Month: July 2018

“Даншиг-Хүрээ цам 2018” шашин, соёлын арга хэмжээ ирэх наймдугаар сарын 4, 5-нд Хүй долоон худагт болно. Тус арга хэмжээний үеэр морь уралдуулж, бөх барилдуулдаг уламжлалтай юм. Энэ жилийн даншигт өмнөх шигээ 256 бөх барилдуулах юм байна. Барилдах бөхчүүдийг ирэх долоо хоногийн баасан гараг буюу наймдугаар сарын 3-нд 09.00—17.00 цагийн хооронд бүртгэх ажээ. Бүртгэлийг Чингэлтэй дүүргийн Биеийн тамир спортын заал /хучнаар Хоршоолол нийгэмлэгт/ хийнэ. Наадамд барилдахаар бүртгүүлэх бөхчүүд иргэний үнэмлэх, 3х4 хэмжээтэй цээж зурагтай ирэх ёстойг сануулжээ.

Дашрамд дуулгахад, “Даншиг наадам-Хүрээ цам 2017” шашин, соёлын наадмын хүчит бөхийн барилдаан өнөөдөр эхэллээ. Хүчит бөхийн барилдаанд Даншигийн аварга Р.Пүрэвдагва, начин О.Хангай, Э.Энхбат, Бо.Батжаргал, Д.Амарсайхан, Б.Пүрэвсайхан нарын 256 бөх хурд хүч, авхаалж самбаагаа сорьж байжээ. Үүнээс Архангай аймгийн Булган сумын харьяат бөх Р.Пүрэвдагва “Даншиг наадам-Хүрээ цам 2017” түрүүлснээр шашин соёлын наадамд гурав дахь удаагаа түрүүлж Даншигийн даян аварга цол хүртсэн ажээ.

“Тал нутгийн Монгол” олон улсын марафоныг энэ жил наймдугаар сарын 19-ний өдөр Хүй долоон худагт зохион байгуулах гэж байна. Японы иргэн Фүживара болон Кон Аяа нар 1996 онд анхлан санаачилж байсан уг наадам энэ жил 22 дахв удаагаа зохион байгуулагдах аж. Тэмцээнд Монгол, Япон болон бусад гадаад орнуудын гүйгчид, спорт сонирхогчид оролцох юм.

Ойролцоогоор 2500 гаруй хүн сонирхогчдын болон мэргэжлийн тамирчдын хагас марафоны зайд хурд хүчээ сорьдог ажээ. Энэ жилийн тэмцээний үеэр тал нутгийн 3, 5, 10, 21 километрээс гадна “Богдхан уулын ултра трайл” болох 50 километрийн марафоныг зохион байгуулж байгаагаараа онцлогтой хэмээн албаныхан мэдээлжээ.

Монголын Эмнести интернэшнл байгууллага мэдэгдэл гаргаад байна. Тус мэдэгдэлд “Монгол Туркийн хамтарсан Улаанбаатар Эмпати сургуулийн захирал, Турк Улсын иргэн Вэйсел Акчайг 2018 оны 7-р сарын 27-ны өдөр 9 цаг 30 минутын орчимд үл мэдэгдэх хүмүүс гэрийн гаднаас нь хүч хэрэглэн авч явсан нь хүний эрх, эрх чөлөөнд халдсан явдал хэмээн Монголын Эмнести Интернэшнл буруушааж байна.

Монгол Улс Иргэний болон улс төрийн эрхийн тухай олон улсын пакт, Эрүүдэн шүүх болон бусад хэлбэрээр хэрцгий хүнлэг бусаар буюу хүний нэр төрийг доромжлон харьцаж шийтгэхийн эсрэг конвенц, Хүчээр алга болгохоос бүх хүнийг хамгаалах тухай олон улсын конвенцид нэгдэн орж, дотоодын хууль тогтоомждоо эрүүдэн шүүхээс ангид байх, халдашгүй байх эрхийг баталгаажуулж өгсөн. Үүнд Эрүүгийн хуулийн 1 дүгээр зүйлийн 1.7-ийн 3 дахь хэсэгт “тухайн улсын хуульд зааснаар цаазаар авах ял оногдуулах, эрүү шүүлт тулгах хангалттай үндэслэл байгаа тохиолдолд гадаадын иргэн, харьяалалгүй хүнийг тухайн улсад гэмт хэрэгт мөрдөн шалгуулах, ял шийтгүүлэхээр шилжүүлэн өгөхгүй” хэмээн тодорхой заасан.

