Month: January 2018

Ажлын хэсгээс гаргасан удирдамжийн дагуу Улсын Их Хурлын гишүүд хууль, тогтоомжийн хэрэгжилтийн биелэлттэй танилцах хүрээнд Улаанбаатар хотын дүүргүүдэд агаарын бохирдлыг бууруулах чиглэлээр хийж байгаа аж ахуйн нэгж, төр болон төрийн бус байгууллагуудын үйл ажиллагаа болон, гэр хорооллын иргэдийн нөхцөл байдалтай биечлэн танилцаж, санал сонсохоор тогтсон юм.

Удирдамжид 2018 оны 01 дүгээр сарын 04-12 ны өдрүүдэд Ажлын хэсгийн гишүүн С.Бямбацогтоор ахлуулсан УИХ-ын гишүүн Д.Хаянхярваа, Н.Цэрэнбат, Л.Болд нар Баянзүрх, Хан-Уул дүүрэгт, Ажлын хэсгийн гишүүн Л.Оюун-Эрдэнээр ахлуулсан УИХ-ын гишүүн Ө.Энхтүвшин, М.Оюунчимэг, Д.Эрдэнэбат нар Сүхбаатар, Чингэлтэй дүүрэгт, Ажлын хэсгийн гишүүн Л.Элдэв-Очироор ахлуулсан УИХ-ын гишүүн Ж.Ганбаатар, Б.Бат-Эрдэнэ, Д.Тэрбишдагва нар Баянгол, Сонгинохайрхан дүүрэгт ажиллаж, агаарын бохирдлыг бууруулах талаар мэдээлэл цуглуулж, тодорхой санал бэлтгэн Ажлын хэсэгт танилцуулах юм.

Дээрх удирдамжийн дагуу өнөөдөр (2018.01.10) УИХ-ын гишүүн Б.Бат-Эрдэнэ, Д.Тэрбишдагва, УИХ-ын гишүүн, Засгийн газрын гишүүн, Эрүүл мэндийн сайд Д.Сарангэрэл нар Сонгинохайрхан дүүрэгт ажиллалаа.

“Эко түлш үйлдвэрлэх төсөл”-ийг хэрэгжүүлж буй компанийн үйл ажиллагаатай танилцав

Эхлээд гишүүд Сонгинохайрхан дүүргийн 4 дүгээр хороонд байрладаг “Хөх тэнгэрийн мөнхийн гэрэл” ХХК-ийн үйл ажиллагаатай танилцаж, “Эко түлш үйлдвэрлэх төсөл”-ийн талаар мэдээлэл сонссон юм.

Тус компанийн ерөнхий захирал К.Өнербек агаарын бохирдолтой тэмцэх хүрээнд эко түлш, мазут, хий үйлдвэрлэхээр ажиллаж байгаагаа гишүүдэд танилцуулсан.

Тэрбээр “Солонгос улсад бүтээсэн тоног, төхөөрөмжөөр эко түлшээ үйлдвэрлэдэг. Ашигласан түүхий нүүрсний 90 хувь нь хагас кокс болж гардаг технологи одоогоор монголд байхгүй. Иймээс дээрх тоног төхөөрөмжийг оруулж ирэхэд 33 тэрбум төгрөг шаардлагатай. Засгийн газраас дэмжлэг үзүүлж, хөнгөлөлттэй зээлд хамруулаад өгвөл эхний ээлжинд хоёр тоног төхөөрөмж оруулж ирээд бусад компаниудтай хамтран шахмал түлш үйлдвэрлэх боломжтой болно. Түүнчлэн дотоодын дулааны цахилгаан станцуудаа сайн чанарын мазутаар 100 хувь хангадаг болох зорилтыг тавин ажиллаж байна. Манай дулааны цахилгаан станцууд ОХУ-аас 1 тонн мазутыг 320 ам.доллароор худалдан авдаг. Харин манай мазутыг дулааны станцууд 224 ам.доллароор авах боломжтой болно” гэв.

“Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр”-ийг хэрэгжүүлж буй төслийн нэгжийн үйл ажиллагаатай танилцлаа

Төслийн талаарх танилцуулгыг Д.Мөнхжаргал хийсэн юм. Тэрбээр “320 сая ам.долларын төсөл хэрэгжиж байна. Төвлөрлийг сааруулах АХБ-ны төслийн хүрээнд Улаанбаатар хотод 8 дэд төвийг байгуулах юм. Үүнээс Баянхошуу, Сэлбэ дэд төвийн бүтээн байгуулалт 20-30 хувьтай явж байна. Хэдий ажил урагштай явж байгаа ч зарим иргэд газраа хэт өндөр үнэлж, газраа чөлөөлөхгүй байгаа нь асуудал дагуулж байгаа. Одоогийн байдлаар газар чөлөөлөлт 50 гаруй хувьтай байна. 2018-2019 онд Баянхошуу, Сэлбэ дэд төвүүдэд 14 метрийн өргөнтэй зам тавих, дулаан, цэвэр, бохирын шугаманд холбох ажлыг зуун хувь шийднэ” гэлээ.

