Month: December 2017

ОУВС-гийн Өргөтгөсөн санхүүжилтийн хөтөлбөр”-т хамарснаар манай улс хэд хэдэн төрлийн татварын хувь хэмжээг нэмээд байна. Тухайлбал Засгийн газар өнгөрсөн сард Сүхбаатар, Замын-Үүд, Алтанбулаг, Эрээнцавын боомтуудаар импортлох 90 хүртэл октантай автобензины онцгой албан татварыг тонн тутамд 30 мянган төгрөгөөр, 90 ба түүнээс дээш октантай автобензины онцгой албан татварыг тонн тутамд 50 мянган төгрөгөөр, дизель түлшийн онцгой албан татварыг тонн тутамд 100 мянган төгрөгөөр тус тус нэмэгдүүлэн тогтоохоор шийдвэрлэж, 11 дүгээр сарын 30-ны өдрөөс мөрдөж эхэлсэн. Тэгвэл ирэх оны 1 дүгээр сарын 1-нээс дараах төрлийн татваруудын хувь хэмжээг нэмэгдүүлэх бөгөөд иргэд орлогоосоо хамаарч 10-25 хувийн татвар төлнө. 1.5 сая хүртэл орлоготой иргэд 10 хувь,1.5 саяас дээш орлоготой бол 15 хувь, 2.5 саяас дээш орлоготой бол 20 хувь, 3.5 саяас дээш орлоготой бол 25 хувийн татвар төлөх юм байна. Мөн нийгмийн даатгалын шимтгэлийг ирэх 1 дүгээр сарын 1-нээс нэг хувиар нэмэгдүүлнэ. Ингэснээр 11 хувийн татвар төлдөг болно. Улмаар ирэх сард тамхи, согтууруулах ундааны онцгой албан татварыг 10 хувиар нэмэгдүүлэх бол газар эзэмших тусгай зөвшөөрлөө бусдад худалдах, шилжүүлэхэд шинэ төрлийн татвар авч эхлэх аж.

Нийслэлийн эрүүл мэндийн газраас гаргасан албан үүргийн дагуу томуу, томуу төст өвчний талаархи зөвлөгөө, мэдээллийг дүүргийн эрүүл мэндийн төвүүд утсаар дамжуулан иргэдэд хүргэж байна. Амьсгалын замын цочмог халдвараас урьдчилан сэргийлэх зөвлөмж, эмнэлгийн тусламж, үйлчилгээний талаар нийслэлийн эрүүл мэндийн төвүүдээс зөвлөгөө авах утасны жагсаалтыг гаргажээ.

Монголын барилгачдын нэгдсэн холбоо, “Монгол даатгал”, “Work line with us” компани хамтран “Гэр хорооллын дахин төлөвлөлтийн төсөл”-ийг хэрэгжүүлэх хөрөнгө оруулалт татахад давхар даатгалын тогтолцоог нэвтрүүлэхэд хамтран ажиллахаар боллоо. “Work line with us” компани нь гэр хорооллын дахин төлөвлөлтийн төсөлд хөрөнгө оруулахын тулд “Монгол даатгал”-аар дамжуулан, Германы “Hannover Re” компанид таван төрлийн давхар даатгал хийлгэж эрсдлээ хаахаар болжээ. Тодруулбал, гүйцэтгэлийн баталгаа, бизнес тасалдал, удирдах ажилтны хариуцлага, барьцаа хөрөнгийн даатгал хийлгэх аж. Өмнөд Солонгосын хөрөнгө оруулалттай “Work line with us” компани өнгөрсөн онд хөрөнгө оруулалтын гэрээ байгуулсан “Нарлаг Буянт-Ухаа” төслийг бодит байдалд нийцүүлэн дахин төлөвлөж, хөрөнгө оруулахаар ажиллаж эхэлсэн байна. Улмаар “Баганат өргөө” компанийн 560 орчим айлын орон сууцны барилгад хөрөнгө оруулах гэрээ байгуулжээ. Тус компани нь барилгын салбарт оруулж буй гадаадын санхүүжилтийг даатгаж буй анхны тохиолдол аж.

