Month: January 2018

Иргэдийн гар утас, автомашины хучлага болон бусад зүйлийг хулгайлсан хэргийг цагдаагийн алба хаагчид илрүүлэн шалгаж байна. Тухайлбал, Баянхонгор аймгийн харьяат Э нь Баянзүрх дүүргийн нэгдүгээр хороонд оршин суух Ц-ийн “Vingroud” автомашины хучлагыг хулгайлан авч явж байсныг цагдаагийн алба хаагчид эргүүлийн үүрэг гүйцэтгэж явахдаа илрүүлжээ. Уг үйлдлийг Баянзүрх дүүрэг дэх цагдаагийн нэгдүгээр хэлтэст шалгаж байна.

“Сонгинохайрхан дүүргийн 26 дугаар хороонд байрлах хашаанд ил байсан автомашины хучлага алдагдсан байна” гэсэн мэдээлэл тус дүүргийн иргэн Л.Б-ээс Сонгинохайрхан дүүрэг цагдаагийн нэгдүгээр хэлтсийн алба хаагчид шуурхай эрэн сурвалжилж илрүүлжээ.

Хан-Уул дүүргийн аравдугаар хороо “Буянт-Ухаа-2” хорооллын байрны гаднаас автомашины хучлага алдагдсан хэргийг Хан-Уул дүүрэг дэх цагдаагийн хоёрдугаар хэлтсийн алба хаагчид үйлдэл дээр нь илрүүлсэн байна. Сонгинохайрхан дүүргийн 26 дугаар хороонд оршин суух Д нь тээврийн хэрэгсэл ашиглан хулгайлах гэмт хэрэг үйлджээ.

Мөн Баянгол дүүрэг дэх цагдаагийн хоёрдугаар хэлтсийн алба хаагчид автомашины эд анги хулгайлсан хэргийг, НЦГ-ын хэлстийн алба хаагч халаасны хулгайн гэмт хэргийг илрүүлэн үүргээ амжилттай гүйцэтгэн ажилласан байна.

Иймд иргэдийг ил задгай талбайд машинаа орхихдоо орчны гэрэлтүүлэг, харуул хамгаалалт, камертай орчинд орхиж байх. Ийм боломжгүй тохиолдолд машиндаа дохиоллын систем суулгахыг цагдаагийн байгууллагаас зөвлөж байна.

Түүнчлэн цагаан сарын баяр дөхөхөөр баярын идээ шүүс болох бууз, банш, ууц, өвчүүний хулгай нэмэгддэг. Иймд иргэдийг сонор сэрэмжтэй байж, өөрийн өмч хөрөнгөдөө тавих хараа хяналтаа сайжруулах, гэр орноо эзэнгүй орхиж буй бол хөршдөө захиж үлдээх, гэрийн цоож цуургаа сайжруулах, гарахдаа цонх, хаалганыхаа түгжээг шалгаж болзошгүй хулгайн гэмт хэргээс сэрэмжлэхийг анхааруулъя.

Баянзүрх дүүрэг хүүхдийн сайн сайхны төлөөх ажлын хүрээнд “Цахлай” хүүхэд хамгааллын төсөлтэй хамтран ажиллахаар болж, санамж бичгийг үзэглэжээ.

Тус дүүрэг хүүхдийн төлөөх бүхий л санал санаачилга, төсөл хөтөлбөрийг дэмжин ажилладаг. Энэ хүрээнд тус төсөлтэй хамтран ажиллах болсон бөгөөд дүүргийн Засаг дарга Т.Баясах, Нийгмийн хөгжлийн хэлтсийн дарга С.Сувд-Эрдэнэ, дүүрэг дэх Цагдаагийн I,II,III хэлтсийн удирдлагууд болон ‘’Цахлай’’ хүүхэд хамгааллын төслийн удирдагч С.Батсайхан нар санамж бичиг байгуулах ёслолд оролцсон юм.

