Month: July 2018

Тулгар төрийн 2227, Их Монгол Улсын 812, Ардын хувьсгалын 97 жилийн ой, Үндэсний их баяр наадмын өдрүүдэд цагдаагийн байгууллагаас иргэдийн ая тухай, аюулгүй зорчих, нөхцөл боломжийг бүрдүүлэхзорилгоор бусад анги байгууллагуудаас хүч нэмэгдүүлэн нийт 557 алба хаагч мөн нэмэгдлээр Хууль сахиулахын их сургуулийн 85 сонсогч өндөржүүлсэн бэлэн байдлын зэрэгт шилжин үүрэг гүйцэтгэнэ.

Иргэд хөдөлгөөнд оролцогчдыг ая тухтай, аюулгүй зорчуулах чиглэлээр Төв цэнгэлдэх хүрээлэн, Хүй долоо худаг дахь авто зогсоолын хэмжээнээс хамааран тээврийн хэрэгслийн зөвшөөрлүүд олгогддог. Зөвшөөрөл нь баяр наадмын үеэр иргэд, хөдөлгөөнд оролцогчдыг зам тээврийн ослоос урьдчилан сэргийлэх, түгжрэл саатал үүсгэхгүй байхад чиглэгдсэн хөдөлгөөн зохион байгуулалтын нэг хэлбэр юм. Энэ жил А, Ж, DК, Ү, Г, улаан М, Цэнхэр М гэх нийт 7 төрлийн зөвшөөрлүүд олгогдож байна.

Мөн бид замын мэдээлэгдсэн байдлыг сайжруулах, жолоочид мэдээллийг ойлгомжтой байдлаар хүргэх зорилгоор тэмдэг, тэмдэглэл, “Чиг заасан мэдээлэх самбар”-ыг шаардлагатай байрлалуудад байрлуулаад байна. Та бүхэн тавигдсан тэмдэг, авсан зөвшөөрлийнхөө зураглалын дагуу хөдөлгөөнд оролцохыг зөвлөж байна.

Цагдаагийн байгууллага үйл ажиллагаа явуулахдаа иргэдийнхээ аюулгүй, ая тухтай байдлыг хангахад чиглүүлдэг. Энэ хүрээнд энэ жил зарим тээврийн хэрэгслийн зөвшөөрлийн талбайг ойролцоо дүүргээр нь ангилж өгчээ.

Жишээ нь: “Г” төрлийн зөвшөөрлийг хоёр байршилд байгуулсан. Нэг дэх байршил нь Сүхбаатар, Сонгинохайрхан, Баянгол, Чингэлтэй дүүргийн чиглэлээс ирж буй иргэдэд зориулан Энхтайвны гүүрний зүүн дор байрлах “Усан парк”-ын зогсоол, хоёр дах нь Хан-Уул, Баянзүрх дүүргийн чиглэлээс ирж буй иргэдэд зориулан Хурд хорооллын зүүн талд байрлах “Суруго Монгол” ХХК-ны зогсоолд байрлуулахаар зохион байгуулсан гэх мэт зохицуулалтыг хийх аж.

Түүнчлэн:

“А”, “ДК” ангиллын зөвшөөрөлтэй тээврийн хэрэгсэл – Төв цэнгэлдэх хүрээлэнгийн баруун талд байрлах “Наадам” төвийн 6 давхар авто зогсоолд,
“Ж” буюу жуулчдад зориулсан зөвшөөрөлтэй тээврийн хэрэгсэл – Гандийн гудамж буюу Төв цэнгэлдэх хүрээлэнгийн чанх хойно байрлах “Говийн Од” ХХК-ийн талбайд байрлуулна. Мөн тухайн үед бид 45 ба түүнээс дээш хүний суудалтай автобуснуудад зориулсан нэмэлт зогсоолуудыг гаргаж ажиллана.
“Г, Ү” зөвшөөрөлтэй тээврийн хэрэгсэл – Нийслэлийн гудамж буюу Хурд хорооллын зүүн талд байрлах “Суруга Монгол” ХХК-ийн талбайд
“Улаан M”, “Цэнхэр М” зөвшөөрөлтэй тээврийн хэрэгсэл: Зөвхөн Хүй 7 худаг явна.

