Month: July 2018

Categories
мэдээ нийгэм

АТГ-ын дарга Г.Энхжаргалтай холбоотой ташаа мэдээлэл гаргаснаа залруулжээ

Авлигатай тэмцэх газар болон тус газрын дарга Х.Энхжаргалын албаны нэр хүндийг гутаасан илтэд гүтгэлгийн шинж чанартай мэдээлэл нийтэлсэн www.breakingnews.mn сайт уг мэдээллийг залруулсан талаараа 2018 оны долдугаар сарын 1-ний өдрийн 2/308 тоот албан бичгээр мэдэгдлээ.

Албан бичигт “www.breakingnews.mn сайтад Авлигатай тэмцэх газар болон тус газрын дарга Х.Энхжаргалын нэртэй холбоотой гарсан мэдээлэл нь “Жамух Интернэйшнл” ХХК болон түүний харьяа www.breakingnews.mn сайтын бодлого биш бөгөөд бид энэхүү мэдээллийг бэлтгээгүй болно. Уг мэдээллийг нэр бүхий иргэн бусдын хэвлэл мэдээлэлд өгсөн ярилцлага мэдээллийг үндэслэн бэлтгэж тус сайтын холбогдох албан тушаалтанд хянуулалгүйгээр нээлттэй админ эрхтэй байдлаа ашиглан сайтад байршуулсан нь хуулийн байгууллагын шалгалт холбогдох нотлох баримтаар тогтоогдсон билээ. Иймд “Жамух Интернэйшнл” ХХК-ийн зүгээс дээрх мэдээг бэлтгэж дур мэдэн сайтад байршуулсан сэтгүүлчид арга хэмжээ авч уг мэдээтэй холбоотойгоор өөрийн сайтад залруулга хийснээ үүгээр мэдэгдэж байна. Цаашид аливаа иргэн, байгууллагын талаар гарч байгаа мэдээ мэдээллийн үнэн бодит байдал эх сурвалжид хяналт тавьж анхааран ажиллах болно” гэжээ.

Categories
мэдээ нийгэм

Алт олборлохын тулд нутгийн иргэдэд 100 сая төгрөг амласан гэв

“Загийн голоо аварья” ТББ-ын тэргүүн Л.Энхсайхан “Худалдаа хөгжлийн банкны эзэн Д.Эрдэнэбилэг нь Баянхонгор аймгийн Заг сумын “Эх булаг” хэмээх газарт алт олборлохын тулд нутгийн иргэдэд 100 сая төгрөг амлан, газар нутгаа худалдахыг ятгаж байна” хэмээн өнөөдөр Үндэсний мэдээллийн төвд болсон хэвлэлийн хурлын үеэр сэтгүүлчдэд мэдээлэв.

Тэрбээр, “Д.Эрдэнэбилэгийн 99 хувийн хувьцаа эзэмшдэг “Централ Эшиа Майнинг” ХХК Заг сумын Баянбулаг багийн иргэдэд мөнгө өгнө хэмээн 27 дахь удаагаа амласан. Бид 6кг алтны үнээр төрсөн нутгаа худалдахгүй гэдгээ мэдэгдэж байна. Харин Д.Эрдэнэбилэг танд малчин бид 100 хонь бэлэглэе, наад үйл ажиллагаагаа зогсоо. Хэрэв алт олборлохыг завдвал тэмцлийн хэлбэр улам ширүүснэ гэдгийг анхааруулж байна” гэв.
“Ардын заргын товчоо”, “Загийн голоо аваръя”, “Дэлхийн Монгол ногоон нэгдэл” ТББ хамтран зохион байгуулж буй уг хурлын үеэр “Централ Эшиа Майнинг” ХХК нь Ашигт малтмал, газрын тосны газрын шийдвэрээр 411 га талбайд ашиглалтын тусгай зөвшөөрөл авч, алт олборлохын тулд нутгийн иргэдэд удаа дараа заналхийлж байна. Энэ асуудлаар Баянхонгор аймгийн ИТХ-ын төлөөлөгчид, Уул уурхай, хүнд үйлдвэр, БОАЖЯ-нд хэд хэдэн удаа хандсан ч өөрчлөлт гарсангүй. “Эх булаг”-т орших Загийн гол нь Бөмбөгөр, Баацагаан, Бууцагаан сумдын хүн малыг ундаалахаас гадна говийн ганц нуур болох Бөөнцагаан нуурыг тэтгэдэг. Нутгийн иргэд бидэнд уух ус, үр ач нартаа үлдээх үзэсгэлэнт нутаг минь хэрэгтэй болохоос алт огтхон ч хэрэггүй гэж “Ардын заргын товчоо” ТББ-ын удирдах зөвлөлийн дарга С.Зоригтбаатар хэллээ.
Categories
мэдээ нийгэм

