Month: April 2018

Categories
мэдээ цаг-үе

“Ганц худаг”-т хоригдоод байгаа С.Баярцогт, Б.Бямбасайхан, Б.Ариунсан, Г.Амарбат нарыг үргэлжлүүлэн хорих үгүйг өнөөдөр шийднэ

– “ОЮУТОЛГОЙ”, “ЭРДЭНЭТ” ҮЙЛДВЭРТЭЙ ХОЛБООТОЙ ХЭРЭГТ 500 ГАРУЙ ХҮНИЙГ АТГ ШАЛГАХААР БОЛЖЭЭ-


Авлигатай тэмцэх газраас өнгөрсөн ням гаригт буюу энэ сарын 1-нд нэр бүхий дөрвөн хүнийг цагдан хорьжээ. Авлигатай тэмцэх газрын мөрдөн байцаах хэлтсээс Сангийн сайд, Засгийн газрын хэрэг эрхлэх газрын дарга асан С.Баярцогт, “Оюу толгой” төлөөлөн удирдах зөвлөлийн гишүүн “Эрдэнэс Монгол” компанийн захирал асан Б.Бямбасайхан, Татварын ерөнхий газар, Тагнуулын ерөнхий газрын даргаар ажиллаж байсан Б.Ариунсан нарыг гэрээс нь саатуулжээ. Мөн “Эрдэнэт” үйлдвэрийн Худалдаа хэлтсийн даргаар ажиллаж байсан Г.Амарбатыг саатуулсан байна.

Т.МӨНХТУНГАЛАГ: НЭР БҮХИЙ ДӨРВӨН АЛБАН ТУШААЛТНЫГ БАРИВЧИЛЖ, ХОЛБОГДОХ МӨРДӨН ШАЛГАХ АЖИЛЛАГАА ҮРГЭЛЖИЛЖ БАЙГАА

Өчигдөр 12:30 цагт Авлигатай тэмцэх газрын Хэвлэл, олон нийттэй харилцах ажилтан, комиссар Т.Мөнхтунгалаг баривчилгааны талаар сэтгүүлчдэд мэдээлэл хийсэн юм. Түүнээс зарим зүйлийг тодрууллаа.

-Авлигатай тэмцэх газраас “Оюу толгой”-н төсөлтэй холбоотой нэр бүхий дөрвөн хүнийг энэ сарын 1-нд баривчилсан гэсэн. Энэ талаар тодруулахгүй юу?

-Авлигатай тэмцэх газраас “Оюу толгой”-н төсөлтэй холбогдох “Батлагдсан гэрээ, эрх зүйн баримт бичгүүдийг батлахдаа эрх мэдэл албан тушаалын байдлаа урвуулан ашиглаж, илт хууль бус шийдвэр гаргасан, бусдад давуу байдал олгосон байж болзошгүй” гэх хэрэгт Сангийн сайд, Засгийн газрын хэрэг эрхлэх газрын даргаар ажиллаж байсан С.Баярцогт, Татварын Ерөнхий газрын дарга асан Б.Ариунсан, “Эрдэнэс Монгол” ХХК-ийн гүйцэтгэх захирал асан Б.Бямбасайхан нарыг нэмж холбогдуулан эрүүгийн хэрэг үүсгэн шалгаж эхэлсэн.

Эдгээр нэр бүхий хүмүүсийг энэ сарын 1-ний өдөр сэжигтнээр баривчилсан. Одоогоор хэргийн мөрдөн шалгах ажиллагаа үргэлжлэн явагдаж байна. Тэднийг Шүүхийн шийдвэр гүйцэтгэх ерөнхий газрын харьяа цагдан хорих 461 дүгээр ангид саатуулсан. Үүнээс гадна “Стандарт” банкнаас “Жаст” компанийн авсан зээлд “Эрдэнэт” үйлдвэр баталгаа гаргасан гэх асуудалтай холбогдуулж, тухайн үеийн “Эрдэнэт” үйлдвэрийн Худалдааны хэлтсийн даргаар ажиллаж байсан Г.Амарбатыг энэ сарын 1-нд баривчилж, хэргийн шалгалтын ажиллагаа үргэлжлэн хийгдэж байгаа юм.

-Сэжигтнүүдийг хорих хугацаа тодорхой болсон уу. Ямар үндэслэлээр сунгах төлөвтэй байгаа бол?

-Дээр нэр дурдсан хүмүүсийг цаашид яллагдагчаар цагдан хорих шаардлагатай гэж Авлигатай тэмцэх газар үзэж байгаа. Иймээс цагдан хорих, яллагдагчаар татах саналыг Нийслэлийн прокурорын газарт хүргүүлсэн. Мөн шүүхийн байгууллагад саналаа явуулсан. Шүүх шийдвэрээ гаргавал яллагдагчаар татаж, цагдан хорино. Шүүх өнөөдөр хэлэлцэнэ гэсэн.

-Эдгээр хүмүүсийг шалгаж байгаа нь Дубайн гэрээтэй яах аргагүй холбогдоно. Энэхүү гэрээг байгуулсан гол хүн бол Ерөнхий сайд асан Ч.Сайханбилэг. Түүнд ямар нэг байдлаар хэрэг үүсгэсэн үү, шалгах уу?

-Ерөнхий сайд асан Ч.Сайханбилэг одоогоор гадаад улсад байгаа. Тиймээс түүнд прокурорын дуудах хуудсыг хүргүүлсэн. Монголдоо ирэх үед нь энэ хэрэгт холбогдуулж, байцаалт авна.

-Амралтын өдрөөр ийнхүү баривчилгаа явагдсан нь улс төрийн зорилготой байсан гэдгийг ярих хүмүүс ч байна…

-Байцаан шийтгэх ажиллагаа ажлын болон амралтын өдөр гэж ялгадаггүй. Тасралтгүй үргэлжилж байдаг юм. Уг хэрэг дээр ажиллаж буй Авлигатай тэмцэх газрын ажлын хэсэг болон мөрдөгч нар бямба, ням гаригийг ялгалгүй ажиллаж байна. Эрүүгийн байцаан шийтгэх ажиллагааны журамд зааснаар “Байцаан шийтгэх ажиллагааг өдрөөр ялгаж өгдөггүй” юм. Харин цагаар ялгасан байдаг. Иймээс энэ бол хууль зөрчсөн ажиллагаа биш. Хууль журмын дагуу явагдаж буй.