Энэхүү санамж бичгийг байгуулснаар, Баянзүрх дүүргийн хэмжээнд үйл ажиллагаа явуулж буй ерөнхий боловсролын сургуулийн сурагчдыг биет болон биет бус халдлагаас хамгаалах, болзошгүй эрсдэл, гэмт хэрэгт холбогдохоос сэргийлэх ажилд дүүргийн цагдаагийн байгууллага болон сургууль, хорооны нийгмийн ажилтнуудтай хамтран ажиллах юм.

“Цахлай” төсөл нь хүүхэд хамгааллын салбарт үндсэн 2 чиглэлээр үйл ажиллагаа явуулдаг. Нэгдүгээрт, хүүхдийг биет бус халдлагаас хамгаалах зорилгоор хүүхэд өсвөр үеийнхний дунд цахим орчин дахь зохистой хэрэглээг бий болгох, тэднийг баталгаат эерэг мэдээ мэдээллээр хангах цахим сайт, гар утасны аппликейшныг ажиллуулж байна. Түүнчлэн хүүхдийн интернет хэрэглээнд эцэг эхчүүд хяналт тавих боломжийг технологийн түвшинд шийдвэрлэхээр зорьж байна. Хоёрдугаарт, хүүхдийг биет халдлага буюу хулгай, дээрмийн гэмт хэрэг цаашлаад төөрөх, алга болох зэрэг эрсдэлээс хамгаалах зорилгоор хүүхдийн байршил тогтоох системийн үйл ажиллагааг хэрэгжүүлж байгаа ба энэхүү үйлчилгээ нь эцэг эхчүүдийн хүүхдэдээ тавих хараа хяналтыг сайжруулах, хүүхдийг болзошгүй эрсдэлээс хамгаалах эерэг үр дүнтэй ажээ.

“Блүүмбэрг ТВ Монголиа”-гаас санаачлан Барилга, хот байгуулалтын яам, МИК-тай хамтран “Утаагүй Улаанбаатар” форум зохион байгуулахаар болжээ. Энэ сарын 10-ны өдрийн лхагва гаригт “Блү скай” зочид буудалд эхлэх тус форумаар “Орон сууц-цэвэр агаар”, “Орон сууц-зах зээл”, “Орон сууц-тогтвортой санхүүжилт” гэсэн сэдвээр хэлэлцүүлэг өрнүүлэх ажээ.

Форумын эхний хэлэлцүүлэгт Байгаль орчин, аялал жуулчлалын сайд Н.Цэрэнбат, Агаарын бохирдол бууруулах ажлын хэсгийн гишүүн, УИХ-ын гишүүн Д.Тэрбишдагва, эдийн засагч Ч.Хашчулуун, Цаг уур, орчны шинжилгээний газрын хэлтсийн дарга Ж.Батбаяр, Нийслэлийн Засаг даргын дэд бүтэц, гэр хорооллын хөгжил хариуцсан орлогч дарга П.Баярхүү нар оролцох юм байна. Дараагийн хэлэлцүүлгүүдэд Барилга, хот байгуулалтын яам, Сангийн яам, Монголын барилгачдын холбооны төлөөллүүд оролцох ажээ.

Авлигатай Тэмцэх Газрын дэргэдэх Олон нийтийн зөвлөлөөс АТГ-н дарга 60 тэрбумыг хаацайлснаар төсвөөр шагнуулсан хэмээн хэвлэлийн хурал зохион байгууллаа.

АТГ-ын дэргэдэх олон нийтийн зөвлөлийн дарга Г.Баасан “Бид авлигыг таслан зогсоох зарчим баримтлан ажиллаж байгаа. Олон нийтийн зөвлөл өнгөрсөн хугацаанд дөрвөн удаа хуралдаж, хууль хяналтын байгууллагынхантай уулзаж, хамтран ажиллах санал хүргүүлээд байгаа. УИХ, Ерөнхийлөгчид авлигын эсрэг зөвлөмж хүргүүлсэн.

