Month: December 2017

Тусгай дуут болон гэрэл дохио нь зөвшөөрөгдсөн өнгөнөөс хамааран ЗХДүрмийн зарим зүйл заалтыг мөрдөхгүй байх, хөдөлгөөнд оролцогч бусад жолооч нараас давуу эрхүүдийг олгодог. Харин сүүлийн үед замын хөдөлгөөний ачаалал эрс нэмэгдэж зарим иргэд, албан тушаалтнууд тусгай дуут болон гэрэл дохиог хэрэглэх болсон нь дэг журамд сөргөөр нөлөөлж эхэлсэн. Иймээс хэт замбараагүй болоод байгаа хэрэглээнд хязгаар тавьж журам тогтоох чиглэлээр Засгийн газраас үүрэг чиглэл өгсний дагуу зохион байгуулалтын арга хэмжээг Замын Цагдаагийн албанаас хэрэгжүүлж эхэлжээ. Ажлын хүрээнд 2016 онд батлагдсан “Тээврийн хэрэгсэлд тусгай дуут болон гэрэл дохио тавьж хэрэглэх” журмыг XII сарын 11-нд шинэчлэн баталсан байна.

ШИНЭЧЛЭГДСЭН ЖУРМЫН ГОЛ ӨӨРЧЛӨЛТ

УЛААН ӨНГИЙН ТУСГАЙ ДУУТ БОЛОН ГЭРЛЭН ДОХИО

НОГООН ӨНГИЙН ТУСГАЙ ДУУТ БОЛОН ГЭРЛЭН ДОХИО

ШАР ӨНГИЙН ТУСГАЙ ДУУТ БОЛОН ГЭРЛЭН ДОХИО

MNS4979:2016 СТАНДАРТ

.

Шинэчлэлийн Засгийн газрын үед хийсэн томоохон ажлуудын нэг нь яах аргагүй ТҮЦ машин. Иргэдэд төрийн үйлчилгээг ойртуулах чирэгдлийг багасгахад ТҮЦ машин үүргээ гүйцэтгэсэн хэмээн албаныхан хэлдэг. Өмнө нь заавал хороо руугаа явж, элдэв янзын тодорхойлолт авдаг байсан иргэд одоо хотын төвийн хаана ч буй ТҮЦ машин дээр очиход л хангалттай болсон.

Мөн заавал иргэний бүртгэл орж, гэрлэсэн, гэрлээгүй тодорхойлолт, эсвэл үл хөдлөх хөрөнгийн гэрчилгээ авдаг байсан нь мөн л ТҮЦ машинд “шингэсэн”. Ингэснээр нэг талдаа иргэдийн зардал чирэгдлийг, нөгөө талдаа төрийн ажил үйлчилгээг ч хөнгөвчилж чадсан билээ. 2018 он гарахаар ТҮЦ машинаас их дээд сургуулийн дипломын лавлагааг авдаг болох юм байна. Төрийн сангийн зээлээр сурсан оюутнууд заавал төгссөн сургууль дээрээ очиж дипломынхоо хуулбарыг авах шаардлагагүй. Мөн хуурамч диплом зах зээлээс шахагдан гарах боломж бүрдэх аж.

Хууль зүй, дотоод хэргийн сайдын нэрэмжит, цагдаагийн байгууллагын шилдэг хэсгийн төлөөлөгч шалгаруулах “Шилдэг хэсгийн төлөөлөгч” улсын анхдугаар уралдаанд Дорнод аймаг дахь Цагдаагийн газрын Баяндун сум дахь хэсгийн төлөөлөгч, цагдаагийн дэслэгч Б.Бат-Отгон тэргүүн байр эзэлж, “УАЗ-469” маркийн автомашинаар шагнууллаа. Тэргүүн байрт шалгарсан хэсгийн төлөөлөгчийн шагналыг Улсын Их Хурал, Засгийн газрын гишүүн, Хууль зүй, дотоод хэргийн сайд Ц.Нямдорж гардуулсан юм.

Уралдааны дэд байрт Өмнөговь аймаг дахь Цагдаагийн газрын Цогтцэций сум дахь Сум дундын цагдаагийн хэлтсийн хэсгийн төлөөлөгч, цагдаагийн ахлах дэслэгч Г.Дөлгөөн, гутгаар байрт Говь-Алтай аймаг дахь Цагдаагийн газрын Халиун сум дахь хэсгийн төлөөлөгч, цагдаагийн ахмад Т.Пүрэвбаяр нар шалгарч мотоцикл, иж бүрэн компьютерийг гардлаа.

Энэхүү уралдаанд нутаг дэвсгэр хариуцсан цагдаагийн газар, хэлтсээс нэг, хоёрдугаар шатны шалгуурыг амжилттай давж шалгарсан 14 аймгийн 14 хэсгийн төлөөлөгч оролцож эсээ бичих, гадаад хэл, хууль, эрх зүйн мэдлэг, цагдаагийн байгууллагын мэдээллийн цахим сан болон компьютерийн хэрэглээний програм хангамж ашиглах чадвар, логик сэтгэлээ IQ чадвараараа өрсөлдсөн. Мөн бие бялдрын бэлтгэлийг болон тээврийн хэрэгсэл жолоодох, мал зүслэх, шүдлэх, им тамга нэрлэх зэрэг хэсгийн төлөөлөгчийн мэдлэг, ур чадвар, авхаалж самбаа, тэсвэр хатуужил шалгасан төрлүүдээр өрсөлдүүлэн шилдэг хэсгийн төлөөлөгчийг тодрууллаа.

