Month: January 2018

Налайх дүүрэг дэх Цагдаагийн хэлтэс 2017 онд хийж хэрэгжүүлсэн ажлын тайлангийн хурлаа өнөөдөр дүүргийн Соёлын ордонд хийлээ. Тайлангийн хуралд дүүргийн ИТХ-ын дарга Б.Нэргүй, Засаг дарга Ч.Раднаабазар, Налайх дүүрэг дэх Цагдаагийн хэлтсийн дарга, цагдаагийн дэд хурандаа Н.Сумъяа нар оролцлоо.

Дүүргийн нутаг дэвсгэрт 2017 онд 421 гэмт хэрэг бүртгэгдсэн нь өмнөх оны мөн үеэс 39 хэргээр буюу 8.5 хувиар буурсан үзүүлэлттэй байна. Бүртгэгдэх үедээ сэжигтнээр тооцвол зохих этгээд нь тогтоогдоогүй нийт 287 гэмт хэрэг бүртгэгдсэнээс 73 хэргийг илрүүлж, хэргийн илрүүлэлт 25,4 хувьтай байна.

Гэмт хэргээс урьдчилан сэргийлэх ажлыг зохицуулах зөвлөлөөс 2017 оныг “Архигүй жил” болгон зарласантай холбогдуулан архидан согтуурахтай тэмцэх ажлыг зохион байгуулах ажлын хэсэгт тус цагдаагийн хэлтсээс хэв журмын ахлах байцаагч нар багтсан бөгөөд ажлын хэсгийг дүүргийн Засаг даргын захирамжаар байгуулан “Архигүй Налайхчууд” хөтөлбөрийг боловсруулан ажиллаж байна. Уг хөтөлбөрийн хүрээнд “Гэр бүлсэг Налайх” хөтөлбөр болон “Эргүүл”, “Гэр бүлийн хүчирхийллээс урьдчилан сэргийлэх”, “Архидан согтуурахтай тэмцэх” дэд хөтөлбөрүүдийн төслийг хүргүүлж 2018 онд хамтран ажиллахаар төлөвлөж байна.

Тайлангийн хурлын үеэр Засаг дарга Ч.Раднаабазар “Цагдаагийн албаны тухай хууль шинэчлэгдэн батлагдаж өнгөрсөн онд шинэ хуулиа ёслол хүндэтгэлтэй хүлээн авч хэрэгжүүлж эхэлснээс хойш нэлээдгүй хугацаа өнгөрчээ. Шинэ хуульд цагдаагийн алба маань гэмт хэрэгтэй тэмцэх, нийтийн хэв журмыг хамгаалах, олон нийтийн аюулгүй байдлыг хангах гэсэн 3 үндсэн чиг үүрэгтэй байхаар тусгаж, цагдаагийн алба хаагчийн үйл ажиллагааг хуулиар баталгаажуулж өглөө.

Цагдаагийн байгууллагын үйл ажиллагааны стандартыг дээшлүүлэх, үйл ажиллагаагаа иргэдийн хэрэгцээ, шаардлагатай уялдуулах, гэмт хэрэгтэй тэмцэх, урьдчилан сэргийлэх, нийгмийн хэв журмыг сахин хамгаалах үүргийн дагуу 2017 онд та бүхэн амжилт бүтээлтэй ажилласан гэдгийг хэлье.

Дүүргийн зүгээс гэмт хэргийн гаралтыг бууруулахад анхаарч хороодыг үе шаттай камержуулах, гэрэлтүүлгийг нэмэгдүүлэх, уурхайн эдэлбэр газар орчмыг цэгцлэх, иргэдийн хяналтыг сайжруулах, материаллаг баазыг нэмэгдүүлэх чиглэлээр багагүй ажлыг зохион байгуулан ажиллалаа. Цаашид нийгмийн эмзэг сэдэв болоод байгаа хүүхэд, гэр бүлийн хүчирхийллийн эсрэг хамтарсан багийн ажиллагааг илүү идэвхжүүлж ажиллах, гэмт хэргийн гаралтыг бууруулахад та бидний хамтын ажиллагаа, хүчин чармайлт маш чухал юм. Гэмт хэрэгтэй тэмцэх, урьдчилан сэргийлэх, нийтийн хэв журам хамгаалах, олон нийтийн аюулгүй байдлыг хангах үүргээ сахин биелүүлэх ажилд өндөр амжилт хүсэн ерөөе” гэв.

