Month: January 2018

Аргын тооллын нэгдүгээр сарын 17, Буд гариг. Билгийн тооллын 1, Элдэв тэнгэрт одтой, шарагчин тахиа өдөр. Өдрийн наран 8:23 цагт мандан, 17:34 цагт жаргана. Тухайн өдөр үхэр жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж биеэ энхрийлүүштэй. Эл өдөр эе, эвээ ололцох, хамтын хөдөлмөр эхлэх, гэрээ хэлэцэл байгуулах, найр хурим хийх, бэр гуйх, инж өгөх, авах, үнэт эрднийн зүйл авах, гаригийг тахих, хагалгаа хийлгэх, буг дарах, газрын ам бооход сайн. Улай гаргах, хиншүү хярвас гаргах, мод суулгах, нарийн зөвлөгөөн хийх, байшингийн суурь тавих, угаал үйлдхэд муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод баруун зүгт мөрөө гаргавал зохистой.

Үс шинээр үргээлгэх буюу засуулахад тохиромжгүй.

“Өдрийн сонин”-ы лхагва гарагийн дугаар хэвлэгдэн гарлаа.

“Өдрийн сонин”-ы “Өдрийн сурвалжлага” буланд “Магнай трейд” компанийн шатахуун импортлох эрхийг цуцлах саналыг УУХҮЯ-нд хүргүүллээ хэмээн өгүүлснийг хүлээн авч үзээрэй.

Банкууд охин компани байгуулахыг хориглосон заалт орохоор болов хэмээн “Цаг үе” нүүрт өгүүлсэн байна.

Мөн тус нүүрт Гадаад худалдааны эргэлт 10 тэрбум ам.доллар давж, сүү сүүн бүтээгдэхүүний үнэ арав гаруй хувиар өсчээ хэмээн өгүүлжээ.

Агаарын бохирдол бууруулах 500 сая ам.долларын зээлийн зарцуулалтад БНСУ-ын талаас ажлын хэсэг ажиллана гэж “Өдрийн сонин”-ы “Улс төр” нүүрт өгүүлжээ.

Мөн тус нүүрт УИХ-ын гишүүн Н.Оюундарь: Үйлдвэрлэл эрхлэгчдэдээ татварын хөнгөлөлт үзүүлэх хэрэгтэй хэмээн ярьсныг хүлээн авч үзээрэй.

Нийтлэлч Баабар Утаатай тэмцсэн бидний туршлага хэмээн “Баримт үзэл бодол” нүүрт өгүүлсэн байна.

“Баримт, үйл явдал” нүүрт “Винсвэй”, “Чалько” компани Mонголын Засгийн газрын тогтоолыг эсэргүүцэн, ганцмодны боомтын замыг хааж жагсаал хийлгэж байна хэмээн өгүүлсэн байна.

Монгол Улсын анхны Ерөнхийлөгч П.Очирбат: “Дээлийнхээ энгэрийг мялаасан газрын тос маань шатахуун боллоо шүү” гэж хэлэх юмсан хэмээн “Өөрөөс нь…” буланд ярьсныг хүлээн авч үзээрэй.

Яруу найрагч З.Ядмаа: Зохиолчдын маань инээд наргиан бичигдэж үлддэг байсан бол мөн ч сайхан архив байх сан хэмээн ярьсныг “Өд бэх” булангаас хүлээн авч үзээрэй.

“Дэвжээ” нүүрт Дэлхийн аварга шалгаруулах тэмцээний хошой хүрэл медальт Г.Мандахнаран Тамирчин хүний амжилт гаргах гол үндэс нь ялагдлаа хурдан мартах гэж ярьсан байна.

Дэлгэрэнгүй мэдээллүүдийг уншихыг хүсвэл дараах линкээр бүртгүүлж уншина уу. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы лхагва гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88085029 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

“Тогтвортой хөгжил–Ерөнхий боловсрол” улсын хоёрдугаар зөвлөгөөнийг Ерөнхий сайд У.Хүрэлсүхийн ивээл дор 11 жилийн дараа зохион байгуулах гэж байна.

