Month: May 2018

Нийслэлийн эдийн засаг, нийгмийг 2018 хөгжүүлэх зорилтын хүрээнд Улаанбаатар хотын Ерөнхий менежерийн 2018 оны А/131 дүгээр тушаалын дагуу Улаанбаатар хотын Захирагчийн ажлын албанаас нийслэлийн гэр хорооллын хөрсний бохирдлыг бууруулахад иргэдийн оролцоог нэмэгдүүлэх зорилгоор зургаадугаар сарын 1-нээс аравдугаар сарын 1-н хүртэл “Жорлонгоо ариутгаж-Хөрсөө хамгаалъя” уриатай аяныг зарлаж байна.

Нүхэн жорлонгийн бохирыг задалж, үнэр дарах, нянгийн бохирдлыг бууруулах, хөрсний үржил, шим тэжээлийг нэмэгдүүлэх зориулалттай амьд бактери бүхий био бэлдмэлийг гэр хороодын дэлгүүр, худалдааны төвүүдээр борлуулах, иргэд өөрсдөө нүхэн жорлонгоо ариутгаж, нянгийн бохирдлоос урьдчилан сэргийлэх дадал зуршилд хэвшүүлэх, нүхэн жорлонгоос үүдэх суурьшлын бүсийн хөрсний бохирдлыг бууруулахад энэхүү аяны зорилго оршино. Нийслэлийн 9 дүүргийн нийт гэр хороод болон зуслангийн бүсийн бүх айл өрх хамрагдах юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Хүүхдийн оролцох эрхийг хангах, хүүхэд өөрийн эрх ашигт нөлөөлж байгаа аливаа асуудлаар шийдвэр гаргах үйл явцад сайн дурын үндсэн дээр оролцох бололцоог бий болгохын тулд Нийслэлийн Хүүхдийн төлөө зөвлөлөөс 2017 оны 05 дугаар сарын 30-ний өдрийн 03 тоот тогтоолоор жил бүрийн 5 дугаар сарын сүүлийн 7 хоногийн Лхагва гарагийг Нийслэлийн “Хүүхдээ сонсох” өдөр болгон тэмдэглэж байх шийдвэр гарсан.

Шийдвэр гаргах түвшинд хүүхэд үзэл бодол, дуу хоолойгоо илэрхийлэх, мэдээлэл авах, эвлэлдэн нэгдэх эрхээ эдлэх боломжийг ханган зорилгоор “Хүүхдээ сонсох өдөр” форум 2018 оны 05 сарын 30-ний өдөр Нийслэлийн Иргэний танхимд 09:00 цагаас зохион байгуулагдлаа.

Нийслэлийн Хүүхдийн төлөө зөвлөлийн гишүүд, дүүргийн хүүхдийн элч нар, Нийслэлийн хүүхдийн холбоо, дүүргүүдийн хүүхдийн төлөөлөл оролцон хүүхэд нэг бүрийн сайн сайхны төлөө эвлэлдэн нэгдэж, хүүхдийн өсөж торниж байгаа бүхий л орчныг хүүхэд нэг бүрт ээлтэй болгох, хүүхдийн эрх, хөгжлийн чиглэлээр цаашид хамтран ажиллах чиглэлээ тодорхойлоо

Шийдвэр гаргах түвшинд хүүхэд үзэл бодол, дуу хоолойгоо илэрхийлэх, мэдээлэл авах, эвлэлдэн нэгдэх эрхээ эдлэх боломжийг хангах үүднээс дүүрэг бүр хүүхдийн чуулганаа хийж хүүхэд бүрээс гарсан санал санаачлагаа танилцуулахаар дүүргээ төлөөлөн оролцов.

