Month: February 2018

Японы “Сумитомо Форестри” компани 2041 он гэхэд дэлхийд хамгийн өндөр буюу тэнгэр баганадсан модон барилга барихаар төлөвлөж байгаа ажээ. Энэхүү барилгыг тус компани үүсэн байгуулагдсаныхаа 350 жилийн ойг тэмдэглэх хүрээнд барьж байгуулахаар болсон талаар ВВС агентлаг мэдээлсэн байна.

Компанийн мэдэгдэж буйгаар, нийт 70 давхар байх тус барилгад 180 мянган шоо метр мод ашиглах аж. Барилгын хийцийн 10 хувь нь ган байх бөгөөд зөвхөн Японы мод сонгох юм байна. Нийт 8000 орчим өрөөтэй тус барилгын эргэн тойрон цэцэрлэгт хүрээлэн болон ногооны талбай байх аж. Тэнгэр баганадсан энэхүү барилга нь мөн дэлгүүр, зочид буудал зэрэг үйлчилгээний газруудтай байх юм байна.

Барилга барих нийт өртөг 5.9 тэрбум ам.доллар буюу 600 тэрбум йен бөгөөд энэ нь тэнгэр баганадсан энгийн барилгын өртгөөс хоёр дахин их ажээ. Өнөөдрийн байдлаар дэлхийн хамгийн том модон барилга Ванкуверт байдаг 53 метр өндөр оюутны байр юм.

Эрүүл мэндийн яам болон харьяа 16 байгууллага, нийслэлийн Эрүүл мэндийн газар энэ сарын 15-наас өчигдрийг хүртэл эмнэлгийн тусламж, үйлчилгээг иргэдэд түргэн, шуурхай үзүүлжээ. Мөн улсын хэмжээнд төв эмнэлэг, тусгай мэргэжлийн төв, түргэн тусламжийн төв 24 цагаар үйл ажиллагаа явуулж, дүүргийн эрүүл мэндийн төвүүдийн мэс засал, дотор, хүүхэд, шүдний кабинет, Өрхийн эрүүл мэндийн төвүүд, Шүд эрүү нүүрний төв баярын өдрүүдэд 10:00-16:00 цаг хүртэл ажилласан байна. Сар шинийн баярын үеэр улсын хэмжээнд яаралтай түргэн тусламжаар 12878, амбулториор 9783 дуудлага хүлээн авчээ. Үүнээс хүүхдийн 2467, насанд хүрэгсдийн 2528, осол гэмтлийн 883, архины хордлого 487, төрөх 630, бусад 3355 дуудлага авч үйлчилжээ.

Эрүүл мэндийн яамнаас хөдөө орон нутгийн хүн амд үзүүлэх эрүүл мэндийн тусламж, үйлчилгээний хүртээмж, чанарыг дээшлүүлэхэд дэмжлэг үзүүлэх зорилгоор Хөвсгөл аймгийн Арбулаг, Эрдэнэбулган сумын эрүүл мэндийн төвүүдэд түргэн тусламжийн автомашиныг өнөөдөр гардуулан өглөө. Эрүүл мэндийн яамнаас 2017 онд Улсын төсвийн хөрөнгө оруулалтаар нийт 176 түргэн тусламжийн автомашиныг орон нутгийн эрүүл мэндийн байгууллагуудад хүлээлгэн өгсөн бөгөөд зудын нэн их эрсдэлтэй аймаг, сумдыг түргэн тусламжийн автомашинаар хангах ажлуудыг хийж байна.

Уг арга хэмжээнд УИХ-ын гишүүн, Эрчим хүчний сайд Ц.Даваасүрэн, ЭМЯ-ны Бодлого төлөвлөлтийн газрын дарга Р.Оюунханд, аймаг орон нутгийн түргэн тусламжийн автомашины жолооч нар оролцлоо.

“Мөнгөн Улаанбаатар” спорт наадмын хүрээнд нийслэлийн төр, захиргааны байгууллага, иргэдийн “Цасны баяр” арга хэмжээг зохион байгуулах ажлын хэсэг өнөөдөр хуралдлаа. Хурлаар “Цасны баяр”-ын үеэр зохион байгуулагдах арга хэмжээ, хөтөлбөрүүд, нэгдсэн төлөвлөгөөг хэлэлцэв.

“Мөнгөн Улаанбаатар” спорт наадмын хүрээнд нийслэлийн төр, захиргааны байгууллага болон нийслэлчүүдийн “Цасны баяр” энэ сарын 24-ний бямба гарагт Хандгайт цанын баазад зохион байгуулагдах юм. Жил бүрийн хаврын эхний сард нийслэлчүүд цасны баяраа хийдэг уламжлалтай. Тус цасны баярт нийслэлийн есөн дүүрэг, нийслэлийн Засаг даргын хэрэгжүүлэгч 33 агентлаг, НӨҮГ-ын нийт албан хаагчид оролцох юм.