Г.БЯСМАН: ПРОКУРОР ХЭРГИЙН МАТЕРИАЛТАЙ ТАНИЛЦАЖ БАЙНА

Нийслэлийн прокурорын газрын олон нийттэй харилцах ажил хариуцсан хяналтын прокурор Г.Бясман цаг үеийн асуудлаар өчигдөр мөн л мэдээлэл хийлээ. Тэрээр “Энэ сарын 01-ний өдөр Сангийн сайдаар ажиллаж байсан С.Баярцогт, Татварын ерөнхий газрын даргаар ажиллаж байсан Б.Ариунсан, “Эрдэнэс монгол” компанийн гүйцэтгэх захирлаар ажиллаж байсан Б.Бямбасайхан нарыг “Оюу толгой”-н хөрөнгө оруулалтын гэрээ болон далд уурхайн санхүүжилтийн төлөвлөгөө зэрэг бичиг баримт болон эрх зүйн баримт бичгүүдийг батлахдаа эрх мэдэл, албан тушаалын байдлаа урвуулан ашиглаж, хууль бус шийдвэрээр бусдад давуу байдал олгосон байж болзошгүй гэх үндэслэлээр сэжигтнээр татаж, хойшлуулшгүйгээр баривчлах ажиллагаа явагдсан. Уг хэргүүдэд холбогдсон хүмүүсийг Авлигатай тэмцэх газраас цаашид үргэлжлүүлэн яллагдагчаар татах шаардлагатай гэж үзжээ. Иймээс прокурорт яллагдагчаар татах санал ирүүлээд байна. Мөн “Эрдэнэт” үйлдвэрээр баталгаа гаргуулж “Стандарт” банкнаас их хэмжээний зээл авсан гэх хэрэгт холбогдуулан “Эрдэнэт” үйлдвэрийн Худалдааны хэлтсийн даргаар ажиллаж байсан Г.Амарбатыг сэжигтнээр татаж, хойшлуулшгүй баривчилгаа хийсэн. Авлигатай тэмцэх газраас цаашид Г.Амарбатыг үргэлжлүүлэн яллагдагчаар татах, шалгах саналыг Нийслэлийн прокурорын газарт ирүүллээ. Прокуророос хэргийн материалтай танилцаж байна” гэж мэдээллээ. Өнөөдөр тэдний хорих хугацаа сунгах эсэхийг Нийслэлийн прокурор, шүүхийн байгууллага хамтран шийдэх юм.

С.БАЯРЦОГТЫН АРААСЕРӨНХИЙ САЙДАСАН С.БАЯР, Д.ЗОРИГТ, Л.ГАНСҮХ, Б.ЭНЭБИШ, ДА.ГАНБОЛДТЭРГҮҮТЭЙ 300 ГАРУЙ ХҮНИЙГ ШАЛГАХААР БОЛЖЭЭ

Сангийн сайд, Засгийн газрын хэрэг эрхлэх газрын дарга асан С.Баярцогт нарт холбогдох эрүүгийн хэрэгт АТГ, Швейцарийн Ерөнхий прокурорын газартай хамтран ажиллаж байгаа билээ. Тус газраас С.Баярцогтыг “Оюу толгой” төслийн гэрээ байгуулахад авлига авсан байж болзошгүй ноцтой баримт ирсэн байдаг. Тухайлбал Рио Тинто корпорацийн холбоотой байж болзошгүй компанийн данснаас 2008 оны есдүгээр сард 8.2 сая евро буюу 10.1 сая ам.доллар шилжүүлэн авсан бөгөөд энэ нь нэг төрлийн мөнгө угаасан хэрэг хэмээн үзэж буйгаа мэдэгдээд байгаа. Эндээс эхлэн “Оюу толгой” төслийг хэрэгжүүлэх явцад манай улсын нэр нөлөө бүхий улстөрчид авлига авсан байж болзошгүй гэмт хэргийг шалгаж байна. С.Баярцогт энэ талаар мэдүүлэхдээ “Арван жилийн өмнө орсон их хэмжээний мөнгийг би монголын нэгэн бизнесмэнээс зээлсэн. Зээлсэн мөнгөө тэр данс руу нь эргүүлэн шилжүүлсэн байгаа” хэмээн мэдүүлсэн байдаг. С.Баярцогтыг саатуулан шалгаж байгаатай холбоотойгоор одоогийн байдлаар 300 гаруй хүнийг шалгахаар болоод байгаа гэдгийг албаны эх сурвалж онцолж байв. АТГ-ын Мөрдөн байцаах хэлтсээс “Оюу толгой” компани манай улсын Засгийн газартай гэрээ хийсэн асуудлаар тухайн үед Ерөнхий сайдар ажиллаж байсан С.Баярыг шалгахаар болсон байна. Тухайн үед Ерөнхий сайдын ажлын албанд ажиллаж байсан хүмүүсээс гэрчийн мэдүүлэг авахаар болж нэрсийг нь гаргасан байна. Мөн “Оюу толгой”-н гэрээнд гарын үсэг зурсан Эрчим хүчний сайд асан Д.Зоригтыг шалгах гэнэ. Д.Зоригтыг дагаад Эрчим хүчний яамны дэд сайд, төрийн нарийн бичгийн дарга, хэлтэс, газрын дарга нарыг шалгахаар болсон байна. Тус яамнаас гэрээ байгуулахтай холбоотойгоор ажлын хэсэг гарч, судалгаа шинжилгээ хийсэн байдаг аж. Байгаль орчины сайд асан Л.Гансүх болоод түүний удирдлага дор ажиллаж байсан арав гаруй хүнийг шалгахаар нэрсийг нь гаргажээ. Ерөнхий сайдаар ажиллаж байсан Н.Алтанхуягийн ахлах зөвлөхөөр ажиллаж байгаад “Нүүрс” хөтөлбөр хэрэгжүүлэхдээ улсад онц их хэмжээний хохирол учруулсан гэх хэргээр хорих ялаар шийтгүүлсэн Л.Гансүх дахин АТГ-т дуудагдах нь бололтой. “Айвенхоу майнз Монголиа Инк” ХХК-ийн хувь нийлүүлэгчийн гэрээнд гарын үсэг зурсан Эрдэнэс МГЛ” төрийн өмчит компанийн гүйцэтгэх захирлаар ажиллаж байсан Б.Энэбиш болон түүнтэй холбоотой таван хүнийг шалгах гэнэ. Б.Энэбиш нь оффшор банкинд данстай компаниудын нэрсийг зарласан. “Бату майнинг” компанийн монгол талыг хариуцсан захирлаар ажиллаж байхдаа есөн аймгийн нутгаас 187 лиценз авсан асуудлаар АТГ-т шалгагдаж байгаа билээ. 2008 онд “Эрдэнэс Оюу толгой” компанийн гүйцэтгэх захирлаар ажиллаж байсан Да.Ганболдыг ч шалгах асуудал яригдаж эхэлжээ. “Оюу толгой” уул уурхайн төслийг эхлүүлэх гэрээнд гарын үсэг зурсан сайд дарга, тэдний ойрын хүмүүс, тэр байтугай ар гэрийнхэн, нэр бүхий компанийн эздээс хүртэл эхний удаад гэрчийн мэдүүлэг авах мөрдөн байцаалтын төлөвлөгөө гарчээ.

