Month: July 2018

Энэ сарын 1-7 ны өдрүүдэд Улсын гуравдугаар төв эмнэлэг, ХААН Банк Сан, Нийгмийн эрүүл мэндийн үндэсний төв хамтран хоёр дахь жилдээ хэрэгжүүлж буй “Цусны Даралт Ихсэлтийн Эсрэг Аян – 2018”-ыг орон нутагт, хүн амын зүрх судасны өвчлөл, ялангуяа цусны даралт ихсэх өвчний өвчлөл, нас баралт өндөртэй Хангайн бүсийн Булган, Хөвсгөл аймгуудад анх удаагаа зохион байгуулагдлаа.

Аяны үйл ажиллагаа дээрх хоёр аймгийн төв талбайд олон нийт, ард иргэд рүү чиглэсэн нээлттэй өдөрлөг хэлбэрээр зохион байгуулагдаж, цусны даралт ихсэх өвчний эрт илрүүлэг, үзлэг оношилгоо хийгдэж, иргэдэд цусны даралт ихсэх өвчин, түүнд хүргэж буй эрсдэлт хүчин зүйл, хүндрэлийн шалтгаан, түүнээс урьдчилан сэргийлэх амьдралын эрүүл зөв дадал олгох эрүүл мэндийн сургалт сурталчилгаа хийгдлээ.

Аяны хугацаанд дээрх хоёр аймгийн нийт 2168 иргэн (эрэгтэй 38.5%, эмэгтэй 61.5%)-д цусны даралт ихсэх өвчний эрт илрүүлэг үзлэг, үнэлгээ хийгдэж, 280 иргэнд цусны даралт ихсэх өвчин, түүний эрсдэлт хүчин зүйлийн талаарх эрүүл мэндийн боловсрол олгох сургалт зохион байгуулж, 578 иргэнийг зүрх судас, зүрхний шигдээс, мэдрэл, тархины харвалт, бөөр, хоол боловсруулах замын эмгэгийн нарийн мэргэжлийн эмч нарын үзлэгт хамрууллаа.

Мөн аяны хугацаанд хоёр аймгийн эрүүл мэндийн газар, түүний харьяа нэгдсэн эмнэлэг, сум дундын болон сум, баг, өрхийн 128 эмч, эмнэлгийн мэргэжилтнийг цусны даралт ихсэх өвчний Олон улсын болон Монгол улсын шинэчлэгдсэн эмнэлзүйн удирдамжийн сургалтанд хамруулж, цусны даралт ихсэх өвчний үеийн амьдралын зөв дадал зан үйл, эрүүл хооллолт, идэвхитэй дасгал хөдөлгөөний зөвлөгөө өгөх арга зүйгээр хангаж ажиллаа.

Аяны хүрээнд Хөвсгөл аймгийн Нэгдсэн эмнэлэгт цусны даралт хэмжиж, зөвлөгөө мэдээллээр хангах байнгын ажиллагаатай цусны даралтын эрүүл мэндийн булан байгуулан хүлээлгэж өглөө.

“Цусны даралт ихсэлтийн эсрэг аян-2018” ирэх 9 дүгээр сард Архангай Баянхонгор, Дорноговь аймаг, Замын-Үүд чиглэлд үргэлжлэх болно.

Оюу толгой ХХК анхны баяжмалаа экспортод гаргаж, монголын уул уурхайн салбарын түүхийн хуудсанд нэгэн шинэ, тод мөр эхлүүлсэний таван жилийн ойн баяр энэ өдрүүдэд тохиож байна. Өмнийн цэнхэр говьд бүтээн байгуулалт өрнүүлж, баялаг бүтээж, Монголын эдийн засагт дорвитой хувь нэмэр оруулан хөдөлмөрлөж буй Оюу толгой төслийн үе үеийн удирдагчид, тоног төхөөрөмжийг угсарч суурилуулан тохиргоо хийж, үр бүтээлтэй ажиллуулж ирсэн өндөр мэдлэг, чадвартай, сэтгэл зүтгэлтэй инженер техникийн ажилтнууд нийт уурхайчид Та бүхэндээ дэлхийн зах зээлд эрдэнэс илгээсэн түүхэн ойн баярын мэндийг өргөн дэвшүүлье.

