Month: January 2018

– ФЕЛЬЕТОН –

Алтан унжлагат тахиа жилийг бид үдэж байна. Унжлагатай тахиа гэдгийг дуулаад нэг их тоогоогүй ээ. Тоосон нэг нь тахианых юм чинь юу шалив гээд авч хэлцээгүй. Гэтэл унжлага бол унжлага, тахианых байсан ч жижигддэггүй гэдгийг мэдүүлсэн жил боллоо. Ялангуяа төрийн түшээдийн “алтан унжлага”-тай холбоотой олон асуудал боссон жил байж таарав.

Жишээлэхэд, зарим улстөрч алтан унжлаганыхаа уутыг айлд гээж баларсан бол нөгөөх нь алтан унжлаганыхаа зургийг явуулж хүн айлгасан асуудалд холбогдов. Нэг хүн чөтгөрөөс, нөгөөх нь чононоос, гурав дахь нь харанхуйгаас айж байхад зарим эмэгтэй “алтан унжлага”-ны зурагнаас сүнсээ зайлтал айдаг байх нь. Харин тэд зөвхөн зурагнаас айдаг уу, зураг бус бодит дүрийг үзвэл яах вэ гэсэн асуудал хариугаа хүлээсээр үлдэж. Судлаачид ч санал хуваагдаж “зөвхөн зурагнаас айдаг гэж үздэг нь хужаа”, “үгүй ээ, зураг дүр хоёулангаас нь айдаг нь хужаа” гэлцэн ширүүн маргаж байна.

Ер нь алтан унжлага оролцоогүй хэрүүл цөөхөн байлаа даа. Том даргын алтан унжлагыг мялаагаад гавьяа шагнал хүртсэн тухай дуулиан ч сонсдож байна. Түүнчлэн, зарим том улстөрч сонгуульд нэр дэвших эмэгтэйг заавал ч үгүй “алтан унжлагаараа аравнайлдаг” гэсэн хэрүүл ч дуулдаж байлаа.

Хэд хэдэн эмэгтэй “Өөрийг нь алтан унжлагаараа хуурсан” гишүүний тухай гомдол санал гаргасан байна. Гялгар цалгар юманд дуртай бүсгүйчүүл төрийн түшээдийн алтан унжлагаар нь гангалах гээд бүтээгүй юмуу, нөгөөдүүл нь алтан унжлагаа бэлэглэх гэж байгаа дүр үзүүлэн унжигнуулан гайхуулж байснаа эргүүлээд хуйлчихсанд урам нь хугарсан уу, бүү мэд ээ?

Хүүхнүүдийн хэрүүлийн агуулга ч өөрчлөгдөж “Чи алтан унжлагад дуртай”, “Үгүй, би алтан ээмгэнд л дуртай”, “Чи бол алтан унжлага хэрэглэх заяагүй” гэхчлэнгээр хөврөх болсон ч гэх шиг.

Гэхдээ хорвоо юм хойно, наанатай цаанатай л ажгуу. Сайн мэдээ байхгүй биш байгаа юм байна. Судлаачдын үзэж байгаагаар “Зарим алтан унжлага хэтэрхий биегүй материалаар хийгдсэн тул амархан үрчийдэг нь хэрэглэгчийн таашаалд нийцээгүй”, мөн “нэр бүхий гишүүнийх эдэлгээ даахдаа муу” болон “Тэр сайдынх хэтэрхий богино, унжлага гэхээсээ илүү мэнгэ гэвэл зохилтой байсан нь нэн урамгүй” гэхчлэнгийн гомдлууд тахиа жилд эрс багассан байна.

