Month: July 2018

НИТХ-ын дарга С.Амарсайхан Замын цагдаагийн уулзварын гүүрэн гарц болон Яармагийн шинэ гүүрний ажлыг газар дээр нь шалгаж, гүйцэтгэлийн ажлыг хангалтгүй байна гэж дүгнэн, хүн хүчээ нэмж 24 цагт бүрэн хүчээр ажиллахыг үүрэг болгов.

Замын цагдаагийн газрын уулзварын гүүрэн гарц нь БНХАУ-ын 30 орчим сая долларын хөнгөлөлттэй зээлийн хөрөнгө оруулалтаар 1.6 жилийн хугацаанд баригдаж дуусахаар төлөвлөж эхэлсэн бүтээн байгуулалтын ажил юм. Нийт 100 гаруй монгол, 80 БНХАУ-ын иргэн ажиллаж байгаа бөгөөд монголчууд өдрийн найман цагаар, хятад ажилчид 24 цагийн турш ажилладаг байна.

Гүйцэтгэгч компаниуд төлөвлөгөөний дагуу ажил явагдаж байгаа гэсэн хэдий ч өнгөрсөн хугацаанд хийсэн байх ёстой ажлууд цагтаа хийгдээгүй, гүүрэн гарцны ажил удаашралтай, одоогийн байдлаар талбай дээр бүтээн байгуулалтын ажлыг хангалттай хийж эхлээгүй байгаа юм. Жишээлбэл, нийт 98 ширхэг гадсан суурийг 40 метр гүнд өрөмдөх ёстой байтал одоогийн байдлаар 48-ыг өрөмдөөд байна.

Үүний шалтгаан нь үйл ажиллагаанд хэрэглэж байгаа 3 өрөмийн машины 1 нь эвдэрсэн, 2-ыг нь түрээслэж байгаа боловч мөн л байнга эвдэрдэг. Гэхдээ техникийн асуудлаас болоод одоогоор ажиллахгүй байгаа гэхээсээ илүүтэй шугам сүлжээний ажил хийгдэж байгаатай холбоотойгоор хүлээгдэж байгаа гэв.

Энэ үеэр НИТХ-ын дарга С.Амарсайхан “Замын цагдаагийн уулзварын гүүрэн гарцны ажил их удаашралтай байна. Эвдэрсэн, ажилладаггүй өрмийн машины асуудлаа шийдээгүй, зарим туслан гүйцэтгэх компаниудын ажлын хөлсийг нь өгөөгүй, шаардлагатай санхүүжилтийг өөр төсөл хөтөлбөрт зориулсан гэх мэт асуудлууд байна. Тиймээс гэрээг дахин дүгнэх шаардлагатай. Ирэх оны ёсдүгээр сард энэ гүүрэн гарцыг ашиглалтад оруулна гэсэн график гаргаж, түүний дагуу ажил явж байгаа гэсэн ч бодит байдал дээр ажил бүрэн хийгдэхгүй цаг хугацаа алдаж байна” гэлээ.

Өнөөдөр газар дээр нь шалгаад төлөвлөснөөс багадаа 3 сарын өмнө ажлыг дуусгах бүрэн боломж байна гэж дүгнэлээ. Иймд гүүрэн гарцын ажлыг хугацаанаас нь өмнө буюу 3-4 сарын өмнө дуусгах чиглэлээр судалгаа тооцоогоо дахин хийж, танилцуулах үүрэг өглөө. Нийслэлийн иргэдийн хувьд гурван сар битгий хэл гурван минут, секунд ч үнэтэй байна. Замын түгжрээ асуудал нийслэлчүүдийг бухимдуулж байхад зам барилгын гүйцэтгэгч компани бид хугацаандаа багтааж ажлаа хийж л байвал болно гээд цаасан дээр хэдэн сар хоног тавьчихаад асуудалд хойрго хандаж болохгүй гэсэн юм.

Тэрээр гүүрэн гарц барьж буй гүйцэтгэгч компанийн ажлыг хангалтгүй гэж үзэн, хугацаатай үүрэг даалгавар өгөв. Нэгдүгээрт, долдугаар сарын 7-ны дотор холбогдох албан тушаалтнууд ярилцаж 2019 оны 9-1-ний дотор хүлээлгэж өгнө гэсэн хугацааг 3-4 сараар нааш татаж тавдугаар сард хүлээлгэж өгөхөөр хөтөлбөр графикаа дахин өөрчлөх.

