Month: July 2018

Монгол Улсын Хууль зүй, дотоод хэргийн яам жендэрийн тэгш байдлыг хангах хүрээнд ХЗДХ-ийн сайдын эрхлэх асуудлын хүрээний хууль сахиулах байгууллагуудын жендэрийн нэгдсэн бодлогын баримт бичгийг боловсруулан баталж хэрэгжүүлж байсан билээ. Тухайн бодлогын баримт бичгийг 2018 оны 6 дугаар сарын 13 өдрийн А117 дугаар тушаалаар шинэчлэн баталлаа.

Энэхүү жендэрийн нэгдсэн бодлого нь хууль сахиулах байгууллагад ажиллагсдын жендэрийн ялгаатай хэрэгцээг бодлого төлөвлөлтөд тусгах, тэднийг чадавхжуулах замаар тэгш эрх, тэгш оролцоог нь хангах тогтвортой бодлогын гараа болж байгаа юм.

Бодлогын баримт бичиг батлагдсантай холбоотойгоор 6 дугаар сарын 29-ний өдөр танилцуулах сургалтыг зохион байгуулж, хууль сахиулах байгууллагуудын 50 гаруй албан хаагчдийг хамрууллаа.

Жич: Энэхүү бодлогын баримт бичгийг англи хэлнээ орчуулан, 500 ширхэг хэвлүүлж салбарын хэмжээнд сурталчлан таниулахад дэмжлэг үзүүлсэн Монгол Улсын Засгийн газар, Жендэрийн үндэсний хороо Азийн Хөгжлийн Банктай хамтран хэрэгжүүлж буй “Салбар, орон нутгийн жендэрийн мэдрэмжтэй хөгжлийн бодлого, төлөвлөлт, үйл ажиллагаа” техник туслалцааны төсөл, түүний багийханд талархал илэрхийлье.

Монгол Улсаас ЮНЕСКО-гийн дэргэд суугаа Байнгын төлөөлөгч, Элчин сайд А.Баттөр 2018 оны 7 дугаар сарын 3-ны өдөр ЮНЕСКО-гийн Ерөнхий захирал хатагтай Одри Азулэид итгэмжлэх захидлаа барьж, Монгол, ЮНЕСКО-гийн харилцаа, хамтын ажиллагааны талаар санал солилцов.

Үндэсний их баяр наадам болох гэж байгаатай холбогдуулан долдугаар сарын 9,10-ны өдрүүдийг амралтын өдөрт шилжүүлэх шийдвэрийг дөнгөж сая Засгийн газрын хуралдаанаас гаргасан талаар хэвлэлүүд мэдээлсэн. Гэвч Ерөнхий сайдын зүгээс дэмжээгүй байна. Нийтээр амрах өдрүүдийг хуулиар зохицуулдаг бөгөөд Үндэсний их баяр наадмаар монголчууд тав хоног амардаг билээ.

Унадаг дугуйн спортоор хичээллэдэг тамирчдад зориулагдсан усан дээр хөвөх төхөөрөмж “Улаан акул”-ыг танилцуулахаар бэлтгэлээ. Хуурай газар унадаг дугуй жийх, усан дээр унадаг дугуйн дөрөө жийх нь харилцан адилгүй. Усны даралт их байдаг тул маш их хурд, хүч гаргах шаардлагатай болдог. Яг энэ зарчим л тамирчдын хүч чадал, тэсвэр тэвчээрийг нэмэгдүүлэхэд гол ач холбогдолтой гэж үзжээ.

Унадаг дугуй болон завины хослосон төхөөрөмжийг өмнө нь Германы алдарт автомашин үйлдвэрлэгч “BMW” компанид ажиллаж байсан загвар зохион бүтээгч Жозеф Рубау бүтээсэн байна. Хамгийн анх “Sea Otter Europe” гэх үзэсгэлэнгийн үеэр олон нийтэд танилцуулж байсан юм.

Бат бөх төдийгүй хөнгөн материалыг ашиглан хийсэн энэхүү төхөөрөмжийг спорт, аялал зугаалга, сонирхогчдын гэсэн гурван төрлийн зориулалтаар бүтээжээ. Байнгын усан дээр хөвөх зориулалтын төхөөрөмж гэдэг утгаар нь зэвэрдэггүй ган төмрөөр урлажээ.

