Month: April 2018

НҮБ-ын хүний эрх ба аюулгүй ундны ус, ариун цэврийн байгууламжийн асуудал хариуцсан тусгай илтгэгч Лео Хеллер өчигдөр Улаанбаатарт “Жорлонгоо өөрчилье” сургалттай танилцлаа. Тэрбээр Монгол Улсын Засгийн газрын урилгаар дөрөвдүгээр сарын 9-20-ны хооронд Монголд ажиллаж байгаа юм. Хүндэт зочин “Нутгийн шийдэл” сангаас зохион байгуулдаг “Жорлонгоо өөрчилье” сургалт болж байсан танхимд хүрэлцсэн ирсэн юм. “Нутгийн шийдэл” сангийн тэргүүн Ц.Оюунгэрэл түүнд сургалтынхаа тухай товч танилцууллаа.

Тусгай илтгэгч Лео Хеллер сургалтанд оролцсон хоёр хүнд асуулт тавьж, “шалгалт” авч амжив. Тэрбээр эмэгтэй оролцогчоос “Жорлон эмэгтэйчүүдийн хувьд илүү чухал байдаг. Хувийн нууц, нэр төртэй холбоотой асуудал байдаг. Жорлон ямар байвал эмэгтэй хүний нэр төрийг хамгаалах вэ” гэсэн юм.

Харин өөр нэг эрэгтэй оролцогчоос “Жорлонгоо байгуулахдаа хөрсний бохирдлоос хэрхэн сэргийлэх вэ” хэмээн лавласан.

Лео Хеллер сургалтанд оролцогчдод хандан хэлэхдээ “Ариун цэврийн байгууламж буюу жорлон гэрээс холгүй, хүн болгонд хүртээмжтэй байх учиртай. Хүн болгонд гэдэг маань хүүхэд багачууд, эмэгтэйчүүд, эрэгтэйчүүд, хөгжлийн бэрхшээлтэй хүмүүс, настай хүмүүст хүртээмжтэй, ээлтэй байх тухай ярьж байгаа юм шүү. Мэдээж ариун цэврийн хувьд зүй зохистой байх учиртай. Үндэстэн ястны зан заншил, соёлыг дэмжсэн байх хэрэгтэй. Хамгийн гол нь үнэ хямд байх учиртай. Жорлон үнэтэй бол хүн болгон хэрэглэж чадахгүй. Энэ бол хүн байх эрхээ хэрэгжүүлэх, физиологийнхоо хэрэгцээг хангахад чухал. Сэтгэлийнхээ дуудлагаар энэ сургалтанд оролцож байгаа та бүхэн зохистой ариун цэврийн байгууламжийг дэмжигчид, шинэ санааг түгээгчид болж байна. Амжилт хүсч, баяр хүргэж байна” гэсэн юм.

“Нутгийн шийдэл” сангаас 28 дахь сургалтаа зохион байгуулжээ. Нийслэлийн бүх дүүрэгт “Жорлонгоо өөрчилье” сургалт болсон бол “Жорлонгоо өөрчилье” багийнхан өдгөө орон нутагт ажиллаж буй. Харин энэ удаагийн сургалтыг “Шунхлай” компанийн захиалгаар Улаанбаатарт хийжээ.

Уг сургалтанд “Шунхлай” компанийн 40 ажилтнаас гадна Азийн хөгжлийн банкны “Гэр хорооллын ариун цэврийн байгууламжийг сайжруулах төсөл”-ийн багийнхан, сошиалаар сургалт болох гэж байгаа тухай олж мэдсэн иргэд оролцсон юм.

Шунхлай компанийн байгаль орчин, галын аюулгүй байдал хариуцсан инженерГ.Солонго ярихдаа “Шунхлай компани 21 аймагт салбартай. Бүх шатахуун түгээх станцад жорлон байдаг.Бид жорлонгоо байгаль орчинд ээлтэй болгож өөрчлөхөөр Улаанбаатарын салбаруудаас эхэлж байгаа. Жорлонгоо өөрчилье сургалтанд хамт олноороо хамрагдаж байна” гэсэн юм.

