Month: July 2018

Өнгөрсөн зургадугаар сарын 24 болон 30-ны өдрүүдэд 11 аймгийн 30 сумын Иргэдийн Төлөөлөгчдийн Хурал /ИТХ/-ын нөхөн болон дахин сонгууль болж өндөрлөлөө. Аймгийн ИТХ-ын хоёр мандат, сумын ИТХ-ын 50 мандатын төлөө нийт 90 нэр дэвшигч өрсөлдсөн байна. Үүний дийлэнх олонхи буюу 80-аас дээш хувьд МАН ялалт байгуулжээ. Тодруулбал, нөхөн сонгуульд аймгийн ИТХ-ын хоёр мандат, сумын ИТХ-ын 30 мандатын төлөө 60 нэр дэвшигч өрсөлдсөнөөс аймгийн ИТХ-д МАН-ын хоёр нэр дэвшигч, сумын ИТХ-д МАН-аас 21 нэр дэвшигч, АН-аас 9 нэр дэвшигч олонхийн санал авч ялалт байгуулсан байна.

Харин дахин сонгуульд сумын ИТХ-ын 20 мандатын төлөө 30 нэр дэвшигч өрсөлдсөнөөс МАН-аас 16 нэр дэвшигч, АН-аас хоёр нэр дэвшигч, МАХН-аас нэг нэр дэвшигч олонхийн санал авч тухайн шатны ИТХ-ын төлөөлөгчөөр тус тус сонгогдоод байна.

Өмнөговь аймгийн хэмжээнд 969 сурагч ЭЕШ өгсөн байна. 760 онооноос дээш 800 хүртэл оноо авсан сурагчдыг аймгийн Засаг дарга 1,000,000-1,500,000 төгрөгөөр шагнаж урамшуулав.

Б.Одгэрэл Нийгмийн тухай мэдлэг -800, Монгол хэл -787
Д.Маралнаран Биологи 800, Математик -795
Э.Алтанзул Математик 787, Монгол хэл -760
У.Цолмонбаяр Нийгмийн тухай мэдлэг-800
Д.Мягмаржав Нийгмийн тухай мэдлэг -800
Б.Насанцэцэг Биологи-790
Б.Оюунболор Нийгмийн тухай мэдлэг -766
А.Мишээл Нийгмийн тухай мэдлэг -766
Н.Бадамсүрэн Монгол хэл 769
Т.Энхзаяа Монгол хэл -760
Г.Баярмаа Монгол хэл-760 оноог авч нийт 11 сурагчийг аймгийн удирдлагууд хүлээн авч хүндэтгэл үзүүлэн мөнгөн шагнал өглөө.

АТГ-т авлигын хэрэгт холбогдсон хэд хэдэн мэдээлэлд шинээр хэрэг нээн шалгаж байна.
Тодруулбал, Нийслэлийн Хот төлөвлөлт, ерөнхий төлөвлөгөөний газрын удирдах албан тушаалтан Э нь албан үүрэг, бүрэн эрх, албан тушаалын байдлаа урвуулан ашиглаж хахууль өгөгчийн ашиг сонирхлын үүднээс албаны чиг үүргээ хэрэгжүүлсний хариуд бусдаас их хэмжээний хахууль авсан байж болзошгүй үйлдэлд хэрэг бүртгэлтийн хэрэг нээн шалгаж байна.

Мөн Дорнод аймгийн Хүнс хөдөө аж ахуйн газрын албан тушаалтнууд нь албан тушаалын байдлаа урвуулан ашиглаж тус аймгийн Гурванзагал суманд хэрэгжүүлэхээр шийдвэрлэсэн “Мах сүү, сүүний чиглэлийн үржлийн хээлтэгч, хээлтүүлэгч олгох” төслийг сонгон шалгаруулалтгүйгээр өөрсдийн хамаарал бүхий төрсөн ах, дүү нартаа олгож бусдад давуу байдал бий болгосон байж болзошгүй үйлдлийг шалгаж дуусаад яллах дүгнэлт үйлдүүлэх саналтайгаар прокурорын байгууллага руу шилжүүлжээ.