Гурван төрөл зүйлээсээ шалтгаалаад харилцан адилгүй нэмэлт тоноглолуудтай юм байна. Өөртөө бас бус зүйлсээ хийгээд авч явах зориулалтын савны хэсэгтэй. Хамгийн энгийн буюу сонирхогчдын төрлийн төхөрөөмж нь 5800 ам.долларын үнэтэй бол спорт төрлийнх нь 11600 ам.доллар, аялал зугаалгын төрлийн төхөөрөмж нь 8100 ам.долларын үнэтэй юм байна.

Гамшгийн эрсдэлийг бууруулах Азийн сайд нарын II бага хурлын хүрээнд олон нийтэд зориулан Сүхбаатарын талбайд дэлгэж буй Олон улсын үзэсгэлэнг Шадар сайд Ө.Энхтүвшин өнөөдөр нээлээ.

Шадар сайд Ө.Энхтүвшин “Энэхүү үзэсгэлэнгийн зорилго нь шинжлэх ухаан, техник, технологийн хөгжлийн чиг хандлагыг гамшгийн эрсдэлийг бууруулахад хэрхэн ашиглаж байгаа, гамшгийн эрсдэлийг бууруулах чиглэлээр улс орнуудын олсон амжилт, Ази Номхон далайн бүс нутгийн улс орнуудын түүх, соёл, уламжлал, хөгжил зэрэг олон асуудлаар харилцан мэдээлэл, туршлага солилцоход оршиж байгаа юм” гээд, “Олон нийтийн оролцоотой гамшгийн эрсдэлийг бууруулах талаар хэрэгжүүлж байгаа арга хэмжээ, туршлагууд миний анхаарлыг их татлаа” хэмээн онцлов.

Үзэсгэлэнг Монгол Улсын Байгаль орчин, аялал жуулчлалын яам, Нийслэлийн Засаг даргын Тамгын газар, Онцгой байдлын ерөнхий газар хамтран зохион байгуулж байгаа бөгөөд Гамшгийн эрсдэлийг бууруулах Азийн сайд нарын бага хуралд оролцож байгаа 49 улс орон, олон улсын байгууллага гамшгийн эрсдэлийг бууруулах талаар хэрэгжүүлж байгаа үйл ажиллагаагаа өөрсдийн бүтээлээр дамжуулан олон нийтэд хүргэж байгаа юм.

Шадар сайд Ө.Энхтүвшин “Монгол Улсын нийслэлийн төв цэг болох их жанжин Сүхбаатарын талбайд зохион байгуулж байгаа энэхүү үзэсгэлэнг Гамшгийн эрсдэлийг бууруулах Азийн сайд нарын бага хуралд оролцогч 50 гаруй улсын 3000 шахам төлөөлөгч үзэж сонирхохоос гадна Монгол Улсын өнцөг булан бүрээс ирсэн иргэд, гадаад дотоодын жуулчид ирж танилцан та бүхний амжилт бүтээл, шинэлэг санаа, шилдэг шийдэл, сайн туршлагыг өөрсдийн амьдрал ахуй, үйл ажиллагаандаа хэрэгжүүлэх болно гэдэгт эргэлзэхгүй байна. Энэхүү үзэсгэлэнгээр дамжуулан Ази номхон далайн бүс нутгийн улс орнуудын олон байгууллага, иргэдийн хооронд шинжлэх ухаан, судалгаа шинжилгээ, техник технологи, бизнесийн болоод ажил хэргийн түншлэл, хамтын ажиллагааны эхлэл тавигдаж, цаашид өргөжин хөгжих болно гэдэгт миний бие итгэж байна. Та бүхэн нүүдэлчний болон орчин үеийн суурин амьдралын хэв маягийг хослуулан амьдардаг монгол түмний ахуй амьдрал, ёс заншил, түүх, уламжлал, байгалийн хосгүй сайхныг харуулсан аялал жуулчлал, Монгол үндэстний цэнгэл болсон баяр наадмын мэдээлэлтэй танилцаж, Монголын сайхан орноор аялаарай” хэмээлээ гэж Шадар сайдын Ажлын албанаас мэдээлэв.

“Шангри Ла” зочид буудалд болж буй Гамшгийн эрсдэлийг бууруулах Азийн сайд нарын бага хурал салбар хуралдаануудаар үргэлжилж байна.

“Нийгмийн хамгаалал ба эмзэг байдлыг бууруулах” сэдэвт сэдэвчилсэн хуралдаан 10:45 цагт эхэллээ. Энэхүү хуралдааныг Онцгой байдлын ерөнхий газрын дарга, хошууч генерал Т.Бадрал удирдан явуулж байна.

