Month: December 2017

2016-2017 оны хичээлийн жилд амжилттай суралцаж бусдыгаа манлайлсан МУИС-ийн Шинжлэх ухааны сургуулийн Байгалийн ухаан, Хүмүүнлэгийн ухаан, Нийгмийн ухааны салбарын нийт 25 оюутанд нэг сая ба түүнээс дээш хэмжээний тэтгэлэг олголоо.

Энэхүү тэтгэлгийг бэлэн мөнгөөр бус зөвхөн сургалтын төлбөрт зарцуулахаар зохицуулж МУИС-ийн сургалтын нэгдсэн систем Сиси-д тухайн оюутны нэр дээр байршуулсан тухай Шинжлэх ухааны сургуулийн захирал, доктор Б.Баяртогтох хэлэв.

МУИС-ийн нэрэмжит тэтгэлгийг “МУИС-д суралцагчдад тэтгэлэг олгох нийтлэг журам”-ын дагуу идэвх чармайлт гарган амжилттай суралцаж, бусдыгаа манлайлан, сурлагын өндөр амжилт гаргасан оюутнуудад олгодог юм.

Улаанбаатар хотод өнөөдрийн байдлаар нийтийн тээврийн үйлчилгээнд 88 чиглэлийн 937 автобус, троллейбус ажиллаж байна. Үүнээс үндсэн 75 чиглэл нь ажлын өдөр 6-8, амралтын өдөр 8-10 минутын интервалтай үйлчилгээнд ажиллаж, ажлын өдөрт дунджаар 637 мянга орчим зорчигч тээвэрлэж байна.

Нийслэлийн Тээврийн газар иргэдээс ирүүлсэн санал хүсэлтийн дагуу нийтийн тээврийн үйлчилгээний оройн оргил ачааллын цагт

Түүнчлэн дээрх 10 чиглэлд 24 тээврийн хэрэгслийг өдрийн цагаар ачаалал багатай үед цонхлуулж оройн 20:00 цагт ажиллах тээврийн хэрэгслийн тоог 148 байсан бол 166 болгож 2.1 хувиар, 21:00 цагт ажиллах тээврийн хэрэгслийн тоог 97 байсан бол 161 болгож 9.6 хувиар 22:00 цагт ажиллах тээврийн хэрэгслийн тоог 48 байсан бол 97 болгож 14.8 хувиар нэмэгдүүлсэн байна.

“Өнөөдрийн байдлаар нийтийн тээврийн үйлчилгээнд явах ёстой 937 автобус маань бүгд шугамандаа явж байна. Замын хөдөлгөөний ачааллаас хамаараад автобуснууд түржирч, иргэдийн хүлээх хугацаа нэмэгдсэнээр, иргэдэд бүрэн хүрч үйлчилж чадахгүй байгаа. Ийм учраас нийслэлийн Тээврийн газраас шинэ менежмент хийсэн. Энэ нь Автобуснуудыг заавал уртаар явуулалгүй ид ачааллын үеэр богино эргэлтүүдийг хийлгэж байна. Автобусны тоог нэмэгдүүлж бус байгаа тээврийн хэрэгсэл дээрээ зохицуулалт хийх нь илүү үр дүнтэй байна. Цаашид хаана хаана хэдэн цагт автобус шаардлагатай байна гэдэг судалгаа хийгээд, үе шаттайгаар нэмэгдүүлэх зохицуулалт хийж байна” хэмээн нийслэлийн Тээврийн газрын орлогч дарга Х.Булгаа ярилаа.

Мөн “Бид нийтийн тээврийг илүү хурдан явуулах зорилгоор тусгай эгнээ гаргаж өгсөн. Харамсалтай нь сүүлийн үед жолооч нар ид ачаалалтай үед нэгдүгээр эгнээгээр зорчих асуудал их гарч байна. Үүндээр Замын цагдаагийн алба болон Нийтийн тээврийн газраас холбогдох шалгалтыг хийсэн. Цаашид ч үргэлжлүүлэн шалгалт хийж, холбогдох арга хэмжээг нь авах болно. Замын хөдөлгөөний удирдлагын төвөөс нэгдүгээр эгнээгээр зорчсон тээврийн хэрэгсэлд камерын хяналт хийж, торгуулийг мөн хүргүүлж байгаа” гэдгийг онцолж байв.