ӨМӨЗО-ны ААН-үүдтэй 460 сая ам.долларын гэрээ байгууллаа

Монгол Улсын ГХЯ, ӨМӨЗО-ны Ардын Засгийн газар хамтран Монгол Улс болон БНХАУ-ын ӨМӨЗО-ны эдийн засаг, худалдааны хамтын ажиллагааг бэхжүүлэх “2018-Монгол Улс болон БНХАУ-ын ӨМӨЗО-ны эдийн засаг, худалдааны хамтын ажиллагааны чуулга уулзалт” болж, хоёр улсын хөдөө аж ахуй, аялал жуулчлал, зам тээвэр, уул уурхайн салбарын ААН-үүд 460 сая ам.долларын өртөг бүхий 12 гэрээ хэлэлцээрт гарын үсэг зурлаа.

Чуулга уулзалтын нээлтэд Монгол Улсын ГХЯ-ны сайд Д.Цогтбаатар, ӨМӨЗО-ны Намын хорооны НБД Ли Жихөн, МҮХАҮТ-ийн Ерөнхийлөгч Б.Лхагважав, БНХАУ-аас Монгол Улсад суугаа Онц бөгөөд Бүрэн эрхт Элчин сайд Шинь Хайминь тэргүүтэй албаны хүмүүс оролцож үг хэлэв.

Монгол Улсын ГХЯ-ны сайд Д.Цогтбаатар “Манай хоёр орны худалдааны эргэлт эрчимтэй нэмэгдэж байна. Энэ өсөлтийг 10 тэрбум ам.долларт хүргэхээр зорьж байгаа нь аль аль талын Засгийн газар худалдаанд саад болох үйл ажиллагаа явуулахгүй гэсэн тохиролцоо гэж ойлгож болно. Замын-Үүдийн боомт дээр үе үе гардаг асуудлууд ихэвчлэн захиргааны шинж чанартай байдаг. Энэ төрлийн хүндрэлийг бид шийдвэрлэж, шалган нэвтрүүлэх ажиллагааг сайжруулах хэрэгтэй байна. Сүүлийн жилүүдэд Хятад улстай хийх худалдааны эргэлт 30 орчим хувиар өссөн. Өнөөдрийн хийж буй 460 сая ам.долларын гэрээ хэлэлцээрүүд бүрэн хэрэгжихэд тодорхой цаг хугацаа шаардана. Гэвч хамтын ажиллагаа, худалдааныхаа үнэ өртгийг тохирчихсон байхад дараа нь өөрчлөгдөх боломжгүй. Тиймээс энэ төрлийн чуулга уулзалт манай эдийн засгийн өсөлтөд чухал ач холбогдолтой” хэмээн онцлов.

ӨМӨЗО-ны Худалдааны танхимын дэд дарга Сэцэн “Өнөөдрийн форумыг зохион байгуулж буйн гол зорилго ӨМӨЗО-ны хөрөнгө оруулагч, бизнес эрхлэгчдийг Монгол Улсад танилцуулан, хоёр улсын эдийн засгийн хамтын ажиллагаанд ахиц гаргахад оршиж байна. ӨМӨЗО болон Монголын соёл, зан заншил, ахуйн хувьд олон нийтлэг зүйл байдаг нь бизнесийн таатай орчинг бүрдүүлж байна гэж бид үзэж байна. Тиймдээ ч Монгол, БНХАУ-ын бизнесийн хамтын ажиллагааны 50 орчим хувийг ӨМӨЗО-ны бизнес эрхлэгчид эзэлж буй юм. Бид Монгол Улсын ойрын гурван жилийн бизнесийн чиг хандлага, гадны хөрөнгө оруулагчдад үзүүлэх хөнгөлөлтийн талаар судлах зорилготой байна” гэв.