Хоёрдугаарт, хятад талын компани техник технологи, хүн хүч, дадлага туршлагын давуу талтай гэж ажил гүйцэтгэх гэрээ хийсэн хэрнээ Монголд байгаа өрмийн машин нь л энэ гээд яриад сууж байгаа учраас гэрээний нөхцлийн дагуу түргэн хугацаанд техник технологийн бүрэн бүтэн байдал, чанар стандартыг хангаж ажиллахыг тус компанийн удирдлагуудад даалгалаа. Даалгасан үүргийг түргэн, чанартай гүйцэтгэх, гүйцэтгэллд нь хяналт тавьж ажиллахыг НАЗХГ-ын хяналтын удирдлага, хяналтын инженерүүдэд хатуу анхаарууллаа.

Мөн дараагаар нь НИТХ-ын дарга С.Амарсайхан Яармагийн шинэ гүүрний ажлын явцтай танилцлаа. Тэрээр “Яармагийн гүүрний гүйцэтгэл чанартай сайн хийгдэж байна. Гэхдээ өндөр үнэ өртгөөр хийж байгаа гүүрний гэрэлтүүлэг нь өнгө үзэмж, чанар стандартын хувьд шаардлага хангахгүй байгаа асуудал байна. Тиймээс гэрэлтүүлгийг дахин өөрчлөн гэрлийн чанар, загвар хийцийг шинэчлэх тал дээр анхаарах ёстой, наадмаас өмнө гүүрний автомашин зорчих хэсгийг хэсэгчлэн нээхээр болж байгаа” гэв.

Яармагийн гүүрийг урьдчилсан байдлаар энэ долоо хоногт багтаан нээх юм. Гүүрний ажлыг бүхэлд нь энэ оны сүүлээр эцсийн байдлаар хүлээлгэн өгөхөөр ажиллаж байгааг гүйцэтгэгч компанийн удирдлагууд онцлон илэрхийлж байв.

Монгол Улс, ХБНГУ-ын хамтын ажиллагааний хүрээнд “Уул уурхайн салбар дахь байгаль орчны хамгаалал” төслийг Мэргэжлийн хяналтын ерөнхий газар, ХБНГУ-ын Геошинжлэх ухаан, байгалийн нөөцийн хүрээлэнтэй хамтран 2005-2014 онд амжилттай хэрэгжүүлж, 2015 оноос “МХЕГ-ын Геологи, уул уурхайн хяналтын мэдээллийн системийн ашиглалтыг жигдрүүлэх” дэд төслийг хэрэгжүүлэн, өнөөдөр хаалтын арга хэмжээг зохион байгууллаа.

“Уул уурхайн салбар дахь байгаль орчны хамгаалал” төслийн хүрээнд улсын байцаагчдыг мэргэшүүлэх болон гүнзгийрүүлсэн сургалтад хамруулж, хяналт шалгалтын үйл ажиллагаанд орчин үеийн арга барил нэвтрүүлэх, багаж хэрэгслийг сайжруулах, салбарын хууль, эрх зүйн орчныг сайжруулахад чиглэсэн олон арга хэмжээг зохион байгуулсан юм.

Дэд төслийн хувьд геологи уул уурхайн мэдээллийн сан байгуулах ажлын хүрээнд 2010 оноос хэрэгжиж байгаа мэдээллийн системийг сайжруулах, шаардлагатай нэмэлт функцуудыг хөгжүүлэх, улмаар Шилэн хяналтын системтэй холбогдож, мэдээлэл солилцох боломжтой болгох зорилгоор хэрэгжүүлсэн аж. Төсөл хэрэгжсэнээр хяналт шалгалтын мэдээллийн сан үүсэх, мэдээллээр хангах, төрийн болон төрийн бус байгууллагатай мэдээлэл солилцох, шалгалтын объектийн байршил, тусгай зөвшөөрөл, тайлан төлөвлөгөө зэрэг нарийвчилсан мэдээлэл харах, сүлжээгүй, хээрийн нөхцөлд ч хяналтын хуудас бөглөх, илэрсэн зөрчил бүртгэж баримтжуулах, төрийн үйлчилгээг ил тод болгох, нарийвчилсан тайлан, статистик мэдээг шуурхай гаргах зэрэг боломжтой болжээ.