Францын мэс заслын академийн хүндэт гишүүнээр өргөмжлөгдсөн ХСҮТ-ийн Ерөнхий захирал, Анагаахын шинжлэх ухааны доктор Ж.Чинбүрэн өчигдөр эх орондоо ирлээ. Түүнийг өнөөдөр эрүүл мэндийн сайд Д.Сарангэрэл хүлээн авч уулзан баяр хүргэж, эрүүл энх хамгийн сайн сайхан бүхнийг хүслээ.

Тэрээр Дэлхийн хамгийн нэр хүндтэй Францын мэс засалчдын академийн хүндэт гишүүний өргөмжлөлийг гардан авсан юм. Ингэснээр Азиас энэ шагналыг авсан гурав дахь хүнээр тодорч байна. 2004 оноос Францын мэс заслын арга, техникийг монголдоо төдийгүй гадаадад нэвтрүүлсэн мөн элэгний төвд байрласан төвөгтэй хавдрын тайралтыг хялбаршуулсан, Монгол улс мэс заслыг санхүүгийн хязгаарлагдмал орчинд элэг, нойр булчирхайн хавдрын мэс заслыг амжилттай, үр дүнтэй сайн хийсэн хэмээн хүндэт гишүүний гэрчилгээ гардуулжээ.

Тэрээр хэлэхдээ “1731 онд байгуулагдсан Францын мэс засалчдын академийн Хүндэт гишүүн болсондоо маш их баяртай байна. Дэлхийн нэр хүндтэй, урт удаан түүхтэй, уламжлалтай, мэргэжлийн байгууллагад хөөцөлдсөөр байгаад үнэлүүлнэ гэсэн ойлголт байдаггүй юм. Тус академийн мэргэжлийн Өндөр зөвлөлийн шийдвэрээр өргөмжлөгддөг. Энэ амжилт спортоор бол Олимпын алтан медаль бөгөөд олимпын медальтай дүйцэхүйц шагнал. Энэ бол Монгол улсын мэс заслыг ОУ-ын түвшинд хүлээн зөвшөөрсний баталгаа билээ. Энэ баярт явдлыг тохиолдуулан Монголын үе үеийн мэс засалчдадаа халуун баяр хүргэе”гэлээ.

Төрийн банк банк өнөөдрөөс Тэтгэвэр барьцаалсан зээлийн хүүг 12 хувь болгож бууруулав.

ХНХЯ болон ХААН банк, Төрийн банк хооронд байгуулсан тэтгэврийн зээлийн хүүг бууруулах Санамж бичгийн хүрээнд иргэд 12 сарын хугацаатай тэтгэврийн зээлийг 12 хувийн хүүтэй авах боломж бүрдсэн бөгөөд өнөөдрөөс албан ёсоор хэрэгжиж эхэлсэн юм. Өнөөдөр 10.00 цагт ХААН банк тэтгэврийн зээлийн хүүг бууруулсан талаар бид мэдээлсэн. Тухайн үед Төрийн банкны удирдлагууд зээлийн хүүг бууруулах шийдвэрийг албан ёсоор гаргаагүй байсан юм. Харин үдээс хойш Төрийн банк Санамж бичгээр хүлээсэн үүргээ албан ёсоор хэрэгжүүлж эхэлжээ.

Монгол Улсын хэмжээнд 381.8 мянган иргэн нийгмийн даатгалын байгууллагаас сар бүр тэтгэвэр авч байгаа бөгөөд үүний 60 хувь буюу 230.8 мянган иргэн 680.9 тэрбум төгрөгийн тэтгэврийн зээлтэй байна. Тиймээс НДЕГ-аас Монгол Улсын Засгийн Газрын 2016-2020 оны үйл ажиллагааны хөтөлбөрт тусгагдсан тэтгэврийн зээлийн хүүг үе шаттайгаар бууруулах зорилтын хүрээнд тэтгэвэр авагчдад 6 хүртэлх сарын тэтгэвэртэй тэнцэх хэмжээний зээлийг 15 хувийн хүүтэйгээр олгох ажлыг өнгөрсөн оны нэг сард эхлүүлсэн. Энэ хугацаанд 95 мянга 600 тэтгэвэр авагч 15 хувийн хүүтэй зээлийг 76,3 тэрбум төгрөгийн зээл авсан бөгөөд энэ нь 18 хувьтай харьцуулахад 1.3 тэрбум төгрөгийн хүүгийн дарамтаас чөлөөлөгдсөн үзүүлэлт юм. Гэвч энэ төрлийн зээлийн хугацаа хэт богино тул иргэд банкны шаардлагыг төдийлөн хангахгүй байгаа юм. Тиймээс зээлийн хугацааг 12 сар болгож, хүүг мөн 3 хувиар бууруулав. Харин иргэд 12 сараас урт хугацаанд буюу 36 сар хүртэлх хугацаатай зээл авсан тохиолдолд 18 хувийн хүүтэй байх юм.

