Month: April 2018

Нийслэлийн татварын газарт компьютер, принтер шаардлагатай тоног төхөөрөмжийг өнөөдөр Нийслэлийн Засаг дарга бөгөөд Улаанбаатар хотын захирагч С.Батболд гардуулан өглөө. Нийслэлийн хэмжээнд 9 дүүргийн татварын хэлтэст 1000 орчим татварын байцаагч ажилладаг. Эдгээр албан хаагчдын компьютер тоног төхөөрөмж 2013 оноос шинэчлэгдээгүй байсан юм.

Нийслэлийн Засаг дарга бөгөөд Улаанбаатар хотын захирагч С.Батболд “Нийслэл хотод бизнесийн байгууллагын 90 гаруй хувь нь үйл ажиллагаа явуулж байна. Монгол Улсын ДНБ-ний 64 хувийг Улаанбаатар хот бүрдүүлдэг. Нийслэл болон төр засгийн байгууллагуудын санхүүг бүрдүүлдэг учир нийгмийн асуудлыг шийдэхэд татварын бааз суурь бат бөх, сайн байх ёстой. Улаанбаатар хотын санхүүгийн бие даасан байдлыг хангах нь бидний зорилт. Тиймээс Монгол Улсын Засгийн газрын зүгээс УИХ-д хууль өргөн барьсан. Энэ хуулийн зорилт Улаанбаатар хот эдийн засгийн санхүүгийн хувьд бие даасан байх ёстой гэсэн үзэл баримтлал юм. Одоогоор нийслэлийн төсвийг хүн амын орлогын албан татвар бүрдүүлж байна. Энэ байдлыг цаашид засах хэрэгтэй. Дэлхийн томоохон хотуудын эдийн засгийн байдал нь өөрсдийн гэсэн татварын системтэй байдагт оршиж байна. Бид нийслэлийн татварын баазыг өргөжүүлэхийн тулд үл хөдлөх хөрөнгө, газрын харилцаа, газрын татварын асуудлыг хөндөх шаардлагатай. Өнгөрсөн онд татварын байгууллага хууль тогтоомж хэрэгжүүлэх, татвар бүрдүүлэхэд нөлөөтэй сайн ажилласан. Төсвийн орлогын төлөвлөгөөг 3 хувиар буюу 20.8 тэрбум төгрөгөөр биелүүлсэн. Үүний 90 орчим хувийг нийслэл, дүүргийн татварын алба бүрдүүлсэн байна. Татварын байгууллага зөвхөн татвар хураадаг биш, татвар төлөгч аж ахуй нэгж, иргэн, бизнесийн байгууллагуудад холбоотой хууль тогтоомжийг сурталчлах хэрэгтэй. Төрийн болон орон нутгийн байгууллагууд, иргэд, бизнесийн байгууллагын үйлдвэрлэл үйлчилгээ эрхлэх таатай орчныг бүрдүүлэх, улсдаа татвар төлөх боломж бололцоог хангаж өгөх хэрэгтэй” гэлээ.

Өнгөрсөн 2017 онд нийслэлийн татварын газар нийслэлийн татварыг 104.4 хувиар буюу 20 гаруй тэрбум төгрөгөөр давуулан биелүүлсэн байна. 2018 онд 1.2 их наяд төгрөг бүрдүүлэх зорилго тавьжээ. Нийслэлийн орлогыг бүрдүүлдэг татварын байгууллагын ажилтнуудын ажиллах боломж нөхцөлд цаашид анхаарч ажиллана гэдгээ Нийслэлийн Засаг дарга бөгөөд Улаанбаатар хотын дарга С.Батболд уулзалтын үеэр хэлж байлаа. Албан хаагчдын тоног төхөөрөмж 2013 оноос шинэчлэгдээгүй 5 жил ашиглагдаж байгаа. Өнөөдөр 60 компьютер, 37 принтерийг хүлээлгэн өглөө гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Монгол Улсын Ерөнхий сайд У.Хүрэлсүх болон манай улсад айлчилж байгаа Бүгд Найрамдах Турк Улсын Ерөнхий сайд Бинали Йылдырым нар албан ёсны хэлэлцээ хийлээ.

Монгол Улсын Гадаад бодлогын үзэл баримтлалд гуравдагч хөрш хэмээн тусгагдсан Турк Улстай хөгжүүлж буй иж бүрэн түншлэлийн харилцаанд бид ач холбогдол өгч, бүхий л салбарт өргөжүүлэхийн төлөө байдаг гэдгийг Ерөнхий сайд У.Хүрэлсүх тэмдэглэв.

