Month: April 2018

БНХАУ-ын Шилийн гол аймгийн Зүүн Үзэмчин хошууны Улиастай хотын Хууль зүйн товчоонд “Монгол иргэдэд хууль зүйн үнэгүй зөвлөгөө өгөх цэг” 2018 оны 3 дугаар сарын 30-ны өдөр албан ёсоор нээгджээ.

Монгол Улсаас БНХАУ-ын Эрээн хотод суугаа Консулын газар, Зүүн Үзэмчин хошуу хоорондын хамтын ажиллагааны үр дүнд байгуулагдсан энэхүү цэгт хандсанаар монгол иргэд БНХАУ-ын хууль тогтоомжийн талаар мэдээлэл авахаас гадна эвлэрүүлэн зуучлах, мөн төлбөртэй, төлбөргүй өмгөөлөгч авах боломжтой болж байна.

Зүүн Үзэмчин хошууны Улиастай хотод Монгол Улсын 70 гаруй иргэн оршин суудаг бөгөөд тус хошууны нутаг дэвсгэрт байрладаг Монгол, Хятадын Бичигт-Зүүн хатавч боомтоор 2017 онд 130 мянган иргэн, 1.3 сая тонн ачаа бараа нэвтэрчээ.

“Иргэдийн оролцоотой-Амьдрах орчныг сайжруулах жил’’-ийн хүрээнд хэрэгжиж буй ‘’Манай хороо-Миний гудамж’’ аяны дэд ажлын хэсэг хуралдлаа. Тус аян энэ оны 10 дугаар сарыг хүртэл үргэлжлэх бөгөөд Гудамж, зам талбайг тохижуулах, Ногоон байгууламжийг нэмэгдүүлэх, Байгууллага, аж ахуй нэгжийн гадна хаяг, хаягийн байгууламжийг холбогдох журамд нийцүүлэх, Хог хаягдал, орчны бохирдлыг бууруулах, Гудамж, зам талбайн гэрэлтүүлгийг нэмэгдүүлэх, Инженерийн шугам сүлжээ дэд бүтцийг сайжруулах гэсэн үндсэн 6 чиглэлээр явагдаж байгаа аж.

Уг хуралдаанаар аяны хүрээнд дүүргийн хэмжээнд өнгөрсөн хугацаанд хийгдсэн ажлуудаа тайлагнаж, цаашид хэрэгжүүлэх ажлаа төлөвлөж, боловсруулсан юм. Түүнчлэн дүүргийн Засаг даргын орлогч, Манай хороо-Миний гудамж аяны ажлын хэсгийн ахлагч Т.Батцогт хороодын Засаг дарга болон Нийтлэг Үйлчилгээний газруудад тус аянтай холбогдуулан заавар, зөвлөгөө өгч ажиллалаа хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Бага насны хүүхдүүд хараа хяналтгүйгээр замын хөдөлгөөнд оролцсоны улмаас машинд дайруулж, мөргүүлж эрүүл мэндээрээ хохирох, цаашлаад амиа алдах харамсалтай хэргүүд гарсаар байна. Өдөрт дунджаар 4-6 хүүхэд явган хэлбэрээр замын хөдөлгөөнд оролцож байхдаа машинд мөргүүлдэг гэх судалгаа байна.

Өнгөрсөн долоо хоногт гэхэд нэг өдөр зургаан хүүхэд зам тээврийн осолд өртжээ. Тэдний тав нь харгалзах хүнгүй явж байсан аж. Хүүхэд зам тээврийн осолд өртсөн талаарх өнгөрсөн оны статистик тоог харахад улсын хэмжээнд 1018 бүртгэгдэж, ослын улмаас 59 хүүхэд амь насаа алдаж, 1117 хүүхэд гэмтэл авснаас 205 хүүхэд хүндэвтэр, хүнд гэмтжээ. Осолд өртөх шалтгаан нь ганцаараа зам хөндлөн гарах, гарцгүй газраар гүйх зэргээс болж машинд мөргүүлж, шүргүүлдэг байна.

Бага насны хүүхдүүдээ эцэг эхчүүд нь сургууль, цэцэрлэгт нь хүргэж өгөхөөс гадна цагаан шугам, ногоон гэрлээр гаргаж сургахыг ЗЦГ-аас зөвлөж байна.

Хүнс, хөдөө аж ахуйн, хөнгөн үйлдвэрийн яамнаас махны хомсдол, махны үнийн хөөрөгдөл үүсгэхгүй байх зорилгоор жил бүр нөөцийн махыг хямд үнээр зах зээлд бэлтгэн гаргадаг билээ. Энэ жилийн нөөцийн махыг өнөөдрөөс эхлэн худалдаанд гаргаж байна. Нийслэл, Дархан, Эрдэнэт хотын хүн амын хэрэгцээнд зориулан тодорхой тогтоосон үнээр худалдаалах аж.

Улаанбаатар хотод 79, хөдөө орон нутагт 44 үйлдвэр, цех үйл ажиллагаа явуулж байгаа бөгөөд үүнээс хүсэлт гаргаж, шаардлага хангасан 25 үйлдвэр, аж ахуй нэгжийг сонгон одоогоор нийт 12.8 мянган тонн махны нөөц бүрдүүлжээ.