Гэвч зөвшөөрөлгүй эсвэл олгогдсон зөвшөөрлийн бус талбай руу жолооч нар нэвтрэх үйлдлийг ихээр гаргадаг. Энэ нь бусад хөдөлгөөнд оролцогчид болон хөдөлгөөн зохицуулалтанд ихээхэн хүндрэл учруулж, зохиомол түгжрэл саатал бий болох шалтгаан болдогыг анхаарах хэрэгтэй.

Мөн Дүнжингарав, Мишээл экспо төвийн зогсоол дээр автомашинаа байрлуулан Төв цэнгэлдэх хүрээлэн рүү 3-5 минут тутамд үнэ төлбөргүй автобусаар зорчих боломжтой.

Замын ачааллаас шалтгаалан энэ сарын 12-ны 07:00-09:00 цагт “Соёолон” насны хурдан морины уралдааны үеэр Архангай руу салдаг уулзвараас Хүй долоо худаг хүртэлх замыг зүүнээс баруун тийш, баруунаас зүүн чиглэлд нэг чигийн урсгалд оруулж хөдөлгөөнийг зохицуулах бөгөөд морь уралдаж дууссаны дараа Улаанбаатар хотоос Архангай руу салдаг уулзвар хүртэлх замыг нэг чигийн хөдөлгөөнд оруулж замын хөдөлгөөнийг зохион байгуулахаар төлөвлөсөн байна.

Графикт ажлуудыг төлөвлөсөн хугацаанд амжилттай хэрэгжүүлсэн инженерийн хангамжийн байгууллагууд, Захирагчийн харьяа орон нутгийн өмчит байгууллагуудын нэр бүхий 37 албан тушаалтнууд, ажилтнуудыг шагнаж урамшууллаа гэж нийслэлийн Захирагчийн ажлын албанаас мэдээллээ.

Хан-Уул дүүргийн зургадугаар хорооны Засаг дарга А.Сүххишигийн санаачлагаар Хан-Уул дүүргийн Засаг даргын Тамгын газар, “Тереза” ахмадын халамжийн төвтэй хамтран тус хорооны хогийн цэг, гуу жалга байсан газрыг засаж тохижуулан ногоон байгууламж бүхий эко тоглоомын талбай байгууллаа.

Тус тоглоомын талбай байгуулагдсанаар бага насны хүүхэдтэй эцэг эхчүүд хүүхдээ салхинд гаргах, хүүхдүүд аюулгүй орчинд, ая тухтай тоглож наадахад тохиромжтой орчин бий болж байгаа юм. Мөн ахмадууд чөлөөт цагаа өнгөрөөж дасгал хийх боломжтой чийрэгжүүлэх төхөөрөмжүүдийг суурилуулсан бөгөөд тоглоомын талбайн резинэн хавтантай, байгалийн зүлэгжүүлэлт хийсэн гэдгээрээ онцлог юм.

Үйл ажиллагаанд Хан-Уул дүүргийн Засаг даргын орлогч А.Амартүвшин, Тохижилт үйлчилгээний төв ОНӨААТҮГ-ын захирал Ц.Эрдэнэбаатар, дүүргийн ИТХ-ын Тэргүүлэгч, Тохижилт үйлчилгээний төвийн дэд захирал Ч.Базарзаяа, зургадугаар хорооны Засаг дарга А.Сүххишиг, ГБХЗХХэлтсийн дарга О.Мягмарсүрэн, Тереза ахмадын төвийн Монгол дах салбарын захирал болон иргэдийн төлөөлөл оролцлоо.

Иргэд, хогийн цэг байсан талбайг засаж тохижуулан ногоон байгууламжтай тоглоомын талбай санаачлан хийж, Яармагын хүүхэд багачууд чөлөөт цагаа үр бүтээлтэй өнгөрүүлэхэд чиглэсэн бүтээлч ажлыг өрнүүлж байгаа санаачлагч нарт талархал илэрхийллээ.

“Эко дүүрэг” болохын төлөө хамтран ажиллаж байгаа аж ахуйн нэгж, байгууллагуудад ХУД-ийн ЗДТГ талархснаа илэрхийлэв.