Монгол улсын эдийн засгийн гол хөдөлгөгч хүч уул уурхайн салбарын тогтвортой хөгжлийн үзэл баримтлалыг хэрэгжүүлэх, хариуцлагатай, ил тод уул уурхайг хөгжүүлэхэд ижил төстэй үйл ажиллагаа явуулж буй Эрдэнэт үйлдвэр ХХК, Оюу толгой ХХК-ийн хамтын ажиллагаа нэн чухал. Ажилчдын эрүүл мэнд, аюулгүй ажиллагаа, байгаль орчин, орон нутгийн хамтын ажиллагааны стандартыг сайжруулах замаар Монгол улсын уул уурхайн салбарыг улам төгөлдөржүүлэхийн төлөө бид бодитой хамтран ажиллах учиртай. Тиймээс ч хоёр тал харилцан ойлголцлын санамж бичиг байгуулан тодорхой чиглэлд олон ажил зохион байгуулан хамтын ажиллагаагаа өргөжүүлж байгаа нь үр дүнд хүрч байна. Санамж бичгийн хүрээнд манай хоёр компанийн хэрэгжүүлж буй хөтөлбөр, мэдлэг, туршлагаа хуваалцах уулзалт, хэлэлцүүлэг, ажиллагсадын ур чадварыг хөгжүүлэх сургалтыг үе шаттай зохион байгуулахын зэрэгцээ хөдөлмөрийн аюулгүй ажиллагаа, ажиллагсадын эрүүл мэндийг хамгаалахад тулгарч буй асуудлуудыг мэргэшлийн өндөр түвшинд хэлэлцэж сайжруулах, шийдвэрлэх талаар зөвшилцөх зэргээр тэргүүн туршлагаа бусад аж ахуйн нэгж, байгууллагад харилцан солилцож, түгээн дэлгэрүүлэхэд хамтран ажиллаж байгаад бид талархалтай байдаг.

Манай хоёр компани олон мянган иргэнийг ажлын байраар хангахын зэрэгцээ Монголын уул уурхайн салбарт дэлхийн тэргүүлэх технологийг түүчээлж, компанийн соёлыг түгээн дэлгэрүүлж жишиг тогтоож буй нь нэгэн цагийн бахархал юм.

Монгол улсын ХХ зууны манлай бүтээн байгуулалт Эрдэнэт үйлдвэрийн нийт уурхайчдынхаа нэрийн өмнөөс болон хувиасаа Оюу толгойн ХХК-ийн баялаг бүтээгчдэд чин сэтгэлээсээ баяр хүргэж, ажлын амжилт, амьдралын сайн сайхныг хүсэн ерөөе. Уурхайчдын яруу алдар бадартугай.

Эрдэнэт үйлдвэр ХХК-ийн Ерөнхий захирал, Монгол улсын Аж үйлдвэрийн гавьяат ажилтан, Техникийн шинжлэх ухааны доктор (Sc.D) Х.БАДАМСҮРЭН

Үндэсний баяр наадмын амралтын өдрүүдэд эмнэлэг, эрүүл мэндийн байгууллагын ачаалал ихсэж, төрөл бүрийн хордлогот, халдварт өвчин, архаг хууч өвчин сэдрэх, осол гэмтэл ихсэх хандлагатай байдаг. Иймд НЭМГ-аас дараах зөвлөмжийг хүргүүлж байна.