Улаанбаатар Эмпати дунд сургуулийн технологийн багш П.Алексейтэй ярилцлаа.

Дархан хотын Төмөр замын вокзалын өртөөний баруун талын цэцэрлэгийн дунд нэгэн сонирхолтой байгууламж нүдэнд содон тусдаг. Энэ бол орчны барилгаас ялгаран харагдах сансрын хөлөг юм. Хотын зочин гийчний хувьд энэ байгууламж нь олон асуудал дагуулах үнэхээр сонин бүтээл. Эзэнгүй мэт хаягдсан, арчилгаагүй цэцэрлэгийн дунд ёрдоон харагдах, хүн төрөлхтний дэвшлийн хүчит хөлөг, сансрын уудам өөд тэмүүлсэн хэвээр байх авч, тээвэрлэгч нэг пуужин нь зах зээлийн шуурганд үгүй болж, өнгө жавхаа нь цагийн эрхээр гандан доройтож, тэнгэр өөд цойлох хөг нь аль хэдийнэ өнгөрсний бэлэг тэмдэг болсныг илтгэнэ.

Үнэндээ бол ийм харамсал, харууслын гэрч болон сүндэрлэх тавилангүй юмсан. Монгол хүн дахин сансарт дүүлэн нисэхгүй юм, гэж үү? Хөнгөн гунигаар дүүрсэн миний сэтгэл хөдөлж, энэ өрөвдөлтэй хөшөө дурсгалын бүтээгч эздийг тодруулах нэгэн түүхийн эрэлд морьдсоны эцэст зохиогч, бүтээлчдийн төлөөлөл болох нэгэн хүнтэй уулзан ярилсанаа уншигч танаа толилуулъя.

-Таныг би энэ Сансрын хөлөгт хөшөөний зохион бүтээгч, барьсан хүн нь гэж сонслоо. Та үүний үүх, түүхийг ярихгүй юу?

-Би ганцаараа бүтээж, зохиогоогүй. Энэ бол хамтын бүтээл. Тухайн үеийн захиргаа удирдлага санаачлан дэмжээгүй бол, энэ бүтээл хэзээ ч босохгүй байв.

1970 – 80 оны үед Дархан зангилааны удирдлага, МАХН-ын хороо, үйлдвэрчний болон залуучуудын эвлэлийн хороод үнэхээр ард иргэдийн төлөө чинь сэтгэлээсээ эрмэлзэн хамтын нягтралтай ажилладаг байжээ. Тухайн үед эдгээрийг намын хорооны дарга “Буурал” хочит Даржаа гуай, ҮЭ-ийн хорооны дарга Роза гуай, ХЗЭ-ийн хорооны дарга Б. Жияандорж нар удирдан зохион байгуулж, аливаа ажил хөдөлмөрийн тэргүүн шугамд манлайлан оролцдог байсныг дурсахгүй байх аргагүй. Тэгэхэд би Төмөр замын Дохиолол холбооны 1 дүгээр ангид монтёрын албан тушаалтай, ажлын хажуугаар Зангилааны төрөл бүрийн зураг, чимэглэл, тохижилтын ажил гүйцэтгэдэг, гарын дүйтэй гэгдэх үнэгүй зараал байлаа. Ер нь би ч биш, бүх залуучууд тийм л байсан. Гайгүй юм бүтээдэг залуучуудыг дээрх удирдлагууд албан ажлаас нь чөлөөлөн юм хийлгэдэг нь нууц биш. Сонирхолтой нь бид дуудагдаж очоод, үүрэг даалгаврыг нь дуртай хүлээн аваад, залхууралгүй, чинь сэтгэлээсээ гүйцэтгэдэг байсан нь илхэн. Тэгж л биднийг хүмүүжүүлсэн.

