Үндэсний их баяр наадмыг зохион байгуулах хорооны хурдан морины салбар хорооноос хурдан морины уралдааныг хэрхэн зохион байгуулах талаар мэдээлэл өглөө.
ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, Хурандаа Ж.Амгалан “Хурдан морины салбар хорооноос хүүхдийн аюулгүй байдал, замын аюулгүй байдал, морьдын аюулгүй байдлыг хангах зэрэг арга хэмжээг авч хэрэгжүүлнэ. Хамгийн холын зай 25 км-ээс бариа хүртэл камержуулах, хяналтын бичлэг хийхээр болсон. Энэ нь бүртгэгдээд гарсан морьдыг маршрутаар явуулах, санаатай, санаандгүй байдлаар хүүхэд хүүхэд унагадаг зэрэг зөрчлүүдийг илрүүлэх боломжтой. Мөн уяачид, хурдан морь сонирхогчидод хандаж хэлэхэд хурдан морины уралдааныг машинаар дагадаг асуудлыг болиулна” гэв.
Бямбадорж “Уралдах морьдын үйлдвэрлэг байдлыг тодорхойлох мэргэжлийн хүмүүс ажиллана. Сэрвээний өндөр болон морины үйлдвэрлэг байдлыг харж ялгана. Сэрвээний өндөр нь даага 127 см, шүдлэн 132 см, хязаалан 137 см, соёолон, азарга 140 см, их насны морьд 141 см байхаар заасан байгаа. Сэрвээний өндөр заасан хэмжээнд хүрэхгүй байгаа боловч үйлдвэрлэг байдал нь илт эрлийз байвал уралдаанд оролцуулахгүй. Уяачид ёс зүйтэй байж, эрлийз морьдоо өөрсдийн ангилалд нь уралдуулахыг хүсч байна” хэмээлээ.
Гэр бүл, хүүхэд, залуучуудын хөгжлийн газрын Хууль эрх зүй, хамтын ажиллагааны газрын дарга А.Энхбаатар “Уралдаанч хүүхдүүдийн эрхийг хамгаалахтай холбоотой асуудал буюу хүүхдүүдийн даатгалыг 100 мянган төгрөг болон нөхөн олговорыг 20 сяа төгрөг болгосон. Энэ асуудлыг мэдсээр байж орон нутагт мэдэн будилж, хуучинаар нь даатгаж байна гэсэн мэдээлэл ирж байна. Бид иймэрхүү байдал гаргасан газрын удирлагуудад арга хэмжээ авахуулж, олон нийтэд мэдээлэх болно. 21 аймагт бүх уралдаанч хүүхдийн бүртгэлийг цахимаар явуулна” хэмээв.
Үндэсний их баяр наадмын хурдан морины уралдааныг 12-20 машин дагадаг байна. Хурдан морины салбар хорооноос энэ жил хурдан морины уралдааныг найман машинаар дагуулахаар төлөвлөсөн байна. Энд морь тайлбарлагч, эмч, чиглүүлэгч, морины комисс, шууд дамжуулалтын телевиз багтах юм байна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
Санхүүгийн зохицуулах хорооны даргын тушаалаар нийслэлд үйл ажиллагаа явуулж буй зохицуулалтын байгууллагуудад газар дээрх хэсэгчилсэн хяналт шалгалт хийж байна. Банк бус санхүүгийн байгууллага (ББСБ)-уудад хийх хяналт шалгалт өнгөрөгч сард эхэлж, нийслэлийн 437 ББСБ-ыг хамруулан, үнэлгээ, дүгнэлт өгөх шатандаа үргэлжилж байгаа бол энэ долоо хоногт хадгаламж, зээлийн хоршоо (ХЗХ)-дод хийх хяналт шалгалтын ажил эхэллээ.
