Month: May 2018

Нийслэлийн эдийн засаг, нийгмийг хөгжүүлэх үндсэн чиглэлийн 4.5.8-д Гэр бүлийн боловсрол олгох, гэр бүлийн хүчирхийллээс урьдчилан сэргийлэх, хүчирхийллээс татгалзах хандлагыг олон нийтэд төлөвшүүлэх зорилгоор олон нийтэд чиглэсэн гэр бүлийн үнэт зүйлийг бэхжүүлэх, тогтвортой гэр бүлийг дэмжих, хүүхэд хүмүүжлийн эерэг аргыг түгээн дэлгэрүүлэх, Хүүхдийн хөгжил, хамгааллын үндэсний хөтөлбөрийн 4.1.2-д Хүүхдийг аливаа эрсдэлд өртөх, эрх нь зөрчигдөхөөс урьдчилан сэргийлэх, хүүхдийн эсрэг хүчирхийллийн бүх хэлбэрийг үл тэвчих нийгмийн хандлагыг төлөвшүүлэх чиглэлээр бүх яам агентлаг, харъяа байгууллага, орон нутгийн нэгжүүддээ эцэг эхийн зөвлөл байгуулж ажиллуулана гэсэн заалтыг хэрэгжилтийг хангах ажлын хүрээнд “Би хариуцлагатай аав ээж” аяны зохион байгуулж байгаа билээ. Энэ аяны хүрээнд Нийслэлийн харьяа агентлагийн хүний нөөцийн мэргэжилтнүүдэд гэр бүлийн боловсрол олгох, эцэг эхийн зөвлөл байгуулах арга зүй өгөх сургалт тавдугаар сарын 2-нд зохион байгууллаа.

Нийслэлийн Засаг даргын Тамгын газрын харьяа 32 агентлагийн Хүний нөөцийн мэргэжилтнүүдэд “Гэр бүлийн зөв харилцаа”, “Хүүхэд хүмүүжүүлэх эерэг арга” сургалт, мөн байгууллага дээрээ “Эцэг эхийн зөвлөл” байгуулах талаар арга зүй өгч, албан хаагчдынхаа хүүхэд, гэр бүл рүү чиглэсэн ажлуудыг зохион байгуулж хэвшүүлэн хамтран ажиллахаар болсон.

Байгууллагууд дэргэдээ “Эцэг эхийн зөвлөл”-тэй болсноор албан хаагчиддаа хувийн болон байгууллагын стресс менежментийг зөв зохицуулах, гэр бүлийн зөв харилцаа хандлага, хүүхдээ эерэг зөв аргаар хүмүүжүүлэх, гэр бүлдээ хүчирхийллийн аливаа үйлдэл хийхээс зайлсхийх, албан хаагчдын хүүхдүүдийн дунд төрөл бүрийн уралдаан тэмцээн зохион байгуулж, хүүхдийнхээ оролцох хөгжих эрхийг нь хангах, хамт олон бие биенээ ойлгох, дэмжих байгууллагын эерэг дулаан уур амьсгал сайжрах, албан хаагчдынхаа нийгмийн асуудалд анхаарах, ар гэртэй нь ойр эргэх холбоотой ажиллах зэрэг олон талын ач холбогдолтой юм.

Сургалтад оролцогчдод “Эцэг эхийн зөвлөл”-ийн самбар гардуулан өгсөн ба хүний нөөцийн мэргэжилтнүүд байгууллага дээрээ зөвлөл байгуулан, албан хаагчдынхаа хүүхэд гэр бүл рүү чиглэсэн олон ажлуудыг санаачлан зохион байгуулж, самбартаа тогтмол мэдээлэн ажиллахаа илэрхийлсэн гэж нийслэлийн Хүүхэд гэр бүлийн хөгжлийн газраас мэдээллээ.

Монгол Улсын Ерөнхийлөгчийн Тамгын газрын дэргэдэх Иргэний танхимд “Эрүүл мэндийн салбарын хууль эрх зүйн орчин, иргэний эрүүл мэндийн эрхийн тухай” сэдэвт хэлэлцүүлэг өрнөж байна.

Дэлхийн байгаль хамгаалах сан (WWF)-гийн Монгол дахь хөтөлбөрийн газар нэн ховор цоохор ирвэсийг хамгаалах төслөө энэ оны тавдугаар сарын 01-нд албан ёсоор эхлүүллээ. Тодруулбал, Говь-Алтай аймгийн нутагт орших Хасагт хайрхан, Дарвийн нуруу, Баян-Өлгий аймгийн Сайр хайрхан, Хатуугийн нуруу, Увс аймгийн Түргэн, Цагааншувуут ууланд цоохор ирвэс, түүний идэш бологч амьтан, амьдрах орчныг хамгаалах таван жилийн хугацаатай төсөл хэрэгжүүлэх юм. Тус төслийг өмнө нь Монгол орны баруун хэсэгт буюу зөвхөн Алтай Соёны бүс нутагт орон нутгийн иргэдэд түшиглэсэн байгаль хамгаалах хөтөлбөрөөр хэрэгжүүлдэг байсан аж.

