Month: January 2018

“Тогтвортой хөгжил-Ерөнхий боловсрол” сэдэвт улсын хоёрдугаар зөвлөгөөн Төрийн ордонд эхэллээ. Өнөөдрийн зөвлөгөөнд Улаанбаатар хотын Налайх, Баянзүрх, Багануур, Багахангай дүүрэг, Төв аймгийн нийт 800 гаруй багш, ажилтнууд оролцож байна. Зөвлөгөөнөөр “Эрх зүйн шинэчлэл”, “Багшийн хөгжил, цалин хөлсний шинэчлэл”, “Сургалтын чанар, үнэлгээний шинэчлэл”, “Хүүхдийн хүмүүжил, төлөвшил, хөгжил, хамгаалал” гэсэн дөрвөн сэдвээр салбар хуралдаанууд болно.

УИХ-ын гишүүн, Боловсрол, Соёл, Шинжлэх Ухаан, Спортын сайд Ц.Цогзолмаа илтгэлдээ “Монголын боловсрол, монголын багш нар монгол ухаан, соёл, уламжлал, эрдэм боловсролыг хойч үед өвлүүлж, монгол хүний хөгжлийг хангаж, улс эх орныхоо тусгаар тогтнол, хөгжил дэвшлийн баталгааг хангах эрхэм чухал бөгөөд өндөр хариуцлагатай үүргийг биелүүлж, Монгол Улсын түүхийн хөгжил дэвшлийн үе шат бүхэнд хөгжлийн хөтөч болж ирсэн бахдам гавьяатай гэдгийг юуны өмнө тэмдэглэн хэлэхийг хүсч байна.

Зөвхөн сургалтын төлөвлөгөөнд байгаа судлагдахууны цагаар багшийн ажлын нормыг тогтоож, сургалтыг тооцон санхүүжүүлдэг санхүүгийн тогтолцоог өөрчлөх шаардлага бий болж байна. Сонгон, секц, дугуйланг сургалтын хөтөлбөрийг хэрэгжүүлэх орон зай, цагийн нөөц, хичээлийн бүрэлдэхүүн хэсэг болгож, санхүүжүүлэх шаардлага гарч ирж байгаа.

Сургалтад мэдээлэл, холбооны технологийг нэвтрүүлэх, цахим сургалт, боловсролын нээлттэй эх үүсвэрүүдийг хөгжүүлж бусад нөөц бололцоог өргөнөөр ашиглах замаар хөтөлбөрийн зорилтыг бүрэн хангах, сургалтыг чанартай, үр дүнтэй болгох шаардлага бий болж байна” гэлээ.

Зөвлөгөөнд оролцогчдын 70 хувь нь ЕБС-ын багш нар, 30 хувь нь удирдах болон бусад ажилтнуудын төлөөллөөс бүрдэж байгаа аж. Зөвлөгөөн Улаанбаатар хотод 25-ны өдрийг хүртэл үргэлжлэх юм. Бүсчилсэн хэлбэрээр Ховд, Өвөрхангай, Орхон, Дорнод аймгуудад нэгдүгээр сарын 29-нөөс хоёрдугаар сарын 3-ны өдрийг хүртэл зохион байгуулагдах юм. Зөвлөгөөн Төрийн ордонд үргэлжилж байна.

Нийслэлийн Засаг дарга С.Батболд хэвлэл мэдээллийнхэнтэй зангиагүй уулзалт хийлээ. Тэрээр олон нийтийн хамгийн эмзэг сэдэв болсон, агаарын бохирдлыг хэрхэн бууруулах, цаашид ямар арга хэмжээ авч ажиллах талаараа мэдээлэл өглөө. Түүний өгсөн мэдээллээр ойрын хугацаанд хотын захиргааг Яармагийн дэнж рүү шилжүүлэх бөгөөд 2018-2019 ондоо багтаж эхний ажлаа нь хийхээр төлөвлөжээ.Тодруулбал, НЗДТГ, НИТХ болон нийслэлийн харьяа гучин гурван агентлаг, зарим үйлдвэрийн газрыг нүүлгэх аж. Түүнчлэн Хотын дарга агаарын бохирдол, утаанаас залхаж байгаагаа онцолж байлаа.

Тэрээр ярихдаа “Хотын захиргааг нүүлгэснээр гучин таван мянган төрийн албан хаагчаас гадна гучин мянган иргэн хотоос гарна. Тэр хэмжээгээр хот түгжрэлгүй болно. Яармагийн дэнжийг сонгосон нь хэд, хэдэн шалтгаантай юм. Нэгдүгээрт, тухайн газарт сул зай, талбай их. Хоёрдугаарт, дэд бүтэц харьцангуй сайн хөгжсөн гэж үзсэн учир уг газрыг сонгосон. Утаанаас салахын тулд хамгийн зөв шийдэл нь хотоо орон сууцжуулах явдал юм. Утаа, авто замын түгжрэлээс салахын тулд дагуул хотыг байгуулж, хотоо тэлэх бодлогыг барьж ажиллаж байна” гэв.

НӨАТ суутгагчтай хийсэн худалдан авалтад төлсөн албан татварын 20 хүртэл хувийг буцаан олгуулахаар ГТСМТТ-өөс ирсэн мэдээллийг хянан баталгаажуулах ажил Татварын ерөнхий газарт хийгдэж байна. Өнөөдрийн байдлаар 655245 хэрэглэгчийн бүртгэл байгаагаас 22192 иргэний бүртгэлийн мэдээлэл дутуу, алдаатай байна.