МХАҮТ-ийн Ерөнхийлөгч Б.Лхагважав “Монгол, Хятадын хамтын ажиллагааны уур амьсгал таатай байна. БНХАУ-ын дарга Си Жинпинь худалдааны эргэлтийг хоёр жилийн дотор 4 тэрбум ам.доллараар нэмэгдүүлэх зорилготой байгаагаас харахад хоёр талын бизнес эрхлэгчдийг их ажил хүлээж байна. Энэ их ажлыг хийхэд бид шинэ технологи нэвтрүүлж, Монгол Улсын нийт экспортын 60 гаруй хувийг эзэлдэг Хятад улстай харилцан ашигтай хамтран ажиллах, итгэл даахуйц ААН-үүдийн бэлтгэх хэрэгтэй. Сүүлийн дөрвөн жилийн эдийн засгийн хямралыг манай бизнес эрхлэгчид өөрсдийн хичээл зүтгэлээр давсан. 2013 онд бид татварын хөнгөлөлтийн хууль баталсан боловч одоо хэр нь энэ хөнгөлөлт эдлэгдэхгүй байна. Энэ асуудал УИХ-ын намрын чуулганаар шийдвэрлэгдэнэ гэж итгэж байна” хэмээн онцлов.

Categories
мэдээ нийгэм

“Эрхэд суурилсан эрүүл мэнд” чуулган болж байна

“Эрхэд суурилсан эрүүл мэнд” цөөнхийн эрүүл мэнд, эрхийн чуулган Чингис зочид буудалд үргэлжилж байна.

Чуулганы зорилго нь эмч мэргэжилтнүүдийн бэлгийн цөөнх буюу ЛГБТИ хүмүүс, хөгжлийн бэрхшээл, үндэс угсааны цөөнхийн талаар үнэн зөв, шинжлэх ухаанч мэдлэг, ойлголтыг сайжруулах, эрүүл мэндийн байгууллагын мэргэжлийн ёс зүй, соёлын мэдрэмж, үйлчилгээний хандлага, чадварыг дээшлүүлэх, ЛГБТИ болон бусад цөөнх хүмүүсийн онцлог хэрэгцээнд тулгуурласан эрүүл мэндийн үйлчилгээний хүртээмжийг нэмэгдүүлэх юм.

Чуулганы хэлэлцэх асуудлууд:

● Ази номхон далайн бүсийн ЛГБТИ олон нийт, үндэсний цөөнх, хөгжлийн бэрхшээлтэй иргэдийн хүний эрхийг хүндлэх нь тэдний эрүүл мэндэд эерэгээр нөлөөлөх хүчин зүйлс болох тухай;
● Бэлгийн мөн чанар, хүйсийн баримжаа болон хөгжлийн бэрхшээл гэх мэт ялгаварлан гадуурхагдсан асуудлуудыг шийдвэрлэх гарцыг хайх, хэрэгжүүлэх зөвлөмжүүдийг хэлэлцэх, төрд хүргүүлэх;
● НҮБ-ын Тогтвортой хөгжлийн зорилтын “Хэнийг ч орхигдуулахгүй” зарчмыг Ази номхон далайн бүсийн дунд болон дундаас доогуур орлоготой орнуудад хэрэгжүүлэх талаар хэлэлцэнэ.

Зочин илтгэгч/мэргэжилтнүүд:

1. Рүүт Макнэйр – Ерөнхий мэргэжлийн их эмч, Мэлбүрн их сургуулийн хүндэт профессор, Австрали
2. Натаниэл Рэйд – Northside клиникийн Ерөнхий мэргэжлийн их эмч, АУ-ны магистр, Австрали
3. Ниша Догра – Сэтгэцийн эмч, АУ-ны профессор, Грийнвүүд эмнэлгийн хүүхэд, өсвөр үеийн сэтгэцийн тасгийн хүндэт зөвлөх, Их Британи
4. Кимберли Айвори – Ерөнхий мэргэжлийн их эмч, АУ-ны магистр, Сиднейн их сургууль, Австрали
5. Раттанават – Ази Номхон Далайн Трансжендэр Сүлжээний удирдах зөвлөлийн гишүүн
6. Кианан Рассал – Трансжендэр Европ

Чуулганд цөөнх бүлгүүдийн эрүүл мэндийн үйлчилгээг хүний эрхийн нүдээр харж эрүүл мэндийн эрх, олон нийтийн хөгжлийн асуудлаар ажилладаг эмч, мэргэжилтнүүд, судлаач, багш нар, ЛГБТИ хүмүүс, хөгжлийн бэрхшээлтэй иргэд, ТББ-ууд болон бие даасан мэргэжилтнүүд оролцож байна. Чуулган маргааш өндөрлөнө.

