Month: December 2017

Categories
мэдээ нийгэм

“Нийслэлийн нийтийн тээврийн автобусанд байгалийн шатдаг хий /LNG-CNG/ нэвтрүүлэх төсөл” хэрэгжиж эхэллээ

“Улаанбаатар хотын хөгжлийн корпораци” ХК нь Монгол Улсын Их Хурлаас 2013 онд баталсан “Улаанбаатар хотыг 2020 он хүртэл хөгжүүлэх Ерөнхий төлөвлөгөөний тодотгол, 2030 оны хөгжлийн чиг хандлага” бодлогын баримт бичигт туссан төсөл хөтөлбөрийг төр хувийн хэвшлийн түншлэлээр хэрэгжүүлэх ажлын хүрээнд “Нийслэлийн нийтийн тээврийн автобусад байгалийн шатдаг хий нэвтрүүлэх” төсөл хэрэгжүүлэхээр ажиллаж байна.

Улаанбаатар хотын нийтийн тээврийн том оврын автобусад хорт утаа тортог ихээр ялгаруулдаг дизель түлш бус байгальд ээлтэй түлшийг ирэх оны 2-р улирал гэхэд нэвтрүүлэхээр БНСУ-ийн хөрөнгө оруулалтаар дээрх төслийг хэрэгжүүлэхээр хамтран ажиллах гэрээ байгууллаа. Гэрээнд БНСУ-ын талаас “Үжин Ар Ди Си” компанийн дэд ерөнхийлөгч И Ил Гюу, “Улаанбаатар хотын хөгжлийн корпораци” ХК-ийн Гүйцэтгэх захирал С.Сод-Эрдэнэ нар өнөөдөр гарын үсэг зурлаа. Төслийг тусгай зориулалтын компани байгуулж хэрэгжүүлэх ба тус компанийн нэр “Улаанбаатар байгалийн хий” ХХК нэртэй юм байна.

“Нийслэлийн Засаг дарга бөгөөд Улаанбаатар хотын Захирагчийн гаргасан захирамжаар нийслэлийн нийтийн тээвэрт байгальд ээлтэй технологи, байгалийн хий ашиглах төсөл хэрэгжүүлэхээр шийдвэрлэсэн. Энэ төслийн хүрээнд төр, хувийн хэвшлийн түншлэлээр 28.4 тэрбум төгрөгийн хөрөнгө оруулалтыг шийдвэрлэж байна. Мөн нийслэлд байгалийн шатдаг хий агуулах колонкуудыг барих дэд бүтцийн асуудлыг шийдвэрлэлээ. Улаанбаатар хот агаарын бохирдлыг бууруулах чиглэлээр шат дараатай арга хэмжээ авч байгаа. Нийтийн тээврээс гарч байгаа хорт утаа, тортог зэргийг байгальд ээлтэй технологиор шийдэхийн тулд нийслэлийн нийтийн тээврийн парк шинэчлэлтэй уялдуулан байгалийн хий ашиглах төсөл хэрэгжих гэж байна” хэмээн “Улаанбаатар хотын хөгжлийн корпораци” ХК-ийн гүйцэтгэх захирал С.Сод-Эрдэнэ ярилаа.

Нийтийн тээврийн хэрэгсэл нь Улаанбаатар хотын хорт утааны 11 хувийг эзэлж байгаа нь нэг хүнд ногдох хүлэмжийн хийн ялгарлын хэмжээгээр өндөр үзүүлэлттэй байдаг.

“Улаанбаатар байгалийн хий” ХХК-ийн Төлөөлөн удирдах зөвлөлийн дарга И Ил Гюу “Улаанбаатар хотын хөгжлийн корпорацитай энэ төслийг хэрэгжүүлэхээр снамж бичиг байгуулаад байна. Төслийн хэрэгжүүлэх анхны үйл ажиллагаа явагдаж эхлэх гэж байгаад маш их баяртай байна. Энэ төсөл хэрэгжсэнээр Улаанбаатар хотын утааг багасгахад хувь нэмэр оруулна гэж үзэж байгаа. Нийтийн тээвэрт байгалийн хий нийлүүлэх нь төслийн анхны хэрэгжих хувилбар. Цаашдаа гэр хороололд хэрхэн нийлүүлэх зэргээр өргөжих болно” хэмээн ярилаа.

Сүүлийн жилүүдэд замын хөдөлгөөний түгжрэл ихэсч, агаарын бохирдлын хэмжээ нэмэгдүүлж, байгаль орчинд сөргөөр нөлөөлж байна. Ялангуяа том оврын автобуснууд ихэвчлэн дизель түлш хэрэглэдэг. Дизель түлшнээс ялгарах хорт утаа, хорт бодис, тортог нь бусад төрлийн түлшнээс илүү хортой учир байгалийн хийн түлшийг нэвтрүүлж, нийгэм, эдийн засгийн ач холбогдлыг нэмэгдүүлэх, агаарын бохирдлыг бууруулах зайлшгүй шаардлагатай байгаа юм гэж нийслэлийн ЗДТГ-н Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ нийгэм

Иргэдийг бодит мэдээллээр түргэн шуурхай хангах үндэс суурь тавигдлаа

Нийслэлийн Засаг даргын А/864 дүгээр захирамжийн дагуу “Нийслэлийн хот байгуулалтын дундын мэдээллийн сангийн нэгдсэн тогтолцоог бий болгох” ажлын хүрээнд байгуулагдсан ажлын хэсгийн ээлжит хурал 2017 оны 12 дугаар сарын 06-ны өдөр боллоо.

Газар зүйн мэдээллийн системд суурилсан хот байгуулалтын дундын мэдээллийн сангийн нэгдсэн стандарт, бодлогын баримт бичиг боловсруулан, бодит цаг хугацаанд өгөгдөл, мэдээлэл солилцох нэгдсэн тогтолцоо, архитектур бүхий дэд бүтцийг бий болгох зорилготой энэхүү ажлын хэсэгт 30 байгууллагын 52 албан хаагчид оролцлоо.

Энэ удаагийн хурлаар нийслэлийн Мэдээллийн технологийн газраас “Нийслэлийн хот байгуулалтын дундын мэдээллийн сангийн нэгдсэн тогтолцоог бий болгох” ажлын хүрээнд гарсан үр дүн, тайланг танилцуулж, ажлын хэсгийн гишүүдээр батлуулав.

Ийнхүү нийслэлийн хот байгуулалтын дундын мэдээллийн сангийн нэгдсэн тогтолцоог бий болгож, төрийн байгууллагуудын уялдаа холбоог сайжруулах, шийдвэр гаргагчид болон иргэдийг бодит мэдээллээр түргэн шуурхай хангах үндэс суурь тавигдлаа гэж Нийслэлийн Мэдээллийн технологийн газраас мэдээллээ.