Түүнчлэн Зам тээврийн хөгжлийн яамны Тээврийн ухаалаг систем, өгөгдлийг хариуцсан мэргэжилтэн, эрх бүхий албан тушаалтнууд нь эрх мэдлээ хэтрүүлэн 2017 оны 7-12 дугаар сарын хооронд Авто тээврийн үндэсний төвийн авто тээврийн хэрэгслийн бүртгэлийн системд зориуд худал мэдээлэл оруулсан, мэдээлэл устгасан, өөрчилсөн, худал мэдээлэл бүхий баримт бичиг үйлдсэн байж болзошгүй үйлдлийг шалгажээ.

Орон сууцны тасралтгүй санхүүжилтийн сувгийг нээх олон улсын туршлагаас судлах Азийн тогтмол орлоготой үнэт цаасны тав дахь удаагийн чуулга уулзалт /AFIS/ Улаанбаатар хотноо өнөөдөр болж байна. Чуулга уулзалт “Орон сууцны бодлого ба санхүүжилтийн шийдлүүд” сэдвийн дор өрнөж, “Орон сууцны бодлогын сонголтууд”, “Орон сууцны санхүүжилтийн шийдлүүд”, “Азийн хөрөнгийн зах зээл дээрх боломжууд” дэд сэдвээр үргэлжилж байна. Энэхүү дээд хэмжээний чуулга уулзалтыг Монголын ипотекийн корпораци /МИК ОССК ХХК/ нь Барилга хот байгуулалтын яам, Сангийн яам, Санхүүгийн зохицуулах хороотой хамтран зохион байгуулж байгаа юм.

Барилга, хот байгуулалтын сайд Х.Баделхан: Ипотекийн зээл 2013 оноос хэрэгжиж эхлээд үр дүнгээ өгч байна. Өнөөдрийн байдлаар 4,2 их наяд төгрөг хуримтлагдан сан бий болсон байна. Зээлийн хүрээнд 80,000 орчим өрх орон сууцтай болсон. Одоогоор Ипотекийн зээлийн журмыг хэрэгжүүлэхэд хамгийн тулгамдсан асуудал бол хөрөнгийн эх үүсвэрийг нээх юм. Жилдээ улсын төсвөөс нийтдээ 120-130 тэрбум төгрөг хөтөлбөрт төлөвлөж байна. Өмнөх Ипотекийн зээлийн сангийн эргэн төлөлтөөр 200 гаруй тэрбум төгрөг төвлөрсөн. Өнгөрсөн онд энэ хоёр эх үүсвэрээр нийтдээ 10 мянган айл орон сууцтай болсон. Орон сууцны эрэлт, нийлүүлэлтийн судалгаагаар эрэлт нийлүүлэлтээс давсан, хүмүүс ипотекийн зээлээр орон сууц худалдан авах хүсэлтэй байна. Тиймээс эх үүсвэрийг нь нэмэгдүүлэх шаардлагатай. Эх үүсвэрийг нэмэгдүүлэхийн тулд улсын төсвийн хөрөнгө оруулалтыг нэмэгдүүлэх, хоёр дахь зээлд бонд гаргаж мөнгө босгох хоёр зам байна. Улсын төсвийн хөрөнгө оруулалтыг нэмэгдүүлэхийг Засгийн газар дангаар шийдэх боломжгүй. Учир нь бүх санхүү төсөв Олон улсын валютын сангийн өргөтгөсөн хөтөлбөртэй холбогдсон байгаа.

Өмнөд Солонгос улсаас өгөх 500 сая ам.долларын хөнгөлөлттэй зээлийг иргэдийг орон сууцжуулахад зарцуулахаар төлөвлөсөн. Ипотекийн зээлийн хөтөлбөрийг аажмаар засагт авна. Ипотекийн зээлийн журмыг өөрчлөхөөр засагт өргөн барьсан. Тухайлбал, зарим банк өөрөөсөө зээл авсан хүмүүст зээл олгодог, зарим банк Ипотекийн зээл ирсэн үед олгоно гээд өндөр хүүгээр зээл олгож иргэдийг хохироож байгааг шинэ журмаар зохицуулна. Зээлийн урьдчилгааг 25 хувь болгож оруулаад тохиролцсон. Харин зээлийн хүүг бууруулах боломжгүй. Учир нь өнөөдрийн байдлаар арилжааны банкнуудын зээлийн хүү өндөр байна.