Хоёр улсын дээд, өндөр түвшний яриа хэлэлцээ, харилцан ойлголцлыг бэхжүүлэхэд өнгөрсөн хугацаанд зохион байгуулсан айлчлал, арга хэмжээ, Эрхэмсэг ноён Ерөнхий сайдын энэ удаагийн айлчлал түлхэц үзүүлнэ гэдэгт итгэлтэй байна гэлээ.

Хоёр орны харилцаа улс төр, батлан хамгаалах, соёл, боловсрол, шинжлэх ухаан зэрэг салбарт хоёр талын хүчин чармайлтын үр дүнд идэвхжиж байгаад сэтгэл хангалуун байгаагаа Ерөнхий сайд У.Хүрэлсүх илэрхийллээ.

Цаашид бүх салбар дахь харилцаа, хамтын ажиллагаагаа улам өргөжүүлэн хөгжүүлэхийн төлөө байна гэв. Тухайлбал эдийн засгийн харилцааг идэвхжүүлэхэд Монгол, Туркийн хооронд Чөлөөт худалдааны хэлэлцээр байгуулах боломжийн талаар хамтарсан судалгааг эхлүүлэхээр тохирсон нь ихээхэн ач холбогдолтой болсныг тэмдэглэв.

2017 оны байдлаар 31 сая ам.доллар байгаа худалдааны эргэлтийн хэмжээг богино хугацаанд 300 сая ам.долларт хүргэх тодорхой саналыг харилцан тавив.

Төсөв, санхүү, хөдөө аж ахуй, хөнгөн үйлдвэрлэл, онцгой байдал, барилга, хот байгуулалт, зам, тээвэр, эрчим хүч, уул уурхай, чөлөөт бүс, гадаадын харьяат, шилжилт хөдөлгөөн, аялал жуулчлал зэрэг салбар болон хувийн хэвшил, бизнес эрхлэгчид, хөрөнгө оруулагчдын хамтын ажиллагаа, харилцан итгэлцлийг улам бэхжүүлэх нь зүйтэй гэдэгт талууд санал нэгдэв.

БНТУ өнгөрсөн 15 жилийн хугацаанд эрүүл мэнд, зам, тээвэр, харилцаа холбооны салбараа үсрэнгүй хөгжүүлсэн. Энэ чиглэлээр олсон ололт, туршлагаа Монгол Улстай хуваалцахад бэлэн байна гэдгээ Ерөнхий сайд Бинали Йылдырым хэллээ.

БНТУ сэргээгдэх эрчим хүчний /салхи, нар, усан цахилгаан станц/ чиглэлээр хамтрах, 700 гаруй мянган орон сууц барьсан Төрийн орон сууцны удирдлагын газар, Монгол Улсын холбогдох байгууллага хамтарч иргэдийг орон сууцжуулах чиглэлээр ажиллах боломжтой гэдгээ илэрхийлэв.

БНТУ нь 2002 онд Олон улсын хөтөлбөрт хамрагдаж байсан бөгөөд 2010 он гэхэд ОУВС-д төлөх өрөө бүрэн барагдуулсан. Тус улсын экспорт одоогоор 160 тэрбум ам.долларт хүрсэн, Европын зургаа дахь том эдийн засагтай орон болжээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Монгол Улсын нийгэм, эдийн засгийн хөгжилд дорвитой хувь нэмэр оруулсан инновацийн бүтээгдэхүүн, үйлчилгээнд “Үндэсний инновацийн шагнал” олгоно. Үндэсний инновацийн шагнал нь “Шилдэг инновацийн бүтээгдэхүүн”, “Үйлчилгээний салбарын шилдэг инноваци”гэсэн төрөлтэй байна.

Шилдэг инновацийн бүтээгдэхүүний шагналд зах зээлд шинээр, эсхүл өмнө байсан бүтээгдэхүүнээс чанар, технологийн агууламжийн хувьд давуу, орчин үеийн технологи, мэдлэгт түшиглэсэн, импортыг орлох, экспортод чиглэсэн техник, технологи, тоног төхөөрөмж, бүтээгдэхүүнийг нэр дэвшүүлнэ.

Үйлчилгээний салбарын шилдэг инновацийн шагналд зах зээлд шинээр, эсхүл өмнө байсан үйлчилгээний хэлбэрээс чанар, технологийн агууламжийн хувьд давуу, төрийн үйлчилгээ, банк санхүү, харилцаа холбоо, мэдээллийн технологи, боловсрол, эрүүл мэнд, тээвэр, худалдаа, аялал жуулчлал зэрэг үйлчилгээний салбарууд болон дундын ашиглалтын оффис, технологи дамжуулах төв зэрэг инновацийг дэмжих үйлчилгээг нэр дэвшүүлнэ.