МХЕГ-аас Дархан-Уул, Сэлэнгэ аймгийн нутаг дэвсгэрт үйл ажиллагаа явуулж буй эрүүл мэнд, аж үйлдвэр, авто замын салбарт цацрагийн үүсгүүрийн ашиглалт, хамгаалалт, аюулгүй байдалд аймгийн Мэргэжлийн хяналтын газруудтай хамтран 06.25-наас 07.03-ны өдрүүдэдтөлөвлөгөөт хяналт шалгалт, тандалт судалгааг хийлээ. Хяналт шалгалтад нийт 11 аж ахуйн нэгж, байгууллагыг хамруулж, цацраг идэвхт бус ашигт малтмалын чиглэлээр үйл ажиллагаа явуулж буй найман байгууллагад цацрагийн нөлөөллийг тогтоох тандалтыг хийв.

Аж үйлдвэр, авто замын салбарт цацрагийн үүсгүүр ашиглаж, хадгалж байгаа “Дарханы төмөрлөгийн үйлдвэр” ХК, “Бороо гоулд” ХХК зэрэг байгууллагууд тусгай зөвшөөрөлтэй, цацрагийн хамгаалалт, аюулгүй ажиллагааны хөтөлбөр, төлөвлөгөө, болзошгүй ослын төлөвлөгөөг улсын байцаагчаар шинэчлэн батлуулан, цацрагтай ажиллагсдыг хангалттай тооны хамгаалалтын хувцас, хэмжилтийн багажаар хангаж, мэргэшүүлэх сургалтад тогтмол хамруулан цацрагийн аюулгүй байдлын соёлыг хэвшүүлэн ажилласан байна.

Эрүүл мэндийн салбарт рентген оношилгооны аппаратыг хүлээн авч, суурилуулалт хийлгэхдээ ажлын байрны цацрагийн хамгаалалт, аюулгүй байдалд баталгаажуулах хэмжилт, хяналт хийлгээгүйгээс стандартын шаардлага хангаагүй, цацрагийн хамгаалалт бүрэн хийгдээгүй ажлын байранд үйл ажиллагаа явуулдаг, цацрагтай ажиллагчдыг мэргэжлийн сургалтад хамруулаагүй,хуучирсан, ашиглалтын шаардлага хангахгүй байгаа рентген төхөөрөмжийг ашиглалтаас гаргах талаар холбогдох байгууллагуудад мэдэгдэж, шийдвэрлүүлээгүй, рентген аппаратыг хүлээж авсан тухайгаа холбогдох хуульд заасан хугацаанд мэдэгдэж, улсын бүртгэлд бүртгүүлээгүй зэрэг зөрчлүүд нийтлэг илэрч байна.

Хяналт шалгалтаар илэрсэн зөрчлийг арилгуулахаар зургаан байгууллагад 65 заалт бүхий улсын /ахлах/ байцаагчийн албан шаардлага хүргүүлж, ашиглалтын зөвшөөрөлгүй үйл ажиллагаа явуулж байсан нэг байгууллагад шийтгэлийн арга хэмжээ тооцон, эмнэлгийн үйл ажиллагаанд ашиглах боломжгүй нэгаппаратыг битүүмжилжээ. Шалгалтад хамрагдсан байгууллагын удирдлага, цацрагтай ажиллагч нарт шинээр мөрдөгдөж байгаа дүрэм, журам, цацрагийн хамгаалалтын талаар сургалт зохион байгуулж, мэргэжил арга зүйн зөвлөгөө өгөв.

Цаашид цацрагийн үүсгүүрийг улсын хилээр нэвтрүүлэх, ашиглах болон хадгалахдаа Мэргэжлийн хяналтын ерөнхий газраас холбогдох зөвшөөрлийг авч, хууль тогтоомжийг зөрчихгүй байхыг анхааруулж байна.

Арьс шир боловсруулах үйлдвэр, технологийн хаягдал ус цэвэрлэх байгууламжийн ажилчид, менежерүүдэд зориулсан “Хүхэрт устөрөгчийн хийтэй хэрхэн харьцах вэ? H2S” сэдэвт цахим хичээл Монгол хэлнээ нээгдлээ. Сургалт нь үнэ төлбөргүй бөгөөд арьс шир боловсруулах үйлдвэр дэх хүхэрт устөрөгчийн хийн аюул, түүнийг шийдвэрлэх аюулгүй ажиллагааны талаар танилцуулах юм. Суралцагчид хүссэн цагтаа, хүссэн газраасаа цахим курст хандаж бие даан суралцах боломжтой ба онлайн шалгалтын 80%-ийг зөв гүйцэтгэснээр гэрчилгээ авна.