Хүний эрхийн олон улсын хэм хэмжээний дагуу эрүүдэн шүүх, ялгаварлан гадуурхалтаас ангид байх, шударгаар шүүлгэх эрх нь хэдийд ч түдгэлзүүлэх буюу хязгаарлах ёсгүй эрх юм. Одоогоос хоёр жилийн өмнө буюу 2016 оны долдугаар сард Турк улсад төрийн эргэлт хийх гэсэн оролдлогын дараа онц байдал зарлаж, хүний эрхийн хамгаалагч, сэтгүүлч, иргэний нийгэм, улс төрийн сөрөг хүчнийхнийг баривчлан, эрүүдэн шүүж, зүй бус харьцан хорьж байгааг олон улсын хүний эрхийн байгууллагууд буруушаасаар байна.

Монгол Улс тусгаар тогтнол, бүрэн эрхт байдлаа хамгаалан, хүний эрх, эрх чөлөө, шударга ёсыг эрхэмлэн дээдэлж, олон улсын хамтын нийгэмлэгийн өмнө хүлээсэн үүрэг, дотоодын хууль тогтоомжоо хэрэгжүүлэн Монгол Туркийн хамтарсан Улаанбаатар Эмпати сургуулийн захирал, Турк улсын иргэн Вэйсал Акчайг хүч хэрэглэн авч явсан балмад үйлдлийг шалган тогтоож, буруутай этгээдэд хариуцлага тооцох, цаашид Вэйсал Акчайг Турк улсад шилжүүлэн өгөхгүй байх үүргээ хэрэгжүүлнэ гэж найдаж байна” гэжээ.

Энэ онд Орхон аймагт орон нутгийн төсвийн хөрөнгөөр шинээр “Баян” худалдааны төвөөс Сүмийн уулзвар хүртэлх 540 метр үргэлжлэх хатуу хучилттай авто зам, Уртын гол, Их залуу, Булаг багт нийтдээ 3 км үргэлжлэх сайжруулсан шороон замын ажил хийгдэж байна. Хатуу хучилттай авто зам барихад 392.3 сая, сайжруулсан шороон зам барихад 70,7 сая орчим төгрөг тус тус батлагдсан бөгөөд эдгээр ажлыг ирэх сарын 15-нд бүрэн дуусгах зорилт тавиад байгаа аж. Түүнээс гадна энэ онд орон нутгийн төсвийн хөрөнгөөр 2115 м.кв, “Аваар”-ынзардлаар 2200 орчим м.кв авто замын нөхөөсийн ажил хийгджээ.

Гэхдээ энэ жил хур ихтэй байгаа тул авто замын нөхөөс нэмж хийх шаардлага гарч байгаа юм. Шинээр авто авто барихаас гадна Шанд, Их залуу, Уртын гол, Говил, Баянцагаан багт 11 байршилд автобусны орчин үеийн буудал байгуулахад 100 орчим, хэвтээ болон босоо тэмдэг, тэмдэглээ шинээр хийхэд мөн тооны хөрөнгө зарцуулж байна. Мөн энэ онд улсын төсвийн хөрөнгө оруулалтаар Эрдэнэт хотын 7-р хороолол буюу “Евро эко төгөл” орон сууцны хорооллын урд талаарх 4 эгнээтэй 900 гаруй метр хатуу хучилттай авто замын ажил хийгдэж байгаа аж.

Олон улсын шатрын ИХ МАСТЕР цол хүртээд буй Б.Амина болон түүний багш Ц.Энхбат нарыг Дорнод нутгийнхны төлөөлөл өнөөдөр Төрийн ордонд хүлээн авч уулзаж, хүндэтгэл илэрхийллээ.

Эрүүл мэндийн сайдын энэ сарын 20-ны өдрийн А/295 дугаар тушаалаар жил бүрийн наймдугаар сарыг “Эрүүл мэндийн ажилтны нийгмийн хамгааллыг дэмжих сар” болгон зохион байгуулахаар шийдвэрлэжээ.