Ингээд хаврын сэрүүхэн нэгэн өглөө ажилдаа ирээд байтал, намын хороон дээр Даржаа дуудаж байна гэв. Очлоо, тэгсэн Даржаагуай – Хүүхээ, чи пуужин хийж чадах уу? –гэлээ. Би мэл гайхан, цэл хөхрөв. Тэгсэн, нүүрэнд нь баяр бялхаж – Чи төсөөл дөө, өнөөдөр Монгол хүн анх сансарт ниссэн шүү дээ, надад өглөө утсаар хэлсэн, би үхтлээ баярлаж байна, одоо чамд хэлж байна. Дээрээс утасдаад намайг ажил зохион байгуул гэсэн. Нисээд буухад нь хөшөө босгочихсон баймаар байна. Гэхдээ жинхэнэ гоё хөшөө. Энэ хүү байхгүй юу – ЖҮГДЭРДЭМЭДИЙН ГҮРРАГЧАА ! Мундаг уу? Плакат үзүүлэв. Энэ оростой – Жанибеков гэдэг! Бас мундаг хүү! Энэ пуужин нь – СОЮЗ 39 – хөлөг! Үүнийг хийж чадах уу? Маш томоор? –гэв. Би ийм гайхалтай үйл явдал болж байхад яаж зүгээр харж суухав, баярласан бахархсандаа сэтгэл халин нисэх шахуу мөчид “Тэгье !” – гэж нулимсаа барин зөвшөөрөв.

Даржаа дарга намайг тэврэн авч чанга үнсэнгээ – “Сайн байна! Миний хүү 12 цаг гэхэд надад зураг эскиз ээ аваад ир. Хэрэгтэй гэсэн хүмүүсээ сонго. Би Роза даргад хэлчихье, ажлаас нь чөлөөлөг. Хоол унд, ажлын байр, материалд санаа зоволтгүй. Харин сайхан эскиз гарга!” гэв. Пуужингийн ба сансрын нисгэгчдийн, будаг нь ханхалсан, шинэхэн хоёр плакат өгөв. Ингэж Союз-39 сансрын хөлөгт цогцолбор хөшөөний түүх эхэлсэн юм.

Би плакатуудаа бариад дотны найз Т.Баярсайхандаа энэ баяртай мэдээг дуулгахаар очлоо. Сүүлийн үед бид хоёр гар нийлэн олон чимэглэгийн ажил хийж байгаа улс. Баярсайхан Цэрэгжүүлсэн хамгаалах салаанд ажилладаг, зураг сайхан зурахаас гадна нямбай цэвэр бичигтэй үнэхээр авьяастай, мотоспортын тамирчин, Монгол Улсын спортын мастер залуу байлаа. Хоёул суулаа, ярилцлаа. Баяраа маань жинхэнэ асаж байна. Шуурхайлан эскиздээ орлоо. Төрөл бүрийн ноорог зураг тус тусдаа гаргаж байгаад, санаагаа нийлүүллээ. Нэгдсэн санаагаа А3 ватум цаас дээр эскиз зураг болгон гаргалаа, өнгө будгаар ялгалаа, сансрын хөлгийн бодит хэмжээг 30 дахин багасгасан масштабаар буулгалаа, тусад нь цогцолбор хөшөөний бусад чимэглэх элементүүдийн эскизийг гаргаж зохион бүтээх конструкцийн зураг, байрлуулах арга ажиллагаа болон байрлах газрын сонголт зэрэг санаагаа бичиж хавсаргалаа. Энэ бүх ажлыг үндсэндээ хамтын хүчээр богино хугацаанд, яг 12 цагт дуусгалаа. Яаравчлан хоёулаа Даржаа дарга дээр орлоо, нөгөөдөх чинь баярлаж байна гэж жигтэйхэн, “миний хөвгүүд сайн”- л гэнэ, эскиз тайлбарлах хооронд байн байн тэвэрч аван үнсэж “мундаг”- л гэнэ, ярьж дууссаны дараа “Би Улаанбаатар орж эдгээрийг батлууллаа, Та хоёр ажилдаа ор, дуртай хүмүүсээ дайчил, үүрэг өгсөн байгаа, би маргааш ирнэ” –гээд л шуурга шиг гарч одсон, машин дуудсан байсансан. Ингээд ажил ундарсан даа.