Categories
мэдээ нийгэм

Малын удмын санг сайжруулах үндэсний цогцолбор үүдээ нээлээ

Хүнс, хөдөө аж ахуй, хөнгөн үйлдвэрийн яамны харьяа Малын удмын сангийн үндэсний цогцолбор (2018.07.03) нээлтээ хийлээ. “Монгол мал” үндэсний хөтөлбөрт тусгагдсан томоохон зорилтыг хэрэгжүүлэх хүрээнд Дархан-Уул аймгийн Хонгор сумын нутагт 22,3 га газарт 2013-2018 онд бүтээн байгуулалтын ажил хийж гүйцэтгэн, цогцолборыг ашиглалтад орууллаа. Энэ бүс нутагт Малын удмын сангийн үндэсний цогцолбор байгуулсан нь бусад аймаг хотын хэрэглэгчид, малчид, фермерүүдэд ойртуулсан чухал шийдэл болсон гэж үзэж байна.

Нээлтийн арга хэмжээнд УИХ-ын гишүүн Б.Баттөмөр, ХХААХҮЯ-ны Төрийн нарийн бичгийн дарга Д.Энхбат, Малын удмын сангийн үндэсний төвийн захирал Д.Цолмон болон Дархан-Уул аймгийн Хонгор сумын удирдлагууд болон мал аж ахуйн салбарын ахмад мэргэжилтнүүд оролцсон.

Арга хэмжээг нээж, Төрийн нарийн бичгийн дарга Д.Энхбат хэлсэн үгэндээ: “Монгол Улс олон улсын жишигт нийцсэн малын генийн санг хамгаалах, үйлдвэрлэх, шинжлэх ухааны ололтыг нэвтрүүлэх, эдийн засгийн эргэлтэд оруулах, Азидаа томоохонд тооцогдох Малын удмын сангийн үндэсний цогцолбортой боллоо. Уг цогцолбор ашиглалтад орсноор манай орны эрдэмтэн, судлаачид туршилт-судалгаа хийх, мэргэжлийн зохиомол хээлтүүлгийн техникчид үржүүлгийн бүтээгдэхүүнийг мал эмнэлэг, ариун цэврийн шаардлагын дагуу үйлдвэрлэж, мал аж ахуй эрхлэгчдэд нийлүүлэх улмаар малын үүлдэр угсааг сайжруулах, тооноос чанарт шилжих Засгийн газрын бодлого хэрэгжих боломж бүрдэж байна” гэлээ.

ХХААХҮЯ-ны Төрийн нарийн бичгийн дарга Д.Энхбат

Малын удмын сангийн үндэсний төв нь бүтцийн хувьд гурван алба, 34 хүний бүрэлдэхүүнтэй ажилладаг. Тус төвийн генийн санд 4 үүлдрийн ямааны 1793 тун, 16 үүлдрийн хонины 25878 тун, 8 үүлдрийн бухны 37086 тун нийт 30 үүлдэр, омгийн 64757 тун малын үр хадгалагдаж, монгол малын удмын санг хамгаалахын зэрэгцээ эдгээр үүлдэр, омгийн үрийг зохиомол хээлтүүлэгт ашиглаж, удамзүйн дэвшил түгээж байна.

Тодорхой жишээ дурдвал, Засгийн газраас “Мал эмнэлгийн урьдчилан сэргийлэх болон малын үржүүлэг, технологийн ажил”-ын хүрээнд өндөр ашиг шимт махны болон сүүний чиглэлийн абердин-ангус, симменталь, хар тарлан, алатау үүлдрийн бухны 1244 тун гүн хөлдөөсөн үр, 110 литр азотыг захиалгын дагуу нийлүүлжээ. 2017 онд нийт 3033 мал хээлтүүлсэн бол 2018 онд энэ тоог 55 хувиар нэмэгдүүлэн, хээл авалтыг 8 хувиар дээшлүүлэхийг зорьж байна. Өнгөрсөн онд бод, бог малын 17839 тун үр үйлдвэрлэсэн бол энэ онд 28000 тун үр үйлдвэрлэж, цаашид дотоодын хэрэгцээ бүрэн хангаж, экспортлох зорилт тавин ажиллаж байна.