Тэгвэл ирэх сард эрүүл мэндийн ажилтны эрүүл мэндийг хамгаалах, дэмжих, тэдний гэр бүл, төрөл төрөгсдөд өөрийн байгууллагын түвшинд тусламж, үйлчилгээг хөнгөлөлттэй үнээр үзүүлэх эрх зүйн орчин бүрдүүлэх, салбарын шилдэг шалгаруулах ажлыг хийх аж.

Мөн Эрүүл мэндийн сайдын нэрэмжит оюутны тэтгэлэг олгох ёслолын арга хэмжээ, эрүүл мэндийн ажилтан, хамт олны үйл ажиллагааг олон нийтийн хэвлэл, мэдээллийн хэрэгслээр сурталчилах, хөдөлмөрийн яармаг, хөдөлмөрийн аюулгүй ажиллагааны сургалтыг зохион байгуулж, үр дүнг тооцон ажиллах юм байна.

Нийслэлийн Засаг даргын хэрэгжүүлэгч агентлаг Залуучуудын хөгжлийн газар, Зэвсэгт Хүчний Жанжин Штабтай хамтран хэрэгжүүлж буй “Эерэг–Эх орон” аяны хүрээнд Зэвсэгт хүчний 119, 120, 326 дугаар ангийн 130 алба хаагчдад “Гэр бүлийн үнэ цэнэ” сэдвээр сургалт зохион байгуулжээ.

Сургалтын үеэр залуучуудад гэр бүлийн тогтвортой харилцааг хэрхэн бий болгох, гэр бүлийн гишүүдийн хүлээх үүрэг, хариуцлага, хүүхдийн хөгжил, төлөвшилд гэр бүлийн харилцаа хэрхэн нөлөөлөх, бэрхшээлийг даван туулах чадвар, асуудлыг эерэгээр шийдэх гарцыг олох, эерэг хандлагыг төлөвшүүлэх сэдвээр нийслэлийн ЗХГ-ын захиргааны хэлтсийн дарга Н.Мандуул мэдээлэл өгсөн байна.

Мөн аяны хүрээнд Зэвсэгт Хүчний Жанжин Штабтай хамтран энэ оны аравдугаар сар хүртэл “Гэр бүлийн үнэ цэнэ”, “Эерэг сэтгэлгээг хөгжүүлцгээе” сэдвээр нийт 21 цэргийн ангид нөлөөллийн сургалт хийхээр төлөвлөн ажиллаж байгаа аж. Сургалтаар Монголын хөгжлийн тулгуур болсон залуу үеийнхэнд эерэг хандлага төлөвшүүлж, нийгмийн сэтгэл зүйд давамгайлсан сөрөг уур амьсгалыг өөрчлөх, ёс суртахуун, хариуцлага, харилцааны соёлыг нэмэгдүүлэх, гэр бүлийн боловсрол олгох зорилготой юм байна.

Өмнөговь аймгийн нутагт 07 дугаар сарын 27-оос 28-нд шилжих шөнө орсон аадар борооны улмаас Даланзадгад сумаас Баяндалай, Сэврэй, Ноён, Гурвантэс сумдын чиглэлийн хатуу хучилттай автозамын 58-60 дахь километрт замын зорчих хэсэг эвдэрсэн билээ. Замын эвдрэл зам тээврийн осол, хэрэг гарах шалтгааныг бүрдүүлсэн тул Замын цагдаагийн тасгийн алба хаагчид автомашины хөдөлгөөнийг түр хугацаагаар хориглож, урьдчилан сэргийлэх ажлыг эрчимжүүлж байна. Мөн Даланзадгад сумын хэмжээнд их бороо орсны улмаас айл өрх, аж ахуй нэгж байгууллагууд үер усанд автсан байгаа юм. Үeр усны дуудлагын дагуу сумын Захирагчийн ажлын албаныхан түргэн шуурхай үйлчилгээ үзүүлж олон айлыг усны аюулаас аварч, сэргийлсэнд ард иргэд баярлаж талархснаа илэрхийлсэн байна.