Ачаалал ихтэй дундын зогсоолуудаас буюу МУБИС-Улаан чулуут, Ард кино театр -Орбит, Дүнжингарав худалдааны төв зогсоолоос төв замаар 3,4-р хороолол, Офицеруудын ордоноос- ХМК чиглэлүүдэд 18:10-19:50 цагийн хооронд 20-30 минутын давтамжтайгаар чиглэл тус бүрд 2-3 автобус явуулах төлөвлөлт хийгдсэн ба өнгөрсөн сарын 29-ний өдрөөс үйлчилгээг эхлүүлээд байгаа аж.

Нийслэлийн хэмжээнд 20:00 цагийн үед 873, 21:00 цагийн үед 734, 22 цагт 356 нийтийн тээврийн автобус үйлчилгээнд ажиллаж байна.

Нийтийн тээврээр үйлчлүүлэгч иргэд та бүхэн үйлчилгээтэй холбоотой санал хүсэлтээ 11323176, 11326352 дугаарын утаснуудад 24 цагаар өгөх боломжтой гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Өнгөрсөн жилийн хаврын их цаснаар хот тохижилт ОНӨХХКомпани Хурандаа Б.Эрхэмбаяр захирагчтай зэвсэгт хүчний 339-р ангитай хамтран цас цэвэрлэх ажлыг аймгийн төвд явуулсан байдаг. Их хэмжээний цасыг алба хаагчид нүцгэн гараараа хүрз жоотуугаа бариад л цэвэрлэж байсныг та бид харсан билээ. Тэдэнд барьсан тоног төхөөрөмж байхгүй, хур дагтаршсан цасыг цэвэрлэх гэж хугацаа их алдсан зэрэг хүнд нөхцөл байдлаас үүдэн цас түрэх тусгай төхөөрөмж хийе гэсэн санаачилга гаргажээ. Тус санаачилгыг аймгийн Засаг дарга дэмжиж төхөөрөмж хийх төсвийг шийдэж өгсөн байна. Ингэснээр тус цэргийн ангийн инженер техникийн ажилчид 10 гаруй хоногийн дотор энэ төхөөрөмжийг бүтээжээ.

Цас цэвэрлэх төхөөрөмжийг чанартай сайн хийсэн зэвсэгт хүчний 339-р ангийн алба хаагчдад аймгийн ИТХ-ын дарга Ц.Отгонбаяр талархлаа дэвшүүлэн аймаг орон нутгийн хөгжил дэвшил цэргийн ангийн алба хаагчдын хүчин зүтгэлтэй салшгүй холбоотой гэдгийг онцлон тэмдэглээд цаашид боломжтой бүх талаар тус ангийн үйл ажиллагааг дэмжиж ажиллана гэлээ.

Энэ үеэр цэргийн ангийн захирагч, хурандаа Б.Эрхэмбаяр цас цэвэрлэх төхөөрөмжөө “Хот тохижилт” ОНӨХХК-ний дарга С.Готовт албан ёсоор хүлээлгэн өгсөн ба цас цэвэрлэх төхөөрөмж цаашид тус компанид харьяалагдаж явах юм.

Төхөөрөмж нь тусгай зориулалтын машинд угсрагдаж гар удирдлагаар ажиллах ба 20-30 см цасыг саадгүй цэвэрлэх юм байна. Түүнийг угсарсан машин нь тусгай цэргийн зориулалттай ба их бага ямар ч хэмжээний цасыг түрж цэвэрлэхэд ачаалал даахуйц юм байна. Төхөөрөмжийг орос материалаар хийсэн ба ойрын 10 жилдээ эвдэрч гацахгүй бат бөх сайн чанартай хийсэн аж. Аймгийн төвийн зам харгуй өвөл хаврын цагт цасанд даруулаад байхгүй, улмаар осол аваар, халтиргаа гулгааг бууруулахад тус ангийн хамт олны хичээл зүтгэл ийнхүү өндөр байж олон хүний ажлыг хөнгөвчилжээ.

Малайзын Куала Лампур хотод болсон Цээж тооллын дэлхийн аварга шалгаруулах 22 дахь удаагийн тэмцээн амжилттай боллоо.

Цээж тооллын дэлхийн аварга шалгаруулах тэмцээнд нийт 75 орны 8500 гаруй хүүхдүүд оролцжээ. Тэмцээнд Монголоос “ТОЯА” хүүхэд хөгжлийн академийн дэргэдэх Соробан сампингийн сургалтын төвийн 5-14 насны шилдэг хүүхдүүд оролцжээ. Сампинчин хүүхдүүд Гранд чемпион 1, чемпион 2, алтан цом 20, мөнгөн цом 33, хүрэл цом 20 хүүхэд хүртсэн байна.