Дархан аварга Х.Баянмөнх өчигдөр бөхчүүдэд хандан дараахь уриалгыг гаргасан байна. Тэрээр “Монголын үндэсний их баяр наадмын чимэг болж зүлэг ногоон дэвжээн дээр эр бие, эрэлхэг зориг гарган ясныхаа хөлсөөр ахан дүүс болсон зодог шуудагны садан төрөл Та бүхэнд баярын мэнд хүргэж аз жаргал, сайн сайхны ерөөл дэвшүүлж мэндчилж байна. Нийгмийн шилжилтийн ороо бусгаа цагт, үзэл бодлын зөрчилдөөн та биднийг тойрсонгүй. Гэхдээ хэний ч үзэл баримтлалыг үл ойшоон монгол хүний нинжин сэтгэл, хүнлэг ёс, гүндүүгүй сайхан ноён нуруу, ёс суртахуун, эр зориг, золбоо хийморь, хоёр нүүргүй шударга үйлс, алдар гавьяа, өнгө зүс, нэр төрийг тээж явдаг заяагдмал үүргээ нэр төртэй биелүүлж зөвхөн зүлэг ногоон дэвжээн дээрээ барилдааны дүрмээ ямар ч зөрчилгүй биелүүлж, эр бяраа үзүүлж, ов мэх давамгайлсан зориг төгөлдөр сайхан барилдаанаараа наадамчин олноо баярлуулан цэнгүүлэхийг цагийн байдал та биднээс шаардаж байна. Өвгөд дээдэс үе үеийн аваргуудын хүч чадал, авьяас чадвараа сорьж өргөн олон түмнээ цэнгүүлж явсан зүлэг ногоон талбайгаа ихэд дээдлэн бөх хүний хатан тэвчээр, голч ухаан, хэзээ ч хувирч ганхахгүй ноён нуруутай байж, шударга үнэнчээр монгол ёс суртахуунтай барилдах нь “Аварга” цол хүртсэнээс илүү нандин чанар гэдгийг ямагт санаж, өөртөө хэлж биелүүлж байхыг сануулж, захиж зөвлөж байна.
Санхүүгийн зохицуулах хорооноос олон нийтийн санхүүгийн мэдлэг, мэдээллийг нэмэгдүүлэх хүрээнд явуулж буй орон нутгийн иргэдэд чиглэсэн цуврал үйл ажиллагаа хэдхэн хоногийн өмнө “Үнэт цаасны зах зээлийн нээлттэй өдөрлөг”-өөр үргэлжиллээ. Дархан-Уул, Булган, Орхон аймагт тус бүр нэг өдрийн турш зохион байгуулсан өдөрлөгийг “Монголын хөрөнгийн бирж” ТӨХК-тай хамтран хийж, нийт 3000 гаруй хүнд нэг цэгийн цогц үйлчилгээг үзүүлэв.
Тайландын хойд хэсгийн Тхам Луанг агуйд гацсан хөвгүүдийг багшийнх нь хамт аврах ажиллагаанд оролцож байсан шумбагч амиа алджээ. Талийгаач Саман Гунан нь 38 настай, урьд нь Тайландын Тэнгисийн цэрэгт алба хааж байсан офицер хүн бөгөөд албанаас халагдсан ч аврах ажиллагаанд оролцож байсан юм байна. 
БНХАУ-ын Засгийн газрын хөнгөлөлттэй зээлийн хөрөнгөөр нийслэлийн Хан-Уул дүүргийн IV хорооны нутаг дэвсгэрт “Яармагийн шинэ гүүр барих, хуучин гүүрийг засварлах” төсөл хэрэгжиж байна. Энэ онд багтаан гүүрийн ажлыг дуусгаж, ашиглалтад оруулах юм байна.
Мексикийн шинээр сонгогдсон Ерөнхийлөгч Андрес Мануэль Лопез Обрадор ирэх 12 дугаар сард болох ерөнхийлөгчийн тангараг өргөх ёслолдоо АНУ-ын Ерөнхийлөгч Дональд Трампыг урина хэмээн пүрэв гарагт мэдэгдсэнийг “Синьхуа” агентлаг уламжлав.
Япон улсын ихэнх нутгаар хүчтэй аадар бороо үргэлжлэн орж, тус улсын баруун хэсэгт оршдог мужуудад үер бууж, хөрсний гулгалт үүссэний улмаас хүмүүс ор сураггүй алга болоод байгаа тухай “Киодо” агентлаг мэдээлэв.