач холбогдолтой байна.

Сендайн хөтөлбөрийг баталсан 3 жилийн хугацаанд хөтөлбөрийн 5 дугаар зорилтыг хэрэгжүүлэн үндэсний болон орон нутгийн түвшинд гамшгийн эрсдэлийг бууруулах төлөвлөгөө боловсруулсан улс орнуудын сайн жишээг бид энэ долоо хоногт Улаанбаатар хотноо зохион байгуулагдаж буй хурлын үеэр сурталчлах юм. Бидэнд энэ зорилтыг хэрэгжүүлэхэд 2 жилийн хугацаа үлдээд байна.

Уур амьсгалын өөрчлөлтийн эсрэг НҮБ-ын конвенцийн 23 дугаар хуралдааныг Фижи Улс даргалан оролцож, энэ жилд Үндэсний гамшгийн эрсдэлийг бууруулах бодлогын баримт бичгийг шинэчлэн, Гамшгийн эрсдэлийг бууруулах Сендайн хөтөлбөртэй уялдуулан, дээрх зорилтыг хэрэгжүүлэхэд чухал хувь нэмэр боллоо.

Бүгд Найрамдах Энэтхэг Улс Гамшгийн эрсдэлийг бууруулах Азийн сайд нарын бага хурлыг зохион байгуулж, олон чиглэлээр дэвшил гаргасаар байна. Сендайн хөтөлбөрт суурилсан үндэсний түвшний гамшгаас хамгаалах төлөвлөгөөг батлан гамшгийн хохиролын мэдээллийн санг байгуулан, тус улсын нийт 640 дүүрэгт эрсдэлийн мэдээллийн сан байгууллаа.

Цаашилбал олон улс оронд гамшгаас хамгаалах үйл ажиллагааг манлайлан оролцож байгаа номхон далайн улс орнуудын сайн жишээнээс суралцаж, гамшгийн эрсдэлийг бууруулах үйл ажиллагааг уур амьсгалын өөрчлөлтөд дасан зохицох үйл ажиллагаатай уялдуулж байна.

Гамшгийн эрсдэлийг бууруулах Сендайн хөтөлбөрийг үнэлэх мониторингийн механизмыг бид бий болгож 3 сард зарласан бол ихэнх улс орнууд Сендайн хөтөлбөрийг хариуцсан алба хаагчийг томилсон зэрэг нь цаашид улам өндөр үр дүнтэй ажиллах суурь нөхцөл болж байна.

Эдгээр ажилтнууд өөрийн улс оронд статистик мэдээллийн албатай нягт хамтран ажиллаж, үндэсний гамшгийн хохиролын мэдээллийн санг бий болгох талаар тодорхой ахиц гаргаж, 7 зорилт 38 индикаторын дагуу хэрэгжилтээ тайлагнана гэдэгт итгэлтэй байна.

Үндэсний болон орон нутгийн гамшгийн эрсдэлийг бууруулах стратегийг бодитоор хэрэгжүүлэх гол үндэс нь бүс нутгийн бүхий л улс оронд гамшгийн хохирлын мэдээллийн сантай байх явдал юм.

Хохирлыг бүртгэж эхэлснээр ирээдүйн хөрөнгө оруулалтыг зөв хуваарилж, 2030 он хүртэл хөтөлбөрийг амжилттай хэрэгжүүлэх бололцоотой болох юм.

Гамшгийн хохирлын мэдээллийг цуглуулж, анализ хийх асуудал олон бэрхшээлтэй тулгарч байгааг бид сайн ойлгож байна. Ийм ч учир НҮБ-ын Гамшгийн эрсдэлийг бууруулах газар, НҮБ-ын Хөгжлийн хөтөлбөр энэ салбарт чадавхыг бэхжүүлэх чиглэлээр дэмжлэг үзүүлж хамтран ажиллахад бэлэн байдаг. Үүнээс гадна олон улс орон Өмнөд-Өмнөдийн хамтын ажиллагааны механизмаар дамжуулан хоёр талын хамтын ажиллагааг хөгжүүлж байна.