-Архи дарснаас татгалзах, архигүй баяр тэмдэглэх
-Согтууруулах ундаа хэрэглэсэн бол жолооны ард суухыг хатуу цээрлэх, бусдад шаардлага тавьж сурах
-Хоол ундыг тохируулан хэрэглэх, муудсан хоол хүнс хэрэглэхээс сэргийлэх
-Хоол унд бэлтгэх болон идэхийн өмнө, бие зассаны дараа гараа сайтар угааж байх
-Ил задгай, баталгаагүй газраас хоол хүнс авахаас татгалзах
-Бага насны хүүхэд, өндөр настан, жирэмсэн эх, асаргаа сувилгаа шаардсан хүмүүст илүү анхаарал хандуулах, тэднийг ганцааранг нь орхихгүй байх, хараа хяналт тавих
-Наршилтаас сэргийлэх
-Гүнзгий гол, дуу цахилгаантай бороо, үер уснаас сэргийлэх
– Ахуйн осол гэмтлээс сэргийлэх
– Хол замд явах бол унааны бэлтгэл, найдвартай байдлыг хангах
– Хурд хэтрүүлэхгүй явах, суудлын бүс, даруулгыг хүн бүрт тохируулан хэрэглэх, суудлын тооноос илүү зорчигч тээвэрлэхгүй байх
-Гал түймрийн аюулаас сэргийлэх арга хэмжээг авах
-Гудамж, талбайд хүн ухаангүй буюу биеэ авч явах чадваргүй байгаа бол та яаралтай 103, 102 дугаарын утсанд мэдэгдэх, тусламж иртэл анхны тусламж үзүүлэх шаардлагатай хэмээн зөвлөж байна.

Өнгөрсөн амралтын өдөр буюу долдугаар сарын 7, 8-нд Нийслэлийн Налайх хотын баяр наадам болж өнгөрлөө. Барилдаанд улсын гарьд Ж.Бат-Эрдэнэ, Ш.Жаргалсайхан нарын тэргүүтэй улс, аймгийн алдар цолтой 256 бөх барилдсанаас Булган аймгийн Орхон сумын харьяат Хил хамгаалах ерөнхий газрын “Хилчин” спорт хороо, Хилийн цэргийн 0208-р тусгай салбар, “Кардыш” ХХК, “Булган хан” дэвжээний бөх аймгийн заан Булган-Эрдэнийн Түмэндэмбэрэл найм даван түрүүлж аймгийн арслан цол хүртлээ.

Архангай аймгийн Батцэнгэл сумын харьяат “Алдар” спорт хороо, Зэвсэгт хүчний 330-р анги, “Бест буйдан” ХХК-ийн бөх аймгийн харцага Батсүхийн Зоригтбаатар үзүүрлэж, аймгийн заан цолтон боллоо. Харин их шөвөгт Завхан аймгийн Цэцэн-Уул сумын харьяат “Хүч” спорт хороо, “Жем интернэйшнл” ХХК-ийн бөх аймгийн харцага Шагдарсүрэнгийн Чинтулга, Өвөрхангай аймгийн Зүүнбаян-Улаан сумын харьяат Их Монголын Хүчтэн дэвжээний бөх сумын заан Баасанцогтын Өлзийсайхан нар шалгарч Ш.Чинтулга харцага цолоо хоёр дахиа баталж, Б.Өлзийсайхан аймгийн харцага цолтон боллоо.

Баяр наадмын өдрүүдээр ихэнх нутгаар бороо хуртай байх тул болзошгүй үер ус, аянга цахилгааны аюулаас сэрэмжтэй байхыг Ус цаг уур, орчны хүрээлэнгээс малчид, иргэдийн анхааралд анхаарууллаа.

Маргааш ихэнх нутгаар, энэ сарын 11-нд төвийн аймгуудын ихэнх нутаг, говь болон зүүн аймгуудын нутгийн зарим газраар, 12-нд төв болон зүүн аймгуудын нутгаар, 13-нд төвийн аймгуудын нутгийн зүүн хэсэг болон зүүн аймгуудын нутгаар бороо орно. Дуу цахилгаантай. Салхи ихэнх хугацаанд секундэд 6-11 метр, 10,11-нд зарим газраар секундэд 13-15 метр хүрч ширүүснэ. Ихэнх хугацаанд нутгийн хойд хэсгээр сэрүүсч Дархадын хотгор, Монгол-Алтай, Хангай, Хөвсгөл, Хэнтэйн уулархаг нутаг, Завхан голын эх, Тэрэлж голын хөндий, Хүрэн бэлчир орчмоор шөнөдөө 1-6 градус, өдөртөө 11-16 градус, Эхийн голын Баянбүрд орчмоор шөнөдөө 16-21 градус, өдөртөө 29-34 градус, говийн бүс нутгийн өмнөд хэсгээр шөнөдөө 14-19 градус, өдөртөө 25-30 градус, бусад нутгаар шөнөдөө 7-12 градус, өдөртөө 18-23 градус дулаан байна. 13-нд ихэнх нутгаар дулаарна.

