Month: January 2018

Сэлэнгэ аймгийн Мандал суманд гарсан гоц халдварт шүлхий өвчний өвчлөл, тархалт бүрэн зогссон байна. Иймд тус сумын гамшгаас хамгаалах штабын энэ сарын 10-ны өдөр хуралдаж, сум дотор төмөр замын хойшоо урагшаа чиглэлд гарах авто машиныг хөдөлгөөнийг зөвхөн зүүн талын төмөр замын гармаар чөлөөтэй нэвтрүүлэх шийдвэрийг гаргажээ.

Мөн хурлаар сумын дотор мөрдөгдөж байсан дугаарын хязгаарлалт хэвээр мөрдөгдөж, сарын тэгш сондгой өдрүүдэд зорчиж байх шийдвэрийг гаргасан байна. Түүнчлэн сумын хэмжээнд эцсийн ариутгал халдваргүйтгэл хийгдээгүй байгаа тул иргэд, ААНБ-ын сумаас гадагш чиглэсэн хөдөлгөөнийг хориглосон хэвээр байгаа аж. Гэхдээ тархалт зогссон хэдий ч сумаас гадагш хөдөлгөөн хийх зайлшгүй тохиолдолд гамшгаас хамгаалах штабын даргаас зөвшөөрөл авч явахыг шаардаж буй юм байна.

Монгол Улсын Засгийн газраас нүүрс тээвэрлэлтийн талаар авах арга хэмжээтэй холбогдуулан 2017 оны 11 дүгээр сарын 29-ний өдрийн 320 дугаар тогтоолыг батлан гаргасан. Тус тогтоолыг хэрэгжүүлэх ажлын хүрээнд нүүрс тээвэрлэлтийг уурхайгаас Цагаан хадны гаалийн хяналтын бүс, Цагаан хадны гаалийн хяналтын бүсээс Гашуунсухайт боомт хүртэлх тээвэрлэлтийг зохион байгуулах, хилийн боомтоор нэвтэрч байгаа тээврийн хэрэгслийн тоо хэмжээтэй уялдуулан нүүрсний ачилт, тээвэрлэлтийн үйл ажиллагаанд тээвэр төлөвлөлтийг хийх зэрэг ажлыг Зам, тээврийн хөгжлийн яам, Автотээврийн үндэсний төвөөс зохион байгуулсан. Энэ хүрээнд “Автотээврийн үндэсний төв” ТӨҮГ-аас Тавантолгой-Гашуунсухайт чиглэлд нүүрс тээвэрлэгч аж ахуй нэгжүүдтэй гэрээгээ дүгнэж, дотоодын хууль тогтоомж хангаж байгаа 60 гаруй аж ахуй нэгжийн 4700 гаруй тээврийн хэрэгслийг тээвэрлэлтэд оролцуулж байгаа юм.

Тус үйлдвэрийн газраас Засгийн газрын 320 дугаар тогтоолыг хэрэгжүүлж, нүүрсний тээвэрлэлт хийж буй аж ахуйн нэгжүүдийн жолооч нарт эрүүл мэнд, нийгмийн даатгал төлсөн байх, мэргэшсэн жолоочийн үнэмлэхтэй байх зэрэг шаардлагыг тавьж буй. Ингэснээр Гашуунсухайт боомт дээр үүсээд байсан нүүрс тээвэрлэж буй авто машины урт цуваа арилж, Монгол Улсын хууль тогтоомж чанд мөрдөгдөж эхлээд буй.

Харин Ганцмод боомтын нүүрсний тээврийн Хятадын хөрөнгө оруулалттай зарим компанийн эзэд Баяннуур хот болон Ганцмодны боомтын удирдлагууддаа хандаж өргөх бичиг барьсан байна. Энэхүү өргөх бичигт “Хятадын тал их гүрний байр сууринаас Хятадын талаас заавал нийгмийн даатгал төлөх, тээврийн хэрэгслийн гэрчилгээ, баримт бичиг, торгууль төлөх зэрэг нь хүндрэлтэй байдаг. Иймд уртын урт тээврийг зогсооснийг эсэргүүцэж, нүүрс импортыг зогсоож, Монголын талд хатуу сануулга өгнө үү” гэсэн утгатай зүйл дурдсан байна.

Энэ талаар “Автотээврийн үндэсний төв” ТӨҮГ-ын Тэргүүн дэд захирал Ж.Эрдэнэбаатараас тодруулахад “Засгийн газрын 320 дугаар тогтоол хэрэгжиж эхэлснээс хойш олон жил яригдсан асуудал зөв гарцаа олж, тодорхой шийдэлд хүрлээ. Өнөөдрийн байдлаар Тавантолгойгоос Гашуунсухайт чиглэлд нүүрс тээвэрлэсэн машинууд бүгд боомтоор гарч байгаа. Хуучных шиг зам дээр хоноглодог явдал бүрэн арилж, асуудал чирэгдэлгүй болсон. Өдөртөө Хятадын талаас хэдийг татах сонирхолтой байна, тэр хэмжээгээр гаргаж байгаа” гэлээ.