Нийслэлийн Хүүхэд, гэр бүлийн хөгжлийн газраас Хүүхдийн эрхийн конвенци, Хүүхдийн хөгжил, хамгааллын үндэсний хөтөлбөрийн хэрэгжилтийг хангах ажлын хүрээнд нийслэл дэх асрамж, халамжийн төвд амьдарч буй хүүхдүүдийн хууль эрх зүйн мэдлэгийг нэмэгдүүлэх, тэднийг эрх үүргээ мэддэг өв тэгш иргэн болгон төлөвшүүлэх зорилготой “Миний эрх үүрэг” сэдэвт 2 сарын аяныг 03 дугаар сарын 25-05 дугаар сарын 25-ний хооронд зохион байгуулсан. Аянд нийслэлд үйл ажиллагаа явуулдаг 17 байгууллагын 27 төв идэвхитэй хамрагдлаа. Аяны хүрээнд олон ажил зохион байгуулсан бөгөөд “ХҮҮХДЭД ЧИГЛЭСЭН ҮЙЛ АЖИЛЛАГАА ИЙМ Л БАЙГААСАЙ” Хүүхдүүдийн дундах эссэ бичлэгийн уралдаанд шалгаран гарсан хүүхдүүдэд шагнал гардууллаа

Хүүхдийн насны онцлогт тохирсон хөгжлийг дэмжих дэд хөтөлбөрийг хэрэгжүүлэх хүрээнд Нийслэлийн Засаг даргын нэрэмжит тэтгэлэгт хөтөлбөрийн уралдааныг багш, нийгмийн ажилтны чиглэлээр суралцаж байгаа оюутан залуусын дунд 2 үе шаттай зохион байгуулж нийт 98 хүн оролцсоноос 15 оюутан шалгарч Нийслэлийн Засаг даргын нэрэмжит тэтгэлэгт хөтөлбөрт хамрагдсан оюутануудад батламж гардууллаа.

Баянзүрх дүүрэг энэ оныг ‘’Хүүхдийн хөгжлийн жил’’ болгон зарласан билээ. Иймд Олон улсын хүүхдийн баярыг тохиолдуулан дүүргийн Төрийн захиргааны удирдлагын хэлтсийн албан хаагчид хандив цуглуулж, сайн үйлсийн аян өрнүүлсэн байна. Тухайлбал дүүргийн алслагдсан 20 дугаар хороонд буюу Гачууртад үйл ажиллагаа явуулдаг 63 дугаар цэцэрлэгт ‘’Даралтат хөгжим’’, ‘’Өсгөгч’’-ийг бэлэглэсэн юм.

Тус цэцэрлэгт 300 орчим хүүхэд хүмүүждэг бөгөөд энэ үеэр цэцэрлэгийн эрхлэгч Н.Энхцэцэг ‘’Манай цэцэрлэгт нэн шаардлагатай байсан ‘’Өсгөгч’’, ‘’Даралтат хөгжим’’-ийг бэлэглэж хүүхдийн боловсрол, хүмүүжлийн үйл ажиллагаанд идэвх санаачлагатай оролцож байгаа тус хэлтсийн хамт олонд гүнээ талархаж буйгаа илэрхийлсэн’’ юм.

БСШУСЯ-ны ивээл дор Монголын балетын хөгжил сан, Нийслэлийн соёл урлагийн газрын дэмжлэгтэйгээр Монгол Улсад анх удаа балетын олон улсын анхдугаар тэмцээнийг тавдугаар сарын 29-нөөс зургадугаар сарын 01-ний өдрүүдэд зохион байгуулж байна. Энэхүү олон улсын тэмцээний салхийг хагалж Монголын үндэсний балетын хоёрдугаар уралдаан болж өчигдөр шилдгүүдээ тодруулжээ. Харин өнөөдөр Балетын олон улсын анхдугаар уралдаан нээлтээ хийж байна. Үүнтэй холбогдуулан өнөөдөр уг тэмцээнийг зохион байгуулагчид болон шүүгчид хэвлэлийн бага хурал хийлээ. Хэвлэлийн бага хуралд Олон улсын балетын тэмцээн зохион байгуулах хорооны удирдах зөвлөлийн гишүүн, Монголын балетын хөгжил сангийн тэргүүн, Монгол Улсын гавьяат жүжигчин Д.Алтанхуяг, БСШУСЯ-ны Соёл, урлагийн газрын мэргэжилтэн З.Баянзул, ДБЭТ-ын уран сайхны удирдаач Б.Түвшинбат, БНХАУ-ын Шанхайн урлагийн төвийн захирал хатагтай Кати Вон нар болон тэмцээний шүүгчид оролцсон юм.