Б.БЯМБАСАЙХАН “ОЮУ ТОЛГОЙ” КОМПАНИД ДАВУУ ЭРХ ОЛГОДОГ БАЙСАН ГЭВ

“Оюу толгой” ХХК дахь Монгол Улсын Засгийн газрын 34 хувийг эзэмшин, төлөөллийн эрхийг хэрэгжүүлдэг “Эрдэнэс Монгол” компанийн захирал Б.Бямбасайханд “Оюу толгой” гэрээний хэрэгжилттэй холбоотой асуудлаар эрүүгийн хэрэг үүсгэн шалгаж байгаа аж. Түүнийг өнгөрсөн долоо хоногийн ням гаригт гэртээ амарч байхад нь АТГ-ын алба хаагчид саатуулжээ. Б.Бямбасайханыг улс эх орныхоо эрх ашгийг үл тоомсорлон “Оюу толгой” компанид хэт давуу эрх олгосон гэх асуудал байгаа гэв. Өөрөөр хэлбэл, эрх мэдэл албан тушаалаа урвуулан ашиглаж улсад онц их хэмжээний хохирол учруулсан. Мөн “Оюу толгой” компанийн удирдлагуудаас авлига авсан байж болзошгүй гэх үндэслэлээр шалгаж байгаа гэнэ. 2014 онд Дэлхийн эдийн засгийн форумаас Дэлхийн Залуу Манлайлагчаар шалгарч байсан уул, уурхай эдийн засгийн томоохон эрдэмтдийн нэг хэмээн нэрлэгдэх болсон Б.Бямбасайхан цагдан хорих 461 дүгээр хорих ангид саатуулагдлаа. Түүнийг 2015 оны наймдугаар сард “Оюу толгой” компанийн ТУЗ-ийн гишүүнээр томилсон байдаг.

Б.АРИУНСАНГ ОЮУ ТОЛГОЙ” КОМПАНИЙГ ТАТВАРААС ЧӨЛӨӨЛСӨН ГЭХ АСУУДЛААР ШАЛГАЖ БАЙНА

Татварын ерөнхий газар, Тагнуулын ерөнхий газрын даргаар ажиллаж байсан Б.Ариунсан “Оюу толгой” компанийг татвараас чөлөөлсөн асуудалд шалгаж байгаа аж. Тэрбээр “Оюу толгой” компанийг татвараас чөлөөлөх тухай өөрийн гарын үсэг бүхий албан бичиг байгаа аж. Б.Ариунсанг Татварын ерөнхий газрын даргаар ажиллаж байхдаа татварт авах 127 сая ам.долларыг 30 сая ам.доллар болгож багасгасан гэх мэдээлэл байна. “Оюу толгой” компанид татварын хөнгөлөлт үзүүлсэн асуудлыг Татварын ерөнхий газраас шалгасан билээ. Ажлын хэсэг тус компанийг 2010- 2012 онд татвар дутуу төлсөн, санхүүгийн бусад ноцтой зөрчил гаргасан хэмээн дүгнэж акт гаргасан. Ингээд 130 сая ам.долларын торгууль ногдуулсан. Үүний 30 саяыг “Оюу толгой” компани 2015 онд барагдуулсан байдаг. Мөн л 2013- 2015 оны үйл ажиллагаанд Татварын ерөнхий газраас дахин шалгалт хийж 155 сая ам.долларын торгууль тавьсан байдаг. Энэ мэт байдлаар “Оюу толгой” компанитай холбоотой татварын маргаантай асуудал олон жилийн нүүрийг үзэж байгаа билээ. Татварын ерөнхий газрын “Оюу толгой” компанид шалгалт хийсэн мэргэжилтнүүдийн дүгнэж байгаагаар их хэмжээний татвар төлөхөөс зайлсхийж, монголын олон хууль журмыг зөрчиж байна гэх дүгнэлтийг гаргасан байдаг. Үүний дагуу АТГ-аас “Оюу толгой” компанийн удирдах албан тушаалтнууд болон нягтлан, тухайн үед Татварын ерөнхий газрын даргаар ажиллаж байсан Б.Ариунсан, дэд дарга болон хэлтсийн дарга, мэргэжилтнүүдийг шалгаж байгаа гэдгийг эх сурвалж онцолж байв. “Оюу толгой” компанийг татвараас чөлөөлсөн асуудалтай холбоотойгоор 20 гаруй хүн шалгагдах хар зураг гараад байгаа юм байна. Татварын ерөнхий газраас “Оюу толгой” компанид татварын акт тавьсан маргаан нь арбитрийн шүүхэд очоод байгаа. Манай улсын Засгийн газрыг “Оюу толгой” компанийн хувьцаа эзэмшигч “Туркиз Хил Ресурс” компани Арбитрийн шүүхэд өгсөн юм.

Г.АМАРБАТ “ЭРДЭНЭТ” ҮЙЛДВЭРИЙН БАРЬЦААНД ТАВЬЖ, ГАРЫН ҮСЭГ ЗУРСАН АСУУДЛЫН ГОЛ ГЭРЧ

“Эрдэнэт” үйлдвэрийн Худалдааны хэлтсийн даргаар ажиллаж байсан Г.Амарбатыг сэжигтнээр баривчлан, мөрдөн шалгаж байгаа гэдгийг дээр дурдсан билээ. Түүнийг АТГ-ынхан гэрээс нь баривчилсан байна. “Жаст” группын захирал Ш.Батхүүг өнгөрсөн сард баривчилсан. Г.Амарбатад эрүүгийн хэрэг үүсгэн шалгаж байгаа нь “Жаст” групп өмнөд Африкийн “Стандарт” банкнаас зээл авахын тулд уулын баяжуулах “Эрдэнэт” үйлдвэрээс баталгаа гаргуулсан хэргийн гол зангилаа тайлагдах магадлал өндөр байгаа гэнэ. Ш.Батхүү “Стандарт банкнаас зээл авахад Уулын баяжуулах “Эрдэнэт” үйлдвэрийн дарга Ч.Ганзориг, Төрийн өмчийн хорооны даргаар ажиллаж байсан Д.Сугар, УБТЗ-ын дарга Т.Очирхүү нар зээл авахад батламж гаргаж, гарын үсэг зурсан гэх асуудал байгаа. Одоогоор баталгаанд гарын үсэг зурсан, зураагүй гэх асуултын хариулт ил болоогүй байна. Гэхдээ Арбитрийн шүүхэд “Стандарт” банкнаас өгсөн бичиг баримт дотор баталгаанд дээрх хүмүүс гарын үсэг зурсан гэдгийг батлах гол баримт байгаа аж. Энэ баримтнаас үүдэлтэйгээр Арбитрийн шүүхэд манай Засгийн газар унасан гэх. “Эрдэнэт” үйлдвэрийн хуулийн зөвлөх Б.Мөнхжаргал, худалдааны хэлтсийн даргаар ажиллаж байсан Г.Амарбат нар “Жаст” групп зээл авахад “Эрдэнэт” үйлдвэр баталгаа гаргаж өгч байгаа асуудалтай холбоотойгоор “Стандарт” банкны төлөөлөлтэй уулзсан бичлэг байдаг гэнэ. “Эрдэнэт” үйлдвэрийн Улаанбаатар дахь төлөөлөгчийн газар уулзаж, 27-34 сая ам.долларын санхүүжилтийн талаар ярьсан байгаа аж. Дээрх хэргийг шалгаж байгаа мөрдөн байцаагчдын таамаглаж байгаагаар “Эрдэнэт” үйлдвэрийн хуулийн зөвлөх Б.Мөнхжаргал, худалдааны хэлтсийн даргаар ажиллаж байсан Г.Амарбат нарын өгсөн мэдүүлэг маш чухал гэнэ. Тэд “Эрдэнэт” үйлдвэрийн дарга асан Ч.Ганзориг, Төрийн өмчийн хорооны даргаар ажиллаж байсан Д.Сугар, УБТЗ-ын дарга Т.Очирхүү нар зээл авахад батламж гаргаж, гарын үсэг зурсан гэх асуудлын гол гэрч юм байна. Хэн үүрэг чиглэл өгч, баталгаа гарга гэж тушаал өгсөн нь энэ хоёр хүний өгсөн мэдүүлэг, нотлох баримт зэргээс тодорхой болох аж. Одоогоор “Эрдэнэт” үйлдвэртэй холбоотой хэрэг 100 гаруй хүнээс гэрчийн болон эрүүгийн хэргээр байцаалт авахаар болсон байна. Одоогоор Ерөнхий сайд асан С.Баяр, Үндсэн хуулийн цэцийн гишүүн Д.Сугар нарын 28 хүнээс мэдүүлэг авч, хавтаст хэрэгт тусгажээ.