Мөн Цагдаагийн хэлтсийн хамт олонд “Иргэдийн оролцоотой хөгжлийн төлөө” бүтээлч аяны туг дэвтрийг гардуулан өгч, туг аялах хугацаанд бүтээлч, санаачилгатай ажил хийж тайлагнахыг үүрэг болгосон юм гэж Налайх дүүргийн ЗДТГ-аас мэдээллээ.

УИХ-ын Байгаль орчин, хүнс, хөдөө аж ахуйн байнгын хороо, Нийгмийн бодлого, боловсрол, соёл, шинжлэх ухааны байнгын хорооны “Агаарын бохирдлыг бууруулах” дэд ажлын хэсгүүд өнөөдөр агаарын бохирдол ихтэй дүүргүүдэд ажиллаж байна. Ажлын хэсгийнхэн НЗДТГ-ын хурлын зааланд цугларч, агаарын бохирдол ихтэй дүүргүүдийн товч танилцуулга болон гэр хорооллын дахин төлөвлөлт, дэд төвүүдийн ажлын цаг үеийн мэдээллийг сонсч, тулгамдаж буй асуудалтай танилцсан юм.

Эхний ажлын хэсгийг УИХ-ын Байгаль орчин, хүнс, хөдөө аж ахуйн байнгын хорооны дарга Л.Элдэв-Очир ахалж байгаа юм. Түүний ахалсан ажлын хэсэг Баянзүрх, Хан-Уул дүүрэгт ажиллана. Тэрбээр “Гэр хорооллын өрхүүдийн гаргаж буй утаа нийслэлийн агаарын бохирдлын 80 хувийг бүрдүүлж байна. Тиймээс утааны эх үүсвэрийг бууруулах чиглэлд гол ажлаа төвлөрүүлэх ёстой. Зуух, түлш ярихаар хүмүүс хэт улс төржүүлдэг. Бид улс төржиж, бүх иргэдээ орон сууцанд оруулах талаар ярьж болно. Гэхдээ бидэнд бодит шийдэл, үр дүн хэрэгтэй. Үүнийг шийдвэрлэх богино хугацааны ажил бол сайжруулсан зуух, түлшний асуудал. Нийслэлээс агаарын бохирдлыг бууруулахад хамгийн их нөлөө үзүүлэх, олон улсын хийгээд дотоодын стандарт, шаардлагад нийцсэн зуух үйлдвэрлэгч компаниудыг шалгаруулж, УИХ-д танилцуулах хэрэгтэй. Мөн сайжруулсан түлш үйлдвэрлэгч аж ахуйн нэгжүүдийг ч шалгаруул. Цаашдаа шинэ сууршлийн бүс бий болгох, орон сууцжуулах ажлаа зохион байгуулна” гэлээ.

Ажлын хэсгийнхэн Агаарын бохирдлыг бууруулах чиглэлээр үйл ажиллагаа явуулдаг байгууллагын бүтээгдэхүүн, 100 кВт-с дээш хүчин чадалтай уурын зуух ашиглагч байгууллага, Амгалан дулааны станцын үйл ажиллагаатай танилцана. Мөн өөрийн хөрөнгөөр дулаалга, цахилгаан халаагуурын төслийг хэрэгжүүлсэн Баянзүрх дүүргийн иргэн н.Хаш-Эрдэнийд зочилох юм.

Хоёр дахь ажлын хэсгийг УИХ-ын гишүүн Д.Оюун-Эрдэнэ ахалж байгаа бөгөөд өнөөдөр Чингэлтэй, Сүхбаатар дүүрэгт ажиллана. Тэд агаарын чанарын хэмжигч суурин харуулын үйл ажиллагаа, “Яндангүй байшин” төслийн хэрэгжилт, их хэмжээгээр утаа, агаарын бохирдол үүсгэдэг уурын зуухаар ажиллаж буй нэгжийг хааж, буулгах ажлын явцтай танилцахаас гадна төвлөрсөн дулаан хангамжид холбох шаардлагатай ерөнхий боловсролын сургууль дээр очих юм.