Ийнхүү төвийн үйл ажиллагааг өргөжүүлж, цогцолбор хэлбэрээр хөгжүүлж байгаа нь дэлхийн жишигт нийцсэн мал үржүүлэг, биотехнологийн ажил, үйлчилгээг мал аж ахуйн эрхлэгчдэд үзүүлэх зорилготой. Тиймээс мэргэжлийн боловсон хүчнүүдийг тогтвортой ажиллуулахын тулд төвийн ажилтнуудын нийгмийн баталгааг хангах тал дээр анхаарна гэдгээ нээлтийн арга хэмжээнд оролцсон төр засаг, сум орон нутгийн удирдлагууд хэлж байсан юм.

Малын удмын сангийн үндэсний цогцолбор нь орчин үеийн биотехнологийн шинжлэх ухааны ололт, дэвшилтэт технологи, инновацийг нэвтрүүлэх чиглэлээр үр үйлдвэрлэл, азот цех үйлдвэрлэл, ээмэгний үйлдвэрлэл, хөврөл үр шилжүүлэн суулгах зэрэг иж бүрэн лаборатори, малын генийн санг хадгалах зориулалтын байр, сайн чанарын хээлтүүлэгч бойжуулах болон малыг тэжээж бордох байр талбай, тэжээл боловсруулах цех, сургалтын байр, мал эмнэлгийн үйлчилгээний цэг, цахилгаан, ус, дулаан хангамжийн шугам зэрэг 14 объектоос бүрдэж байна. Нээлтийн арга хэмжээнд оролцогчдод эдгээр байгууламжийг нэг бүрчлэн танилцуулж, үр үйлдвэрлэх процесс, хөврөл шилжүүлэн суулгах мэс ажилбар хийж байгааг бодитоор харууллаа.

Малын удмын сангийн үндэсний цогцолбор

Малын удмын сангийн үндэсний цогцолборын иж бүрэн лабораторийн зурагнаас

Бухнаас үр үйлдвэрлэж байгаа нь

Хөврөл шилжүүлэн суулгах ажилбарыг хангай, тал нутгийн цагаан үүлдрийн хонин дээр хийж байна. Гол нь малын ашиг шимийг дээшлүүлэх үндсэн зорилготой.

Мах, сүү, ноосны чиглэлийн 50 хуц, 30 ухнын байр. 12 аймгийн цөм сүргээс шилж сонгон, тодорхой хугацаанд үр үйлдвэрлэлдээ ашиглан, орон нутаг руу нь буцаадаг байна.

Малын зуны байр

Цаашид Монгол малын гайхамшиг, давуу талыг гадаад, дотоодын жуулчдад танилцуулах, хүүхэд, залуучуудад уламжлалт мал аж ахуйн арга ухааныг өвлүүлэх, таван хошуу малаа хайрлан, хамгаалах хандлага бий болгох зорилготой олон нийтэд чиглэсэн арга хэмжээг тогтмол зохион байгуулахыг зорьж байна.

Малын удмын сангийн үндэсний цогцолборын нээлтийн арга хэмжээний төгсгөлд, зарим хүнд талархал гардууллаа

Хүнс, хөдөө аж ахуй хөнгөн үйлдвэрийн яамны харьяа Малын удмын сангийн үндэсний төв нь мал аж ахуйн салбарын тэргүүлэх зорилтууд болох мал үржлийн ажил, үйлчилгээг эрхлэх, мал сүргийн генетик нөөцийг хамгаалах, хадгалах, баяжуулах, ашиг шимийг нэмэгдүүлэх удам гарваль, үүлдэр, угсааг сайжруулах арга хэмжээг тодорхой бодлого, стратегийн дагуу үндэсний хэмжээнд нэгтгэн зохион байгуулж хэрэгжүүлэх үндсэн чиг үүрэг бүхий мэргэжлийн үйлчилгээний байгууллага юм.

Тус төв нь Монгол Улсын мал сүргийг уугуул орчинд болон генийн түвшинд хадгалах, хамгаалах, сайжруулах, үржлийн ажлын стратеги төлөвлөгөө, үржүүлгийн хөтөлбөрийн дагуу малын үүлдэрлэг байдал, ашиг шимийг нэмэгдүүлэх, малын нөхөн үржихүйн чадавхи, нөөц боломжид суурилан үржүүлгийн бүтээгдэхүүн үйлдвэрлэх, биотехнологи, генийн инженерчлэлийн ололтыг мал аж ахуйн үйлдвэрлэлд нэвтрүүлэх, үйлдвэрлэгчид, хэрэглэгчдийн эрэлт хэрэгцээг хангах, үр ашгийг нэмэгдүүлэх зорилтын хүрээнд үйл ажиллагаагаа явуулдаг.

