Month: January 2018

“Эрдэнэт үйлдвэр” хязгаарлагдмал хариуцлагатай компанийг нээлттэй хувьцаат компани болгож, нийт хувьцааны тодорхой хувийг иргэдэд эзэмшүүлэхээр Засгийн газрын хуралдаанаар шийдсэн. Мөн хувьцаат компани болгох болон хувьцааг нь иргэдэд эзэмшүүлэх талаар санал боловсруулж УИХ-аар хэлэлцүүлэн батлуулахаар болсон билээ. Нийт хувьцааны хэдэн хувийг, ямар хугацаа нөхцөлөөр иргэдэд эзэмшүүлэх, иргэд хувьцаагаа худалдах, худалдан авахтай холбоотой журмыг Засгийн газар батлах юм. Дээрх шийдвэрийг хэрэгжүүлэхтэй холбогдуулж эхлээд “Эрдэнэт” үйлдвэрт олон улсын аудит оруулж үнэлгээ хийлгэн, үнэ цэнийг нь тодруулах зэрэг ажлыг хийхээр болсон аж.

Энэ талаар Төрийн өмчийн бодлого зохицуулалтын газрын дарга Ц.Ням-Осор “Хувьцааг ард иргэдэд үнэ төлбөргүй олгоно. Олон улсын аудитын байгууллагаар “Эрдэнэт” үйлдвэрт үнэлгээ хийлгэсний дараа хэдий хэмжээний хувьцаа эзэмших вэ гэдэг илүү тодорхой болно. Цаашлаад ашигтай ажилладаг компанийн хувьцаанаас ард иргэдэд олгохоор хувьцааны үнэ цэнийг илүү мэдэрдэг болно. Хөрөнгийн бирж ч хөгжинө. Нөгөө талдаа компанийн засаглал илүү сайжирна. Өөрөөр хэлбэл, “Эрдэнэт” үйлдвэрт олон нийт хяналт тавьдаг болсноор бараа, материал өндөр үнэтэй шахах, улстөрчид хүнээ шахдаг зэрэг үзэгдэл байхгүй болно” хэмээн ярьсан.

Харин энэхүү хувьцаа олголтын асуудлаар “Алтан бумба” санхүүгийн нэгдлийн эдийн засагч, судлаач Ч.Эрдэнэдалай “Юуны өмнө хоёр тал асуудлаа шийдвэрлэх ёстой. Үүний дараа хувьцаа олголтын асуудлыг ярих нь зөв. Хувьчлал бол зөв алхам. Гэхдээ Монголд хөрөнгийн зах зээл бүрэн зургаараа хөгжих болоогүй байна. Өмнө нь томоохон стратегийн орд газруудыг хувьчилж, иргэдэд хувьцаа хэлбэрээр тарааж л байсан. Энэхүү хувьцаа сүүл рүүгээ нийгмийн халамж болж хувирсан. Тэгэхээр хувьцааны зах зээл, хөрөнгийн зах зээл гэдгийг монголчууд ойлгохгүй байна. “Эрдэнэт үйлдвэр”-ийн хувьцаанаас тодорхой хувийг иргэдэд эзэмшүүлэх гэж байгаа бол яг хөрөнгийн зах зээлийн хуулиар зохицуулах ёстой. Түүнээс биш нийгмийн халамж руу чиглэсэн бодлогоор явбал энэ нь Монголын эдийн засагт нэмэр болохгүй” хэмээн онцлон хэллээ.

Энэхүү хувьцааны асуудлаар “Эрдэнэт үйлдвэр” ХХК-ийн Төлөөлөн удирдах зөвлөлийн гишүүн Д.Дэмбэрэлээс дараахь тодруулгыг авлаа.

-“Эрдэнэт” үйлдвэрийн хувьцаанаас тодорхой хувийг иргэдэд эзэмшүүлэх шийдвэрийг Засгийн газар гаргалаа. Энэ нь нийгэм, эдийн засагт ямар ач холбогдолтой вэ?

-Хувьцаанаас тодорхой хувийг иргэдэд олгоно гэдэг нь болох асуудал шүү. Ашигт малтмалын тухай хуульд стратегийн ач холбогдол бүхий ордоос 10 хувийг Монгол Улсын иргэдэд үнэ төлбөргүй эзэмшүүлнэ гэсэн заалт байдаг. Энэхүү заалтын дагуу л Засгийн газар шийдвэр гаргаж байгаа хэмээн ойлгосон. Энэ талаар би бусдын адил ерөнхий мэдээлэлтэй л байгаа.