Гишүүдийн хувьд агаарын бохирдлыг бууруулахад дээрх төслүүд чухал ач холбогдолтойг онцлоод ажлаа улам эрчимжүүлж ажиллахыг төслийг хэрэгжүүлэгчдээс хүссэн юм.

Дараа нь гишүүд Сонгинохайрхан дүүргийн Эрүүл мэндийн төвийн үйл ажиллагаатай танилцсан юм гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Улсын Бага Хурал, Анхны Улсын Их Хурал буюу 1992-1996 оны парламентын гишүүдийг урьж оролцуулсан уг хэлэлцүүлгийг нээж Улсын Их Хурлын дарга М.Энхболд үг хэлэв.

Тэрбээр, “Монголын ард түмэн 1992 онд шинэ Үндсэн хуулиа баталснаар хүний эрхийг дээдэлсэн хүмүүнлэг иргэний ардчилсан нийгмийг байгуулах улс төр, эдийн засаг, нийгмийн өргөн хүрээтэй өөрчлөлтийг эхлүүлсэн билээ.

Ардчилсан, эрх зүйт төрт ёсыг Монгол Улсад төлөвшүүлэн хөгжүүлэх их ажлыг үе үеийн парламент өөрийн бүрэн эрхийн хугацаанд өртөөлөн гүйцэтгэж 26 жилийг ардаа үлдээжээ.

Нийгмийн харилцааг хуулиар зохицуулах, эрх зүйт төрт ёсыг төлөвшүүлэн хөгжүүлэх нь хууль тогтоох байгууллагын хөгжил, төлөвшилтэй шууд холбогддог.

Хууль тогтоох байгууллага засаглалын хувьд хэр бэхэжсэн, үйл ажиллагааны горим дүрмийн ойлгомжтой байдал, бүтэц зохион байгуулалтын тодорхой, ил тод засаглал бүрдсэнээсихээхэн шалтгаална.

Улсын Их Хурал дотоод зохион байгуулалт, үйл ажиллагаагаа Монгол Улсын Их Хурлын хуралдааны чуулганы дэгийн тухай хуулиар зохицуулж байна.

Үе үеийн Улсын Их Хурал өөрийн бүрэн эрхийн хугацаанд парламентын үйл ажиллагааг төгөлдөржүүлэх, хуралдааны үйл ажиллагаанд гарч байгаа хүндрэл бэрхшээлийг арилгах чиглэлээр дэгийн зохицуулалтыг боловсронгуй болгохоор ажиллаж, өөр өөрсдийн хувь нэмрээ үлдээсэн байдаг.

Улсын Их Хурлаас Монгол Улсын Их Хурлын чуулганы хуралдааны дэгийн тухай хуулийг 2007 оны 10 дугаар сарын 1-ний өдөр баталж,улмаар түүнд нийтдээ 20 удаа нэмэлт, өөрчлөлт оруулжээ.

Улсын Их Хурал Хууль тогтоомжийн тухай хуулийг батлан гаргасан нь хуулийн төслийг боловсруулах, өргөн мэдүүлэхэд тавигдах шаардлагыг өндөржүүлсэн. Энэ хуультай дэгийн зохицуулалтыг хууль тогтоомжийн төслийн хэлэлцүүлгийн түвшинд уялдуулах шаардлага бий.

Цаашид хуралдааны үйл ажиллагааг сайжруулах, үйл ажиллагааны тасралтгүй, шуурхай, үр дүнтэй байдлыг хангах, Улсын Их Хурлын гишүүдийн сахилга хариуцлагыг бэхжүүлэх, хууль тогтоомжийг хэлэлцэх үе шатыг боловсронгуй болгохчиглэлээр Улсын Их Хурлын хуралдааны дэгийг сайжруулах хэрэгцээ, шаардлага байсаар байна.

Бид бүхний зохион байгуулж байгаа өнөөдрийн хэлэлцүүлгийн онцлогийг анхны ардчилсан Үндсэн хууль баталсны 26 жилийн ойн өмнө, түүнчлэн Үндсэн хуульд нэмэлт, өөрчлөлт оруулах төслийг бүх нийтээр хэлэлцүүлж буй цаг үетэй давхцаж байгаагаар тодорхойлж болох юм.