Монгол улс дэлхийн хөгжлийн чиг хандлагыг дагаж, иргэдийн оролцоогоор дамжуулан төр засгаас гарах шийдвэрт санал бодлоо тусгах боломж олгох “Зөвлөлдөх санал асуулгын тухай хууль”-ийг Улсын их хурлаас 2017 оны 2 дугаар сарын 9-ний өдөр батлан гаргаж, нарийвчлан зохицуулалт хийсэн.

Тус хуулийн дагуу 2017 онд анх удаа Монгол Улсын Үндсэн хуульд нэмэлт, өөрчлөлт оруулах асуудлаар орон даяар анхдугаар Зөвлөлдөх санал асуулга явуулж байсан бол энэ удаа Налайх дүүргийн нутаг дэвсгэрт нүүрс олборлосны улмаас иргэдийн эрүүл мэнд, амь нас хохирч, байгаль орчны тэнцвэр алдагдаж байгаа асуудлыг таслан зогсоох, хууль бус олборлолтын улмаас үүссэн ам, цооногуудыг дахин ашиглуулахгүй хаах асуудлаар тус дүүргийн оршин суугч, иргэдийн дунд зөвлөлдөх уулзалтыг 2018 оны 06 дугаар сарын 16-ны өдөр Налайх дүүрэгт зохион байгууллаа.

Налайх дүүргийн иргэдийн дунд зохион байгуулсан зөвлөлдөх санал асуулгыг хуулийн хүрээнд хоёр үе шаттайгаар Нийслэлийн Засаг даргын захирамжаар батлагдсан ажлын хэсэг амжилттай зохион байгуулав.

Нэгдүгээр үе шатны санал асуулгыг түүврийн аргаар сонгогдсон 940 өрхөд Үндэсний Статистикийн хорооноос бэлтгэгдсэн судлаачид биечлэн очиж авсан бол хоёрдугаар үе шатны зөвлөлдөх уулзалтад эхний санал асуулгад оролцсон иргэдийн 50% буюу 470 өрхөд урилга хүргүүлснээс 278 иргэн хүрэлцэн ирж тухайн асуудлын талаар үнэн зөв, тэгш мэдээлэл авсныхаа дараа дахин саналын хуудас бөглөж оролцов.

Зөвлөлдөх уулзалтад оролцсон иргэдийн санал асуулгын нэгдсэн дүн, мэдээ тайланг Үндэсний статистикийн хороо нэгтгэн гаргаж, зөвлөлдөх зөвлөлийн гишүүдэд хүргүүлснээр Зөвлөлдөх зөвлөлийн бүрэлдэхүүн тайланг үндэслэн “Зөвлөмж”-ийг боловсруулж Монгол улсын Засгийн газрын Хэрэг эрхлэх газар хүргүүлж, Нийслэлийн Засаг даргын Зөвлөлийн хуралд танилцууллаа гэж нийслэлийн Байгаль орчны газраас мэдээллээ.

Үндэсний их баяр наадмыг тохиолдуулан цагдаагийн нийт бие бүрэлдэхүүн өнөөдрөөс өндөржүүлсэн бэлэн байдалд шилжлээ. Тодруулбал, Хүй долоон худаг, Төв цэнгэлдэх хүрээлэн, Сурын талбайд гадаад дотоодын зочид төлөөлөгчид, ард түмний аюулгүй байдлыг хангаж, гэмт хэргээс урьдчилан сэргийлж, иж бүрэн камержуулах, иргэдийн үнэмлэх мандатаар нь нэвтрүүлэх, цэнгэлдэх дотор ямар зохион байгуулалтай байлгах вэ, ард түмний дунд маргаан дагуулдаг бөхийн барилдааныг дэс дараатай бичиж баримтжуулах гэх мэт ажлуудыг зохион байгуулалттай хийнэ. Мөн хурдан морины гараанаас бариа хүртэлх зайг бүрэн камержуулсан байна.