Б.ЭГШИГЛЭН

Том оврын шилмүүст модны хаврын цэнэг усалгааг энэ сарын 1-нээс эхлүүлээд байгаа бөгөөд мэргэжлийн 8 байгууллага хотын Ерөнхий менежерийн баталсан хуваарийн дагуу гүйцэтгэж байна. Хотын төвийн гудамжуудын модонд хэлбэржүүлэлт, залуужуулах огтлол болон шохойдох ажил хийгдэж байгаа бөгөөд нийт 1100 модыг шохойдож, 710 модонд хэлбэржүүлэлт хийгээд байна. Хаврын цэнэг усалгаа энэ сарын 15-нд дуусч хөрсний чийгшлээс хамаарсан байнгын усалгаа хуваарийн дагуу тогтмол үргэлжлэх юм.

Улаанбаатар хотын Захирагчийн ажлын албанаас 2016, 2017 онуудад хотын ногоон байгууламжийг нэмэгдүүлэх, нягтралыг сайжруулах зорилгоор 4083 ш том оврын шилмүүст модыг шилжүүлэн тарьсан бөгөөд арчилгааг агротехнологийн дагуу хийснээр 99.6 хувийн ургалттай байна гэж Улаанбаатар хотын Захирагчийн ажлын албанаас мэдээллээ.

Эмхэтгэлийн шинэ дугаарт Дүрэм батлах тухай, Шүүгчийг сонгон шалгаруулах журам шинэчлэн батлах тухай Монгол Улсын Ерөнхийлөгчийн зарлигийг нийтэлсэн байна.

Дүрэм батлах тухай зарлигаар “Прокурорын сахилгын дүрэм”-ийг баталсан бөгөөд Прокурорт хууль, хуулийг хэрэгжүүлэх талаар Улсын Ерөнхий прокуророос гаргасан тушаал, заавар, журмыг хэрэгжүүлээгүй, зөрчсөн, прокурорын ёс зүйн дүрмийг зөрчсөн, байгууллагын дотоод журмыг зөрчсөн, хуульд заасан албаны чиг үүргээ хүндэтгэн үзэх шалтгаангүйгээр биелүүлээгүй, прокурорын мэргэжлийн дүрмийг зөрчсөн үндэслэлээр сахилгын шийтгэл оногдуулахаар заажээ. Уг дүрэмд сахилгын шийтгэл оногдуулах үндэслэлийг шалгах, шалгалт явуулж дууссаны дараа явуулах үйл ажиллагаа, сахилгын шийтгэл оногдуулах талаар тусгасан байна.

Мөн бүх шатны шүүхийн шүүгч, анхан болон давж заалдах шатны шүүхийн Ерөнхий шүүгчийн албан тушаалд нэр дэвшигчээс шалгалт авах, дүгнэлт гаргах, сонгон шалгаруулах ажиллагааг зохицуулах Шүүгчийг сонгон шалгаруулах журмыг эмхэтгэлд бүрэн эхээр нь нийтэлсэн байна.
Сонгон шалгаруулалт нь Шүүхийн мэргэшлийн хороо шалгалтын үнэлгээ, Шүүхийн ерөнхий зөвлөлийн болон Монголын хуульчдын холбооны дүгнэлт, Шүүхийн ерөнхий зөвлөлийн Монгол Улсын Ерөнхийлөгчид өргөн мэдүүлэх санал хураалтаас бүрдэх бөгөөд Анхан шатны шүүхийн шүүгчийн сонгон шалгаруулалтыг жилд хоёроос доошгүй удаа, давж заалдах болон хяналтын шатны шүүхийн шүүгчийн, Ерөнхий шүүгчийн сонгон шалгаруулалтыг сул орон тоо зарлагдах бүрд зохион байгуулах юм байна.