Нийгмийн хамгааллын бодлого, хөтөлбөрүүд нь ядуурал, эмзэг байдлыг бууруулахыг зорьж, хямралын үед хүний суурь хэрэгцээг хангах үйл ажиллагаанд улам чиглэгдэх болсон.

Энэхүү хуралдаанаар нийгмийн хамгааллын хөтөлбөрийг төлөвлөхөд мөнгөн тусламж, урьдчилсан таамаглалд суурилсан санхүүжилт зэргийг хүн амын эмзэг бүлэг, гамшигт өртсөн айл өрх, орон нутгийнхны гмшгийг даван туулах чадавхыг нэмэгдүүлэх, гмшгийн эмзэг байдлыг бууруулах арга хэмжээ авахад хэрхэн чиглүүлж болох арга замуудыг авч үзэх юм байна.

Мөн хямралын үеийн эхний шатанд айл өрхүүд гамшгийг даван туулах үр дүнтэй арга хэмжээнүүдийг хэрхэн хэрэгжүүлж эхлэх талаар хэлэлцэнэ. Танилцуулах жишээ баримт нь нийгмийн хамгааллын өнөөгийн практик байдлыг харуулахын зэрэгцээ өнөөгийн нийгмийн хамгааллын тогтолцоог өргөжүүлэх боломжийг судлах боломж олгох ач холбогдолтой.

Уг хуралдаан нь Ази, номхон далайн орнуудад хэрэгжүүлж байгаа нийгмийн хамгааллын тогтолцоог хэрхэн зохицуулах, эсвэл шинээр бий болгох, өсөн нэмэгдэж буй байгалийн гамшгийн үед орон нутгийн иргэдийн гамшгийг даван туулах, тэсвэрлэх чадавхыг хангахад чиглэсэн зөвлөмжийг хүргэх зорилготой юм гэж Онцгой байдлын ерөнхий газраас мэдээллээ.

Монголын Үндэсний Музей өөрийн сан хөмрөгөөс Үндэсний их баяр наадмыг тохиолдуулан монголчуудын уламжлалт шүтээн, сахиусны холбогдолтой 70 гаруй эд өлгийн зүйлсийн үзэсгэлэнг өнөөдөр олон нийтэд дэлгэлээ.

Тус үзэсгэлэнд Бөө болон Чойжин сахиусны гүртэнгийн иж бүрэн хувцас, онго шүтээн, сахиус, мөн Халх Монголын шарын шашны тэргүүн Богдыг өргөмжлөх Далай лам, Банчин эрдэнийн тамга бүхий шар торгон өргөмжлөлийг анх удаа олноо дэлгэн үзүүлж байгаа аж. Энэхүү шар торгон өргөмжлөлд Далай лам болон Банчин эрдэнийн сахиус бурхадыг дүрсэлснээрээ онцлог юм.

Дашрамд дурдахад, үзэсгэлэн наймдугаар сарын 25-ны өдөр хүртэл үргэлжлэх ажээ.

Ц.УРАНБОЛОР

ОХУ-д болж буй 21 дэх удаагийн хөлбөмбөгийн дэлхийн аварга шалгаруулах тэмцээний шөвгийн 16-н сүүлийн тоглолтууд өнгөрсөн шөнө болж, найман баг тодорлоо. Ингээд шөвгийн наймд үлдсэн багуудыг танилцуулья:

• УРУГВАЙ – ФРАНЦ (Долдугаар сарын 6-ны 22.00, Доод Новгород хот)
• БРАЗИЛ – БЕЛГИ (Долдугаар сарын 7-ны 02.00, Казан хот)
• ШВЕД – АНГЛИ (Долдугаар сарын 7-ны 22.00, Самара хот)
• ОХУ – ХОРВАТ (Долдугаар сарын 8-ны 02.00, Сочи хот)

• УРУГВАЙ – ФРАНЦ (Долдугаар сарын 6-ны 22.00, Доод Новгород хот)

УРУГВАЙ

21 дэх удаагийн ДАШТ-д Уругвайн шигшээ баг хэсэгтээ ОХУ, Тунис, Панамыг хожин есөн оноогоор тэргүүлэхдээ хаалгандаа гоол алдаагүй. Гэхдээ шөвгийн 16-д Португалтай тоглоход нэг гоол алдсан юм. Уругвайчуудын 597 минут хаалгандаа гоол алдаагүй гэсэн амжилтыг Португалын Пэпэ зогсоосон. 1930, 1950 оны дэлхийн аварга Уругвайн шигшээ баг дэлхийн шилдэг хөлбөмбөгчин К.Роналду тэргүүтэй Португалын шигшээ багийг нутагт нь буцааж шөвгийн наймд үлдээд байна.