-“Эрдэнэт үйлдвэр”-ийн хувьцаанаас хэдэн хувийг нь хувьчилж, иргэдэд хувьцаа хэлбэрээр олгох юм бол. Өнөөгийн ханшаар тус үйлдвэрийн хувьцаанаас 10 хувийг хувьчилж, хувьцаа хэлбэрээр гурван сая иргэндээ олговол нэг иргэнд 6000 төгрөг ногдоно гэсэн тооцоо судалгааг эдийн засагчид гаргасан байна л даа…

-Энэ тооцоог маш сайн хийх ёстой. Засгийн газраас хуульд заасан 10 хувь гэдгийг нэмж, хасах асуудлаар ямар нэгэн шийдвэр гаргуулахаар Улсын Их Хуралд оруулсан. Тийм болохоор одоохондоо иргэдэд хичнээн хувьцааг ямар зохицуулалтаар олгох асуудал бодлогын түвшинд яригдаж байна. Тус үйлдвэрийн хувьцааны тодорхой хувийг иргэдэд ийм, ийм зохицуулалтаар олгоно гэсэн эцсийн шийдвэр хараахан гараагүй байгаа гэсэн үг.

Э.МӨНХ

Монгол Улсын Татварын ерөнхий газраас ”Оюутолгой” ХХК-д 150 сая ам.долларын татварын акт тавьсан тухай мэдэгдэл хүлээж авсан талаараа тус компанийн хувьцаа эзэмшигч ”Туркойз Хилл Ресурс” өчигдөр /2018.01.15/ мэдэгдсэн байна.

”Туркойз Хилл Ресурс”-ын зүгээс ”Оюутолгой ХХК төслийн хөрөнгө оруулалтын гэрээний хүрээнд (Гүний уурхайн бүтээн байгуулалт, санхүүжилтийн гэрээ), Монгол Улсын хууль дүрэмд заасны дагуу шаардлагатай бүх татвар, хураамжийг төлж барагдуулсан. Оюутолгой ХХК Татварын ерөнхий газраас гаргасан актыг дүгнэн хэлэлцээд, хуулийн хугацаанд хариу мэдэгдэнэ” гэсэн тайлбар гаргажээ.

Оюутолгой ХХК-д 2013-2015 оны хооронд явуулсан аудитын шалгалтын дүнд Татварын ерөнхий газар тус компанийг төслийн эхний үе шатанд албан татвар дутуу төлсөн болон бусад санхүүгийн зөрчил гаргасан хэмээн татварын акт гаргасан аж.

”Оюутолгой” компанитай холбоотой татварын маргаан анх 2014 оны зургадугаар сард эхэлсэн байдаг. ”Оюутолгой” төслийн эхний шатны бүтээн байгуулалтын явцад албан татвар дутуу төлсөн, санхүүгийн бусад зөрчил гаргасан хэмээн Татварын ерөнхий газраас ”Туркойз Хилл Ресурс” компанид албан мэдэгдэл хүргүүлж, татвар төлөлтөд хийсэн аудитын шалгалтаар 130 сая ам.долларын татвар дутуу төлсөн тул уг татварыг нөхөж төлөх шаардлага тавьсан байдаг нь одоог хүртэл үргэлжилж байгаа асуудал юм.

Орон нутагт зам тээврийн ослын улмаас хоёр хүн амиа алдаж, зургаан хүн гэмтжээ. Замын цагдаагийн албаны Жижүүрийн шуурхай удирдлагын хэлтэст өчигдөр нийт 290 дуудлага иржээ.

Үүнээс зам тээврийн ослын 227 дуудлага бүртгэгдсэн бөгөөд ослын улмаас нийслэлд 16 гэмтэж бэртэж, орон нутагт хоёр хүний амь нас хохирч, зургаан хүн гэмтсэн ноцтой хэргүүд гарсан байна. Тухайн өдөр зам тээврийн осолд бага насны нийт долоон хүүхэд өртсөний тав нь тээврийн хэрэгслээр зорчиж байх үедээ осолд өртжээ.

Тухайн өдөр нийслэл хотын гудамж замд хөдөлгөөний аюулгүй байдлыг хангах чиглэлээр нийт 366 алба хаагч үүрэг гүйцэтгэсэн бөгөөд хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 24 зөрчлийг илрүүлэн шалгаж байна.