Үндэсний инновацийн шагналд шинэ мэдлэг, технологийг зах зээлд инновацийн бүтээгдэхүүн, үйлчилгээ болгон нэвтрүүлж, нийгэм, эдийн засагт дорвитой хувь нэмэр оруулсан шинийг санаачлагч, зохион бүтээгч, бизнес эрхлэгчнарын хүсэлтийг хүлээн авна.

Та бүхнийг “Үндэсний инновацийн шагнал олгох журам” (277.39 KB) -ын дагуу холбогдох баримт бичгээ бүрдүүлэн “Үндэсний инновацийн шагнал”-д нэр дэвшүүлэх бүтээлээ ирүүлэхийг урьж байна.

Бүтээлд тавигдах шаардлага:

• зах зээлд сүүлийн 2 жилд нэвтрүүлсэн байх;
• тухайн бүтээгдэхүүнийг үйлдвэрлэх, үйлчилгээг нэвтрүүлэхэд ашигласан техник, технологи, программ хангамж, зураг дизайн нь шинжлэх ухаан, технологийн дэвшилтэт ололтод тулгуурласан байх;
• хүний эрүүл мэнд, байгаль орчинд сөрөг нөлөөгүй нь судалгаа, туршилтаар нотлогдсон байх;
• хөгжлийн бэрхшээлтэй иргэн, ахмад настан, хүүхэд, эмэгтэйчүүд зэрэг хүн амын бүлгийн онцлог хэрэгцээнд нийцсэн байх;
• олон нийтэд шинэ мэдлэг, өндөр технологийн ололтыг таниулсан байх;
• Инновацийн тухай хуулийн 15.1 дэх хэсэгт заасан шаардлагыг хангасан байх.

Холбоо барих утас: 263180

“Мах, махан бүтээгдэхүүний үйлдвэрлэл, худалдаанд мөрдөх техникийн зохицуулалт журам”-ын төслийн хэлэлцүүлэг өнөөдөр (2018.04.06) ХХААХҮЯ-ны хурлын танхимд болж байна.

элэлцүүлэгт ХХААХҮЯ-ны Худалдаа, нийтийн хоол, үйлчилгээний зохицуулалтын хэлтсийн дарга О.Онон, мах махан бүтээгдэхүүний асуудал хариуцсан мэргэжилтэн Ц.Цэцэгдарь, Нэмүү өртгийн сүлжээ төслийн зөвлөх, зохицуулагчид, зах, худалдааны төвүүд, супермаркет, дэлгүүр зэрэг худалдааны чиглэлээр үйл ажиллагаа явуулдаг аж ахуйн нэгжийн төлөөлөл оролцож байгаа юм.

Журмын төсөлд мал төхөөрөх, мал ангилж савлах, мах боловсруулах үйлдвэрлэлд тавих шаардлага, мах хөргөх, хөлдөөх, тээвэрлэх үеийн эрүүл ахуйн шаардлага, мах боловсруулах үйлдвэрийн цэцэрлэгээ, халдваргүйтгэлд тавих шаардлага, мал бэлтгэх, төхөөрөх үйл ажиллагаанд мал эмнэлгийн хяналт үйлчилгээ, худалдааны шатанд тавих шаардлага, мах, махан бүтээгдэхүүний хүнсний аюулгүй байдал зэрэг зохицуулалтыг тусгажээ.

“Мах, махан бүтээгдэхүүний үйлдвэрлэл, худалдаанд мөрдөх техникийн зохицуулалт журам” батлагдсанаар мал төхөөрөхөөс эцсийн хэрэглэгчид хүрэх хүртэл бүх шат дамжлага хяналттай болж, хүн амыг эрүүл, аюулгүй мах, махан бүтээгдэхүүнээр хангах боломж бүрдэх бөгөөд махны үйлдвэрлэл, худалдаа эрхлэгчдийн нийтээр дагаж мөрдөх журам гэдгийг хэлэлцүүлэг зохион байгуулагчид онцолж байна.

“Хөгжлийн бэрхшээлтэй хүмүүсийн бие даан амьдрах эрхэд суурилсан хандлага төлөвшүүлэх нь” төслийн хүрээнд “Peer Counseling” хөтөлбөрийг танилцууллаа.