АТГ энэ мэт улстөрчдийг албан тушаал, эрх мэдлээ урвуулан ашиглаж авлига авсан гэх хэрэгт баривчилгаа хийж байна. Зарим хуульчид “Муухайгаар хэлэхэд авлигалчдыг “агнах” махны машин ажлаад эхэлчихлээ” гэв. Сүр дуулиантайгаар эхэлсэн баривчилгаа ямар нэг шалтгаанаар тодорхойгүй болчихоод байгаа. Монголбанкны ерөнхийлөгч асан Г.Золжаргал, “Монголросцветмет” компанийн гүйцэтгэх захирал Д.Ганболд нарыг 48 цаг саатуулаад сулласан. Үүнээс болж холбогдох хэрэг нь замхарч байгаа гэдгийг албаны эх сурвалжууд болон хуульчид онцолж байгаа юм.

Э.ХҮРЭЛБААТАР

Б.УРАНЧИМЭГ

Categories
мэдээ эдийн-засаг

Н.Баяртсайхан: Монголбанк хуримтлагдсан алдагдлаа буурууллаа

Н.Баяртсайхан зурган илэрцүүд

Монголбанкны үйл ажиллагааны үзүүлэлт сүүлийн таван жилийн турш алдагдал зааж байсан ч өнгөрсөн онд ашигтай гараад байгаа билээ. Энэ талаар тодруулахаар Монголбанкны Ерөнхийлөгч Н.Баяртсайхантай ярилцсанаа уншигч танд толилуулж байна.

– Сүүлийн таван жилийн турш алдагдал хүлээж байсан Монголбанк нэг жилийн дотор яаж ашигтай ажиллав, бодлогын ямар арга хэмжээнүүд авч хэрэгжүүлсэн бэ?

Монголбанкны үйл ажиллагааны үзүүлэлт 2012-2016 онд тасралтгүй алдагдалтай гарч байсан нь үнэн. Гэвч хуримтлагдсан алдагдлыг нэмэгдүүлэхгүйн тулд сүүлийн хоёр жилд эрчимтэй арга хэмжээ авч ажилласнаар 2017 оны үйл ажиллагааны үр дүнгээр 176.6 тэрбум төгрөгийн ашигтай гарлаа. Ингэснээр өмнөх онуудад хуримтлагдсан алдагдлын хэмжээ буурч байгаа юм. Үүнд юу нөлөөлсөн бэ? гэхээр гадаад валютын улсын албан нөөцийг 2017 оны 12 дугаар сарын 28-ны өдрийн байдлаар 3 тэрбум ам.долларт хүргэж, өмнөх оны мөн үеэс 3 дахин өсгөсөн. Үүний тулд бид нэгдүгээрт, алт, мөнгө худалдан авах үнийг дэлхийн зах зээлийн ханштай нийцүүлэх шийдвэрийг гаргаснаар нийт худалдан авсан алт мөн онд 20.0 тоннд хүрэв. Энэ бол Монголбанк анх удаа ийм хэмжээний алт худалдаж авсан түүхэн өндөр үзүүлэлт шүү дээ. Алтны биет хэмжээний өсөлтөөс гадна дэлхийн зах зээл дээрх алтны үнэ оны эхнээс 10 орчим хувиар өссөн нь алтны орлого нэмэгдэх, цаашилбал нөөц өсөхөд эерэг нөлөөллөө. Хоёрдугаарт, Монгол Улсын Засгийн газраас Олон улсын хөрөнгийн захад “Хуралдай” болон “Гэрэгэ” бондыг гаргахад Монголбанк хамтран оролцож амжилттай гаргасан нь нөлөөлсөн. Гуравдугаарт, ОУВС-ийн “Өргөтгөсөн санхүүжилтийн хөтөлбөр”-ийн хүрээнд ОУВС болон донор орнуудаас 700 сая гаруй ам.долларын санхүүжилт орж ирсэн. Энэ бүхний үр дүнд гадаадын хөрөнгө оруулагчдын итгэл сэргэж, хувийн секторт гадаадын хөрөнгө оруулалт ч бас нэмэгдэв. Цаашдаа Монголбанк үйл ажиллагаанаас олох ашгаараа хуримтлагдсан алдагдлыг хааж, Төв банкны бие даасан хараат бус байдлыг сэргээхэд дэмжлэг болон ажиллана.

– Тэгвэл үүнээс өмнө яагаад алдагдалтай ажиллаж байсан юм бэ?

Монголбанкны алдагдлыг сүүлийн жилүүдэд ихээхэн хэмжээгээр нэмэгдүүлж, хуримтлагдахад хүргэсэн суурь шалтгаан нь валютын орох урсгал татарсан үед түүнтэй уялдуулан валютын гарах урсгалыг бууруулаагүй буюу валютын нөөцөө гамнаж хэмнээгүй явдал байсан. Түүхий эдийн үнийн уналт, макро эдийн засаг дахь гадаад сөрөг шоктой нийцүүлэн валютын ханшийг уян хатан тогтоохын оронд ханшийн сулралтыг удаашруулах, үр ашиггүй оролдлого (интервенц)-ыг Монголбанк хийсэн нь гадаад валютын нөөцийн хэмжээг хурдацтай бууруулж, улмаар гүйлгээнд байгаа Монгол төгрөгийн валютын баталгаа эрс буурсан. Бас нэг гол шалтгаан нь төсвийн шинжтэй үйл ажиллагаанд Монголбанк оролцож хэт өндөр зардал гаргасантай холбоотой. Монголбанкнаас төсвийн шинжтэй үйл ажиллагаа явуулж, төгрөгийн нийлүүлэлтийг нэмэгдүүлсэн нь урсгал дансны алдагдал өндөр байх, гадаад валютын хүрэлцээ алдагдах шалтгаан болсон.

