Month: January 2018

Батлан хамгаалахын сайдын тушаалаар батлагдсан “Цэргийн бүртгэл явуулах журам”-ыг удирдлага болгон нийслэлийн Засаг даргын гаргасан захирамжийн дагуу нийслэлийн хэмжээнд энэ сарын 4-нөөс 20-ны хооронд цэргийн үүрэгтэн, бэлтгэл офицеруудын бүртгэлийн ажлыг зохион байгуулж байна.

Бүртгэлийг хорооны Засаг даргын ажлын байранд ажлын өдрүүдэд 08:30-19:00 цагийн хооронд, амралтын өдрүүдэд 10:00-18:00 цагийн хооронд зохион байгуулж байгаа юм. Цэргийн тоо бүртгэлд 18-50 насны цэргийн алба хаасан, хаагаагүй бүх эрчүүд, 60 хүртлэх насны бэлтгэд офицерууд бүртгүүлэх ёстой юм.

НЗДТГ-ын Цэргийн штабын дарга, Хурандаа Ж.Болдбаатар, Батлан хамгаалах хууль тогтоомж, хяналт шинжилгээ хариуцсан офицер, Дэд хурандаа Т.Мөнхбаяр, Тоо бүртгэл, нөхөн хангалтын офицер, Дэд хурандаа Б.Баянмөнх нар өнөөдөр Хан-Уул, Сонгинохайрхан дүүргийн зарим хороодын цэргийн тоо бүртгэлийн үйл ажиллагаатай биеэр очиж танилцлаа. Цэргийн бүртгэлийн ажил зохион байгуулаад 6 хоног өнгөрч байгаа юм. Энэ хугацаанд Хан-Уул дүүргийн хэмжээнд цэргийн үүрэгтэн, бэлтгэл офицеруудын бүртгэлд эрчүүдийн 30.8 хувь нь бүртгүүлээд байгаа бол Сонгинохайрхан дүүргийн хэмжээнд 35 хувь нь бүртгүүлсэн байна. Харин нийслэлийн хэмжээнд цэргийн тоо бүртгэлийн ажил өнөөдрийн байдлаар дунджаар 38.5 хувьтай явагдаж байгаа аж.

“Цэргийн албаны тухай хуульд цэргийн насны залуучууд жил бүр цэргийн бүртгэлд бүртгүүлэх, тухайн бүртгэлийг засаг захиргааны анхан шатны нэгж буюу орон нутгийн төрийн захиргааны байгууллагууд хийж гүйцэтгэнэ гэсэн хуулийн заалттай. Үүний дагуу нийслэлийн Засаг даргын захирамжаар нийслэлийн хэмжээнд 2018 оны цэргийн тоо бүртгэлийг энэ сарын 4-20-ны хооронд засаг захиргааны анхан шатны нэгж, хороодуудаар дамжуулан зохион байгуулахаар шийдвэрлэсэн. Өнөөдрийн байдлаар нийслэлийн есөн дүүргийн 152 хороодоор цэргийн бүртгэлийг явуулж байна” хэмээн НЗДТГ-ын Цэргийн штабын дарга, Хурандаа Ж.Болдбаатар ярилаа.

Цэргийн албыг Зэвсэгт хүчин, хил хамгаалах байгууллагад 12 сар буюу нэг жилйин хугацаатай алба гүйцэтгэх, цэргийн дүйцүүлэх албыг биеэр хаах, цэргийн дүйцүүлэх албыг мөнгөн төлбөрийн хэлбэрээр хаах, оюутан цэрэг, гэрээт цэрэг гэсэн 5 төрлөөр цэргийн хааж болдог. Цэргийн тоо бүртгэл явуулснаар энэ таван хэлбэрээс иргэд альнаар нь албаа хаах вэ гэсэн нэгдсэн судалгааг гаргаж ирдэг байна.

НЗДТГ-ын Цэргийн штабаас 2018 оны “Батлан хамгаалах хууль тогтоомжийг хэрэгжүүлэх- Дайчилгааны бэлтгэл нөөцийг сайжруулах жил” болгон зарлаж байгаа аж. Тус ажлын хүрээнд энэ онд анх удаа цэргийн насны залуучуудын эрүүл мэндийн программ бий болгосон байна. Ингэснээр дүүргийн Цэргийн штаб, Эрүүл мэндийн төвтэйгөө цахим хэлбэрээр холбогдоод ямар хүн ямар өвчтэй гарч байна, түүний эрүүлжүүлэлтийн асуудал дээр хэрхэн ажиллаж байна гэдгийг харж болох аж хэмээн нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Олон улсын валютын сангийн ажлын хэсэг энэ сарын 25-нд Монголд ирж ажиллана.

Засгийн газраас уг ажлын хэсгийнхнийг Улаанбаатарт ажиллах үеэр татварын нэмэгдлийн асуудлыг хөндөж тавих аж. Учир нь иргэдийн зүгээс татварын нэмэгдлийг ихээхэн эсэргүүцэж байгаа бөгөөд ОУВС-гийн нэрээр цалин тэтгэврийг нэмэхгүй байна хэмээн шүүмжилж буй. Иймд татварын нэмэгдэл болон цалин өсгөх асуудлыг гаргаж тавихаар болжээ.