Бүртгэгдсэн зам тээврийн осол, хэргийг хэлбэрээр нь авч үзвэл явган зорчигч мөргөж гэмтээсэн долоон осол, мөргөлдөх хэлбэрээр 11 осол тус тус бүртгэгдсэнийг ЗЦА-аас шалгаж байна.

Тухайлбал: Нийслэлд СХД-ийн нутаг Товчооны зам “Сод монгол” ШТС-ын урд замд амины N.Sunny маркийн автомашины жолооч нь H.Sonata-6, T.Prado маркийн автомашинуудтай мөргөлдөж жолооч 41 настай Б, 16 настай А, 11 настай Т, 15 настай Г, 11 настай С нарын таван хүн гэмтээжээ.

Орон нутагт:

Төв аймгийн нутаг Жирмийн цагаан нуур гэх газрын асфальтан замд T.Pruis-30 маркийн автомашин T.Landcruiser-200 маркийн автомашинуудтай мөргөлдөж зорчигч 45 настай Б-н амь нас хохирч зургаан хүн гэмтсэн хэргийг Төв аймаг дахь Цагдаагийн газар шалгаж байна.

Хөдөлгөөний ачаалал, түгжрэл саатал ихэссэнтэй холбоотойгоор зөвшөөрсөн гэрэл дохио нь ассан боловч тухайн чиглэлийн замд тээврийн хэрэгслийн хөдөлгөөн удааширсан, түгжрэл сааталтай байхад “Зогс шугам”-ын ард зогсолгүй уулзварт орж, хөндлөн чиглэлд яваа тээврийн хэрэгслийн хөдөлгөөнд саад учруулж бусад чиглэлийн тээврийн хэрэгслийн хөдөлгөөнийг хаадаг, түгжрэл саатлыг механикаар үүсгэдэг зөрчил манай улсын хувьд их байна. Тухайлбал: Багшийн дээдийн уулзвар, МИС-ийн уулзвар, Цэцэг төвийн уулзвар, Төв шуудангийн уулзвар зэрэг.

Иймээс тус албанаас энэ төрлийн зөрчилд тавих хяналтыг эрчимжүүлэх, жолооч нарын сахилга, хариуцлагыг дээшлүүлэх, түгжрэл саатлыг бууруулах чиглэлээр тодорхой төрлийн ажлуудыг зохион байгуулан ажиллаж байна гэж ЗЦА-наас мэдээллээ.

Эрчим хүчний дэд сайд Т.Гантулгаар ахлуулсан салбарын шуурхай зөвлөгөөн хуралдлаа. Хуралдааны эхэнд Монгол Улсын хэмжээнд дулааны цахилгаан станцуудын үйл ажиллагаа хэвийн үргэлжилж байгааг танилцуулсан. Харин сүүлийн үед үүсээд байгаа түлш, шатахууны асуудал хөндөгдлөө. 3-4 хоногийн нөөцтэй байгааг анхааралдаа авч ажиллахыг Эрчим хүчний дэд сайд Т.Гантулга харьяа газруудад үүрэгдлээ.Төвийн бүсийн эрчим хүчний систем өнгөрөгч долоо хоногт 1025 мвт хүрч ажилласан нь энэ өвлийн хамгийн өндөр үзүүлэлт болсон байна. Олон жилийн дунджаар авч үзвэл цаашид энэ ачаалал буурах магадлалтайг Эрчим хүчний “Диспетчерийн үндэсний төв” ХХК-ийн гүйцэтгэх захирал Д.Балдорж танилцууллаа.