УИХ-ын чуулганы хуралдаанаар Агаарын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслийн анхны хэлэлцүүлгийг хийлээ. Хуулийн төсөлд Агаарын бохирдлыг бууруулах тусгай сан байгуулах асуудлыг тусгасан. Энэ заалттай холбогдуулж үг хэлсэн гишүүдийн зарим нь өмнө ажиллуулж байсан “Цэвэр агаар” сан шиг удирдлагууд нь хууль бус үйл ажиллагаа явуулж, хөрөнгө мөнгө шамшигдуулсан явдал давтагдах юм биш биз хэмээж байв. Мөн хуулийн төсөлд иргэдийн эрүүл мэндийг хамгаалах үүднээс агаар цэвэршүүлэгч, амны хаалт, эрчим хүчний хэмнэлттэй халаагч төхөөрөмжийг Гаалийн болон НӨАТ-аас чөлөөлөх асуудлыг тусгасан. Энэхүү заалтыг оруулж өгснөөр амны хаалт үйлдвэрлэгч компаниудын үйл ажиллагаа саарч, дотоодын үйлдвэрлэлээ унагах шалтгаан болох вий гэх ч гишүүн гарч байсан юм.

УИХ-ын гишүүн М.Оюунчимэг хилээр оруулж ирэх амны хаалт нь тусгай шүүгчтэй байна гэсэн тайлбарыг хийсэн. УИХ-ын гишүүд нийслэлийн гэр хорооллын айлуудыг орон сууцжуулах нь хамгийн оновчтой хувилбар. Гэвч бүх айлыг орон сууцжуулна гэдэг цаг хугацаа, хөрөнгө мөнгө шаардагдах учраас ойрын жилүүдэд халаалтаа цахилгаан эх үүсвэрээр шийддэг болох ёстой гэв. Сангийн дэд сайд Х.Булгантуяа энэ үеэр ипотекийн хөтөлбөрт хамрагдахаар хүсэлтээ ирүүлж байгаа иргэдийн ердөө 13 хувь нь л арилжааны банкнаас тавьдаг зээлийн шаардлагыг хангаж байна гэсэн мэдээллийг өгөв. Үүний дараа уг хуулийг эцсийн хэлэлцүүлэгт бэлтгүүлэхээр холбогдох байнгын хороонд шилжүүлснээр чуулганы үдээс өмнөх хуралдаан завсарлалаа. Үдээс хойшхи хуралдаан 15 цагаас эхлэнэ.

Монгол Улсад үйл ажиллагаа явуулдаг гадаадын дипломат корпус, олон улсын байгууллагын удирдлагуудыг төрийн гурван өндөрлөг хүлээн авч уулздаг уламжлалын дагуу өнөөдөр Улаанбаатар хотод суугаа дипломат корпусын тэргүүн, гишүүд, Элчин сайд нарыг хүлээн авч уулзлаа. Уулзалтад, Монгол Улсын Ерөнхийлөгч Х.Баттулга, Их Хурлын дарга М.Энхболд, Монгол Улсын Ерөнхий сайд У.Хүрэлсүх, Гадаад харилцааны сайд Д.Цогтбаатар нар оролцлоо

Уулзалтын эхэнд Монгол Улсын Ерөнхийлөгч Х.Баттулга Дипломат корпусын ахлагч, Элчин сайд, Суурин төлөөлөгчдөд хандан 17 дугаар жарны шар нохой жилийн Цагаан сарын баярын мэндийг угтуулан дэвшүүлж, сайн сайхан бүхнийг хүсэн ерөөлөө. Мөн Монголын ардчилал, эдийн засаг, Монгол Улсын татварын ил тод байдлын талаар төлөөлөгчдөд хандан байр сууриа илэрхийллээ.

Ерөнхийлөгч Х.Баттулга хэлсэн үгэндээ “Өнгөрсөн онд эдийн засгийн хүндрэлийг даван туулах, гадаад худалдаа, эдийн засгаа өсгөх нөхцөлийг бүрдүүлэхийн төлөө түнш орнууд, олон улсын байгууллагууд, тэдгээрийн нэр хүндтэй төлөөлөл Та бүхэнтэй хамтран ажилласандаа Монголын төр, засгийн төлөөлөл болсон бид сэтгэл хангалуун байна. Хөршүүд ОХУ, БНХАУ-тай сайн хөршийн найрсаг харилцаагаа үргэлжлүүлж, хамтын ажиллагаагаа өргөжүүлэх, хамтын ажиллагааны эдийн засгийн үр өгөөжийг нэмэгдүүлэхийн төлөө монголчууд онцгой хүчин чармайлт тавьж ирсэн, цаашид ч анхааран ажиллах болно. Хөрш улсуудтай “Монгол-Орос-Хятадын Эдийн засгийн коридор байгуулах хөтөлбөр”-ийг хэрэгжүүлэх механизм болон “Хөрөнгө оруулалтын судалгааны төв” байгуулах зарчмын тохиролцоонд хүрч, эхний ээлжинд хэрэгжүүлэх төслүүдийг тохирсон нь чухал алхам боллоо. Монгол Улсын гадаад бодлого “Гуравдагч хөрш” орнууд, дэлхийн бусад улсууд, олон улсын байгууллагуудтай харилцаа, хамтын ажиллагааг боломжит бүх салбарт хөгжүүлж, дэлхийн хамтын нийгэмлэгийн нийтлэг эрх ашиг, сайн сайхны төлөө идэвхтэй хамтран ажиллах зарчмыг тууштай баримталж ирлээ.