Арьс шир боловсруулах үйлдвэр, цэвэрлэх байгууламжууд ажилтнуудаа энэхүү курст жил тутам давтан сургах, шинэ ажилтнуудаа тухай бүр сургаж гэрчилгээжүүлэх нь хөдөлмөрийн аюулгүй ажиллагааг хангахад чухал ач холбогдолтой. Курсын агуулгыг НҮБ-ын Аж үйлдвэр хөгжлийн байгууллагаас боловсруулан гаргасан бөгөөд олон улсад сайшаагдсан, хэрэглэхэд хялбар, хөдөлгөөнт дүрс бүхий суралцахуйн хэрэгслүүд агуулсан сургалт юм. Цахим сургалтын танилцуулга, хичээлийн агуулга, сургалтад бүртгүүлэх зааврын талаар мэдээлэл авахыг хүсвэл энд дарна уу.

ХҮХЭРТ УСТӨРӨГЧИЙН ХИЙН ТУХАЙ

Арьс шир боловсруулах үйлдвэр ба тус үйлдвэрээс гарах технологийн хаягдал ус цэвэрлэх байгууламжийн орчинд гарч болох томоохон эрсдлийн нэг бол хүхэрт устөрөгчийн хийн ялгаралт юм. Хүхэрт устөрөгч бол агаараас хүнд, нүдэнд үл үзэгдэх, өнгөгүй хий бөгөөд багахан агууламжтай үедээ ч хүчтэй, таагүй үнэртдэг. Арьс шир боловсруулах үйлдвэрт арьснаас үсийг салгахдаа сульфидыг шохойтой хамт хэрэглэдэг. Сульфид агуулсан шүлтлэг шингэн хүчиллэг шингэнтэй холилдвол хүхэрт устөрөгчийн хий үүснэ. Өндөр агууламжтай хийд өртөх нь агшин зуурын үхэлд хүргэх аюултай. Хийн бага агууламжид өртсөн ч дуниартах, толгой өвдөх, дотор эвгүйрэх, төв мэдрэлийн систем гэмтэх, түүнчлэн нүд гэмтэх эрсдэлтэй байдаг. Хөдөлмөрийн аюулгүй ажиллагааны давтан сургалт дутмаг, ажилчдыг хувийн хамгаалах хэрэгслээр бүрэн хангаагүй, хамгаалах хэрэгслийг зөв зохистой ашигладаггүйн улмаас ажилчид гүн хордох, амиа алдах явдал тохиолдсоор байна. Харамсалтай нь ослын тоо баримт ил тод биш байх нь олонтаа. 2018 оны 4-р сард гарсан хэвлэлийн мэдээнээс үзэхэд сүүлийн 7 жилд Энэтхэгийн Веллор дүүрэгт гэхэд арьс шир боловсруулах үйлдвэрүүдэд хүхэрт устөрөгчийн хордлогоос болж 19 ажилчин амиа алдсан тоо баримт байна.

НҮБ-ЫН АЖ ҮЙЛДВЭР ХӨГЖЛИЙН БАЙГУУЛЛАГЫН ТУХАЙ

Нэгдсэн Үндэстний Байгууллагын Аж үйлдвэр хөгжлийн байгууллага (НҮБАҮХБ/UNIDO) бол эдийн засгийн өсөлтийг хангаж, ядуурлыг бууруулахын тулд үйлдвэрлэлийн тогтвортой хөгжлийг дэмжих зорилготой Нэгдсэн Үндэстний Байгууллагын мэргэшсэн агентлаг юм. НҮБАҮХБ нь арьс шир боловсруулах үйлдвэрлэлийн технологи, хөдөлмөрийн аюулгүй ажиллагаа, байгаль орчны асуудлаар дөч гаруй жил ажиллаж байна. Арьс ширийг боловсруулагч, үйлдвэрлэгч, хэрэглэгч бүх талуудад аюулгүй, ээлтэй бүтээгдэхүүн байлгах эрхэм зорилгоор олон улсад технологи дамжуулалт, мэргэжлийн сургалт, зөвлөгөө, бенчмаркинг чиглэлээр идэвхтэй ажилладаг. НҮБАҮХБ нь арьс ширний нэмүү өртгийн сүлжээг чадавхжуулах чиглэлээр модульд суурилсан олон улсын сургалтуудыг боловсруулан хэрэгжүүлж буйгаас Европын Холбооны санхүүжилттэй “Монгол Улсад хөдөлмөр эрхлэлтийг дэмжих” төслийн хүрээнд “Ажлын байранд анхны тусламж үзүүлэх нь”, “Гутлын дизайн ба зохион бүтээлт” зэрэг модулиудыг Монгол хэлнээ нутагшуулж зорилтот бүлэгт хүргэх юм.

