Month: December 2017

Аргын тооллын арванхоёрдугаар сарын 12, Ангараг гариг. Билгийн тооллын 25, Тугчин одтой, харагчин тахиа өдөр. Өдрийн наран 8:37 цагт мандан, 17:02 цагт жаргана. Тухайн өдөр үхэр, могой жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай ханд. Эл өдөр буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын абшиг авах, шинэ гэр ба байр авах, гаригийг тахих, хагалгаа хийлгэх, гэр бүрэхэд сайн. Мод суулгах, нарийн зөвлөгөөн хийх, улаа гаргах, хиншүү хярвас гаргахад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод баруун хойш мөрөө гаргавал зохистой. Тэрсүүд өдөр.

Үс шинээр үргээлгэх буюу засуулахад тохиромжгүй.

Өглөө бүр тантай хамт байдаг “Өдрийн сонин”-ы мягмар гаригийн дугаар 16 нүүрээр хэвлэгдэж, та бүхний гар дээр хүрч байна.

УИХ-ын гишүүн, МАХН-ын дарга О.Баасанхүү, МАХН-ын дэд дарга С.Ганбаатар нартай хийсэн ярилцлага тэргүүн нүүрэнд тус тус хэвлэгджээ.

УИХ-ын гишүүн Ж.Ганбаатартай хийсэн ярилцлага улс төрийн хоёрдугаар нүүрэнд оржээ. Тэрээр “Жижиг, дунд үйлдвэрлэл эрхлэгчдэд 3-4 хувийн хүүтэй зээл олгоно” гэжээ.

Өчигдөр МАН, АН-ын бүлгүүд тус тус хуралдсан юм. Энэ талаарх сурвалжилгыг хоёрдугаар нүүрнээс хүлээн аваарай.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог, баримт, үзэл бодлын гуравдугаар нүүрэнд “Баярынх нь өдөр иргэдээ барьж, хорьж, хөөж туудаг хударгагүй төр” нийтлэлийг хүлээн авч уншаарай.

“Монгол кино пикчерс”-ийн зургийн дарга Б.Ангарагтай хийсэн ярилцлагыг баримт, үйл явдлын долоодугаар нүүрнээс үзэх боломжтой. Тэрээр “Утсаа оролдож яваад л метроны замруу уначихсан юм билээ” гэсэн байна.

XI эмч нүүрэнд “Алт болд” эмнэлгийн мэдрэлийн эмч Д.Өлзийбаяр уригдан оржээ. Тэрээр “Уцаарлах, бухимдах, хэт хардах зэрэг нь сэтгэцийн тулгамдсан асуудал” гэж онцлон хэлжээ.

Үсний бүтэц, үс яагаад бууралтдаг, үс тойрсон бизнес, үсийг хэрхэн шилжүүлэн суулгадаг, үсээ хэрхэн зөв арчлах талаар танин мэдэхүйн XII нүүрнээс сонирхон харах боломжтой юм.

“Малчин” телевизийн сурвалжлагч, нэрт сэтгүүлч, цаг уурч Д.Шагдарсүрэнтэй хөөрөлдсөнийг XIII нүүрнээс хүлээн аваарай. Тэрээр “Монгол орны жараад хувь зудтай, дээр нь туурайн зуд нэрвэж эхэллээ” гэжээ.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завьяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

Та бүхэн манай сонины цахим хувилбарыг https://admin.dnn.mn/plugins/news/login/хаягаар хүлээн авч уншаарай.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-оос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 99090658, 88085029 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХНИЙ УРГАХ НАРНААР ТАНТАЙ ХАМТ

Санхүүгийн зохицуулах хороо ШУТИС-ийн Санхүүгийн менежментийн сургуулийн оюутнуудын дунд болсон ‘Бид ирээдүйн хөрөнгө оруулагчид 2017” мэргэжлийн тэмцээн боллоо. Жил бүр зохион байгуулагдсаар ирсэн тус тэмцээн энэ онд 22 дахь удаагаа болж, оюутнуудын Martins, Cloud, Team Seekers, Shark Tank багууд мэдлэг оюун, авьяас чадвараа сорив.

