Month: July 2018

Categories
мэдээ нийгэм

Энэ сарын 9-нд Яармагийн шинэ гүүрийг нээнэ

Энэ сарын 9-н буюу ирэх даваа гаригт яармагийн шинэ гүүрийг нээхээр болжээ. Энэ талаар Нийслэлийн авто замын хөгжлийн газрын дарга Ж.Тогтохбаяр ярихдаа “Хятадын хөнгөлөлттэй зээлийн 30 сая ам.долларын төсвөөр баригдсан Туул гол дээрх дөрвөн эгнээ, 250 метрийн урттай Яармагийн үндсэн шинэ гүүр есөн сарын хугацаанд баригдаж дууслаа.

Одоо энэ сарын есөнд хөдөлгөөнөө нээх гэж байна. “Хятадын төмөр замын хоёрдугаар групп товчоо” ТӨК ажлыг гүйцэтгэж, Монгол Германы хамтарсан зөвлөх компани ажиллаж байна. Байгалийн гамшгаас үүдэлтэй асуудал үүсэхгүй бол 50-60 жилийн баталгаатай. Баталгааны хувьд 100 жил байх ч бололцоо бий. Шинэ гүүр одоо байгаа хуучин гүүрнээсээ гурав дахин их ачаалал авч хөдөлгөөнийг нэвтрүүлэх чадалтай. Өөрөөр хэлбэл, энэ гүүр ашиглалтад орсноор Яармагийн гүүрний орчмын замын түгжрэл 50-60 хувь буурах юм. Шинэ гүүрний доор 50 метрийн өргөнтэй нүхэн гарц баригдаж байгаа. Мөн 8.5 метрийн өргөнтэй, 270 метрийн урттай Д рамп гүүрний дээгүүр баригдаж байгаа болохоор замууд хоорондоо огтлолцохгүй, тэр хавьд ямар нэг саатах зүйл гарахгүй. Бид есөнд шинэ гүүр ашиглалтад ормогц хуучин гүүрээ хааж засварлах ажлыг эхлүүлж энэ оны 11 дүгээр сарын 30-н гэхэд дуусгахаар төлөвлөж байна. Ерөнхийдөө Яармагийн бүтэн гүүр буюу яармагийн уулзвар орчмын засвар шинэчлэлтийн ажил 11 дүгээр сарын 30-нд бүрэн дуусна” гэлээ.

Categories
мэдээ нийгэм

Аймгуудын наадам Өмнөговь аймгийн баяр наадмаар эхэллээ

Тулгар төрийн 2227 жил, Их Монгол улс байгуулагдсаны 812, Ардын хувьсгалын 97 жилийн ойн аймгуудын баяр наадам өнөөдөр Өмнөговь аймгийн баяр наадмаар эхэлж байна. Тус аймгийн баяр наадам энэ сарын 5, 6-нд болох бөгөөд улсын начин Т.Энхтуяа, Б.Сумъяа, Ц.Одбаяр, аймгийн хурц арслан Ш.Дарханбат нарын тэргүүтэй улс, аймгийн алдар цолтой 256 бөх барилдахаар бүртгүүлжээ. Өмнөговь аймгийн наадмын дараа

-Говьсүмбэр аймгийн наадмыг долдугаар сарын 7, 8-нд,

-Дорнод, Дундговь, Төв аймгийн наадмыг долдугаар сарын 9, 10-нд,

-Баянхонгор, Говь-Алтай, Дархан-Уул, Завхан, Орхон, Өвөрхангай, Сүхбаатар, Сэлэнгэ, Увс, Ховд, Хөвсгөл аймгийн наадмыг долдугаар сарын 10, 11-нд,

-Хэнтий аймгийн наадмыг долдугаар сарын 13, 14-нд

-Дорноговь аймгийн наадмыг долдугаар сарын 28, 29-нд тус тус тэмдэглэхээр тогтоосон байна.

Categories
мэдээ соёл-урлаг

Наадмаар Сүхбаатарын талбайд Г.Ариунбаатар “Монгол сонгодог” тоглолтоо толилуулна

Үндэсний их баяр наадмаар Сүхбаатарын талбайд дэлхийд данстай Монголын дуурийн дуучин Г.Ариунбаатар “Монгол сонгодог” гала концертоо толилуулахаар болжээ. Түүний тоглолт долдугаар сарын 12-нд 21.00 цагт үндэсний их баяр наадмын хаалт болон эгшиглэх нь ээ.

Энэхүү тоглолтод ОХУ-ын Ардын жүжигчин Дарима Линховоин, МУГЖ Ө.Уянга, Соёлын тэргүүний ажилтан, дуучин Б.Батжаргал, Ц.Амарболд, С.Батчимэг нар оролцох юм байна.

Үндэсний урлагийн их театрын Төрийн их найрал хөгжим , Улсын Филармоний симфони найрал хөгжим, удирдаач, Урлагийн гавьяат зүтгэлтэн З.Туулайхүү, Н.Буянбаатар нар удирдана. Тоглолтын ерөнхий найруулагчаар Урлагийн гавьяат зүтгэлтэн Г.Цоггэрэл ажиллаж 200 гаруй хүн тоглолто оролцох аж.

Categories
мэдээ соёл-урлаг

Морин хуурч Н.Жигжиддорж шинэ цомгийн тоглолтоо толилууллаа

Монгол Улсын Филармонийн Морин хуурын чуулгын концейртмейстр, удирдаач, морин хуурч Н.Жигжиддорж шинэ цомгийн нээлтийн тоглолтоо өчигдөр тус Филармонийн тайзнаа үзэгчдэд өргөн барилаа.

Тэрбээр Бээжингийн Их театр, Солонгосын Үндэсний их театр, Оросын Большой театр, Франц дахь Юнескогийн танхим, Нью-Йорк дахь НҮБ-ын хурлын их танхим гээд дэлхийн гурван тивийн том, том тайзнаа гарч хуурдаж амжсан нэгэн билээ.

Түүний шинэхэн тоглолтын талаар Урлаг судлалын ухааны доктор, профессор Н.Жанцанноров хэлэхдээ, “Б.Шарав, Х.Билэгжаргал нарын хийл, морин хийл, төгөлдөр хуурын гурвал Монголын хөгжмийн XX зууны ололтыг бүрнээ илэрхийлэх бүтээлүүд. Хийлийг морин хуураар орлуулан хөгжимдсөн нь Н.Жигжиддоржийн зориг, чадварыг илэрхийлж байгаа хэрэг. Миний “Саруул талын дээгүүр” гэх гурвалыг энэ цомогт оруулсанд талархахын ялдамд уг бүтээлийг шинэ сэргэг дуурьсал, уран чадварын сайхан охь оргилуулан хөгжимдсөнд баярлууштай. Н.Жигжиддорж хуурчийн хөгжимдөх өндөр эрэмбэ, хуурынх нь өрнүүн эрчимт дуурьслыг сонссон хэний ч сэтгэл хөдөлж, баяр баясал, ухаарал гэгээрэл өгнө гэдэгт итгэнэм” хэмээн сэтгэгдлээ хуваалцжээ.

Түүний шинэ цомогт орчин цагийн монголын мэргэжлийн хөгжмийн сор бүтээлүүдийн дээжсээс оржээ. Тэрбээр тоглолтдоо Ш.Өлзийбаяр “Морин хуур, Найрал хөгжмийн II концерт”, II: Largo, III: Allegro energico, Б.Шарав “Эхийн сэтгэл шиг…”, “Трио”, Н.Жанцанноров “Саруул талын дээгүүр-Трио”, Х.Билэгжаргал “Трио” бүтээлийг эгшиглүүлсэн юм.

Categories
мэдээ нийгэм

Эмнэлгүүдийн гадна талбайг тохижуулж байна

Улаанбаатар хотод гудамж, зам, талбайн засвар шинэчлэлтийн ажил үргэлжилж байна. Мөн томоохон эмнэлгүүдийн гадна талбайн тохижилт хийгдэж байна. Эмнэлгүүдийн талбайн тохижилтын ажил ямар шатандаа хийгдэж буй талаарх мэдээллийг хүргэж байна.

Халдварт өвчин судлалын Үндэсний төвийн гадна талбайн тохижилтын ажлын явц 60 хувьтай байна. Тус ажлын хүрээнд газар шорооны ажил хийгдэж, хашлага суурилуулж, хашаа татаж байна.
Хан-Уул дүүргийн Эрүүл мэндийн төв, Яармаг салбарын гаднах тохижилтыг Бумбат даваа ХХК гэрээ байгуулан гүйцэтгэж эхлээд байна. Авто зам, зогсоол, явган хүний зам, гэрэлтүүлэг, тоглоомын талбай хийж иж бүрэн тохижуулах юм.
Нийслэлийн Амгалан амаржих газрын гадна тохижилтын ажил 75 хувьтай үргэлжилж байна. Зүлэгжүүлэлт, мод тарих, гадна хашаа барих, явган хүний замын хавтан суурилуулах ажлууд хийгдэж байна.
Баянзүрх дүүргийн Нэгдсэн эмнэлэгийн гаднах тохижилтын ажлын хүрээнд замын суурь байгуулах, хашлага суурилуулах, явган хүний зам барих ажлууд хийгдэж байна.
Нийслэлийн өргөө амаржих газрын гаднах тохижилтын ажил үргэлжилж байна. Тус ажлын хүрээнд газар шорооны ажил хийгдэж байна.
Categories
мэдээ нийгэм

Уяачдын анхааралд

Хурдан морины уралдаанд оролцох уралдаанч хүүхдийг бүртгүүлэхдээ дараах зүйлсийг бүрдүүлэн, уралдаанч хүүхдийн хамт ирж, бүртгэлээ хийлгэнэ үү.

1. Төрсний гэрчилгээний хуулбар

2. Эрүүл мэндийн даатгалын дэвтэрийн дугаар

3. Гэнэтийн ослын даатгалын хураамж 100.000 төгрөг заавал даатгуулсан байх /Заавал шаардана/

4. Эцэг эх асран хамгаалагчийн зөвшөөрөл, гэрээ,

регистерийн дугаарын хамт, оршин суугаа хаяг

5. Уралдаанд оруулцуулах уяачийн утас, Регистерийн дугаар

6. Эрүүл мэндийн тодорхойлолт

7. Уралдаанч хүүхэд иж бүрэн хамгаалалтын хувцастай байж, уралдаанд оролцоно.

Эцэг эх, асран хамгаалагчтай хийх гэрээг ЭНД ДАРЖ татаж авна уу.

Categories
мэдээ нийгэм

Азийн сайд нарын бага хурал оролцогч талуудын мэдэгдэл хуралдаанаар үргэлжилж байна

Гамшгийн эрсдэлийг бууруулах Азийн сайд нарын бага хурал гуравдахь өдрөө Шангрила зочид буудалд үргэлжилж байна.

“Оролцогч талуудын мэдэгдэл” хуралдаан өнөөдөр 08:30 цагт эхэллээ. Тус хуралдааныг ОБЕГ-ын дарга, хошууч генерал Т.Бадрал даргалан явуулж байгаа юм.

Хуралдаанаар Гамшгийн эрсдэлийг бууруулах Азийн сайд нарын бага хуралд оролцож буй оролцогч талуудын 2016 онд Энэтхэг улсад зохион байгуулагдсан Азийн сайд нарын бага хурлын үеэр өгсөн үүрэг амлалтын биелэлтээ танилцуулж, үйл ажиллагааны мэдэгдэл хэлбэрээр үүрэг амлалтаа дахин шинэчлэх боломжийн талаар хэлэлцэж байна.

Хуралдаанаас гаргасан сайн дурын үйл ажиллагааны мэдэгдлээ Азийн сайд нарын бага хурлын хаалтын нэгдсэн хуралдаанд танилцуулж, Азийн сайд нарын бага хурлаас гарах 2018-2020 онд Азийн бүс нутагт хэрэгжүүлэх төлөвлөгөө, “Улаанбаатарын тунхаглал”, Оролцогч талуудын сайн дурын мэдэгдэл баримт бичгүүдэд тусгуулах юм гэж Онцгой байдлын ерөнхий мэдээллээ.



Categories
мэдээ нийгэм

Хот суурин газрын гамшигтай тэмцэх чадавхыг сайжруулах зөвлөмж гаргана

Гамшгийн эрсдэлийг бууруулах Азийн сайд нарын бага хуралд Монгол Улсын Засгийн газраас онцлох хоёр хуралдааныг удирдан зохион байгуулж байна. Онцлох хуралдааны нэг болох “Гамшигт тэсвэртэй дэд бүтэц, хот суурин газрын гамшигтай тэмцэх чадавхыг сайжруулах нь” сэдэвт хуралдаан Шангрила зочид буудалд үргэлжилж байна.

