Month: February 2018

Монголын уулчдын үндэсний холбоо нь Онцгой байдлын ерөнхий газартай хамтран ажиллахаар болжээ.

Энэ хүрээнд Онцгой байдлын ерөнхий газрын тэргүүн дэд дарга, бригадын генерал Г.Ариунбуян, дэд дарга, хурандаа Б.Ууганбаяр нар Монголын уулчдын үндэсний холбооны ерөнхийлөгч Б.Тулга, дэд ерөнхийлөгч Б.Золжаргал нарыг энэ сарын 23-нд хүлээн авч уулзан хамтран ажиллах санамж бичигт гарын үсэг зурсан байна.

Монгол Улсын уулын аврах ажиллагааны үндэсний тогтолцоог бий болгохын тулд Олон улсын холбоодоос хүлээн зөвшөөрсөн сургалтын хөтөлбөрийн дагуу бэлтгэгдсэн сургагч багш, уулын аврагч, дасгалжуулагчдыг бэлтгэх, мэргэжлийн уулчдын хамтарсан уулын аврах багийг байгуулах, мэргэжил, арга зүйн зөвлөгөө өгөх, шаардлагатай сургалт, бэлтгэлийн бааз байгуулах асуудлыг санамж бичигт тусгасан аж.

ОБЕГ энэ онд Завхан аймгийн Отгон сумын нутаг дэвсгэр “Отгонтэнгэр”, Баян-Өлгий аймгийн Цэнгэл сумын нутаг дэвсгэр “Алтай таван богд” ууланд баруун бүсийн хэмжээнд өндөр уулан дахь эрэн хайх, аврах ажиллагааны дадлага, сургалтыг холбогдох мэргэжлийн байгууллагатай хамтран зохион байгуулахаар төлөвлөж тухай энэ үеэр дурдагдсан байна.

Нийслэлийн ЗДТГ болон Энэтхэг Улсын Логин байгууллага хамтран төрийн албан хаагчдыг чадавхжуулах, төрийн албан хаагчийн сургалтын хөтөлбөр боловсруулах чиглэлээр ажиллахаар болсон. Энэ хүрээндхоёр тал Монгол Улсын Төрийн албаны зөвлөлийн удирдлагууд, тус байгууллагын төлөөлүүдтэй албан уулзалт хийлээ.

Төрийн үйлчилгээг хүнд чирэгдэлгүй, шуурхай, шударга хүргэхэд тухайн үйлчилгээг үзүүлж буй төрийн албан хаагчийн чадвар, мэргэшсэн байдлаас ихээхэн хамаардаг. Тиймээс төрийн албан хаагчдын, ялангуяа анхан шатны нэгжид ажиллаж байгаа ажилтнуудын чадавх, ур чадварыг дээшлүүлэх, мэргэшүүлэх шаардлагатай. Энэ хүрээнд төрийн албан хаагчдыг чадавхжуулах сургалтуудыг тус байгууллагатай хамтран хийх юм.

“ЛОГИН”-ы багийн ахлагч Прета Лалл “Төрийн албан хаагчдын сургалтын хөтөлбөрийн цогц агуулгыг боловсруулах чиглэлээр ажиллаж байна. Нийслэлийн хэмжээнд ажиллаж байгаа албан хаагчдын хэрэгцээнд суурилж ажиллана. Хотын хүн амын төвлөрөл ихэсч байгаатай холбоотойгоор ямар ур чадвар, дадал, сургалт хэрэгтэй вэ гэдгийг судалж тэр хэрэгцээнд нийцүүлж хөтөлбөрөө гаргана” хэмээв.

ЛОГИН нь төвлөрлийг сааруулах, орон нутгийн засаглалыг бэхжүүлэхэд чиглэсэн зорилгын дор нэгдсэн Зүүн өмнөд Азийн орнуудын оролцогч байгууллагуудын сүлжээ юм.

Улаанбаатар хотын хөгжлийн корпораци ХК-аас “Олон улсын жишигт нийцсэн такси үйлчилгээг нэвтрүүлэх нь” сэдэвт нээлттэй хэлэлцүүлэг, чөлөөт уулзалт ирэх даваа гарагт Нийслэлийн иргэний танхимд болно.

Нийслэлийн Засаг дарга бөгөөд Улаанбаатар хотын захирагчийн мөрийн хөтөлбөрт “Улаанбаатар хотын такси үйлчилгээг хөгжүүлэх хөтөлбөр хэрэгжүүлнэ” гэсэн заалт туссан.