Categories
мэдээ цаг-үе

Гишүүнчлэлийн карттай бол бараагаа захын үнээс ч хямдаар авна

Хотын яг төвөөс чанх хойд зүгт гурван километр гаруй зайтай орших Таван буудалд “Арви” хэмээх супермаркет нээгдээд удаагүй байна. Бусад дэлгүүрүүдээс өвөрмөц үйлчилгээ үзүүлдэг гэх. Манайд янз бүрийн дэлгүүрүүд зөндөө л байдаг гэж та бодох байх. Харин “Арви” нь бусдаас өөр нэгэн онцлогтой. Чухам ямар онцлогтой болохыг мэдэхээр тус супермаркетыг зорьсон юм.
Биднийг очиход Орост үйлдвэрлэсэн чихэр, жигнэмэгүүдийг нийлүүлэгчдээсээ хүлээн авч ажилтнууд нь ихэд завгүй байсан тул энэ хооронд дэлгүүртэй нь танилцав. Бусад супермаркетуудад худалддаг бидний өдөр тутмын хүнсний хэрэглээний бараанаас эхлээд сав суулга гээд ахуйн хэрэгцээний бүх л барааг борлуулж байв. Удахгүй болох шинэ жилийн баярыг угтаж гацуур моднууд ч тавьсан харагдав. Харин бараанууд нь гишүүний, ердийн гэсэн хоёр үнэтэй байв. Жишээ нь “Атар” талхыг гишүүд нь 1100 төгрөгөөр авна. Харин бусад үйлчлүүлэгчдийн хувьд 1200 төгрөгийн үнэтэй. Өндөг гэхэд 260 төгрөг, ердийн үнэ нь 300 төгрөг. Гишүүнчлэлийн үнэ гэдэг нь “Арви” супермаркетын хамгийн гол онцлог. Өөрөөр хэлбэл та тус супермаркетын гишүүний карттай бол зарж буй бүх бараануудыг ямар нэгэн татвар зэрэг нэмэгдэлгүйгээр үйлдвэрийн үнээр авна. Эхэндээ тус дэлгүүр нь зөвхөн гишүүддээ үйлчилнэ гэсэн зарчим баримталж байжээ. Харин өнөөдөр бол ямар ч хүн үйлчлүүлж болно. Гагцхүү төлөх үнэ нь өөр өөр. Гишүүний болон ердийн үнийн зөрүү нь 12-15 хувь.
Бид хамгийн түрүүн “Арви” супермаркетын худалдааны менежер М.Жавхлантай уулзсан юм. Дэлгүүр нь 100 кв. метр талбайтай. Доод талдаа мөн ийм хэмжээний том заалтай. Яваандаа өргөжихөөр доод давхрын талбайгаа ч ашиглах бодолтой байгаа гэнэ. Гишүүддээ дотоодын бараануудыг үйлдвэрийнх нь үнээр зардаг юм бол импортын барааны хувьд ямар байдаг талаар тодруулахад дистрибьютер буюу нийлүүлэгчийн үнээр зардаг хэмээн тайлбарлав. Худалдан авалтдаа аль болох бага мөнгө зарцуулах хүсэлтэй бол гишүүн болоход л хангалттай.
“Арви” супермаркетын гишүүний картыг авах хоёр арга зам бий. Хамгийн хялбар нь 50 мянган төгрөг төлөөд нэг жилийн туршид хэрэгцээтэй бараагаа үйлдвэрийн үнээр авна. Харин гишүүний төлбөр нэмэгдэх эсвэл хасагдах талаар сонирхоход одоогоор энэ талаар тодорхой шийдвэр гаргаагүй гэв. Ер нь бол 50 мянган төгрөгийг нэмэхгүй байх бодлого барих аж. Ийнхүү биднийг ярилцаж байхад нэлээд хэдэн үйлчлүүлэгч кассан дээр дугаарлан зогссон харагдав. Бага ангийн сурагч охиноо дагуулсан нэгэн бүсгүй нэлээд их зүйл авсан харагдав. Авсан бараагаа хоёр хэсэг болгон уутанд хийлгэж төлбөрөө хийгээд гарах гэж байхад нь хэдэн үг сольсон юм. “Арви” супермаркетын онцлогийн талаар мэддэг эсэхийг нь сонирхоход бараг өдөр болгон орж ирдэг гэв. Гишүүдэд зориулсан үнэ нь маш хямд гэдгийг ч сайн мэдэж байлаа. Гэр нь ойрхон байдаг бөгөөд охиныхоо багшид өгөх бэлэг авахаар орж иржээ. Гишүүний карт авах бодолтой байгаа эсэхийг сонирхоход худалдаж авсан барааныхаа талоныг цуглуулж байгаа гэв. Худалдан авалт нь 300,000 төгрөг болоход гишүүн болдог гэдгийг ч мэдэж байлаа. Харин бүсгүйн дараагийн үйлчлүүлэгч гэр бүлийн хоёр зуслан руу явж байгаад зам дагуу байрласан тул орж ирсэн. Ийм супермаркет байдгийг мэдээгүй гэнэ. Гишүүний үнэ нь бараг захын үнээс нь хямд байгааг онцлов. Тиймээс ч кассан дээр төлбөрөө хийхдээ яаж гишүүн болох талаар дэлгэрэнгүй мэдээлэл авсан гэв. Супермаркетын талх зардаг хэсэгт явж байсан эмэгтэйтэй ярилцахад гишүүн болох бодолтой байгаагаа ярив. Гэхдээ одоохондоо байдлыг ажиглаж байгаа гэнэ. “Арви” дэлгүүрийн үйл ажиллагаа цаашдаа ямар байхаас шалтгаалан гишүүнээр элсэх эсэхээ шийднэ гэдгээ хэлсэн юм. Өнгөрсөн амралтын өдрүүдэд “Шарк Танк” шоу нэвтрүүлгээр “Арви” дэлгүүрийн эзэн Б.Ойдовын ярихыг үзсэн гэв. Ийнхүү хэд хэдэн үйлчлүүлэгчтэй ярилцахад “Шарк Танк” шоу нэвтрүүлгийг үзээд супермаркетыг зорьж ирсэн үйлчлүүлэгч ч нэлээд хэд байлаа. Ажил тарах үед 17:00 цагаас хойш бол нэлээд хөл хөдөлгөөнтэй болдог гэнэ. Супермаркет нээгдээд удаагүй боловч үйлчлүүлэгчдээсээ талархлын үг нэлээд сонссоор байгаа хэмээн ажилчид нь ярьж байлаа.
50 мянган төгрөг төлөөд нэг жилийн туршид талх, сүү, ногоо гээд өдөр тутмын хэрэглээний бараагаа хямдаар авна гэдэг бол маш том давуу тал болохыг худалдааны менежер тайлбарлаж байв. Ийнхүү биднийг ярьж байхад тус дэлгүүрийн эзэн Ч.Ойдов ч орж ирж бидэнтэй ярилцсан юм. Тэрээр МУИС-ийг эдийн засагч мэргэжлээр дүүргэсэн. “Номин”, “Мобиком”-д борлуулалтын газрын захирлаар ажиллаж байсан. Австралид эдийн засгаар мастер цол хамгаалж ирээд “Арви” супермаркетаа ажиллуулж байгаа. Ер нь бол худалдааны салбарт нэлээд туршлага хуримтлуулсан нэгэн.
-Өнөөдөр Улаанбаатар хотод олон том супермаркетууд байдаг. Тэдгээр нь зах зээлд байр сууриа эзэлчихсэн гэж болно. Ийм үед дахин нэгэн шинэ дэлгүүр нээнэ гэдэг нэлээд зоригоос гадна ихэд эрсдэлтэй алхам.
-Би худалдааны чиглэлээр олон жил ажилласан. Ажилдаа ч дуртай. Энэ салбарт ажиллахдаа худалдааны байгууллагад хамгийн гол нь үнэ гэдгийг ойлгосон. Яавал аль болох хямд үнээр бараагаа борлуулах вэ гэдэг нь асуултын тэмдэг гэж болно. Энэ бол худалдааны бүх л байгууллагын тулгамдсан асуудал. Би ч ялгаагүй ийм эрэл хайгуул, судалгаа хийж байгаад барааг үйлдвэрийнх нь үнээр зарах боломж бий гэж бодсон. Миний хувьд бусад супермаркетуудтай өрсөлдөнө гэхээсээ илүү худалдааны салбарт шинэ загварыг бий болгох зорилт тавьсан. Энэ бол цэвэр бизнес биш 20 хувь нь ашиг, 80 хувь нь нийгмийн хариуцлага. Өөрөөр хэлбэл нийгэмдээ хувь нэмэр оруулах зорилготой.
-Ойролцоогоор нэг өдөрт танай супер маркетаар хичнээн хүн үйлчлүүлж байна?
-Нэг өдөрт дунджаар 500 орчим талон гарч байгаа. Тэгэхлээр 500 хүн үйлчлүүлж байна гэсэн үг.
-Та “Шарк Танк” шоу нэвтрүүлэгт оролцсон. Шүүгчид нь таныг дэмжсэн үү, юу гэж хэлсэн?
-Дэмжихээр болсон. Энэ салбарын зовлон жаргалыг илүү сайн мэддэгээрээ Түмэнгэрэл гуай илүү их дэмжсэн. Ч.Ойдовоос яагаад супермаркетаа “Арви” гэж нэрлэснийг сонирхоход арвижуулах, хэмнэх гэсэн утгыг агуулсан хэмээн тайлбарласан юм. Одоогоор ямар ч ашиггүй шахуу ажиллаж байгаа тул хөрөнгө оруулалт хамгийн чухал гэнэ. Одоогийн байдлаар санаа нийлсэн найз нар, ээж нь гээд өөрийг нь тусалж дэмждэг хүмүүстэйгээ хамтарч байгаагаа ч ярив. Монголын худалдааны салбарт шинэ хэв маяг оруулж буй “Арви” супермаркетаар 8.30-22.00 цаг хүртэл үйлчлүүлэх боломжтой юм байна.