Төслийн явцад цоохор ирвэс, түүний идэш бологч зүйлийн хамгаалал, амьдрах орчны хамгаалал, бэлчээрийн зохистой ашиглалт, хуулийн хэрэгжилт, хөдөөгийн хөгжилтэй холбоотой олон асуудлыг шийдвэрлэхэд анхаарч ажиллах юм. Дашрамд сонирхуулахад, эдүгээ Монголд 800-1000 цоохор ирвэс байдаг бөгөөд энэ нь дэлхийн нийт популяцын 20 хувь нь юм. Үүний 500-700 нь Алтай Соёны бүс нутагт амьдардаг ажээ.

Монгол Улсын Засгийн газрын 2018 оны дөрөвдүгээр сарын 30-ны өдрийн 112 дугаар тогтоолоор Хөгжлийн банкны ТУЗ-ын гишүүдийг томилжээ.

МУХБ-ны Төлөөлөн Удирдах Зөвлөл нь 9 гишүүнтэй үүнээс 4 гишүүн хараат бус бөгөөд гишүүдийг хувьцаа эзэмшигчид нээлттэй сонгон шалгаруулалтаар сонгон 3 жилийн хугацаагаар томилдог.

Иргэд, аж ахуй нэгжүүд тээврийн хэрэгслийн торгуулийг бүрэн барагдуулсны үндсэн дээр тээврийн хэрэгслийн нэр шилжүүлэх, татвар төлөх, хяналтын үзлэгт орох, албан журмын даатгалд хамрагдах зэрэг бусад үйлчилгээг авдаг билээ.

Эдгээр асуудлыг шийдвэрлэхийн тулд Улаанбаатар хотын замын хөдөлгөөний удирдлагын төв нь тээврийн хэрэгслийн зөрчилд ногдуулсан торгуулийн төлбөр төлөх боломжуудыг хялбаршуулах зорилгоор Улаанбаатар банкны бүх салбарт иргэн зөвхөн тээврийн хэрэгслийн улсын дугаарыг хэлснээр торгуулиа хялбар төлөх боломжийг бүрдүүлсэн. Мөн аль ч банкны QPay цэсээр гар утаснаасаар тухайн тээврийн хэрэгслийн торгуулийг төлөх боломжоор хангаж өгсөн.

Харин энэ удаад үйлчилгээгээ нэмэгдүүлж Метатек ХХК болон Улаанбаатар банктай хамтран түргэн үйлчилгээний цахим машиныг нэвтрүүлж, тээврийн хэрэгслийн торгуулийг төлөх, иргэдэд түргэн шуурхай чирэгдэлгүй төрийн үйлчилгээ үзүүлэн ажиллаж эхэлжээ.

Эхний ээлжинд нийт 6 цэгт байршуулан ажиллаж байна.

Үүнд:

1. Дүнжингарав худалдааны төв дэх Нэг цэгийн үйлчилгээ

2. Нийслэлийн төр захиргааны IV байр 1 давхарт буюу Улаанбаатар банкны шилэн барилга

3. Баянзүрх дүүргийн 17-р хороо, “Да хүрээ” авто худалдаа үйлчилгээний төв

4. АСА цирк дэх Авто тээврийн үндэсний төвийн 1 давхарт

5. Сонгинохайрхан дүүрэг авто худалдааны цогцолборт

6. Баянгол дүүргийн 20-р хороо “Хөсөг трейд” ХХК –ийн байранд тус тус үйлчилгээ үзүүлж байна.

Цаашид Улаанбаатар хотын дүүргүүдийн цагдаагийн хэлтсүүд болон шаардлагатай цэгүүдэд байршуулж үйл ажиллагааг өргөжүүлэх төлөвлөгөөтэй ажиллаж байгаа юм байна.

МУБИС-аас жил бүр уламжлал болгон зохион байгуулдаг олон улсын эрдэм шинжилгээний хурлыг энэ жил “Боловсролын чанар, үр дүн” сэдвийн хүрээнд зохион байгуулж байна. Тавдугаар сарын 4, 5-ны өдрүүдэд болох хуралд Монголоос гадна АНУ, Герман, Итали, ОХУ, Япон, Солонгос, Хятад, Энэтхэг, Конго зэрэг есөн орны 80 гаруй эрдэмтэн, судлаачид оролцож байгаа бөгөөд “Боловсролын үйлчилгээний чанар, үр дүн”, “Боловсролын чанар, үр дүнгийн хэмжилт, үнэлгээ”, “Боловсролын чанар, үр дүнгийн баталгаажуулалт” сэдэвт гурван салбар хуралдаанаар илтгэлээ хэлэлцүүлж байна. Хурлын үеэр гадаад болон дотоодын сургалтын чанар, үр дүнгийн талаар хийгдэж буй судалгаа, туршлагыг хуваалцаж байгаагаараа онцлог юм хэмээн зохион байгуулагчид онцолж байна.