Тэмцээнд багууд онолын мэдлэгээ сорьсон сэдэвт ажлуудыг гүйцэтгэх, танилцуулга хийх болон асуулт, хариултын өрсөлдөөн, мөн мэргэжлийн байгууллагуудаас ирүүлсэн бодит жишээ баримт бүхий даалгавруудыг гүйцэтгэх, хууль, эрх зүйн зохицуулалттай холбоотой асуудалд шийдэл эрэлхийлэх, олон өгөгдөл, хувьсагч бүхий бодлогын хариу олох зэргээр өрсөлдөж, нийлбэр дүнгээр Team Seekers баг тэргүүлэн, шилжин явах цомын эзэн боллоо.

Уламжлалт тэмцээнийг Хороотой хамтран Монголын хөрөнгийн бирж, Монголын үнэт цаасны бирж, Үнэт цаасны арилжаа эрхлэгчдийн холбоо, Үнэт цаасны төвлөрсөн хадгаламжийн төв, Unitel компани, Хууль сахиулахын их сургууль зэрэг байгууллагууд ивээн тэтгэж, шүүгч, ажиглагчаар оролцов. Мэргэжлийн байгууллагууд тэмцээний даалгавруудыг төлөвлөх, гүйцэтгэлийг нягтлан шүүхээс гадна зөвлөгөө мэдээлэл өгөх, практик дээрх сорилт, туршлагын талаар тайлбар, танилцуулга хийх зэргээр багуудтай идэвхтэй хамтран ажилласан юм. Энэ нь тэмцээнийг илүү өгөөжтэй, үр дүнтэй болгож буйд оюутнууд талархал илэрхийлж байлаа.

Улаанбаатараас Улаан-Үд, Эрхүүгийн чиглэлд шинээр аялж эхлэх хурдан галт тэрэгний анхны аяллыг үдэн гаргах ёслолын арга хэмжээ боллоо. Тус чиглэлийн 305/306 дугаар галт тэрэг аялуулах талаар өнгөрсөн есдүгээр сард Вьетнам улсын Халонг хотноо болсон олон улсын галт тэрэгний хурлаар хэлэлцэж улмаар ОХУ-ын Эрхүү хотноо зохион байгуулагдсан Хятад-Монгол-ОХУ-ын хилийн хэлэлцээрээр баталгаажуулсан аж. Шинэ галт тэрэг аялуулах бэлтгэл ажлыг хангах хүрээнд Улаанбаатар Төмөр Зам /УБТЗ/ ОХУ-аас 2014 онд авсан шинэ вагоноос бүрдсэн галт тэрэгний бүрэлдэхүүний зэхэлтийг бүрэн шинэчилж, вагоны үйлчлэгч нарын дүрэмт хувцсыг шинэ загвараар хийлгэн, зорчигчдын тав тух, аюулгүй байдалд ихээхэн анхаарсан байна.

Хурдан галт тэрэгний талаар УБТЗ-ын дарга Д.Жигжиднямаа хэлэхдээ: “ОХУ, Монгол Улс хооронд харилцан визгүй зорчдог болоод гурван жилийн хугацаа өнгөрлөө. Хоёр орны хооронд харилцан визгүй зорчдог болсноос хойш худалдаа үйлчилгээ, аялал жуулчлалын бизнес эрчимтэй хөгжих боллоо. Мөн авто тээврийн урсгал 2-3 дахин нэмэгдсэн. Алтанбулагийн боомтоор өмнө нь нэг өдөрт 200-300 хүн, 150-170 машин харилцан зорчдог байсан бол одоо 700-800 иргэн, 500 гаруй тээврийн хэрэгсэл харилцан зорчдог. Тиймээс цаашид Алтанбулаг, Хиагтын боомт дээр үүссэн бөглөрөл, ачааллыг багасгахын тулд хурдан галт тэргийг аялуулахаар ОХУ-тай тохиролцсон. Иргэд хямд найдвартай унаагаар Байгаль нуурын эрэг дээр очиж амрах, Эрхүү хотоор аялах боломжтой болж байна. Нөгөө талдаа галт тэрэг дагасан шинэ аялал жуулчлалын маршрут нээгдсэн гэсэн үг“ гэлээ.