Эрхэмсэг зочид төлөөлөгчид өө,

Гамшгийн дараа хор уршгийг арилгах үе шатнаас гамшгийн өмнөх, урьдчилан сэргийлэх үйл ажиллагааг эрчимжүүлэх асуудлыг биднээс өөр дэлхийн аль ч бүс нутаг илүүтэй ойлгохгүй. Гамшгийн суурь шалтгаан болж байгаа эдгээр эрсдэлүүдийг бууруулах нь чухал байна.

Бидний өмнө тулгамдаж байгаа аливаа эрсдэлээс урьдчилан сэргийлэхээс гадна шинээр эрсдэл үүсгэхгүй байхад анхаарал хандуулах хэрэгтэй. Ирж буй жилүүдэд энэ бүс нутагт олон хөтөлбөр, бүтээн байгуулалт хэрэгжиж байгаа нь гамшгийн эрсдэлийг хөгжлийн төлөвлөлттэй уялдуулах чухал боломжийг бий болгож байна.

Бид тогтвортой хөгжлийн зорилт, Уур амьсгалын өөрчлөлтийн эсрэг Парисын хэлэлцээр, гамшгийн эрсдэлийг бууруулах Сендайн хөтөлбөрийг уялдуулах, цаашлаад “Шинэ хотжилт” хөтөлбөрт нийцүүлэх ажлыг анхаарах нь зүйтэй байна.

Харилцан уялдаатай ажиллах нь давхардал үүсгэхгүй, хязгаарлагдмал нөөцөөр олон ажлыг амжуулах бодит боломжийг бий болгох юм.

Бид ядууралтай тэмцэж, уур амьсгалын өөрчлөлтөд дасан зохицож, хот суурин газруудад дэд бүтцийг сайтар төлөвлөж, экосистемийг хамгаалан, гамшгийн эрсдэлийг бууруулах институцийн чадавхийг бэхжүүлэх шаардлагатай байна.

Хэдийгээр гамшгийн эрсдэлийг бууруулах ажил үндэсний Засгийн газрын үүрэг мөн хэдий ч нийгмийн олон талуудын оролцоог хангаж, иргэний нийгэм, хувийн хэвшил, шинжлэх ухаан технологийн болон хэвлэл олон нийтийн олон талт оролцоог хангахын ач холбогдол өндөр болохыг цохон тэмдэглэмээр байна.

Үүгээр хэлэх үгээ өндөрлөхийн ялдамд Монгол Улсын Засгийн газарт энэхүү хурлыг өөрийн улс оронд зохион байгуулж байгаа явдалд дахин талархал илэрхийлье. Анхаарал тавьсанд баярлалаа

Онцгой байдлын ерөнхий газар

Өнөөдөр буюу 2018 оны долдугаар сарын 04-ний Лхагва гарагт хийх засварын хуваарийг танилцуулж байна. Хэрэглэгчид ээ, засвар хийх хугацаанд хэрэглээгээ түр зохицуулна уу.

⚡️БАЯНЗҮРХ ДҮҮРЭГ

09:00-21:00 цагт: 11-р хороо Хонхор орчмоор, 20-р хороо,

⚡️НАЛАЙХ ДҮҮРЭГ

10:00-18:00 цагт: 2-р хороо 16-18, 20-22-р байр, Дулааны станцын контор, Хас банк, Сод-Ирээдүй цэцэрлэг, Татварын алба, Халамж үйлчилгээний хэлтэс.

Цахилгаан эрчим хүчээр түр хязгаарлагдах хэрэглэгчдийг байршлаар нь баримжаалан жагсааж байгааг анхаарна уу. Цаг агаарын болон болзошгүй аваар саатлаас шалтгаалан хуваарьт өөрчлөлт орох магадлалтай ба өөрчлөгдсөн тохиолдолд УБЦТС ТӨХК-тай байгуулсан гэрээнд бүртгэлтэй утсаар холбогдож ААН, үйлдвэр, компаниудад мэдээлэх болно.