Гэрэл зургийг Г.БАЗАРРАГЧАА

Categories
мэдээ нийгэм

​Бидний амьдралыг өөрчлөх 19 технологийн бүтээл

Хүмүүс өдөр тутмын амьдралаа хөнгөвчлөхийн тулд маш олон технологуудыг бүтээж байна. Удахгүй бидний амьдралыг өөрчлөх гайхалтай технологуудыг та бүхэнд танилцуулая.

Усыг дарс болгон хувиргах шилэн аяга бий болно гэвэл та итгэх үү?

Сингапурын эрдэмтэд ямар нэг шингэний үнэр, амтыг өөрчлөх шилэн аягыг бүтээжээ. “Vocktail” хэмээн нэрлэгдэж буй энэ аяганы нэр нь “виртуал коктейл” гэсэн утгыг илэрхийлдэг. Хамгийн гайхалтай нь гар утасны аппликейшнаар доторх шингэнийг нь хүссэнээрээ өөрчлөх юм.

Ухаалаг нүдний шил нь төсөөлшгүй өргөн боломжтой

“Vue” хэмээн нэрлэгдэх ухаалаг нүдний шил нь олон төсөөлшгүй давуу талтай. Жишээлбэл энэхүү нүдний шил дуудлага хийх, хөгжим тавих, байршил тогтоох, алхаагаа тоолох, шатааж буй илчлэгээ хэмжих зэрэг боломжийг олгон. Гайхалтай биш гэж үү. Хамгийн гайхалтай нь, “Миний нүдний шилийг хай” тохиргоог идэвхжүүлснээр, та шилээ алга болгох вий хэмээн айх хэрэггүй болох аж. “Vue” нь энгийн нүдний шил, энгийн нарны шил шиг харагдах хэдий ч, товчлуураар ажилладаг, утасгүй цэнэглэж болдог тусгай төхөөрөмж юм.

Шүдээ угаахаас залхуураад байвал автомат шүдний сойз олж аваарай

“Amabrush” хэмээн нэрлэгдэх шүдний сойзыг амандаа хийгээд л хүлээ. Таны шүд угаагдсан байх болно. Бас маш чанартай угаана гэж байгаа. Ердөө 10-хан секундэд шүдийг бүрэн угааж цэвэрлэдэг уг шүдний сойзыг “Bluetooth”-ээр ухаалаг гар утастайгаа холбоход л таны хүсэл биелнэ.

Хэлний бэрхшээл гарсан үед хүний яриаг текст рүү хөрвүүлдэг хүзүүний зүүлт хэрэглээрэй

“Senstone” хүзүүний зүүлтийг хүзүүндээ зүүсэн байхад нэг товчлуур дараад л үг яриаг текст болгон хөрвүүлэх боломжтой. Тус төхөөрөмжийн хэрэглээний тухай судалгаа явуулахад, нийт оролцсон оюутнуудын 97 хувь нь “Senstone” төхөөрөмжийг өдөр тутамдаа хэрэглэхийг хүсч байсан аж. Одоо харин тэд лекцэнд санаа зовох хэрэггүй болж, ердөө л багшийн яриаг сонсож, зүүлтээ асаан тэмдэглэлээ хөтлөх боломжтой боллоо. Дашрамд дуулгахад “Senstone” нь 12 орны хэл ойлгодог байна шүү.