Анхан болон давж заалдах, хяналтын шатны шүүхийн шүүгчийн шалгалтын арга, хэлбэр, үнэлэх аргачлалыг Мэргэшлийн хорооны саналыг үндэслэн Шүүхийн ерөнхий зөвлөл боловсруулах бөгөөд уг аргачлалыг Монгол Улсын Ерөнхийлөгчийн Тамгын газраар хянуулж, энэ журамд нийцсэн эсэх тухай дүгнэлт гаргуулна. Шалгалтын даалгаврын агуулга, нууцлалыг Мэргэшлийн хороо хариуцна хэмээн дээрх журамд заажээ. Түүнчлэн Журам батлах тухай, Татварын алдангийн хэмжээг тогтоох тухай Засгийн газрын тогтоол, Монгол Улсын Их Хурлын 2017 оны 23 дугаар тогтоол Үндсэн хуулийн холбогдох заалтыг зөрчсөн эсэх маргааныг хянан шийдвэрлэсэн тухай Монгол Улсын Үндсэн хуулийн цэцийн дүгнэлтийг нийтэлжээ хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн 2018 оны хөрөнгө оруулалт, бүтээн байгуулалтын ажлын хүрээнд нийслэлийн Газрын албанаас 90 бүтээн байгуулалтын ажилд газар чөлөөлөлтийн ажлыг эхлүүлээд байна. Уг 90 бүтээн байгуулалтын ажлын трасст 1902 нэгж талбарын 216 га газар өртсөн бөгөөд суурин болон хээрийн судалгааг бүрэн гаргасан.

Энэ онд хэрэгжүүлэх улсын чанартай томоохон бүтээн байгуулалтын ажлуудын газар чөлөөлөлтийг 2017 онд эхлүүлсэн бөгөөд үүнээс Замын цагдаагийн уулзвар орчмын олон түвшний огтлолцол бүхий гүүрэн гарц болон Гачууртын уулзвараас Налайх Чойр чиглэлийн 20.9 км авто замын ажлыг дурдаж болно.

Баянзүрх дүүргийн 26 дугаар хороо, Хан-Уул дүүргийн 15 дугаар хороо, Сүхбаатар дүүргийн 1 дүгээр хорооны нутаг дэвсгэрт хийгдэх Замын цагдаагийн уулзвар орчмын олон түвшний огтлолцол бүхий гүүрэн гарцын ажлын трасст нийт 22 нэгж талбар өртсөн. Уг замын нөлөөлөлд өртсөн иргэн, хуулийн этгээдүүдээс “Шунхлай” болон “Жаст” групп ХХК-ийн шатахуун түгээх станц, “Оддын хотхон” СӨХ зэрэг 20 иргэн, аж ахуйн нэгж газраа чөлөөлж авто замын байгууламж болон инженерийн шугам сүлжээний шилжүүлгийн ажлуудыг гүйцэтгэх нөхцөл бололцоогоор хангажээ.

Харин Гачууртын уулзвараас Налайх, Чойрын уулзвар хүртэлх 20.9 км авто замын трасст нийт зөвшөөрөлтэй 82, зөвшөөрөлгүй 38 нэгж талбар (ТҮЦ, павильон, чингэлэг, хашаа хайс), 60 гаруй самбар өртөж байснаас зөвшөөрөлгүй 38 нэгж талбар 60 сурталчилгааны самбарыг албадан чөлөөлж, газрын эзэмших болон өмчлөх эрхтэй 82 нэгж талбараас иргэдийн оролцоо, идэвх санаачлагын дэмжлэгтэйгээр 53 нэгж талбарыг нөхөн олговоргүй чөлөөлөөд байна.

Нийслэлийн Газрын албаны Газар чөлөөлөлтийн хэлтсийн дарга Д.Энхтөр “2018 онд улс нийслэлийн хөрөнгө оруулалтаар 90 ажил хийгдэнэ. Иргэдийн хувьд бүтээн байгуулалтын ажлыг маш их дэмжиж байгаа. Жишээлбэл, Налайх дүүргийн 20.9 км замд нийт 181 иргэн аж ахуйн нэгж өртсөнөөс одоогийн байдлаар 100 хувь газраа чөлөөлсөн. Дээрх иргэдийн 29-т нь нөхөн олговор олгосон бөгөөд бусад нь сайн дураараа газраа чөлөөлж өгсөн.

Баянзүрх дүүргийн 26 дугаар хороо, Хан-Уул дүүргийн 15 дугаар хороо Сүхбаатар дүүргийн 1 дүгээр хорооны нутаг дэвсгэрт хийгдэх Замын цагдаа орчмын олон түвшний огтлолцол бүхий гүүрэн гарцын нөлөөлөлд нийт 22 нэгж талбар өртсөн. Үүнээс Сүхбаатар дүүргийн нутаг дэвсгэрт 17, Баянзүрх дүүргийн нутаг дэвсгэрт 2, Хан-Уул дүүргийн нутаг дэвсгэрт 3 нэгж талбар өртсөн. Нийт 20 нэгж талбар нь газраа чөлөөлж автозамын байгууламж болон инженерийн шугам сүлжээний шилжүүлгийн асуудлыг гүйцэтгэх нөхцөл бололцоогоор хангасан. Үндэсний соёл амралтын хүрээлэн ХХК-тай зөвшөлцөх шатандаа явж байгаа. Нийслэлийн бүтээн байгуулалтыг дэмжин ажиллаж байгаа аж ахуйн нэгж, иргэддээ талархал илэрхийлье” гэлээ.

