Month: July 2018

Монгол Улсын Их Хурлын дарга М.Энхболд Гамшгийн эрсдэлийг бууруулах Азийн сайд нарын бага хуралд оролцож буй НҮБ-ын Хүн амын сангийн Ази, Номхон далайн бүсийн захирал Бьорн Андерссоныг хүлээн авч уулзлаа.

Уулзалтын эхэнд УИХ-ын дарга М.Энхболд Монгол Улсын тогтвортой хөгжлийн зорилтуудыг хэрэгжүүлэх, нийт хүн ам, эмэгтэйчүүд, хүүхэд, залуучуудын хөгжил, эрүүл мэнд, боловсролын зэрэг асуудалд байнга анхаарал тавьж, үр дүнтэй олон төсөл хөтөлбөр хэрэгжүүлж, Монголын ард түмэнд дэмжлэг туслалцаа үзүүлсээр ирсэн НҮБ-ын Хүн амын санд хууль тогтоох дээд байгууллага УИХ-ын нэрийн өмнөөс талархал илэрхийлэв.

Ноён Бьорн Андерссон НҮБ-ын Хүн амын сангийн үйл ажиллагаанд тогтмол дэмжлэг үзүүлж, үнэтэй хувь нэмэр оруулсаар ирсэн Монгол Улсын Их Хуралд талархал илэрхийлээд, саяхан Улаанбаатар хотноо болсон Ази, Номхон далайн бүсийн орнуудын парламентчдын уулзалт зөвлөлгөөнийг УИХ амжилттай зохион байгуулсанд баяр хүргэлээ.

Уулзалтын үеэр хүн амын насжилт, эмэгтэйчүүдийн эрхийг хамгаалах, жендерийн тэгш байдал, залуучуудыг эрх мэдэлжүүлэх, хүүхэд залууст бэлгийн боловсрол олгох, нөхөн үржихүйн эрүүл мэнд зэрэг сэдвийг хөндөж, энэ чиглэлээр НҮБ-ын Хүн амын сангаас авч хэрэгжүүлж буй үйл ажиллагаа, Монгол Улсын оролцоо, цаашид анхаарах асуудлуудаар яриа өрнүүллээ.

НҮБ-ын Хүн амын сан “Залуучуудын хөгжлийг дэмжих тухай” хууль, “Гэр бүлийн хүчирхийлэлтэй тэмцэх тухай” хуульд өөрчлөлт оруулах хуулийг парламентаар хэлэлцэн батлахад дэмжлэг үзүүлж ажилласныг энэ үеэр онцоллоо.

Ноён Бьорн Андерссон “Монгол Улс өргөн уудам нутагтай. Хүн ам цөөтэй, суурьшил нь таруу. Тиймээс нөхөн үржихүйн болон эмэгтэйчүүд, залуусын эрүүл мэндийн сэдвээр хэрэгжүүлсэн “Телемедицин” төсөл дэлхийн бусад улс орнуудад үлгэр дуурайл болохуйц чухал үр дүнтэй арга хэмжээ болсон” хэмээгээд, НҮБ-ын Хүн амын сангийн Захирлуудын зөвлөлөөс баталсан “Улс орнуудыг дэмжих” хөтөлбөрийн хүрээнд Монгол Улстай бид цаашид ч идэвхтэй хамтран ажиллах болно гэлээ.

УИХ-ын дарга М.Энхболд НҮБ-ын Хүн амын сан, тус сангийн Монгол Улс дахь Суурин төлөөлөгчийн газрын үйл ажиллагааг парламентаас байнга дэмжиж ажиллах болно гэв.

Уулзалтад НҮБ-ын Хүн амын сангийн Монгол дахь суурин төлөөлөгч, хатагтай Наоми Китахара байлцав.

Улсын Их Хурлын Байгаль орчин, хүнс, хөдөө аж ахуйн байнгын хорооноос өнөөдөрхэвлэлийн бага хурал зохион байгуулж, 2018 оны хаврын ээлжит чуулганы үйл ажиллагааны талаар сэтгүүлчдэд мэдээлэл хийлээ.