Тус хуралдааныг Монгол Улсын Шадар сайд Ө.Энхтүвшин нээж хэлсэн үгэндээ, “Цаг агаарын эрс тэс уур амьсгалтай, далайд гарцгүй, нийт хүн амын гуравны хоёр нь хот суурин газарт амьдарч байгаа Монгол Улс нь төв Азийн бүс нутгийн газар хөдлөлтийн өндөр идэвхтэй бүсэд оршдог бөгөөд сүүлийн жилүүдэд газар хөдлөлтийн тоо давтамж эрс ихсэж байгаа нь бид бүхний сэтгэлийг ихээр түгшээж байна. Иймд Монгол Улсын Засгийн газраас хот суурин газруудын гамшигт тэсвэртэй байдлыг хангах, барилга, байгууламж, дэд бүтцийг илүү сайжруулан барьж байгуулах, гамшгийн эрсдэлийг бууруулахад төр, хувийн хэвшлийн хамтын ажиллагааг дэмжих, хөрөнгө оруулалтыг нэмэгдүүлэхэд анхаарал хандуулж, бусад улс орнуудын тэргүүн туршлага, ололт амжилтаас суралцах үүднээс энэхүү онцлох хуралдааныг “Гамшигт тэсвэртэй дэд бүтэц, хот суурин газрын гамшигтай тэмцэх чадавхыг сайжруулах нь” сэдвийн дор зохион байгуулж байна. Монгол Улс НҮБ-ын Гамшгийн эрсдэлийг бууруулах газраас санаачлан дэлхийн улс орнуудад хэрэгжүүлж байгаа, хот суурин газрын гамшгийн эрсдэлийг бууруулж, тогтвортой хөгжлийг хангах зорилго бүхий “Гамшигт тэсвэртэй аюулгүй, хот” хөтөлбөрийг бүрэн дэмжиж бүх аймгийн төв, хотуудаа нэгтгэсэн Азийн анхны орны хувьд гамшигт тэсвэртэй эрсдэлийн мэдрэмжтэй хот төлөвлөлтийг зорилгоо болгон ажиллаж байгаа юм. Энэхүү хөтөлбөрт гамшигт тэсвэртэй аюулгүй, хотыг бий болгохын тулд заавал хэрэгжүүлэх 10 үндсэн чиглэлийг тодорхойлсон нь дэлхийн олон улс орны нийслэл, хүн ам ихтэй хот, суурин газруудын хувьд өөрсдийн хотын гамшгийн эрсдэл, эмзэг байдлаа үнэлж, түүнийг бууруулах арга хэмжээг урт, богино, дунд хугацаанд төлөвлөж хэрэгжүүлэх, ингэснээр Гамшгийн эрсдэлийг бууруулах Сендайн үйл ажиллагааны хүрээнд дэвшүүлсэн 7 зорилтын 5 дахь (2020 он гэхэд үндэсний болон орон нутгийн түвшний гамшгийн эрсдлэийг бууруулах стртаегитай улс орны тоог бодитой нэмэгдүүлэх) зорилтыг хэрэгжүүлэхэд чухал үүрэг гүйцэтгэж байгаа” хэмээн цохон тэмдэглэсэн юм.

Хурлын үеэр ОБЕГ-ын дэд дарга, хурандаа Б.Ууганбаяр “Газар хөдлөлтийн эсрэг барилга байгууламжийн тэсвэрлэх чиглэлээр хийгдэж байгаа ажлуудын ололт, амжилт”, Гамшиг судлалын хүрээлэнгийн эрдэмтэн нарийн бичгийн дарга, дэд хурандаа М.Сэржмядаг “Улаанбаатар хотын дэд бүтцийн гамшгийн тэсвэрлэх чадвар” сэдвээр тус тус илтгэл танилцууллаа.

“Гамшигт тэсвэртэй дэд бүтэц, хот суурин газрын гамшигтай тэмцэх чадавхыг сайжруулах нь” сэдэвт хуралдаанаар бүс нутгийн хэмжээнд шинээр үүсэх эрсдэлийг бууруулах, эрсдэлд тэсвэртэй дэд бүтцийг байгуулах, хот суурин газрын гамшгийг тэсвэрлэх чадавхыг бэхжүүлэх замаар тогтвортой хөгжлийг хангах арга замыг тодорхойлохоос гадна улс орнуудын гамшигт тэсвэртэй, хот суурин газрыг бий болгосон тэргүүн туршлага, ололт амжилт, тулгамдаж буй асуудлын талаар харилцан мэдээлэл солилцох юм.

Мөн дэлхийн болон бүс нутгийн хэмжээнд дэд бүтцийг хөгжүүлэх, хот суурин газрын гамшгийг тэсвэрлэх чадавхыг сайжруулахад чиглэсэн бодлого, техникийн шийдэл, нөлөөллийн цогц арга хэмжээ авах тухай зөвлөмжийг гаргана гэж Онцгой байдлын ерөнхий газраас мэдээллээ.


Categories
мэдээ нийгэм

Гамшгийн эрсдлийг бууруулах азийн сайд нарын бага хурлын үеэр БОАЖЯ-ны санаачилгаар салбар хуралдаан зохион байгууллаа

Энэхүү салбар хуралдаан нь “Уур амьсгалын өөрчлөлт, гамшгийн эрсдлийг бууруулах нь”сэдвээр зохион байгуулагдсан бөгөөд 42 орны төлөөлөл оролцлоо. “Гамшгийн аюулыг даван туулах чадварыг дээшлүүлэх, сэргээн босгох үйл ажиллагааг сайжруулах”, “Ус ба гамшгийн эрсдлийн менежмент” болон “ Ойн түймрээс үүдэн гарах гамшиг” гэсэн гурван нарийвчилсан сэдвийн хүрээнд тэд хуралдсан юм.