Ёс жудагтай зарим судлаачийн амнаас төрийн түшээдийн дотоожийг “Алтан унжлагын сав” буюу товчоор “Алтан сав” хэмээн нэрийдэж бичих санал гаргасан байх юм. Санал гаргаад зогссонгүй “Айлд хонохдоо “алтан сав”-аа гээсэн эрхэм гишүүний тухайд” гэхчлэн бичиж эхэлсэн байна. Манай өнөө хэн гишүүний явдал шастир түүхнээ “Эрхэм гишүүн бээр “алтан унжлагаа хувиараа цэнгүүлж яваад… “айлд хонохдоо “алтан сав”-аа мартаж гарсан” байдлаар бичигдэх нь тодорхой болж байх шиг.

Тэд үүл борооны явдлыг өгүүлсэн зохиолоо “Эр хүн алтан саваа нээхүй дор…” гэхчлэн эхлүүлжээ. Тэр ч бүү хэл ажил явдал тохиолдсон айлд ирсэн ламбугай “Бурхан болоочийн алтан савыг нээе” гэхэд хүмүүс “олны нүдэн дээр тийм юм хийлгэхгүй” гэж дургуйцсэн гэх.

Урьдын сайхан уламжлал ч энэ зуур сэргэж эхэлжээ. Манай Батлан хамгаалах яам “Бүх цэргийн хар сүлд цэнгүүлэх” ёслол хийдэг сайхан уламжлалтай. Энэ ёсыг өргөжүүлэн Их хурлын тамгын газраас бүх гишүүдийн “Төрийн алтан унжлага цэнгүүлэх” ёслол хийдэг болох юм байна.

Нэгэнт л эрхэм гишүүдийн унжлагын явдал нь төрийн хэрэг болоод явчихаж байгаа хойно, тэдний чадавхи нь “төрийн чалх” байж таарна. Учир мэдэх зарим мэргэд, зарим ахмад гишүүний алтан унжлага нь сульдснаас үүдэн төгрөгийн чалх сульдсаан гэж байна. Тэд “АНУ-ын ерөнхийлөгч Трамп нас өндөр ч залуу эхнэртэй учраас нэгдсэн улсын төрийн унжлага чанга байгаа, доллар ч гозойсоор буй” хэмээнэ.

Иймээс улс орны эдийн засгийн чадавхи, төгрөгийн чалхыг бэлгэдэн эрхэм гишүүдийг алтан унжлагын нэрийг цээрлэж “Алтан суварга” хэмээн цоллох хөтөлбөр ч боловсруулжээ. Үнэхээр ч эрхэм гишүүнд гомдол гаргасан нэгэн эмэгтэй “Суварга нь унжлага болсон” хэмээн зүхэж байсан нь нэгийг өгүүлэх мэт.

Жирийн нэг ярианы утга ч өөр болж, цаг үеэ дагаад. Саяхан эрхэм гишүүн рүү утасдсан бүсгүй ажлаа бүтээж өгөхийг гуйгаад

-За битгий унжаад байгаарай хэмээн захиж байгааг “хүнд биш унжлагад нь сануулсан” захиас гэж үзүүштэй мэт.

Эртээ урьд цагт “моод Монголоор дуусдаг” байсан бол одоо “Сенсаац Монголоос” гэдэг болж. Манай өнөө “Алтан унжлагат гишүүн”-ий явдал дэлхий дахины унжлаганы адал явдлын үүдийг нээж, “морийг эмээллэсэн” байна.Тэрээр унжлаганыхаа алтан баринтгийг айлд тайлсны маргаашаас эхлэн Холливудын одод “алдартай продюсерүүдийн алтан унжлаганд ороолдсон хэрэг” цуурайллаа. Урлагийнхан ч дэгжин улс юм болохоор бараг бүх эрэгтэй одод алтан унжлагаараа гайхуулсан, хүүхнүүдэд албадан зүүсэн хэрэгт унажээ. Харин хүний зовлон мэддэгээрээ Катрин Денев тэргүүтэй франц хүүхнүүд л “Хүүхнүүд тэгээд унжлагагүй яаж амьдрах гэсэн юм бэ” хэмээн сөргүүлж асуусан байна. Ертөнц түгдэрсэн гэх.