Утаатай холбоотой засгийн газрын тогтоолд зах зээл дээр байгаа бэлэн байгаа орон сууцыг борлуулах үүрэг өгсөн. Зах зээл дээр байгаа 5822 орон сууц байна. Үүнээс иргэд худалдан авах боломжтой, өөрөөр хэлбэр энгийн стандартын 2112 орон сууц байна. Төрийн албаны тухай хуулиар төрийн албан хаагчдыг төр орон сууцаар хангах үүрэгтэй. Судалгаагаар боловсрол, эрүүл мэнд, хүчний байгууллагын албан хаагчид орон сууц авах хүсэлт их байгаа. Хөрөнгийн эх үүсвэр шийдэгдсэн нөхцөлд төрийн албан хаагчдад дээрх орон сууцыг олгох боломжтой. Саналыг боловсруулаад засагт оруулсан. Түрээсийн орон сууц хөтөлбөр ахмад настан, залуу гэр бүл гэсэн зорилт бүлгүүдэд чиглэсэн. Буянт-ухаанд барьж буй 972 орон сууцыг түрээсийн орон сууцны зориулалтаар барьж байна. Өмнөд Солонгосоос авах зээлийн талыг нь түрээсийн орон сууцны хөтөлбөрт зарцуулна. Хурлаар ипотекийн зээлээр баталгаажсан бонд гаргаж олон улсын зах зээлээс хөрөнгө татах асуудалд Азийн орнуудаас туршлага, боломжийг судалж, санал солилцож байна. Тухайлбал, үндсэн хөрөнгөөр баталгаажсан зээлийн 4,2 их наяд хөрөнгийг бонд болгож олон улсын зах зээлээс хөрөнгө татах боломжтой.

Балбын Вант Улсын Засгийн газрын Хөдөө аж ахуй, газрын менежмент, хамтын ажиллагааны яамны Төрийн нарийн бичгийн дарга Ноён Шанкар Бахадур Тапа-аар ахлуулсан зургаан төлөөлөгчдийг газрын харилцаа, геодези, зураг зүйн салбарын асуудлаар туршлага судлах, солилцох зорилгоор 2018 оны 06 сарын 28-наас 07 дугаар сарын 05-ны өдрүүдэд Монгол улсад айлчилж байна.

Балбын Вант Улсын төлөөлөгчдийг өнөөдөр буюу 2018 оны 07 сарын 02-нд Барилга, хот байгуулалтын дэд сайд Ш.Лхамсүрэн хүлээн авч уулзан мэндчилгээ дэвшүүллээ.

Орхон аймгийн Эрдэнэ багийн нутаг дэвсгэрт 7000 гаруй иргэн амьдардаг. Иргэдийн буруутай үйлдлээс шалтгаалан 6 хогийн цэг, гудамж хооронд хог хуримтлагдан, олны тав тухыг алдагдуулж байсан юм. Эрдэнэ багт иргэдийг гэмт хэрэг зөрчлөөс урьдчилан сэргийлэх, хулгайн гэмт хэрэгт өртөхөөс айл хөршөө хамгаалах, ил задгай хог хаягдлын эсрэг ажилладаг сайн санааны эв нэгдэл бүхий 80 гаруй хүний бүрэлдэхүүнтэй хөршийн холбоо бий.

Хөршийн холбооны гишүүд, багийн ажлын албаныхны хамтын уриалгаар иргэд, оршин суугчид, аж ахуй нэгжийн тусламж дэмжлэгтэйгээр, орон нутгаас санхүүгийн дэмжлэг авалгүйгээр, олон жилийн дагширсан хогийн цэгүүдийг цэвэрлэж, чөлөөт цаг өнгөрөөх цэвэр орчныг бүрдүүлсээр байна. Энэ мэтээр хүүхдийн тоглоомын талбай, сагсан бөмбөгийн талбай зэргийг бий болгосон бөгөөд өнөөдөр хоёр дахь сагсан бөмбөгийн талбайг хүүхдүүдэд хүлээлгэн өгч, энэ хүрээнд 3:3 тэмцээнийг ч зохиолоо.

Талбай байгуулахад орон нутгаас хөрөнгө мөнгө нэхээгүй гэв. Шаардагдах хайрга дайрга, сагсны шийтийг “Эрдэнэт” үйлдвэр Эрдэнэ багтай хамтын ажиллагааны хүрээнд гаргаж, цемент бусад материалыг багийн ажлын албаныхан өөрсдийн цалингаас гаргасан байна. Харин ажиллах хүчний хувьд хөршийн холбоо, иргэд өөрсдөө гар бие оролцжээ.

Мөн тус багт дуудлагаар хог ачих үйлчилгээ нэвтэрсэн тул ая тухтай, хоггүй цэвэр орчныг эрхэмлэж, айл өрхүүд идэвх санаачилгатай, ил задгай хогноос татгалзаж, дуудлага өгч байна гэдгийг багийн Засаг дарга Н.Отгонбилэг хэллээ.

Дашрамд дурдахад, энэ онд Эрдэнэ багт орон нутгийн төсвөөс 45 гаруй сая төгрөгийн хөрөнгө оруулалт суугдсаны дагуу чөлөөт цагийн талбай, багийн орчинд шаардлагатай хүчин зүйлсийг шийдвэрлэж байна. Одоогоор ажлын гүйцэтгэл 30 гаруй хувьтай үргэлжилж байна.

“Эрүүл зүрх-Эрүүл Улаанбаатар” хөтөлбөрийн хүрээнд Сонгинохайрхан дүүргийн өрхийн эрүүл мэндийн төвүүдэд “Майкролайф” брэндийн цусны даралт хэмжих багаж бэлэглэлээ.

Хан-Уул дүүрэг “Эко дүүрэг” болох зорилтын хүрээнд дүүргийн Засаг даргын Тамгын газар болон Ц.Эрдэнэбаатар захиралтай Тохижилт үйлчилгээний төвийн санаачилгаар 120 мянгатын автобусны буудлын хойно 2.2 га талбайд нийслэлд жишиг болохуйц “Шинэ Хан-Уул” цэцэрлэгт хүрээлэнг шинэчлэн байгууллаа.

Энэ цэцэрлэгт хүрээлэн нь ногоон байгууламжтай, таван тивийн 41 төрлийн 200 гаруй ан амьтдын баримал хөшөөтэйгөөс гадна хад чулуу ашиглан байгалийн тогтцыг харуулсан бичил хэсгүүдийг бий болгож, усан оргилуур, хүрхрээ, дугуйн болон тэшүүрийн зам, хүүхдийн тоглоомын талбай бүхий цогц жишиг цэцэрлэгт хүрээлэнг 49 сая төгрөгийн өртгөөр хийжээ.

Тус цэцэрлэгт хүрээлэнгийн талбайд ургаж байгаа мод бут сөөг нь 50 гаруй жилийн настай бөгөөд шинэчилсэн тохижилтын ажлын хүрээнд гоёл чимэглэлийн зориулалттай мод бут болон ховор эмийн ургамал тарьжээ.

Хан-Уул дүүргийн Засаг дарга Ж.Алдаржавхлан хэлэхдээ, “Хан-Уул дүүрэг “Эко дүүрэг” болох зорилтын хүрээнд энэхүү жишиг цэцэрлэгт хүрээлэнгээс гадна дахиад хоёр цэцэрлэгт хүрээлэнтэй болно. Жишээ нь, энэ ондоо багтаан дүүргийн Нисэх, Яармаг орчимд “Дөрвөн улирал”-ын жишиг цэцэрлэгт хүрээлэнтэй болохоор төлөвлөн ажиллаж байна” хэмээн онцлов.

Тус амьтдын баримал нь бороо болон наранд өнгөө алдаж мууддаггүй нийлэг пластик материалаар хийсэн гэдгээрээ онцлог юм.