МУБИС-ийн зүгээс уг хуралд өндөр ач холбогдол өгч байгаа бөгөөд хурлаас гарсан судалгааны дүнд тулгуурлан сургалтын үйл ажиллагааг сайжруулах, гадаадын их дээд сургуулиудтай судалгааны чиглэлээр хамтын ажиллагаагаа өргөжүүлэх зорилт тавин ажилладаг байна. Уг эрдэм шинжилгээний хурал хоёр өдрийн турш болох бөгөөд маргааш МУБИС дээр үргэлжлэх аж.

“Боловсролын чанар, үр дүн” олон улсын эрдэм шинжилгээний хуралд Боловсрол, соёл, шинжлэх ухаан, спортын сайд мэндчилгээ дэвшүүлж, амжилт хүслээ.

Дэлгэрэнгүй мэдээллийг www.iceee2018.com веб сайтаас авна уу.

Энэ долоо хоногт буюу дөрөв дүгээр 30-наас тавдугаар сарын 4-ний хооронд Замын цагдаагийн албаны ЖШУХ нийт 1204 дуудлага, мэдээ мэдээлэл хүлээн авснаас зам тээврийн ослын 834 дуудлага бүртгэгдсэн байна. Үүнд осол хэргийн улмаас 47 хүн гэмтэж бэртсэний 16 нь бага насны хүүхэд тэр дундаа 13 нь явган зорчигч хэлбэрээр хөдөлгөөнд оролцож байх үедээ осолд өртжээ. Нэгдүгээрт эцэг эхчүүд бага насны хүүхдийг харгалзах хүнгүй хөдөлгөөнд оролцуулдаг, насанд хүрээгүй хүнд даатгадаг,хүүхдүүд гарцгүй газраар зам хөндлөн гарах, ойртон ирж байгаа тээврийн хэрэгслийн урдуур гэнэт гүйх, түүнчлэн жолооч нар замын хөдөлгөөний дүрмээ биелүүлдэггүй зэрэг томчууд бидний буруутай үйлдлээс шалтгаалан осолд өртөх нөхцлийг бүрдүүлж байгаа талаар албаныхан дуулгалаа.

Тухайлбал, өчигдөр 5 хүүхэд зам тээврийн осолд өртжээ. Тодруулбал, Баянзүрх дүүргийн нутаг “Да хүрээ” гудамж, Эрдэнэ толгойн замд “Grace” маркийн автомашин явган хүний гарцаар гарч байсан 6 ангийн сурагч 12 настай Б-г мөргөж гэмтээсэн. Хан-Ууул дүүргийн нутаг 75-р сургуулийн баруун замд “Harrier” маркийн автомашин 6 настай, 9 настай 2 хүүхдийг мөргөж гэмтээсэн байна.

Дорнод аймгийн “Хавирга өртөө” гэх газар шороон замд “Libero” маркийн автомашины жолооч 2 настай Т-г мөргөж амь насыг нь хохироосон байна. Урин дулааны цаг эхэлж найз нөхөд, хамт олон, гэр бүлээрээ амралт зугаалгаар явах, төгсөлтийн баяраа тэмдэглэх зэргээр хөдөө, орон нутгийн замд зорчихдоо гүйцэж түрүүлэх үйлдлийг буруу хийх, хурд хэтрүүлсний улмаас зогсоох арга хэмжээ аваагүй зэрэг байдлаас шалтгаалан мөргөлдөх, онхолдох хэлбэрээр дийлэнх осол бүртгэгджээ.

Гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 155 жолоочийг илрүүлэн саатуулж, 20 жолоочид шүүхээр баривчлах шийтгэл ногдуулан ажиллалаа.

Бүртгэгдсэн зам тээврийн осол, хэргийг хэлбэрээр нь авч үзвэл явган зорчигч мөргөж гэмтээсэн 23 осол, мөргөлдөх хэлбэрээр 19 осол, үл хөдлөх зүйл мөргөсөн 3 осол, хэрэг тус тусбүртгэгдсэн нь өнөх 7 хоногтой харьцуулахад нийт дуудлага мэдээлэл 10 хувиар, гэмтсэн хүний тоо 14 хувиар, орон нутагт амь нас нь хохирсон хүний тоо 1,5 дахин өссөн үзүүлэлттэй байна.

Түүнчлэн Замын цагдаагийн албанаас замын хяналтын төхөөрөмж ашиглан хянаж, зохицуулах боломжтой уулзваруудад биет зохицуулалт хийж хөдөлгөөн зохицуулахгүй байгаа бөгөөд харин уулзварт дэглэм тогтоох, хяналт шалгалт хийх чиглэлээр үүрэг гүйцэтгэн ажиллаж байгаа аж.