Categories
гадаад мэдээ

Найман настай хүү ахлах сургуулиа төгсчээ

Бельги улсад 8 настай сурагч Лоран Симонс ахлах сургуулиа төгсөөд, их дээд сургуульдаа элсэн орох гэж байгаа талаар “Риа Новости” агентлаг мэдээлэв.

Тэрбээр 6 жилийн сургалтын хөтөлбөрийг хагас жилийн дотор дүүргэж 18 настай төгсөгчидтэй хамт гэрчилгээгээ гардан авсан байна. Түүний IQ үзүүлэлт нь 145 хэмээн Л.Симонсын эцэг эх ярьжээ.

“Миний хамгийн дуртай хичээл бол математик. Учир нь математикийн шинжлэх ухаан бол өргөн цар хүрээтэй. Математикт статистик, геометр, алгебр багтдаг” гэж Л.Симонс ярилцлага өгөх үеэрээ хэлжээ.

Л.Симонсын эцэг эхийн ярьж байгаагаар, тэрбээр чөлөөт цагаараа тоо бодох, анагаах ухааны ном унших дуртай аж. Өмнө нь тэрбээр мэс засалч юм уу сансрын нисгэгч болохыг мөрөөддөг байсан бол сүүлийн үед мэдээлэл зүйн салбарыг ихээхэн шимтэж байгаа гэнэ.

“Лоран бага байхаасаа л онцгой хүүхэд байсан. Тэр найз нөхөдтэйгээ тоглох дургүй байсан” гэж эцэг эх нь ярьсан байна.

Одоогоор Лоран Симонс ямар их сургуульд орохоо сонгоогүй байгаа хэдий ч дэлхийн олон сургуулиас урилга хүлээн аваад байгаа гэнэ.

Categories
мэдээ нийгэм

Хан-Уул дүүргийн ажилд зуучлах өдөрлөг болж байна

Хан-Уул дүүргийн хөдөлмөр үйлчилгээний хэлтсээс ажилд зуучлах өдөрлөгийг Нийслэлийн үйлчилгээний нэгдсэн төвийн Мишээл салбарт хоёр өдөр 10.00-15.00 цагийн хооронд зохион байгуулж байна. Тодруулбал, тус дүүрэгт хөдөлмөрийн насны 67 мянга гаруй иргэн оршин суудагч тэдний 10 гаруй хувь нь ажилгүй байдаг аж.Тиймээс уг өдөрлөгөөр дамжуулан иргэдэд зах зээлийн мэдээлэл олгох, санал болгож буй ажлын байранд бүртгүүлэх, хөнгөлөлттэй үнээр мэргэжил эзэмших боломжийг олгож байгаа юм.

Дүүргийн хөдөлмөр, халамжийн үйлчилгээний хэлтсийн Хөдөлмөр эрхлэлтийн албаны дарга Д.Алтанцэцэг “ 2018 онд манай хэлтэст 720 иргэн ажил хайж бүртгүүлснээс 644 иргэнд ажлын байр санал болгож, 298 нь ажилтай болсон. ХУД-ийн хөдөлмөр, халамжийн үйлчилгээний хэлтсийн үйл ажиллагааны үндсэн чиглэл бол иргэдээ ажилтай, орлоготой байлгахад оршдог. Энэ хүрээнд олон араг хэмжээ зохион байгуулдгийн нэг нь энэхүү ажилд зуучлах өдөрлөг юм” хэмээлээ.

Тус өдөрлөгийг Хөдөлмөр эрхэлэлтийг дэмжих тухай хуулийн 9.1, ХУД-ийн Засаг даргын 2017-2020 оны үйл ажиллагааны хөтөлбөрийн 4.7.1 заалтыг хэрэгжүүлэх ажлын хүрээнд зохион байгуулж буй бөгөөд “Номин Холдинг” ХХК, “Кашемир Холдинг” ХХК, “Атар Өргөө”ХК, “Гоёо” ХХК зэрэг тус дүүрэгт үйл ажиллагаа явуулдаг 10 гаруй компани оролцож нээлттэй ажлын байр санал болгож байгаа юм.