Энэ оны хаврын бүтээн байгуулалтын ажлын нөлөөлөлд өртсөн үндэсний компаниуд Улаанбаатар хотын хаврын бүтээн байгуулалтыг дэмжиж, газраа чөлөөлж буйд холбогдох албанаас талархал илэрхийлж байна гэж нийслэлийн ЗДТГ-ын Хэвлэл мэдээлэл олон нийттэй харилцах хэлтсээс мэдээллээ.

Улсын Гуравдугаар төв эмнэлэг 2018 оны Дэлхийн эрүүл мэндийн өдрийг “Эрүүл мэндийг хүн бүрт” уриан дор өдөрлөг хэлбэрээр тэмдэглэн өнгөрүүллээ.

Тус эмнэлэг энэхүү өдрийг угтан БГД-ийн “Эрдмийн Ундраа” цогцолбор сургуулийн бага ангийн багш нарт “Чихрийн шижин өвчний тухай ойлголт ба түүнээс сэргийлэх нь” сэдэвт эрүүл мэндийн мэдээлэл боловсрол олгох сургалт зохион байгуулж, бага бүлгийн нийт 30 багшид биеийн жин, өндөр, бүсэлхийн тойрог, цусны даралт хэмжин чихрийн шижингийн эрсдлийн үнэлгээ хийж, захын цусанд глюкоз тодорхойлон дотоод шүүрлийн эмч зөвлөгөө өгөв. Мөн “Чихрийн шижин өвчний үеийн эмчилгээний хоол”, “Цусанд сахар багасах”, “Цусанд сахар ихсэх”, “Таргалалт”, “Хөлний хүндрэлээс урьдчилан сэргийлэх“ сэдэвт гарын авлагыг бэлтгэн түгээсэн юм. Түүнчлэн Япон монголын хамтарсан “Номт наран” ерөнхий боловсролын тавдугаар ангийн сурагчдад “Амны хөндийн эрүүл ахуй” сэдвээр сургалт хийж, “Хүүхдийн шүд цоорох өвчний урьдчилан сэргийлэлт” номыг сургуульд нь бэлэглэв.
Энэ өдөр эмнэлгийн төв үүднээс иргэд, үйлчлүүлэгч, эмч, ажилчдаа угтан Дэлхийн эрүүл мэндийн өдрийн үйл ажиллагаанд идэвхитэй нэгдэхийг уриалан, Зөвлөх Поликлиникт “Эрүүл мэндийг хүн бүрт” өдөрлөгийн үйл ажиллагааг зохион байгуулж, “Тархины харвалтаас сэргийлье”, “Зохистой хооллолт” сэдэвт сургалт хичээл, харвалт, чихрийн шижин, цусны даралт ихсэлтийн эрсдлийн үнэлгээг хийж, хүн бүрт эрүүл мэндийн боловсрол олгох мэдээлэл сургалтын үйл ажиллагааг зохион байгуулсан юм.
Тус эмнэлгийн эмчилгээний хоолонд хэрэглэж буй хүнсний 15 зүйлийн нарийн ногоо, тэдгээрийн боловсруулалт, хэрэглэх арга, хоол эмчилгээнд хэрхэн бэлтгэх зэргийг харуулсан үзэсгэлэн гаргаж иргэд үйлчлүүлэгчдэд тайлбарлан танилцуулж, “Хүнсний ногооны ашиг тус”, “Хүрэн манжингийн шүүс бэлтгэх”, “Нарийн ногоонууд” гэсэн зөвлөмжийг хүргэв.
Дэлхийн эрүүл мэндийн өдрийн үйл ажиллагаанд нийт 500 гаруй үйлчлүүлэгч иргэд, эмч, ажилчид, сурагч, багш нар оролцож, зургаан төрлийн гарын авлага материалыг түгээн сурталчиллаа гэж ЭМЯ-наас мэдээллээ.