Европын холбоотой байгуулсан Түншлэл, хамтын ажиллагааны хэлэлцээр хүчин төгөлдөр болсон, тус холбоо Төлөөлөгчийн газраа Улаанбаатар хотноо албан ёсоор нээсэн, АНУ-ын Мянганы сорилтын корпорацтай хоёр дахь компакт гэрээ байгуулах шалгуур үнэлгээг хангасан зэрэг үр дүн гарсныг энд дурдаж болно. Монгол Улсад тулгарч байгаа зарим нэг хүндрэл, сорилтыг ч дашрамд дурдмаар байна. Европын Холбооны Сангийн сайд нарын Зөвлөлөөс Монгол Улсыг “татварын асуудлаар хамтран ажилладаггүй орнуудын хар жагсаалтанд” оруулсанд манай төр, засаг харамсаж байна. Энд үл ойлголцол, мэдээллийн дутмагшил гарсан байх. Монгол Улсын хувьд татварын асуудлыг ил тод байлгахад татгалзах зүйл огтхон ч байхгүй. Европын Холбоотой ойлголцолд хүрч, манай улсыг ойрын хугацаанд энэ жагсаалтаас хасна гэдэгт эргэлзэхгүй байна” гэлээ.

Мөн Монгол Улсын Ерөнхийлөгч Х.Баттулга энэ онд Үндэсний аюулгүй байдлын цөм болсон эдийн засгийн аюулгүй байдлаа сайжруулахад онцгой анхаарна гэдгээ хэлж, энэ зорилтын хүрээнд гадаадын шууд хөрөнгө оруулалтыг нэмэгдүүлэх, хөнгөлөлттэй зээл, тусламжийн ашиглалтыг сайжруулж, өгөөжийг нь дээшлүүлэх, эдийн засгаа олон тулгууртай болгох, экспортын бүтээгдэхүүний төрлийг олшруулахын төлөө тодорхой бодлого гарган ажиллах талаар ярьж, энэ ажилд гадаад анд нөхөд та бүхний чин сэтгэлийн дэмжлэг, туслалцаа чухал хэвээр байх болно гэв. Харин Дипломат корпусын ахлагч, Элчин сайд, Суурин төлөөлөгчдийг төлөөлөн Дипломат корпусын тэргүүн нарын ахлагч Казакстан улсын Элчин сайд Калыбек Ибрагимович Кобландин Төрийн гурван өндөрлөгт хандан мэндчилгээ дэвшүүлэв.

Тэрээр “Эрхэмсэг ноён Ерөнхийлөгч, УИХ-ын дарга, Ерөнхий сайд, Гадаад харилцааны сайд аа, Монгол Улс дахь Дипломат корпусын нэрийн өмнөөс шинэ жилийн баярыг тохиолдуулан үг хэлэх завшаан тохиосон нь нэр төрийн хэрэг болж байна. Монгол Улс Үндэсний эдийн засгийн чадамжаа болон нийгмийн хөгжлөө бэхжүүлэх төслүүд, үйл ажиллагааг хэрэгжүүлж байгаад бид баяртай байна.

Манай өөдрөг үзэл болон талархлыг хүлээж байгаа бас нэг шалтгаан нь өнгөрсөн оны Ерөнхийлөгчийн сонгуульд өндөр сахилга баттай оролцсон монголын ард түмний иргэний хариуцлага, ухамсар юм. Гадаадын олон зуун ажиглагч ажигласан сонгууль нь Монгол Улс Олон улсын хамтын нийгэмлэгийн хариуцлагатай гишүүний хувьд ардчиллын тогтвортой хөгжлийн замаар явж байгааг бататган харууллаа. Үүнийг дээрх ажиглагчид ч баталлаа. Тус улсын төрийн үйл хэрэг нь бусад улс орнуудтай эдийн засгийн хамтын ажиллагааг хөгжүүлэх, цаашдын гадаадын хөрөнгө оруулалт татахад чухал ач холбогдол бүхий төрийн тогтвортой байдал Монгол Улсын ард түмний найдварыг бэхжүүлж өглөө” гэв.

Мөн Шинэ Засгийн газарт иргэдийнхээ аж амьдралыг дээшлүүлэх амаргүй ажил байгааг дурдаж, Дипломат корпусын үйл ажиллагааны хүрээнд Монгол Улсын яамд, агентлагуудтай хамтран ажиллаж, талуудын тохиролцсон гэрээ хэлэлцээрүүдийг үргэлжлүүлэн, хамтран ажиллахдаа сэтгэл хангалуун байна гэдгээ илэрхийллээ.