…Өнгөрч байгаа жилийн “унжлага”-ыг бид “Тахианых юм чинь юу шалив гэж”, “Босоо биш унжаа юм чинь чих халууцуулахгүй байлгүй” хэмээн огт тоогоогүй билээ. Гэтэл юу болов, хар даа. Эрхээ биш унжлага нь “алтан” байсан тулдаа л дээдсийг нэрвээд эгэл бидэндээ хал балгүй өнгөрлөө.

Гэтэл гарах жил маань бас унжлагатай… алтаар унжихын оронд “Тийн унжина” гэж байгаа. За яахав, тийн унждаг юм байгаа биз гэхэд амьтан нь нохой, тахиа биш нохой…

Нохой ч тийн унжихаараа эвгүй шүү, эвгүй. Гэхдээ “Тийн босно” гээгүй болохоор арай гайгүй бол уу, мэдэх ч юм алга оо.

Өглөө бүр тантай хамт байдаг “Өдрийн сонин”-ы пүрэв гаригийн дугаар 16 нүүрээр хэвлэгдэж, та бүхний гар дээр хүрч байна.

Эдийн засгийн бодлого, өрсөлдөх чадварын судалгааны төвөөс “Аймгуудын өрсөлдөх чадварын тайлан-2017”-ийн үр дүнг өчигдөр танилцууллаа. Уг судалгаанд Орхон аймгийн өрсөлдөх чадвар 13,6 хувиар өссөн бол Говь-Алтай, Архангай аймаг ядуурал, ажилгүйдлээрээ тэргүүлжээ. Энэ талаарх сурвалжилгыг тэргүүн нүүрнээс хараарай.

УИХ-ын Хууль зүйн байнгын хорооны энэ сарын 16-ны өдөр болсон хуралдааны үеэр Хууль зүйн сайд Ц.Нямдорж ноцтой мэдэгдэл хийсэн. Үүнийг нэгдүгээр нүүрэн дэх “С.Зоригийн амь насыг хөнөөсөн хэрэг дээр ажилласан өмгөөлөгчдийн гар утсыг чагнасан, хүн байнга дагасан, амь насанд заналхийлсэн нь үнэн” сурвалжилгаас үзээрэй.

Сангийн дэд сайд Х.Булгантуяатай ярилцлага хийжээ. Тэрээр “Ройтерс Монголыг албан ёсоор хар жагсаалтаас гаргалаа гэж мэдээлсэн” хэмээн онцлон хэлжээ.

Монгол Улсын Ерөнхий сайд У.Хүрэлсүхийн БНСУ-д хийсэн ажлын айлчлал өндөрлөлөө. Айлчлалын талаарх сурвалжилгыг улс төрийн хоёрдугаар нүүрэнд хэвлэгджээ.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог, баримт, үзэл бодлын гуравдугаар нүүрэнд нэрт нийтлэлч Б.Цэнддоогийн “Алтан унжлаганы хэрэг” нийтлэлийг хүлээн авч үзээрэй.

Ардчилсан намын Улс төрийн бодлого хариуцсан нарийн бичгийн дарга АЗХ-ны ерөнхийлөгч С.Эрдэнэболдтой хийсэн ярилцлагыг дөрөвдүгээр нүүрнээс хараарай.

“Нийслэлийн гэр хорооллын дахин төлөвлөлт болон авто замын бүтээн байгуулалтын төсөл хөтөлбөрүүд”-ийн талаарх хэлэлцүүлэг өчигдөр боллоо. Улс төрийн тавдугаар нүүрэн дэх “Дагуул хот барина, тэлнэ гэдэг одоогоор боломжгүй” сурвалжилгаас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завьяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

Та бүхэн манай сонины цахим хувилбарыг https://admin.dnn.mn/plugins/news/login/хаягаар хүлээн авч уншаарай.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-оос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 99090658, 88085029 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХНИЙ УРГАХ НАРНААР ТАНТАЙ ХАТ