Улаанбаатараас Эрхүү хүртэл өмнө нь 48 цаг явдаг байсан бол энэхүү хурдан галт тэргээр тус газарт 24 цагийн дотор очих боломжтой болж байгаа юм байна. ОХУ-ын төмөр замчидтай Монгол, Оросын хамтарсан “Улаанбаатар төмөр зам” нийгэмлэгээс цагийн хуваариа тохирчээ. Ингээд олон улсын галт тэрэгний хуваариар долоо хоногт гурван удаа, 15.22 цагаас явахаар болсон байна. Үнийн тухайд 33550-120750 төгрөгийн хооронд байгаа юм. Цаашид зорчигчдын тоо нэмэгдвэл алдагдалтай эхэлсэн тасалбарынхаа анхны үнийг буулгаж, хөнгөлөх талаар хоёр тал ярилцах аж.

Галт тэрэг ингэж хурдан аялдаг болсноор улс хоорондын ачаа эргэлт нэмэгдэж ОХУ, Монгол Улсын иргэдийн харилцаа улам дотносно гэж ОХУ-ын Элчин сайдын яамны төлөөлөл онцолж байлаа.

Гэрэл зургийг Г.БАЗАРРАГЧАА

Монголын анхны, Азийн хоёр дахь, дэлхийн 101 дахь сансрын нисгэгч, ЗХУ, БНМАУ-ын баатар, төр нийгэм, цэргийн нэрт зүтгэлтэн, бэлтгэл хошууч генерал Ж.Гүррагчаагийн 70 насны ой энэ сарын 5-нд тохиолоо. Монгол Улсын анхны сансрын нисгэгчийн 70 насны ойг тэмдэглэн өнгөрүүлэх ажлын хүрээнд БХЯ-наас хэд, хэдэн бүтээлч үйл ажиллагаа зохион байгууллаа. Түүний нэг нь Ж.Гүррагчаа баатар өөрийн замнал түүхийн тухай цэргийн алба хаагчдад зориулсан лекц байв. Энэхүү арга хэмжээнд УИХ, Засгийн газрын гишүүн, Батлан хамгаалахын сайд Н.Энхболд, Батлан хамгаалахын дэд сайд Т.Дуламдорж, ЗХЖШ-ын дарга, дэслэгч генерал Д.Даваа тэргүүтэй БХЯ, ЗХЖШ-ын удирдлагууд, агаарын цэргийн командлалын анги, байгууллагын бие бүрэлдэхүүн, ахмад буурлууд оролцсон. Батлан хамгаалахын сайд Н.Энхболд “Монгол Улсын бахархал, Монгол Улсын түүхэн хүн бол яахын аргагүй хошууч генерал Ж.Гүррагчаа юм. Батлан хамгаалахаас эхлээд олон салбарт үр бүтээлтэй ажилласан бахархалт генералдаа хүндэтгэл үзүүлэх нь зүйн хэрэг юм” гэсэн юм.

Онцгой байдлын ерөнхий газар, АНУ-аас Монгол Улсад суугаа Элчин сайдын яам, Ази, номхон далайн цэргийн командлалын төлөөлөгчид “Говийн чоно-2018” сургалт, дадлага сургуулийн бэлтгэл уулзалтыг зохион байгууллаа.

Тус сургалт, дадлага сургуулийг 2018 оны 05 дугаар сард баруун бүсийн таван аймгийг хамруулан Ховд аймагт зохион байгуулах юм.

Аймгуудын нутаг дэвсгэрийг хамарсан, хавсарсан гамшиг, байгалийн аюулт үзэгдлийн үед олон улсын, улсын, орон нутгийн үйл ажиллагаа, чиг үүргийн дагуу гамшигтай тэмцэх чадавхийг сайжруулах, Онцгой байдлын ерөнхий газар, Зэвсэгт хүчин, АНУ болон бусад оролцогч талууд хоорондын цэрэг-иргэний хамтын ажиллагаа, уялдаа холбоог сайжруулах, шинэчлэн батлагдсан Гамшгаас хамгаалах тухай хуулийн хэрэгжилтийг хангах, гамшгийн хор уршгийг арилгах багаж хэрэгсэл, удирдлага, зохицуулалтын зохион байгуулалтын бүтцийг турших зорилгоор энэ удаагийн “Говийн чоно-2018” олон улсын дадлага сургуулийг зохион байгуулах юм гэж Онцгой байдлын ерөнхий газраас мэдээллээ.