НӨАТ-ын тухай хуулийн дагуу татварын алба мэдээллийг хянан баталгаажуулж Сангийн яаманд хүргүүлнэ. Сангийн яам ажлын 45 өдөрт багтаан буцаан олгох шийдвэрийг гаргах бөгөөд Монгол банкаар дамжуулан татвар төлөгчийн харилцагч банкруу буцаан олголтыг шилжүүлдэг. Таны цахим төлбөрийн баримтын системд бүртгүүлсэн хэрэглэгчийн данс эзэмшигчийн мэдээлэл арилжааны банкин дахь данс эзэмшигчийн мэдээлэлтэй ижил, зөрүүгүй байх шаардлагатай. Хэрэв бүртгэлийн мэдээлэл алдаатай бол гүйлгээ буцаагдах юм.

Иймд бүртгэлийн мэдээлэл огт оруулаагүй, дутуу алдаатай оруулсан, давхар данс нэгтгэх шаардлагатай иргэд бүртгэлийн мэдээллээ, ТЕГ-аас мэдээллийг хянан баталгаажуулж Сангийн яаманд хүргүүлэх хугацаанаас өмнө буюу 2018 оны энэ сарын 22-ноос өмнө засварлах шаардлагатай. Бүртгэлийн мэдээлэл алдаатай тохиолдолд буцаан олголт авах боломжгүй ажээ.

Татварын ерөнхий газрын зөвлөгөө өгөх утас 1800-1288, хянагдаж байгаа төлөвтэй байгаа бол 70115019 дугаарын усанд холбогдож мэдээллээ баталгаажуулах юм байна.

Монгол үндэсний сагсан бөмбөгийн холбоо энэ жилийн хоёр дахь өсвөр үеийн улсын аварга шалгаруулах тэмцээнээ Буянт-Ухаа спорт ордонд зохион байгуулж байна.

Энэ удаагийн өсвөр үеийн улсын аварга шалгаруулах тэмцээнд 2000 оноос хойш төрсөн 18 хүртэлх насны ерөнхий боловсролын сургуульд суралцаж буй хүүхдүүд өрсөлдөж байгаа юм. Энэ тэмцээнийг “Отгонтэнгэр” Их сургууль ивээн тэтгэжээ. Тэмцээний шилдэг эрэгтэй, эмэгтэй нэг тоглогчийг тус сургуульд бүтэн жил үнэгүй суралцах эрхийн бичгээр шагнах болзолтой ажээ.

Тэмцээнд эрэгтэй 24, эмэгтэй 12 багийн тамирчид хурд, хүч, авхаалж самбаагаа сорьж байгаа юм. Тэмцээний шилдгүүд ирэх пүрэв гарагт тодрох бөгөөд тус тэмцээнд сайн тоглосон тамирчдаас сонгож Монгол Улсын шигшээ багийг бүрдүүлэн ХБНГУ-д болох олон улсын тэмцээнд оролцуулна.

Өнөөдөр Эрүүл мэндийн яамны Эдийн засаг санхүүгийн хэлтсийн дарга Б.Пүрэвсүрэнгээр ахлуулсан баг нийслэлийн алслагдсан Багахангай дүүргийн эрүүл мэндийн төвийн тусламж, үйлчилгээтэй танилцлаа. Тус дүүрэг нь Улаанбаатар хотоос 100 км-т оршдог бөгөөд 4400 гаруй суурин хүн амтай. Багахангай дүүргийн Эрүүл мэндийн төв нь Эрүүл мэндийн сайдын “Томуу, томуу төст өвчнөөс сэргийлэх, хянах ажлыг эрчимжүүлэх тухай” албан даалгавар, Нийслэлийн Засаг даргын захирамжийг хэрэгжүүлэх зорилгоор “Томуу, томуу төст өвчнөөс урьдчилан сэргийлэх бэлэн байдлыг хангах, дэгдэлтийн үед хэрэгжүүлэх үйл ажиллагааны төлөвлөгөө гарган хэрэгжилтийг ханган ажиллаж байна.

Тус Эрүүл мэндийн төв нь нийт 15 ортой, үүнээс хүүхдийн 4, насанд хүрэгчдийн 6 ортой. Одоогийн байдлаар хүүхдийн 6 ор ажиллуулж, томуугийн улмаас хэвтүүлэн эмчлэх тусламж, үйлчилгээг хүлээгдэл чирэгдэлгүй зохицуулан ажиллуулж байна.

Бага насны хүүхэд, ахмад настан, хөгжлийн бэрхшээлтэй иргэдийн гэрийн эргэлтийг сайжруулснаар амбулаторийн үзлэг хэвийн түвшинд байна.

Хоногтоо 10 –аас доошгүй дуудлагатай, 60 км-ын тойрогт дуудлагын тусламж, үйлчилгээг үзүүлж байна.

Алслагдсан дүүргийн хувьд сүүлийн үед цус, шээсний анализаторын аппарат, хурдавчилсан оношлуураар 13 төрлийн шинжилгээг хийснээр иргэдэд тусламж, үйлчилгээг ойртуулж байна. Томуу, томуу төст өвчнөөс урьдчилан сэргийлэх сурталчилгааны ажлыг сургууль, цэцэрлэг, албан байгууллагуудад хийж, хамтран ажиллаж байна.