Засварын ажлыг тухайн тоноглолыг хүчдэлээс бүрэн чөлөөлсний дараа хийдэг нөхцөл байдлыг харгалзан үзэж хэрэглээгээ түр зохицуулан, хүлээцтэй хандахыг хэрэглэгч Та бүхнээс хүсье.

Цахим үйлчилгээ: http://my.tog.mn
Мэдээлэл, лавлагаа авах утас: 70047004

Цагдаагийн ерөнхий газрын дарга, Дотоодын цэргийн командлагч, цагдаагийн хурандаа С.Баатаржав Б/476 тоот тушаал гаргаж, Баянхонгор аймаг дахь Цагдаагийн газрын дарга, цагдаагийн хурандаа Ц.Анхбаяр, Говь-Алтай аймаг дахь Цагдаагийн газрын дарга, цагдаагийн хурандаа Г.Түмэннасан, Ховд аймаг дахь Цагдаагийн газрын дэд дарга, цагдаагийн хошууч Н.Бямбажав нарт Цагдаагийн албаны тухай хуулийн 81 дүгээр зүйлийн 81.4.2 дахь хэсэгт заасны дагуу сахилгын шийтгэл ногдуулжээ.

Цагдаагийн алба хаагчид шашны зан үйлд оролцсон үйлдэл нь Монгол Улсын Төрийн албаны тухай хууль, Цагдаагийн албаны тухай хууль, Цагдаагийн алба хаагчийн ёс зүйн дүрмийг тус тус зөрчсөн байна.

Хурандаа С.Баатаржав бусад алба, нэгж, нутаг дэвсгэр хариуцсан цагдаа, дотоодын цэргийн байгууллагын удирдлагуудад Монгол Улсын Үндсэн хууль бусад хуулийн дээдлэн хүндэтгэж сахин биелүүлэх, Төрийн албаны болон төрийн албан хаагчийн ёс зүйн хэм хэмжээ, төрийн байгууллагын соёл, дэг журмыг сахиж, нэр хүндийг эрхэмлэн дээдлэх, Албан үүрэгтэйгээ холбогдолгүй асуудлаар нам, төрийн бус болон шашны байгууллагын үйл ажиллагаанд төрийн алба хаагчийн хувьд оролцохгүй байх зэрэг хуулийн зарчмыг үйл ажиллагаандаа мөрдлөг болгохыг үүрэг болгожээ.\

10.00 цагт Монгол Улс, БНХАУ-ын ӨМӨЗО-ы хамтарсан “Шинжлэх ухаан, технологийн хамтын ажиллагаа-2018” үзэсгэлэн МХАҮТ-ийн байранд нээлтээ хийнэ.

10.00 цагт Өвөрмонголын 12 компани оролцож, Монголын компаниудтай хамтарч ажиллах гарц, боломжуудыг Корпорэйт зочид буудалд хэлэлцэнэ. Холбоо барих: 99090339

11.00 цагт “Монголчуудын уламжлалт шүтээн, сахиус” үзэсгэлэнгийн нээлт Монголын Үндэсний музейд болно.

11.30 цагт Үндэсний мэдээллийн төвд “Загийн гол” хөдөлгөөн, “Дэлхийн Монгол Ногоон нэгдэл”, “Ардын заргын товчоо” ТББ-аас “Централ Эшиа Майнинг” компани нь Баянхонгор аймгийн Заг суманд алт олборлохоор завдаж буй талаар болон тус компанийн хувьцаа эзэмшигч Д.Эрдэнэбилэгт хандан мэдэгдэл хийнэ.