Сэрүүлэгтэй шалны дэвсгэр

Ихэнх хүмүүс өглөө тавьсан сэрүүлгээ унтраачихаад л унтаад өгдөг шүү дээ. Тэгвэл “Ruggie” шалны дэвсгэрийг гараар унтраах боломжгүй. Заавал босч хөлөөрөө гишгэж байж унтарна. Энэ нь хүмүүсийг орноос нь босгоход туслах сайн талтай бөгөөд дэвсгэр дээр хоёр хөлөөрөө 3 секунд гишгэхэд л сэрүүлэг унтрах юм байна. 3 секунд нь тархийг нойрноос сэргээхэд хангалттай хугацаа аж.

Шарвин хэвлэгч

“PancakeBot” хэмээх энэ төхөөрөмжтэй байхад хүссэн хэлбэр хэмжээгээрээ шарвин хайрч болох юм байна. Хүүхдүүддээ цэцгэн хэлбэртэйгээс эхлээд, дуртай үлгэрийн баатрын дүрстэйг хүртэл хийж өгч болох бөгөөд хүүхдүүд өөрсдөө төрөл бүрийн зураг зурж, тэр зургаараа хайрсныг ч идэж болох гэнэ шүү.

Ус шүүгч гуурс

“LifeStraw” шүүлтүүртэй гуурс нь бактерийг 99.9 хувь, вирусийг 96.2 хувь шүүж чаддаг. Анхандаа үүнийг ундны цэвэр усны гачигдалтай, ядуу буурай орнуудын иргэдэд зориулан бүтээсэн ч дэлхийгээр аялагчдын дунд ихээхэн нэрд гараад байна. Аялагчид үүнийг ашиглан гол, нуурын уснаас чөлөөтэй ууж болох юм байна хэмээн ихэд талархан хүлээж авч байгаа аж.

Доторх бүтээгдэхүүн нь муудвал өнгөө өөрчилдөг таглаа

“Braskem” компани Америк, Бразилийн эрдэмтэдтэй хамтран доторх бүтээгдэхүүн нь муудвал өнгөө өөрчилдөг таглаа зохион бүтээжээ. Таглаа нь саван доторх хүчил, шүлтийн түвшнээс хамаарч өнгөө өөрчилдөг бөгөөд ийм таглаа супермаркетуудыг хугацаа нь дууссан бүтээгдэхүүн худалдахаас сэргийлж чадах юм.

Дэлгэцтэй салхины шил

“Carloudy” салхины шил нь өөр дээрээ дэлгэцтэй бөгөөд дэлгэцийг ухаалаг гар утас юм уу өөр ямар нэгэн “Bluetooth”-ээр холбогддог төхөөрөмжтэй холбоод байршлын мэдээлэл авч болох аж. Мөн дэлгэцийг шилний дуртай хэсэг рүү зөөж, харах хэсгээ чөлөөлж болно. Үүгээр ч зогсохгүй дэлгэцийг дуу хоолойгоороо удирдаж, жолооч гараа жолооны хүрднээс авахгүй байх боломжийг олгоно.

Ухаалаг куртик

Канадын өвлийн хувцасны “Smart Parka” компани ухаалаг куртик зохион бүтээж байна. Уг куртик ханцуйндаа бээлийгээ хадгалдаг бөгөөд бээлийгээ хаядаг эсвэл бээлий авч явж чаддаггүй хүмүүсийн хэрэгцээнд бүрэн нийцэж байгаа юм. Куртикны урт өөрчлөгдөж болох ба дотроо олон халаастай. Хэрэв та куртикаа олохгүй бол байршил тогтоогчоор илрүүлж болно. Мэдээж куртик маш дулаан бөгөөд Канадын өвлийн хүйтэнд зохицсон аж.

Халаасны кино театр

Энэ төхөөрөмжийг проектор болон чанга яригчийн тусламжтайгаар ашиглаж болно. Халаасандаа аваад явж болох энэхүү бяцхан капсулыг хана, тааз, шалтай л бол дуртай газраа гаргаж ирэн кино, бичлэг үзэх боломжтой. Гэртээ заавал том өрөөндөө орохгүйгээр унтлагын өрөөнийхөө хана, таазан дээр дуртай киногоо үзээд хэвтсэн ч болно.

Толбо тогтдоггүй цамц

“Fooxmet” хэмээх энэхүү цамц нь шингэн зүйл шингээдэггүй даавуун материалтай бөгөөд уснаас кетчуп хүртэлх төрөл бүрийн шингэнийг өөртөө нэвчүүлдэггүй гэдгээрээ онцлог юм. Түүнчлэн энэ цамц үрчлээ суудаггүй тул индүүдэх шаардлагагүй.

Хулгайч халдах боломжгүй үүргэвч

“LocTote” нь энгийн үүргэвчээс ерөөсөө ялгарахгүй, зөөлөн материалтай үүргэвч юм. Гэхдээ энэ үүргэвчийг зүсч болохгүй, шатааж болохгүй, зөвхөн цоожоороо л онгойдог. Тийм учраас үүргэвчээ санаа зоволтгүй хараа хяналтгүй орхиж болно.

Ачааны цахим шошго

“Mu Tag” хэмээх энэхүү цахим шошгыг ачаа тээшнийхээ жижиг халаасанд хийснээр, ачаагаа алдахгүй, солихгүй байх боломж бүрдэх юм. Учир нь уг жижиг электрон төхөөрөмжөөр байршил тогтоож, ачааны эзэн мөн эсэхийг мэдэж болно. Мэдээж цахим шошгыг дан ганц цүнхнийхээ дотор талд хийхээс гадна чухал бичиг баримт, түлхүүр, нохойны хүзүүвч гэх мэт зүйлүүдэд байрлуулж болно. Ийм шошго зүүсний дараа хулгайд алдвал аппликейшнээр дамжуулан байршлыг нь тогтоож болох аж.

Стресс тайлагч шоо

Хүмүүс юм бодох зуураа балныхаа үзүүрийг хазах, цаас урах гэх мэт үйлдэл хийдэг. Тэгвэл “Fidger Cube” шоог хэрэглэснээр хүмүүс эдгээр үйлдлийг хийхгүй бас уйдахгүй байх боломжтой. Харахад энгийн ч үнэхээр уйдаахгүйн зэрэгцээ стресс тайлах шидтэй гэнэ шүү.

Эрчүүдийг уургалдаг хөхний даруулга

Япончуудын бүтээсэн энэхүү хөхний даруулгыг ашиглан эрчүүдийг уургалах боломжтой. Учир нь энэ дижитал хөхний даруулга дээрх товчлуурыг дарснаар өөрийнхөө хөхийг харагдах байдлаар нь хүссэн хэлбэртээ оруулж, томруулж болдог аж.

Харах боломжтой чих цэвэрлэгч

Хүмүүс чихээ ухахдаа, дотор нь юу байгааг харж чаддаггүй тул мэдрэмжиндээ тулгуурлан цэвэрлэдэг. Тэгвэл “EarScope” хэмээх энэхүү төхөөрөмж нь хүмүүсийг чихнийхээ дотор талыг харж байгаад цэвэрлэх боломжийг олгож байна.