ТӨСЛИЙН ТУХАЙ

Монгол Улсын Засгийн газар, НҮБ-ын Хүнс, хөдөө аж ахуйн байгууллагатай хамтарсан Европын Холбооны санхүүжилттэй “Монгол Улсад хөдөлмөр эрхлэлтийг дэмжих (UNIDO SECiMC2)” төсөл нь экспортын баримжаатай, импортыг орлох мал аж ахуйн гаралтай арьс шир, ноос ноолуур, мах, сүүн бүтээгдэхүүн үйлдвэрлэлийн нэмүү өртгийн сүлжээг чанар стандартын шаардлагад нийцүүлэн хөгжүүлж, зохистой хөдөлмөр эрхлэлтийг дэмжих, орлогын эх үүсвэрийг нэмэгдүүлэх зорилготой. НҮБАҮХБ нь уг төслийг 2018 оны 3-р сараас 2020 оны 1-р сарыг хүртэл Хүнс, хөдөө аж ахуй, хөнгөн үйлдвэрийн яам, хувийн хэвшил, мэргэжлийн холбоо, эрдэм шинжилгээний болон холбогдох бусад байгууллагуудтай хамтран хэрэгжүүлнэ.

Улаанбаатар хотын хэмжээнд авто замын ус зайлуулах шугам сүлжээний хүрэлцээ муутайгаас үүдэж бороо орсны дараа авто зам дээр ус их хэмжээгээр тогтож, иргэдийн тав тухыг алдагдуулж авто зам болон явган хүний зам талбайгаар зорчих боломжгүй болдог. Тиймээс хур борооны улиралд түр зуурын аадар бороо ороход үерт автаж зорчиход хүндрэлтэй байдаг Токиогийн гудамж, “E-mart” дэлгүүрийн хойд уулзварын борооны ус зайлуулах шугамын шинэчлэлтийн 1-р ээлжийн ажлыг эхлүүлсэн.

Тус ажлын хүрээнд Нийслэлийн Засаг даргын орлогч П.Баярхүү, НАЗХГ-ын орлогч дарга Б.Индра, НГУББГ-ын дарга Т.Цэрэнноров нар бусад албаны инженерүүдийн хамт борооны ус зайлуулах шугамын ажлын нөхцөл байдлыг шалган газар дээр нь ажиллалаа.

Борооны ус зайлуулах шугам шинэчлэлтийн нэгдүгээр ээлжийн ажил зургадугаар сарын 20-ны өдөр эхэлжээ. Өнөөдрийн байдлаар 112 м урт ф400 төмөр бетон хоолой угсарч, ус хүлээн авах үзлэгийн худаг 5, шүүрт худаг хоёрыг суурилуулах ажлууд хийгдэж, ажлын явц 40%-тай байна.

Ажлыг шалгах үеэр НЗД-ын орлогч П.Баярхүү “Токиогийн гудамжны борооны ус зайлуулах шугамын шинэчлэлтийн ажлаас гадна замын гарцыг өөрчлөх ажил хийгдэнэ. Өмнө нь авто машин төв зам руу тойрон орж түгжрэл үүсгэдэг байсныг өөрчлөн зам руу нэвт орох гарцыг нэмж хийж өгнө. Ингэснээр түгжрэлийг тодорхой хэмжээгээр бууруулах боломжтой” хэмээлээ.