12.30 цагт МҮЭХ-ны 4 давхрын хурлын зааланд Эрүүл мэндийн ажилтны ҮЭХ-оос хэвлэлийн бага хурал зарлаж байна. Утас 99203600

14.00 цагт МҮХАҮТ-ын 507 тоотод Монгол-Оросын бизнес уулзалт болно. Холбоо барих: 89918969, 99090339

-АЗИЙН САЙД НАР УЛААНБААТАР ХОТНОО ЧУУЛЖ ЭХЭЛЛЭЭ-

Өнөөдөр 16:00 цагт Төрийн ордонд Гамшгийн эрсдэлийг бууруулах Азийн сайд нарын хоёрдугаар бага хурлын нээлтийн ажиллагаа эхэллээ. Энэхүү хурлыг хамтран зохион байгуулж буй Монгол Улсын Засгийн газрыг төлөөлж Шадар сайд Ө.Энхтүвшин, НҮБ-ыг төлөөлж тус байгууллагын Ерөнхий нарийн бичгийн даргын Гамшгийн эрсдэлийг бууруулах асуудлаарх Тусгай төлөөлөгч Мами Мизутори нар Төрийн ордны өмнөх Сүхбаатарын талбайд эрхэм хүндэт зочдоо ёслон угтав.

“Тогтвортой хөгжлийг хангахын тулд гамшгийн эрсдэлийг бууруулах нь” сэдэвт энэ удаагийн Азийн сайд нарын хуралд нийт 3500 гаруй төлөөлөгч оролцож байна. Ази, Номхон далайн бүс нутгийн 50 орон, Америк, Европ, Араб, Африк тивийн улс орон болон Засгийн газар хоорондын, бүс нутгийн болон төрийн бус байгууллагын 1584 төлөөлөл хүрэлцэн ирсэн байна.

Бага хурлыг нээж Монгол Улсын Шадар сайд Ө.Энхтүвшин хэлсэн үгэндээ “Өнөөдрийн хурал газар зүйн өвөрмөц тогтоцтой, эрс тэс уур амьсгалтай, урт хугацаанд үргэлжилдэг гамшгийн аюул нь нийгэм, эдийн засагт ихээхэн хохирол учруулдаг далайд гарцгүй улсад анх удаа зохион байгуулагдаж байгаагаараа онцлог” хэмээн тэмдэглэв.

Мөн тэрээр “Гамшгийн эрсдэлийг бууруулах Азийн сайд нарын бага хурал гамшгаас урьдчилан сэргийлэх, болзошгүй эрсдэлийг бууруулах, улс орнуудын хамтын ажиллагааг хөгжүүлэх, гамшгаас хамгаалах үйл ажиллагаанд зарцуулах хөрөнгө оруулалтыг нэмэгдүүлэх, инновацийг нэвтрүүлэх үүргээ бүсийн түвшинд амжилттай хэрэгжүүлж байгаа платформ гэж дүгнэж байна.

Дэлхийн улс орнууд хүн төрөлхтөнд учирч болзошгүй төрөл бүрийн аюул заналтай тэмцэх, хариу арга хэмжээ авахаас илүүтэйгээр урьдчилан сэргийлэх үйл ажиллагаанд илүү их ач холбогдол өгч тэргүүлэх чиглэлээ болгохын зэрэгцээ бүс нутгийн хамтын ажиллагааны механизмыг байгуулахын чухлыг онцлон үзэх болсон байна” гэж хэллээ.

Хурлын үеэр Монгол Улсын Засгийн газрын хоёр онцлох арга хэмжээ, сайд нарын болон сонирхогч талуудын хуралдаан, 14 техникийн ба сэдэвчилсэн, 53 салбар хуралдаан болон 13 дагалдах арга хэмжээнүүдийг зохион байгуулахаар ажиллаж байна. Маргааш 51 байгууллага оролцох танилцуулах үзэсгэлэн нээх бөгөөд 47 илтгэгч өөрийн үйл ажиллагаагаа танилцуулах юм.

Шадар сайд Ө.Энхтүвшин “Энэхүү хурлаар Сендайн үйл ажиллагааны хүрээ баримт бичиг бүс нутгийн болон үндэсний түвшинд хэрхэн хэрэгжсэнийг тайлагнаж, 2018-2020 онд Азийн бүс нутагт хэрэгжүүлэх төлөвлөгөө, гамшгийн эрсдэлийг бууруулах “Улаанбаатарын тунхаглал” зэргийг бид бүхэн хэлэлцэн батлах болно” гэж мэдэгдлээ. Тэрбээр хурлыг амжилттай зохион байгуулснаар бүс нутаг дахь гамшгийн эрсдэлийг бууруулах бодлогын үзэл баримтлал тодорхой болж, бид бүхний хамтын ажиллагаа улам өргөжин хөгжинө гэдэгт илтгэл төгс байгаагаа илэрхийлэв.