Монгол Улсын Засгийн газрын 2015 оны 459 дүгээр тогтоолын хэрэгжилтийг хангах хүрээнд Архангай, Баянхонгор, Говь-Алтай, Говьсүмбэр, Дундговь, Завхан, Өвөрхангай, Хэнтий, Төв аймгийн төвд дулааны станц, дулааны шугам сүлжээ барих, Сүхбаатар аймгийн төвийн дулааны станцыг өргөтгөх төслийг БНСУ-ын “Экспорт импорт” банкны зээлийн хөрөнгөөр хэрэгжүүлэхээр талууд тохиролцсон.Төслийн техник эдийн засгийн үндэслэл/ТЭЗҮ/ – ийг БНСУ-ын “КDHEC” компани боловсруулж байна. ТЭЗҮ 2018 оны 06 дугаар сард бэлэн болно.“КDHEC” компанийн мэргэжилтнүүд 2018.01.15-25-ны өдрүүдэд 10 аймагт томилолтоор ажиллахаар төлөвлөсөнтэй холбогдуулан дэмжлэг үзүүлж, ажлыг шуурхай болгох зорилгоор манай яам, яамны харьяа байгууллагын дулаан хангамжийн инженер, мэргэжилтнүүдээс бүрдсэн 3 багийг 3 чиглэлд хамт ажиллуулах ажлыг Эрчим хүчний дэд сайд Т.Гантулга зохион байгуулж, аймгийн Засаг дарга нар болон томилолтын ажлын хэсэгт удирдамж чиглэл өгч, бэлтгэл ажлыг хангууллаа.

Нийслэлийн улсын бүртгэлийн газраас 152 хороог бүртгэлийн нэгдсэн цахим сүлжээнд холбох ажлыг зохион байгуулж байна.

Одоогийн байдлаар 94 хороог цахим сүлжээнд холбожээ. Тухайлбал, энэ сарын 10-наас өнөөдрийг хүртэлх хугацаанд Баянгол дүүргийн 23 хорооны 16 хороог цахим сүлжээнд холбожээ. Энэ нь иргэдэд төрийн үйлчилгээг түргэн шуурхай хүргэх, хороодын хооронд шилжилт хөдөлгөөний мэдээллийг солилцох цагийг хэмнэх ач холбогдолтой юм.

Хороодыг цахим сүлжээгээр холбох ажлын хэсэгт Нийслэлийн мэдээлэл технологийн газрын нэг инженер, ОӨУБЕГ-ын Мэдээллийн технологийн газрын 7 инженер, Нийслэлийн Улсын бүртгэлийн газрын, төвийн зургаан дүүргийн бүртгэлийн хэлтсийн мэдээлэл технологийн ажилтан нар оролцож байна.

Монголын татвар төлөгчдийн үйлдвэрчний эвлэлийн холбооноос шатахууны үнийг бууруулах асуудлаар Засгийн газарт шаардлага хүргүүлэх болжээ.

УИХ-аас 2016 оны хоёрдугаар сарын 05-ны өдөр батлагдсан “Хөгжлийн бэрхшээлтэй хүний эрхийн тухай хуулийн 18 дугаар зүйлийн 18.1.5-д “мэргэжлийн ур чадварын олон улсын тэмцээнд амжилттай оролцсон хөгжлийн бэрхшээлтэй хүнд урамшуулал олгох журмыг хөдөлмөрийн асуудал эрхэлсэн төрийн захиргааны төв байгууллага батлах” гэж заасны дагуу энэхүү журмын төслийг боловсруулж, Хөдөлмөр, нийгмийн хамгааллын сайдын 2017 оны 12 дугаар сарын 07-ны өдрийн А/212 тоот тушаалаар батлуулсан аж. Энэхүү журамд мэргэжлийн боловсролын сургалтын байгууллагаар мэргэжил эзэмшиж байгаа, мэргэжлийн үнэмлэх болон чадамжийн гэрчилгээтэй хөгжлийн бэрхшээлтэй хүн олон улсын тэмцээн, уралдаанд амжилттай оролцож алт, мөнгө, хүрэл медаль хүртсэн болон тусгай байр эзэлсэн тохиолдолд 500 мянгаас гурван сая төгрөгтэй тэнцэх хэмжээний нэг удаагийн мөнгөн урамшуулал олгохоор тусгасан байна.

Түүнчлэн багш, дасгалжуулагч, хувийн туслах нарт тухайн хөгжлийн бэрхшээлтэй хүний гаргасан амжилтаас хамааран 20-30 хувьтай нь тэнцэх хэмжээний мөнгөн урамшуулал олгох юм. Мөн мэргэжлийн ур чадварын улсын тэмцээнийг гурван жилд нэг удаа зохион байгуулж, нэг мэргэжлээр нэг хүн шалгаруулан гурван жил тутамд нэг удаа зохиогддог дэлхийн мэргэжлийн ур чадварын тэмцээнд оролцуулна. Журмын дагуу шаардагдах төсвийг дэлхийн мэргэжлийн ур чадварын тэмцээн зохион байгуулагдах жилийн төсвийн төсөлд тусгуулж шийдвэрлүүлэх аж.