Анхны электрон бэхэн шивээсний машин

“moodINQ” нь шивээсний ертөнцөд хувьсгал хийсэн бүтээл болсон бөгөөд тусгай зургийг хүний арьсан дээр түвэггүй буулгаж чаддаг. Юу гэж хэлэх гээд байна вэ гэвэл уг машинд зургаа оруулсан байхад тэр зургийг арьсан дээр шивээс болгон буулгадаг байна.

Уутны ам үдэгч

“iTouchless” хэмээх энэхүү жижиг төхөөрөмжөөр идэлгүй үлдээсэн бүтээгдэхүүний уутны амыг үдэж болно. Бид бүхэн задалсан гээд дуусгахыг хичээдэг шүү дээ. Тэгвэл энэ багаж чипс, чихэр, үрэл гэх мэт хүнсний бүтээгдэхүүнийг асгарахгүй байхад тусална.

Categories
мэдээ нийгэм

Нийслэлийн гэмт хэргээс урьдчилан сэргийлэх ажлыг зохицуулах зөвлөлийн III хуралдаан боллоо

Нийслэлийн гэмт хэргээс урьдчилан сэргийлэх ажлыг зохицуулах зөвлөлийн III дугаар хуралдаан өнөөдөр боллоо. Өнөөдрийн хуралдааныг нийслэлийн мэргэжлийн хяналтын байгууллагуудын хүрээнд зохион байгууллаа. Энэ үеэр мэргэжлийн хяналтын байгууллагууд гэмт хэргээс урьдчилан сэргийлэх түүнийг таслан зогсоох, ард иргэдийг эрүүл аюулгүй орчинд ажиллаж, амьдрах нөхцлийг бүрдүүлэхэд өнгөрсөн хугацаанд ямар ажлуудыг хийсэн талаар тайлангаа танилцууллаа.

Нийслэлийн гэмт хэргээс урьдчилан сэргийлэх санал сурталчлагааны материал болон иргэдийг соён гэгээрүүлэх чиглэлийн батлагдсан хөтөлбөр, нийслэлийн мэргэжлийн хяналтын байгууллагуудын өдөр тутмын үйл ажиллагааг дэмжиж, үйл ажиллагааг сайжруулах зэрэг ажлуудад зориулан Нийслэлийн гэмт хэргээс урдчилан сэргийлэх ажлыг зохицуулах зөвлөлөөс 20 сая төгрөгийн санхүүжилтийг үзүүллээ.

Гэмт хэргээс урьдчилан сэргийлэх ажлыг зохицуулах зөвлөлийн даргын үүргийг НИТХ-ын дарга С.Амарсайхан гүйцэтгэдэг юм. Тэрбээр хурлын үеэр хэлсэн үгэндээ “Нийгэмд ноцтой хохирол учруулж, сөрөг үр дагварыг үүсгэдэг олон төрлийн гэмт хэрэг болон гэмт хэргийн шинжтэй болзошгүй осол, эрсдлээс урьдчилан сэргийлэхэд нийслэлийн төр, захиргааны шат шатны байгууллагуудын ажлын уялдаа холбоо, харилцан хамтын ажиллагаа, нэгдмэл бодлого, ажилтан албан хаагчдын мэргэжлийн ур чадвар, ёс зүй, ажлын хариуцлага хамгийн чухал үүргийг гүйцэтгэх ёстой” гэдгийг онцлов.

Мөн “Нийслэлийн хэмжээнд хөдөлмөрийн аюулгүй байдал, эрүүл ахуй стандартын шаардлагыг хангуулах, болзошгүй эрсдлээс урьдчилан сэргийлэх ажлын хүрээнд аж ахуйн нэгж, байгууллагуудад 563 мэдэгдэл, 773 зөвлөмж, 253 сургалт хийж, хэвлэл мэдээллийн хэрэгслээр мэдээлэл хийж ажилласантай холбоотойгоор ослын хэмжээ өмнөх онуудтой харьцуулахад тодорхой хувиар буурсан хэдий ч бид тайвшрах ёсгүй. Цаашид мэргэжлийн хяналтын байгууллагаас төрийн болон төрийн бус байгуулагуудтай гэмт хэргээс урьдчилан сэргийлэх чиглэлээр ажлаа, уялдаа холбоогоо улам сайжруулан, хамтран ажиллаж, нийслэлийн иргэдийн эрүүл аюулгүй орчинд амьдрах нөхцөл хангана гэдэгт итгэж байна” хэмээв гэж НИТХ-ын хэвлэлийн албанаас мэдээллээ.

Categories
мэдээ нийгэм

​Монголын чөлөөт бөхийн холбооны удирдлагууд хууль бус үйл ажиллагаа их хийдэг гэв

Монголын чөлөөт бөхийн холбооны /МЧБХ/ Онц их хурлыг зарлан хуралдуулах Түр хорооноос өнөөдөр мэдээлэл хийлээ. Энэхүү хуралд чөлөөт бөхийн үндэсний шигшээ багийн ахлах дасгалжуулагчаар ажиллаж байсан, Монгол Улсын гавьяат дасгалжуулагч Ц.Цогтбаяр, Б.Баяраа болон МУГТ О.Пүрэвбаатар нар оролцлоо.

Гавьяат тамирчин Ц.Цогтбаяр “Монголын чөлөөт бөхийн холбооны удирдлага гэх хүмүүс биднийг гүтгэж байна. Шүүхийн шийдвэрийг үндэслэн үнэн бодит мэдээлэл хүргэх гэсэн юм. 2015 оны Катарт болсон Ази тивийн аварга шалгаруулах тэмцээнд оролцох байсан гурван тамирчинд Монголын чөлөөт бөхийн холбооны удирдлагууд хуурамч виз хийж өгөн, улмаар тэд Арабын улсад 40 цаг саатуулагдаж, тэмцээндээ оролцож чадаагүй. Оронд нь хэдэн багш нар барилдаад ирснийг та бүхэн мэдэж байгаа. Н.Чинбат, А.Сүхбат, Д.Сумъяабазар гэх мэтийн хүмүүс дээрх визний асуудлыг няцааж мэдээлэл хийж байсан. Үүний хариуд бид шүүхэд хандсан.

Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхийн тогтоол гарсан. Тогтоолоор Монголын чөлөөт бөхийн холбооны ерөнхий нарийн бичгийн дарга байсан О.Баянмөнх нь тамирчдад санаатайгаар хуурамч виз хийж өгсөн нь нотлогдсон. О.Баянмөнх ялаа авсан” гэв.

Гавьяат дасгалжуулагч Б.Баяраа “2013 онд гаргасан Монголын чөлөөт бөхийн холбооны дүрмийг хэрэгсэхгүй болгосон. “Рио”-гийн олимпт оролцогч Мандахнарангийн барилдаан дээр шүүлтийн булхай явагдсан. Энэ үйл ажиллагаанд чөлөөт бөхийн холбооны удирдах зөвлөлийн гишүүд хуралдаж, “Рио”-гийн олимпт тамирчдаа бэлдсэн хоёр багшийн эрхийг гурван жилээр хасах шийдвэр гаргасан байгаа.

Уг хоёр багшийн зүгээс Сүхбаатар дүүргийн иргэний хэргийн анхан шатны шүүхэд хандсан юм. Шүүхээс хоёр багшид хариуцлага тооцох тогтоолыг хүчингүй болгосон. Энэ мэтчилэн Монголын чөлөөт бөхийн холбооны удирдлагууд хууль бус үйл ажиллагаа их хийж байна. Мөн тэд чөлөөт бөхийн шигшээ багийн тамирчидтай сүүлийн гурван жилд нэг ч удаа уулзаагүй” гэлээ.

Categories
мэдээ улс-төр

“Эрүүл мэнд, нөхөн үржихүй, инноваци” сэдэвт хэлэлцүүлэг болов

УИХ-ын Нийгмийн бодлого, боловсрол, соёл, шинжлэх ухааны байнгын хороо, Эрүүл мэндийн яам хамтран “Эрүүл мэнд, нөхөн үржихүй, инноваци” сэдэвт хэлэлцүүлгийг Төрийн ордонд зохион байгууллаа.

Хэлэлцүүлэгт УИХ-ын НББСШУ-ны байнгын хорооны дарга Ё.Баатарбилэг, тус байнгын хорооны гишүүн М.Билэгт, УИХ-ын гишүүн, Засгийн газрын гишүүн, Эрүүл мэндийн сайд Д.Сарангэрэл, БСШУС-ын сайд Ц.Цогзолмаа болон эрүүл мэндийн салбарын эрдэмтэн, судлаачид оролцлоо.

НББСШУ-ны байнгын хорооны дарга Ё.Баатарбилэг хэлэлцүүлгийг нээж үг хэлэв.

Тэрбээр “Эрүүл мэндийн салбарын Инновацийн тухай хуулийн хэрэгжилтийн байдалд дүн шинжилгээ хийх, ялангуяа тухайн салбарт нөхөн үржихүйн чиглэлээр хийгдэж байгаа инноваци, технологи дамжуулалттай холбоотой тулгамдаж буй асуудлуудад гарц, шийдэл олох зорилгоор өнөөдрийн хэлэлцүүлгийг байгуулж байгаа бөгөөд цаашид эрүүл мэндийн салбарын олон чиглэлүүдээр хэлэлцүүлгийг үргэлжлүүлэн зохион байгуулахаар төлөвлөж байна.

Манай оронд инновацийн үйл ажиллагааг улсын төсвөөс тусгайлан дэмжих санхүүжилт байхгүй тул тус салбарын үйл ажиллагааг өнөөгийн байдлаар Шинжлэх ухаан, технологийн сангаас санхүүжүүлж байгаа бөгөөд Анагаахын шинжлэх ухааны салбарт тус сангаас 2017 онд инновацийн 8, захиалгат 9, суурь судалгааны 7, хамтарсан 5 төсөлд санхүүжилт олгосон байна.

Эрүүл мэндийн салбарын инновацийн үйл ажиллагааг төрөөс онцгойлон дэмжих, санхүүжилтийн зөв механизмийг бий болгох, судалгаа боловсруулалтын ажлын үр дүнд бий болсон шинэ технологи, инновацийн бүтээгдэхүүн, эм бэлдмэл, вакцин, оношлуур зэргийг эмчилгээ, үйлчилгээнд ашиглах, зах зээлд гаргах, сурталчилах иж бүрэн тогтолцоог бүрдүүлэх хэрэгтэй байгааг энд онцлон дурдах нь зүйтэй гэж үзэж байна.

Ялангуяа анагаахын шинжлэх ухааны салбарт хэрэгжүүлж байгаа манай эрдэмтэн судлаачдын төслүүд нь бусад салбартай харьцуулахад судалгаа боловсруулалтын ажил гүйцэтгэхэд урт хугацаа шаарддагтай уялдуулан тасралтгүй урт хугацааны санхүүжилтээр дэмжлэг үзүүлэх хэрэгтэй байгаа зэрэг шийдлээ хүлээсэн олон асуудлуудыг шийдвэрлэхэд анхааран ажиллах болно. Та бүхэн энэхүү хэлэлцүүлгээр үнэтэй санал, санаачилга гаргана гэдэгт итгэлтэй байна” гэлээ.

Үргэлжлүүлэн УИХ-ын гишүүн, Засгийн газрын гишүүн, Эрүүл мэндийн сайд Д.Сарангэрэл хэлэлцүүлэгт оролцогчдод хандан үг хэлсэн юм.

Тэрбээр “Эрүүл мэндийн салбар дахь шинжлэх ухаан, инновацид зориулж буй санхүүжилт маш бага байна. Жишээлбэл, Австри Улсад дотоодын нийт бүтээгдэхүүнийхээ 3,4 хувьтай тэнцэх хэмжээний санхүүжилтийг судалгаа, шинжилгээ, инновацид зориулж байна. Манай улс дотоодын нийт бүтээгдэхүүнийхээ ердөө 0,11 хувьтай тэнцэх санхүүжилтийг шинжлэх ухаан, техник технологи, судалгаа, шинжилгээнд зориулж байна” гээд энэ чиглэлийн санхүүжилтийг жил бүр нэмэгдүүлж байх ёстойг онцлон хэллээ.

Дараа нь “Эрүүл мэндийн салбар дахь шинжлэх ухаан, инновацийн өнөөгийн байдал” сэдвээр Эрүүл мэндийн яамны Эм үйлдвэрлэл, технологийн газрын дарга Л.Мөнхтулга, “Эх, хүүхэд, нөхөн үржихүйн эрүүл мэнд ба инноваци” сэдвээр Эх хүүхдийн эрүүл мэндийн үндэсний төвийн ерөнхий захирал, Анагаах ухааны доктор, Клиникийн профессор Ш.Энхтөр, “Эрүүл мэндийн салбарын инновацийн бүтээгдэхүүнд Шинжлэх ухаан технологийн сангаас олгосон санхүүжилт үр дүн, цаашид авах арга хэмжээ” сэдвээр Шинжлэх ухаан технологийн сангийн захирал Д.Энхжаргал, “Нөхөн үржихүйн инноваци” сэдвээр Өөжинмед эмнэлэгийг үүсгэн байгуулагч, Анагаах ухааны доктор, дэд профессор Э.Одхүү нар илтгэл тавьсан юм.

Үүний дараа хэлэлцүүлэгт оролцогчид холбогдох яамдын сайд нарт инноваци болоод хийгдэх боломжтой ажлуудын талаар саналаа хэлэв.