Мөн хурдан морины салбар хорооноос хүүхдийн аюулгүй байдал, замын аюулгүй байдал, морьдын аюулгүй байдлыг хангах зэрэг арга хэмжээг авч хэрэгжүүлнэ. Хамгийн холын зай 25 км-ээс бариа хүртэл камержуулах, хяналтын бичлэг хийхээр болсон. Энэ нь бүртгэгдээд гарсан морьдыг маршрутаар явуулах, санаатай, санаандгүй байдлаар хүүхэд унагадаг зэрэг зөрчлүүдийг илрүүлэх боломжтой аж.

Улсын их баяр наадмаас өмнө ил задгай утастай шонг цэгцлэхээр болжээ. Тодруулбал, Улаанбаатар хотын нийтийн эзэмшлийн гудамж, зам талбайд төвийн зургаан дүүргийн хэмжээнд 55 мянган гэрэлтүүлэг, 46 мянган ширхэг гэрэлтүүлгийн шонд 13 аж ахуйн нэгж ашиглалт засвар үйлчилгээг хариуцан ажиллаж байна. Эхний шатны тооллогоор 1800 гаруй таггүй задгай холболттой шон байна гэж мэдээ ирүүлсэн аж.

Нарийвчилсан самналт явуулахад гэр хороолол болон орон сууцны хороолол, нийтийн эзэмшлийн газарт таггүй задгай холболттой 2640 шон байсан байна. Өнөөдрийн байдлаар 1693 шонг засварлан тагжуулж, 65 хувийн гүйцэтгэлтэй байгаа тухай албаныхан мэдээлжээ. Шонгийн таг нь төмрөөр хийсэн байдаг учир хулгайд алдагдах нь их учир жил бүр тагжуулах ажлыг хийдэг. Мөн Улаанбаатар хотын шуурхай удирдлагын зохицуулалтын төвийн 310005 дугаарын утсаар 24 цагийн турш дуудлага хүлээн авч байгаа юм. Дуудлагын дагуу, иргэдийн сошиалаар ирүүлсэн гомдлыг тухай өдөрт нь шийдвэрлэж зөрчлийг арилгаж байгаа ажээ.

Таиландын аврагчид үерт автсан Кхао Луанг гэдэг агуйд боогдоод байгаа 13 хүнээс 4 хүүхдийг гаргаж чадсан байна. Хүүхдүүд болон тэдний дасгалжуулагч багш уг агуйд хоёр долоо хоног гаруйн турш байсан юм.

Аврах ажиллагааг удирдаж буй Наронгсак Осоттханаконы мэдэгдсэнээр, хүүхдүүдийг эмнэлэгт хүргэсэн байна.

Харин тэрбээр бусад хүүхдүүд болон дасгалжуулагчийг хэзээ агуйгаас гаргаж авах боломжтой талаар тодорхой зүйл хэлсэнгүй. Аврах ажиллагааны дараагийн үе шат 10-20 цагийн дараа эхэлж магадгүй байгаа бөгөөд тухайн үеийн нөхцөл байдлаас шалтгаалах аж. Учир нь, агуйгаас гарах замын дагуу байрлуулсан хүчилтөрөгчийн баллонуудыг солих шаардлагатай байна.

Наронгсак Осоттханаконы ярьснаар, аврах ажиллагаанд гадаадын 50, Таиландын 40 шумбагч оролцож байгаа аж.

Болсон явдлын тухайд сануулан дурдахад, үндэсний цэцэрлэгт хүрээлэнгийн ажилтнууд 6 дугаар сарын 23-ны өдөр Кхао Луанг агуйн аман дээр нэг мотоцикл, хэд хэдэн унадаг дугуй болон спортын хэрэглэл байсныг олжээ. Тэд орон нутгийн хөл бөмбөгийн клубтэй холбогдон лавлахад, эдгээр мотоцикл, унадаг дугуй, спортын хэрэглэлүүд нь 12 сурагч ба тэдний дасгалжуулагчийнх мөн гэдгийг нотолсон байна. Хүүхдүүд болон тэдний дасгалжуулагчийн хоргодож буй агуй нь 10 км урт, хэд хэдэн амтай ба дотроо том хонгилуудтай учраас үерийн уснаас зугтан хоргодох боломжтой гэнэ.