Салбар хуралдааныг Япон улсын Засгийн газар, Дэлхийн усны түншлэл, НҮБ-ын харьяа Дэлхийн хүнс хөдөө аж ахуйн байгууллага, НҮБ-ын Байгаль орчны хөтөлбөр, UN-REDD үндэсний хөтөлбөр, Азийн сан зэрэг байгууллагуудтай хамтран зохион байгуулсан юм. Уулзалтад дээрх байгууллагуудын төлөөллөөс гадна Байгаль орчны сайдаар ажиллаж байсан С.Оюун, Ж.Батжаргал, БОАЖЯ, Байгаль орчин, уур амьсгалын сангийн албан хаагчид оролцсон.

Уулзалтыг нээж, БОАЖ-ын сайд Н.Цэрэнбат Монгол Улс хог хаягдлын асуудлаар ямар менежмент баримталж байгаа болон 2019 оны 3-р сарын 1-нээс нэг удаагийн нийлэг уутыг хэрэглээнээс халах болсон талаар танилцууллаа.

Салбар хуралдааны гол зорилго нь ус, ой, хог хаягдлаас үйдэлтэй гамшгийн эрсдийг бууруулах, нөхөн сэргээхэд чиглэсэн менежменттэй холбоотой зорилтуудыг хангахад гаргаж буй Ази-Номхон далайн орнуудын хүчин чармайлтыг дэмжих, урамшуулах явдал юм.

Уулзалтын үеэр олон улсын байгууллагын төлөөллүүд уур амьсгалын өөрчлөлтөөс үүдэлтэй гамшгийг цогц байдлаар шийдэх гарцыг хайх, эрсдлийг бууруулахтай холбоотой олон талын асуудлаар харилцан мэдээлэл солилцож, гамшгийн бэлэн байдлыг хангах дэвшилтэт арга замыг хамтран тодорхойлохыг зорьсон юм.

Categories
мэдээ нийгэм

Монгол Улс Бүгд Найрамдах Австри улстай дипломат харилцаа тогтоосны 55 жилийн ой тэмдэглэв

Монгол Улс Бүгд Найрамдах Австри Улстай дипломат харилцаа тогтоосны 55 жилийн ой, Үндэсний их баяр наадмыг тохиолдуулан Монгол Улсаас Австри Улсад суугаа Элчин сайдын яам 2018 оны 7 дугаар сарын 4-ний өдөр Вена хотын “Дэлхийн музей”-д хүндэтгэлийн хүлээн авалт зохион байгуулав.

Хүлээн авалтад Австри Улсын төрийн яамд, байгууллага, тус улсад суугаа гадаад улсын дипломат төлөөлөгчийн газар, олон улсын байгууллага, хувийн хэвшлийн болон Австри Улсад ажиллаж, амьдарч буй монголчуудын төлөөлөл зэрэг 200 гаруй хүндэт зочин, төлөөлөгч оролцов.

Хүндэтгэлийн арга хэмжээний үеэр ардын язгуур урлагийн “Хөх Монгол” хамтлаг уран бүтээлээ толилуулж, урлагийн тоглолт хийв. Мөн энэ өдөр Монгол киноны нээлттэй өдөрлөгийг зохион байгуулсан нь Монгол өв соёлыг Австрийн олон нийт, 120 гаруй гадаад улсын ДТГ-ын төлөөлөл төдийгүй жил бүр 20 сая жуулчид хүлээн авдаг Вена хотын гадаадын зочдод сурталчилсан арга хэмжээ боллоо.

Монгол Улс Бүгд Найрамдах Австри Улстай 1963 оны 7 дугаар сарын 1-ний өдөр дипломат харилцаа тогтоосон бөгөөд Австри Улс нь Монгол Улсыг хүлээн зөвшөөрсөн өрнөдийн хоёр дахь улс юм.

Вена хотын “Дэлхийн музей” нь дэлхийн улс, үндэстний соёлын эд өв бүхий 220 гаруй мянган үзмэртэй бөгөөд тус музейн сан хөмрөгт XIX зууны эхэн үеийн монголчуудын шашин болон ахуй соёлыг илэрхийлсэн эд өвийн цуглуулга хадгалагдаж байна.