Month: June 2018

НМХГ-аас энэ оны эхний хагас жилд үйлдвэрлэлийн болоод барилгын, өргөгч техникүүдэд гарсан ослын талаар мэдээллээ. Он гарсаар барилгын салбарт нийт найман осол гарч, таван хүн нас баржээ. Өргөх механизмын угсралтын болон ашиглалтын аюулгүй ажиллагааг хангаагүйн улмаас дөрөв осол гарч, 10 хүн гэмтсэн гэдгийг Мэргэжлийн хяналтын байцаагчид хэлж байна.

Хөдөлмөр аюулгүй байдал, эрүүл ахуйн хууль, дүрэм журам, стандарт хангаагүйн улмаас сүүлийн дөрвөн жилд нийт 140 осол гарчээ. Үүний 64 буюу 45.7 хувь нь барилгын, 9 буюу 6.5 хувь нь эрчим хүчний, 24 буюу 17.5 хувь нь уул уурхайн, 24 буюу 17.5 хувь нь хүнсний салбарт гарсан байна. Эдгээр ослын шалтгааны 35 хувийг тээврийн хэрэгсэл, барилга, шатнаас унах, 30 хувийг унаж буй эд зүйлд цохиулах, барилга, байшинд дарагдах, 7.5 хувь нь цахилгаан гүйдэлд цохиулах, таван хувь нь түлэгдэлт, 12.5 хувь өргөх зөөх механизмын ажиллагаанаас шалтгаалан гарсан осол эзэлжээ.

Осол гарахад нөлөөлдөг хүчин зүйлийн 15 хувь нь удирдлагын тогтолцооноос шалтгаалдаг байна. Уг нь байгууллагууд төсвийнхөө 1.5 хувиас доошгүй аюулгүй байдлыг хангахад зарцуулах ёстой ажээ.

Сэлэнгэ аймгийн Сүхбаатар сумын Цагаан эрэг баг Орхон голд хоёр хүн амиа хорлох гэж байна гэх дуудлагыг аймгийн Цагдаагийн хэлтэс хүлээн авчээ. Дуудлагын дагуу Орхон гол дагуу голын усанд иргэд осолдохоос урьдчилан сэргийлэх эргүүл, шалгалт, ухуулга сурталчилгааны үүрэг гүйцэтгэж байсан Сэлэнгэ аймгийн Онцгой байдлын газрын Эрэн хайх аврах ангийн бүлгийн дарга ахмад М.Ганбаатараар ахлуулсан таван алба хаагч ослын газар шуурхай очсон байна. Энэ үед Сэлэнгэ аймгийн Сүхбаатар сумын харьяат иргэн 24 настай Г, 24 настай Б нар нь согтууруулах ундааны зүйл хэрэглэж, биеэ авч явах чадваргүй усанд живж байсныг уснаас эсэн мэнд гаргажээ.

Иргэдийн аялал, амралтын улирал эхэлж гол мөрний дагуу олноор амрах, архи, согтууруулах ундааны зүйл хэрэглэсэн үедээ гол нуурын усанд орох, бага насны хүүхдийг хараа хяналтгүй гол нуурын эрэг дагуу тоглуулах, тухай гол мөрний гүн, урсацын хурдыг тооцоогүйгээс гол мөрний усанд осолдох тохиолдол нэмэгдэх хандлагатай байгаа тухай албаныхан мэдээлж байна.

Австралийн уул уурхайн салбарт тэргүүлэгч “Хаан Электрикал Контрактинг” болон “Говь Инфрастракчер Партнерс” компанийн хамтын хөрөнгө оруулалттай “Хаан Электрикал Монгол” компанийн уул уурхайн эрчим хүчний салбарын завсар, үйлчилгээ, агуулахын төвийн нээлт Улаанбаатарт боллоо. Энэ төв нь барууны стандартад бүрэн нийцсэн гэдгээрээ онцлог юм.