– Энэ алдагдал Төв банкны хараат бус байдлыг алдагдуулахад хүргэсэн үү?

Тийм ээ. Олон жил дараалан алдагдалтай ажилласан Төв банк Засгийн газраас хараат бус, бие даасан байдлаа алдаж, өөрийн гол үүргүүдийн нэг болох инфляцийг тогтвортой нам дор барих чадвараа алддаг. Нэгэнт инфляцийг тогтвортой нам дор барих чадвараа алдвал Монголбанк үндсэн зорилт болох үндэсний мөнгөн тэмдэгтийн тогтвортой байдлыг хангах үүргээ гүйцэтгэж чадахгүйд хүрдэг. Иймээс бид Монголбанкны алдагдлыг бууруулах, хараат бус байдлаа бэхжүүлэх, инфляцыг тогтворжуулах, төгрөгийн тогтвортой байдлыг хангахын төлөө тууштай ажиллах болно.

– Олон улсын туршлагаас харахад төв банкууд алдагдлаасаа яаж гарсан байдаг юм бол?

Тухайлбал, Бразил, Чили, Чех, Унгар, Өмнөд Солонгос болон Тайланд улсын төв банкуудын алдагдалд орсон байдал нь янз бүр байдаг. Алдагдлыг арилгахад авч хэрэгжүүлсэн нийтлэг арга хэмжээнүүдийг авч үзвэл, тухайн улсын засгийн газраас үнэт цаас гаргах замаар санхүүжүүлсэн эсвэл тухайн улсын төв банк төсвийн шинжтэй үйл ажиллагааны зардлыг санхүүжүүлэхээ зогсоож, өөрөө алдагдлыг хариуцан арилгасан байдаг.

– Манай улсын төсвөөс Төв банкны алдагдлыг бууруулахад санхүүжилт хийсэн тохиолдол бий эсэх талаар мэдээлэл дуулдаж байгаагүй юм байна шүү?

ОУВС-гийн зүгээс аливаа Төв банк алдагдалтай ажилласан тохиолдолд Засгийн газрын үнэт цаас гаргах замаар алдагдлыг санхүүжүүлэхийг зөвлөдөг. Гэвч төсвийн алдагдал өндөр, хүндрэлтэй хэвээр, Засгийн газрын өрийн тааз тулсан байгаа тул өндөр дүнгээр нэмж үнэт цаас гаргах орон зай байхгүй байгаа юм. Иймд макро эдийн засгийн одоогийн нөхцөл байдалд Монголбанкны алдагдлыг ийм байдлаар шийдвэрлэх боломжгүй байна. Иймд, цаашид алдагдлыг нэмэгдүүлэхгүй байх, одоогийн хуримтлагдсан алдагдлыг урт хугацааны туршид тогтвортойгоор бууруулахын тулд хэд хэдэн тодорхой арга хэмжээг авч хэрэгжүүлэх шаардлагатай байгаа юм.

– Тухайлбал, ямар арга хэмжээнүүд авч болохоор байгаа талаар тодруулж өгөөч.

Юуны өмнө, Төв банкны чиг үүргээс давсан төсвийн шинжтэй бодлогын үйл ажиллагаа авч хэрэгжүүлэхгүй байх хэрэгтэй. Бид энэ ажлыг эхлүүлж Төв банк /Монголбанк/-ны тухай хуулиндаа нэмэлт өөрчлөлт оруулж, дээрх нөхцөл байдлыг бүрдүүлж чадсан. Үүний хамт гадаад зээлийг барагдуулах замаар Төв банкны гадаад өглөгийг бууруулж, балансын бүтцийг эрүүлжүүлэх шаардлагатай. Мөн валютын ханшийн макро эдийн засгийн суурь нөхцөлтэй нийцтэй байдлыг хадгалж, ханш уян хатан тогтох зарчмыг тууштай баримтлах, зах зээлд ажиллах боломж олгох хэрэгтэй. Мэдээжийн хэрэг, гадаад валютын нөөцийг хуримтлуулах бодлогыг үргэлжлүүлэн баримталж, гадаад валютын цэвэр нөөцийг эерэг түвшинд аваачих юм. Эдгээрээс гадна Төв банкны үнэт цаасаар дамжуулан арилжааны банкуудын илүүдэл нөөцийг татдаг тогтолцооноос аажмаар татгалзаж, Засгийн газрын үнэт цаасны хоёрдогч захад оролцох сонгодог хэлбэрт шилжих явдал. Эдгээр хүчин зүйлсийг бүрдүүлж чадаж байж алдагдалгүй байх боломж бүрдэнэ.

Ярилцсанд баярлалаа.

Categories
мэдээ спорт

Д.Сумъяа чансааны оноогоор дэлхийд тэргүүлжээ

Олон улсын жудо бөхийн холбоо тив, дэлхийд болсон цуврал тэмцээнүүдийн дүнг харгалзан жудочдын дэлхийн чансааг шинэчилдэг уламжлалтай. Тэгвэл өнгөрсөн долоо хоногт буюу гуравдугаар сарын 26-ны өдөр дэлхийн чансааны шинэчлэлийг зарлав.

Уг чансааны үзүүлэлтээс харахад олимпийн мөнгөн медальт, дэлхийн аварга, Монгол Улсын Хөдөлмөрийн баатар Доржсүрэнгийн Сумъяа дэлхийн жудочдоос хамгийн өндөр оноог авсан байна. Энэ нь дэлхийн дээд амжилтыг Монголын тамирчин эзэмшиж байгаа гэсэн үг юм.

Түүний авсан 7,237 оноо бол урьд өмнө нь хэн нэг тамирчин авч байгаагүй өндөр үзүүлэлт аж.

Дэлхийн шинэчилсэн чансаагаар долоон жинд тэргүүлэгчдийн оноог сонирхуулбал

  • эмэгтэй жудочдын 48 кг-ын жинд Мөнхбатын Уранцэцэг (Монгол) 5,970,
  • 52 кг-д Эрика Миранда (Бразил) 5,340,
  • 57 кг-д Доржсүрэнгийн Сумъяа (Монгол) 7,237, 6
  • 3 кг-д Тина Трстеняк (Словен) 5,375,
  • 70 кг-д Мария Портело (Бразил) 5,271,
  • -78 кг-д Гуусье Стийнхаус (Нидерланд) 5,500,
  • 78 кг-д Ким Мон Жон (БНСУ) 5,420 оноогоор тус тус тэргүүлсэн бол
  • эрэгтэйчүүдийн 60 кг-д Рюжи Нагаяма (Япон) 5,080,
  • 66 кг-д Хифиму Абэ (Япон) 5,000,
  • 73 кг-д Сончи Хашимото (Япон) 6,650,
  • 81 кг-д Хасан Халмурзаев (ОХУ) 4,850,
  • 90 кг-д Александр Куколж (Серб) 5,011,
  • -100 кг-д Варлам Липерталиани (Гүрж) 5800,
  • +100 кг-д Давид Моура (Бразил) 5,565 оноогоор жин бүрийнхээ нэгд бичигдсэн байна.