Тухайлбал, хэт төвлөрлийг сааруулах замаар нөхөн үржихүйтэй холбоотой асуудлыг шийдэх, архи, согтууруулах ундааны хэрэглээг хязгаарлах, ялангуяа өсвөр насны хүүхдүүдийг үүнээс хол байлгах, оношилгоонд зарцуулж буй хөрөнгийг инновацид зарцуулдаг байх, хүнс болон эм зүйн салбарт хяналт тогтоох зэрэг саналуудыг хэлж байлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ улс-төр

ХЗБХ Ерөнхийлөгчийн хоригийг хүлээж авахыг дэмжсэнгүй

Улсын Их Хурлын Хууль зүйн байнгын хороо өнөөдөр (2017.12.06) хуралдаж, Монгол Улсын 2018 оны төсвийн тухай хуульд хэсэгчлэн тавьсан Монгол Улсын Ерөнхийлөгчийн хоригийг хэлэлцэв. Энэ талаар Ерөнхийлөгчийн Тамгын газрын дарга З.Энхболд танилцууллаа.

Улсын Их Хурал Монгол Улсын 2018 оны нэгдсэн төсвийг батлахдаа тухайн төсвийн жилд төвлөрүүлэх төсвийн тэнцвэржүүлсэн орлогын хэмжээг 5,207,337.2 сая төгрөг, зарцуулах төсвийн зарлагын хэмжээг 7,710,777.6 сая төгрөг байхаар тооцож 2,503,440.4 сая төгрөгийн алдагдалтай төсвийг баталсан байх бөгөөд нэгдсэн төсвийн алдагдал дотоодын нийт бүтээгдэхүүний 9.5 хувьд хүрсэн байна. Өмнөх жилүүдийн төсвийн гүйцэтгэлийн дүн, мэдээнээс үзэхэд Монгол Улсын төсвийн орлого 3.3-4.2 их наяд төгрөг, төсвийн зарлага 4.3-5.2 их наяд төгрөг байсан бол нэгдсэн төсвийн алдагдал 2012-2015 оны хооронд дотоодын нийт бүтээгдэхүүний 3.2-5.1 хувьтай тэнцэж байжээ. Харин Олон улсын валютын сангийн шаардлагаар Монгол Улсын хуулиудыг зөрчиж, 2016 оны улсын төсвийн зарлага дээр Монгол Улсын Хөгжлийн банк болон Төрийн банкнаас иргэд, аж ахуйн нэгжүүдэд олгосон арилжааны зээлийг нэмэн хамруулж, нэгдсэн төсвийн алдагдлыг дотоодын нийт бүтээгдэхүүний 14.3 хувьд хүргэсэн байна. Анхаарч авч үзэх ёстой олон асуудал 2018 оны төсөвт туссан. Төсвийн зарлагыг танаж, алдагдлыг арилгах арга хэмжээг Улсын Их Хурал авч хэрэгжүүлсэн тохиолдолд Монгол Улсын 2018 оны Төсвийн тухай хуулийн 11 дүгээр зүйлд заасан 100 тэрбум төгрөгийг хуримтлал болгох, 12 дугаар зүйлд заасан 408,744.3 сая төгрөгийг хуримтлалд нь үлдээх, 13 дугаар зүйлд заасан 2,583,181.9 сая төгрөгийн өрийг улсын өр дээр нэмэхгүй байх зэрэг бодитой олон үр дүнд шууд хүрэхээр байгаа юм. Тиймээс төсвийн бодлогоо эргэн харж, сахилга бат, хариуцлагыг эрхэмлэсэн, хэмнэлттэй, үр ашигтай төсөв батлах шаардлагатайг Улсын Их Хуралд сануулж, Монгол Улсын Үндсэн хуулийн Гучин гуравдугаар зүйлийн 1 дэх хэсгийн 1, Монгол Улсын Ерөнхийлөгчийн тухай хуулийн 12 дугаар зүйлийн 8 дахь хэсгийг тус тус үндэслэн Монгол Улсын 2018 оны Төсвийн тухай хуулийн 6 дугаар зүйлд хэсэгчлэн хориг тавьсан болохыг Ерөнхийлөгчийн Тамгын газрын дарга З.Энхболд танилцууллаа.

Танилцуулгатай холбогдуулан Улсын Их Хурлын гишүүн Б.Пүрэвдорж, Л.Болд нар Сангийн сайдаас асуулт асууж, хариулт авлаа. Тухайлбал, Монгол Улсын Засгийн газар Олон улсын валютын сан хамтран хэрэгжүүлж буй хөтөлбөртэй холбоотойгоор татвар нэмэх, тэтгэврийн насыг нэмэх, хүүхдийн мөнгийг 60 хувьд олгох зэрэг шийдвэрүүдийг гаргасан боловч 2018 оны төсөв дэх хэмнэж болохуйц хөрөнгө оруулалтын зардалын талаар ямар нэг шаардлага тавихгүй байгаад шүүмжлэлтэй хандаж буйгаа Улсын Их Хурлын гишүүн Б.Пүрэвдорж хэллээ. Мөн дээрх хөтөлбөрийн хүрээнд хүүхдийн мөнгийг 60 хувьд олгохоор тохирсон ч 2017 онд бүх хүүхдэд олгосон, гэтэл 2018 онд 60 хувьд олгохоор төсөвт тусгаад байгаа. Засгийн газар, Сангийн яам хүүхдийн мөнгийг хүүхэд бүрт олгох чиглэлээр ажиллах шаардлагатай хэмээн хэлж байв.