Он гарснаар шатахууны үнэ шалтгаангүйгээр гурван ч удаа нэмэгдсэнтэй холбогдуулан АН-ын Үндэсний бодлогын зөвлөлийн гишүүд болон зам тээврийн бодлогын газар хамтран мэдээлэл хийлээ. Энэ үеэр зарим газруудад шатахууны зохиомол хомсдол үүсгэж байгаа, шатахуун түгээх газрууд хуурамч шатахуун борлуулсан болон шатахууны хөөрөгдлийг дагаад өргөн хэрэглээний бараа бүтээгдэхүүний үнэ нэмсэнд иргэд бухимдалтай байгаа гэв.

Шатахууны импортын татварыг тэглэчихээд байхад үнэ нь өссөөр байгааг зохиомол хөөрөгдөл гэж үзэж байгаа аж. Шатахууны үнийг эргэн буруулж, тогтворжуулахыг иргэд хүсч байгаа учраас Ардчилсан намын зам тээврийн бодлогын зөвлөлөөс Засгийн газарт шаардлага хүргүүлэхээр болсон байна.

Үүнд улсын хэмжээнд буюу 21 аймаг, есөн дүүрэгт худалдаалагдаж байгаа бүх төрлийн бензин, дизель шатахууны үнийг нэн даруй бууруулах шаардлагатай. Эрх баригч нам 2016 оны УИХ-ын сонгуулийн мөрийн хөтөлбөртөө тусгасан “Шатахууны үнийг дэлхийн зах зээлийн үнэтэй уялдуулан бууруулахын зэрэгцээ улсын хэмжээнд ижил түвшний үнэ тогтоох болно”гэсэн амлалтаа биелүүлэхийг шаарджээ.

Он гарсанаас хойш бензин, дизель түлшний үнийн өсөлтийг хооронд нь харьцуулбал нэгдүгээр сард Улаанбаатар хотод А-80 1л-1550 төгрөгөөр худалдаалагдаж байсан бол одоо 1580 төгрөгт хүрчээ. Харин Дорноговь аймагт тус бензин өнгөрсөн нэгдүгээр сард 1л-1560 төгрөгөөр худалдаалдаг байсан. Гэтэл энэ сарын дөрөвний байдлаар 1л-2070 төгрөгөөр худалдаалж, шатахууны үнэ 32 хувиар өссөн байна.

Авто замын бодлогын мэргэшсэн инженер Ж.Энхбат, “Баяр наадам дөхөөд ирэхээр амьжиргаанд зайлшгүй хэрэгтэй бараа бүтээгдэхүүний үнийг хөөрөгдүүлж, иргэдээр тохуурхдаг. Одоо ч мөн адил байна. Засгийн газар ОУВС-гийн нэрийг барьж иргэдийг татвараар дарамталж, үнийн хөөрөгдлийг дээд цэгт нь тулгаж буйд иргэд бухимдаж байгаа. Тиймээс дэлхийн зах зээлд ашигладаг үнэ буурч байхад онцгой албан татварыг нэмж хуримтлал үүсгэдэг. Харин үнэ өсөх үед татвараа буулгаж, өмнө нь үүсгэсэн хуримтлалаасаа үнийн өсөлтийг зохицуулдаг жишгийг дагах хэрэгтэй байна” гэв.

Мөн АН-ын Үндэсний бодлогын хорооны гишүүн Б.Болорсүрэн, “Ойр ойрхон шатахууны үнэ нэмэгдсэнээс үүдэн амьдралаа залгуулах гэж ядаж яваа нэг иргэний халааснаас жилд 600 мянган төгрөг дэмий урсч байгаа. Энэ илүү зардлаас болоод айл өрхүүд хэрэглээгээ хангаж чадахгүйд хүрээд байна. Уг нь АН-ыг засаг барьж байхад “Үнэ тогтворжуулах хөтөлбөр”-ийг хэрэгжүүлж, шатахууны үнийг хэвийн барьж, бүр тодорхой хэмжээнд буулгаж байсан түүхтэй. Тиймээс эрх баригчид иргэдийн амьдралын бодит байдалтай танилцаж, түүнтэйгээ уялдсан бодлого гаргаач ээ” хэмээн хүсч байлаа.

Шатахууны үнэ нэмэгдсэнээс үүдэн, хот хоорондын зорчигч тээвэр болон бүх төрлийн ачаа тээвэрлэлтийн зардал нэмэгдэх эрсдэл үүсч байгаа юм. Хэрэв нэмэгдвэл өргөн хэрэглээний барааны үнэ дагаад өсч болзошгүй талаар хэлж байв.

З.СУВД