Хурлын үеэр нийслэлийн Засаг даргын орлогч, ажлын хэсгийн ахлагч Ш.Анхмаа Цасны баярт оролцож байгаа нийслэлийн төр, захиргааны байгууллагын албан хаагчдыг нийтийн тээврээр үйлчлүүлэхийг уриаллаа. Мөн цасны баяраар зохиогдох уралдаан, тэмцээнийг дүгнэхдээ нийтийн тээврээр үйлчлүүлсэн байдлыг харгалзан үзэж, байр эзлүүлнэ гэдгээ анхааруулж байв.

ЦУОШГ-аас өгсөн мэдээгээр энэ сарын 24-ний бямба гарагт -6 хэмийн хүйтэн байх аж. Мөн Хандгайт, Санзай чиглэлийн автобус 45 минут тутамд Тэнгис кино театрын өмнөх зогсоолоос иргэдэд үндсэн тарифаараа үйлчлэх юм. Хотын удирдллагууд нийслэлийн нийт иргэдээ “Цасны баяр”-т өргөнөөр оролцохыг уриаллаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Гэрэл зурагчин Х.Сэргэлэнбатын “Миний эх орон” байгалийн гэрэл зургийн үзэсгэлэнгийн нээлт Дундговь аймгийн музейн үзэсгэлэнгийн танхимд боллоо. Үзэсгэлэнд Дэлхий болон Монголын нэн ховордсон зэрлэг ан амьтан, ховор ургамал, байгалийн үзэсгэлэнт газрууд, Монгол орны дөрвөн улирлын өнгө төрхийг илэрхийлсэн 40 гаруй бүтээл тавигджээ. Тус үзэсгэлэнгийн нээлтэд аймгийн Засаг Дарга О.Бат-Эрдэнэ, Засаг Даргын орлогч Ж.Мөнхчулуун, Боловсрол, соёл, урлагийн газрын дарга Ц.Бумангэрэл, Дундговь аймгийн музейн захирал М.Бямбажав нарын албаны хүмүүс болон иргэд, хүүхдүүд оролцлоо.

Тэрбээр нээлтийн үеэр 21 аймагт гаргах “Миний эх орон” үзэсгэлэнгээ төрөлх нутаг Дундговь аймгаасаа эхэлж байгаадаа баяртай байна. Энэ үзэсгэлэнд тавигдсан бүтээлүүд маань миний долоон жилийн хөдөлмөр зүтгэлээр үүссэн. Монгол Улсын Улаан номонд орсон 33 хөхтөн амьтан байдгийн 15 нь энэ үзэсгэлэнд дэлгэгдсэн байгаа. Мөн төрийн тахилгат уулс, Монгол орны үзэсгэлэнт газар, дөрвөн улирлын өнгө төрхийг харуулсан юм аа. “Миний эх орон” нь миний найм дахь бие даасан үзэсгэлэн болж Та бүхэндээ хүрч байгаад таатай байна” гэсэн юм. Үзэсгэлэн нийт 14 хоног гарч байгаа билээ.

Гэрэл зурагчин Х.Сэргэлэнбат нь анхны үзэсгэлэнгээ 2015 онд “Гэгээн эгшин” нэртэй гаргаснаас хойш “Сайхан Монгол”, Дөрвөн өнгө” үзэсгэлэнг гаргасан юм. Мөн одоогоор “Монголын зэрлэг ан амьтдын тусгай байгал”-ийн гэрэл зургийн үзэсгэлэн нь БНСУ-ын Тэжон, Тэгү, Гуанжу, Бусан хотуудад бүтэн жилийн хугацаанд аялан дэлгэгдэж байгаа билээ.

ЭМЯ болон харьяа 16 байгууллага, НЭМГ энэ сарын 15-наас өчигдрийг хүртэл эмнэлгийн тусламж, үйлчилгээг иргэдэд түргэн, шуурхай үзүүлжээ. Мөн улсын хэмжээнд төв эмнэлэг, тусгай мэргэжлийн төв, түргэн тусламжийн төв 24 цагаар үйл ажиллагаа явуулж, дүүргийн эрүүл мэндийн төвүүдийн мэс засал, дотор, хүүхэд, шүдний кабинет, Өрхийн эрүүл мэндийн төвүүд, Шүд эрүү нүүрний төв баярын өдрүүдэд 10:00-16:00 цаг хүртэл ажилласан байна. Сар шинийн баярын үеэр улсын хэмжээнд яаралтай түргэн тусламжаар 12878, амбулториор 9783 дуудлага хүлээн авчээ. Үүнээс хүүхдийн 2467, насанд хүрэгсдийн 2528, осол гэмтлийн 883, архины хордлого 487, төрөх 630, бусад 3355 дуудлага авч үйлчилжээ.