Нийслэлийн Засаг дарга бөгөөд Улаанбаатар хотын Захирагч С.Батболд Азийн сангийн суурин төлөөлөгч ноён Марк Кэйнигийг өнөөдөр хүлээн авч уулзлаа. Уулзалтад НЗДТГ-ын Төрийн захиргааны удирдлагын хэлтсийн дарга Ү.Ганболд, Бодлого төлөвлөлтийн хэлтсийн дарга Г.Өлзийбаяр, Азийн Сангийн Монгол дахь дэд суурин төлөөлөгч Диана Фернандез, Азийн Сангийн төслийн менежер Н.Амарзаяа болон бусад албаныхан оролцов. Энэ үеэр Нийслэлийн Засаг дарга бөгөөд Улаанбаатар хотын Захирагч С.Батболд “Азийн сан 2012 оноос НЗДТГ-тай хамтран ажиллаж, “Бизнес эрхлэгч эмэгтэйчүүдийн төв”, “Хотын засаглал”, “Хог хаягдал ба цаг уурын өөрчлөлт”, “Төрийн албанд ил тод байдлыг нэмэгдүүлэх нь” зэрэг төслийг амжилттай хэрэгжүүлж ирсэн билээ. Тиймээс цаашид засаглалыг бэхжүүлэх, сайн засаглалыг дэмжих чиглэлээр урьд бий болгосон харилцаагаа өргөжүүлэн хөгжүүлж хамтран ажиллахад бэлэн байна. Азийн сантай Улаанбаатар хот нягт хамтын ажиллагаатай ажилладаг. Хотын зүгээс хотын засаглалыг сайжруулах чиглэлээр хамтын ажиллагаагаа өргөжүүлнэ. Түүнчлэн Азийн сан Улаанбаатар хотыг олон улсын тавцанд гаргахад туслалцаа дэмжлэг үзүүлдэг. Сүүлийн жилүүдэд Зүүн хойд Азийн хотуудын дарга нарын форум зохион байгуулж байгаа. Үүнд маш идэвхтэй оролцдог. Энэ жил уг форумыг хамтран зохион байгуулахаа энэ удаад ярилцлаа. Шинээр томилогдсон суурин төлөөлөгч нь хотын засаглалаар мэргэшсэн, Монгол Улсад олон удаа ирж ажиллаж байсан туршлагатай хүн учраас шууд ажилдаа орсон байна. Тиймээс хамтарч ажиллахад таатай байх болно” хэмээн онцлов.

Азийн сангийн суурин төлөөлөгч ноён Марк Кэйниг “Азийн сан нь яг одоогоор НЗДТГ-тай хамтраад хоёр үндсэн том төслийг хэрэгжүүлж байгаа. “Хотын засаглал” төсөл нь Швейцарийн санхүүжилттэйгээр хэрэгжиж байна. Хотын албан хаагчдын чадавх, иргэдэд үйлчлэх үйлчилгээний чанарыг сайжруулах, төрийн үйлчилгээг хороодын түвшинд хүргэх гол зорилготой төсөл юм. Төслийн хүрээнд 3000 гаруй төрийн албан хаагчийг сургасан байгаа. Хоёрдахь гол төсөл бол “Бизнес эрхлэгч эмэгтэйчүүдин төв” юм. Энэ төв бизнес эрхлэх сонирхолтой, бизнес санал, санаачлагатай, бизнесээ өргөжүүлэх хүсэлтэй эмэгтэйчүүдэд зориулсан сургалт, ганцаарчилсан зөвлөгөө, инкубатор хөтөлбөр зэрэг үйл ажиллагааг явуулдаг. Нээгдсэнээсээ хойш 2 жилийн хугацаанд 4000 гаруй эмэгтэйг үйл ажиллагаандаа хамруулсан байна. Миний хувьд Азийн сангийн суурин төлөөлөгчөөр ажиллах болсондоо баяртай байгаа. Цаашид НЗДТГ-тай олон талд үр дүнтэй хамтарч ажиллана гэдэгт итгэлтэй байна” гэв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Чингэлтэй дүүргийн ЗДТГ-аас агаарын бохирдлыг бууруулах чиглэлд “Монгол базальт” компанитай хамтран XVI хорооны иргэн Ц.Ганхуягийнд “Загвар өрх” төсөл хэрэгжүүлжээ.