Иймд уг нээлттэй хэлэлцүүлгээр иргэд, такси үйлчилгээ эрхлэгч ААН, холбогдох харьяа байгууллагууд такси үйлчилгээний өнөөгийн нөхцөл байдал, хөрш зэргэлдээ хотуудын такси үйлчилгээний талаарх судалгаа болон цаашид баримтлах бодлогын асуудлыг хэлэлцэх нь.

ХХААХҮЯ-аас “Эрүүл хүнс-Эрүүл Монгол хүн” зорилтын дор 2020 он гэхэд үйлдвэрийн аргаар боловсруулсан зарим төрлийн хүнсний бүтээгдэхүүн, хоолны давсны агууламжийг 30 хүртэл хувиар бууруулахаар болж “Давс багатай бүтээгдэхүүн үйлдвэрлэлийг дэмжье” аяныг энэ сараас эхлүүллээ.

Энэхүү аян хэрэгжсэнээр хүн амын дунд давсны зохистой хэрэглээг бий болгох, иоджуулсан давсны дотоодын үйлдвэрлэлийг нэмэгдүүлэх, давс багатай хоол, хүнсний үйлдвэрлэл өргөжүүлж амьдралын зөв хэвшлийг бүрдүүлж, ингэснээр хэт их давсны хэрэглээнээс үүсэх өвчлөлийн эрсдлийг бууруулах боломж бүрдэх юм. Тус аянд Хан-Уул дүүргийн нэгдсэн эмнэлэг, Сонгинохайрхан дүүргийн 112 дугаар цэцэрлэг, Баянгол дүүргийн 57, 94 дугаар цэцэрлэг, Номадс, Броадвэй сүлжээ ресторан, Хан идэрмэг ХХК, ДЦС-4 ХК-ийн Эрчим зоогийн газар, Атар өргөө, Мах маркет ХХК зэрэг байгууллага, аж ахуй нэгжүүд 4-10 гаруй нэр төрлийн хоол, хүнсний бүтээгдэхүүнийхээ давсны агууламжийг бууруулахаар болсон байна.

Аяны хүрээнд хүнс, хоол үйлдвэрлэгч нарт арга зүйн зөвлөгөө өгөх, давс багатай хоолны цэсийг боловсруулан хоол үйлдвэрлэлд нэвтрүүлэх, давсны агууламжийг хянах, хэрэглэгчдэд зориулсан сургалтыг үе шаттай зохион байгуулах зэрэг олон ажлыг хийхээр төлөвлөжээ. Уг аян ирэх оныг дуустал хоёр үе шаттай хэрэгжинэ.

АНУ-ын Дотоодын Аюулгүй байдлын яамнаас H-2 визний ангилалд Монгол Улсыг багтаасан. Уг визийг манай иргэд ирэх сарын нэгнээс мэдүүлж эхлэхтэй холбогдуулж АНУ-аас Монгол Улсад суугаа ЭСЯ-наас Н-2 виз мэдүүлэх ерөнхий журмын талаар дараах зөвлөмжийг гаргажээ.

Алхам 1: Түр хугацаагаар ажилчид авах шаардлагатай байгаа компани эсвэл зуучлагч байгууллагаа АНУ-аас олно. АНУ-ын Элчин Сайдын Яам нь аливаа ажил олгох компани, зуучлагч байгууллага эсвэл боломжит ажлын байрны жагсаалт олж өгөх, ажлын байр олгох үйлчилгээ үзүүлдэггүй болно.

Алхам 2: H-2 виз нь “petition” буюу урьдчилан зөвшөөрөгдсөн өргөдөлд үндэслэн олгогддог визний төрөл юм. АНУ дахь ажил олгогч эхлээд АНУ-ын Хөдөлмөрийн Яамнаас ажиллах хүчний зөвшөөрөл авах бөгөөд улмаар цагаачлалын бус түр хугацааны ажилчин авах өргөдлийг (I-129 маягт, https://www.uscis.gov/sites/default/files/files/form/i-129.pdf) АНУ-ын Иргэншил ба Цагаачлалын албанд гаргана. Зөвхөн I-129 өргөдөл батлагдсан тохиолдолд боломжит ажил горлигч нь АНУ-ын виз мэдүүлнэ.