Уругвайн шигшээ баг 2014 онд Бразилд болсон 20 дахь удаагийн ДАШТ-д үхлийн хэсэг болох Итали, Англи, Коста-Рикагийн шигшээ багуудтай нэг хэсэгт багтсан юм. Хэсгийн хоёрдугаар байраар шалгарсан ч шөвгийн 16-д Колумбид ялагдан тэмцээнээ өндөрлүүлсэн удаатай. Энэ удаа ‘А’ хэсэгт багтаж, хожигдолгүйгээр хэсгээ тэргүүлэн улмаар Португалыг хожоод байна.

ФРАНЦ

Францын шигшээ баг “С” хэсгийг тэргүүлсэн Аргентинтай хасагдах шатны эхний тоглолтоо хийсэн. Казан хотод болсон тоглолт 4:3-аар Францын ялалтаар өндөрлөсөн. Тоглолтын гол баатар 19 настай Францын Килиан Мбаппэ байсан бөгөөд тэрбээр хоёр гоол оруулж, багаа ялалт байгуулахад гол үүргийг гүйцэтгэсэн.

Францын шигшээ баг хоёр мянганы заагт оргил амжилтаа үзүүлж байсан. 1998 оны дэлхийн аваргад түрүүлсэн бол ердөө хоёр жилийн дараа Европын аваргын цомыг өргөсөн. Улмаар 2006 онд дахин дэлхийн аваргын финалд үлдэж, Италид торгуулийн цохилтоор ялагдаж байсан юм. Харин 2014 онд Бразилд болсон дэлхийн аваргын шөвгийн наймд Германд хожигдсон. Энэ удаагийн Францын шигшээ багийн залуу тоглогчид гялалзсан амжилтыг үзүүлсээр байна. Мөн Килиан Мбаппэ энэ дэлхийн аваргад өөрийгөө бүрэн нээж чадлаа.

Шөвгийн наймд учраа таарсан Франц, Уругвайн тоглолт долдугаар сарын зургаад хуучнаар Горький, одоогийн Доод Новгород хотын 45 мянган хүний багтаамжтай “Доод Новгород” цэнгэлдэх хүрээлэнд болно. Тоглолт Улаанбаатарын цагаар 22.00-с эхэлнэ.

ОХУ – ХОРВАТ (Долдугаар сарын 8-ны 02.00, Сочи хот)

ОХУ

ОХУ-ын шигшээ баг дэлхийн аварга Испаний шигшээ багийг хожиж, шөвгийн наймд үлдсэн. Энэхүү тоглолт Москва хотын ‘Лужник’ цэнгэлдэх хүрээлэнд долдугаар сарын 1-ний өдөр болсон юм. Хэдэн зуун сая хөгжөөн дэмжигчдийнхээ өмнө 2010 оны дэлхийн аварга Испанийг хожих даалгавартай гарсан талбайн эзэд торгуулийн цохилтоор өрсөлдөгчөө гэрт нь буцаасан юм.

“А” хэсгийн хоёрдугаар байраар шалгарсан ОХУ, “В” хэсгийг тэргүүлсэн 2010 оны дэлхийн аварга Испаний шигшээ багуудын тоглолтыг 78 мянган үзэгч ‘Лужник’ цэнгэлдэхэд үзжээ. Эдгээр үзэгчийн ихэнх нь Оросын хөгжөөн дэмжигчид байсан юм. Мөн хүндэтгэлийн суудалд ОХУ, Испаний хүндэт зочид байлаа. Тоглолтын гол баатар нь хаалгач Акинфеев байсан бөгөөд Испанийн Коке, Аспасын нарын цохилтыг хааснаар сүүлийн тав дахь цохилтоос өмнө багаа хожилд хүргэсэн. Оросууд хамгийн сүүлд 1986 онд Мексикт болсон 13 дахь удаагийн ДАШТ-д шөвгийн 16-д үлдэж байжээ.