Сансрын нислэгийн нэгдэх өдөр, шөнө. Дархан зангилааны 11 дүгээр байрны 1 дүгээр орцны подвалд байрлах Дохиолол холбооны 1-р ангийн Чөлөөт цаг өнгөрүүлэх танхимд, төмөр замын депогоос машинч Аварзэд, гагнуурчин Жаргалсайхан, Өртөөнөөс “Розагийн аравгар хорхой” хочит Энх-Амгалан, Орон сууцнаас “Фото зурагчин” хочит Баттулга, Дохиолол холбооноос Засварын бригадын монтёр Баярсайхан бид хоёр, Цэрэгжүүлсэн хамгаалах салаанаас мастер Баярсайхан зэрэг шижигнэсэн, гарын дүйтэй гэгдэх, одоо овог нь мартагдсан, долоон залуус өдрийн 14 цаг гэхэд цугласан байлаа. Тэр өдөр бид хэрэгцээт бүх материалуудаа татан авч, хэсэгчлэн хуваагдаж, үүрэгт ажлуудаа хуваарилан авсны үндсэн дээр дор дороо л нэг зорилгод хүчин зүтгэж байлаа.

Миний хариуцсан хэсэг Сансрын хөлгийн конструкцийн ажил болон будаж чимэглэх үүрэг хүлээсэн. Мастер Баярсайханы хариуцсан хэсэг нь Интеркосмос хөтөлбөрийн эмблем логоны барельефт гурван ширхэг чимэглэлийн хавтан босгох, хугацааны хувьд хамгийн давчуу, хүнд даалгавар хүлээн авсан. Харин Жаргалсайханы хэсэгт бүх гагнуурын ажил, цемент цутгуур, газар шорооны ажил ноогдов. Үндсэндээ бид хоёр хоёроороо хуваагдаж, харин аравгар хорхой (өхөөрдөж хэлж байгаа юм шүү) бүгдэд нь шуурхайлан туслахаар томилогдов. Үүргээ ч маш сайн, махруу гавшгай биелүүлсэн дээ.

Тэр шөнө Аварзэд бид хоёр сансрын хөлгийн бүтэц зохион бүтээх ажлын хэрэгцээт бүх эд ангийн эсгүүрийг масштабын дагуу гаргаж, хоёр мм-ийн зузаан гөлөм төмрийг хайчилж угсран бэлдсэн дээ.

Харин Жаргалсайханы хэсэг Сансрын хөлөгт хөшөөний газар шороо, төмрийн ажлыг гүйцэтгэхээс гадна Баярсайханы хэсэгт барельефт хөшөөний арматур зангидах, гагнах ажилд туслав.

Мастер Баярсайхан тэр шөнө Интеркосмос хөтөлбөрийн эмблем, Монгол – Оросын хамтарсан сансрын нислэгийн лого болон Гүррагчаа – Жанибеков хоёрын сансрын дуулгатай нүүр хөргийн гурван барельефийг гипс-цементийн хольцоор гардан бүтээсэн дээ.

Сансрын нислэгийн хоёрдахь өдөр, шөнө. Энэ өдөр нойргүй хоносон бидний хувьд хүндэвтэр өдөр байлаа, гэхдээ залуу байж дээ. Өглөө нь бид Союз-39 хөлгийг угсрах ажилдаа орсон. Кран дуудсан, гол төмрөө босгосон, суурь цемент цутгуурын ажлуудыг гүйцэтгэсэн, сансрын хөлгөө угсарсан, гагнуурын ажил хийсэн, будсан. Үдэш болоход вокзалын хажууд сансрын хөлөг боссон, хүн амьтан шавсан байлаа. Хүлээгдэж байгаа нь мастер Баярсайханы арматурд цутгасан барельефт хавтан хөшөөнүүд.