Олон улсын валютын сантай хамтран хэрэгжүүлж буй хөтөлбөрийн хүрээнд Монгол Улс донор орнуудаас 5.5 тэрбум ам.долларыг хөнгөлөлттэй хүүтэй зээл болон буцалтгүй тусламж хэлбэрээр авч байгааг Сангийн сайд хэллээ. Энэ хөтөлбөрийн хүрээнд Дэлхийн банк Сангийн яамтай хамтран ажиллаж, улсын төсвөөс хэрэгжиж байгаа хөрөнгө оруулалтын бодлогод зөвлөгөө өгч байгаа аж. Улсын өрийн зээлийн хүү өндөр байгаа нь төсөвт ихээхэн дарамт учруулж байгааг тэрбээр хэллээ. Монгол Улс 2016 онд зээлийн хүүнд 1.3 их наядыг төлсөн, энэ хэмжээг бууруулахаар Засгийн газар, Сангийн яам болон холбогдох байгууллагууд ажиллаж байгаа, эхний үр дүн нь гарсан гэв. Зээлийн хүүгийн дарамт, их өрийн дарамтаас гарахын тулд олон улсын банк, санхүүгийн байгууллагуудтай, түүний дотор Олон улсын валютын сантай хамтран хэрэгжүүлж байгаа хөтөлбөр чухал үүрэгтэй байгааг Ч.Хүрэлбаатар сайд тэмдэглэв. Мөн тэрбээр “2017 оны дөрөвдүгээр сард “Өргөтгөсөн санхүүжилтийн хөтөлбөр”-ийг хэрэгжүүлэхдээ хүүхдийн мөнгийг 60 хувьд олгохоор тохирсон. Харин Засгийн газар хүүхэд бүрт хүүхдийн мөнгө олгох шийдвэрийг зургаадугаар сард гаргасан. Эл шийдвэрээс нь болж “Өргөтгөсөн санхүүжилтийн хөтөлбөр” тодорхой хугацаагаар зогссон ч хоёр тал яриа хэлэлцээр хийж, ойлголцсоноор хөтөлбөрийг үргэлжлүүлж байна. Би сайдаар ажилласан эхний өдрөөсөө хүүхдийн мөнгийг олгох хувийг нэмэгдүүлэх чиглэлээр ажиллаж байна. Сангийн яам тодорхой ажлуудыг хийж, хүүхдийн мөнгийг 80 хувьд нь олгох зорилт тавин эрчимтэй ажиллаж байна. Үүний тулд бид зөвхөн Олон улсын валютын сан төдийгүй 5.5 тэрбум ам.долларын санхүүжилт олгож буй донор байгууллагуудтай ойлголцох шаардлагатай учир нэлээд цаг хугацаа шаардаж байгааг дуулгая. Түүнчлэн зээлийн хүүгийн төлбөрт төсвөөс төлж буй зардал, өндөр хүүтэй зээлүүдийг багасгахаар Сангийн яам тодорхой ажлуудыг хийж, үүнээс хэмнэлт гаргахаар ажиллаж байна” гэлээ. Мөн төсвийн сахилга батыг сайжруулах ажлыг хийж байгаагаа Ч.Хүрэлбаатар сайд тайлбарласан.

Ийнхүү гишүүд асуулт асууж, байр сууриа илэрхийлсний дараа Монгол Улсын Ерөнхийлөгчөөс Монгол Улсын 2018 оны Төсвийн тухай хуулийн 6 дугаар зүйлд хэсэгчлэн тавьсан хоригийг хүлээж авах нь зүйтэй эсэхээр санал хураалт явууллаа. Хуралдаанд оролцсон гишүүдийн 81.8 хувь нь хоригийг хүлээн авахаас татгалзсан бөгөөд энэ талаарх Байнгын хорооны санал дүгнэлтийг чуулганы нэгдсэн хуралдаан танилцуулахаар тогтов хэмээн Улсын Их Хурлын Хэвлэл мэдээлэл, олон нийттэй харилцах хэлтэс мэдээллээ.

Categories
мэдээ эдийн-засаг

Монгол Улсад олгох 350 сая ам.долларын санхүүжилтийг баталгаажуулахаар ажиллаж байна

Монгол Улсын Ерөнхий сайд У.Хүрэлсүх Мянганы сорилтын корпорацийн дэд ерөнхийлөгчийн орлогч Фатема Зумарыг хүлээн авч уулзахдаа АНУ-ын Мянганы сорилтын корпорац манай улсыг хоёр дахь компакт гэрээ байгуулах боломжтой орноор шалгаруулснаас хойш хоёр тал компакт боловсруулах ажлыг амжилттай гүйцэтгэж хэрэгжүүлэх төслүүдээ үндсэндээ тохироод байгаад баяртай байна гэв.

Компакт гэрээнд онцгой ач холбогдол өгч байгаа, АНУ-ын Засгийн газар, ард түмний олон зуун сая долларын буцалтгүй тусламж манай улсын эдийн засгийн өсөлт, тогтвортой хөгжилд урт хугацаандаа томоохон дэмжлэг үзүүлэх салбарт чиглэгдэж байгаад талархлаа илэрхийллээ.

Улаанбаатар хотын ус хангамжийг нэмэгдүүлэх төсөл болон ус дахин ашиглах төслийн техник эдийн засгийн үндэслэлийн судалгааны урьдчилсан дүнг дэмжсэн. Усны салбарын цогц хөтөлбөрийг амжилттай хэрэгжүүлэх маш чухал зангилаа асуудал болох Төв цэвэрлэх байгууламжийг шинэлчлэн сайжруулахад онцгой ач холбогдол өгч байгаа гэдгээ Ерөнхий сайд У.Хүрэлсүх онцоллоо.

Мянганы сорилтын корпорац шинэ Төв цэвэрлэх байгууламжийн төслийн захиалагчийн үүрэг, шаардлага болон хуримтлагдсан лагтай холбоотой асуудлыг боловсруулж байгааг Үндэсний ажлын алба мэдээлсэн. Шинэ Төв цэвэрлэх байгууламжийн төслийг олон улсын стандартын дагуу амжилттай хэрэгжүүлэхэд корпорацийн мэргэжилтнүүд манай холбогдох яамдтай нягт хамтран ажиллах шаардлагатай гэв.

Компакт боловсруулах ажлыг хариуцаж буй холбогдох багууд техникийн нарийн асуудлуудаа ирэх оны эхээр эцэслэн тохиролцвол гэрээг 2018 оны эхний хагаст багтаан байгуулах боломжтой. Монгол Улсын 350 сая ам.доллар хүртлэх санхүүжилтийг баталгаажуулахаар шуурхай ажиллаж байгаа гэж хатагтай Фатема Зумар хэллээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ спорт

Өвлийн Олимпийн наадамд ОХУ-ын тамирчдыг оролцуулахгүй

Image result for Өвлийн Олимпийн наадамд ОХУ-ын тамирчдыг оролцуулахгүйИрэх хоёрдугаар сарын 9-нд эхлэх Пёнчаны өвлийн Олимпийн наадамд өвлийн спортын нэг том гүрэн оролцохооргүй болжээ. Олон Улсын Олимпийн Хороо өвлийн Олимпийн наадамд ОХУ-ын тамирчдыг оролцуулахгүй болсноо өчигдөр зарласан байна.

Учир нь 2014 оны Сочигийн өвлийн Олимпийн үеэр тус улсын тамирчид төрийн дэмжлэгтэй сэргээш хэрэглэсэн гэх хэргийг 17 сарын турш шалгасны үр дүнд ийм шийдвэрийг гаргасан байна. Гэхдээ ОХУ-ын тамирчид сэргээш хэрэглээгүйгээ хувиараа баталж чадвал ямар нэг улсын харьяалалгүйгээр оролцож болох гэнэ.

ОХУ-ын зарим улс төрчид энэ шийдвэрийг хүчтэй эсэргүүцэж байгаа бол нөгөө хэсэг нь үүгээр далимдуулж спортын салбараа цэвэрлэж авах хэрэгтэй хэмээн мэдэгдээд байгаа аж.