Бас нэгэн онцлогийг хэлбэл, Монгол Улсын тамирчин, дэлхийн аварга М.Уранцэцэг өрсөлдөгчөөсөө онооны ялгаагаар хол тэргүүлж яваа бол Японы Соичи Хашимото эрэгтэй жудочдыг манлайлжээ.

Categories
мэдээ нийгэм

Ж.Бат-Эрдэнэ сайд нүүрс тээвэрлэх зөвшөөрлийг хилээр нэвтрэх чадалд тохируулан олгохыг үүрэгдлээ

Зам, тээврийн хөгжлийн сайд Ж.Бат-Эрдэнэ Өмнөговь аймгийн Гашуунсухайт боомтоор нэвтэрч буй нүүрсний тээвэрлэлтэд үүсч буй хүндрэл бэрхшээлийг арилгах асуудлаар Хил хамгаалах ерөнхий газар, Гаалийн ерөнхий газар, “Эрдэнэс таван толгой” ХК, “Таван толгой” ХК, “Энержи ресурс” ХХК, “Гашуунсухайт авто зам” ХХК-ийн төлөөлөлтэй уулзаж, холбогдох газруудад үүрэг, чиглэл өглөө.

Энэ үеэр “Нүүрсний тээвэрлэлтийн талаар авах зарим арга хэмжээний тухай” Монгол Улсын Засгийн газрын 2017 оны 320 дугаар тогтоол хэрэгжсэнтэй холбогдон нүүрсний тээвэрлэлтэд гарсан эерэг, сөрөг тал, үүсээд буй нөхцөл байдлын талаар хил, гаалийн байгууллагууд болон уурхай эзэмшигч нарын саналыг сонсов.

Өнөөдрийн байдлаар Цагаан хадны гаалийн хяналтын бүсэд их хэмжээний нүүрсний нөөц бий болсноос гадна уурхайгаас гаалийн хяналтын бүс болон Гашуунсухайт боомтын чиглэлд хоёр талдаа 20-25 км-ийн тээврийн хэрэгслийн дараалал үүссэн байна.

Иймд ЗТХ-ийн сайд Ж.Бат-Эрдэнэ “Уурхайд хийгдэж буй нүүрсний ачилт, хилийн боомтоор нэвтэрч буй тээврийн хэрэгслийн тоо болон экспортлох нүүрсний хэмжээтэй уялдуулж хэрэгцээ шаардлагыг тодорхойлсны үндсэн дээр тээвэрлэлтийн гэрээ байгуулж, зөвшөөрөл олгож байх чиглэлийг уурхайн удирдлагууд болон “Автотээврийн үндэсний төв” ТӨҮГ-ын даргад үүрэг болголоо.

Categories
мэдээ нийгэм

15-39 насныханд В, С вирус илрүүлэх шинжилгээ хийнэ

“Элэг бүтэн Монгол” үндэсний хөтөлбөрийн хүрээнд энэ онд 15-39 насныханд В, С вирус илрүүлэх шинжилгээ хийнэ.

Тус хөтөлбөрийн эхний үе шат 2017 онд болж, 40-65 насны 353 мянган иргэн В, С вирусийн илрүүлэх шинжилгээнд хамрагджээ.

Харин энэ онд 15-39 насны 1.2 сая иргэнийг уг шинжилгээнд хамруулахаар төлөвлөжээ.
Аяны хоёр дахь шатны нээлт дөрөвдүгээр сарын 4-ний өдөр 11.00 цагаас Мишээл экспо төвд болох юм.

Categories
мэдээ улс-төр

​М.Энхсайхан Ерөнхий прокурорт захидал илгээлээ

Монгол Улсын Ерөнхий прокурор М.Энх-Амгалан Танаа

Юуны өмнө хууль сахиулах байгууллагууд, ажилтнууд улс төрийн хүндхэн нөхцөлд ажиллаж байгаа гэдгийг хүлээн зөвшөөрөхийн сацуу хэсэг бүлэг хүмүүс тэднийг улс төрийн өрсөлдөгчөө “намнах” хэрэгсэл болгочихвий гэсэн битүүхэн болгоомжлолтой явдагаа хэлэхийг хүсч байна.

Ийм болгоомжлол төрүүлэхүйц үйл явдал өнгөрсөн долоо хоногт надтай тохиосон юм. Болсон явдлыг ил захидал хэлбэрээр бичих нь нийтийн эрх ашгийг урьтал болгож олон нийтэд бодит мэдээлэл хүргэх гэсэн хэрэг юм. Үйл явдлыг зураглая.

  1. Миний бие Монгол улсаас Шведийн Вант улсад суугаа элчин сайд бөгөөд надад эрүүгийн 1ХХХХХХХ2 дугаартай хэрэгт АТГ-ын байран дээр 2018 оны 3 дугаар сарын 26-ны өдөр ирж гэрчийн байцаалт өгөхийг Нийслэлийн прокурор Гадаад Харилцааны яамаар дамжуулж өгсөн юм. Гадаад харилцааны яамнаас өгсөн чиглэлийн дагуу АТГ-ын байцаагчтай утсаар холбогдож цаг хугацаанд нь очихоо мэдэгдсэн.
  2. Гэрчийн мэдүүлэг авах мэдэгдэх хуудсанд 3 дугаар сарын 14-нд прокурор гарын үсэг зурсан байдаг. Гэтэл үүнээс 9 хоногийн өмнө 3 дугаар сарын 5-наас эхэлж хэвлэл, мэдээллийн хэрэгслээр “АТГ элчин сайдыг 7 долоо хоногийн хугацаанд ирэхийг шаардав”, “Элчин сайд дуудсан цаг хугацаанд ирсэнгүй” гэх зэргээр зохион байгуулалттай худал мэдээллүүд цацагдсан.
  3. Энэ нь авилгатай тэмцэх үүрэг бүхий төрийн байгууллага нь элчин сайдыг дуудаад тэр нь ирэхгүй хүчин мөхөсдөж буй мэт, гадаад бодлогыг хэрэгжүүлж байгаа ГХЯ, элчин сайдууд нь Монгол улсын хуулиас гадуур ажилладаг мэт сэтгэгдэл төрүүлэхүйц ер нь АТГ болон ГХЯ-ны нэр хүндэд хортой, угтаа Монгол төрийн нэр хүндийг гутаах бодлого гэж харагдаж байна.
  4. Элчин сайдууд ажлаа зохицуулж хуулийн байгууллагын ажилд дэм үзүүлэх нь ойлгомжтой боловч элчин сайдыг гэрчээр дуудах прокурорын мэдэгдэл нь энэ асуудлаархи илт хоосон улс төржсөн худал мэдээллийн дараа гарч байгаа нь Хууль хяналтын байгууллагыг улс төржилтөд санаатай ашиглах, эсхүл тэдгээр нь улс төржилтөд санамсаргүй ашиглагдах ажлын арга барилын алдаатай нөхцөл бий болсон байж магадгүй сэтгэгдэл төрүүлж байна.
  5. Миний бие АТГ-т мэдүүлэг өгөх явцдаа тодруулга авах бүх асуудлаар хариултыг өгсөн болно.
  6. Нэгэнт бүх асуудлаар хариултыг өгсөн тул урдчилан төлөвлөсний дагуу Швед улс рүү 3 дугаар сарын 29-ний өдөр нисэх гэж буйгаа мэдэгдэж, байцаагч нартай ойлголцсон болно.
  7. Гэтэл нийслэлийн прокурор Д. Ширэндэв нь буцах нислэгтэй өдөр давхцуулан АТГ дээр дахин гэрчийн байцаалт авах мэдэгдэл ирүүлэв.
  8. Нислэгээ гурав хоногоор хойшлуулж дурдсан цагт нь АТГ дээр ирсэн боловч уулзах учрах хүн гарсангүй. Тиймээс байцаагчид утсаар мэдэгдэж АТГ-ын жижүүрт ирсэн цаг, регистрийн дугаараа тэмдэглүүлсэн болно.