Өнөөдрийн 12.00 цагийн мэдээгээр Баянхошуу орчимд агаарын чанарын индекс 885 буюу хамгийн их бохирдолтой байна. Харин толгойт орчимд 717, Баруун дөрвөн замд 576, Амгаланд 503-ыг зааж байна. ДЭМБ-аас гаргасан стандартаар агаарын бохирдол 500-гаас дээш бол хүний эрүүл мэндэд онц ноцтой хохирол учруулна гэж үздэг. Гэтэл нийслэлийн агаарын бохирдлын мэдээгээр дөрвөн цэгт бохирдол 500-гийн хязгаарыг давсан байна.

Нийслэлийн мэргэжлийн хяналтын газраас шинэ жил болох гэж буйтай холбогдуулан хүнсний бүтээгдэхүүний хадгалах хугацаа болон аюулгүй байдлыг сайтар шалгаж авахыг иргэдэд анхаарууллаа. Учир нь тус газраас есөн дүүрэгт явуулсан хяналт шинжилгээгээр 422 зөрчил илрүүлсний дийлэнхийг хадгалах хугацаа дууссан бүтээгдэхүүн эзэлжээ. Тодруулбал “Нарантуул”, Орхон худалдааны төв, Хороолол хүнсний зах, Таван эрдэнэ зэрэг хүнсний захуудад худалдаалж байсан тоглоомтой чихэр, өндгөн шоколад, бохь, иштэй чихэр, кремтэй кекс зэрэг бүтээгдэхүүнд хаяг шошгын зөрчилтэй бүтээгдэхүүнүүд ихээр илэрчээ. Шалгалтад 432 иргэн, аж ахуйн нэгж хамрагдсанаас 276 зөрчлийг газар дээр нь арилгуулсан байна.Мөн зөрчилтэй гурван аж ахуйн нэгжид 1.7 сая төгрөгийн торгууль ногдуулжээ. Дашрамд дурдахад НМХГ-ын төв лабораторид энэ онд шинжлэгдсэн хиам, хиаман бүтээгдэхүүний 6.6 хувь, архи, согтууруулах ундааны 17 орчим хувь нь эрүүл ахуйн шаардлага хангаагүй бүтээгдэхүүн байжээ.

Ханиад томууны дэгдэлт их байгаа учир эмнэлгүүдийн хүүхдийн тасаг уртасгасан цагаар ажиллаж эхэллээ. Мөн амралтын өдрүүдэд өрхийн эмнэлэг ажиллаж байна. Нийслэлийн эрүүл мэндийн газраас гаргасан албан үүргийн дагуу томуу, томуу төст өвчний талаар зөвлөгөө, мэдээллийг дүүргийн эрүүл мэндийн төвүүд утсаар иргэдэд хүргэж буйг НЭМГ-аас мэдээллээ. Нийслэлийн хэмжээнд энэ сарын 14-ний байдлаар, амбулаторийн 76.672 үзлэг хийснээс томуу, томуу төст өвчтэй 4124 тохиолдлыг оношилжээ. Энэ нь нийт үзлэгийн 5.4 хувийг эзэлсэн нь өнгөрсөн долоо хоногийн дунджаас 1.1 хувиар их, өнгөрсөн оны мөн үеэс 1.8 хувиар багаүзүүлэлттэй гарсан байна. Нийт өвчлөгсдийн 33.5 хувийг 0-2 нас, 26.6 хувийг 2-4 насны хүүхдүүд эзэлж буй аж. Томуу, томуу төст өвчлөлийн хувьд Чингэлтэй дүүрэгт 5.9 хувь, Хан-Уул дүүрэгт 5.8 хувийг тус, тус эзэлж байгаа нь хамгийн өндөр үзүүлэлт юм гэдгийг албаныхан хэллээ.