Геодези, Усны барилга байгууламжийн газрын дарга Т.Цэрэнноров “2018 оны төсөвт Улаанбаатар хотод ус ихээр тогтдог 10 байршилд шугам угсралтын ажил хийгдэж байна. Энэ ажлын хүрээнд “E-mart” их дэлгүүрийн орчмын шугам солих ажил хурдтай явагдаж байна. Тус газрын хуучин шугам 1984 онд тухайн үеийн инженер барилга, байгууламжид зориулан хийгдсэн. Сүүлийн жилүүдэд ус их тогтож, ачааллаа даахгүй нөхцөл байдал үүссэн болохоор 2018 оны төсөвт энэ хэсгийн ажлыг хоёр ээлжээр шинэчлэх хөрөнгө тавигдсан. 1-р ээлжинд 180 метр шугамыг сольж, шинээр ус хүлээж авах 10 салбар шугам нэмэх ажил хийгдэж байна. Энэ ажил наадмын өмнө дуусахаар төлөвлөн ажиллаж байна.” хэмээлээ.

Геодези, Усны барилга байгууламжийн газраас Улаанбаатар хотын хэмжээнд ус зайлуулах шугам сүлжээгүй, борооны ус ихээр тогтдог ачааллыг дийлэхгүй байгаа эхний 10 байршлын судалгааг гарган түүнээс зургаан байршлын ажлыг нь 100% хийж гүйцэтгэн ашиглалтад оруулах комисст хүлээлгэн өгсөн байна. Харин Чингис зочид буудлын урд хэсэгт хийгдэж буй борооны ус зайлуулах шугамын ажил долоодугаар сарын 11-нд дуусах төлөвлөгөөтэй байгаа аж.

Сүүлийн жилүүдэд байгалийн өнгөт болон үнэт чулууг хууль бусаар олборлож, хил гаргах явдал ихсээд байгаа. Тухайлбал Хэнтий аймгийн Батноров суманд хууль бус чулуу түүгчид олширч, тэдэнтэй тэмцсэн Засаг дарга хүнд гэмтсэн удаатай.

Тэгвэл Засгийн газрын өнөөдрийн хуралдаанаар өнгөт чулуу худалдаж авдаг, дамжуулдаг, тээвэрлэдэг, хилээр хууль бусаар гаргадаг сүлжээ байгаа эсэхийг тогтоох, буруутай этгээдэд хүлээлгэх хариуцлагыг чангатгах чиглэлээр холбогдох хуулиудад нэмэлт оруулах санал боловсруулахыг сайд Ц.Нямдоржид даалгалаа.

Хэнтий аймгийн Батноров, Бор-Өндөр, Галшар, Дархан, Хэрлэн суманд өнгөт чулуу хууль бусаар олборлогчид олширч, байгаль орчин сүйтгэж байгааг орон нутгийн удирдлагууд хэлдэг. Тухайлбал тус аймгийн Батноров сумын 131 га газар хууль бус чулуу олборлогчдын үйл ажиллагаанаас болж эндэгджээ.

Энэ талаар тус сумын засаг дарга Г.Тайванжаргал “Байгалийн өнгөт чулуу олборлогчид газрыг 20 см-ээс 1 метр 50 см-ээс доош нь ухдаг. Түгээмэл тархацтай болохоор хаа ч хамаагүй ухаж, сэндийчээд л яваад байдаг. Газрын хэвлийн ус, чийгийг тэнцвэржүүлдэг чулууг авснаар гол горхи ширгэж, байгаль эх дэлхийтэйгээ буруу харьцсанаас болж ган гачиг болж байна гэж бодож байна. Өнгөт чулуу олборлогчдоос болж байгаль орчин маш ихээр бохирдож байгаа” хэмээсэн.

Өнгөт чулуу 50 мянгаас 1-2 сая төгрөгийн үнэд хүрдэг байна.

Үндэсний их баяр автомашины наадмын зөвшөөрөл энэ сарын 6-наас худалдаанд гарна гэж Замын Цагдаагийн Албанаас мэдээллээ.

Урьдчилсан байдлаар зөвшөөрлийг Нийслэлийн үйлчилгээний нэгдсэн төвийн “Дүнжингарав”, “Драгон”, “Мишээл экспо”, “Оргил-6 буудал” дахь салбаруудаар худалдаалахаар төлөвлөжээ.

Иргэдэд бухимдал чирэгдэл, урт дараалал үүсгэхгүйн тулд өнгөрсөн жил НҮНТ-ийн салбаруудаар зөвшөөрлийг худалдаалсан юм. Өмнө нь Замын цагдаагийн албанаас баяр наадмын үеийн автомашины зөвшөөрлийг олгодог байсан билээ.

Зөвшөөрлийн үнэ, төрөл болон бусад дэлгэрэнгүй мэдээллийг Замын Цагдаагийн Албанаас энэ сарын 6-нд өгнө гэв.