Байнгын хорооны дарга Л.Элдэв-Очир мэдээллийн эхэнд, Ээлжит чуулганы хугацаанд Байнгын хороо 12 удаа хуралдаж давхардсан тоогоор 24 хуулийн төсөл, Улсын Их Хурлын тогтоолын төсөл гурав, сайдын мэдээлэл долоог сонсож, дөрвөн хууль, Улсын Их Хурлын тогтоол нэгийг батлуулсан. Байнгын хороо Улсын Их Хурлын тогтоолын төслийн үзэл баримтлалыг хэлэлцэх эсэхийн санал, дүгнэлтгурав, анхны хэлэлцүүлэгт бэлтгэсэн талаарх санал, дүгнэлт найм, эцсийн хэлэлцүүлэгт бэлтгэсэн тухай танилцуулга хоёр, зарчмын зөрүүтэй саналын томьёолол 49, Байнгын хорооны гурван тогтоол батлан гаргасан. Тус байнгын хороонд байгууллага иргэдээс санал, хүсэлт, гомдол зэрэг нийт 41 албан бичиг ирүүлснийг зохих журмын дагуу шийдвэрлэж, хариу өгсөн. Тайлангийн хугацаанд Байнгын хороо зөвлөгөөн, хэлэлцүүлэг, сургалт, уулзалт, ярилцлага дөрвөн удаа тус тус хийсэн гэдгийг онцлов.

Улсын Их Хурлын 2018 оны хаврын ээлжит чуулганы хугацаанд Байгаль орчин, хүнс, хөдөө аж ахуйн байнгын хороо Монгол Улсын иргэнд газар өмчлүүлэх тухай хуульд өөрчлөлт оруулах тухай хуулийн төслийг нэгдсэн чуулганаар хэлэлцүүлэн, батлуулсан. Ингэснээр иргэнд газрыг нэг удаа үнэгүй өмчлүүлэхтэй холбоотой заалтуудын хүчин төгөлдөр мөрдөгдөх хугацааг 2028 оны 05 дугаар сарын 01-ний өдрийг хүртэл 10 жилийн хугацаагаар сунгахаар болгосон. Түүнчлэн Баяжуулсан хүнсний тухайхуулийн төслийг хэлэлцүүлэн батлуулсан бөгөөд хууль батлагдсанаар хүн амын эрүүл мэндийг хамгаалах, аминдэм, эрдэс бодисын дутлаас урьдчилан сэргийлэх зорилгоор зарим төрлийн хүнсийг албан журмаар баяжуулж, амьжиргааны баталгаажих доод түвшингээс доогуур орлоготой иргэд шим тэжээллэг хүнс хэрэглэх боломж бүрдэх, бага зардлаар хүн амын аминдэмийн хэрэгцээг хангах, улирлын чанартай шим тэжээлийн дутлаас сэргийлэх, хүүхдийн оюуны болон бие бялдрын өсөлт хөгжилтөд эерэгээр нөлөөлөх ач холбогдолтой гэдгийг Л.Элдэв-Очир гишүүн мэдээлэлдээ дурдав.

Мөн тэрбээр Ус цаг уур, орчны хяналт шинжилгээний тухай хуульд өөрчлөлт оруулах тухай хуулийн хэлэлцүүлэн батлуулсныг дурдахдаа хууль батлагдсанаар аймаг, нийслэлийн ус цаг уур, орчны шинжилгээний төв болон лаборатори, хүрээлэнгийн даргыг тухайн шатны засаг даргатай зөвшилцөн ус цаг уур, орчны хяналт шинжилгээний асуудал эрхэлсэн төрийн захиргааны байгууллагын дарга, улсын сүлжээний нэгжийн албан хаагчийг төрийн албаны тухай хуулиар тогтоосон шаардлагыг хангасан иргэнийг сонгон шалгаруулж, тухайн шатны засаг даргатай зөвшилцөн харьяалах төв, лаборатори, хүрээлэнгийн дарга томилж, чөлөөлдөг болсон нь төвлөрлийг сааруулсан зохицуулалтыг бий болгосон гэдгийг онцолж байлаа.

Ээлжит чуулганы хугацаанд Байнгын хороо хуралдаанаараа Богдхан уулын дархан цаазат газарт хамаарах Туул голын эрэг дагуу аялал жуулчлал эрхлэх зориулалтаар эрх бүхий байгууллагаас олгосон зөвшөөрөл болон Монгол Улсын нутаг дэвсгэр дэх гол, мөрний урсац бүрэлдэх эхийн хилийн заагийн солбицол, Ойн сан бүхий газрын хилийн заагийн солбицол, Усан сан бүхий газрын хамгаалалтын бүсийн солбицлын талаарх Байгаль орчин, аялал жуулчлалын сайдын мэдээллийг сонсож, Туул голын эрэг дагуу аялал жуулчлал эрхлэх зориулалтаар эрх бүхий байгууллагаас олгосон зөвшөөрлийн талаар “Чиглэл өгөх тухай” Байнгын хорооны 06 дугаар тогтоолыг батлуулсан байна.