Мөн 102 иргэн ОНЗ-ийн төлөөлөлтэй биечлэн уулзсан. Бид 2018 оныг гэрч, хохирогч, мэдээлэгч, шүгэл үлээгч нарыг хамгаалах жил болгон зарласан. Олон нийтийн зөвлөлд ирүүлсэн иргэдийн саналаас АТГ-т дөчин гурван гомдол оруулж, үүнээс гуравт нь эрүүгийн хэрэг үүсгэсэн. Гурван хэрэг эцэслэн шийдвэрлэгдсэн. УБТЗ-ын гурван ажилтныг ажлаас нь халсан зэрэг хэрэг юм. Одоогоор бүрэн шийдэгдээгүй 15 хэрэг байгаа. Өмнө нь АТГ-т асуудлаа тавиад хариу авчихсан байсан таван гомдол байсан. Азийн сангийн 2016 оны судалгаагаар нэр хаяггүй АТГ-т гомдол хүсэлт гаргах хүсэлтэй гэдэг асуултад иргэдийг далан хувь нь тийм гэсэн хариулт өгсөн байна. Тэгэхээр иргэдийн дийлэнх нь авлигын эсрэг гомдол гаргахдаа нэр хаягаа тавихыг хүсэхгүй байгаа юм. Төмөр замтай холбоотой асуудлыг чимээгүй орхи гэж хүртэл надад хэлсэн. ШУТИС-ийн оюутнуудын төлбөрөөс 3-4 тэрбум төгрөг завшсан гээд өөр бусад 23 баримт бидэнд байгаа ч АТГ-т хүргүүлээгүй л байна. Х.Энхжаргал гэдэг хүнийг солиогүй цагт АТГ-т юу ч хүргүүлээд нэмэргүй. Х.Энхжаргал 60 тэрбумын хэрэгт холбогдсон М.Энхболдын дотнын найз. Тиймээс Х.Энхжаргалыг огцруулах саналыг бид өнөөдрийн хурлаар дэвшүүлж байна. Авлигын эсрэг хууль, эрүүгийн хуульд өөрчлөлт оруулах ёстой” гэв

Төрийн үйл ажиллагааг иргэн төвтэй болгож, төрийн үйлчилгээг цахим хэлбэрт шилжүүлэн хэрэглээнд нэвтрүүлэх ажлаа эрчимжүүлэхийг Мэдээлэл, харилцаа холбооны бодлогын зөвлөлийн дарга, Монгол Улсын сайд, Засгийн газрын Хэрэг эрхлэх газрын дарга Г.Занданшатар зөвлөлийн гишүүдэд үүрэг болголоо.

Бодлогын зөвлөлийн хуралдаан өнөөдөр болж төрийн цахим мэдээлэл солилцооны “Хур” систем ашиглах, тоон гарын үсгийн хэрэглээг нэмэгдүүлэх зэрэг асуудлыг хэлэлцэв.

Өнөөдрийн байдлаар Үндэсний дата төв, сумдын шилэн кабелийн сүлжээ, иргэний цахим үнэмлэх, 11 11 төв, нийтийн түлхүүрийн дэд бүтэц, ТҮЦ машин, төрийн мэдээлэл солилцооны “Хур” систем бий болсон. Үүний дүнд мэдээлэл, харилцаа холбооны технологи ашиглан төрийн бүх үйлчилгээг иргэдэд цахим, нэг цонхны хэлбэрээр үзүүлэх суурь бүрдээд байна.

Цахим засгийг хөгжүүлснээр иргэд төрийн үйлчилгээг орон зай, цаг хугацаанаас үл хамааран энгийн хялбар хэлбэрээр авах юм. Төрийн үйлчилгээний чанар, хүртээмж дээшилж энэ хэрээр авилга, хүнд суртал багасан, ил тод байдал сайжирна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.