1992 оны Үндсэн хууль батлагдсаны дараа байгуулагдсан 1992-1996 оны Улсын Их Хуралд шинэ ардчилсан Үндсэн хуулийн үзэл санааг эхлүүлэн хэрэгжүүлэх түүхэн үүрэг ногдсон төдийгүй энэ бүрэн эрхийн хугацаанд анхдагч суурь хуулиудыг баталж, эдийн засаг, нийгмийн өргөн хүрээтэй өөрчлөлтийг эхлүүлснээрбогино хугацаанд системийн шилжилтийг хийж дуусгахад чухал үүрэг гүйцэтгэсэн билээ. Тухайн үед баталсан олон хуулиудын үзэл баримтлал нь өнөөг хүртэл төрийн бодлогын түвшинд залгамжлагдан хадгалагдаж байна.

Үндсэн хуульд нэмэлт, өөрчлөлт оруулах төслийн хэлэлцүүлгийг орон даяар зохион байгуулж, иргэдээс санал авах өргөн хүрээтэй ажил нь ихээхэн хүч хөдөлмөр орсон, иргэд ч мөн өөрсдийн үзэл бодлоо чөлөөтэй илэрхийлсэн үйл явдал болсон.

Үндсэн хуульд оруулах нэмэлт, өөрчлөлтөөр төрийн эрх мэдлийн хуваарилалтын тэнцвэртэй байх, харилцан хяналттай байх зарчимд нийцүүлэн Улсын Их Хурлын хариуцлагыг өндөржүүлэхасуудлууд яригдаж байна.

Ер нь цаашдаа дэгийн зохицуулалтыг сайжруулахад гадны орнуудын сайн туршлагаас байнга суралцах явдал чухал.

Улсын Их Хурлын хөгжил төлөвшилтөд сайн хууль,дүрэм, журам чухал байхын зэрэгцээ хувь гишүүн бүрийн ёс зүй, сахилга, хариуцлага, өргөсөн тангарагтаа үнэнч байх хүчин зүйлээс ихээхэн шалтгаална гэдэгт эргэлзэхгүй байна. Парламентын хуралдааны үйл ажиллагааг боловсронгуй болгох асуудал ньтасралтгүй үргэлжлэх процесс. Гэхдээ энэхүү ажиллагаа нь тухайн цаг үедээ тохируулан хийгддэг дур зоргийн шинжтэй байж болохгүй бөгөөд Үндсэн хуулийн суурьзарчим, үнэт зүйлийг дээдэлсэн байх үзэл санаандзахирагдах ёстой.

Энэхүү хэлэлцүүлэгт уригдан ирсэн хууль тогтоох байгууллагын үе үеийн удирдлага, эрхэм гишүүд, зочидтөлөөлөгчид та бүхэн Улсын Их Хурлын үйл ажиллагааг сайжруулах, дэгийн зохицуулалтыг боловсронгуй болгоход өөрсдийн мэдлэг, туршлагаасаа хуваалцаж,олон сайхан үнэтэй санал, зөвлөмжүүд хэлнэ гэдэгт бүрнээ итгэлтэй байна” гээд хэлэлцүүлгийн үйл ажиллагаанд амжилт хүслээ.

Дараа нь Улсын Их Хурлын гишүүн, Төрийн байгуулалтын байнгын хорооны дарга Д.Лүндээжанцан хэлэлцүүлэгт оролцогчдыг нэгбүрчлэн танилцуулж, хэлэлцүүлгийн талаар тодруулга мэдээлэл хийв. Тэрбээр Улсын Их Хурлын чуулганы хуралдааны дэгийн зохицуулалт, боловсронгуй болгох асуудлыг хэлсэн үгэндээ онцолсон юм.

Хөтөлбөрийн дагуу Монгол Улсын дэд ерөнхийлөгч, Улсын Бага Хурал, УИХ-ын дарга асан Р.Гончигдорж “Улсын Бага Хурлын хуралдааны анхны дэг, туршлага” сэдвээр хийсэн мэдээлэлдээ анх дэг батлагдсан түүх, процедурыг хөндөж ярилаа.

Үүний дараа хэлэлцүүлэг өрнүүлснээр оролцогчид Улсын Их Хурлын гишүүдийн сахилга хариуцлага, ирц, ёс зүй, төлөвшил, чадавхи, нэр хүнд, мөн Үндсэн хуулийн нэмэлт, өөрчлөлтийн төсөл, улс орны хөгжлийн тулгамдсан асуудалтай холбогдуулан үг хэлж, байр сууриа илэрхийлэв.

“Монгол Улсын Их Хурлын чуулганы хуралдааны дэгийн асуудал, туршлага” сэдэвт энэхүү хэлэлцүүлэгт УИХ-ын гишүүн Л.Болд, Л.Оюун-Эрдэнэ, Б.Жавхлан, Д.Тогтохсүрэн, Ё.Баатарбилэг, УИХ-ын Тамгын газрын Ерөнхий нарийн бичгийн дарга Ц.Цолмон нар оролцлоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.