Манай улс тус сангийн Өргөтгөсөн санжүүжилтийн хөтөлбөрт өнгөрсөн жилээс эхлэн хамрагдсан. Засгийн газар Олон улсын валютын сантай гурван жилийн хугацаанд дээрх хөтөлбөрийг хамтран хэрэгжүүлэх бөгөөд хөтөлбөрийн хэрэгжилтэд улирал тутам үнэлгээ хийж буй. Үнэлгээний үр дүнд тус сангийн зүгээс хөтөлбөрийн хэрэгжилтийн явц хэвийн, амжилттай үргэлжилж байгаа гэсэн дүгнэлтийг удаа дараа хийгээд байгаа билээ.

Өвөлжилт хүндэрсэн аймгуудад нөөцийн өвсийг хямдралтай үнээр худалдаж эхэллээ. Бэлчээрийн даац нь 2.8 дахин хэтэрсэн Ховд аймагт энэ нөөцөөс 200 тонн өвс тарааж байна. Харин Говьсүмбэр аймгийн өвөлжилт хүнд байгаа сумдын малчдад аюулгүйн нөөцийн өвсийг 50 хувиар хямдруулан зарж байгаа аж. Сангийн яамнаас малын тэжээл нийлүүлэх 28 аж ахуйн нэгжтэй 36.3 тэрбум төгрөгийн зээлийн гэрээ байгуулснаас 10 тэрбум төгрөгийг нь олгожээ.

Мөн 10 аж ахуйн нэгж 1.2 тэрбум төгрөгийн 8000 гаруй тонн малын тэжээл импортолсон байна. Хүнс, хөдөө аж ахуй, хөнгөн үйлдвэрийн яам “Өвөл, хаврыг өнтэй давъя” аяны хүрээнд Монгол Улс болон ОХУ-ын Засгийн газар хооронд хийсэн хэлэлцээрийн дүнд 51 мянган тонн тэжээлийг малчдад түгээх юм. Нийт 40 тэрбум төгрөгийн үнэ бүхий тэжээлийг 34 аж ахуйн нэгжээр дамжуулан орон нутагт борлуулна.

Гэр бүлийн хүчирхийлэлтэй тэмцэх тухай хууль шинэчлэгдэн батлагдаад жилийн хугацаа өнгөрсөн байна. Энэ хугацаанд нийслэлд үйлдэгдсэн гэр бүлийн хүчирхийллийн хэргүүдийн талаар Нийслэлийн цагдаагийн газраас мэдээлэл хийлээ. Өнгөрсөн онд нийслэл хотын хэмжээнд гэр бүлийн хүчирхийллийн нийт 757 гэмт хэрэг үйлдэгдсэн нь өмнөх оны мөн үеэс 81 хэргээр буюу 9,6 хувиар буурчээ.

Эрүүгийн хуулийн 11.7 дугаар зүйлд заасан “Гэр бүлийн хүчирхийлэл үйлдэх” гэмт хэрэгт улсын хэмжээнд 198 эрүүгийн хэрэг үүсгэн шалгасны 130 буюу 65,6 хувь нь нийслэл хотод үйлдэгдсэн байна.

Нийслэл хотод 2017 онд хүүхдээс 555 гэмт хэрэг үйлдэгдсэн нь өмнөх оны мөн үетэй харьцуулахад 44 хэргээр буюу 7,3 хувиар буурсан байна. Улсын хэмжээнд насанд хүрээгүй хүмүүсээс үйлдсэн нийт гэмт хэргийн 55,9 хувь нь нийслэл хотод үйлдэгджээ. Нийслэлд хүүхэд хохирсон 1115 гэмт хэрэг үйлдэгдсэн нь өмнөх оны мөн үетэй харьцуулахад 288 нэгжээр буюу 34,0 хувиар өссөн байна.

Нийслэл хотын хэмжээнд 2017 онд үйлдэгдсэн 364151 захиргааны зөрчлийн 0,6 хувийг буюу 2028 нь гэр бүлийн хүчирхийллийн улмаас үйлдэгдсэн зөрчил эзэлж байна.

Гэр бүлийн хүчирхийлэл үйлдэх зөрчил 2028 бүртгэгдсэн нь өмнөх оны мөн үеэс 1353 нэгжээр буюу гурав дахин өссөн дүнтэй байна. “Захиргааны хариуцлагын тухай хууль”-д зааснаар зөрчил гаргасан 449 хүнд 8409,0 төгрөгөөр торгох арга хэмжээ авч, “Зөрчлийн тухай хууль” зөрчсөн 1579 хүнд баривчлах шийтгэлийг ногдуулсан байна.

Гэр бүлийн хүчирхийлэлтэй тэмцэх тухай хууль хэрэгжиж эхэлсэн нэг жилийн хугацаанд гэр бүлийн хүчирхийллийн улмаас үйлдэгдсэн гэмт хэрэг 9,6 хувиар буурч, гэр бүлийн хүчирхийллийн дуудлага мэдээлэл 2,2 дахин, зөрчил гурав дахин нэмэгджээ.