Ажлын хэсгүүдэд БОАЖЯ, ЭМЯ, ЭХЯ, НЗДТГ-ын төлөөлөл багтсан бөгөөд агаарын бохирдлыг бууруулах чиглэлээр санал санаачилга гаргах, одоо хэрэгжүүлж буй бодлого, төсөл хөтөлбөрүүдийн үр дүнг тодорхойлох зорилготой юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Сонгинохайрхан дүүргийн 21 дүгээр хороо, Ар гүнтийн давааны баруун, зүүн талын автозамыг түр хаасан талаар Замын цагдаагийн албанаас мэдээллээ.

Учир нь нутгийн төв хэсгээр цасан шуурга болж буйн улмаас тус давааны автозамын зорчих хэсэгт халтиргаа, гулгаа үүсчээ. Тиймээс тус давааны автозамыг хаасан бөгөөд жолооч нарыг дээрх чиглэлийн замаар зорчихгүй байхыг анхааруулж байгаа юм. Мөн Улаанбаатараас Өвөрхангай аймгийн чиглэлийн замд цас орж, хальтиргаа гулгаа үүсч байгаа тул орон нутгийн замд гарч буй жолооч нарыг хурдаа тохируулж анхаарал болгоомжтой хөдөлгөөнд оролцохыг зөвлөж байна.

Монгол Улсад Гал түймэртэй тэмцэх байгууллага үүсч хөгжсөний 96 жилийн ойн баярын өнөөдөр тохиож байна.

1922 оны энэ өдөр буюу 1 дүгээр сарын 13-нд Ардын Засгийн газрын 35 дугаар тогтоолоор Галын аюулаас хамгаалах байгууллагыг байгуулж байсан түүхтэй. Түүнчлэн 1999 онд Галын аюулгүй байдлын хуулийн төслийг боловсруулан УИХ-аар батлуулснаар Гал түймэртэй тэмцэх байгууллагын үйл ажиллагааны эрх зүйн орчин бүрдэж, ой хээрийн болон объектын түймрээс урьдчилан сэргийлэх, унтраах, шалтгаан нөхцөлийг тогтоох, гал түймрийн хэрэг бүртгэх ажлыг хариуцах болсон юм. Харин Монгол Улсын Засгийн газрын 2004 оны нэгдүгээр сарын 7-ны өдрийн хуралдаанаар тус газрыг ОБЕГ-ын бүтцэд нэгтгэсэн түүхтэй.

Монгол Улсын төр, нийгмийн нэрт зүтгэлтэн, Монгол Улсын Хөдөлмөрийн баатар, Ардын багш, Гавьяат хуульч, доктор, профессор Бяраагийн Чимидийн нэрэмжит шагнал гардуулах ёслол өнөөдөр /2018.01.13/ Төрийн ёслол хүндэтгэлийн их танхимд боллоо.

Шагнал гардуулах ёслолд Монгол Улсын Их Хурлын дарга М.Энхболд, Улсын Их Хурлын гишүүн Д.Лүндээжанцан, УИХ-ын Тамгын газрын Ерөнхий нарийн бичгийн дарга Ц.Цолмон, Захиргаа, аж ахуйн асуудал хариуцсан нарийн бичгийн дарга П.Цэрэн, Ардын багш, Гавьяат хуульч, доктор, профессор Б.Чимидагсны гэргий Б.Цээрэгзэн болон албаны бусад хүмүүс оролцов.

Ёслолын арга хэмжээний эхэнд Б.Чимидийн нэрэмжит шагнал олгох тухай Улсын Их Хурлын даргын захирамж, шагналын Өргөмжлөлийг уншиж сонордуулав.

Монгол Улсын Их Хурлын даргын 2018 оны 01 дүгээр сарын 09-ний өдрийн “Шагнал олгох тухай” захирамжийг үндэслэн хууль зүйн шинжлэх ухааны доктор, профессор, академич С.Нарангэрэлийн“Монголын эрх зүйн эх толь бичиг” бүтээлд төр, нийгмийн нэрт зүтгэлтэн, Монгол Улсын Хөдөлмөрийн баатар, Ардын багш, Гавьяат хуульч “Бяраагийн Чимидийн нэрэмжит” 2018 оны Монгол Улсын Их Хурлын шагналыг хүртээж Өргөмжлөл, Б.Чимидийн дүрс бүхий медаль, мөнгөн урамшуулал олгож буйг дурдлаа.