Нээлтэд, Австрали улсаас манай улсад суугаа Элчин сайд Жон Лангтри оролцсоноос гадна компанийн удирдлагууд, харилцагч байгууллагуудын төлөөлөл оролцжээ.

Австралид үзүүлдэг засвар, үйлчилгээ, бүтээгдэхүүний чанар, стандартыг Монгол Улс болон Төв Азийн бүсэд анх удаа нэвтрүүлж буй нь энэ аж. Австралийн талаас бүтээн байгуулалтад ойролцоогоор 500 орчим сая ам.долларын хөрөнгө оруулалт хийжээ.

Засварын төвийн гол бүтээгдэхүүн нь гүнийн уурхайн цахилгаан, машин тоног төхөөрөмжийн тэжээлд ашигладаг трэйлин кабель шинэчлэл юм. Өмнө нь кабелийн утас эвдэрч гэмтэхэд засварлах төв Монголд байхгүйгээс ихэнхдээ гадагшаа явуулж, эсвэл шинээр худалдан авдаг байжээ. Харин одоо уг засварын төвөөр дамжуулан дотооддоо засварлах боломжтой болж байгаа юм.

“Хаан Электрикал Монгол” ХХК-ийн гүйцэтгэх захирал Ц.Баянзул хэлэхдээ, “Манай компанийн ашиглалтад оруулж буй засварын төв нь уул уурхайн салбарт өргөн ашигладаг цахилгаан тоног төхөөрөмжийн тэжээлийн кабелийг засварлах зориулалттай юм. Энэхүү кабелийн засварын төв нь Монголдоо төдийгүй төв Азидаа анхдагч гэдгээрээ давуу талтай. Бид цаашид тус засвар үйлчилгээний төвөө олон монгол залуусын барууны стандартаар цахилгаан эрчим хүчний салбарт ажиллаж чадах түшиц газар болгохын төлөө ажиллана” гэв. Харин хөрөнгө оруулагч “Хаан Электрикал Контрактинг” Гүйцэтгэх захирал Крейг Хаан,“Бидний хувьд Монгол Улсын зах зээлд ажиллаад нэг жил болж байна. Үйлчилгээг Монголын зах зээлд нэвтрүүлснээруул уурхайн компаниудын хувьд маш их зардал хэмнэх боломжтой”хэмээлээ.

Дашрад дурьдахад, засварын төвд 20 гаруй монгол залуус ажиллах бөгөөд дэлхийн стандартад нийцсэн үйлчилгээ үзүүлэх юм.

М.Сувд

Бөхийн өргөөний маргаанаасболоод бөхчүүд хоёр хуваагдаад байгаа. Өчигдрийн болсон хэргийн дараа А.Сүхбат аваргатай цөөн хором ярилцсан юм.

-Хүмүүс наадмыг хүсч хүлээж байгаа. Хэзээнээс эв зүйгээ олж, төрийн наадам зүй ёсоороо болох вэ?

-Шударга л байя. Шударга тэмцээнийг бий болгоё. Шударгаар барилдааныг шүүж, начны найрааг зогсооё. Ийм авилгал, хээл хахууль болсон, нутаг усаа харж буруу шүүлт явуулсан бөх үзэхийг бид хүсээгүй.

-Б.Бат-Эрдэнэ аварга та хоёрын хооронд асуудал байна гэж интернет орчинд мэдээлэл их гараад байна. Тэр талаар мэдээлэл өгөөч?

-Б.Бат-Эрдэнэ аварга бид хоёрын барилдаж байсан он жилүүдэд сайхан байсан.. Амжилтын төлөө, тэргүүн байрын төлөө шударга өрсөлдөж байлаа. Барилдааны хувьд ямар ч асуудал байгаагүй. Хамгийн гол нь үзэл бодлын зөрүү харагдаж байсан. Миний хувьд шударга л байх хэрэгтэй. Аливаа зүйлийг Бөхийн өргөөнд тайланд ч гэдэг юм уу, Бөхийн холбоотой уялдаатай энэ асуудлыг бол ард түмэндээ зөв л тайлагнаж байх ёстой. Аливаа нэг бүлэглэл үүсгээд, нууц байдалд оруулаад, хуйвалдаад байвал хүмүүс дургүйцдэг юм байгаа биз дээ. Энийг л хэлээд байгаа юм.