Categories
мэдээ нийгэм

Зүрхний өвчтэй 300 хүүхдэд амьдрал бэлэглэжээ

Өмнөд Солонгос улсын “Мирал Шижан” сангаас зүрхний цоорхой болон зүрхний бусад өвчлөлтэй хүүхдүүдэд туслах аяныг эхлүүлэн тэдэнд үнэ төлбөргүй хагалгаа хийж, 14 жил тасралтгүй Монгол Улсад ажиллахдаа цөөнгүй хүнд шинэ амьдралбэлэглэжээ.

“Мирал Шижин” сан нь анх 1987 онд байгуулагдсан бөгөөд 2017 онд 30 жилийн ойгоо тэмдэглэж байсан билээ. Сан байгуулагдсан цагаас хойш 30 жилийн хугацаанд зүрхний эмгэгтэй 3300 гаруй хүүхдэд сангийнхаа хөрөнгөөр зүрхний хагалгаа хийлгэж, 3300 хүнд шинэ амьдрал бэлэглэсэн олон нийтийн хүмүүнлэгийн байгууллага юм.

Харин Монгол Улсад үйл ажиллагаа явуулж эхэлснээс хойш өнөөдөр 300 орчим Монгол хүүхэд энэ сангийн тусламжтайгаар зүрхний хагалгаанд орж эрүүл энх амьдарцгааж байгаа аж. Тэгвэл тус сан манай улсад 14 жил тасралтгүй үйл ажиллагаа явуулж ирсэн ойн арга хэмжээг маргааш зохион байгуулахаар болжээ.

Үйл ажиллагаа “Гранд Хилл” зочид буудлын 17 давхарт 10.00 цагаас болох аж. Сангийн 30 жилийн ойн үеэр Ерөнхийлөгч Х.Баттулга сангийн ерөнхийлөгч И Жон Жэд “Талархлын захидал” илгээж байсан билээ.

Categories
мэдээ нийгэм

Хүүхдийн эрхийг хамгаалах талаар хэлэлцэнэ

Хууль зүй, дотоод хэргийн яам, Швейцарын хөгжлийн агентлагийн хамтарсан “Иргэдийн оролцоо II” төслөөс санаачлан “Хүүхдийн эрхийг хамгаалах талаар хэлэлцье” нээлттэй хэлэлцүүлгийг зохион байгуулах гэж байна. Ирэх пүрэв гарагийн 09:00-12:00 цагийн хооронд Хууль зүйн үндэсний хүрээлэнгийн “Хуульчдын танхим”-д энэхүү хэлэлцүүлэг болох юм.

Энэхүү уулзалт, хэлэлцүүлэг нь хүүхдийн өсөж хөгжих, боловсрох, аюулгүй орчинг бий болгоход Төрийн бус байгууллагууд, хуульч, өмгөөлөгчдийн оролцоо, хууль, эрх зүйн боломжийн талаар хэлэлцэж, тодорхой үйл ажиллагаа явуулах санал, санаачилга гаргах зорилготой. Мөн салбарын Төрийн бус байгууллагууд, про-боно хууль зүйн туслалцаа үзүүлэх хуульч нар хамтран үйл ажиллагаа явуулах талаар харилцан мэдээлэл солилцох аж. Хэлэлцүүлэгт Хүүхдийн эрхийн чиглэлээр үйл ажиллагаа явуулдаг Төрийн бус байгууллагууд, хуульч, өмгөөлөгчид оролцож, санал бодлоо хуваалцах юм байна.

Categories
мэдээ нийгэм

Ховд аймгийн Жаргалант суманд үер буужээ

Ховд аймгийн Жаргалант сумын төвд өчигдөр буюу 07.03-ны өдрийн 19:50 цагийн орчимд усархаг ширүүн бороо орсны улмаас уруйн үер болжээ. Үерийн улмаас наран багийн 14, 15 дугаар гудамжны 30 айл өрх, Рашаант багийн 25 айл өрхийн гэр хашаа усанд автсан байна.

Дуудлагын дагуу тус аймгийн Онцгой байдлын газрын 25 алба хаагч, хоёр автомашинтай, орон нутгийн 60 иргэн, 24 автомашинтай ажиллаж 800 метр урт шороон даланг сэргээн засварлажээ. Харин өнөөдрөөс гэр, хашаа нь усанд автсан айл өрхийн тоог нарийвчлан гаргаж, ариутгал халдваргүйтгэлийн ажлыг зохион байгуулж буй аж.