Өнгөрсөн сарын дундуур Авлигатай тэмцэх газраас Авто тээврийн үндэсний төвд шалгалт хийсэн. Улмаар тус газрын Тээвэр зохицуулалтын хэлтсийн дарга Д.Батбаярыг саатуулсан байдаг. Түүний өрөөнөөс 20 сая төгрөг хураан авсан гэдгийг эх сурвалж мэдээлсэн билээ.

Мөн үүнтэй холбоотойгоор тус газрын хэд хэдэн хүнийг шалгасан гэх мэдээлэл бий. Д.Батбаярыг нэгэн уул уурхайн компанийн олон зуун машинд С зөвшөөрөл өгч, авлига авсан хэрэгт буруутгасан байна. Харин цагдан хорих 461-р ангид хоригдож байсан түүнийг өчигдөр суллажээ.

Япон Улсын Засгийн газрын буцалтгүй тусламжийн хүрээнд Улаанбаатар хотын “Гал түймэртэй тэмцэх техник, тоног төхөөрөмжийг шинэчлэн сайжруулах” төслөөр нийлүүлэгдсэн гал түймэр унтраах шуурхай албаны автомашинуудын сэлбэг хэрэгслийг хүлээлгэн өгөх ажиллагаа өнөөдөр нийслэлийн Онцгой байдлын газарт боллоо.

Монгол Улсаас БНСУ-д суух Онц бөгөөд Бүрэн эрхт Элчин сайдаар томилогдохоор нэр дэвшээд буй Б.Хурцад холбогдох асуудлаар маргааш буюу баасан гарагт Нээлттэй хэлэлцүүлэг зохион байгуулах болжээ.

УИХ-ын гишүүн Ж.Батзандан нарын нэр бүхий 21 гишүүнээс Элчин сайдад нэр дэвшигч Б.Хурцтай холбоотой Өргөдлийн байнгын хороонд ирсэн гомдлыг үндэслэн Нээлттэй сонсгол явуулахыг шаардан, УИХ-ын даргад бичиг хүргүүлсэн. Гэвч Нээлттэй сонсголын хуульд зөвхөн УИХ-аас томилдог албан тушаалд сонсгол явуулахаар тусгасан учир Өргөдлийн байнгын хороо болон АБГББХ-гоор Нээлттэй хэлэлцүүлэг явуулах боломжгүй болсон юм. Тиймээс Нээлттэй сонсгол хийх санаачилгад нэгдсэн гишүүд өргөдөл гаргасан иргэдийн төлөөллийг байлцуулан маргааш хэлэлцүүлэг зохион байгуулах болсон байна. Хэлэлцүүлгийг хэрхэн зохион байгуулах талаар Ж.Батзандан нарын УИХ-ын гишүүд өнөөдөр дэлгэрэнгүй мэдээлэл хийх юм.

Үндэсний аудитын газраас “Эрчим хүчний үнэ тарифын зохицуулалт, үр дүн”-д хийсэн гүйцэтгэлийн аудитаар тус салбарт хэрэгжүүлсэн дөрвөн төсөлд 15.5 тэрбум төгрөгийн зөрчил илэрснийг Авлигатай тэмцэх газарт шилжүүлжээ.

Дөрвөн төслийн гурвыг нь “ Анненг повер стэшн экүюипмент групп лимитед” компани гүйцэтгэжээ. Аудитаар илэрсэн зөрчилтэй холбоотой албан тушаалтнуудыг нэрлэвэл, ажлаас чөлөөлөх тушаал гарсны дараа 216.2 сая төгрөгийг дур мэдэн зарцуулсан, Даланзадгад ДЦС-ын турбин шинэчлэх тэрбум төгрөгийн хөрөнгө оруулалтыг үр ашиггүй болгосон Эрчим хүчний сайд асан Д.Зоригт, Эрчим хүчний зохицуулах хорооны дарга асан С.Отгонбаяр. ДЦС-IV ТӨХК болон ЦДҮС ТӨХК-ийн гүйцэтгэх захирлаар ажиллаж байсан Б.Цэвээн, Ж.Равдандорж нар холбогдож байна.