Нийслэлийн прокурор Д.Ширэндэвийн мэдэгдэх хуудас нь хэрэг мөрдөн байцаах үүрэг бүхий АТГ-тайгаа уялдаа холбоогүй хийгдэж байгаагаас харахад уг шийдвэрт улс төрийн нөлөөлөл орсон юм боловуу гэсэн миний болгоомжлолыг лавшруулав.

Ер нь нь АНУ, Англи, Европын зарим орнуудад суугаа элчин сайдуудтай холбоотой элдэв хоосон улс төржилт нь хувь хүмүүс, намуудын зөрчил мэт харагдавч үнэндээ Монгол Улсаас гуравдагч хөрш гэж нэрлэгддэг Олон улсын хамтын нийгэмлэгтэй тогтоосон олон талт харилцааны түвшинг алдагдуулах, харилцан итгэлцлийг бууруулах бодлого гэж ойлгогдож , Монгол Улсын эрх ашигт хортой үр дагавар дагуулах аюултай.

Өөрт тохиолдсон явдлаас харахад АТГ өөрт ногдсон үүрэгт ажлаа хийх гэж эрмэлздэг, харин тэднийг дээрээс нь улс төржүүлэх гэж оролдоод байна уу даа гэсэн сэтгэгдэл төрөв. Ийм нөхцөлд авилгатай хийх тэмцэл үр дүн муутай байх нь ойлгомжтой.

Ерөнхий прокурор Таныг Монгол улсын хууль тогтоомжийн дагуу прокурорууд нь хараат бус, бодит байх, төрийн бусад байгууллагынхаа ажилд саад учруулахгүй зохицож ажилладаг байх, хуулиар олгосон эрх мэдлээ улс төрийн зорилгоор ашиглахгүй байх нөхцлийг бий болгох талаар нэмэлт арга хэмжээ авч ажиллахыг хүсье.

Таныг хүндэтгэсэн,

Шведийн Вант Улсад суугаа Монгол Улсын элчин сайд М.Энхсайхан

2018 оны 4 дүгээр сарын 3


Categories
мэдээ нийгэм

Төрийн үйлчилгээ таны гэрт

Налайх дүүргийн Засаг даргын 2016-2020 оны үйл ажиллагааны хөтөлбөр, дүүргийн эдийн засаг, нийгмийг 2018 онд хөгжүүлэх үндсэн чиглэлд тусгагдсан нэг чухал зорилт бол “Хэвтрийн болон байнгын асаргаа шаардлагатай өндөр настан, хөгжлийн бэрхшээлтэй иргэдэд үзүүлэх эрүүл мэнд, халамж, банк болон боловсролын үйлчилгээг гэрээг хөнгөлөлттэй нөхцөлөөр үзүүлдэг тогтолцоог бий болгоно” гэсэн зорилт юм.

Энэ зорилтыг хэрэгжүүлэх талуудтай гэрээ хэлэлцээрүүд байгуулсны үндсэн дээр зорилт хэрэгжих биеллээ олж, хэвтрийн болон байнгын асаргаа шаардлагатай өндөр настан, хөгжлийн бэрхшээлтэй иргэдэд хэрэгцээт эрүүл мэндийн болон төрийн үйлчилгээг гэрт нь хүргэх ажил улсын хэмжээнд анхдагч болж эхлэлээ тавилаа.

Гэрт хүрэх үйлчилгээний үр дүнг хүртэгч, өндөр настан О-ийн охин хэлэхдээ: “Ээж маань нас сүүдэр 80 хол давсан. Одоо тэргэнцэртэй, асаргаанд байдаг. Манай гэр бүлд ямар бэрхшээл тулгарч байсан гэхээр эмнэлэгт хэвтэхийн тулд заавал 6 төрлийн шинжилгээ өгдөг байсан. Энэ 6 төрлийн шинжилгээг өгөхийн тулд ээжийгээ тэргэнцэртэй нь авч очиж, шатаар дээш, доошоо өргөж гаргах, мөн шинжилгээний хариуг авахын тулд олон газар өргөж явах хэрэг гардаг. Өргүүлж, дамжлуулж яваа ээж хүн “би үр хүүхдүүдээ зовоож байна” гэсэн сэтгэлийн шаналалтай маш хүндхэн нөхцөлтэй байдаг. Би ээжийгээ өргөж, дамжлан авч явахдаа дургүйцэж, төвөгшөөгөөгүй. Хамгийн гол нь эцэг, эх хүн үр хүүхдээ зовоож байна гэсэн сэтгэлийн их шаналалыг энэхүү гэрт хүрэх үйлчилгээ хөнгөлж өгч байна.

Дүүргийн ЗДТГ болон Эрүүл мэндийн нэгдлийн нарийн мэргэжлийн 3 эмч, 2 сувилагчтайгаа гэрт маань аппарат хэрэгсэлтэйгээ ирж, эхо, зүрхний цахилгаан бичлэг, бариа засал, сэргээн засах эмчилгээ, сувилахуйн тусламж үйлчилгээг настай ээжид маань үзүүлсэнд баяртай байна.