Европын холбоо, АИФО олон улсын байгууллагын санхүүжилтээр Тэгш нийгэм холбоо ТББ, Монголын бие даан амьдрах төвүүдийн үндэсний холбоо хамтран уг хөтөлбөрийг хэрэгжүүлж байгаа юм. Энэхүү хөтөлбөрийг хөгжлийн бэрхшээлтэй залуучуудын эрх чөлөө, оролцоо, хөгжлийг дэмжих зорилгоор өнгөрөгч нэгдүгээр сараас эхлэн хоёр жилийн хугацаатай хэрэгжүүлэхээр болсон аж.

Энэ үеэр Монголын бие даан амьдрах төвүүдийн тэргүүн Ч. Ундрахбаяр “Би оюутан байхдаа гэмтэл аваад суугаа болсон. Олдмол гэмтэлтэй. Нэг л өдөр ийм болоод сэтгэл санааны цохилтод орсон. Энэ байдалдаа дасан зохицож, өөрийгөө хүлээн зөвшөөрөх ёстой болсон. Энэ бүх асуудлыг шийддэг зүйл бол зөвлөлдөх үйлчилгээ. Гэмтсэнийхээ дараа хоёр сургууль төгссөн. Би ганцаараа шийдээд сураагүй. Адилхан нөхцөл байдалд буй залуучуудтайгаа ярилцаж итгэл үнэмшил төрсөн. Бие даан амьдрана гэхээр хүмүүст амархан сонсогддог. Улс бүрт хөгжлийн бэрхшээлтэй иргэдийг яавал дээр вэ гэсэн асуудал бий. Энэхүү асуудлуудыг асрамжийн төвд аваачих, тусгай сургууль цэцэрлэгт байлгах, тусгай хот үүсгээд өгөх гэх мэт янз янзын бодлого санаачилж байсан. Манай улсад эмнэлгийн загварыг хэрэгжүүлж байлаа. Энэ нь хөгжлийн бэрхшээлтэй хүмүүст тэтгэвэр өгөөд гэрт нь байлгах, гэр бүлийн хүмүүсээр нь асран халамжлуулах юм. Жилээс жилд хөгжил дагаад үүнийг бид өөрчлөх шаардлагатай болж байна. Энэхүү зөвлөлдөх үйлчилгээ нь Монголд шинэ учраас яаж хэрэгжүүлэхээ мэдэхгүй байна. Хууль хэрэгжихийн өмнө загвар төсөл хийж харуулах гээд байгаа юм. Төслийн хүрээнд хөгжлийн бэрхшээлтэй залуучуудынн нийгмийн оролцоог нэмэгдүүлж чадваржуулах, бие даан амьдрахад бэлтгэнэ. Бид нарын хувьд тулгуур эрхтэн голлосон учраас ажлын байрны хүртээмж бага байдаг. Энэ хөтөлбөрт 30 залуу хамрагдаж байна. 20 нь анх удаа олны дунд орж үзэж байгаа. Гэртээ нуугдаад амьдардаг гэсэн үг. Нуугдах хэрэггүй давах хэрэгтэй. Давахын тулд энэ хөтөлбөр хэрэгжих гэж байна” гэлээ.

Peer Counseling буюу Зөвлөлдөөн гэдэг нь адил нөхцөл байдалд буй ижил бэрхшээлтэй хүмүүсийн хооронд нийгмийн амьдрал, хууль эрхзүйн талаар ярилцлага, зөвлөгөө, зөвлөлдөөн хэлбэрээр явагдаж, бие биедээ дэмжлэг үзүүлэн амьдралын итгэл үнэмшил олгох үйл ажиллагаа ажээ.

Б.НОМИН-ЭРДЭНЭ

Монгол Улсын иргэн гэр бүлийн хэрэгцээний зориулалтаар газрыг нэг удаа үнэгүй өмчилж авах хуулийн хугацаа ирэх сарын 1-ний өдөр дуусч байгаатай холбоотойгоор дүүргүүдийн газрын албаны ачаалал эрс нэмэгдсэн. Мөн урин дулаан цаг болж иргэдийн газартай холбоотой хүсэлт нэмэгддэг зэргийг харгалзан дүүргүүдийн Газрын алба энэ сарыг дуустал бямба гаригийн 9.30-16.30 цаг хүртэл ажиллахаар боллоо. Ингэснээр иргэд ажлын өдөр цаг заваа алдалгүй амралтын өдөр харьяа дүүргийнхээ Газрын албанд хандаж, өөрийн газартай холбоотой хүсэлтээ шийдвэрлүүлэх боломжтой болж байна гэж нийслэлийн Газрын албанаас мэдээллээ.