Дуудлага, мэдээлэл, зөрчил өссөн нь гэр бүлийн хүчирхийллийн талаарх мэдээллийг иргэд цагдаагийн байгууллагад шуурхай дамжуулдаг болж иргэний үүргээ биелүүлж байгаатай, цагдаагийн байгууллагын зүгээс дээрх дуудлага, мэдээллүүдийг нэн тэргүүнд шалгаж хүчирхийлэл үйлдэгчийн үйлдэл бүрт хуулийн хариуцлага ногдуулж байгаатай холбоотой.

Б.АМАРТҮВШИН

Засгийн газрын хуралдаанаар “Эрдэнэт” үйлдвэрийг Ашигт малтмалын хуулийн 5.6-д заасны дагуу хувьцаат компани болгох, тодорхой хувийг нийт иргэдэд давуу эрхийн хувьцаа болгож эзэмшүүлэхээр шийдвэрлэсэн байна.

Энэ хүрээнд Олон улсын аудит орно, үнэлгээг хийнэ гэх мэт 10 гаруй ажил хийгдэнэ. Энэ асуудлыг УИХ эцэслэн шийдвэрлэнэ гэдгийг Засгийн газрын хэвлэл мэдээллийн албаны дарга Ц.Ганзориг мэдээллээ.

“Монгол Улсад 2018-2020 онд цагаачлуулж болох гадаад иргэдийн тоо, бүтэц, байршилын тухай” УИХ-ын тогтоолын төсөл, өвөл, хаврын улиралд хурдан морины уралдааныг бүрэн хориглох тухай зэрэг 20 гаруй асуудлыг энэ удаагийн Засгийн газрын хуралдаанаар хэлэлцэхээр төлөвлөжээ.

Чингэлтэй дүүргийн IX хорооны иргэн Ц.Баттөмөр

Энэ нь “хууль хүчний байгууллагыг төрөөс ангид байлгаж байж хүмүүсийн эрх ашгийг хангах ёстой” гэсэн шинжлэх ухааны онолын зарчим алдагдсантай шууд холбоотой. Ялангуяа сүүлийн жилүүдэд, М.Энхболд УИХ-ын даргаар ажилласан 1,6 жилийн хугацаанд бүүр ч тартагтаа тулав. Зөвхөн би ч хэлээгүй. Монголын ард түмэн мэдэхийн дээдээр мэдэж, мэл хөхөрсөөр л.

Захын баримт сөхөхөд С.Зориг агсны хэргийг яаж шийдсэн болов. Ингэх нь хэнд ашигтай байв, хэний захиалгаар шийдэв. Бас Л.Гансүхийг олон түмний нүдэн дээр “Хүн нь байвал хэрэг нь хайчихав” гэдгээр шийдсэн. Энэ нь Н.Алтанхуягийн Засгийн газрыг унагаах захиалга байсан нь нэгэнт тодорхой болсон. Хүчингийн хэрэг ичгүүр сонжуургүйгээр гаарч ихэнх нь чимээгүй өнгөрөв. Ялангуяа УИХ-ын гишүүн Д.Гантулгатай холбогдсон хэрэг хэвлэл мэдээллээр хэдэн сар хангалттай яригдсан. Өмгөөлөгчид хууль сахиулах прокурорын байгууллага баримтаар нотлоод УИХ-д түдгэлзүүлж өг гэж хүссэн талаар телевиз хэвлэлээр олон мэдэгдсэн. Гэтэл УИХ-ын дарга М.Энхболд нэгдүгээр сарын 3-нд телевизээр “Надад бичиг сэлт ирээгүй, бараг сонсож дуулаагүй” гэж мэдэн будилав.

Батын Хурцын асуудал хурц яригдсан. Тагнуулын газар Засгийн газрын мэдлийн газар, Засгийн газрыг УИХ тохоон томилдлог биш бил үү. Цаана нь нүд байсаар байхад нуухаар нь оролдоод үр дүн гарах уу даа.

Бид монгол нэг л болохгүй байна гэж олон жил ярьцгаав. Бас тогтолцоондоо байдаг юм гэж хичнээн ч жил оношлов. Ийм УИХ-тай, ийм спикертэй 2,5 жил тэвчих үү, гаргалгаа гарц байна уу.

Энэ УИХ-ыг тараах, ядахдаа М.Энхболдыг огцруулах л гарц байна. Энэ парламент Ерөнхийлөгчийн хориг,Үндсэн хуулийн Цэцийн дунд суудлын хурлын шийдвэр, Монгол Улсын Дээд шүүхийн тогтоол, сөрөг хүчний санал, түмний өргөдөл гомдол бүхнийг “Нохой хуцаж л бай, буга идээшилж л бай “ гэсэн чадсан юманд аргагүйгээр бас л 2,5 жилийг барах уу.

“Өдрийн сонин”-ы “Хэлэх эрхийн индэр”-т оролцон үзэл бодлоо илэрхийлэхийг хүсвэл 89998856 дугаарын утсаар холбоо барина уу.

Тэмдэглэл хөтөлсөн О.ДАШНЯМ