Хэсэг түр завсарласны дараа шөнийн гурван цагийн үед барельефт хавтангууд эвэрсэн тул цогцолбор хөшөөг бүрэн дуусгах боломж олдов. Хавтангуудыг болгоомжтойгоор нэг нэгээр нь кранаар өргөж суурь дээр байрлуулан бэхлэх ажлыг гагнуураар гүйцэтгэж дуусав. Өглөө найман цаг болж байсан шиг санаж байна.

Одоо ганцхан манай хэсгийн ажил үлдсэн. Барельефт хөшөөг бэхэлсний дараа холбогч төмрийг гөлөм төмрөөр бүрж гагнах ажлыг Жаргалсайхан гүйцэтгэсэн. Үүн дээр суурь өнгө тавих, дээр нь үг бичих асуудлыг би биелүүлсэн. Залуучууд нээлтийн ажиллагаанд оролцох бэлтгэлээ хангаж байлаа.

Сансрын нислэгийн гуравдахь өдөр. Сансар огторгуйн өнгө будаг тавьсны дараа хөшөөгөө тойруулан би гурван талд нь : Сансарт мөнхөрсөн ахан дүүсийн найрамдал, Нэг экипажид – нэг багт, Монгол – Зөвлөлтийн найрамдал бадартугай! – гэж бичсэн байлаа. Өдрийн 11 цагт бичиж дуусав.

12:00 цагт Дархан зангилааны бүх аж ахуйн албадын дарга нар болон албан хаагчид цугласан цогцолбор хөшөөний нээлтийн ёслолын ажиллагаа болсон. Нээлтийн ажиллагааг анхны сансрын нисгэгч газардах өдөр хийнэ гэдэг амлалтдаа бид хүрсэндээ маш их бахархдаг. Иймэрхүү л түүхтэй дээ.

-Асуух зүйл байна. Ийм богино хугацаанд, тийм том дурсгалт зүйл бүтээчихлээ гэхэд үнэмшмээргүй юм аа. Та давслаагүй биз?

-Үгүй. Гэрчүүд нь өнөөдөр ч гэсэн Дархан хотын төмөр замд ажилласан, амьдарсан хэвээр л байгаа шүү дээ.

-Сониноос энэ хөшөөг босгоход гар бие оролцож байсан залуучууд одоо байгаа болов уу ?

-Маш сайхан асуулт байна. Би үнэндээ одоо сайн мэдэхгүй юм аа. Энэ пуужин чинь босоод 37 жил өнгөрсөн байна. Би Дарханд амьдраагүй удаж байна, төмөр замд ажиллаагүй бүр их удаж байна. Миний сайн мэдэхээр, миний дотны нөхөр Монгол Улсын Спортын мастер Баярсайхан минь дараа жил нь автын ослоор тэнгэрт хальсан юм даг. Би туйлын харамсаж явдаг. Мөнхөд бүтээлээ үлдээсэн гэж боддог, даанчиг харамсалтай нь энэ хөшөөг буулгах тухай яриа мэр сэр явагддаг гэж сонссон. За нөгөөдүүлийг сайн мэдэхгүй юм. Аварзэд төмөр замаас гараад Америк явсан сурагтай, Холбооны Баярсайхан байгаа гэсэн, Орон сууцны Баттулга өнгөрсөн гэж сонссон, Энх-Амгалан байгаа гэсэн байх аа. Бусдыг нь үнэхээр мэдэхгүй юм. Харин энэ завшааныг ашиглаад хэрэв амьд бол, сонин уншдаг бол “Холбоо бариач !” –гэмээр байна.

– Гунигтай юм. Уншигчдад сонирхуулахад тухайн үед та нарыг шагнаж урамшуулсан биз дээ?

-Шагнал урамшууллын төлөө зүтгээгүй л дээ. Гэхдээ одооны байр суурина харахад, өрөвдөлтэй л санагдах юм.

-Урамшуулаагүй гэж үү?