ХОРВАТ

“D” хэсгийг тэргүүлсэн Хорват, “C” хэсгийн хоёрдугаар байраар шалгарсан Данийн шигшээ багийн тоглолт Доод Новгород хотын 45 мянган хүний багтаамжтай “Доод Новгород” цэнгэлдэх хүрээлэнд болсон. Шөвгийн наймд өрсөлдөх ээлжит багаар Хорватын шигшээ баг тодорсон юм.

Хоёр багийн тоглолт 120 минутад 1:1-ээр тэнцээгээр өндөрлөж, торгуулийн цохилтоор ялагч тодрох болсон. Хорватын шигшээ баг илүү азтай байж, торгуулийн цохилтын гурвыг нь амжилттай болгосон бол даничууд хоёрыг нь оновчтой гүйцэтгэсэн. Ингээд хорватчууд торгуулийн цохилтыг 3:2-оор илүүрхэн шөвгийн наймд үлдлээ. Хорватын шигшээ баг Аргентин, Исланд, Нигерийг хожиж хэсгээ тэргүүлсэн. Хэсэгтээ Аргентинийг хожсон хорватчууд хүчтэй өрсөлдөгч гэдгээр харуулсаар байна. Хорватын шигшээ баг тусгаар тогтнолоо зарласнаасаа хойш анх удаагаа 1998 оны дэлхийн аваргад оролцож шууд хүрэл медаль хүртсэн байдаг. Харин түүнээс хойш 2002, 2006, 2014 оны ДАШТ-д оролцохдоо хэсгээс гарч чадаагүй байна.

ОХУ, Хорватын тоглолт долдугаар сарын 8-ны өдөр өглөөний 02.00 цагаас Сочи хотын “Фишт” цэнгэлдэх хүрээлэн болно. Энэ цэнгэлдэх хүрээлэнд нийт зургаан тоглолт болохоос сүүлийнх нь энэ тоглолт юм. “Фишт” цэнгэлдэх хүрээлэнг 2014 оны өвлийн олимпийн наадамд зориулан барьж байжээ.

БРАЗИЛ – БЕЛГИ (Долдугаар сарын 7-ны 02.00, Казан хот)

БРАЗИЛ

Америк тивийн төлөөлөл Бразил болон Мексикийн шигшээ багууд шөвгийн 16-д учраа таарсан. Тоглолт Самара хотын “Космос Арена” цэнгэлдэх хүрээлэнд болсон бөгөөд 2:0-оор дэлхийн таван удаагийн аварга Бразилын шигшээ багийн ялалтаар өндөрлөсөн юм.

Багаа шөвгийн наймд үлдэхэд дэлхийн үнэтэй хөлбөмбөгчин Неймар болон Роберто Фирмино нарын гоол үнэ цэнэтэй байв.

26 настай довтлогч Неймар бол Бразилын шигшээ баг төдийгүй дэлхийн шилдэг тоглогч гэдгээ өчигдрийн тоглолтод дахин харууллаа. Дэлхийн шилдэг хөлбөмбөгч Л.Месси, К.Роналдо нар гэртээ харьсан энэ үед Неймараас их зүйлийг хүлээж байгаа. Тэрбээр багаа ялалтад хүргэсээр байна. Дэлхийн аваргад түрүүлэх боломжтой байсан Аргентин, Испани, Португал зэрэг топ багууд эрт тэмцээнийг орхисон. Ийм үед Бразилын шигшээ баг боломжийг ашиглаж чадах уу гэдгийг харах үлдлээ. Гэхдээ дэлхийн үнэтэй хөлбөмбөгчин Неймарын үйлдлийг олон улсын хэвлэл мэдээлэл онцолсоор байна. Тоглолтын үеэр Бразилын супер од Неймар нэг гоол хийсэн ч түүнийг хэд хэдэн удаа зохиомлоор унан баашилсан хэмээн бичиж эхэллээ. Зарим спортын сувгууд энэ талаар нэвтрүүлэг хийгээд эхэлсэн байна. Неймарын энэ үйлдлийг залуу үеийнхэнд сөрөг үлгэр дууриалал үзүүлж байна гэж иргэд саналаа илэрхийлж, Олон улсын хөлбөмбөгийн холбоо анхааралдаа авах хэрэгтэй хэмээн зөвлөгөө ч хүргэж эхлэв.