-Сумогийн дэлхийн аваргад нэр дэвшиж байхад таныг бас явуулаагүй. Оронд нь Отгон эгчийг явуулж байсан гэсэн?

-Тэр бол өөрийгөө дөвийлгөж, хэт дээш нь гаргах байдлаас л үүссэн гэж үздэг. Тухайн үед хохирсон, эрхээ хасуулсан юм.

-Та хэвлэл мэдээллийн вэб сайтуудаар ерөнхийлөгчид хүсэлт гаргасан. 14:00 цагаас Бөхийн өргөөг хүчээр авна гэсэн мэдээллүүд тавигдсан байгаа. Одоо 14:00 цаг болчихлоо?

-Энэ тэмцлийн хэлбэр гэж үзэхээс өөр аргагүйд хүрч байна. Хууль ёсны нөхдүүд нь хаалга үүдээ нээгээгүй байж хууль бус нөхдүүдтэй хуйвалдаад байгаа шүүх цагдаагийхныг юу гэж хэлэх вэ. Үүнийг л та бүхэн гаргаад ир. Бид та бүхэнд улсын бүртгэлийн гэрчилгээ, тамга тэмдэг, гаргасан тушаал шийдвэрүүдийг бүгдийг нь үзүүлнэ бэлэн байгаа. Бид цаанаа Б.Бат-Эрдэнэ гэдэг хүний бусармаг үйл ажиллагаа, хуйвалддаг энэ байдлаас нь тасрахгүй байна. Монголын үндэсний бөхийн холбоо бол монгол бөхчүүдийн өмч. Монгол бөхийн өргөө монголын ард түмэн, монгол бөхчүүдийн өмч. Одоо яах гээд байгаа юм? Үйл ажиллагаа явуулах гэхээр бөхийн өргөө булаацалдаж байгаа мэдээлэл ийм байдал үүсгэж, ард иргэдэд буруу ташаа мэдээлэл хүргэж ойлгуулаад байдаг юм.

-Хамгаалалт өчигдөр буусан гэж байна. Одоо шууд яваад орох боломж байхгүй юу?

-Та нар одоо хар ямар хүмүүс дотор нь явж байна, ямар үйл ажиллагаа явуулж байгааг. Наадуул чинь дотроо зураг аваад бичлэг хийгээд л сууж байгаа. Дотор нь тэр хууль бус нөхдүүд бүгд байгаа. Магадгүй энэ зоорийн давхартаа Аварга дээд сургуулийн олон оюутнууд оруулчихсан ч байж магадгүй. Ийм л байдалтай наадуул чинь үхэн хатан зүтгэдэг. Хоёр талаасаа гэрээ хийгээд, хэл амаа ололцоод цааш явъя гэхээр түүнээсээ буцдаг. Гарангуутаа хэвлэлийн бага хурал хийгээд буруу ташаа мэдээлэл өгдөг. Тэгэхээр чинь яаж хүнд итгэж ажиллах юм бэ.

-Өмнө нь таныг хэнийг ч оруулахгүй гэж тохирч байсныг бид сонсон.

Хоёр талаасаа зөвшөлцөөд, гэрээ байгуулаад, үйл ажиллагаа явуулъя, хоёр талаасаа бүрэлдэхүүнээ сонгоё гэж тохирсон. Г.Өсөхбаяр аварга бид хоёрын хувьд тохирсон. Г.Өсөхбаяр аварга үүн дээр маш сайхан нийцтэй хандсан. Тэгээд Б.Бат-Эрдэнэ аварга дээр очихоороо л өөр болчихдог. Эмх замбараагүй байдлыг үүсгэдэг, үл ойлголцлыг төрүүлдэг, буруу ташаа мэдээлэл явуулдаг. Ийм л болчихоод байна.