-БАЙГАЛИЙН ГАМШГИЙН АЮУЛААС БОЛЖ ОРОН ГЭРГҮЙ ХОЦОРЧ, ЭЦЭГ ЭХЭЭ АЛДАЖ БАЙГАА ХҮҮХДҮҮДИЙГ ХАРААД БИ ӨӨРИЙН ЭРХГҮЙ УЙЛДАГ-

НҮБ-ын Ерөнхий нарийн бичгийн дарга Антонио Гуттериш бага хурлын үйл ажиллагаанд амжилт хүсэн, видео мэндчилгээ дэвшүүлжээ. Бага хурлын нээлтийн ёслолд “American school” сургуулийн тавдугаар ангийн сурагч, 10 настай З.Маралгоо Ази, Номхон далайн улс орнуудын бүх хүүхэд, залуучуудыг төлөөлж үг хэллээ.

Тэрээр “Та бүхэнд энэ өдрийн мэндийг хүргэе. Намайг Маралгоо гэдэг би арван настай. Би Улаанбаатар хотод сурдаг бөгөөд энэ тайзнаа Ази, Номхон далайн улс орнуудын бүх хүүхэд, залуучуудыг төлөөлж үг хэлэхээр ирлээ.

Газар хөдлөлт, үер, цунамигаас болж амь насаа алдаж зовж, зүдэрч байгаа хүмүүсийг зурагтаар үзэхэд надад маш их айдас төрдөг. Байгалийн гамшгийн аюулаас болж орон гэргүй хоцорч, эцэг эхээ алдаж байгаа хүүхдүүдийг хараад би өөрийн эрхгүй уйлдаг.

Манай оронд “ЗУД” гэдэг өөрийн онцлог бүхий байгалийн гамшиг болдог. Зудын үеэр цаг агаар тэсгим хүйтэн болж, ан амьтдын хөл хөдөлж чадахгүй болтлоо тас хөлддөг.

Гамшиг тохиолдсон үед өөрсдөдөө тусалж чадахгүй байгаа хүмүүсийг хараад надад харамсалтай санагддаг. Гэсэн хэдий ч тусламж хэрэгтэй хүмүүсийн төлөө гараа сунгах сая сая эрэлхэг, зоригтой хүмүүс байдгийг би мэднэ. Аврагчид эцэг эх, хүүхдүүдийг аюулаас аварч байгааг хараад би хязгааргүй ихээр баярладаг.

Манай хотод газар хөдлөлт болсон тохиолдолд яах ёстой талаар сургуулиас минь бидэнд зааж өгдөг. Ангийн найзууд болон багш нарынхаа хамтаар аюултай үед барилгаас болгоомжтойгоор түргэн, шуурхай гарах сургуулилтуудыг хийдэг. Мөн хэрвээ найз маань гэмтвэл анхан шатны тусламж үзүүлэх тухай ч зааж өгдөг.

Эдгээр энгийн анхан шатны тусламжуудыг Та, Би, Бид Бүгд мэддэг байх ёстой гэдэгтэй надтай санал нийлж байгаа гэдэгт итгэлтэй байна. Мөн энэ шалтгааны улмаас өнөөдөр миний төрөлх хот болох Улаанбаатарт дэлхийн 50 гаруй улсын мянган мянган хүмүүс цугларч байгааг би мэднэ.

Чин сэтгэлээсээ би та бүхнийг Ази-Номхон далайн бүсийн хүүхэд залуучуудтай хамт сэтгэл зүрх, бодол санаа, хүсэл тэмүүллээ нэгтгэн бид бүгдийн төлөө гэрэлт ирээдүйг бүтээхийг уриалж байна. Баярлалаа” гэв.