Алхам 3: Ажлын гэрээтэйгээ танилцаж I-129 маягт буюу өргөдөл нь батлагдсан эсэх болон хүчинтэй хугацааг шалгах хэрэгтэй. Зах зээлийн судалгаа хийж ажил олгогч таньд зах зээлийн ханштай дүйцэх хэмжээний цалин олгох эсэхийг баталгаажуулна. Англи хэл дээр бичигдсэн ажлын гэрээ хүлээн авч гарын үсгээ зурах ёстой бөгөөд хэрэв Англи хэл ойлгодоггүй бол Монгол эсвэл өөр ойлгодог хэл дээрхи гэрээн дээр бас гарын үсгээ зурсан байх шаардлагатай.

Алхам 4: I-129 өргөдөл нь батлагдсан эсэхийг нотолсоны дараа DS-160 электрон визний анкетыг бөглөн Хаан банкинд визний хураамж болох 190 доллартай тэнцэх төгрөг тушаана. (http://www.ustraveldocs.com/mn/mn-niv-visafeeinfo.asp).

Алхам 5: H-2 ангиллын визний ярилцлагын цагаа товлоно (https://cgifederal.secure.force.com/).

Алхам 6: Виз мэдүүлэгч нь АНУ-ын Элчин Сайдын Яам/ Консулын хэлтэст визний ярилцлаганд орно. Визний ярилцлаганд ирэхдээ хүчин төгөлдөр паспорт, АНУ-ын визний шаардлага хангасан нэг хувь цээж зураг (http://www.ustraveldocs.com/mn/mn-niv-photoinfo.asp) болон I-129 өргөдлийн баримтын дугаар зэргийг авчирна.

Алхам 7: Виз олгогдсон тохиолдолд визээ авч АНУ-ын хил дээр очин H-2 түр хугацааны ажилтны визээр нэвтрэх зөвшөөрөл хүснэ.

Алхам 8: Ажлын гэрээ дуусгавар болсны дараа H-2 визний статус зөрчих аливаа үйлдэл хийлгүй АНУ-д байх зөвшөөрөгдсөн хугацаа дуусахаас өмнө Монголд буцаж ирнэ. Хэрэв илүү дэлгэрэнгүй мэдээлэл шаардлагатай бол
https://travel.state.gov/
https://search.uscis.gov/
http://www.ustraveldocs.com/ цахим хуудсуудаас авах боломжтой бөгөөд H-2 визний ангилалд Монгол Улсыг багтаасан нь итгэл хүлээлгэсэн хэрэг юм. Иймд визээ ямар нэгэн байдлаар буруугаар ашигласан эсвэл зөрчсөн тохиолдолд АНУ-ын Дотоолын Аюулгүй байдлын яам визийг цуцлах эрхтэй гэдгийг тус ЭСЯ-наас мэдэгдэв.

Засгийн газрын шийдвэрээр түүхий нүүрсний хэрэглээг хязгаарлах гэж байгаатай холбогдуулан сайжруулсан түлшний үйлдвэрлэлийг нэмэгдүүлэх, дэмжих ажлын хэсэг байгуулагдан ажиллаж байна.

Засгийн газар, нийслэл, салбарын яамдын төлөөлөл бүхий 16 хүний бүрэлдэхүүнтэй ажлын хэсэг Дархан-Уул, Дорноговь, Говьсүмбэр, Төв аймаг, нийслэлд үйл ажиллагаа явуулж байгаа болон үйлдвэрлэл явуулах бололцоотой 8 үйлдвэр, “Эрдэнэс таван толгой” ТӨХК, ” Энержи Ресурс” ХХК-иудын хоёр уурхайтай газар дээр нь очиж танилцан дүгнэлтээ гаргасан байна.

“Монгол шахмал түлш нэгдэл”-д гишүүнээр элссэн 11 аж ахуй нэгж жилдээ 300 мянган тонн сайжруулсан түлш үйлдвэрлэнэ. Мөн Дулааны II цахилгаан станцын дэргэдэх сайжруулсан шахмал түлшний үйлдвэр 200 мянган тонныг үйлдвэрлэнэ гэсэн урьдчилсан тооцоо гаргажээ.

Засгийн газар ирэх оны дөрөвдүгээр сарын 1-нээс түүхий нүүрсийг ахуйн зориулалтаар оруулахгүй байх шийдвэр гаргасан. Иймд сайжруулсан түлшийг нэг стандартаар үйлдвэрлэх асуудал яригдаж байгаа тул тус ажлын хэсэг ажиллаж байгаа юм.