Төрийн үйлчилгээ гэрт нь ирлээ хэмээн ээж маань нулимс унаган баярлаж, төр намайг тоож байна, төр надад хүндэтгэл үзүүлж байна гэж хүндэтгэн хандсан. Магадгүй энэ сэтгэлээрээ тэр хүний биеийн байдал сайжрах зэрэг эерэг талууд гарахыг үгүйсгэхгүй. Тиймээс төрийн хайр энэрэл хамгийн их шаардлагатай хэсэг болох ахмадууд, хөгжлийн бэрхшээлтэй иргэдийн гэрт нь очих энэхүү үйлчилгээг хамгийн хэрэгтэй, чухал, дэвшилтэт, цаг үеэ олсон үйлчилгээ гэж бодож байна” гэв.

Цаашид зөвхөн эрүүл мэнд, сувилахуйн тусламжаас гадна нийгмийн халамж, нийгмийн даатгалын тэтгэвэр, тэтгэмжийг арилжааны банкуудтай хамтран гэрээр олгохоор төлөвлөөд байна гэж Налайх дүүргийн ЗДТГ-аас мэдээллээ.

Categories
мэдээ нийгэм

Баянгол дүүргийн бэлтгэл, бэлэн байдлыг шалгаж байна

Монгол улсын Засаг захиргаа, нутаг дэвсгэрийн нэгж, түүний удирдлагын тухай хууль, Гамшгаас хамгаалах тухай хууль болон Нийслэлийн Засаг даргын А/11 дүгээр захирамж, дүүргийн Засаг даргын А/87 дугаар захирамжийн дагуу нийслэлийн Онцгой байдлын газраас “Гамшгаас хамгаалах бэлэн байдлын үзлэг”-ийг Баянгол дүүрэгт зохион байгуулж байна.

Дүүргийн нутаг дэвсгэрт тохиолдож болзошгүй гамшгийн аюулаас хүн, мал амьтан, эд хөрөнгө, хүрээлэн байгаа орчныг урьдчилан сэргийлэх, аврах, хор уршгийг арилгах, хойшлуушгүй сэргээн босгох үйл ажиллагаанд иргэн, аж ахуйн нэгж байгууллагын томилгоот бүрэлдэхүүнийг сурган дадлагажуулах, гамшгийн үеийн хүч хэрэгслийн харилцан ажиллагааг сайжруулах зорилготой тус бэлэн байдлын үзлэгийг НОБГ-ын дэд дарга, хурандаа А.Дашнямаар ахлуулсан ажлын хэсэг удирдан явуулж байгаа юм.

Үзлэг шалгалтаар тус дүүргийн Онцгой комисс, нутгийн захиргааны болон аж ахуйн нэгж, байгууллагын гамшгаас хамгаалах төлөвлөлт, сургалт, гамшгийн үеийн удирдлага, зохион байгуулалт, харилцан ажиллагаа зэрэг нийт 19 чиглэлээр дээрх байгууллагуудыг дүгнэж, гамшгаас хамгаалах бэлтгэл бэлэн байдлыг хэрхэн хангах чиглэлээр мэргэжлийн заавар, зөвлөмжийг өгч ажиллана гэж нийслэлийн Онцгой байдлын газраас мэдээллээ.

Categories
мэдээ нийгэм

С.Баярцогтыг үргэлжлүүлэн хорихоор болжээ

С.Баярцогт зурган илэрцүүдСангийн сайд асан С.Баярцогтыг энэ сарын 1-нд цагдан хорьсон. Түүнийг үргэлжлүүлэн цагдан хорих эсэхийг шийдэх шүүх хурал сая боллоо. Улмаар түүнийг үргэлжлүүлэн 30 хоног хорих шийдвэр гаргалаа. Шүүх хурлын дараа түүний өмгөөлөгч Г.Орхон “Миний үйлчлүүлэгч С.Баярцогтыг энэ сарын 1-нд гэрчээр мэдүүлэг авна гэж АТГ дуудсан. Мэдүүлэг авч дуусаад шууд хорьсон. Өчигдөр яллагдагчаар татсан тогтоолоо танилцуулсан. Өнөөдөр үргэжлүүлэн хорих шийдвэр гаргалаа” гэв.

Categories
мэдээ нийгэм

Өнөөдрийн үйл явдлуудын товч

08.00 цагт Баянзүрх дүүрийн 55 дугаар тусгай сургуульд “Тусгай хэрэгцээт боловсролтой танилцах нэг өдрийн арга хэмжээ” болно.

09.30 цагт 100 айлын уулзвар дээр Сүхбаатар дүүргийн цагдаагийн албанаас автозамын түгжрэлийг арилгах арга хэмжээний талаар мэдээлэл хийнэ. Утас: 93216886.

10.00 цагт НЗДТГ-т Нийслэлийн Засаг дарга С.Батболд дүүргүүдийн тохижилт үйлчилгээний газруудын удирдлагуудтай уулзана.

10.00 цагт Хууль зүйн үндэсний хүрээлэнд НИТХ дахь АН-ын бүлгээс Нийслэлийн эрх зүйн байдлын тухай хуулийн шинэчилсэн найруулгын төслийн талаар хэлэлцүүлэг зохион байгуулна.

10.00 цагт ЦССҮТ-д “Сар бүрийн 3-Цусаа бэлэглэх өдөр” арга хэмжээ болно.

10.30 цагт Хангарди ордонд Нийслэлийн Засаг дарга С.Батболд нийслэлийн 152 хорооны дарга нартай уулзана.

11.00 цагт ШУТИС-ийн Номын санд БСШУСЯ, Их дээд сургуулиудын консорциум, Сингапурын ТЕМАСЕК сан багшийн хөгжлийг дэмжих чиглэлд хамтран ажиллах Санамж бичигт гарын үсэг зурна.

11.00 цагт Монголын урчуудын эвлэлийн үзэсгэлэнгийн танхимд “Араншин” нөхөрсөг шог зургийн үзэсгэлэнгийн уран бүтээлчид мэдээлэл хийнэ.

11.30 цагт “Монгол ньюс” мэдээллийн төвд Боловсрол, шинжлэх ухааны үйлдвэрчний эвлэлийн холбооноос “Дээд боловсролын тогтолцоо-Тогтвортой хөгжил” сэдвээр мэдээлэл хийнэ.

11.30 цагт “Үндэсний мэдээллийн төв”-д хуульчид шүүхийн байгууллагын хууль бус үйл ажиллагааны талаар мэдээлэл хийнэ.

12.00 цагт “Holiday Inn” зочид буудалд Эдийн засгийн сэтгүүлчдийн “Өөрчлөгч” клубээс “Гурван тулгуурт хөгжлийн бодлогыг бүтээн байгуулалттай хэрхэн уялдуулах вэ” хэлэлцүүлэг зохион байгуулна. Хэлэлцүүлэгт БХБ-ын дэд сайд Ш.Лхамсүрэн, Нийслэлийн Засаг даргын орлогч П.Баярхүү болон холбогдох албаныхан оролцоно.

15.00 цагт Хэвлэлийн хүрээлэнд “Жендерийн мэдрэмжтэй сэтгүүл зүйд миний оролцоо” шилдэг бүтээлийн уралдааны зохион байгуулагчид мэдээлэл хийнэ.