БЕЛГИ

Бельгийн шигшээ баг G хэсгийг ганц ч хожигдолгүйгээр 9 оноогоор тэргүүлсэн бол Японы шигшээ баг хэсгээсээ хоёроор хасагдах шатанд шалгарсан. Хоёр багийн тоглолт Дон мөрний хөвөөнөө орших Ростов хотын “Ростов Арена” цэнгэлдэх хүрээлэнд болж, 3:2-оор Белгийн шигшээ ялснаар шөвгийн наймд үлдсэн. Хэдийгээр Японы шигшээ баг түрүүлж хоёр гоол оруулан тэргүүлж байсан ч сүүлийн 25 минутад гурван гоол оруулсан белгичууд хожлыг өөрийн болгосон.

Ази тивийн төлөөлөл болон шөвгийн 16-д ганцаараа үлдсэн Японы шигшээ баг харамсалтайгаар нутаг буцсан бол белгичууд цааш өрсөлдөх эрхтэй болсон. Белгийн шигшээ багийн энэ амжилт 1966 оноос хойш ДАШТ-ий хасагдах шатны тоглолтын үндсэн 90 минутад 2 ба түүнээс дээш гоолын зөрүүтэй хожигдож яваад гүйцэж хожсон анхны баг болж байна. 1996 онд Португалын шигшээ баг Хойд Солонгост 3:0-оор хожигдож яваад 5:3 болгон хожиж байсан түүхтэй юм. Бельгийн шигшээ багийн дэлхийн аваргад үзүүлсэн хамгийн өндөр амжилт бол 1986 оны Мексикт болсон ДАШТ-ий хагас шигшээд шалгарсан амжилт юм. 2014 онд Бразилд болсон 20 дахь удаагийн ДАШТ-ий шөвгийн наймд Аргентины шигшээ багт хожигдож (1-0) байсан.

Бразил, Белгийн тоглолт долдугаар сарын 7-ны шөнийн 02.00 цагаас Казан хотод болно.

ШВЕД – АНГЛИ (Долдугаар сарын 7-ны 22.00, Самара хот)

ШВЕД

Шведийн шигшээ баг Герман, Мексик болон Өмнөд Солонгосын шигшээ багуудтай нэг хэсэгт багтаж, хэсгээ тэргүүлсэн. Өнгөрсөн шөнө хасагдах шатны тоглолтыг Швейцарын шигшээ багтай хийж, 1:0-оор ялалт байгуулснаар шөвгийн наймд үлдлээ. Шведийн гол баатар Эмил Порсберг багтаа хожлын гоолыг авчирсан юм.

Шведийн шигшээ баг бол дэлхийн аваргын мөнгө, хүрэл медаль хүртэж байсан том багуудын нэг. Гэхдээ Орост ирэхийн тулд Итали, Нидерландыг ардаа оруулсан Шведийн шигшээ баг цааш онцгойроход гайхах зүйл байхгүй. Шведүүд бол дан ганц хоккейгоор алдартай биш. Тэд хөлбөмбөг ч тоглож чаддаг бөгөөд дэлхийн аваргад 1958 онд мөнгөн медаль хүртэж, хоёр удаа гуравдугаар байранд шалгарч байсан шилдэг баг юм.

АНГЛИ

Өнгөрсөн шөнө Москва хотын “Открытие Арена” цэнгэлдэх хүрээлэнд дэлхийн аваргын шөвгийн 16-н сүүлчийн тоглолт болох Өмнөд Америкийн төлөөлөл Колумб болон Английн шигшээ багуудын хооронд боллоо. Тоглолтын үндсэн болон нэмэлт цаг 1:1-ээр өндөрлөсөн. Ингээд торгуулийн цохилтоор ялагч тодроход 4:3-аар Английн шигшээ баг хожиж, шөвгийн наймд үлдэх сүүлийн багаар тодорлоо.

Английн шигшээ баг 1966 онд нутагтаа зохиосон ДАШТ-д түрүүлсэн байдаг. Харин хамгийн сүүлд 1990 онд хагас шигшээд шалгарч байжээ. Дэлхийн аваргад 14 удаа оролцохдоо ердөө гурван удаа хэсгээс гарч байгаагүй бөгөөд хамгийн сүүлд дөрвөн жилийн өмнө Бразилд гутамшигтайгаар тэмцээнээ өндөрлүүлж байсан. Тэгвэл энэ жил алдаагаа залруулах зорилготой, цаашлаад битүүхэн аваргын цомыг горилан ирсэн нь дамжиггүй. Тэдэнд боломж бий.

Английн шигшээ баг чимээгүйхэн хагас шигшээ цаашлаад шувтаргын шатанд хүрэх магадлал тун өндөр байгааг онцлох хэрэгтэй.