Мөн Нийгмийн бодлого, боловсрол, соёл, шинжлэх ухааны байнгын хороотой хамтарсан хуралдаанаар Улсын Их Хурлын “Агаарын бохирдлыг бууруулахтай холбогдуулан авах арга хэмжээний тухай” 2018 оны 02 дугаар тогтоолын хэрэгжилтийн тайлан, Улсын Их Хурлын даргын 2017 оны 212 дугаар захирамжаар байгуулагдсан Ажлын хэсгийн зөвлөмжийн дагуу Монгол Улсын Засгийн газар, Нийслэлийн Засаг даргаас хэрэгжүүлсэн ажлын талаарх тайлан, мэдээллийг сонсож, “Агаарын бохирдлыг бууруулах ажлыг эрчимжүүлэх тухай” 2018 оны 05 дугаар сарын 30-ны өдрийн Нийгмийн бодлого, боловсрол, соёл, шинжлэх ухааны байнгын хороотой хамтарсан 07/16 дугаар тогтоолоор Засгийн газарт чиглэл өгсөн аж.

Тайлант хугацаант тус байнгын хороо Мах, сүүний анхдугаар аяны хэрэгжилт, явц, үр дүн болон Мал аж ахуй болон тариалангийн бүс нутгийн ган, хуурайшилтын нөхцөл байдал, малыг цаг агаарын гэнэтийн аюулаас хамгаалах бодлогын талаарх Хүнс, хөдөө аж ахуй, хөнгөн үйлдвэрийн сайдын мэдээлэл сонсчээ.

Мөн Монгол Улсын Их Хурлаас Мал, амьтны эрүүл мэндийн тухай болон Малын генетик нөөцийн тухай хуулиудыг баталсөн бөгөөд эдгээр хуулиуд 2018 оны 06 дугаар сарын нэгнээс эхлэн хүчин төгөлдөр мөрдөгдөж эхлээд байна. Иймд хуулиудыг хэрэгжүүлэхтэй холбогдох бэлтгэл ажлыг хангах талаар “Хууль хэрэгжүүлэх зарим арга хэмжээний тухай” Улсын Их Хурлын 81, 82 дугаар тогтоолыг баталлуулжээ.

2018 оны хаврын чуулганы завсарлагааны хугацаанд Байнгын хорооноос байгуулагдсан “Ус бохирдуулсны төлбөрийн тухай хуульд нэмэлт, өөрчлөлт оруулах тухай” хуулийн төсөл болон хамт өргөн мэдүүлсэн бусад хуулийн төсөл болон Хүнсний тухай хуульд өөрчлөлт оруулах тухай болон хамт өргөн мэдүүлсэн Хүнсний бүтээгдэхүүний аюулгүй байдлыг хангах тухай хуульд нэмэлт, өөрчлөлт оруулах тухай хуулийн төслийг чуулганаар хэлэлцүүлэх бэлтгэл хангах, санал, дүгнэлтийн төсөл боловсруулах үүрэг бүхий ажлын хэсэг тус тус ажиллаж байна. Үүний зэрэгцээ Байнгын хороо батлуулсан хууль, тогтоолын хэрэгжилтэд анхаарч, хууль хэрэгжүүлэх төлөвлөгөө, хуулиар эрх олгож, батлан гаргахыг үүрэг болгосон эрх зүйн актуудын боловсруулалт, хуульд заасан тогтолцооны талаарх Хүнс, хөдөө аж ахуй, хөнгөн үйлдвэрийн сайдын мэдээллийг сонсож, үүрэг, чиглэлийг тухай бүр өгч ажиллаж байна гэж Байнгын хорооны дарга мэдээллийнхээ төгсгөлд онцоллоо.

Дараа нь хэвлэлийн бага хуралд оролцсон Байнгын хорооны дарга Л.Элдэв-Очир, Улсын Их Хурлын гишүүн Б.Саранчимэг, Гадаад харилцааны сайд Д.Цогтбаатар нар сэтгүүлчдийн сонирхсон асуултад хариулав гэжУлсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.