“Шилдэг хэсгийн төлөөлөгч” улсын анхдугаар уралдааны шагнал гардуулах ёслолын ажиллагаанд ХЗДХЯ-ны Бодлогын хэрэгжилтийг зохицуулах газрын дарга Э.Энхтуяа, Цагдаагийн ерөнхий газрын дарга, Дотоодын цэргийн командлагч, цагдаагийн хурандаа С.Баатаржав, Тэргүүн дэд дарга, цагдаагийн хурандаа Р.Отгонжаргал, Дэд бөгөөд Нийслэлийн цагдаагийн газрын дарга, цагдаагийн хурандаа Д.Ядамдорж, Эрүүгийн цагдаагийн албаны дарга, цагдаагийн хурандаа Д.Энхбаяр болон бусад албаны хүмүүс оролцов.

Цагдаагийн байгууллагын шилдэг хэсгийн төлөөлөгчийг шалгаруулах, тэдний мэдлэг, ур чадвар, ажлын үр дүнг дээшлүүлэх, албандаа хандах эерэг хандлагыг нэмэгдүүлж, гэмт хэрэг зөрчлийг илрүүлэх арга тактикийг сайжруулах зорилгоор зохион байгуулж буй энэхүү уралдаан цаашид уламжлал болон жил бүр зохион байгуулагдахыг уралдааны шүүгчид онцолж байсан юм.

Элэг шилжүүлэн суулгах, ясны чөмөг шилжүүлэн суулгах, үүдэл эсийн банк байгуулах технологи зэрэг долоон чиглэлээр 43 эмч, эмнэлгийн мэргэжилтнийг 14 хоногоос 6 сарын хугацаатай сургалтад хамруулахаар болжээ.

Эдгээр эмч нарыг өнөөдөр Эрүүл мэндийн сайд Д.Сарангэрэл хүлээн авч уулзав. Тэрбээр энэ үеэр цаашид эмч, мэргэжилтнүүдийн мэдлэг боловсролд анхаарна гэдгээ онцолсон юм.

Эрүүл мэндийн сайдын тушаалаар Улсын нэг болон Гуравдугаар төв эмнэлэг, ГССҮТ, ЗӨСҮТ-ийн 43 эмч БНСУ, Япон улсын томоохон эмнэлгүүдэд суралцахаар энэ сард тус улсыг зорино.

Эмнэлгийн мэргэжилтэн, эмч нар Элэг шилжүүлэн суулгах, Ясны чөмөг шилжүүлэн суулгах, үүдэл эсийн банк байгуулах технологи, Хавсарсан хүнд гэмтлийн үеийн мэс засал, Иммуногистохимийн эмгэг судлалын шинжилгээ, Халдварт өвчний үүсгэгчийн генийн дараалал тогтоох арга зүй, Мөч хадгалах боломжтой үеийн хавдрын нөхөн сэргээх эмчилгээ, Электрофизиологийн оношилгоо, эмчилгээ зэрэг чиглэлээр БНСУ-ын Самсунг, Хана, Католикийн их сургуулийн Гэгээн мария, Чосуны эмнэлэг, Хавдар судлалын үндэсний төв, Япон улсын Гүнма их сургуульд суралцах юм.

Шүүхийн шийдвэр гүйцэтгэх байгууллагын нийслэл, орон нутгийн хорихоос өөр төрлийн ял эдлүүлэх ажиллагаа хариуцсан шийдвэр гүйцэтгэгчдийг хамруулсан нэгдсэн сургалтыг 2017 оны 12 дугаар сарын 14,15-ны өдрүүдэд зохион байгуулж байна.

Сургалтад нийт 44 алба хаагч хамрагдаж байгаа бөгөөд “Хорихоос өөр төрлийн ялын хэрэгжилт”, шинэчлэн батлагдсан “Эрүүгийн хуулийн ялын бодлого”, “Шүүхийн шийдвэр гүйцэтгэх тухай хууль”, “Зөрчлийн тухай хууль”, “Зөрчил шалган шийдвэрлэх тухай хууль”-ийн холбоглох заалтууд, “Албадлагын арга хэмжээ авагдсан шүүхийн шийдвэрийг гүйцэтгэх ажиллагаа”, “Зорчих эрхийг хязгаарлах ял”-ын талаарх ойлголт, төслийн үйл явц, “Цахим программ ашиглалт”, “Тэнсэн, ял хойшлуулсан, хугацааны өмнө суллаж хяналт тогтоосон этгээдүүдэд тавих хяналт” зэрэг сэдвүүдийн хүрээнд Улсын ерөнхий прокурорын газар, Цагдаагийн ерөнхий газар, Хууль сахиулахын их сургуулийн Шүүхийн шийдвэр гүйцэтгэлийн сургуулийн холбогдох албан тушаалтнууд хичээл сургалтыг заан явуулж байна.

УИХ-ын чуулган хаалттай хуралдаж Тагнуулын ерөнхий газрын дарга асан Б.Хурцыг БНСУ-д Элчин сайдаар томилохыг дэмжсэн билээ. Үргэлжлүүлэн чуулганы нэгдсэн хуралдаан нээлттэйгээр үргэлжилж, Малын генетикийн нөөцийн хуулийг хэлэлцлээ. Уг хуулийн төслийн эцсийн хэлэлцүүлгийг хэлэлцэж, гишүүдийн олонхын саналаар дэмжлээ. Уг хуулийн төсөлд мал үржлийн үүлдэр угсаа, үржил шимийг сайжруулах бөгөөд сайн чанарын хээлтүүлэгч малыг улсаас гаргадаг байх, Түүнчлэн сум болгонд малзүйч ажилладаг байхаар заажээ.