Монголын Балетын олон улсын анхдугаар уралдааныг Монгол, БНСУ, БНХАУ, ХБНГУ, Япон, Сингапур гэсэн зургаан орны олон улсад нэр алдартай 11 шүүгч шүүх ажээ. Тэмцээний ерөнхий шүүгчээр Монгол Улсын хөдөлмөрийн баатар, ардын жүжигчин, төрийн шагналт Б.Жамьяндагва ажиллах нь. Харин тэмцээнд долоон улсын 80 гаруй хүүхэд залуус өрсөлдөж байгаа юм байна. Балетын олон улсын анхдугаар тэмцээн сонгодог болон орчин үеийн гэсэн хоёр төрлөөр, 12-14, 15-18, 19-29 гэсэн гурван насны ангиллаар зохиогдох юм. Монгол Улсад анх удаа олон улсын балетын тэмцээн зохион байгуулж буй нь балетын урлагаар хичээллэж байгаа олон олон хүүхэд багачууд, мэргэжлийн бүжигчид өөрийн ур чадварыг дүгнэх, харьцуулах, бусад олон тэмцээнд оролцох анхны туршлага нь болох, багш, дасгалжуулагч нарын ур чадвар нэмэгдэх, тухайн салбарын мэргэжилтнүүдийн хувийн ур чадвар нэмэгдэх олон талын ач холбогдолтой гэдгийг санаачлагч, зохион байгуулагчид нь хэлж байна.

Үүнээс гадна соёлын аялал жуулчлалын бас нэгэн шинэ төрлийг бий болгох давуу талтай гэдгийг ч онцоллоо. Учир нь энэхүү тэмцээний нэр хүнд өсөхийн хэрээр оролцогчдын тоо нэмэгдэх үүнийг дагаад аялал жуулчлалд тодорхой хугацааны дараа нөлөөлөх боломжтой гэж төсөөлж байгаа юм байна. Балетын олон улсын тэмцээн цаашид Монгол Улсад хоёр жил тутамд зохион байгуулагдана. Энэ жилийн анхдугаар тэмцээний Гранпри шагналын эзэн 4250 ам.доллар, алтан медалийн эзэн 1500 ам.доллар, мөнгөн медалийн эзэн 1000 доллар, хүрэл медалийн эзэн 800 ам.долларын шагнал хүртэх юм байна. Мөн шилдгээр тодорсон балетчид ирэх зургадугаар сарын сүүлээр БНСУ-д, наймдугаар сард БНХАУ-ын Шанхай хотод болох балетын олон улсын тэмцээнүүдэд оролцох боломж нээгдэх ажээ.

Сүхбаатар дүүргийн нутаг дэвсгэрт байрлах “Амила” цэцэрлэгийн багш хүүхэд зодож ёс зүйн алдаа гарган ажлаасаа халагджээ. Тодруулбал, тус цэцэрлэгийн багш Г.Анхтуяа нь энэ оны тавдугаар сарын 28-ны өдөр бага насны хүүхдийг чирч зодон багшийн ёс зүйн алдаа, үйлдэл гаргасан байна. “Амила” цэцэрлэгийн зөвлөлийн шийдвэрээр түүнийг ажлаас нь халж, багшаар ажиллах эрхийг нь хасах саналыг Багшийн мэргэжил дээшлүүлэх институтад хүргүүлсэн аж.

Ёс зүйн алдаа гаргасан багшийг ажлаас нь чөлөөлсний дараа тус цэцэрлэгийн зөвлөл “Цаашид Амила цэцэрлэг нь 2018-2019 оны хичээлийн жилээс камерийн нэгдсэн хяналтын системд оруулж оператор бүх салбар нэгжийн өдөр тутмын үйл ажиллагаанд хяналт тавьж мониторинг хийгдэх болсныг мэдэгдье” гэжээ. Түүнчлэн нийт эцэг эхчүүдээс уучлал хүсч байгаагаа илэрхийлсэн байна.

Гэтэл цахим орчинд нэгэн ээж тус цэцэрлэгийн талаар бичихдээ “Сүүлийн хэдэн сар шөнө миний хоёр настай бяцхан охин дандаа уйллаа. Уйлахдаа хүн цохиод авч байна уу гэмээр чарлаж уйлаад тайвширдаггүй болсон. Гэтэл “Амила” цэцэрлэгийн багш Ганболдын Анхтуяа зодож цохиод, чирч гудчиж харанхуй өрөөнд оруулж байгаа бичлэгийг өчигдөр буюу тавдугаар сарын 28-нд олж үзлээ.

Анхтуяа багшийн хүүхэд зодох зөрчлийг өмнө удаа дараа гаргаж түүнд сануулж байсан талаар эрхлэгч н.Солонго хэлсэн. Өөрөөр хэлбэл “Амила” цэцэрлэг нь хүмүүжиж байгаа хүүхдийн бие махбодод халдаж буй талаар мэдэж байсан атлаа Анхтуяа багшийг үргэлжүүлэн ажилуулсан нь тус цэцэрлэгт хүмүүжиж буй хүүхдийн аюулгүй орчинд амьдрах, аливаа хүчирхийллээс ангид байх эрхийг ноцтой зөрчсөн байна. Би маш их гомдолтой байна. Охиноо яаж сэтгэл санааны хямралаас гаргах вэ?” гэжээ.

Монгол Улсын “Автотээврийн өөрөө явагч хэрэгслийн албан татварын тухай хууль, Агаарын бохирдлын төлбөрийн тухай хууль”-ийн дагуу автотээврийн болон өөрөө явагч хэрэгслийг эзэмшиж байгаа хувь хүн, хуулийн этгээд албан татвар төлдөг.

Хуульд хувь хүн автотээврийн болон өөрөө явагч хэрэгслийн албан татварыг жилд нэг удаа тухайн жилийн зургадугаар сарын 01-ний дотор төлөх үүрэгтэй бол албан байгууллага, аж ахуйн нэгж эхний хагас жилээр албан татварыг төлөх ба жилийн албан татварыг урьдчилан төлөх боломжтой гэж заасан байдаг.

Уг хуулийг хэрэгжүүлэх, иргэдэд банкинд дараалал үүсгэж цаг хугацаа алдахгүй байх боломжоор хангах зорилгоор автомашины улсын дугаарын сүүлийн оронгоос хамаарч төлөх шинэчилсэн журмыг Нийслэлийн ИТХ-ын Тэргүүлэгчдийн 2015 оны 01-р сарын 26-ны өдрийн 28 дугаар тогтоолоор баталсан.

Журмын дагуу жолооч таны автомашины улсын дугаар:
1, 6 тоогоор төгссөн бол нэгдүгээр сард
2, 7 тоогоор төгссөн бол хоёр дугаар сард
3, 8 тоогоор төгсссөн бол гуравдугаар сард
4, 9 тоогоор төгссөн бол дөрөвдүгээр сард
5,0 тоогоор төгссөн бол тав дугаар сард албан татвар, төлбөр хураамжаа төлнө.

Хэрэв заасан хугацаанд татвараа төлөөгүй тохиолдолд Замын цагдаагийн алба нь өөрийн эрх хэмжээ, хуулийн хүрээнд авто тээврийн эзэмшигчдэд хариуцлага тооцож, замын хөдөлгөөнд оролцуулахгүй байх хүртэл холбогдох хуулийн дагуу арга хэмжээ авах юм. Тиймээс та хуулийн хугацаа дуусахаас өмнө тээврийн хэрэгслийн албан татвар, агаарын бохирдлын төлбөр, автозам ашигласны төлбөрөө төлөхийг холбогдох албаныхан анхаарууллаа.

Тээврийн хэрэгслийн албан татвар, төлбөр төлөхөд ердөө гурван минут л хангалттай болсон. Тээврийн хэрэгсэл эзэмшигч та тээврийн хэрэгслийн нэгдсэн цахим үйлчилгээний /www.smartcar.mn/ цахим хуудасаар нэвтэрч, QPay үйлчилгээг ашиглан төлөх боломжтой.

Албан татвар, төлбөр төлсөн баримт таны и-мэйл хаягруу автоматаар илгээгдэх юм. Татвар төлөгч та тухайн баримтыг хэвлэж, тээврийн хэрэгслийн гэрчилгээнд хавсаргана. Ингэснээр аливаа банкинд оочирлох, татвар хураах цэгт очин тамга даруулах зэрэг цаг заваа хэмнэх боломжтой юм. Хэрэв та онлайнаар төлөх боломжгүй бол өөрт ойрхон банкинд албан татвар, төлбөрөө төлж, төлсөн баримтаа өөр ойрхон татвар хураах дурын цэгт очин тамга даруулан баталгаажуулаарай.

БНСУ-ын Соёл, спорт, аялал жуулчлалын яамнаас санаачлан Монголын БСШУСЯ-тай хамтран Увс аймгийн Улаангом сумын Цогцолбор нэгдүгээр болон Хяргас, Өлгий, Баруунтуруун сумдын сургуулиудад “Баярлалаа, бяцхан номын сан” байгуулж өглөө. “Баярлалаа, бяцхан номын сан” төсөл нь 2007 оноос хойш БНСУ-ын ССАЯ-аас явуулж ирсэн боловсролын хөгжлийн албан ёсны тусламжийн төсөл юм байна.

Өнгөрсөн баасан гарагт болсон уг номын сангийн нээлтийн үйл ажиллагаанд БНСУ-ын Соёл, спорт, аялал жуулчлалын яамны төлөөлөл, БСШУСЯ-ны төлөөлөл, аймгийн удирдлагууд, төсөл хэрэгжсэн сургуулиудын удирдлага болон сурагчид оролцлоо. Энэ үеэр номын сангийн нээлтийг угтаж зохион байгуулсан уралдаан тэмцээний шагналыг гардуулан өгч, Цогцолбор 1-р сургуулийн бяцхан номын сантай танилцсан юм. Тус төслийн зүгээс номын санд боловсролын системд хэрэгтэй 1700 номыг хандивласан байна. Бяцхан номын сан гэсэн орчинд сурагчид монгол орчуулгатай солонгос ном, англи хадмалтай хүүхэлдэйн кино үзэх боломжтой аж. Мөн компьютер, проектор, дэлгэц, принтер, ширээ сандал зэрэг зүйлсээр номын санг тохижуулсан байна. Алс хязгаар аймгийн дөрвөн сургуульд ийнхүү бяцхан номын сан байгуулж өгсөнд Увсын хүүхэд багачууд баярлаж талархаж байгаагаа нээлтийн үеэр хэлж байв.

НИТХ-ын төлөөлөгч, “Хан-Уул хөгжил” сангийн тэргүүн Пүрэвийн Батчимэг хүүхдийн баярын өдрийг тохиолдуулан нийгмийн эмзэг бүлгийн, нэн ядуу амьдралтай хараагүй иргэдийн 100 бяцхан үрсэд хүүхдийн баярын бэлэг гардуулж, мэндчилгээ дэвшүүллээ.

Тус арга хэмжээний үеэр Монголын хараагүйчүүдийн Үндэсний холбооны Ерөнхий нарийн бичгийн дарга Б.Болдбаатар нээж үг хэлэхдээ хүүхдийн баярын өдөрлөгийг 10 дах жилдээ ивээн тэтгэж бяцхан үрсийг минь баярлуулж хүүхдүүдэд баярын бэлгээ жил бүр хүргүүлж хамтран ажилладаг Нийслэлийн Иргэдийн Төлөөлөгчдийн хурлын Төлөөлөгч П.Батчимэгт холбооны өмнөөс болон хүүхдүүдийнхээ нэрийн өмнөөс баярласнаа илэрхийлж, МХҮХ-ны дэргэдэх “Нарны хаан” тусгай цэцэрлэгийн багачууд урлагийн тоглолт үзүүллээ.

Монголын хараагүйчүүдийн Үндэсний холбооноос жил бүр зохион байгуулдаг энэхүү арга хэмжээнд НИТХ-ын төлөөлөгч, “Хан-Уул хөгжил” сангийн тэргүүн Пүрэвийн Батчимэг нь 2008 оноос хойш 10 дах жилдээ ерөнхий ивээн тэтгэгчээр оролцож хараагүй иргэдийн хүүхдүүд болон харааны бэрхшээлтэй 2500 гаруй хүүхдүүдэд баярын бэлэг гардуулсан байна.

Дашрамд дурдахад Монгол Улсад 16.000 хараагүй иргэд байдгаас 3000 орчим иргэн нь Улаанбаатар хотод амьдардаг юм байна.

Манай аймгийн эдийн засгийн гол үзүүлэлт нь ХАРИУЦЛАГАТАЙ УУЛ УУРХАЙ, тогтвортой аялал жуулчлал, эрчимжсэн мал аж ахуй юм. Өнөөдрийн байдлаар Өмнөговь аймагт 14 уул уурхайн компани идэвхитэй үйл ажиллагаа явуулж байгаа ба Оюутолгой ХХК, Энержи ресурс ХХК, Терра энержи ХХК, Мөнх ноён суварга ХХК-тай хамтран ажиллах гэрээ байгуулан ажиллаж байна.

Уул уурхайн ашиглалтын болон олборлолтын үйл ажиллага явуулснаар усны хомсдол, хөрсний эвдрэл, тоосжилт, ан амьтан даажих, ургамал ногоо ховордох сөрөг нөлөөллүүд бий болж байна. Тиймээс уул уурхайн компаниудын нийгмийн хариуцлагыг сайжруулах бодлогын хүрээнд манай аймгийн Цогтцэций сумын нутаг дэвсгэрт үйл ажиллагаа явуулдаг Эрдэнэс таван толгой ХК-тай Ашигт малтмалын тухай хуулийн 42.1.Тусгай зөвшөөрөл эзэмшигч нь байгаль орчныг хамгаалах, уурхай ашиглах, үйлдвэр байгуулахтай холбогдсон дэд бүтцийг хөгжүүлэх, ажлын байр нэмэгдүүлэх асуудлаар нутгийн захиргааны байгууллагатай гэрээ байгуулж ажиллана гэсэн заалтад үндэслэн ХАМТРАН АЖИЛЛАХ ГЭРЭЭГ байгуулав.
Гэрээний хүрээний хүрээнд эхний ээлжинд:
1.Цогтцэций сумын Цагаан-Овоо багийг нүүлгэн шилжүүлнэ.
2.Эрдэнэс таван толгой ХК-ийн хотхоноос Цогтцэций сум хүртэлх 13 км хатуу хучилттай авто зам, нүүрс тээврийн 8,2 км хатуу хучилттай авто замыг байгуулна.
3.Даланзадгад суманд 1500 хүүхдийн суудалтай сургууль, цэцэрлэгийн “Таван толгой” цогцолборыг байгуулна.