– Үгүй яахав дээ. Тэр үе чинь, социализм шүү дээ. Роза дарга минь МҮЭ-ийн Ардын хувьсгалын 60 жилийн ойн Гавшгайч гэсэн тэмдэг гардуулсан, Дархан зангилаа, намын хороо бид долоог гурав хоног амар гэж одоогийн Буриад улсын Галуут нуур хотоор аялуулсан. Тэр үед чинь гадаад явна гэдэг асуудал энгийн хүнд боломжгүй бөгөөд ховор шүү дээ. Тэгэхлээр үүнийг их аз завшаан гэж ойлгодог байсан. Хөөрхий, одоогийн энэ Улаан-Үд орох замд байдаг тосгон. Тэр үед тосгон гэж санагдаагүй шүү. (Инээв)

-Сонин юм аа. За тэр ч яахав ээ. Өнөөдөр энэ хөшөө эзэнгүйдээд байгаа мэт санагдах юм. Гэтэл Та байна, Дархан зангилаа байна, Дархан хот байна. Энэ яагаад ийм өрөвдөлтэй байдалд ороод хогийн цэг, архичдын цугладаг газар болчихсон юм бэ? Ийм их хүч хөдөлмөр гаргаад ийм сайхан үйлсэд зориулаад, Монгол хүн бүрийн ирээдүй, хойч үеийн хүсэл мөрөөдлийн бэлэг тэмдэг болсон дурсгалт зүйлийг ийм муухай болгочихоод, одоо үүнийгээ устгаж санаа амрах юм шиг ярьж байгааг юу гэх вэ? Та ойлгож байна уу?

-Надад ойлгох юм алга. Би үүнийг найз нөхдийн бүтээсэн зүйл юм гээд сэргээн засварлах гэж оролдсон, даан ч надад мөнгө байхгүй юм чинь. Гэхдээ цуглуулвал тийм чиг их мөнгө биш л дээ. Тэгээд би сансрын нисгэгч Ж.Гүррагчаад 25 жилийн ой дөхөөд ирэхэд хандсан. Асуудлыг шийдэж өгнө гэсэн. Шийдсэн гэсэн. Намайг Дархан хотын дарга, одоогийн УИХ-ын гишүүн Хаянхярваад ханд гэсэн. Би баярлаад бригад байгуулаад Дархан хот орж төмөр замын буудалд үнэтэй байрлаад ЗДГ-ын нарийн бичгийн даргатай уулзаад асуудлаа танилцуулсан чинь “Дарга тийм үүрэг үлдээгээгүй, одоо Солонгост байгаа, та ирэхээр нь уулзаарай”- гэдэг хариу авсан. Долоо хоног хүлээгээд дийлэлгүй, буудал, зардалдаа шатаад буцсан даа. Түүнээс хойш хэд хэд оролдсон, сүүлдээ хаясан. Тэгээд бодсон “Ер нь энэ хөшөө хэнд ч хэрэггүй юм байна даа” – гэж.

-Яагаад тэгж бодов?

-Яахав хөөрхий. Хөшөөний нээлтийн ажиллагаан дээр Дархан хотын захиргаанаас нэг ч хүн байгаагүй, дараа нь хоёр сансрын нисгэгч Дархан хотод айлчилж байна гэдэг сургаар Дархан зангилаа хөшөөний хажууд хөдөлмөрчдийг цуглуулаад л баахан хүлээлгэсэн, нисгэгчид ирээгүй. Одоогийн байдлыг та мэдэж байгаа, Төмөр зам Монгол Улсын чинээлэг байгууллагуудын нэг, гэтэл гурван сая хүрэхтэй үгүйтэй мөнгө гаргаад үүнийг сэргээн засварлаж чадахгүй гэж үү?

-Тийм дээ. Та өөр юу хэлмээр байна?

-За, хэлээд байх зүйл бараг үгүй шив дээ. Яахав, эх орон, ирээдүй хойч үеийнхээ итгэл мөрөөдөл, ёс зүйн төлөвшилд санаа зовдог нэгэн байвал Сансрын хөлөгт цогцолбор хөшөөг сэргээн засварлахад санхүү дэмжлэг үзүүлнэ үү? Тав ч багадахгүй шүү – гэмээр байна. Улаанбаатар Эмпати сургуульд технологийн багш хийдэг гэсээр яриагаа өндөрлөлөө.

-Энэхүү дусгалт байгууламжийг сэргээн засварлах сайхан сэтгэлт хүн байвал дараахь утсаар холбогдоно уу.

Холбогдох утас -89580616

Н.ГАНАА