Улсын Их Хурлын дарга М.Энхболд хууль зүйн доктор, профессор, академич С.Нарангэрэлд Б.Чимидийн нэрэмжит шагналыг гардуулж, баяр хүргэж үг хэлсэн юм.

Улсын Их Хурлын дарга М.Энхболд хэлсэн үгэндээ, одоогоос 26 жилийн өмнө Ардын Их Хурал Монгол Улсын шинэ Үндсэн хуулийг баталсан. Энэ Үндсэн хууль бол ардчилал, эрх чөлөөг эрмэлзсэн ард түмний бүтээл, Монгол Улсын аюулгүй байдал, тусгаар тогтнолыг баталгаажуулсан түүхэн баримт бичиг байсан юм. XX зуунд монголчуудын олсон чухал ололт амжилтын нэг нь 1992 оны Үндсэн хууль бөгөөд энэ хуулиар манай орон ардчилсан ёс, зах зээлийн эдийн засгийн харилцаанд шилжиж, шинэ нийгэм байгуулах эрх зүйн үндсийг тогтоосон билээ. Монгол Улсын Их Хурал Үндсэн хууль баталсан энэ өдрийг тохиолдуулж, Үндсэн хуулийг баталж, монгол төрийн хууль тогтоох эрх зүйн үндсийг тогтооход ихээхэн хувь нэмэр оруулсан Хөдөлмөрийн баатар Б.Чимидийн нэрэмжит шагналыг тухайн жил хууль зүйн шинжлэх ухааны салбарт томоохон хувь нэмэр оруулахуйц бүтээл туурвисан хүмүүст олгодог сайхан уламжлал тогтсон.

Энэ шагналыг өнөөдөр дөрөв дэх удаагаа хүртээж байна. Б.Чимид гуай бол шинэ Үндсэн хуулийг эхийг барьж, Ардын Их Хурал 76 хоног төслийг хэлэлцэхэд ачааны хүндийг үүрсэн хүн юм. Түүний алдар гавьяаг мөнхжүүлэх, алдаршуулах зорилготой уг шагналын 2018 оныхыг академич Содовсүрэнгийн Нарангэрэлд хүртээх Улсын Их Хурлын даргын захирамж гарсан юм.

С.Нарангэрэл академич бол 40 гаруй жил хууль зүйн шинжлэх ухааны салбарт хүчин зүтгэж, олон шилдэг бүтээл туурвисан, шилдэг хуульчдыг бэлтгэхэд өөрийн оюун ухаан, хөдөлмөр зүтгэлээ зориулсан, доктор, профессор, академич хүн юм. Таны туурвисан “Монголын эрх зүйн эх толь бичиг” бүтээлд Хөдөлмөрийн баатар, гавьяат хуульч Бяраагийн Чимидийн нэрэмжит шагналыг олгож байна. Танд бүтээл туурвилын их амжилт, сайн сайхныг хүсье” гэлээ.

Дараа нь академич С.Нарангэрэл үг хэлэхдээ, 1992 оны Үндсэн хуулийн эхийг баригч Б.Чимид багшийн нэрэмжит шагналыг гарын шавь нь “Монголын эрх зүйн эх толь бичиг” бүтээлээ хүртэж байгаадаа баяртай байна. Мөн Улсын Их Хурлын дарга М.Энхболд, УИХ-ын Тамгын газрын удирдлагуудад энэ нэр хүндтэй шагналыг хүртээхээр шалгаруулсанд талархаж байгаагаа онцлов.

Энэхүү нэр хүндтэй шагналыг өмнө нь Улсын Их Хурлын гишүүн Д.Лүндээжанцан, Монгол Улсын Гавьяат хуульч И.Дашням “Монгол Улсын төр, эрх зүйн түүх” хоёр боть цогц бүтээлээрээ, хууль зүйн шинжлэх ухааны доктор, профессор Д.Баярсайхан “Эрх зүйн онол” бүтээлээрээ тус тус хүртэж байлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээллээ.