Month: May 2018

“Номын соёлт ертөнц” ТББ-аас Д.Сүхбаатарын талбайд уламжлалт Номын баяр арга хэмжээ “Хүссэнээрээ уншицгаая” уриан дор хоёр дахь өдрөө үргэлжилж байна.

23 дахь удаагаа болж буй Номын баярын үйл ажиллагааг “ЁкозунаНэт” ХХК, Монгол Кино Нэгтгэл, Үндэсний мэдээллийн МОНЦАМЭ агентлаг дэмжин ажиллаж байгаа юм. “Интерном”, “Аз хур”, “Монсудар”, “Тагтаа паблишинг”, “Непко”, “Мир”, “Болор судар” зэрэг 100 гаруй хэвлэлийн газрын асар 20-70 хувийн хямдралтай үнээр шилмэл ном, зохиолуудыг иргэдэд санал болгож буй.

Монгол хэл дээрх номын хамгийн доод үнэ 1000 төгрөгөөр худалдаалагдаж байгаа бол англи хэл дээрх богино хэмжээний өгүүлэл, тууж 3000 төгрөгөөс дээш үнэтэй байна. Улаанбаатар номын баяр жилээс жилд өргөн дэлгэр зохион байгуулагдаж, ном унших залуус олон болж байна гэдгийг зохион байгуулагчдын зүгээс онцолж байгаа юм.

2018 оны 5 дугаар сарын 25-ны байдлаар оны эхний 28.2 сая хээлтэгчийн 63.0 хувь буюу 17 сая 750.0 мянган эх мал төллөж, 16 сая 828.3 мянган төл бойжиж байна. Энэ нь Монгол Улсын мал сүрэг одоогийн байдлаар 53.9 мянган ботго, 402.9 мянган унага, 781.6 мянган тугал, 9 сая 636.0 мянган хурга, 6 сая 912.0 мянган ишгээр өссөн үзүүлэлт юм. Төл бойжилт 95.9 хувьтай байна. Мал төллөлт өмнөх 7 хоногоос 500.0 мянгаар нэмэгдлээ.

2018 оны 5 дугаар сарын 18-ны мэдээ

2018 оны 5 дугаар сарын 18-ны байдлаар оны эхний 28.2 сая хээлтэгчийн 60.6 хувь буюу 17 сая 68.3 мянган эх мал төллөж, 16 сая 310 мянган төл бойжиж байна. Энэ нь Монгол Улсын мал сүрэг 51.4 мянган ботго, 333.8 мянган унага, 681.9 мянган тугал, 8 сая 958.0 мянган хурга, 6 сая 284.0 мянган ишгээр өссөн үзүүлэлт юм. Төл бойжилт 96.3 хувьтай байна. Мал төллөлт өмнөх 7 хоногоос 800 мянгаар нэмэгдлээ.

2018.05.11-ний мэдээ

Оны эхний 28.2 сая хээлтэгчийн 57.9 хувь буюу 16 сая 318.0 мянган эх мал төллөж, 15 сая 465 мянган төл бойжиж байна. Энэ нь Монгол Улсын мал сүрэг одоогийн байдлаар 49.4 мянган ботго, 281.2 мянган унага, 611.6 мянган тугал, 8 сая 567 мянган хурга, 5 сая 951 мянган ишгээр өссөн үзүүлэлт юм. Төл бойжилт 95.0 хувьтай байна.

Малчид, хөдөлмөрчид та бүхэнд сэрэмжлүүлэх үүднээс ойрын өдрүүдийн цаг агаарын мэдээг хүргэе. 5 дугаар сарын 12-ноос ихэнх нутгаар дулаарч, салхи ширүүсч хуурайшилт ихсэх тул болзошгүй гал түймрийн аюулаас сэрэмжтэй байхыг анхааруулж байна. 12-нд говь болон зүүн аймгуудын нутгийн зарим газар, баруун аймгуудын нутгийн баруун хэсгээр, 13,14-нд баруун болон төвийн аймгуудын нутгийн зарим газраар, 15-нд нутгийн зүүн хагаст бороо, хур тунадас орно. Салхи 12,13-нд зарим газраар, 14-нд ихэнх нутгаар, 15-нд говь, талын нутгаар секундэд 15-17 метр хүртэл ширүүсч шороон шуурга шуурна.

Дархадын хотгор, Завхан голын эх, Хүрэн бэлчир, Алтай, Хангай, Хөвсгөл, Хэнтийн уулархаг нутаг, Идэр, Тэс голын хөндийгөөр шөнөдөө 1 градус хүйтнээс 4 градус дулаан, өдөртөө 15-20 градус, говийн бүс нутгийн өмнөд хэсгээр шөнөдөө 9-14 градус, өдөртөө 27-32 градус, бусад нутгаар шөнөдөө 3-8 градус, өдөртөө 21-26 градус дулаан байна. 14-нд баруун болон төвийн нутгийн хойд хэсгээр, 15-нд ихэнх нутгаар сэрүүснэ гэж Ус цаг уур, орчны шинжилгээний газраас мэдээллээ.

Чингэлтэй дүүргийн 4-6 насны цэцэрлэгийн хүүхдүүдийн дунд шатрын тэмцээн 5 дугаар цэцэрлэг дээр боллоо. Дүүргийн 5 дугаар цэцэрлэгийн 60 жилийн ойд зориулсан уг тэмцээнийг “Төгс нүүдэл” шатрын клуб зохион байгууллаа. “Шитэд хөлөг 2018” дүүргийн аварга шалгаруулах шатрын тэмцээнд 60 орчим цэцэрлэгийн насны хүүхдүүд оролцлоо. Тэмцээнийг зохион байгуулсан “Төгс нүүдэл” шатрын клуб 2011 оноос үйл ажиллагаа явуулж эхэлсэн. Энэ хугацаанд 6 мянга орчим хүүхдэд шатрын спортоор сургалт явуулсан байна. Хүүхдүүд шатрын спортоор хичээллэснээр оюун ухааны хөгжил тэлж, сэтгэн бодох чадвар сайжирна гэж “Төгс нүүдэл” шатрын клубын багш Ж.Гантөмөр хэлж байна гэж Чингэлтэй дүүргээс мэдээллээ.

Нийслэлийн зам засварын ажил үргэлжилж байна. Зам засварын ажлын хүрээнд түр хаагдах замуудын мэдээллийг хүргэж байна.

1. БЗД, Доржийн гудамж буюу Хил Хамгаалах Ерөнхий Газрын хойд талын замд “МЭЗ” ХХК 2018 оны 5 сарын 26-ны 23:00 цагаас 5 сарын 27-ны 07:00 цагийн хооронд дулааны шугам угсрах ажил хийхээр замын хөдөлгөөнийг хязгаарлана.

2. БЗД, Дамдинсүрэнгийн гудамжинд “Бөртэ Трейд” ХХК 2018 оны 5 сарын 26-ны 23:00 цагаас 5 сарын 27-ны 07:00 цагийн хооронд зам хааж, бохир усны шугам татах ажил хийнэ.

3. ХУД, 3-р хороо, Энгельсийн гудамжинд 2018 оны 5 сарын 26-ны 23:00 цагаас 5 сарын 27-ны 07:00 цагийн хооронд дулааны шугам солих ажил хийнэ.

Монгол Улсын Шадар сайд, Үндэсний их баяр наадмыг зохион байгуулах хорооны дарга Ө.Энхтүвшин өнөөдөр /2018.5.25/ Улсын драмын эрдмийн театрын ерөнхий найруулагч, төрийн соёрхолт Н.Наранбаатар, Үндэсний урлагийн их театрын захирал, урлагийн гавьяат зүтгэлтэн Г.Цоггэрэл нарыг Төрийн ордонд хүлээн авч уулзаж, баяр наадмын урлаг, соёлын арга хэмжээний салбар хорооноос санал болгосны дагуу Үндэсний их баяр наадмыг зохион байгуулах хорооны хуралдаанаар энэ жилийн улсын наадмын нээлт, хаалтын ёслол, төрийн хүндэтгэлийн концертын ерөнхий найруулагч, ерөнхий продюссерээр эдгээр уран бүтээлчдийг баталсныг албан ёсоор мэдэгдэн уран бүтээлийн амжилт хүслээ.

Улсын наадмын нээлтийн ёслолыг энэ жил 3 дахь удаагаа дэглэхээр сонгогдсон төрийн соёрхолт, найруулагч Н.Наранбаатар айсуй наадмыг “Монгол орон мөнхөд бат оршиг” агуулга дор сэдэвчилсэн уран бүтээлийн цогц шийдлээр нээх бодолтой байгаагаа Үндэсний хорооны даргад танилцуулж, нээлтийн ёслолын зарим сюрпризээс хуваалцав.

Монгол Улсын Шадар сайд наадмын нээлт агуулга төгс, сүрлэг сайхан болвол монгол түмэн билэгшээн омогшдогийг онцлоод энэ жилийн хувьд ард түмнийхээ эв эе, эв нэгдлийг товойлгосон шилмэл бүтээлийн цогцыг Та нөхдөөс хүлээх болно гэлээ.

Сонирхуулахад наадмын нээлтийн ёслол 1 цаг 40 минутын турш үргэлжлэх бол төрийн хүндэтгэлийн концерт 1 цаг 20 минутад багтах ажээ.

Энэ жил наадмын урлагийн арга хэмжээний ерөнхий продюссэрээр сонгогдсон урлагийн гавьяат зүтгэлтэн Г.Цоггэрэл өмнө нь төрийн хүндэтгэлийн концертыг 2 удаа найруулж байжээ гэж Шадар сайдын ажлын албанаас мэдээллээ.

НӨАТ-ын тавдугаар сарын урамшууллаас 50 сая төгрөг хожсон супер азтан Сүхбаатар аймгийн Наран сумын харьяат Г.Батцэцэгт батламжийг нь гардуулан өгчээ.

Өнөө маргаашдаа төв болон зүүн аймгуудын нутгийн зарим газраар, 27-нд нутгийн зүүн хагаст хур тунадас, нойтон цас орж, говь тал, хээрийн нутгаар хүчтэй салхи шуургатай байхыг анхааруулж байна.

Энэ сарын 27-нд нутгийн зүүн хагаст, 28-нд нутгийн зүүн өмнөд хэсгээр хур тунадас, нойтон цас орж, цасан шуурга шуурна. Салхи 27-нд говь тал, хээрийн нутгаар, 28-нд баруун аймгуудын нутгаар түр зуур секундэд 18-20 метр, 29,30-нд зарим газраар секундэд 12-14 метр хүртэл ширүүсч шороон шуурга шуурна. 27-нд нутгийн зүүн хагаст хүйтэн байх боловч цаашдаа ихэнх нутгаар халж Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир, Идэр, Тэс голын хөндийгөөр шөнөдөө 4-9 градус, өдөртөө 21-26 градус, говийн бүс нутаг, Орхон-Сэлэнгийн сав, Дорнод Монголын тал нутгаар шөнөдөө 13-18 градус, өдөртөө 29-34 градус, бусад нутгаар шөнөдөө 8-13 градус, өдөртөө 25-30 градус дулаан байна.