Нийслэлийн Засаг даргын Тамгын газраас Баянзүрх дүүргийн Төрийн захиргааны удирдлагын хэлтсийн Хууль зүйн тасагтай хамтран Нийслэлийн эрх зүйн байдлын тухай хуулийн шинэчилсэн найруулгын хэлэлцүүлгийг өнөөдөр зохион байгууллаа.

Сүүлийн жилүүдэд Улаанбаатар хотын төлөвлөлт, байгаль орчин, экологийн аюулгүй байдалд сөргөөр нөлөөлж, төлөвлөлтгүй суурьшил бий болох, гэмт хэрэг, зөрчил ихсэх, замын хөдөлгөөнд хэт түгжрэл үүсэх, хүн амын эрүүл мэнд, нийгмийн халамж, үйлчилгээний салбар доголдох зэргээр эдийн засаг, нийгмийн бүх талын харилцаанд хүндрэл учруулах болсон тулэнэхүү хуулийг шинэчлэн найруулах шаардлагатай гэж үзсэн юм.

Иймд Нийслэлийн ЗДТГ-ын Хууль, эрх зүйн хэлтсийн дарга А.Даваажаргал, дүүргийн Төрийн захиргааны удирдлагын хэлтсийн дарга А.Пүрэвдулам болон 28 хорооны Засаг дарга, зохион байгуулагч, нийгмийн ажилтнууд оролцож санал солилцсон юм

Нийслэлийн эрх зүйн байдлын тухай хууль 1994 онд батлагдсан бөгөөд 5 бүлэг 32 зүйлтэй хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

“ИХ ХОТЫН ИХ ЦЭВЭРЛЭГЭЭНИЙ 90 МИНУТ” уриатай бүх нийтийн их цэвэрлэгээг дөрөвдүгээр сарын 14 буюу ирэх бямба гарагт зохион байгуулах юм байна.Нийслэл даяар нэгэн зэрэг 11.00 цагт эхлүүлэх бөгөөд ААН байгууллагууд 90 минутын турш орчныхоо хог хаягдлыг цэвэрлэж, хана, цонх, хаяг, хаягийн байгууламж, сандал, хогийн сав, үүд довжоогоо угааж, гадна талбайгаа чийгшүүлэхийг уриалж байна. Энэ хугацаанд ААН, байгууллагуудын үйл ажиллагааг түр зогсоож хотоо цэвэрлэх ажилд нэгдэх аж. Мөн замын хөдөлгөөнд оролцож байгаа жолооч нарыг их гэрлээ асааж, 11.00 цагт дохиогоо 3 удаа өгч их цэвэрлэгээнд нэгдэх юм байна.

Монгол Улсад бие даасан, хараат бус, байнгын ажиллагаатай Сонгуулийн төв байгууллага байгуулагдаад өнөөдөр 26 жил болж байна.

1992 онд шинэ Үндсэн хууль батлагдаж, түүний дагуу төрийн эрх барих дээд байгууллагаас төрийн шинэ бүтэц, тогтолцоог бий болгох зохион байгуулалтаар байгуулагдсан анхны байгууллага бол Монгол Улсын Сонгуулийн Ерөнхий Хороо байв.

1992 оны 4 дүгээр сарын 10-ны өдөр Монгол Улсын Сонгуулийн Ерөнхий Хороо, түүний бүрэлдэхүүнийг баталсан тогтоолыг тэр үеийн хууль тогтоох дээд байгууллага- Улсын Бага Хурал гаргаж байсан билээ.

Түүнээс хойш Монгол Улсын Сонгуулийн Ерөнхий Хороо төрийн эрх барих дээд байгууллага- Улсын Их Хурлын 7, Монгол Улсын Ерөнхийлөгчийн 7 удаагийн сонгуулийг тус тус удирдан зохион байгууллаа. Мөн аймаг, нийслэл, сум, дүүргийн Иргэдийн төлөөлөгчдийн Хурлын 7 удаагийн сонгуулийг зохион байгуулахад мэргэжил, арга зүйн удирдлагаар ханган ажиллаж иржээ.

Өнгөрсөн хугацаанд иргэдийн сонгох, сонгогдох эрхийг бүрэн хангах, сонгуулийн эрх зүйн орчинг улам боловсронгуй болгох, сонгуулийн бүх шатны байгууллагад ажиллах мэргэжилтэнг сургаж бэлтгэх, нарийн мэргэшүүлэх, тогтвортой ажиллуулах зэргээр сонгуулийн байгууллагыг бэхжүүлэх, сонгуулийн бүхий л үйл ажиллагаанд сүүлийн үеийн техник, технологи нэвтрүүлж автоматжуулахад томоохон өөрчлөлт хийж чадсан билээ.

Үүний үр дүнд Монгол Улсад сонгуулийн ардчиллын мөн чанарыг улам бататгаж, түүнийг шинэ агуулгаар баяжуулж, сонгуулийн нэр хүнд, үнэ цэнэ, түүнд итгэх итгэл үнэмшил болон олон улсын үнэлэмжийг үлэмж нэмэгдүүлж чадсан билээ хэмээн СЕХ-ны хэвлэлийн төлөөлөгч мэдээлэв.